1. Vyuma muka vanalisuula kulinga vatu vavavulu, kaha mwomwo ika?

VATU jaYehova vavavulu makumbi ano vanalisuula kulingako vyuma vimwe mangana vazachile chikuma Yehova mukuyoya chavo. Vavavulu vanalisuula kutwama ujike, kaha vaze valimbata vanalisuula kutwama chakuzeneka vana. Jitanga jimwe nawa jinashiwisako chiyoyelo. Vasuuluka navyuma vatwama navyo nakufwelela nawa ngwavo Yehova mwavahana vyuma navasakiwa mukuyoya. Kutala kulinga vyuma kanevi chinapu hikulishina kaha tahi? Nduma. Mwomwo ika? Mwomwo Yehova akiswile Apalahama uze apwa “sevo yavosena vaze vatwama nalufwelelo.”—Loma 4:11.

2. (a) Kweseka namukanda WavaHepeleu 11:8-10, 16, mwomwo ika Apalahama alisuwilile kufuma munganda yaUle? (b) Vihula muka natushimutwila muchihande chino?

² Apalahama alisuwile kuseza chiyoyelo chenyi chamwaza chikuma chize ayoyelenga munganda yaUle. Mwomwo ika alingililile ngocho? Mwomwo apwile nakuvandamina “nganda yize yapwile navihela vyazuvo vyamwenemwene.” (Tangenu WavaHepeleu 11:8-10, 16.) Uno “nganda” muka vene oyo? Ukalu muka ahichilengamo Apalahama omu apwile nakuvandamina nganda kana? Kaha tunahase kulondezeza ngachilihi Apalahama navatu vamwe vamumakumbi etu vaze vanakavangiza chakutalilaho chenyi? Vihula kana natuvishimutwila muchihande chino.

3. Uno nganda apwile nakuvandamina Apalahama yapwa yika?

³ Nganda yize apwile nakuvandamina Apalahama yapwa Wangana waKalunga. Yesu Kulishitu ikiye Mwangana waWangana kana, kaha  mwakayula hamwe navaka-Kulishitu vawavisa 144,000. Paulu avulukile ngwenyi Wangana kana ukiko ‘nganda yaKalunga ou ayoya, Yelusalema yamwilu.’ (Hepe. 12:22; Kuso. 5:8-10; 14:1) Kaha Yesu alwezele tumbaji twenyi valombenga Wangana kana wizenga mangana mwaya muchima waKalunga valingemo mwilu nahamavu nawa.—Mateu 6:10.

4. Kweseka namukanda waKuputuka 17:1, 2, 6, vyuma muka atachikijile Apalahama hanganda chipwe Wangana uze ashikile Kalunga?

⁴ Uno Apalahama atachikijile omwo Wangana waKalunga navakaulongeselamo tahi? Nduma, mwomwo hamyaka yayivulu, vyuma kana vyapwile “vyajila vyakusweka.” (Efwe. 1:8-10; Kolo. 1:26, 27) Chipwe ngocho, Apalahama atachikijile ngwenyi vana venyi vamwe navakapwa vamyangana, mwomwo Yehova ivene amulwezele vyuma kana. (Tangenu Kuputuka 17:1, 2, 6.) Apalahama afwelelele chikuma vyuma amushikile Kalunga, ngocho chapwile kwijiva nge namono lyehi Ou Vawavisa, chipwe ngwetu Meshiya, uze mwakapwa Mwangana waWangana waKalunga. Chuma kana chikiko chalingishile Yesu alweze vaYuleya ngwenyi: “Senu Apalahama awahililile chikuma hakutalilila kukamona likumbi lyami. Kaha alimwene, ngocho awahililile.” (Yowa. 8:56) Chikupu vene, Apalahama atachikijile ngwenyi vana venyi navakapwa muWangana uze mwakakundwiza Yehova, kaha afwilililile kuvandamina Yehova atesemo lushiko kana.

5. Twatachikiza ngachilihi ngwetu Apalahama avandaminyine nganda yize atungile Kalunga?

⁵ Uno Apalahama asolwele ngachilihi ngwenyi apwile nakuvandamina nganda, chipwe ngwetu Wangana wakutunga kuli Kalunga? Chatete, kakundwijile wangana umwe wahamavuko. Anungwojokelenga shimbu yosena, kaha katwaminenga hachihela chimwe nakukundwiza mawangana avatuko. Kaha nawa kafwililile kutunga wangana wenyiko. Oloze ononokelenga lika Yehova nakumuvandamina atesemo lushiko lwenyi. Echi chasolwele hatoma nge Apalahama afwelelele chikuma Yehova. Shikaho, tukekesenu ukalu umwe amwene nakuwana vyuma natulinangulako.

6. Uno nganda yaUle yapwilenga ngachilihi?

⁶ Nganda yaUle yize asezele Apalahama yapwile yakukingiwa, yaulangaji, kaha nawa yauhando. Yapwile yakukinga kujikembwe jangolo, natupila vameya vavanene vakukunama kujisali jitatu. Vatu vamunganda kaneyi vapwile vaka-kusoneka vakwipangweji kaha nawa vatachikijile chikuma  makumi. Chasoloka nge munganda kana mukiko vatu vejilenga nakusekasanyina mwomwo vaka-kuvumbwojola vyuma vyakushikulu vawanyine mapapilo amavulu akusekasana. Jizuvo vatungilenga vatu munganda kana japwile jakutungisa tumenga vakwocha, kaha hajimbango vasalimbilengaho nakukwitaho ulombo utoma. Jizuvo jimwe japwilenga natupete 13 chipwe 14, kaha muweluka wajo valamikilengamo malolwa.

7. Mwomwo ika Apalahama atelelele kufwelela ngwenyi Yehova mwamukinga hamwe kaha natanga yenyi?

⁷ Apalahama atelelele kufwelela ngwenyi Yehova mwamukinga hamwe kaha natanga yenyi. Mwomwo ika? Anukenu ngwenu Apalahama naSala vasezele chiyoyelo chamwaza munganda yaUle, nakuya nakutwama mujimbalaka kaha nawa muvipapa vyamuKanane. Apalahama katwaminenga cheka mujizuvo jakukingiwa najikembwe chipwe jakujingulwisa tupila vameyako. Oloze vatwaminenga muweluka muze chapwilenga chachashi kuvalukuka kuli vaka-kole.

8. Ukalu muka ahichilemo Apalahama?

⁸ Apalahama alingilenga mwayile muchima waYehova, oloze lwola lumwe chamukaluhwililenga kuwanyina vaka-tanga yenyi vyakulya. Mulifuchi muze Yehova amulwezele ayenga nakutwamamo nawa, mwengilile zala yakalombolombo. Zala kana yatohwele chikuma nakumulingisa afumemo natanga yenyi nakuchinyina kuEjipitu. Kahomu ahetele muEjipitu, Fwalo muka-kuyula lifuchi kana amutambwile puwenyi. Apalahama alizakaminyine chikuma oloze Yehova alwezele Fwalo akindulwise Sala kuli lunga lyenyi.—Kupu. 12:10-19.

9. Ukalu muka ahichilemo Apalahama natanga yenyi?

⁹ Chiyoyelo chaApalahama natanga yenyi chakaluhwile chikuma. Puwenyi Sala uze azangile chikuma apwile mumba. Ukalu kana wavahombesele hamyaka yayivulu. Kutwala muze, Sala ahanyine ngamba yenyi Hangale kuli Apalahama mangana asemeneko vana. Oloze omu Hangale emichile, aputukile kulumbilisa kaka yenyi Sala. Ukalu watohwele chikuma nakulingisa Sala ahange Hangale hembo.—Kupu. 16:1-6.

10. Vyuma muka vyasolokele kuli Ishimele naIsaka vize vyatelelele kulingisa Apalahama ahone kufwelela Yehova?

¹⁰ Mukuhita chalwola, Sala emichile, kaha asemene mwana, ngocho Apalahama amulukile ngwenyi Isaka. Apalahama azangile vana venyi vosena vavali, Ishimele naIsaka. Oloze hakuwana nge Ishimele ayanjishilenga chikuma Isaka, ngocho Yehova alwezele Apalahama ahange Ishimele nanaye Hangale. (Kupu. 21:9-14) Omu mwahichile myaka, Yehova alwezele Apalahama alumbe Isaka kupwa wana. (Kupu. 22:1, 2; Hepe. 11:17-19) Muvyuma vyosenevi vivali vyasolokele, Apalahama afwelelele ngwenyi Yehova mwakatesamo jishiko jize amushikile kutalisa kuli ava vana venyi.

11. Mwomwo ika Apalahama atelelele kuvandamina lika Yehova?

¹¹ Apalahama atelelele kutwalaho lika kuvandamina Yehova hamyaka yoseneyi. Halwola vafumine munganda yaUle, Apalahama apwile namyaka yakuhambakana kafwe 70. (Kupu. 11:31–12:4) Kaha atwamine mujimbalaka hamyaka kafwe 100, nakujingwojoka mulifuchi lyaKanane. Apalahama afwile omu apwile namyaka 175. (Kupu. 25:7) Oloze kamwene omu Yehova ateselemo lushiko lwenyi lwakuhana lifuchi lize ajingwojokele kuli vaka-tanga yenyiko. Kaha nawa kamwene omwo nganda, chipwe Wangana waKalunga waputukile kuyulako. Chipwe ngocho, Mbimbiliya yalumbununa ngwayo Apalahama afwile “wakusuuluka mumyaka yaushinakaji wenyi.” (Kupu. 25:8) Chamokomoko nakala ukalu ahichilemo, Apalahama apwile nalufwelelo lwakukola nakulisuula nawa kuvandamina Yehova atesemo jishiko jenyi. Uno chuma muka chamukafwile atwaleho kumika? Mwomwo Yehova amukingilenga nakumuzakama mukuyoya chenyi chosena hakupwa sepa lyenyi.—Kupu. 15:1; Isa. 41:8; Yako. 2:22, 23.

12. Vyuma muka tuli nakutalilila, kaha natushimutwila ika?

¹² Ngana muze chapwile kuli Apalahama, nayetu tuli nakuvandamina nganda yize yikwechi  vihela vyamwenemwene. Chipwe ngocho, etu katweshi nakuvandamina nganda yize kanda vatungeko, mwomwo Wangana waKalunga waputukile kuyula mu 1914, kaha unalingisa lyehi mwaya muchima waKalunga mulingiwe mwilu. (Kuso. 12:7-10) Oloze tuli nakuvandamina Wangana kana uyule hano hamavu. Omu tuli nakuvandamina Wangana kana, tunahase kuhita muukalu wauvulu ngana uze ahichilemo Apalahama napuwenyi Sala. Uno kuliko vangamba jaYehova vamwe makumbi ano vaze vali nakulondezeza Apalahama naSala tahi? Mijimbu yakuyoya chavatu yize vasoneka mujimangazini jaKaposhi Kakutalila yasolola nge vangamba jaYehova vavavulu makumbi ano vali nalufwelelo lwakukola namuchima wakutalilila chikoki ngana muze chapwile kuli Apalahama naSala. Tushimutwilenuko hamijimbu yimwe mangana tumone vishina tunahase kulinangulako.

13. Vyuma muka munalinangula kumujimbu wandumbu Walden?

¹³ Pwenunga namuchima wakulisuula. Kachi nge tuli nakufwila kuhaka Wangana waKalunga kulutwe mukuyoya chetu, kaha twatela kupwa ngana mwaApalahama uze apwile namuchima wakulisuula mangana evwise kuwaha Kalunga. (Mateu 6:33; Mako 10:28-30) Achitalenu hachakutalilaho chandumbwetu walunga Bill Walden. * Omu apwile kwakamwihi nakukumisa kulinangula vyakufunjejeka nakutunga jizuvo hayunivesiti yamu U.S. mu 1942, hakiko aputukile kulinangula Mbimbiliya naVinjiho jaYehova. Lunga umwe uze atanga chikuma uze anangwilenga Bill, awahishile vyuma mangana omu Bill mwakakumisa shikola akaputuke kuzata, oloze Bill akanyine. Alumbunwine hatoma ngwenyi, afwililile kuzachila chikuma Yehova mukutela kuzata milimo yize yatelelele kumuhana jimbongo jajivulu. Kaha nawa nakushimbula chiku, Bill vamulwezele engile mulimo wauswalale, oloze akanyine ngocho vamuhanyine mulonga afwete jimbongo jajivulu nakumukasa mukamenga hamyaka yitanu. Oloze omu mwahichile myaka yitatu vamufumishile mukamenga. Kufumaho vamusanyikile kuShikola yaNgileyate kaha vamutumine kuya nakuzata mulimo waumishonali muAfrica. Bill ambachile Eva, kaha vosena  vavali vayile nakuzachila muAfrica. Chuma kana chasakiwile kulisuula chikuma. Hanyima yamyaka yayivulu, vakindulukile kuUnited States vakazakame naye yaBill. Bill akukulwile mujimbu wakuyoya chenyi hakwamba ngwenyi: “Omu ngweji kushinganyekanga hamilimo ngunazachila Yehova hamyaka yakuhambakana 70, ngweji kuwahililanga chikuma nakuchimona nawa kupwa hikutokwa. Ngweji kumusakwililanga chikuma hakungukafwa ngupwenga mumulimo washimbu yosena mukuyoya chami chosena.” Kutala nayenu munahase kuzata mumulimo washimbu yosena mukuyoya chenu chosena tahi?

14-15. Vyuma muka munalinangula kumujimbu wandumbu Apostolidis napuwenyi Eleni?

¹⁴ Ijivenu ngwenu nayenu namumonanga ukalu mukuyoya chenu. Tunalinangula kumujimbu waApalahama ngwetu, navatu vaze navazachila Yehova mukuyoya chavo chosena navamonanga ukalu. (Yako. 1:2; Petu. 1, 5:9) Achitalenu hachakutalilaho chandumbu Aristotelis Apostolidis. * Ou ndumbwetu vamumbapachishile mu 1946 mulifuchi lyaGreece, kaha kuheta mu 1952 ahuhwile Eleni uze afwililile kuzachila Yehova mukuyoya chenyi chosena ngana mwaikiye. Kutwala muze Eleni apwile naliundu kuwongo ngocho avijile chikuma. Liundu kana valifumishile, oloze omu mwahichile myaka yayindende kufuma haze valimbachile, lize liundu lyaputukile cheka. Kaha ndotolo amupulile cheka, oloze halwola kanelu Eleni atengukile kaha nawa kahashilenga kuhanjika kanawako. Numba tuhu apwile naukalu kanou kaha nawa fulumende yapwilenga nakuyanjisa vatu jaYehova halwola kana, oloze Eleni apwilenga lika muka-kwambulula watwima.

¹⁵ Ndumbwetu Apostolidis, azakamine puwenyi hamyaka 30. Hamyaka yoseneyi, apwilenga kalama muchikungulwilo, nakuzata nawa mujikomiti jakukunguluka, nakutunga nawa Zuvo yaKukunguluka Chachinene. Kaha kuheta mu 1987, Eleni alivulumwine omu apwile mumulimo wakwambulula. Apwile nakundoyoka hamyaka yitatu kaha afwile. Ndumbwetu Apostolidis akukulwile mujimbu wakuyoya chenyi ngwenyi: “Hamyaka yayivulu, ngunahichinga muukalu waunene chikuma, kaha ngwasakiwile kupwa wakumika nakupwa nawa nalukakachila. Chipwe ngocho, Yehova nanguhanenga  lika ngolo ngumike muukalu kanou waunene ngana.” (Samu 94:18, 19) Yehova azanga chikuma vangamba jenyi vosena vaze veji kufwilanga kumuzachila chamokomoko nakala ukalu veji kumonanga.

16. Mazu muka amalemu chikuma ahanjikile ndumbu Knorr kuli puwenyi?

¹⁶ Shinganyekenunga havyuma mwatalilila. Apalahama ashinganyekelenga havyuma vyakulutwe vize amushikile Yehova kahechi chamukafwile omike muukalu ahichilengamo. Kushinganyeka havyuma twatalilila chikiko chakafwile ndumbwetu wapwevo Audrey Hyde omu lunga lyenyi watete Nathan H. Knorr afwile namusongo wakasa nomu nawa lunga lyenyi wamuchivali Glenn Hyde avijile chikuma musongo wakuwongo. * Ndumbu Audrey Hyde ambile ngwenyi chuma chamukafwile shina kwanuka mazu ahanjikile ndumbu Knorr omu asalile navyalumingo vyavindende nakufwa. Ambile ngwenyi: “Nathan angwanukishile ngwenyi: ‘Nge tunafu, lutalililo lwetu nalukatesamo kaha katweshi kukaviza chekako.’ Angulwezele nawa ngwenyi: ‘Tala kulutwe, mwomwo kukiko kuli fweto yove.’ . . . Ahakilileho ngwenyi: ‘Watela kuhundangana chikuma—zachisa kuyoya chove ukafwe vakwenu. Echi nachikunehela kuwahilila mukuyoya chove.’” Mazu kana amalemu chikuma mwomwo anahase kutukafwa nayetu tulingile vakwetu vyuma vyamwaza ‘nakuwahililanga nalutalililo lwetu.’—Loma 12:12.

17. (a) Mwomwo ika natwambila ngwetu kuli vyuma vyavivulu vyakutukafwa tushinganyekenga havyuma vyakulutwe? (b) Uno kukavangiza mazu vasoneka hali Mika 7:7 nachitukafwa ngachilihi tukalivwise kuwaha vyakulutwe?

¹⁷ Makumbi ano, tuli namijimbu yayivulu yakutukafwa tushinganyekenga chikuma havyuma vyakulutwe vize twatalilila. Vyuma vili nakusoloka mukaye vili nakusolola hatoma nge tuli nakuyoyela kusongosongo yakatwamino kamyaka yino. Kalinwomu Wangana waKalunga uputuke kuyula hamavu hosena. Kaha chuma chimwe chamwaza chikuma natukalivwisa kuwaha shina kumona vausoko wetu vaze vafwile vanavasangula. Halwola kana, Yehova mwakafweta Apalahama mwomwo yalufwelelo lwenyi namuchima wenyi wakutalilila chikoki hakukamusangula hamwe kaha natanga yenyi nakukatwama hano hamavu. Uno nayenu namukapwako mangana mukavasambilile tahi? Eyo, nayenu munahase kukapwako kachi nge namupwa namuchima wakulisuula mangana mukundwize Wangana waKalunga, nakupwa lika nalufwelelo lwakukola chamokomoko naukalu namumona nakutwalaho lika kuvandamina Yehova ngana muze alingile Apalahama.—Tangenu Mika 7:7.