1. Baingi nibeefeerereza bintu ki, kandi ahabw’enki nibacwamu batyo?

ABANTU obukaikuru n’obukaikuru ebiro ebi nibeefeerereza munonga. Ab’eishe-emwe na banyaanyazi-itwe baingi bacwiremu kuguma bonka batari mu bushwere. Abari omu bushwere abamwe bacwiremu kuba barekire kuzaara abaana. Ab’amaka abamwe babaasize kuguma bamazirwe n’ebi baine. Abantu aba boona bacwiremu batyo ahabw’enshonga emwe enkuru, nibenda kuheereza Yehova omu bwijwire nk’oku kirikubaasika. Baine okumarwa kandi nibesiga Yehova ngu buzima naija kubaha ebintu ebirikwetengyesa. Mbwenu shi nibaija kwefuuza? Ngaaha! Ahabw’enki turikubaasa kugira obuhame obu? Enshonga emwe eri ngu Yehova akaha omugisha Abrahamu, “ishenkuru wa boona” abaine okwikiriza.​—Rom. 4:11.

2. (a) Kurugiirira aha Abaheburaayo 11:8-10, 16, ahabw’enki Abrahamu yaabaire ayeteekateekire kuruga omu rurembo Uri? (b) Nituza kushwijuma ki omu kicweka eki?

² Abrahamu ayekundiire akatsigaho embeera nungi omu rurembo Uri. Ahabw’enki? Ahakuba akaba ategyereize ‘orurembo orwine emisingi’ eyaabuzima. (Shoma Abaheburaayo 11:8-10, 16.) Ni “rurembo” ki orwo? Abrahamu akahikwaho mbeera ki ezigumire obu yaabaire ategyereize orurembo orwo? Kandi nitubaasa kutooreza tuta Abrahamu n’ab’obunaku obu abarikukuratira eky’okureeberaho kye?

3. Ni rurembo ki oru Abrahamu yaabaire ategyereize?

³ Orurembo oru Abrahamu yaabaire ategyereize n’Obukama bwa Ruhanga. Obukama obwo burimu Yesu Kristo n’Abakristaayo abashukirweho omwoyo gurikwera 144,000. Paulo akagamba aha Bukama obwo ‘nk’orurembo rwa Ruhanga ohuriire,  Yerusaalemu orw’omu iguru.’ (Heb. 12:22; Kush. 5:8-10; 14:1) Yesu akeegyesa abeegi be kushaba aha bikwatiraine n’Obukama obwo, ngu bwije reero ebi Ruhanga arikukunda bikorwe omu nsi nk’oku birikukorwa omu iguru.​—Mat. 6:10.

4. Kurugiirira aha Okutandika 17:1, 2, 6, Abrahamu akaba naamanya kirikwingana ki aha rurembo, nari Obukama obu Ruhanga yaabaire araganiise?

⁴ Mbwenu shi Abrahamu akaba naamanya obushonshorekye bwona oku Obukama bwa Ruhanga bwabaire nibwija kuba butebeekanisiibwe? Ngaaha. Kumara ebyasha bingi, obushonshorekye obwo bukaba buri ‘enaama esherekirwe.’ (Efe. 1:8-10; Kol. 1:26, 27) Kwonka Abrahamu akaba naamanya ngu bamwe ahari baijukuru be nibaija kuba abagabe. Ekyo Yehova akaba akimuraganiise butunu. (Shoma Okutandika 17:1, 2, 6.) Abrahamu akaba aine okwikiriza kuhami omu kuraganisa kwa Ruhanga, yaaba nk’orikureeba ogwo oshukirweho omwoyo gurikwera, nari Mesia, owaabaire naija kuba Omugabe w’Obukama bwa Ruhanga. Ahabw’enshonga egi, Yesu akabaasa kugambira Abayudaaya omu bwire bwe ati: “Shoimwe Abrahamu akashemererwa aine ekihika ky’okureeba ekiro kyangye, ku yaakireebire, yaayesiima munonga.” (Yoh. 8:56) Buzima, Abrahamu akaba naamanya ngu baijukuru be nibaija kutegyeka omu Bukama oburikushagikwa Yehova, kandi akaba ayeteekateekire kutegyereza Yehova kuhikiiriza okuraganisa kwe.

5. Nitumanya tuta ngu Abrahamu akaba ategyereize orurembo orutebeekanisiibwe Ruhanga?

⁵ Abrahamu akooreka ata ngu akaba ategyereize orurembo, nari Obukama obutebeekanisiibwe Ruhanga? Eky’okubanza, Abrahamu tarashagikire Bukama bwona obw’omu nsi. Akaguma naafuruka atarikutuura omu mwanya gumwe kwetantara kushagika omugabe w’abantu. Okwongyera ahari ekyo, Abrahamu tarataireho kutaho obukama obwe. Omu mwanya gw’ekyo, akaguma naayorobera Yehova, kandi akamutegyereza kuhikiiriza eki yaaraganiise. Abrahamu omu kukora atyo, akooreka ngu aine okwikiriza kw’omutaano omuri Yehova. Ka tushwijume zimwe aha mbeera zigumire ezi yaarabiremu, kandi tureebe eki turikubaasa kumwegyeraho.

6. Uri rukaba ruri rurembo rwa muringo ki?

⁶ Orurembo oru Abrahamu yaarugiremu rukaba rwine oburinzi, rutunguukire, kandi  rurimu abantu beegire. Orurembo orwo rukaba rwetooroirwe ebisiika by’amaani n’emifuregye y’amaani aha mbaju ishatu. Abantu omuri Uri bakaba batunguukire omu by’okuhandiika n’omu by’okubara. Kandi orurembo orwo rukaba ruri orw’eby’obushuubuzi, ahakuba ebihandiiko by’obushuubuzi bikashangwa ahu orurembo orwo rwabaire ruri. Amaju g’abantu gakaba gombekyesiibwe amatafaari gateire ekipande, kandi gasiigire einoni. Zimwe aha nju ezi zikaba ziine ebishengye 13 nari 14, kandi ziine n’embuga.

7. Ahabw’enki Abrahamu yaabaire aine kugira obwesigye ngu Yehova naija kumurinda n’eka ye?

⁷ Abrahamu ashemereire kuba yaabaire aine obwesigye ngu Yehova naija kumurinda n’ab’omu ka ye. Ahabw’enki? Ijuka ngu Abrahamu na Saara bakaruga omu rurembo orwine oburinzi n’obuteeka bw’okutuura omu nju omuri Uri, baaguma nibaraara omu mahema omu mpita za Kanaani. Omu mwanya ogu we n’eka ye bakaba bataine burinzi bw’ebisiika n’emifuregye miraingwa. Omu mwanya gw’ekyo, abazigu baabo bakaba nibabaasa kurahuka kubataahirira.

8. Ni mbeera ki ezimwe ezahikire ahari Abrahamu?

⁸ Abrahamu akakora ebi Ruhanga arikukunda, kwonka obumwe akaba ataine by’okurya birikumara kuriisa eka ye. Omu nsi ei Yehova yaamugambiire kuzamu ekaba erimu enjara y’amaani. Enjara egyo ekaba ey’amaani yaareetera Abrahamu kucwamu kufurura eka ye kugitwara omuri Misri kumarayo obwire bukye. Kwonka ku yaabaire ari omuri Misri, Faraho, omutegyeki w’eihanga eryo akamwaka omukazi we. Teebereza okwerarikirira oku Abrahamu ashemereire kuba yaabaire aine okuhitsya obu Yehova yaagambiire Faraho kugarurira Abrahamu omukazi we Saara.​—Kut. 12:10-19.

9. Abrahamu akatunga mirabanamu ki omu ka ye?

⁹ Embeera z’Abrahamu zikaba zigumire munonga. Saara omukazi we omukundwa, akaba atarikubaasa kuzaara. Kumara emyaka mingi bakaba baine kwemera obusaasi obwo. Bwanyima, Saara akaha Abrahamu omuzaanakazi we Hagari kugira ngu abazaarire abaana. Kwonka Hagari ku yaagizire enda akazaara Ishimaeli, akatandika kugaya Saara. Embeera ekaguma munonga kyareetera Saara kubinga Hagari.​—Kut. 16:1-6.

10. Ni nshonga ki ezirikukwata ahari Ishimaeli na Isaaka ezagyerize obwesigye obu Abrahamu yaabaire aine omuri Yehova?

¹⁰ Saara akarugaho yaagira enda reero yaazaarira Abrahamu omwojo ou yaayetsire Isaaka. Abrahamu akaba naakunda batabani be bombi, Ishimaeli na Isaaka. Kwonka ahabw’okugira ngu Ishimaeli akatwariza kubi Isaaka, Abrahamu akagyemeserezibwa kubinga Ishimaeli na Hagari. (Kut. 21:9-14) Bwanyima Yehova akashaba Abrahamu kuhayo mutabani we Isaaka nk’ekitambo. (Kut. 22:1, 2; Heb. 11:17-19) Emirundi yombi, Abrahamu akaba naayesiga Yehova ngu naija kurugaho naahikiiriza okuraganisa kwe ahabw’abatabani bombi.

11. Ahabw’enki Abrahamu yaategyereize Yehova agumisiriize?

¹¹ Omu bwire obwo bwona, Abrahamu akeega kutegyereza Yehova aine okugumisiriza. Naabaasa kuba yaabaire naarenzya emyaka 70 obu yaaruga omuri Uri n’eka ye. (Kut. 11:31–12:4) Kandi kumara emyaka nka igana, akaguma naatuura omu mahema arikuzengyerera omuri Kanaani. Abrahamu akafa aine emyaka 175. (Kut. 25:7) Kwonka tarareebire Yehova arikuhikiiriza okuraganisa kwe okw’okuha baijukuru be ensi ya Kanaani. Kandi taratwireho munonga kubaasa kureeba orurembo orwine emisingi rurikuteebwaho, nibwo Bukama bwa Ruhanga. N’obu kiraabe kiri kityo, Abrahamu naagambwaho nk’owaafiire ari omugurusi amazirwe. (Kut. 25:8) Oyihireho embeera zigumire zoona ezi yaarabiremu, akaguma aine okwikiriza kuhami, kandi akaba amaririire kutegyereza Yehova.  Ahabw’enki yaabaasize kugumisiriza? N’ahabw’okugira ngu embeera zoona ezi Abrahamu yaarabiremu, Yehova akamurinda, kandi yaamutwariza nka munywani we.​—Kut. 15:1; Isa. 41:8; Yak. 2:22, 23.

12. Itwe tutegyereize ki, kandi nituza kushwijuma ki?

¹² Kushushana n’Abrahamu, tutegyereize orurembo orwine emisingi eyaabuzima. Kwonka itwe titutegyereize orurembo orwo kuteebwaho. Obukama bwa Ruhanga bukateebwaho omuri 1914, kandi nibutegyeka omu iguru omu bwijwire. (Kush. 12:7-10) Kwonka tutegyereize ngu bwije butegyekye ensi omu bwijwire. Twaba tutegyereize ekyo kubaho, nitubaasa kuraba omu mbeera nyingi ezirikushushana n’ezi Abrahamu na Saara baarabiremu. Mbwenu shi abaheereza ba Yehova ab’obunaku obu babaasize kutooreza Abrahamu? Ebyafaayo by’abantu ebirikwizira omu Omunaara gw’Omurinzi nibyoreka ngu, baingi obunaku obu baine okwikiriza n’okugumisiriza nk’Abrahamu na Saara. Ka tushwijume bimwe aha byafaayo by’abantu abo tureebe eki turikubaasa kwega.

13. Ebi Ow’eishe-emwe Walden yaarabiremu noobyegyeraho ki?

¹³ Ba oyeteekateekire kwefeerereza. Twaba turi ab’okwebembeza Obukama nari ebirikukwata aha rurembo rwa Ruhanga nk’Abrahamu, twine kuba tweteekateekire kugira ebi twayefeerereza kushemeza Ruhanga. (Mat. 6:33; Mak. 10:28-30) Yetegyereze eky’okureeberaho ky’ow’eishe-emwe orikwetwa Bill Walden. * Omuri 1942, Bill akaba ari haihi kuhendera emishomo ye aha yunivasite omuri U.S. kutunga diguri y’obwa inginiya, obu Abajurizi ba Yehova batandika kumwegyesa Baibuli. Omuhangu omwegyesa wa Bill akaba yaaherize kukora entebeekanisa ngu Bill atungye omurimo bwanyima y’okuhendera emishomo ye, kwonka Bill akanga. Naashoboorora ngu akaba yaaherize kucwamu kutaikiriza omurimo gw’ensi kubaasa kwongyera kuheereza gye Ruhanga. Ekyo kiherize kubaho, Bill akaragiirwa kuza omu mahe. Omu muringo murungi  akanga reero baamutangisa doora 10,000, kandi bakamucwera orubanja rw’okukomwa omu kihome emyaka etaano. Bakamurekura aherizeyo emyaka eshatu yonka. Bwanyima, akeetwa kuza omu ishomero rya Gileadi, kandi yaaheereza omu bumiisani omuri Africa. Bwanyima Bill akataatsya Eva, kandi bakaheereza hamwe omuri Africa, ekyabaire nikibeetengyesa okwefeerereza. Bwanyima y’emyaka, bakagaruka omuri United States kureeberera nyina wa Bill. Naagamba aha byafaayo bye omu bugufu ati: “Ku ndikuteekateeka aha mugisha gw’omutaano ogw’okwikiriza kukoresibwa Yehova kumara emyaka erengire 70 omu buheereza bwe, amarira nigareetwa omu maisho gangye. Obutoosha niimwebaza ahabw’okunyebembera obuheereza bwe nkabuhindura omurimo gwangye.” Noobaasa kuhindura obuheereza obw’obutwire omurimo gwawe?

14-15. Nooyegyera ki aha byahikire aha W’eishe-emwe na Munyaanyazi-itwe Apostolidis?

¹⁴ Otateekateeka ngu torikwija kutunga oburemeezi na kakye. Ebyahikire ahari Abrahamu nibitwegyesa ngu nangwa n’abo abarikwemarira aha kuheereza Yehova nabo nibahikwaho oburemeezi. (Yak. 1:2; 1 Pet. 5:9) Yetegyereze oku eki kyahikire ahari Aristotelis Apostolidis. * Akabatizibwa omu mwaka gwa 1946 omuri Greece, kandi omuri 1952 akamariirira kutaatsya munyaanyazi-itwe Eleni, owaabaire aine ebigyendererwa nk’ebye. Kwonka, Eleni akarwara, baamucebera baashanga aine akazimba k’omu bwongo. Akazimba ako bakakaihamu, kwonka bwanyima y’obwire bukye ataahire omu bushwere, akazimba ako kakagaruka. Abashaho bakagaruka baamushemeza ogundi, kwonka Eleni akasharara orubaju rumwe, kandi akaba atakibaasa kugamba gye. Akaguma ari omweziriki n’obu araabe yaabaire arwaire kandi hariho n’okuhiiganisibwa obwire obwo.

¹⁵ Aristotelis akamara emyaka 30, arikureeberera omukazi we. Omu bwire obwo akaba ari omureeberezi, ari aha kakiiko k’enteerane empango, kandi arikuhwera n’omu kwombeka ekyombeko ky’enteerane empango. Kandi omuri 1987, Eleni akatunga butandu ari omu kubuurira. Akamara emyaka eshatu ataine ki arikumanya, reero yaafa. Aristotelis naagamba aha byafaayo  bye omu bugufu ati: “Kumara emyaka ntwire nindaba omu bigyezo, embeera zigumire, n’ebihikiirizi kyandeetera kumariirira kutaikiriza kintu kyona kummaramu amaani. Kwonka, Yehova atwire naampa amaani agarikwetengyesa kubaasa kusingura oburemeezi obwo.” (Zab. 94:18, 19) Yehova ka naakunda abo boona abarikukora kyona ekirikubaasika kwemera okugyezibwa!

16. Ni buhabuzi ki burungi obu Ow’eishe-emwe Knorr yaahaire omukazi we?

¹⁶ Ta omutima aha by’omumaisho. Abrahamu akaba naata omutima aha birungi ebi Yehova yaabaire naija kumuha omu biro by’omumaisho, kandi eki kikamuhwera kusingura oburemeezi bwe. Munyaanyazi-itwe Audrey Hyde akateeraho kuguma aine emiteekateekyere mirungi, n’obu iba ow’okubanza, Nathan H. Knorr, yaitsirwe ekookoro, kandi na iba owa kabiri, Glenn Hyde, yaarwaire endwara erikureetera obwongo kwebwa. * Akagira ngu akahwerwa eki Ow’eishe-emwe Knorr yaabaire yaamugambiire saabiiti nkye atakafiire. Akagira ati: “Nathan akanyijutsya ati: ‘Bwanyima y’okufa, amatsiko gaitu nigaba gari agaabuzima, kandi titurikubaasa kutunga obusaasi ogundi murundi.’ Reero akampiga ati: ‘Ranzya omu maisho, ahakuba okwo ekihembo kyawe niyo kiri.’ . . . Akoongyeraho ati: ‘Guma oine eby’okukora, teeraho kugira eki waakorera abandi. Eki nikiija kukuhwera kutunga okushemererwa.’” Ka n’obuhabuzi burungi kuguma oine bingi by’okukorera abandi ‘n’okushemererwa oine amatsiko’!​—Rom. 12:12.

17. (a) Ahabw’enki twine enshonga ehikire kuta omutima aha by’omumaisho? (b) Okukuratira eky’okureeberaho ekiri omuri Miika 7:7 nikiija kutuhwera kita kutunga emigisha y’ebiro by’omumaisho?

¹⁷ Obunaku obu, twine enshonga nyingi kukira ira ezirikutureetera kuta omutima aha by’omumaisho. Ebirikubaho omu nsi nibyoreka gye ngu turi omu kicweka ekirikuhererukayo eky’obusingye obu. Omu bwire butari bwa hare nitwija kuba tutarikutegyereza orurembo orwine emisingi eyaabuzima kutegyeka ensi yoona. Gumwe aha migisha mingi ogu turaatungye n’okureeba abakundwa baitu abaafiire barikuzooka. Omu bwire obwo, Yehova naija kuha Abrahamu emigisha ahabw’okwikiriza n’okugumisiriza kwe, arikumuzoora n’ab’omu ka ye kutunga amagara omu nsi. Mbwenu shi noija kuba oriyo kubaasa kubatangirira? Nikiija kubaasika waaba nooyefeerereza ahabw’Obukama nk’Abrahamu, waaguma oine okwikiriza n’obu waakuba oine oburemeezi, kandi waayega kutegyereza Yehova ogumisiriize.​—Shoma Miika 7:7.