1. Ino nkulyaaba kwa buyani baanji nkobakacita, alimwi ino nceebonshi ncobakacitila boobo?

MUNSHIKU shino, bantu bakwe Lesa baanji bakalyaaba munshila shipusenepusene. Bamakwesu abenankashi baanji bakasalawo kuteeba na kuteebwa. Beebene bamwi bakasalawo kutaba abaana. Mikwashi imwi bakasalawo kukala buumi bwakutalila shiinji. Aba boonse mbotwaambawo bakalyaaba ceebo cakwaamba ayi balisuni kucita shiinji muncito yakwe Yehova. Balisangalete alimwi balishomete kwaamba ayi Yehova alaakunoobapa shoonse nshebayandika. Sa balaakulenshekwa nsoni ceebo cakusala kwabo? Sobwe napaceyi! Ino nciinshi ncetwaambila boobo? Twaamba boobo ceebo cakwaamba ayi Yehova wakapa shoolwe Abulaamu, ‘ishi wa baabo boonse bacite lushomo.’​—Loma. 4:11.

2. (a) Kweelana a Bene Ebulu 11:8-10, 16, ino nceebonshi Abulaamu wakasumina kuswa mundabala ya Uli? (b) Ino tutokwiiya nshi mumutwi uyu?

² Abulaamu wakasumina kushiya ndabala ibotu ya Uli mwaakalinga kukala kabotu abuumbi. Ino nceebonshi? Nceebo ncakwaamba ayi wakalinga kulangila “ndabala icite lwiimbi lwancinencine.” (Amubelenge Bene Ebulu 11:8-10, 16.) Ino ni “ndabala” nshi? Ino ngamapensho nshi Abulaamu ngakeendaamo ndyaakalinga kulindila ayi ndabala iyo iyakwe? Alimwi ino inga twacita buyani kwaamba ayi tukonkele cakubonenaako cakwe Abulaamu, alimwi a cabamakwesu abenankashi bamunshiku shino abo bakakonkela cakubonenaako cakwe?

3. Ino ni “ndabala” nshi Abulaamu njaakalinga kulangila?

³ Ndabala Abulaamu njaakalinga kulangila mBwaami bwakwe Lesa. Yesu Klistu ngo Mwaami wa Bwaami ubu alimwi alaakweendelesha pomwi a Beneklistu bananikitwe bali 144,000. Paulo wakaamba  pa Bwaami ubu ayi “ndabala yakwe Lesa muumi, Jelusalemu yakwiculu.” (Ebu. 12:22; Ciyu. 5:8-10; 14:1) Yesu wakaiisha bashikwiiya bakwe ayi banopailila Bwaami ubu kwaamba ayi bukese mukukumanisha kuyanda kwakwe Lesa pacishi capanshi bweenka mbocibete kwiculu.​—Mate. 6:10.

4. Kweelana a Matalikilo 17:1, 2, 6, ino Abulaamu wakalinga kucishi nshi pamakani a ndabala, na Bwaami Lesa mbwaakashomesha?

⁴ Sa Abulaamu wakalinga kucishi Bwaami bwakwe Lesa mbweshi bukabaambwe? Sobwe. Makani aya akalinga “bushishi bwakwe Lesa” kwa ciindi cilaamfu. (Efe. 1:8-10; Kolo. 1:26, 27) Nacibi boobo, Abulaamu wakalinga kucishi kwaamba ayi bamulunyungu lwakwe bamwi balaakuba bamaami, mukwiinga Yehova wakamushomesha. (Amubelenge Matalikilo 17:1, 2, 6.) Abulaamu wakalinga kushomete abuumbi mushishomesho shakwe Lesa cakwaamba ayi cakalingabo anga wamubona kale Unanikitwe na Mesiya, uyo wakalinga kusa mukuba Mwaami wa Bwaami bwakwe Lesa. Ici ncecakapa kwaamba ayi Yesu alwiite ba Juda ndyaakalinga pacishi ayi: “Ishiwanu Abulaamu wakasangalala kwaamba ayi ulaakubona bushiku bwakwisa kwangu, ncakwiila wakabubona alimwi wakakondwa.” (Joni 8:56) Aboobo ncakutatoonsha kwaamba ayi Abulaamu wakalinga kucishi ayi bamulunyungu lwakwe bamwi balaakuba mu Bwaami Yehova mbwakalinga kusa mukubamba, alimwi wakasumina kulindila kwaamba ayi Yehova akumanishe nshaakashomesha.

5. Ino tulishi buyani ayi Abulaamu wakalinga kulindila ndabala yakabambwa a Lesa?

⁵ Ino Abulaamu wakacita buyani kwaamba ayi atondeshe ayi wakalinga kulindila “ndabala,” na Bwaami bwakabambwa a Lesa? Cakutaanguna, Abulaamu taakwe kubaawo kulubasu lwa bwaami buli boonse bwa pacishi capanshi. Wakasalawo buumi bwa kutakala pamusena womwi alimwi taakwe kubaawo kulubasu lwa bwaami buli boonse bwa bantu. Kwiilikaawo, Abulaamu taakwe kweelesha kulipangila bwaami bwakwe mwiine. Sombi wakatolelela kunyumfwila Yehova akulindila kwaamba ayi akumanishe shishomesho shakwe. Kwiinda mukucita boobo, Abulaamu wakatondesha ayi wakalinga kucite lushomo luyumu muli Yehova. Amuleke tubandike mapensho amwi ngakeendaamo akubona nsheenga tweeyako.

6. Ino ndabala ya Uli yakalinga buyani?

⁶ Ndabala ya Uli Abulaamu mwakalonga yakalinga ndabala ibotu abuumbi, yakalinga  kushitilishitwe kabotu, alimwi mwakalinga kukala bantu beeite abuumbi alimwi babile. Yakalinga kucite lubumbu lunene abuumbi alimwi a mifolo ya maanshi mumbasu shotatwe. Bantu bakalinga kukala mundabala iyi bakalinga kucishi kabotu kulemba alimwi akucana nsamushi. Alimwi mundabala iyi mwakalinga makwebo aanji; beshikukaba shakukabakaba bakacana mapepala aanji akalinga mu ndabala ya Uli, ngobakalinga kusebensesha mu makwebo. Maanda amundabala iyi akalinga kuyakitwe anceelwa, akalinga kubikitwe pulasita alimwi bakalinga kwaapenta kusebensesha peenti ituba. Maanda amwi akalinga kucite shipinda 13 na 14 alimwi lubaansa loonse lwakalinga kuyakitwe mabwe.

7. Ino nceebonshi Abulaamu wakalinga kweelete kushoma ayi Yehova alaakumushitilisha amukwashi wakwe?

⁷ Abulaamu wakalinga kweelete kushoma kwaamba ayi Yehova alaakumushitilisha pomwi amukwashi wakwe. Ino nceebonshi? Amwiibaluke kwaamba ayi Abulaamu a Saala bakashiya ŋanda mundabala ya Uli mobakalinga kushitilishitwe alimwi mobakalinga kukala kabotu, lyalo akutalika kukala mumatente mucishi ca Kenani kumusena nkobatakalinga kushitilishitwe. Aboobo cakalinga cuubu kubalwana kubalwani babo.

8. Ino nshiinshi shakacitikila Abulaamu paciindi cimwi?

⁸ Abulaamu wakacita kweelana a Lesa mbwakamulwiita, nacibi boobo, paciindi cimwi taakalinga kucitewo shakulya shikwene shakupa mukwashi wakwe. Kwakalinga nsala inene kumusena Yehova nkwaakamutuma. Nsala iyo yakalinga inene abuumbi cakwaamba ayi Abulaamu wakasala kulongela ku Ijipiti pomwi amukwashi wakwe kwakaciindi. Nacibi boobo ndyaakalinga ku Ijipiti, Falawo mweendeleshi waku Ijipiti wakabwesa mukaakwe Abulaamu. Ano amuyeeyebo Abulaamu mbwaakalisukama kushikila ciindi Yehova ndyaakapa kwaamba ayi Falawo abooshe Saala kuli Abulaamu.​—Mata. 12:10-19.

9. Ino ngamapensho nshi Abulaamu ngakalinga kucite mumukwashi?

⁹ Abulaamu wakalinga kucite mapensho anene mumukwashi wakwe. Saala mukaakwe ngwakalinga kusuni abuumbi taakalinga kubaawo abaana. Ici cakabapa kuba abuumba kwa myaaka iinji. Mukuya kwaciindi, Saala wakapa Abulaamu musebenshi wakwe mwanakashi Aga, kwaamba ayi Abulaamu ashalilemo baana. Ano Aga ndyaakashibabo ayi waba a lifumo lya mwaana uyo wakesa mukutumbwa ayi Ishimaeli, wakatalika kunyaansha Saala. Bukaalo bwakabica abuumbi cakwaamba ayi Saala wakatanda Aga paŋanda.​—Mata. 16:1-6.

10. Ino nshiinshi shakacitika kuli Ishimaeli alimwi a Isaki isho shakapa kwaamba ayi cibe ciyumu kuli Abulaamu kutondesha lushomo?

¹⁰ Mukuya kwaciindi, Saala wakamita akushala mwaana musankwa, uyo Abulaamu ngwaakapa liina ayi Isaki. Abulaamu wakalinga kubasuni abuumbi bana bakwe boonse bobilo, Ishimaeli alimwi a Isaki. Ano mukwiinga Ishimaeli wakalinga kupensha Isaki, Abulaamu wakatanda Ishimaeli a Aga. (Mata. 21:9-14) Ndipakeenda myaaka iinji, Yehova wakalwiita Abulaamu ayi abenge Isaki mwanaakwe mbuli mulambu. (Mata. 22:1, 2; Ebu. 11:17-19) Pashiindi shoonse shobilo ishi, Abulaamu wakalinga kweelete kushoma ayi Yehova alaakukumanisha nshaakashomesha pabana bakwe.

11. Ino nceebonshi Abulaamu wakalinga kuyandika kukalika moyo akulangila Yehova?

¹¹ Ishi shoonse ndyeshakalinga kucitika, Abulaamu wakalinga kuyandika kukalika moyo akulangila Yehova. Alyeelete wakalinga kwiindite myaaka 70 ndyaakalonga amukwashi wakwe kuswa mundabala ya Uli. (Mata. 11:31–12:4) Alimwi mpashi wakekala mumatente myaaka 100 kaashinguluka mucishi ca Kenani. Abulaamu wakafwa kaacite myaaka 175. (Mata. 25:7) Nacibi boobo, taakwe kushikaako kuciindi Yehova ndyaakakumanisha nshaakalinga wamushomesha ayi alaakupa bamulunyungu lwakwe cishi mwaakalinga kushinguluka. Alimwi taakwe kubonaako ndabala, na Bwaami bwakwe Lesa ndyebwakatalika. Nacibi boobo, Baibo ilaamba ayi Abulaamu wakafwa kaacite “myaaka iinji.” (Mata. 25:8) Nabi kwaamba ayi Abulaamu wakeenda mumapensho aanji, wakatolelela kutondesha lushomo luyumu akulangila shishomesho  shakwe Yehova. Ino nciinshi cakamucafwa kuliyumya? Yehova wakalinga kumushitilisha mubuumi bwakwe boonse alimwi wakalinga kumubona ayi ngushicibusa wakwe.​—Mata. 15:1; Isa. 41:8; Jemu. 2:22, 23.

12. Ino nshiinshi nshotutoolindila, alimwi ino nshiinshi nsheshi twiiye?

¹² Bweenka mbuli Abulaamu, aswebo tutoolangila ndabala icite lwiimbi lwancinencine. Nacibi boobo, tatutoolindila kwaamba ayi ikayakwe, mukwiinga Bwaami bwakwe Lesa bwakatalika kale kweendelesha kwiculu kuswa mu 1914. (Ciyu. 12:7-10) Aboobo tutoolindilabo kwaamba ayi bukatalike kweendelesha apacishi capanshi. Bweenka mbuli Abulaamu a Saala, aswebo inga tweenda mumapensho apusenepusene ndyetutolindila ayi ishi shikacitike. Sa basebenshi bakwe Yehova ba munshiku shino balacikonsha kukonkela cakubonenaako cakwe Abulaamu? Makani ngotucana mu Njashi Yamulindilishi palubasu lwa shakacitika mubuumi bwabo, alatondesha kwaamba ayi basebenshi bakwe Yehova baanji munshiku shino abalo balatondesha lushomo akukalika moyo bweenka mbuli Abulaamu a Saala. Amuleke tubandike shakubonenaako shiniini pamakani aya akubona nsheenga tweeyako.

13. Ino mweeyawo nshi pamakani a Mukwesu Walden?

¹³ Amube balibambite kulyaaba. Na tulisuni kubika ndabala na Bwaami bwakwe Lesa panembo mubuumi bwesu, tulyeelete kukonkela cakubonenaako cakwe Abulaamu, uyo wakalinga kulibambite kulyaaba kwaamba ayi asangalashe Yehova. (Mate. 6:33; Maako 10:28-30) Atubandike cakubonenaako ca mukwesu wa liina lya Bill Walden. * Mukwesu Bill wakatalika kwiiya Baibo a Bakamboni Bakwe Yehova mu 1942, ndyaakalinga pafwiifwi akumanisha cikolo ca yunivesiti ku America, kwaamba ayi atambule digili musha buinjiniya. Ba pulofesa bakalinga kwiisha ba Bill bakalinga babalangweta kale anciito njobakalinga kweelete kutalika kusebensa pesule lyakumanisha cikolo, sombi ba Bill bakakaka. Bakasansulula ayi bakakaka kusebensa ncito ya maali aanji ceebo cakwaamba ayi bakalinga kusuni kucita shiinji muncito yakwe Lesa. Tapana kwiinda aciindi cilaamfu, beendeleshi bakalwiita ba Bill ayi balyeelete kunjila busoja. Sombi  mubulemu bakakaka, aboobo bakabalwiita ayi balipile maali amadola ashika 10,000 akubabika mujeele kwa myaaka 5. Bakakushikwa mujeele pesule lya myaaka yotatwe. Lyalo mukuya kwaciindi bakabeeta kucanika ku Cikolo ca Gilyadi, pesule lya cikolo bakabatuma ku Africa mbuli mishonali. Lyalo Mukwesu Bill wakeeba nankashi Eva, aboobo bakatalika kusebensela pomwi mu Africa, ico cakalinga kuyandika kulyaaba. Pesule lya myaaka iinji bakaboolela ku America mukulama bashali babo banakashi. Pamakani abuumi bwabo, ba Bill bakaamba ayi: “Liinji ndalosha minsonshi na ndayeeya pacoolwe cibotu abuumbi cakusebensela Yehova kwa myaaka iindilila 70. Lyoonse ndamulumba pakuncafwa kusalawo kumusebensela.” Sa amwebo inga mwasalawo kusebensela Yehova muncito yaciindi coonse?

14-15. Ino mweeya nshi kuswa kushakacitika mubuumi bwa Mukwesu a Nankashi Apostolidis?

¹⁴ Mutalangili ayi mulaakuba abuumi butacite mapensho. Shakacitika mubuumi bwakwe Abulaamu shilatwiisha ayi mapensho alashikila muntu uli woonse kwiilikaawo abaabo bakaaba buumi bwabo kusebensela Yehova. (Jemu. 1:2; 1 Pita 5:9) Ishi nsheshakacitika kumukwesu Aristotelis Apostolidis. * Wakabombekwa mu 1946 ku Greece alimwi mu 1952 wakakobekela nankashi wa liina lya Eleni, alakwe wakalinga kusuni kusebensela Yehova mubuumi bwakwe boonse. Nacibi boobo, ba Eleni bakatalika kuciswa, bakabacana acintu cakalinga kumena kubongo. Cintu ico cakalinga kumena bakacikusha, ano ndipakeendabo myaaka iniini pesule lya kweebana, bulwashi bwakaboola alimwi. Aboobo bakabacita opaleshoni alimwi, pesule lya opaleshoni ba Eleni bakacaala kabatacite nkusu, alimwi bakalinga kwaalilwa akwaamba kabotu. Bakatolelela kusebensa cankusu muncito yakwe Lesa nabi ndyebakalinga balwashi alimwi mfulumeende shakalinga kupensha Bakamboni Bakwe Yehova paciindi cilya.

¹⁵ Mukwesu Aristotelis wakalama bakaakwe kwa myaaka 30. Paciindi ici wakalinga kusebensa mbuli munene, kucafwilisha mukomiti yakubungana kunene, alimwi akucafwilisha muncito yakuyaka Ŋanda Yakubunganinaamo Mabungano Anene. Lyalo mu 1987, ba Eleni bakalicisa abuumbi cisasa ndyecakabalimba ndyebakalinga kushimikila. Bakekala mucipatela kabataambi nabi kulasha kwa myaaka yotatwe, lyalo bakafwa. Mukwesu  Aristotelis wakaamba ayi: “Kwa myaaka iinji, ndeenda mumapensho aanji akuteengashilawo, aboobo ndakalinga kuyandika kuba ushinishite kuliyumya kwaamba ayi ntabooleli mwisule. Nacibi boobo, lyoonse Yehova wakalinga kumpa nkusu shakucikonsha kukoma mapensho aya.” (Kulu. 94:18, 19) Yehova alibasuni abuumbi basebenshi bakwe abo bacita nsheenga bacikonsha nabi ndyebacite mapensho!

16. Ino ngamaswi nshi acafwa, Mukwesu Knorr ngaakalwiita mukaakwe?

¹⁶ Amuyeeye sha kunembo. Abulaamu wakalinga kubikila maano kushoolwe Yehova nshaakalinga kusa mukumupa kunembo, kucita boobo kwakamucafwa kuliyumya mumapensho ngaakalinga kwiindaamo. Nankashi Audrey Hyde wakalinga kweelesha kutolelela kuyeeya nshaakalinga kulangila kunembo, nabi kwaamba ayi beebaye bakutaanguna ba Nathan H. Knorr, bakafwa kubulwashi bwa kansa alimwi ba Glenn Hyde abo mbwakeebwaako lyabili, bakatalika kuciswa bulwashi bwiitwa ayi Alzheimer. * Wakaamba ayi cakamucafwa nga maswi amwi akaamba Mukwesu Knorr nsondo shiniini kaatana kufwa. Nankashi wakaamba ayi: “Ba Nathan bakanjibalusha ayi: ‘Na twafwa, kulangila kwesu kulaba kwancinencine, alimwi teshi tukapengewo alimwi.’ Lyalo bakanjuminisha akwaamba ayi: ‘Unoolanga kunembo, mukwiinga nkokuli cilambu cako.’ . . . Bakatolelela akwaamba ayi: ‘Utanookalabo, eelesha kusebensesha buumi bwako kucafwa bamwi. Kucita boobo kulaakukucafwa kuba alusangalalo.’” Ncintu ciyandika abuumbi kucita nsheenga twacikonsha kwaamba ayi tucitile bamwi shibotu alimwi “akusangalala ceebo ca nshetutoolangila”!​—Loma. 12:12.

17. (a) Ino nceebonshi nceenga twabikila maano kusheesho sheshi shikacitike kunembo? (b) Ino kukonkela cakubonenaako ncetucana pa Mika 7:7 inga kwatucafwa buyani kusangalala ashoolwe sha kunembo?

¹⁷ Munshiku shino kuli shintu shiinji sheenga shatupa kuyeeya pashintu shibotu sheshi shikacitike kunembo, mubupusano ambocakalinga kale kale. Shintu shitoocitika nsengwe yoonse shilatondesha patuba kwaamba ayi tuli kumamanino anshiku shakweelaako sha bweende bwa shintu ubu. Conoonobo ndabala icite lwiimbi lwancinencine na Bwaami bwakwe Lesa mbotutoolindila bulaakutalika kweendelesha pacishi coonse capanshi. Shoolwe shimwi nsheshi tukafubileemo nkubona bantu mbotusuni abo bakafwa ndyeshi bakabushikwe. Paciindi ici, Yehova alaakupa Abulaamu cilambu palushomo akukalika moyo nkwaakalinga kucite, kwiinda mukumubusha pomwi amukwashi wakwe. Sa mulaakubaako kwaamba ayi mukabatambule? Inga mwabaako na amwebo bweenka mbuli Abulaamu, mwalyaaba ceebo ca Bwaami bwakwe Lesa, mwatolelela kuba alushomo luyumu nabi ndyemutokwiinda mumapensho, alimwi akulindila pali Yehova cakukalika moyo.​—Amubelenge Mika 7:7.