1. Us sakrifays dɛn we bɔku pipul dɛn dɔn mek? Wetin mek dɛn du dat?

TIDE, bɔku pan Gɔd in pipul dɛn dɔn sakrifays bɔku tin dɛn fɔ sav Gɔd. Bɔku brɔda ɛn sista dɛn dɔn disayd nɔ fɔ mared. Sɔm pan di wan dɛn we mared dɔn disayd nɔ fɔ bɔn pikin naw. Sɔm famili dɛn dɔn disayd fɔ liv simpul layf. Dɛn ɔl dɔn disayd fɔ du dɛn tin dɛn ya fɔ wan impɔtant rizin, dat na fɔ du mɔ fɔ sav Jiova. Dɛn satisfay ɛn abop pan Jiova fɔ gi dɛn di tin dɛn we dɛn rili nid. Yu tink se Jiova go disapɔynt dɛn? Nɔ, i nɔ go du dat! Wetin mek wi biliv dat? Wan rizin we mek wi biliv na bikɔs Jiova bin blɛs Ebraam bay we i tɛl am se “i go bi papa fɔ ɔl di wan dɛn we gɛt fet.”—Rom. 4:​11.

2. (a) Frɔm wetin de na Ibruz 11:​8-10, 16, wetin mek Ebraam bin gri fɔ lɛf Ɔ? (b) Wetin wi go tɔk bɔt insay dis atikul?

² Wetin mek Ebraam bin gri fɔ lɛf ɔl di fayn fayn tin dɛn we i bin de ɛnjɔy na di siti we nem Ɔ? Na bikɔs i bin de wet fɔ “di siti we gɛt rial fawndeshɔn dɛn.” (Rid Ibruz 11:​8-10, 16.) Wetin na dis “siti”? Us prɔblɛm dɛn we Ebraam bin gɛt as i de wet fɔ mek dɛn bil di siti? Ɛn aw wi go falamakata Ebraam ɛn sɔm brɔda ɛn sista dɛn insay wi yon tɛm? Wi go ansa dɛn kwɛstyɔn dɛn ya insay dis atikul.

3. Wetin na “di siti” we Ebraam bin de wet fɔ?

³ Di siti we Ebraam bin de wet fɔ na Gɔd in Kiŋdɔm. Ɛn di wan dɛn we de pat pan da Kiŋdɔm de na Jizɔs Krays ɛn di 144,000 anɔyntɛd Kristian dɛn. Pɔl bin se di Kiŋdɔm na “Gɔd we de alayv in siti, dat na  Jerusɛlɛm we de na ɛvin.” (Ibru. 12:​22; Rɛv. 5:​8-10; 14:​1) Jizɔs bin tich in disaypul dɛn fɔ pre mek dis sem Kiŋdɔm kam so dat wetin Gɔd want go bi na di wɔl lɛk aw i de bi na ɛvin.—Mat. 6:​10.

4. Frɔm wetin de na Jɛnɛsis 17:​1, 2, 6, wetin Ebraam bin no bɔt di siti ɔ Kiŋdɔm we Gɔd prɔmis?

⁴ Yu tink se Ebraam bin no aw Gɔd in Kiŋdɔm go ɔganayz? Nɔ, i nɔ bin no. Dat na bin “oli sikrit” fɔ lɔng tɛm. (Ɛfi. 1:​8-10; Kol. 1:​26, 27) Bɔt Ebraam bin no se sɔm pan in pikin dɛn go bi kiŋ dɛn. Jiova insɛf sɛf bin dɔn prɔmis am se na dat go apin. (Rid Jɛnɛsis 17:​1, 2, 6.) Ebraam bin rili biliv tranga wan se Gɔd in prɔmis dɛn go kam tru, ɛn i bin tan lɛk i de si di Mɛsaya we go bi di Kiŋ na Gɔd in Kiŋdɔm. Na dat mek Jizɔs bin tɛl di Ju pipul dɛn we bin de insay in tɛm fɔ se: “Ebraam we na una papa bin de wet wit gladi-at fɔ si mi tɛm, ɛn i si am ɛn gladi.” (Jɔn 8:​56) Dis sho klia wan se Ebraam bin no se sɔm pan in pikin dɛn go de pat pan wan Kiŋdɔm we Jiova mek, ɛn i bin rɛdi fɔ wet fɔ mek wetin Jiova dɔn prɔmis, kam tru.

5. Aw wi no se Ebraam bin de wet fɔ “di siti” we Gɔd dizayn?

⁵ Aw Ebraam bin sho se i de wet fɔ di siti, ɔ Kiŋdɔm we Gɔd bin dizayn? Fɔs, Ebraam nɔ bin bi sitizin na ɛni kiŋdɔm na dis wɔl. I nɔ bin de wan patikyula say ɛn i nɔ ɛva sɔpɔt mɔtalman kiŋ. Pantap dat, Ebraam nɔ bin tray fɔ mek in yon kiŋdɔm fɔ insɛf. Bifo dat, i bin kɔntinyu fɔ obe Jiova ɛn wet fɔ mek I du wetin I dɔn prɔmis. We Ebraam bin du dat, i bin rili sho se i gɛt strɔng fet pan Jiova. Mek wi tɔk bɔt sɔm prɔblɛm dɛn we i bin gɛt ɛn wetin wi kin lan frɔm in ɛgzampul.

6. Aw Ɔ bin tan lɛk?

⁶ Di siti we Ebraam bin kɔmɔt bin sef, pipul dɛn bin de de we lan buk ɛn gɛt bɔku mɔni. Di siti bin gɛt ay wɔl dɛn ɛn wata rawnd am fɔ protɛkt am.  Di pipul dɛn we bin de na Ɔ bin sabi rayt ɛn dɛn bin sabi Matamatiks. Ɛn i go mɔs bi se na siti usay dɛn bin de du biznɛs bikɔs dɛn bin dɔn fɛn sɔm biznɛs dɔkyumɛnt dɛn de. Dɛn bil di os dɛn wit simɛnt-blɔk, plasta am, ɛn waytwɔsh am. Sɔm pan di os dɛn gɛt 13 ɔ 14 rum dɛn ɛn dɛn simɛnt di wan ol kɔmpawn.

7. Wetin mek Ebraam bin nid fɔ abop pan Jiova fɔ protɛkt in ɛn in famili?

⁷ Ebraam bin nid fɔ abop se Jiova go protɛkt in ɛn in famili. Wetin mek? Mɛmba se Ebraam ɛn Sera bin kɔmɔt na say usay dɛn bin de liv na os we sef na Ɔ. I bin lɛf dat fɔ go liv insay tɛnt na say we nɔ gɛt protɛkshɔn na Kenan. In ɛn in famili nɔ bin de na say we gɛt wɔl ɛn wata we go protɛkt dɛn. Bifo dat, dɛn bin de na say we i go izi fɔ mek dɛn ɛnimi dɛn atak dɛn.

8. Wetin nɔ bin izi fɔ Ebraam?

⁸ Ebraam bin du wetin Gɔd want, bɔt wan tɛm bin de we i nɔ bin gɛt bɛtɛ it fɔ in famili. I nɔ bin izi fɔ am bikɔs bɛtɛ it nɔ bin de na di land we Jiova bin tɛl am fɔ go. Tin bin so tranga dat Ebraam bin disayd fɔ go wit in famili na Ijipt fɔ sɔm tɛm. Bɔt we i bin de na Ijipt, Fɛro we na di kiŋ, bin tek Ebraam in wɛf. Ebraam go mɔs dɔn fil bad bɔt wetin apin sote Jiova bin mek Fɛro ritɔn Sera to Ebraam.—Jɛn. 12:​10-19.

9. Us prɔblɛm dɛn Ebraam bin gɛt na in famili?

⁹ Ebraam bin gɛt ɔda siriɔs prɔblɛm dɛn bak. In wɛf Sera we i lɛk, nɔ bin de bɔn pikin dɛn. Fɔ lɔng tɛm, dɛn at bin pwɛl bikɔs dɛn nɔ gɛt pikin dɛn. As tɛm de go, Sera bin gi in savant Egay, to Ebraam fɔ mek i bɔn pikin fɔ dɛn. Bɔt we Egay bin gɛt Ishmayl in bɛlɛ, i bin bigin mek prawd ɛn fityay Sera. Di prɔblɛm so siriɔs dat Sera bin drɛb Egay kɔmɔt na di os.—Jɛn. 16:​1-6.

10. Wetin bin apin to Ishmayl ɛn Ayzak we bin fɔ dɔn mek i at fɔ mek Ebraam abop pan Jiova?

¹⁰ Leta, Sera bin gɛt bɛlɛ ɛn bɔn pikin fɔ Ebraam, ɛn di nem we i gi di pikin na Ayzak. Ebraam bin lɛk ɔltu in pikin dɛn we na Ishmayl ɛn Ayzak. Bɔt bikɔs ɔf di bad we aw Ishmayl bin de trit Ayzak, Ebraam bin drɛb Ishmayl ɛn Egay kɔmɔt na di os. (Jɛn. 21:​9-14) Leta, Jiova bin tɛl Ebraam fɔ gi Ayzak as sakrifays. (Jɛn. 22:​1, 2; Ibru. 11:​17-19) We dɛn tu tin dɛn ya apin, Ebraam bin nid fɔ abop se Jiova go mek tin kɔmɔt fayn fɔ in tu bɔypikin dɛn.

11. Wetin mek Ebraam bin nid fɔ wet fɔ Jiova?

¹¹ Insay ɔl dɛn tɛm dɛn ya, Ebraam bin nid fɔ lan fɔ peshɛnt wet fɔ Jiova. I go mɔs bi se Ebraam bin dɔn pas 70 ia we in ɛn in famili bin kɔmɔt na Ɔ. (Jɛn. 11:​31–12:​4) Ɛn fɔ lɛk wan ɔndrɛd ia, i bin de liv na tɛnt ɛn travul go difrɛn say dɛn na Kenan. Ebraam bin ol 175 ia we i day. (Jɛn. 25:​7) Bɔt i nɔ bin si we Jiova de du wetin i dɔn prɔmis we na fɔ gi di land to Ebraam in pikin dɛn. Ɛn i nɔ bin de igen fɔ si we dɛn mek di siti, we na Gɔd in Kiŋdɔm. Pan ɔl dat, di Baybul tɔk bɔt Ebraam se i bin rili ol ɛn i bin satisfay wit in layf. (Jɛn. 25:​8) Pan ɔl di prɔblɛm dɛn we Ebraam bin gɛt fɔ bia wit, i bin kɔntinyu fɔ gɛt strɔng fet ɛn i bin gladi fɔ wet fɔ Jiova. Wetin mek i bin ebul fɔ bia? Ebraam bin ebul fɔ du dat bikɔs insay in wan ol layf, Jiova bin protɛkt am ɛn i bin de trit am as in padi.—Jɛn. 15:​1; Ayz. 41:​8; Jems 2:​22, 23.

12. Wetin wi de wet fɔ? Wetin wi de kam tɔk bɔt?

 ¹² Lɛk Ebraam, wi de wet fɔ di siti we gɛt rial fawndeshɔn dɛn. Bɔt wi nɔ de wet fɔ mek dɛn bil am. Gɔd in Kiŋdɔm bin dɔn de frɔm 1914 ɛn i dɔn ɔlrɛdi de kɔntrol ɔlsay na ɛvin. (Rɛv. 12:​7-10) Bɔt wi de wet fɔ mek i kɔntrol di wan ol wɔl. As wi de wet fɔ mek dat apin, wi gɛt bɔku prɔblɛm dɛn we wi gɛt fɔ bia wit jɔs lɛk Ebraam ɛn Sera. Fɔ se Jiova in savant dɛn tide dɔn ebul fɔ falamakata Ebraam in ɛgzampul? Di stori dɛn bɔt pɔsin in layf we de na Di Wachtawa sho se lɛk Ebraam ɛn Sera, bɔku pan Jiova in savant dɛn tide dɔn peshɛnt ɛn gɛt fet. Lɛ wi tɔk bɔt sɔm pan dɛn stori dɛn de ɛn si wetin wi kin lan.

13. Wetin yu lan frɔm Brɔda Waldɛn in stori?

¹³ Gri fɔ lɛf sɔm tin dɛn biɛn fɔ sav Gɔd. Fɔ mek wi go ebul fɔ put Gɔd in siti we na di Kiŋdɔm fɔs na wi layf, wi fɔ falamakata Ebraam we bin gri fɔ lɛf sɔm tin dɛn biɛn fɔ mek Gɔd gladi. (Mat. 6:​33; Mak 10:​28-30) Mek wi tɔk bɔt Bil Waldɛn in ɛgzampul. * Bil bin stɔdi bɔt aw fɔ drɔ plan, ɛn insay 1942, i nɔ bin de fa fɔ mek i gradyuet na wan yunivasiti na Amɛrika. Ɛn arawnd da tɛm de, i bin bigin fɔ stɔdi di Baybul wit Jiova Witnɛs dɛn. Bil in lɛkchɔra dɛn bin dɔn arenj fɔ mek i gɛt wok afta i gradyuet, bɔt Bil nɔ bin gri fɔ tek di wok. I bin tɔk se i dɔn disayd se i nɔ go du ɛni wok we go gi am bɔku mɔni so dat i go du mɔ fɔ sav Gɔd. Jɔs afta dat, di gɔvmɛnt bin tɛl Bil fɔ jɔyn soja. I bin tek tɛm tɛl dɛn se i nɔ go du dat ɛn bikɔs ɔf dat, dɛn bin tɛl am fɔ pe bɔku mɔni ɛn put am na prizin fɔ fayv ia. Dɛn bin fri am afta tri ia. Leta, dɛn bin kɔl am fɔ go na Giliad Skul ɛn dɛn bin sɛn am na Afrika. Dɔn Bil bin mared Iva, ɛn dɛn bin sav togɛda na  Afrika we min se dɛn bin lɛf bɔku tin dɛn biɛn. Afta sɔm tɛm, dɛn bin go bak na Amɛrika fɔ kia fɔ Bil in mama. We Bil bin de tɔk bɔt in wan ol layf i bin se: “Wata kin sɛtul na mi yay we a tink bɔt di wɔndaful ɔnɔ we a bin gɛt fɔ mek Jiova yuz mi fɔ wok fɔ am pas 70 ia. A kin tɛl am tɛnki ɔltɛm fɔ we i ɛp mi fɔ yuz mi layf fɔ sav am.” Yu go ebul fɔ mek ful-taym savis di men wok na yu layf?

14-15. Wetin yu lan frɔm Brɔda ɛn Sista Apostolidis dɛn ɛkspiriɛns?

¹⁴ Nɔ tink se yu nɔ go gɛt prɔblɛm dɛn na yu layf. Frɔm Ebraam in ɛgzampul, wi lan se ivin di wan dɛn we dɔn yuz ɔl dɛn layf fɔ sav Jiova go nid fɔ bia wit prɔblɛm dɛn we de mit dɛn. (Jems 1:​2; 1 Pit. 5:​9) Lɛ wi tɔk bɔt aw dis bin apin to Aristotelis Apostolidis. * I bin baptayz insay 1946 na Gris, ɛn insay 1952, i bin ɛngej to wan sista we nem Ɛlɛni, ɛn dɛn ɔltu bin gɛt di sem gol. Bɔt Ɛlɛni bin sik ɛn kam fɔ no se i gɛt bren tyumɔ. Dɛn bin pul di tyumɔ na in bren, bɔt afta sɔm tɛm we dɛn mared, di tyumɔ bin kam bak. Di dɔktɔ dɛn bin du ɔda ɔpreshɔn, bɔt af pat pan Ɛlɛni bin paralayz ɛn i nɔ bin de tɔk fayn igen. I bin kɔntinyu fɔ gɛt zil fɔ sav Gɔd pan ɔl we i sik ɛn di gɔvmɛnt bin de trit dɛn bad da tɛm de.

¹⁵ Aristotelis bin kia fɔ in wɛf fɔ 30 ia. Insay dɛn tɛm dɛn de, in na bin ɛlda, i bin de wok na di asɛmbli kɔmiti, ɛn i bin de ɛp fɔ bil wan Asɛmbli Ɔl. Dɔn insay 1987, we Ɛlɛni bin de prich, wan big ayɛn domɔt bin jam am ɛn i bin wund bad bad wan. I bin go koma fɔ tri ia bifo i day. We Aristotelis bin de tɔk bɔt in ɛkspiriɛns i bin se: “Insay di ia dɛn we dɔn pas, a dɔn gɛt bɔku prɔblɛm dɛn ɛn sɔm pan dɛn jɔs bin de apin lɛk dat. So a bin nid fɔ kɔntinyu fɔ bia ɛn nɔ alaw natin fɔ pwɛl mi at. Bɔt Jiova dɔn de gi mi di trɛnk we a nid  fɔ bia dɛn prɔblɛm dɛn de.” (Sam 94:​18, 19) Jiova lɛk ɔl di wan dɛn we de du ɔl wetin dɛn ebul fɔ sav am pan ɔl we dɛn gɛt prɔblɛm dɛn!

16. Us fayn advays Brɔda Nɔ bin gi in wɛf?

¹⁶ Kɔntinyu fɔ tink bɔt tumara bambay. Ebraam bin pe atɛnshɔn pan di blɛsin dɛn we Jiova go gi am, ɛn dat bin ɛp am fɔ bia di prɔblɛm dɛn we i bin de gɛt. Sista Ɔdri Ayd bin tray fɔ de tink bɔt di op we i gɛt fɔ tumara bambay pan ɔl we in fɔs man, Netan H. Nɔ, bin day bikɔs ɔf kansa ɛn in sɛkɔn man, Glɛn Ayd, bin gɛt Alzima diziz. * I bin tɔk se i bin gɛt ɛp frɔm wetin Brɔda Nɔ bin tɛl am sɔm wiks bifo i day. I se: “Netan tɛl mi se: ‘Afta wi day, wi gɛt tru tru op, ɛn wi nɔ go sɔfa igen.’ Dɔn i ɛnkɔrej mi se: ‘Luk bifo, na de yu prayz de.’ . . . I tɔk bak se: ‘Kɔntinyu fɔ bizi, ɛn tray fɔ yuz yu layf fɔ wok fɔ ɔda pipul dɛn. Dis go mek yu gɛt gladi at.’” Dat na fayn advays fɔ wi fɔ mek wi bizi de ɛp ɔda pipul dɛn ɛn “gladi fɔ di op” we wi gɛt.—Rom. 12:​12.

17. (a) Wetin mek wi go se wi gɛt gud rizin fɔ tink bɔt tumara bambay? (b) We wi fala di advays we de na Mayka 7:​7, aw dat go ɛp wi fɔ ɛnjɔy di blɛsin dɛn tumara bambay?

¹⁷ Tide, wi gɛt gud rizin fɔ mek wi pe atɛnshɔn to wetin gɛt fɔ apin tumara bambay. Di tin dɛn we de apin na di wɔl de sho klia wan se wi de na di las pat na di las dez na Setan in wɔl. I nɔ go te igen, wi nɔ go nid fɔ wet fɔ di siti we gɛt rial fawndeshɔn dɛn fɔ kɔntrol di wan ol wɔl. Wan pan di bɔku blɛsin dɛn we wi go ɛnjɔy tumara bambay, na we wi go si di wan dɛn we wi lɛk we dɔn day de gɛt layf bak. Da tɛm de, Jiova go blɛs Ebraam fɔ di fet we i gɛt ɛn we i peshɛnt bay we i go gi in ɛn in famili layf bak fɔ de na dis wɔl. Yu go de de fɔ wɛlkɔm dɛn? Yɛs, yu go de de if yu falamakata Ebraam ɛn gri fɔ lɛf tin dɛn biɛn fɔ Gɔd in Kiŋdɔm, if yu kɔntinyu fɔ gɛt fet pan ɔl we yu gɛt prɔblɛm dɛn, ɛn if yu lan fɔ peshɛnt wet fɔ Jiova.—Rid Mayka 7:​7.