1. Ki sakrifisius txeu irmon ku irmans sta ta faze i pamodi?

MILHONS di sérvu di Jeová oji sta ta faze sakrifisius. Txeu irmon ku irmans disidi fika solteru. Txeu kazal disidi ka ten fidju gósi. Alguns família sta ta leba un vida sinplis. Tudu es toma kes disizon li pamodi un motivu inportanti: es krê faze ses midjór na sirvisu di Jeová. Es sta kontenti ku kel ki es ten i es ta kunfia ma Jeová ta da-s tudu kel ki es meste. Es pode ben rapende dipôs? Klaru ki nau! Pamodi ki nu pode ten kel sertéza li? Un di kes motivu é pamodi Jeová daba se sérvus na pasadu tudu kel ki es mesteba. Pur izénplu, el abênsua Abraon ki é ‘pai di tudu kes ki ten fé’. — Rom. 4:11.

2. (a) Sima sta na Hebreus 11:8-10, 16, pamodi ki Abraon staba dispostu na sai di Ur? (b) Kuzê ki nu sta ben odja na kel studu li?

² Abraon tinha un vida sábi na sidadi di Ur. Má, el staba dispostu na dexa tudu kuza pa tras. Pamodi? Pamodi el staba ta spéra pa ‘kel sidadi ki ten lisérsi di verdadi’. (Lé Hebreus 11:8-10, 16.) Kuzê ki éra kel ‘sidadi’? Ki prublémas Abraon pasa pa el timenti el staba ta spéra pa fazedu kel sidadi? I modi ki nu pode imita izénplu di Abraon i di kes otu sérvu di Jeová di nos ténpu ki sigi se izénplu?

3. Kuzê ki é kel sidadi ki Abraon staba ta spéra?

³ Kel sidadi ki Abraon staba ta spéra é Reinu di Deus. Jeová skodje Jizus Kristu i kes 144 mil kriston skodjedu ku spritu santu pa faze párti di kel Reinu. Apóstlu Polu  txoma Reinu di ‘sidadi di kel Deus bibu, ki é Jiruzalen di Séu’. (Heb. 12:22; Apo. 5:8-10; 14:1) Jizus inxina se disiplus pa faze orason pa kel mésmu Reinu i pa pidi pa el ben faze vontadi di Deus na Téra sima sta fazedu na Séu. — Mat. 6:10.

4. Sima sta na Génesis 17:1, 2, 6, kuzê ki Abraon sabeba sobri kel sidadi, ô Reinu, ki Deus prometeba el?

⁴ Má, Abraon sabeba modi ki Reinu ta ben sérba organizadu? Nau. Duránti txeu ténpu, kes informason li éra un ‘segredu sagradu’. (Efé. 1:8-10; Col. 1:26, 27) Má, Abraon sabeba ma alguns di se disendentis ta ben sérba rei. Jeová dja fazeba el kel promésa li. (Lé Génesis 17:1, 2, 6.) Abraon tinha un fé fórti na promésas di Deus ki éra sima si el ta odjaba kel Algen ki ta ben sérba Rei di Reinu di Deus, ô Misías. É pur isu ki Jizus flaba kes judeu di se ténpu: ‘Nhos pai Abraon, fika txeu kontenti pamodi speransa di odja nha dia, i el odja-l i el fika kontenti.’ (João 8:56 ) Kel-li ta mostra klaru ma Abraon sabeba ma alguns di se disendentis ta ben fazeba párti di un Reinu, ki ta tinha apoiu di Jeová. I el staba dispostu na spéra pa Jeová kunpriba kel promésa li.

5. Modi ki nu sabe ma Abraon staba ta spéra pa kel sidadi ki Deus faze?

⁵ Modi ki Abraon mostra ma el staba ta spéra pa kel sidadi, ô Reinu, ki Deus faze? Primeru, Abraon ka faze párti di ninhun govérnu li na Téra. El ta staba sénpri ta muda di un lugar pa kel otu i nunka el ka apoia ninhun govérnu di ómi. Tanbê, Abraon ka tenta kria se própi govérnu. Má, el kontinua ta obi ku Jeová i ta spéra pa El kunpriba Se promésa. Di kel manera li, Abraon mostra ma el tinha txeu fé na Jeová. Nu ben odja alguns prubléma ki el pasa i kuzê ki nu pode prende ku se izénplu.

6. Modi ki éra sidadi di Ur?

⁶ Abraon ta viveba na un sidadi suguru, sábi i pesoas di la éra riku i es tinha bon skóla. Es éra bon na lé, na skrebe i  na faze kónta. Sidadi di Ur tinha paredis altu pa protejeba el, el tinha rius fundu ki ta serkaba el pa três ladu. Ta parse ma kel sidadi éra un séntru di nogósiu, pamodi atxadu la alguns dukumentu sobri asuntus di nogósiu. Na kel sidadi tinha kazas ki fazedu di tijolu; ku paredis rabokadu i pintadu ku kal. Alguns di kes kaza tinha 13 ô 14 kuartu i na ses meiu tinha un kintal ku txon di pédra.

7. Pamodi ki Abraon tinha ki kunfiaba ma Jeová ta protejeba el ku se família?

⁷ Pa el saíba di un sidadi suguru i sábi, Abraon tinha ki kunfiaba ma Jeová ta protejeba el ku se família. Pamodi? Pamodi el ku Sara staba ta ba mora na ténda, na kanpu, na téra di Kanan. Es ka staba protejedu más pa kes paredi di tijolu, paredis altu di sidadi i riu. Envês di kel-li, éra fásil pa inimigus atakaba es.

8. Un bês, kuzê ki kontise ku Abraon?

⁸ Abraon ta fazeba vontadi di Deus, má simé el pasa pa prublémas. Un bês, un grandi fómi toma kónta di kel lugar ki Jeová mandaba el pa el ba mora. Abraon fika sen kumida pa el da se família. Pur isu, el disidi muda pa Ijitu pa algun ténpu. Má, timenti el staba la, Faraó, ki ta mandaba na kel país, toma-l se mudjer. Imajina modi ki Abraon fika preokupadu dimás ta spéra ti ki Jeová poi Faraó ta da-l se mudjer. — Gén. 12:10-19.

9. Ki prublémas di família Abraon tevi ki lida ku el?

⁹ Família di Abraon pasa pa un grandi prubléma. Sara, se mudjer ki el kreba txeu, ka ta tinha fidju. Duránti txeu anu, es tevi ki aguenta kel tristéza li. Pur isu, Sara da Abraon se sérva Agar, pa el ten fidju ku el. Asi, el ku Abraon ta tinha fidju através di se sérva. Má kantu Agar fika grávida di Ismael, el kumesa ta dispreza Sara. Situason fika difísil dimás pa Sara, ki el pô-l fóra di kaza. — Gén. 16:1-6.

10. Kuzê ki kontise ku Ismael i Izaki ki poi na próva kunfiansa ki Abraon tinha na Jeová?

¹⁰ Ti ki enfin, Sara fika grávida i el tevi un fidju ku Abraon ki txomaba Izaki. Abraon gostaba txeu di se dôs fidju, Ismael ku Izaki. Má, Abraon tevi ki tra Ismael ku Agar di se kaza, pamodi Ismael staba ta maltrata Izaki. (Gén. 21:9-14) Txeu anu dipôs, Jeová pidi Abraon pa sakrifika Izaki. (Gén. 22:1, 2; Heb. 11:17-19) Na kes dôs situason li, Abraon tinha ki kunfiaba ma Jeová ta kunpriba se promésa ki el fazeba sobri se dôs fidju.

11. Pamodi ki Abraon tevi ki spéra ku paxénxa na Jeová?

¹¹ Duránti se vida, Abraon tevi ki spéra ku paxénxa na Jeová. Talvês dja el tinha más di 70 anu kantu el ku se família sai di Ur. (Gén. 11:31–12:4) I duránti uns 100 anu, el vive na ténda i ta viaja pa téra di Kanan. Abraon móre ku 175 anu. (Gén. 25:7) Má, el ka odja Jeová ta kunpri Se promésa di da kel téra pa se disendentis. Tanbê, el ka vive pa odja kel sidadi, ô Reinu di Deus ta governa. Má simé, Bíblia ta fla ma Abraon móre ‘bédju i kontenti’. (Gén. 25:8) Sikrê ku tudu prubléma ki el pasa pa el, Abraon kontinua ku un fé fórti i el spéra na Jeová ku alegria. Pamodi ki Abraon konsigi aguenta firmi? Pamodi duránti tudu se vida, Jeová proteje-l i trata-l sima un amigu. — Gén. 15:1; Isa. 41:8; Tia. 2:22, 23.

12. Kuzê ki nu sta ta spéra, i kuzê ki nu sta ben odja?

 ¹² Sima Abraon, nu sta ta spéra pa kel sidadi ki ten lisérsi di verdadi. Má, nu ka sta ta spéra pa el fazedu. Reinu di Deus kumesa ta governa na anu 1914 i dja el sta ta kontrola Séu interu. (Apo. 12:7-10) Má, nu sta ta spéra pa kel Reinu li ben governa Téra interu. Timenti kel-li inda ka kontise, talvês nu ten ki aguenta txeu prubléma difísil sima kes ki Abraon ku Sara pasa pa el. Má, sérvus di Jeová oji konsigi imita izénplu di Abraon? Kes stória di vida ki sta na Sentinéla, ta prova ma txeu irmon oji tanbê mostra kel mésmu fé i paxénxa sima Abraon ku Sara. Nu ben odja alguns di kes stória i kuzê ki nu pode prende ku es.

13. Kuzê ki bu ta prende ku stória di vida di irmon Bill ?

¹³ Sta dispostu na faze sakrifisius. Si nu krê pa sidadi di Deus, ô Reinu, sta na primeru lugar na nos vida, nu meste sta dispostu na faze sakrifisius pa agrada Deus, sima Abraon faze. (Mat. 6:33; Mar. 10:28-30) Odja izénplu di un irmon ki txoma Bill Walden. * Na anu 1942, Bill staba kuazi ta finda kursu di enjinheru, na un universidadi di Mérka, kantu el kumesa ta studa ku Tistimunhas di Jeová. Se profesor kreba pa el setaba un trabadju dipôs di kursu, má Bill ka seta. El splika se profesor ma el krê tinha más ténpu pa el sirbiba Deus, di ki ten un bon trabadju. Poku ténpu dipôs, Bill txomadu pa trópa. Ku ruspetu, el nega bai. Pur isu, el dadu un multa di 10 mil dóla i sinku anu di kadia. Má dipôs di três anu, el libertadu. Más tardi, el konvidadu pa Skóla di Jiliádi i el sirbi di misionáriu na Áfrika. Ku ténpu, el kaza ku Eva, i es tevi ki faze sakrifisius pa sirbi djuntu na Áfrika. Dipôs di alguns anu, es volta pa Mérka pa ba kuida di mai di  Bill. El fla sobri stória di se vida: “Agu ta intxi-m na odju óras ki N ta pensa na kel priviléjiu grandi ki N tevi di sirbi Jeová pa más di 70 anu. N ta agradese-l tudu óra pamodi el djuda-m uza nha vida pa sirbi-l.” Bu sta dispostu na uza bu vida pa sirbi Jeová pa ténpu interu?

14-15. Kuzê ki bu ta prende ku stória di vida di kazal Apostolidis?

¹⁴ Ka bu spéra ma bu ka ta ten prubléma na vida. Nu prende ku izénplu di Abraon ma ti kes ki ta uza tudu ses vida pa sirbi Jeová ta ten prubléma. (Tia. 1:2; 1 Ped. 5:9) Odja modi ki kel-li kontise ku Aristotelis Apostolidis. * El batiza na anu 1946 na Grésia i na anu 1952 el fika noivu di irman Eleni, ki tinha mésmu obijetivu ki el. Má, Eleni fika txeu duenti i el atxadu ku un tumor na kabésa. El tradu kel tumor, má alguns anu dipôs di ses kazamentu, kel tumor torna ben. Dotoris opera Eleni, má un párti di se korpu fika paralizadu i el fika ku prubléma na pâpia. Má, el kontinua zeloza sikrê ku duénsa i ku pirsigison di govérnu na kel ténpu.

¹⁵ Irmon Aristotelis pasa 30 anu ta kuida di se mudjer. Duránti kel ténpu, el éra ansion, el trabadja na kumison di asenbleia i el djuda faze un Salon di asenbleia. Dipôs, na anu 1987, timenti Eleni staba na pregason un pórta di féru pizadu da na el i prujudika-l txeu. El fika três anu na kóma, dipôs el móre. Aristotelis fla sobri se stória di vida: “Duránti txeu anu, N pasa pa txeu prubléma i alguns di es N ka sta speraba. Pur isu, N tevi ki aguenta firmi i ka dexa nada dizanima-m. Má, Jeová sénpri da-m kel forsa ki N staba ta meste pa N aguenta kes prubléma.” (Sal. 94:18, 19) Jeová ta ama kes algen ki ta faze ses midjór pa sirbi-l sikrê ku prublémas!

16. Ki bon konsedju irmon Knorr da se mudjer?

¹⁶ Konsentra na futuru. Abraon ta konsentraba na kes benson ki Jeová ta ben  daba el, i kel-li djuda-l lida ku prublémas. É kel-li ki irman Audrey Hyde tenta faze. Se primeru maridu, Nathan Knorr, móre di kánser i se sugundu maridu, Glenn Hyde, panha un duénsa gravi. * Má simé, el kontinua ta pensa na se speransa pa futuru. El fla ma kuzê ki djuda-l é un kuza ki irmon Knorr fla-l alguns simana antis di el móre. El fla: “Nathan lenbra-m: ‘Dipôs ki nu móre, nos speransa é sértu i nunka más nu ka ta sufri.’ Pur isu, el insentiva-m: ‘Odja pa frenti, pa bu rekonpénsa.’ . . . Tanbê el fla: ‘Sta sénpri okupadu, uza bu vida pa faze algun kuza pa otus. Kel-li ta djuda-u ten alegria na vida.’” Kel-li é un bon konsedju, pamodi el ta djuda-nu sta sénpri okupadu na faze kuzas dretu pa otus i di ‘alegra na speransa’! — Rom. 12:12.

17. (a) Pamodi ki nu ten bon motivu pa konsentra na futuru? (b) Modi ki konsedju ki sta na Miqueias 7:7, ta djuda-nu ten bensons na futuru?

¹⁷ Oji nu ten mutu más razon inda pa nu konsentra na futuru. Kes kuza ki sta kontise na mundu, ta mostra klaru ma nu sta na fin di ténpu di fin di kel mundu li. Ka ta dura, nu ka meste spéra más pa kel sidadi ku lisérsi di verdadi ben governa Téra interu. Di tudu kes benson ki nu ta ben ten, nu ta ben xinti alegria di odja kes algen ki nu ta ama ta vive otu bês. Na kel ténpu la, Jeová ta ben rekonpensa Abraon pa se fé i se paxénxa, óras ki el ben da-l vida otu bês na Téra djuntu ku se família. Bu ta ba sta la pa resebe-s? Bu pode sta la, si bu sta dispostu na faze sakrifisius pa Reinu di Deus, si bu kontinua ta ten fé sikrê ku prublémas i si bu prende spéra ku paxénxa na Jeová, sima Abraon. — Lé Miqueias 7:7.