1. Athu owinjhiva enasakula ethu baani, ki mwahaya bwaddi?

MATXIKWI ni matxikwi aadhari a Yehova a peeno enowilibihedha vanlubale. Addibila ni arogola owinjhiva enosakula wihina ekale addiye, teto anamatelana enosakula ohukanna ahima, amudhi enokweyiha egumi yewa. Ethu baani enaathukulela aliwa werana eyo? Aliwa enafuna emulabele Yehova ni kopolo dhiwa dhatedhene. Aliwa enohagalala ni dhithu dhing’ono enniwana, ni enororomela wi Yehova onere wavaha ndhe dhinahalela. Nerege aliwa podi odha osinyuwa mwaha wa yosakula yewa? Newene! Mwahaya bwaddi nigawogaga ndo? Mwahaya bowi, Yehova ahasamalela adhari aye akale. Motajhiha, oliye ahimureeliha Abaraawu ‘babi aathu atene enna nroromelo.’ — Rom. 4:11.

2. (a) Ninga munawogela Hebreus 11:8-10, 16, Mwahaya bwaddi Abaraawu adhe asakulege ohiya sidadi ya Uri? (b) Muwari mwa yohudhera ela nnaasuze ddi?

² Abaraawu akalaga sidadi yo Uri oliye ahikanna egumi yapama. Mbwenye oliye osakula ohiya dhithu ndhe dhapama mundduli. Mwahaya bwaddi? Mwahaya bowi, Abaraawu ajheha ‘sidadi enna ntxikwa nebaribari.’ (Omwileri Hebreus 11:8-10, 16.) ‘Sidadi’ ela enatapulela ddi? Makathamiho baani yanfwanyile Abaraawu ajhehaga omagiwa sidadi ela? Ki nnaamutajhihe ni makalelo baani Abaraawu, ni akiristawu amodha apeeno emutajhihe oliye?

3. ‘Sidadi’ ela ajheha Abaraawu enatapulela?

³ sidadi ajheha Abaraawu waali Omwene wa Mulugu. Omwene ola namathongaya di Yesu ni makiristawu oothikitheliwa owakwana 144 000. Pawulo ohuliganiha Omwene ola ni ‘sidadi ya Mulugu ookalawo, Jeruzale oodhulu.’ (Heb. 12:22; Apo.  5:8-10; 14:1) Yesu ahahudhiha anamaharaye wi elobelege elobaga wihina omwene oyo odhe, wi efunelo ya Mulugu yereye velaboni yavati ninga enereyela odhulu. — Mat. 6:10.

4. Ninga munawogela Génesis 17:1, 2, 6, ethu baani Abaraawu anoniliye wodhela sidadi obe Omwene apaganye Mulugu?

⁴ Abaraawu ahinona dhithu dhatedhene wodhela Omwene wa Mulugu? Newene. Mwa yaka dhowinjhivadhene dhithu dhatedhene wodhela Omwene wa Mulugu, dhaali ‘dhoviteya dhotaleleya.’ (Efé. 1:8-10; Col. 1:26, 27) Mbwenye Abaraawu ahinona wi amodha wa odhuulu waye yere okala mamwene. Mwinyene Yehova ahimpaganya (Omwileri Génesis 17:1, 2, 6.) Mbwenye Abaraawu ahikanna nroromelo nooliba ni dhopaganya dha Mulugu, yakala ninga oliye era omoona muthikitheliwi obe Messiya aakale mwene a Omwene wa Mulugu. Mwaha wa yeyo, Yesu ahawaddela majudewu amalabo aye wi: ‘Babinyu Abaraawu ahihagalala vanlubale mwaha oojheha woona nlabo naga, mbwenye oliye nuwona ahihagalala.’ (João 8:56.) Eyo enowoniha wi Abaraawu ahinona wi athu amodha oodhuulu waye yere okala amwene yakaviheriwege ni Yehova, oliye ahithoma ojheha wakwanela wa mpaganyo ndha Yehova eriliyena.

5. Nnone addi wi Abaraawu oojhehedha ‘sidadi’ yegeredhiwe ni Mulugu?

⁵ Abaraawu oonihe ni makalelo baani wi oojhehedha ‘sidadi’ yegeredhiwe ni Mulugu? Abaraawu kaakavihere omwene waathu. Oliye ootamela mburo buumburo, mbwenye kaakavihere omwene waathu. Ohiya eyenove, Abaraawu kaaxixile okunga omwene wayene. Mbwenye oliye odhowave amwiwelelaga Yehova ni ajhehaga wakwanela wa mpaganyo Dhaye. Mwaha wa yeyo, Abaraawu ahoniha wi nroromelo naye naali nooliba. Nnafuna nawone makathamiho yanfwanyile Abaraawu ni none ethu baani nnahudherihuvo ni yotajhiha ela.

6. Sidadi yo Uri yaali avi?

⁶ Sidadi Abaraawu akalesiye yaali yobareleya, yoriya ni enlubale. Sidadi ele yahikanna muuru wootama, seresereya yahikanna  mwihinjhe miraru dhooddiha. Athu a sidadi yo Uri yahinona oleba ni yahinona konta pamadhene. Podi wera sidadi ele yaali sidadi mweriwa malondda, mwaha wi ehifwanyiwa makarta a malondda. Sidadi yo Uri dhahikalawo nyumba dhamagiwe ni boloku dhoopaha, dhadhirimiwe dhinoopintariwa. Nyumba dhimodha dhookanna makwarto owakwana 13 obe 14, vathaddo vateveene vowekiwa mabwe.

7. Mwahaya bwaddi Abaraawu ohowela omuroromela Yehova?

⁷ Wihina Abaraawu ahiye sidadi ele yobareleya ni yoriya, oliye ohowela aroromele wi Yehova ere omusamalela oliye ni amudhaaye. Mwahaya bwaddi? Mwahaya bowi, aliwa yaakalege muddammwani elabo yo Kanaa. Ahaniyenawo nyumba yoomagiwa ni boloku dhoopaha, wahaali muuru newene wahaali mwihinjhe dhooddiha dhaambarelege. Ohiya eyenove, oliye ni amudhaaye podi wera yakale ethu yokweya wereliwa ethu yabure naathu ootakala murima.

8. Ethu baani yampadduwele Abaraawu?

⁸ Abaraawu aherana efunelo ya Mulugu, podi dhigarive ndo oliye ahifwanyiwa makathamiho. Motajhiha, sidadi atamelewo Abaraawu yahifiyawo dala. Abaraawu kaana makalelo owajhiha amudhaaye. Mwaha wa yeyo, oliye otamela Wijipitu wi akalewo mudhidhi vang’onove. Vano agali wewule, Farawo mwene a elabo yele omuthukula Sara mwadha Abaraawu. Vano Yehova omwaddela Farawo wi amuwelihe Sara. Farawo ahinathi omuweliha Sara, onowanda wubuwela makalelo Abaraawu aliye? — Gén. 12:10-19

9. Emudhi ya Abaraawu yaafwanyiwe makathamiho baani?

⁹ Ethu yathabwile orusa sowi, emudhi ya Abaraawu yahikanna makathamiho. Sara mwadha Abaraawu kaabala. Dhahivira yaka dhowinjhivadhene aliwa yawunddagana makathamiho yala. Vano Sara othoma wi agari mudhari aye agone ni Abaraawu. Sara ubuwela wi oliye ni mamune yere okanna mwana wodhela agari. Vano Agari nuukanna wari ya Ejimayeli, oliye wambela omunyemula Sara. Vano ahiyana ala abili wambela ohiwanana ofiyedha Agari othawa vaade. — Gén. 16:1-6.

10. Ethu baani yampadduwele Izaki ni Ejimayeli yehile nroromelo na Abaraawu?

¹⁰ Nuuvira mudhidhi Sara ombala mwana a Abaraawu, oliye omutwa ndina na Izaki. Abaraawu kaana nsakulo, owadhivela abileene Ejimayeli ni Izaki. Mbwenye, mwaha wa makalelo Ejimayeli amweddihiye Izaki yohoweleya Abaraawu amwigare Agari ni Ejimayeli edhowege. (Gén. 21:9-14) Nuuvira mudhidhi, Yehova omuloba Abaraawu wihina anvahe Izaki ninga Mukutho. (Gén. 22:1, 2; Heb. 11:17-19) Wa dhithu ndha dhapadduwa, Abaraawu ohowela oonihe nroromelo, wi Yehova ere wakwaneliha mpaganyo dhaye wodhela odhuulu waye.

11. Abaraawu ahimujheha Yehova nuuliba murima, mwahaya bwaddi?

¹¹ Egumi yaye yatene Abaraawu ohowela omujheha Yehova wakwaneliha mpaganyo dhaye. Abaraawu avenyaga sidadi yo Uri ni amudhaaye podi wera aanna yaka okwaranya 70. (Gén. 11:31–12:4) Dhahivira yaka 100 Abaraawu akalaga muddammwani, atamelaga mburo dhohiyana-hiyana elabo yo Kanaa. Abaraawu akwile aganna yaka 175. (Gén. 25:7) Podi dhigalive ndo, oliye koonile mpaganyo dha Yehova wodhela odhuulu waye dhakwanelaga. Newene oliye koonile sidadi obe Omwene wa Mulugu okungiwaga. Naari dhigarive ndo, Bibliya anawoga wi Abaraawu akwile ‘agapanre mabasa apama.’ (Gén. 25:8) Podive afwanyiwaga makathamiho, Abaraawu odhowave amuroromelaga Yehova nuuhagalala.  Yamukavihera Abaraawu oliba murima Yaali ddi? Yaali ethu Yehova amwereliye mwigumini mwaaye yatene. Yehova ahimbarela ni ahimweddiha ninga mukwaye — Gén. 15:1; Isa. 41:8; Tia. 2:22, 23.

12. Iyo nnajheha ddi, ki vano nnahudhere ddi?

¹² Ninga Abaraawu, iyo nnajheha sidadi enna ntxikwa nebaribari. Mbwenye ethu nnajhehihu kahiyo okungiwa wa sidadi ela, mwaha wi Omwene wa Mulugu ohukungiwa odhulu yaka ya 1914 ni ohambela othonga odhulu. (Apo. 12:7-10) Mbwenye iyo nnajheha wi omwene oyo orome othonga elabo yatene yavati. Nijhehaaga Omwene wi orome othonga elabo ela yavati, iyo nnere ofwanyiwa makathamiho ninga aafwanyiwe Abaraawu. Peeno adhari a Mulugu enowanda omutajhiha Abaraawu ni Sara? Dhopadduwa dha mwigumini dha addibila dhinadha mu a Sentinela, dhinotonyihedha wi athu owinjhiva peeno enoniha nroromelo ni ovilela ninga Abarawu ni Sara. Vano nnafuna nihudhere dhopadduwa ndha ni noone ethu baani nnahudherihuvo

13. Ohudhere ddi ni dhopadduwa dha mwigumini dha ddibila Bill?

¹³ Wilibihere wihina werena kukuthu. Naafunaga wihina sidadi obe Omwene wa Mulugu okose epaddi mwigumini mwehu, enohoweleya wilibihedha wihina nimuhagalalihe Mulugu ninga Abaraawu. (Mat. 6:33; Mar. 10:28-30) Osugwe yotajhiha ya ddibila anithaniwa Bill Walden. * Bill ambele omuhudhera Bibliya ni Anamona a Yehova yaka ya 1942, akosaga kurso yohenjinyeru eskola enlubale yo Estados Unidos. Purusori aye afuna wi oliye nuumala okosa kurso adhowe alabege, mbwenye Bill okoodda, oliye omwaddela purusori aye wi afuna alabihedhe mudhidhaye amulabelaga Mulugu ohiya wapara mabasa ohenjinyeru. Kuwavirile mudhidhi wowinjhiva, Bill withaniwa wi adhowe okoddoni. Ni makalelo apama Bili okoodda, mwaha wa yeyo oliye othomeliwa wi apagari korowa dhowakwana 640 000, vadhuluva ovokeriwa mukadeya  wihina amale yaka 5 agali mukadeya, mbwenye yapadduwile sowi oliye ahikumihiwa nuuvira yaka 3. Mudhidhi nuuvira oliye withaniwa oskola oJeliyadi, agahudhere oliye olaba ninga misiyonariyu elabo yo África. Vano Bill omutela murogola anithaniwa Eva, aliwa okosa kukuthu wihina emulabele Yehova ninga amisiyonariyu elabo yo África. Mudhidhi nuuvira aliwa ohogolowela o Estados Unidos wihina yaasamalele amaye Bill. Awogaga wodhela Dhopadduwa dha mwigumini mwaaye, Bill wera: “Ginohagalala okanna oneti woolabihedhiwa ni Yehova okwaranya yaka 70. Ginomutamalela oliye malabo matene mwaha wi ohugitonyihedha mabasa apama.” We onofuna omulabela Yehova mudhidhi wamutene wavayekiwa?

14-15. Ohudhere ddi ni Dhopadduwa dha mwigumini dha Apostolidis ni Eleni?

¹⁴ Kuwubuwele wi makathamiho kinuufwanye. Yotajhiha ya Abaraawu enanitonyihedha wi podive athu esakule omulabela Yehova mudhidhi wamutene enofwanyiwa makathamiho. (Tia. 1:2; 1 Ped. 5:9) Osugwe ethu empadduwele ddibila Aristotelis Apostolidis. * Oliye abaddiziwe yaka ya 1946 elabo yo Grecia. Vano yaka ya 1952 oliye onveva murogola anithaniwa Eleni aanna dholuba dhimodhave. Mbwenye yowuukuliha sowi, murogola ole ofwanyiwa oredda wogogo. Vano amediku omoperari, nutelana oredda ole omuhogolowela. Dila yanabili amediku omoperari Eleni ovenyihamo oredda ole, vano oliye kaanda owoga. Podi dhigari ndo, Eleni oodhowave aaparaga mabasa oomuzimuni naarive anamathonga yaharaharaga mudhidhi yole.

¹⁵ Dhihivira yaka 30 ddibila Aristotelis amusamalelaga mwariye. Mudhidhi yoyo amusamalelaga mwariye, oliye oolaba ninga namaholela mulogo, olaba komisawu ya musonkano ni ohukavihera omaga Nyumba ya Musonkano. Teto yaka ya 1987, Eleni alaleyaga omwera asidenti. Yathagaragaya sowi, oliye obulela yaka tharu, nuwindo okwa. Aristotelis onowoga Dhopadduwa dha mwigumini mwaaye egi: “Dhoweha, makathamiho ni dhithu  dholiganyedha dhinagifwanya dhinogoniha wi ginohowela okala muthu oovilela ni ooliba murima. Mowindo, Yehova onogivahesa kopolo wihina gande ogonjhiha makathamiho atene.” (Sal. 94:18, 19) Yehova onowadhivela athu enilibihedha wihina yerena efunelo yaye naarive efwanyiwaga makathamiho!

16. Dholaga baani dhapama ddibila Knorr anvahiliye mwariye?

¹⁶ Ojheehege dhoosogoro. Abaraawu oojheha dhithu Yehova afuniye onvaha, wubuwela dhithu dhendha dhoomukavihera oliye owanana makathamiho. Murogola anithaniwa Audrey Hyde, mamune ooroma ithaniwa Nathan H. Knorr, okwa mwaha oredda wa câncer, teto mamune anabili ithaniwa Glenn Hyde okanna oredda onithaniwa Alzheimer.  *Podi dhigari ndo, oliye owilibihedha wihina akale oohagalala. Oliye onowoga wi ethu yamukavihere sile awogile ddibila Knorr ahinathi okwa. Audrey wera: “Nathan ogubusedha wi: ‘Nakwa yojheha yehu sowi nivenyihiwe nnivahiwe egumi yahinamala.’ Vano oliye ogikongomedha, owoga: ‘Ojheehege dhithu onafuniwe wakela osogolo.’ Oliye owogave wera: ‘waparege mabasa, ovede olabihedha egumawo waakaviheraga athu amodha, eyo enere wukavihera okanna egumi yohagalala.’” Yolaga ela yaali yapama ‘ohagalala ojhehaga’ ni wakavihera athu amodha! — Rom. 12:12.

17. (a) Dhithu baani dhinanikavihera oojheha ndhe dhinadha osogolo?(b) Mwamakalelo baani olabihedha ndhe dhilebiwe va Miqueias 7:7 dhinanikaviheriwa wawakela mareeliho oosogolo?

¹⁷ Peeno nihikanna dhithu dhowinjhiva dhinanithukulela ororomela dhithu dhosogolo. Dhithu dhinapadduwa mwilaboni peeno dhinononiha wi nnakalawo malabo ookuthula a elabo ela yabure. Ovanene sidadi obe Omwene wa Mulugu onerege othonga elabo yavati. Mareeliho owinjhiva nnawakelihu, ehinaajhombe fuwawona ale nnadhivelihu evenyihiwaga muukwani. Mudhidhi yoyo Yehova anere onvenyiha Abaraawu ni amudhaaye aavahe egumi yahinamala mwaha wa nroromelo newa. Ki we, athu ala yavenyihiwaga onere okalawo wihina wawakele? We wilibihera okosaga kukuthu wihina okavihere Omwene wa Mulugu, wadhowagave oganna nroromelo naari ofwanyiwaga makathamiho, ni wahudhera omujheha Yehova wihina akwanelihe mpaganyo dhaye, onere okalawo wi wawakele athu alena enaavenyihiwe muukwani. — Omwileri Miqueias 7:7.