1. Hadia manö zi no latehegö iraono mbanua Lowalangi, ba hadia mbörö?

IADAʼA, oya zi no latehegö iraono mbanua Lowalangi si zuta faʼato. Ato ndra talifusöda sangai angetula enaʼö lö mangowalu. So ösa wongambatö si no mangai angetula enaʼö lö laʼokhögö ndraono ba waʼalio. Ba oya göi nösi nomo sangöna-ngönaiʼö faʼaurira. Hana wa terou dödöra ba wamalua daʼö? Börö me omasi ira lafalua zabölö sökhi ba wamosumange Yehowa. Owua-wua dödöra ba lafaduhusi tödö wa hasambalö iʼasogö fefu zoguna khöra. Lö afatö dödöra ibeʼe Yehowa. Hana wa tola tafaduhusi tödö daʼö? Börö me iʼotarai me föna, lö mamalö iʼasogö zoguna ba nono mbanuania Yehowa. Duma-dumania, ifahowuʼö Gaberahamo, ”ama zamati ba niha fefu”.​—Rom. 4:11.

2. (a) Moloʼö Heberaiʼo 11:8-10, 16, hadia mbörö wa iröi danö Guri Aberahamo? (b) Hadia nitutunöda ba artikel daʼa?

² Aoha gölö Gaberahamo ba wondröi faʼaurinia si sökhi ba mbanua Guri. Hadia mbörö? Börö me idöna-döna ”mbanua andrö, saro dane-dane”. (Baso Heberaiʼo 11:8-10, 16.) Hadia ”mbanua” nidöna-döna Gaberahamo? Hadia manö gabula dödö nitaögö Gaberahamo sagötö wombaloinia faʼamosindro mbanua andrö? Ba hewisa woloʼöda duma-duma Gaberahamo hegöi niha sangoromaʼö famati simane yaʼia ba götöda iadaʼa? Artikel daʼa zanolo yaʼita ba wameʼe fanema li ba wanofu-nofu andrö.

3. Hadia ”mbanua” nidöna-döna Gaberahamo?

³ Banua nidöna-döna Gaberahamo yaʼia daʼö Famatörö Lowalangi. Yesu zi tobali Razo ba Wamatörö andrö, ba so 144.000 niha nibayoini si fao awönia mamatörö. Ifotöi Wamatörö andrö Faulo, ”banua Lowalangi sauri yaʼia daʼö Yeruzalema si so ba zorugo”. (Heb. 12:22; Fam. 5:8-10; 14:1) Ifahaʼö  ndra soloʼö yaʼia Yesu enaʼö laʼangandröi waʼatohare Wamatörö andrö, irege tola alua gohitö dödö Lowalangi ba gulidanö simane ba zorugo.​—Mat. 6:10.

4. Moloʼö 1 Moze 17:1, 2, 6, hadia zaboto ba dödö Gaberahamo sanandrösa ba mbanua, mazui Famatörö nifabuʼu Lowalangi?

⁴ Hadia no aboto ba dödö Gaberahamo fefu hadia ia zoʼamakhaita ba Wamatörö Lowalangi? Löʼö. No ”si tobini niʼamoniʼö” daʼö ba zi hauga ngaotu fakhe faʼara. (Ef. 1:8-10; Kol. 1:26, 27) Hizaʼi, aboto ba dödönia wa so ösa dania ngaʼötönia zi tobali razo, börö me daʼö nifabuʼu Yehowa khönia. (Baso 1 Moze 17:1, 2, 6.) Mamati sibai Gaberahamo ba mbuʼusa li Lowalangi irege hulö no iʼila Mesia, si tobali Razo ba Wamatörö Lowalangi. Daʼö mbörö wa imane Yesu ba niha Yahudi, ”Omuso sibai dödö namami Aberahamo börö me iʼila ngaluo waʼatoharegu. No ikhalaigö ba omuso dödönia.” (Yoh. 8:56) Sindruhu-ndruhu aboto ba dödö Gaberahamo wa tefarahu ngaʼötönia ba Wamatörö nifasindro Yehowa. Si fao faʼebolo dödö, idöna-döna wamalua Yehowa mbuʼusa li andrö.

5. Hezo tola taʼila wa idöna-döna mbanua nifasindro Lowalangi Aberahamo?

⁵ Hadia dandra sangoromaʼö wa idöna-döna Aberahamo ”mbanua” andrö mazui Famatörö nifasindro Lowalangi? Si oföna, lö irai tobali ia ono mbanua ba zi sambua famatörö. Asese findra ia, lö manaroʼo ia ba zi sambua nahia, ba lö irai ituhini razo ba zi sambua famatörö. Si dua, lö ifasindro wamatörönia samösa Aberahamo. Hizaʼi, lö aetu iʼoʼö niwaʼö Yehowa ba idöna-döna waʼalua mbuʼusa linia. Daʼa zangoromaʼö wa mamati sibai Gaberahamo khö Yehowa. Iadaʼa, datatutunö hadia manö gabula dödö nitaögö Gaberahamo ba hadia wamahaʼö si tola tahalö moroi ba duma-dumania.

6. Hewisa mbanua Guri andrö?

⁶ No banua si lö ametaʼuö ba safönu faʼahono dödö mbanua Guri niröi Gaberahamo. No tefasui mbanua andrö faoma öli sagalawa, ba so lala nidanö sagabakha ba zi tölu watalinga danö. Ato niha si kayo hegöi sagalawa sekola ba mbanua andrö. No tehöngö waʼonekhera sanandrösa ba wangerai hegöi ba wanura. Ba gadudula mbanua andrö, oya musöndra zura soʼamakhaita ba wogale. Ba daʼö taʼila wa tola manö banua andre zi tobali  nahia waʼowulo ndra sogale me götö daʼö. Tefazökhi nomo ba mbanua andrö moroi ba batu bata si no muplester, ba mucat ia faoma betua. So ösa nomo ba daʼö sangokhögö 13 mazui 14 mbateʼe, samasui ewali si no mufasa keramik.

7. Hana wa moguna iʼodaligö Yehowa Aberahamo ba wolumöʼö yaʼia hegöi ösi nomonia?

⁷ Moguna iʼodaligö Yehowa Aberahamo ba wolumöʼö yaʼia hegöi ösi nomonia. Hadia mbörö? Börö me no tebulö waʼauri Gaberahamo hegöi Sara. Me föna, toröi ira ba nomo si lö ametaʼuö ba safönu faʼahono dödö ba mbanua Guri. Hizaʼi iadaʼa, hatö tendra nahiara, ba toröi ira misa ba mbenua. Lö hadöi saʼae öli sagalawa hegöi lala nidanö sagabakha si tola molumöʼö yaʼia hegöi ösi nomonia. Aoha sibai ba nudu ba wamaʼala yaʼira.

8. Hadia gabula dödö si no irai alua khö Gaberahamo?

⁸ Lö aetu ifalua zomasi Yehowa Aberahamo. Hewaʼae simanö, göna ia abula dödö. Duma-dumania, no irai abua khönia ba wangaʼasogö soguna ba nösi nomonia börö me alua mbaŵa lofo sabölö-bölö ba danö Ganaʼana. Börö daʼö, ihalö gangetula Aberahamo ba wolohe ösi nomonia ba danö Miserai, ba toröi ira sabata ba daʼö. Hizaʼi, alua gabula dödö tanö böʼö me so ira ba danö Miserai. Ihalö Faraʼo woʼomo Gaberahamo sotöi Sara. Tatu abu sibai dödö Gaberahamo ba zalua khö woʼomonia andrö. Ba gafuriata, itolo ia Yehowa irege ifangawuli woʼomo Gaberahamo Faraʼo.​—1 Moz. 12:10-19.

9. Hadia manö gabula dödö salua ba nösi nomo Gaberahamo?

⁹ Alua göi gabula dödö sebua ba nösi nomo Gaberahamo. Tebai moʼono woʼomo niʼomasiʼönia sotöi Sara. No tobali abula dödöra daʼö ba zi ngafulu fakhe faʼara. Ba gafuriata, ihalö gangetula Sara ba wameʼe zawuyunia sotöi Hagara khö Gaberahamo. Ifalua daʼö enaʼö tola moʼono Hagara, ba tobali ono Gaberahamo hegöi Sara nononia andrö. Hizaʼi, ibörögö iʼosiwawöi Zara Hagara me iʼila wa no manabina ia. Itugu abölö-bölö watitisa ba gotaluara irege ifofanö ia Sara.​—1 Moz. 16:1-6.

10. Hadia manö zalua sanandraigö famati Gaberahamo khö Yehowa?

¹⁰ Ba gafuriata, manabina Zara ba tumbu khönia nono matua sotöi Izaʼaki. Iʼomasiʼö sibai Aberahamo ndraononia matua si darua andrö, sotöi Simaʼeli hegöi Izaʼaki. Hizaʼi, börö me lö sökhi gamuata Zimaʼeli khö Gizaʼaki, ifofanö Zimaʼeli hegöi Hagara Aberahamo. (1 Moz. 21:9-14) Ba gafuriata, iʼandrö Yehowa khö Gaberahamo enaʼö ibeʼe Gizaʼaki tobali sumange nitunu. (1 Moz. 22:1, 2; Heb. 11:17-19) Me alua gabula dödö si dombua andre, moguna faduhu dödö Gaberahamo khö Yehowa wa hasambalö ifalua mbuʼusa linia sanandrösa ba ndraono Gaberahamo si darua.

11. Hana wa moguna so waʼebolo dödö khö Gaberahamo ba wanötöna khö Yehowa?

¹¹ Moguna so waʼebolo dödö khö Gaberahamo ba wanötöna khö Yehowa. Te töra 70 fakhe ndröfinia me iʼohe nösi nomonia ba wondröi banua Guri. (1 Moz. 11:31–12:4) Ba te mato otu fakhe waʼara, toröi ia ba tendra ba asese findra ia ba woʼanöröi danö Ganaʼana. Mate ia me 175 fakhe ndröfinia. (1 Moz. 25:7) Hizaʼi, lö fakhamö iʼila hewisa wamalua Yehowa mbuʼusa linia ba wameʼe danö Ganaʼana ba ngaʼötönia. Lö göi fakhamö iʼila waʼamosindro Wamatörö Lowalangi. Hewaʼae simanö, iwaʼö Sura Niʼamoniʼö wa no ”atua ba ahono dödönia” me mate ia. (1 Moz. 25:8, Terjemahan Dunia Baru) Hewaʼae na oya gabula dödö nitaögö Gaberahamo, lö mamalö aro wamatinia, ba anau gölönia ba wanötöna khö Yehowa. Hana wa tola anau gölö Gaberahamo sandrohu faʼaurinia? Börö me lö mamalö ilumöʼö ia Yehowa ba fahuwu ia khönia.​—1 Moz. 15:1; Yes. 41:8; Yak. 2:22, 23.

12. (a) Hadia nidöna-dönada iadaʼa? (b) Hadia nitutunöda ba artikel daʼa?

 ¹² Simane Aberahamo, tadöna-döna göi mbanua saro dane-dane. Hizaʼi, tenga faʼamosindronia nidöna-dönada. No tefasindro Wamatörö Lowalangi iʼotarai me döfi 1914, ba no mamatörö ia ba zorugo. (Fam. 12:7-10) Iadaʼa, tadöna-döna wa mamatörö ia ba gulidanö. Sagötö wombaloida, tola manö tataögö ngawalö wanandraigö simane salua khö Gaberahamo hegöi Sara. Ato nono mbanua Lowalangi ba ginötö andre zoloʼö duma-duma Gaberahamo. Oya waö-waö waʼauri si no mufaʼanö ba majalah Manuriaigö sangoromaʼö wa mamati ira ba ladöna-döna si fao faʼebolo dödö, simane nifalua Gaberahamo hegöi Sara. Datatutunö ösa waö-waö waʼaurira hegöi famahaʼö si tola tahalö moroi khöra.

13. Hadia wamahaʼö si tola tahalö moroi ba waö-waö waʼauri dalifusöda Walden?

¹³ Yaʼaoha gölöu ba wanehegö hadia zi no öʼokhögö. Na omasi ita taʼofönaiʼö Wamatörö Lowalangi ba waʼaurida, moguna taʼoʼö duma-duma Gaberahamo, saoha ölö ba wanehegö hadia zi no iʼokhögö enaʼö tola iʼomusoiʼö dödö Yehowa. (Mat. 6:33; Mrk. 10:28-30) Nehegö duma-duma dalifusöda ira matua sotöi Bill Walden. * Ibörögö ifahaʼö ia ba Zura Niʼamoniʼö khö ndra Samaduhuʼö Yehowa me döfi 1942. Me luo daʼö, sekola ia ba teknik arsitektur ba zi sambua universitas si so ba Amerika Serikat, ba lö ara tö tama ia. No ihaogö itatugöi samahaʼö yaʼia enaʼö iʼanemaiʼö isöndra halöwönia na no tama ia sekola, hizaʼi itimbagö daʼö Bill. Ifatunö khö zamahaʼö yaʼia wa lö omasi ia ba wolohi halöwö sebua gazi börö me omasi ia na abölö oya ginötönia ba wangai halöwö khö Lowalangi. Lö ara aefa daʼö, laʼandrö khönia wefao ba wajib militer. Börö me itimbagö daʼö talifusöda Bill, moguna ibuʼa 10.000 dolar AS, ba lakuru göi ia lima fakhe waʼara. Laʼefasi ia ba gurunga me no tölu fakhe lakuru ia. Ba gafuriata, laʼandrö khönia wefao ba Sekolah Gilead. Aefa daʼö, tobali ia utusan injil ba Afrika. Me no aefa mangowalu ia khö Eva, fao ira mangai halöwö ba Afrika. Börö daʼö, oya  zinangea latehegö ba waʼaurira. Me no hauga fakhe, mangawuli ira ba Amerika Serikat ba wondrorogö nina Bill. Me itutunö waö-waö waʼaurinia, imane talifusöda Bill, ”No töi si sökhi khögu me tola uhalö halöwö khö Yehowa ba zi töra 70 fakhe faʼara. Moʼala hörögu ero na itörö tödögu daʼö. Asese uʼandrö saohagölö khö Yehowa börö me no ibeʼe khögu wanuturu lala ba wamili ohitö dödö si tefaudu.” Hadia öbaliʼö göi ohitö dödömö wangai halöwö safönu inötö?

14-15. Hadia wamahaʼö si tola öhalö moroi ba duma-duma dalifusöda Apostolidis hegöi foʼomonia?

¹⁴ Böi tötöna wa lö alua gabula dödö ba waʼaurimö. Moroi ba duma-duma Gaberahamo, tola tafahaʼö ita wa hasambalö göna abula dödö zi samösa niha hewaʼae na no ifosumange Yehowa sandrohu faʼaurinia. (Yak. 1:2; 1 Fet. 5:9) Nehegö zalua khö dalifusöda Aristotelis Apostolidis. * Tebayagö ia idanö ba Yunani me döfi 1946. Me döfi 1952, famatua ia khö zi samösa dalifusöda ira alawe sotöi Eleni. Fagölö gohitö dödöra ba wamati. Hizaʼi ba gafuriata, mofökhö Eleni ba iwaʼö doto wa so tumor ba gutonia. No irai mofozu ira ba wangeheta tumor andrö. Hizaʼi, hauga fakhe me no aefa mangowalu ira, ifuli zui so tumor daʼö. Me no aefa lafuli laʼoperasi Eleni, mate dambai mbotonia ba tebai saʼae fahuhuo ia simane si toʼölö. Hewaʼae simanö, lö aetu manuriaigö Eleni hewaʼae na mofökhö ia ba laforege ira samatörö ba wolohi ndra Samaduhuʼö Yehowa si so ba soinia.

¹⁵ Irorogö woʼomonia talifusöda Aristotelis ba zi töra 30 fakhe faʼara. Sagötö wamaluania daʼö, ifalua göi halöwönia tobali satua sokubaloi, anggota panitia gangowuloa sebua, hegöi ba wangehaogö Nahia Gangowuloa Sebua. Me döfi 1987, me manuriaigö Eleni, so mbawandruhö siʼöli si teduhö samözi yaʼia moroi furi irege tezaumba ia misa. Koma ia ba zi tölu fakhe faʼara ba mate ia. Me itutunö waö-waö waʼaurinia, imane talifusöda Aristotelis, ”Ba zi hauga fakhe, oya gabula dödö salua ba waʼaurigu, ba so ösa zalua ba ginötö si lö udöna-döna. Daʼö mbörö wa moguna anau gölögu, ba lö utehegö tobali fangawuwu wamatigu gabula dödö andrö. Hizaʼi, lö aetu iʼabölöʼö ndraʼo Yehowa ba  wanaögö fefu daʼö.” (Zin. 94:18, 19) Sindruhu-ndruhu wa iʼomasiʼö nono mbanuania Yehowa, samorege ba wamosumange yaʼia hewaʼae na lataögö gabula dödö!

16. Hadia mene-mene si sökhi nibeʼe dalifusöda Knorr khö woʼomonia?

¹⁶ Böi aetu angeragö dötönafö ba zi so miföna. Iʼosambuaʼö dödönia Aberahamo ba howu-howu nibeʼe Yehowa khönia ba zi so miföna. Daʼa zanolo yaʼia irege tola anau gölönia ba wanaögö abula dödö salua khönia. Daʼö göi nifalua dalifusöda ira alawe sotöi Audrey Hyde. Lö aetu iʼangeragö dötönafö ba zi so miföna, hewaʼae na no mate woʼomonia si oföna sotöi Nathan H. Knorr börö wökhö kanker, ba göna fökhö Alzheimer woʼomonia safuria sotöi Glenn Hyde. * Iwaʼö talifusöda andrö wa tola anau gölönia börö me itörö-törö tödönia wehede niwaʼö dalifusöda Knorr ba zi hauga migu fatua lö mate ia. Imane wanutunö, ”Ifasugi ba dödögu Nathan, ’Hewaʼae na mate ita, hasambalö so dötönafö nitemada, ba lö saʼae tataögö waʼafökhö.’ . . . ’Osambuaʼö dödömö ba zi so miföna, börö me no muhenaigö khöu howu-howu.’ . . . ’Yaʼowölö-ölö ndraʼugö. Ogunaʼö waʼauriu ba wangaʼasogö bua si sökhi ba waʼauri niha böʼö. Na öfalua daʼö, lö tebulö örasoi waʼomuso dödö.’” No mene-mene si sökhi sibai daʼö! Moguna owölö-ölö ita ba wamalua amuata si sökhi ba niha böʼö, ba ’taʼomusoiʼö dödöda ba wanötöna andrö’.​—Rom. 12:12.

17. (a) Hana wa moguna taʼosambuaʼö dödöda ba dötönafö ba zi so miföna? (b) Simane nisura ba Mikha 7:7, hadia zinangea tafalua enaʼö tola tatema howu-howu ba zi so miföna?

¹⁷ Iadaʼa, moguna itugu taʼosambuaʼö dödöda ba dötönafö ba zi so miföna. Hadia mbörö? Fefu zalua ba gulidanö andre zangoromaʼö wa no so ita ba gangohorita ngaluo safuria. Ba zi lö ara tö, hasambalö mamatörö ba zi sagörö ulidanö mbanua saro dane-dane, yaʼia daʼö Famatörö Lowalangi. Oya dania howu-howu nitemada. Sambua ba gotaluania yaʼia daʼö tola falukha ita ba niha niʼomasiʼöda si no mate. Ba ginötö daʼö, börö me mamati Gaberahamo ba iforomaʼö waʼebolo dödö ba wombaloi nifabuʼu Yehowa, hasambalö isusugi ia Yehowa awö nösi nomonia, ba latema waʼauri si lö aetu ba gulidanö. Na omasiʼö so ndraʼugö dania ba daʼö ba wamaondragö yaʼira, hadia zinangea öfalua? Moguna öʼoʼö duma-duma Gaberahamo. Böi mamalö foromaʼö waʼaoha gölö ba wotuhini Famatörö Lowalangi, böi aetu okhögö wamati hewaʼae na ötaögö gabula dödö, ba döna-döna Yehowa si fao faʼebolo dödö.​—Baso Mikha 7:7.