1. Oyendji yomaapiya yaJehova oya ninga omaiyambo geni, nomolwashike ye ga ninga?

AAPIYA YAKALUNGA omamiliyona kunena, oya ninga omaiyambo. Aamwatate naamwameme oyendji oya tokola kaaya ye mondjokana. Mboka ya hokana ohaya tokola kaaya mone aanona manga. Omaukwanegumbo ogendji ohaga kaleke oonkalamwenyo dhawo paunathangwa. Ooitaali ayehe mboka ohaya ningi omatokolo ngoka omolwetompelo limwe alike, ano okulongela Kalunga pakuudha. Oya gwanenwa kwaashoka ye na, noye na einekelo kutya Jehova ote ke ya kwathela ya mone ashihe shoka ya pumbwa. Mbela otaye ki ipa uusama omolwetokolo ndyoka ya ninga? Aawe! Omolwashike tatu tile ngawo? Etompelo limwe olyo kutya Jehova okwa li a yambeke Abraham, “he yopambepo yaayehe mboka yi itaala Kalunga.” — Rom. 4:11.

2. (a) Shi ikolelela kAahebeli 11: 8-10, 16, omolwashike Abraham a li e na ehalo lyokutembuka mo muUr? (b) Oshike tatu ka kundathana moshitopolwa shika?

² Abraham okwa thigi po onkalamwenyo ombwanawa moshilando Ur, nehalo ewanawa. Omolwashike? Omolwaashoka okwa li a tegelela “oshilando shoka shi na omikanka dha kolelela.” (Lesha Aahebeli 11:8-10, 16.) “Oshilando” shoka oshike? Omashongo geni Abraham a li a taalele manga a tegelela oshilando shoka shi tungwe? Ongiini tatu vulu okukala twa fa Abraham nosho wo mboka yopethimbo lyetu, mboka ya li ya landula oshiholelwa she?

3. “Oshilando” shoka Abraham a li a tegelela oshike?

³ Oshilando shoka Abraham a li a tegelela, Uukwaniilwa waKalunga. Uukwaniilwa mboka owa thikama po muJesus Kristus nosho wo mAakriste aagwayekwa 144 000. Paulus okwa popi Uukwaniilwa  mboka wu li ‘Jerusalem shomegulu, oshilando shaKalunga omunamwenyo.’ (Heb. 12:22; Eh. 5:8-10; 14:1) Jesus okwa longa aalanduli ye ya galikane Uukwaniilwa owo tuu mboka, taya pula wu ye, opo ehalo lyaKalunga li gwanithwe kombanda yevi ngaashi hali gwanithwa megulu. — Mat. 6:10.

4. Shi ikolelela kuGenesis 17:1, 2, 6, Abraham okwa li e shi shi thike peni kombinga yoshilando, ano Uukwaniilwa mboka Kalunga u uvaneka?

⁴ Mbela Abraham okwa li ngaa e shi kutya oshilongo shaKalunga otashi ka kala shu unganekwa ngiini? Aawe. Uule womathelemimvo ogendji, uuyelele mboka owa kala wu li “oshiholekwa.” (Ef. 1:8-10; Kol. 1:26, 27) Ihe Abraham okwa li e shi kutya yamwe yomoluvalo lwe otaya ka ninga aakwaniilwa. Oya li taya ka ninga aakwaniilwa, molwaashoka Jehova osho u uvaneka. (Lesha Genesis 17:1, 2, 6.) Abraham okwa li e na eitaalo lya kola momauvaneko gaKalunga, shoka she mu ningitha a kale a fa e wete Omugwayekwa, ano Mesiasa, ngoka ta ka kala Omukwaniilwa gwUukwaniilwa waKalunga. Omolwetompelo ndyoka, Jesus okwa li a vulu okulombwela Aajuda yopethimbo lye a ti: “Ho Abraham okwa nyanyukwa pombanda okumona esiku lyandje; okwe li mono nokwa nyanyukwa.” (Joh. 8:56) Osha yela kutya Abraham okwa li e shi kutya yamwe yomoluvalo lwe oya li taya ka kala oshitopolwa shUukwaniilwa mboka Jehova a li ta ka dhika po.

5. Otu shi shi ngiini kutya Abraham okwa li a tegelela oshilando shoka sha sindwa kuKalunga?

⁵ Abraham okwa li u ulike ngiini kutya okwa tegelela oshilando, shoka sha sindwa kuKalunga? Shotango, Abraham okwa kala omweendaguli, ihaa kala ethimbo ele pehala lyontumba noka li a ambidhidha omukwaniilwa gwopantu. Shimwe ishewe, Abraham ka li a kambadhala okudhika po uukwaniilwa we mwene. Pehala lyaashono, okwa tsikile okuvulika kuJehova nokwa tegelele a gwanithe po euvaneko Lye. Mokuninga ngawo, Abraham oku ulike eitaalo lya kola muJehova. Natu ka kundathaneni gamwe gomomashongo ngoka a li a taalele, nokutala shoka tatu vulu okwiilonga koshiholelwa she.

6. Ur osha li oshilando sha tya ngiini?

⁶ Abraham okwa li a thigi po oshilando Ur, shoka sha li sha gamenwa, shi na onkalamwenyo yuuzeko naantu yamo oya li ya longwa naayamba. Oshilando shoka osha li shi na  omadhingililokuma omaleeleka nosha li shi na omikanka dhomeya koombinga ndatu dha ya muule. Aantu yomuUr oya li ye shi okunyola nawa noya li ye shi omwaalu. Shimwe ishewe, oshilando shoka otashi vulika sha li ondingandinga yomalandithilo, naampoka sha li, aalafululi oya adha po oondokumende dhi na ko nasha nokungeshefa. Omagumbo gaamoka oga li haga tungwa noondhopi, ga kolongwa komakuma noga paindwa nopainda ontokele. Gamwe oga li haga kala ge na oondunda 13 nenge 14 noge li molugumbo.

7. Omolwashike Abraham a li e na okwiinekela kutya Jehova ote ke mu gamena pamwe nuukwanegumbo we?

⁷ Abraham okwa li e na okwiinekela kutya Jehova ote ke mu gamena pamwe nuukwanegumbo we. Omolwashike? Dhimbulukwa kutya Abraham naSara oya li ya thigi po egumbo lyawo moshilando Ur, mono ya li haya kala ya gamenwa noye na onkalamwenyo ombwanawa, ya ka kale haya zi mootenda momalundu gaKaanan. Ye nuukwanegumbo we, kaya li we ye na egameno ndyoka ya li ye na moshilando Ur. Pehala lyaashono, ngashingeyi oya li ye li moshiponga shokuponokelwa kaatondi.

8. Pompito yimwe, Abraham okwa li a taalele oonkalo dhini?

⁸ Abraham okwa li ha longo ehalo lyaKalunga, ihe pompito yimwe osha li oshidhigu kuye okupalutha uukwanegumbo we. Okwa li a taalele ondjala yekomba ndjoka ya li moshilando moka a tuminwa kuJehova. Ondjala ndjoka oya li ondhigu noonkondo, shoka sha ningitha Abraham a tembudhile uukwanegumbo we pakathimbo kuEgipiti. Ihe sho a li muEgipiti, Farao, omupangeli gwoshilongo, okwa kutha po omukulukadhi gwe. Dhiladhila owala kunkene Abraham a li u uvite, sho Farao a kutha po omukulukadhi gwe, Sara, sigo Jehova a ningitha Farao e mu galulile kuye. — Gen. 12:10-19.

9. Omashongo geni Abraham a li a taalele muukwanegumbo we?

⁹ Onkalamwenyo muukwanegumbo waAbraham oya li ondhigu. Omuholike gwe, Sara, ka li ha mono aanona. Uule womimvo oya li ye na okwiidhidhimikila oshinima shoka. Mokweendela ko kwethimbo, Sara okwa gandja omupika gwe omukadhona, Hagar, kuAbraham, opo a vule oku ya valela aanona. Ihe sho Hagar a ningi etegelelo, okwa tameke okudhina Sara. Onkalo oya nayipala noonkondo sigo Sara a tidha mo Hagar megumbo. — Gen. 16:1-6.

10. Uupyakadhi washike wa li wa holoka pokati kaIsmael naIsak, mboka we shi ningi oshidhigu kuAbraham a kale i inekela muJehova?

¹⁰ Pehulilo Sara okwa ningi etegelelo nokwa valele Abraham okanona kokamati, hoka a luku Isak. Abraham okwa li e hole oyanamati Ismael naIsak. Ihe molwaashoka Ismael okwa li a sheke Isak, Jehova okwa lombwele Abraham a tidhe Ismael naHagar. (Gen. 21:9-14) Lwanima, Jehova okwa pula Abraham a yambe po omwana Isak. (Gen. 22:1, 2; Heb. 11:17-19) Iikando ayihe iyali, Abraham okwa kala i inekela kutya mokweendela ko kwethimbo, Jehova ota ka gwanitha po ashihe shoka u uvaneka kombinga yoyanamati.

11. Omolwashike Abraham a li e na okutegelela neidhidhimiko Jehova?

¹¹ Momukokomoko gwethimbo ndyoka, Abraham okwa li e na okwiilonga okutegelela neidhidhimiko Jehova. Abraham otashi vulika a li e na omimvo dhi vulithe po 70, sho ye nuukwanegumbo we ya tembuka mo muUr. (Gen. 11: 31–12:4) Uule womimvo ethele lwaampono, okwa li a kala mootenda ta endagula nevi lyaKaanan. Abraham okwa si sho e na omimvo 175. (Gen. 25:7) Ihe ina mona sho Jehova a gwanitha euvaneko lye lyokupa oluvalo lwe evi moka a kala te endagula. Ina kala nomwenyo sigo a mono oshilando, ano Uukwaniilwa waKalunga sho tawu dhikwa po. Nonando ongawo, Abraham okwa popiwa kutya okwa si “muukokele uunene nokwa li a kuta omwenyo.” (Gen. 25:8) Nonando okwa kala nokuungaunga nomashongo agehe ngoka, Abraham okwa kala e na eitaalo lya kola nokwa kala e na ehalo okutegelela Jehova u ukithe iinima. Omolwashike a li a vulu okwiidhidhimika?  Omolwaashoka onkalamwenyo ye ayihe, Jehova okwa kala noku mu gamena nokwa kala e mu tala ko e li kuume ke. — Gen. 15:1; Jes. 41:8; Jak. 2:22, 23.

12. Otwa tegelela shike, noshike tatu ka kundathana?

¹² Ngaashi Abraham, natse otwa tegelela oshilando shi na omakankameno ga kolelela. Ihe tse inatu tegelela shi tungwe. Uukwaniilwa waKalunga owa dhikwa po mo 1914 notawu pangele nale megulu. (Eh. 12:7-10) Manga twa tegelela wu ye wu pangele evi alihe, otatu ka pita moonkalo odhindji dha faathana naandhoka Abraham naSara ya li ya taalele. Mbela aapiya yaJehova yokunena oya vula ngaa okuholela oshiholelwa shaAbraham? Eeno! Oondjokonona ndhoka hadhi kala mOshungolangelo odhe shi ulika kutya oyendji kunena oye na eitaalo neidhidhimiko ngaashi Abraham naSara. Natu ka kundathaneni dhimwe dhomoondjokonona ndhoka, tu mone shoka tatu vulu okwiilonga mo.

13. Oshike wi ilonga moshimoniwa shomumwatate Walden?

¹³ Kala wu na ehalo lyokuninga omaiyambo. Ngele otwa hala okupititha komeho monkalamwenyo yetu oshilando shaKalunga, ano Uukwaniilwa, otu na okukala ngaashi Abraham ngoka a li e na ehalo lyokuninga omaiyambo a nyanyudhe Kalunga. (Mat. 6:33; Mark. 10:28-30) Natu ka taleni koshiholelwa shomumwatate Bill Walden. * Mo 1942, Bill okwa adhika e li pokumana okwiilongela uuindjinia wokutunga, sho a tameke okukonakona nOonzapo dhaJehova. Gumwe gwomaalongi yaBill okwa li a ningi elongekidho, opo Bill a mone iilonga konima ngele a mana, ihe Bill okwe yi tindi. Okwe mu yelithile kutya ye okwa tokola okulongela Kalunga pakuudha, pehala lyokutaamba ko iilonga mbyoka hayi futu nawa. Konima yethimbo, Bill okwa pewa elombwelo kepangelo a ye muukwiita. Okwe shi tindi, nokwa pulwa a fute oodola dhaAmerika 10 000, e ta tulwa mondholongo uule woomvula ntano. Okwa ka mangululwa konima yoomvula ndatu. Lwanima okwa hiywa kosikola yaGilead nokwa kala omutumwa muAfrika. Konima yethimbo Bill okwa hokana Eva noya longo pamwe moAfrika, shoka sha li she ya pula ya ninge omaiyambo. Konima yomimvo dhontumba, oya  shuna koAmerika, ya ka sile yina yaBill oshimpwiyu. Bill okwa hokolola onkalamwenyo ye paufupi a ti: “Ohashi lilitha ndje uuna tandi dhiladhila kuuthembahenda uunene mboka nda li ndi na mokulongithwa kuJehova uule womimvo dhi vulithe po 70. Olundji ohandi mu pandula sho a wilike ndje ndi longithe okukalamwenyo kwandje moku mu longela.” Mbela ngoye ito vulu okulongela Jehova miilonga yethimbo lyu udha?

14-15. Oshike wi ilonga koshimoniwa shomumwatate nomumwameme Apostolidis?

¹⁴ Ino tegelela onkalamwenyo yoye yi kale kaayi na omaupyakadhi. Oshiholelwa shaAbraham otashi tu longo kutya naamboka wo ya kala nokulongela Jehova onkalamwenyo yawo ayihe, ohaya adhika komaupyakadhi. (Jak. 1:2; 1 Pet. 5:9) Ndhindhilika nkene shoka sha li sha ningilwa omumwatate Aristotelis Apostolidis. * Okwa ninginithwa momumvo 1946 muGreka, nomo 1952 okwa yaleke omumwameme gwedhina Eleni, ngoka a li e na omalalakano ga fa ge. Ihe Eleni okwa ka kwatwa kuuwehame nokwa monika oshitumbuka kuuluyi. Oshitumbuka osha tandwa po, ihe konima owala yoomvula oonshona sho ya hokana, osha ka galuka ishewe. Oondokotola odhe mu tanda ishewe, ihe okwa kwatwa kombanda, e ta kala ihaa vulu okupopya nawa. Nonando okwa kala te ehama nosho wo omapataneko gepangelo ngoka ga li po, Eleni okwa tsikile okukala Onzapo olaadhi.

¹⁵ Omumwatate Aristotelis okwa kala ta sile oshimpwiyu omukulukadhi gwe uule womimvo 30. Momukokomoko gwomimvo ndhoka, okwa kala ta longo e li omukuluntugongalo, ha longo mookomitiye dhiigongi nokwa li wo a kwathele mokutunga oshinyanga shiigongi. Opo nduno, momumvo 1987, Eleni okwa li e ehamekwa moshiponga manga a li tu uvitha. Okwa tulwa komashina gokukaleka omuntu nomwenyo, nokwa si konima yomimvo ndatu. Aristotelis okwa popi kombinga yankene shoka a pita musho she mu guma a ti: “Uule womimvo oonkalo oondhigu niinima inaayi tegelelwa oya pula ndje lela eidhidhimiko nokwaateka omukumo. Nonando ongawo, Jehova okwa kala aluhe ha pe ndje oonkondo ndi vule okwiidhidhimikila oonkalo ndhoka.” (Eps. 94:18, 19) Jehova oku hole noonkondo aapiya ye mboka haya ningi ngaashi taya vulu, nonando oya taalela omaupyakadhi.

16. Omumwatate Knorr okwa li a pe omukadhi omayele omawanawa geni?

 ¹⁶ Kala ho gandja eitulomo konakuyiwa. Abraham okwa li a gandja eitulomo komalaleko nuuyamba ngoka Jehova a li te ke mu pa, naashoka oshe mu kwathele i idhidhimikile omaupyakadhi ngoka a li a taalele. Omumwameme Audrey Hyde naye okwa li a gandja eitulomo konakuyiwa, nonando okwa li a silwa omusamane gwe gwotango, Nathan H. Knorr, ngoka a si kokankela nosho wo omusamane gwe omutiyali, Glenn Hyde, ngoka li te ehama omukithi ngoka hawu kutha omadhiladhilo gomuntu pehala, hagu ithanwa Alzheimer. * Okwa ti kutya okwa kwathelwa kwaashoka omumwatate Knorr e mu lombwele, sho a li e li pokusa. Okwa ti: “Nathan okwa dhimbulukitha ndje kutya: ‘konima yeso otu na etegameno, noitatu ka hepekwa we kuuwehame.’ Opo nduno okwa ladhipike ndje a ti: ‘Tala komeho, oshoka oko ku na ondjambi yoye.’ . . . Okwa gwedha ko wo a ti: ‘Kala wi ipyakidhila aluhe, kala to longele yalwe uuwanawa okukalamwenyo kwoye akuhe. Okuninga ngawo otaku ke ku etela enyanyu.’” Okukala tatu longele yalwe uuwanawa ‘nokunyanyukilwa etegameno’ kage shi tuu omayele omawanawa! — Rom. 12:12.

17. (a) Omolwashike tu na okugandja eitulomo konakuyiwa? (b) Ongiini okulandula oshiholelwa shoka shi li muMika 7:7, taku ke tu kwathela tu ka nyanyukilwe omalalekonuuyamba gomonakuyiwa?

¹⁷ Kunena otu na omatompelo ogendji gokugandja eitulomo konakuyiwa. Iiningwanima mbyoka tayi ningwa muuyuni, otayi shi ulike sha yela kutya otu li pehulilo lyomasiku gahugunina guuyuni mbuka. Masiku itatu ka tegelela we Uukwaniilwa waKalunga wu tameke okupangela evi alihe. Limwe lyomomalaleko nuuyamba ngoka tatu ka nyanyukilwa, okumona aaholike yetu taya yumudhwa kuusi. Pethimbo ndyoka, Jehova ota ka laleka nuuyamba Abraham, omolweitaalo neidhidhimiko lye moku mu yumudha pamwe nuukwanegumbo we, ya kale nomwenyo sigo aluhe kombanda yevi. Mbela opo ngaa to ka kala wu ya hambelele? Otashi vulika, ngele owa ningi ngaashi Abraham, mokukala ho ningi omaiyambo omolwUukwaniilwa waKalunga, mokukala omudhiginini kuJehova, nonando owa taalela omaupyakadhi nongele owi ilongo okutegelela neidhidhimiko Jehova u ukithe iinima. — Lesha Mika 7:7.