1. Беретӕ сӕхе цӕмӕйти фӕццох кодтонцӕ ӕма цӕмӕн?

АБОНИ милиуангай адӕн Хуцауи гъуддӕгти архайгӕй сӕхе берӕ цӕмӕйдӕрти фӕццох кодтонцӕ. Зӕгъӕн, берӕ хуӕртӕ ӕма ӕнсувӕртӕ бийнонтӕ не ’скодтонцӕ. Бийнонтӕ ка искодта, уонӕй ба беретӕ цӕуӕт нӕ рауагътонцӕ. Кадӕртӕ ба сӕ цард фӕххумӕтӕгдӕр кодтонцӕ. Се ’гасейдӕр уӕхӕн унаффитӕ рахӕссунмӕ баразӕнгард кодта еунӕг гъуддаг – фӕндадтӕй сӕ Йеговӕн фулдӕр лӕггадӕ кӕнун. Еци хуӕртӕ ӕма ӕнсувӕртӕ хъӕбӕр амондгун ӕнцӕ ӕма федарӕй ӕууӕндунцӕ, царди сӕ ӕнӕмӕнгӕй ци гъӕуа, уомӕй сӕ Йеговӕ цох ке нӕ ниууадздзӕй. Цума ескӕд фӕффудӕнгъӕл уодзӕнцӕ? Нӕъ. Цӕмӕн ес уотӕ зӕгъӕн? Уомӕн ӕма рагидзаманти дӕр Йеговӕ ӕ лӕггадгӕнгутӕн ӕнхус кодта. Уонӕй сӕ еу адтӕй Авраам, «ӕууӕндундзийнадӕ кӕмӕ ес, уонӕн... сӕ фидӕ» (Ром. 4:11).

2. а) Дзиуиттӕгтӕмӕ 11:8–10, 16 куд финст ӕй, уомӕ гӕсгӕ Авраам Ур ӕнӕ фӕстӕмӕ фӕккӕсгӕй цӕмӕн ниууагъта? б) Аци статьяй цӕбӕл радзубанди кӕндзиан?

² Авраам ӕнӕ фӕстӕмӕ фӕккӕсгӕй ниууагъта ӕ хуарз цард горӕт Ури. Цӕмӕн? Уомӕн ӕма ӕнгъӕлмӕ кастӕй, «федар бундор кӕмӕн ес... еци горӕтмӕ». (Бакӕсӕ Дзиуиттӕгтӕмӕ 11:8–10, 16.) Цума е цӕхуӕн горӕт адтӕй? Еци горӕтмӕ ӕнгъӕлмӕ кӕсгӕй цӕхуӕн зиндзийнӕдтӕбӕл ӕмбалдӕй? Удта мах бон куд ӕй Авраами дӕр ӕма мах рӕстӕги Авраами хузӕн ка фӕццардӕй, уони дӕр фӕнзун?

3. Авраам ци горӕтмӕ ӕнгъӕлмӕ кастӕй, е ци адтӕй?

³ Авраам ци горӕтмӕ ӕнгъӕлмӕ кастӕй, е ӕй Хуцауи Паддзахадӕ. Ӕ Паддзах ӕй Йесо Киристе, ӕ хӕццӕ ба ма 144 000  исӕрст киристони. Апостол Павел еци горӕт исхудта «уодӕгас Хуцауи горӕт – уӕларвон Йерусалим» (Дзиуит. 12:22; Рарг. 5:8–10; 14:1). Йесо дӕр ӕ фӕдбӕлдзӕугути разӕнгард кодта еци Паддзахади туххӕй ковунмӕ, цӕмӕй Хуцауи фӕндон уӕлӕрвти куд ӕй, уотӕ зӕнхӕбӕл дӕр исӕнхӕст уа (Матф. 6:10).

4. Райдайӕни 17:1, 2, 6 куд финст ӕй, уомӕ гӕсгӕ Авраам горӕти туххӕй, гъома Хуцау зӕрдӕ кӕмӕй байвардта, еци Паддзахади туххӕй ци зудта?

⁴ Цума Авраам зудта, Хуцауи Паддзахадӕ куд конд уодзӕй, уой? Нӕ зудта. Ӕности дӕргъи еци гъуддаг «сосӕгдзийнадӕ» адтӕй (Еф. 1:8–10; Кол. 1:26, 27). Фал ӕй Авраам зудта, ӕ байзӕддӕгтӕй кадӕртӕ паддзӕхтӕ ке уодзӕнцӕ, уомӕн ӕма ин уомӕй Йеговӕ зӕрдӕ байвардта. (Бакӕсӕ Райдайӕн 17:1, 2, 6.) Авраам Хуцауи зӕрдӕвӕрдтӕбӕл уотӕ федарӕй ӕууӕндтӕй, цума еци Паддзахади исӕрст Паддзахи, гъома Мессийи уингӕ кодта, уотӕ. Йесо дӕр, ӕ рӕстӕги ка цардӕй, еци адӕнӕн уомӕ гӕсгӕ загъта: «Уӕ фидӕ Авраам хъӕбӕр цийнӕ кодта, мӕ гъуддӕгтӕ фӕууинуни нифс ӕй ке адтӕй, уобӕл, ӕма сӕ уингӕ дӕр фӕккодта ӕма цийнӕ кодта» (Иоан. 8:56). Авраам ӕй зудта, ӕ байзӕддӕгтӕ, Йеговӕ ке ӕрфедар кӕндзӕй, еци Паддзахади паддзӕхтӕ ке уодзӕнцӕ, ӕма ӕ зӕрдӕвӕрд кӕд исӕнхӕст кӕндзӕй, уомӕ ӕнгъӕлмӕ кастӕй.

5. Кӕцӕй ӕй зонӕн, Авраам «горӕтмӕ», гъома Хуцау ке исфедар кӕндзӕй, еци Паддзахадӕмӕ ке ӕнгъӕлмӕ кастӕй?

⁵ Авраам ӕй куд бавдиста, «горӕтмӕ», гъома Хуцау ке исфедар кӕндзӕй, еци Паддзахадӕмӕ ке ӕнгъӕлмӕ кастӕй? Фиццагидӕр, Авраам ӕхе еунӕг зӕнхон хецауади дӕлбарӕ дӕр нӕ бакодта. Еунӕг рауӕн дӕр берӕ рӕстӕг нӕ басабур ӕй, удта зӕнхон хецӕуттӕй дӕр неке хӕццӕ байеу ӕй. Удта Авраам ӕхе паддзахадӕ ӕрфедар кӕнунбӕл дӕр нӕ архайдта. Е идарддӕр дӕр Йеговӕмӕ игъуста ӕма ӕнгъӕлмӕ кастӕй, ӕ зӕрдӕвӕрдтӕ кӕд исӕнхӕст кӕндзӕй, уомӕ. Уотемӕй Авраам бавдиста, Йеговӕбӕл куд хъӕбӕр ӕууӕндуй, уой. Гъӕйдӕ мадта ӕркӕсӕн, цӕхуӕн зиндзийнӕдтӕбӕл ӕмбалдӕй ӕма си мах цӕбӕл ахур кӕнӕн, уомӕ.

6. Ур цӕхуӕн горӕт адтӕй?

⁶ Авраам ци горӕт ниууагъта, еци горӕт Ур адтӕй гъӕздуг, ӕма си зӕрдидзӕбӕхӕн цӕрун ӕнгъизтӕй. Горӕтӕн е ’ртӕ фарси ӕхгӕд  адтӕнцӕ бӕрзонд фӕрстӕй ӕма арф къанӕуттӕй. Ци адӕн си цардӕй, етӕ ба кӕсун, финсун ӕма нимайун хуарз зудтонцӕ. Археологтӕ си иссирдтонцӕ, базарадон гъуддӕгти кӕмӕй пайда кодтонцӕ, берӕ уӕхӕн документтӕ, ӕма уомӕй бӕрӕг ӕй, еци гъуддӕгтӕ си гъӕйттӕй ке цудӕнцӕ. Сӕ хӕдзӕрттӕ даст адтӕнцӕ агорийӕй, фӕрстӕ ба исӕрст ӕма къирӕй цагъд. Еуӕй-еу хӕдзӕртти адтӕй 13 кенӕ 14 авари, сӕ тургътӕ ба адтӕнцӕ дортӕй конд.

7. Уотӕ зӕгъӕн цӕмӕн ес, ӕма Авраам федарӕй ӕууӕндтӕй, Йеговӕ сӕ ке гъӕуай кӕндзӕй, уобӕл?

⁷ Авраам, ӕвӕдзи, федарӕй ӕууӕндтӕй, Йеговӕ ин ӕхе дӕр ӕма ӕ бийнонти дӕр ке багъӕуай кӕндзӕй. Цӕмӕн ес уотӕ зӕгъӕн? Уомӕн ӕма Авраам ӕма Саррӕ, ӕдас, удта алцидӕр кӕми адтӕй, уӕхӕн горӕт ниууагътонцӕ ӕма цатурти цӕргӕй Ханаани зӕнхитӕбӕл зилдӕнцӕ. Уоми сӕ нӕдӕр фӕрстӕ гъӕуай кодтонцӕ, нӕдӕр къанӕуттӕ. Се ’знӕгти къохмӕ хъӕбӕр ӕнцонтӕй бахаудтайуонцӕ.

8. Еухатт Авраам цӕхуӕн уавӕри бахаудтӕй?

⁸ Авраам алцидӕр кодта, Йеговӕ ин куд амудта, уотӕ, фал ин еу рӕстӕги ба хъӕбӕр зин иссӕй ӕ бийнонтӕ дарун. Йеговӕ сӕ ци зӕнхӕмӕ рарвиста, уоми стонгдзаман ӕркодта. Гъема Авраам исфӕндӕ кодта еци рӕстӕг Египети рацӕрун. Фал Египети ба фараон Сарӕбӕл ӕ цӕстӕ ӕривардта ӕма ’й ӕ галауани ӕрцӕрун кодта. Расагъӕс кӕнӕ, Авраам куд хъӕбӕр тухстӕй, цалинмӕ Йеговӕ ӕхуӕдӕг фараонӕн зунд нӕ байамудта ӕма ин Сарри нӕ рауадзун кодта, уӕдмӕ! (Райд. 12:10–19).

9. Авраам ӕ бийнонти медӕг цӕхуӕн зиндзийнӕдтӕбӕл исӕмбалдӕй?

⁹ Авраамӕн ӕ бийнонти цард дӕр ӕнцонтӕй н’ адтӕй. Берӕ ке уарзта, еци бийнойнаг Саррӕй ин сувӕллӕнттӕ не ’нтӕстӕй. Дӕсгай ӕнзти дӕргъи еци ристи хӕццӕ цардӕнцӕ. Фӕстагмӕ Саррӕ Авраамӕн ӕ лӕггадгӕнӕг силгоймаг Агари равардта, цӕмӕй син уӕддӕр уомӕй сувӕллон райгурдайдӕ. Фал Агарь ку бауӕззау ӕй, уӕд е ’хсийнӕмӕ ӕнӕнвӕрсон каст кӕнун райдӕдта. Саррӕ дӕр ӕй ӕфхуӕрун райдӕдта ӕма си Агарь фӕллигъдӕй (Райд. 16:1–6).

10. Авраамӕн ӕ зӕрдӕ Йеговӕбӕл дарун уӕлдай зиндӕр кӕд адтайдӕ?

¹⁰ Фӕстагмӕ Саррӕн дӕр сувӕллон райгурдӕй ӕма ’й исхудта Исак. Авраамӕн ӕ дууӕ фурти дӕр хъазар адтӕнцӕ. Фал хестӕр кӕстӕри ӕфхуӕрун ку райдӕдта, уӕд Авраами багъудӕй Агари ӕма Измаили хӕдзарӕй рарветун (Райд. 21:9–14). Берӕ ӕнзтӕ фӕстӕдӕр ба Йеговӕ Авраамӕн загъта, цӕмӕй Исакки нивонди ӕрхастайдӕ (Райд. 22:1, 2; Дзиуит. 11:17–19). Еци рӕстӕгути Авраами федарӕй ӕууӕндун гъудӕй, Йеговӕ ин Измаили ӕма Исакки туххӕй зӕрдӕ цӕмӕй байвардта, уой ке исӕнхӕст кӕндзӕй, уобӕл.

11. Авраами Йеговӕмӕ фӕразонӕй ӕнгъӕлмӕ кӕсун цӕмӕн гъудӕй?

¹¹ Берӕ ӕнзти дӕргъи Авраам фӕразонӕй ӕнгъӕлмӕ кастӕй, Йеговӕ ӕ зӕрдӕвӕрд куд исӕнхӕст кӕндзӕй, уомӕ. Урӕй ку рацудӕй, уӕд ибӕл цудайдӕ еу 70 анзи (Райд. 11:31–12:4). Уой фӕсте ба еу сӕдӕ анзей дӕргъи фӕццардӕй цатурти, Ханаани зӕнхитӕбӕл зелгӕй. Ку рамардӕй, уӕд ибӕл цудӕй 175 анзи (Райд. 25:7). Авраам ӕй нӕ фӕууидта, Йеговӕ ин ӕ байзӕддӕгтӕн зӕрдӕвӕрд зӕнхӕ куд равардта, уой. Удта ӕнгъӕлмӕ кӕмӕ кастӕй, еци «горӕт», гъома Хуцауи Паддзахадӕ ку фӕззиндтӕй, еци рӕстӕгмӕ дӕр нӕ фӕццардӕй. Фал уӕддӕр, Библи куд зӕгъуй, уомӕ гӕсгӕ Авраам «рамардӕй зӕрондӕй ӕма цардӕфсесӕй» (Райд. 25:8). Кӕд ӕ царди берӕ зиндзийнӕдтӕ адтӕй, уӕддӕр Йеговӕбӕл федарӕй ӕууӕндтӕй ӕма имӕ фӕразонӕй ӕнгъӕлмӕ кастӕй. Цума ин ци банхус кодта? Йеговӕ е ’мбал ке адтӕй ӕма ’й гъӕуай ке кодта, е (Райд. 15:1; Ис. 41:8; Иак. 2:22, 23).

12. Абони мах цӕмӕ ӕнгъӕлмӕ кӕсӕн? Идарддӕр цӕбӕл радзубанди кӕндзиан?

¹² Мах дӕр Авраами хузӕн ӕнгъӕлмӕ кӕсӕн,  «федар бундор кӕмӕн ес... еци горӕтмӕ». Ӕрмӕст мах, еци «горӕт» кӕд фӕззиндзӕй, уомӕ ӕнгъӕлмӕ кӕсун нӕбал гъӕуй, уомӕн ӕма Хуцауи Паддзахадӕ уӕлӕрвти исфедар ӕй 1914-аг анзи (Рарг. 12:7–10). Мах ӕнгъӕлмӕ кӕсӕн, еци Паддзахадӕ зӕнхӕ ӕ дӕлбарӕ кӕд бакӕндзӕй, еци рӕстӕгмӕ. Ӕма еци рӕстӕгмӕ ӕнгъӕлмӕ кӕсгӕй Авраам ӕма Сарри хузӕн ӕмбӕлӕн аллихузи зиндзийнӕдтӕбӕл. Абони дӕр Йегови лӕггадгӕнгутӕй беретӕ Авраам ӕма Сарри хузӕн фӕразон ӕнцӕ ӕма Йеговӕбӕл сӕ зӕрдӕ дарунцӕ. Кедӕрти биографитӕ си финст ӕрцудӕнцӕ «Гъӕуайгӕнӕн мӕсуги». Гъӕйдӕ си еу цалдӕр нӕ зӕрдӕбӕл ӕрлӕуун кӕнӕн ӕма си цӕбӕл ахур кӕнӕн, уобӕл расагъӕс кӕнӕн.

13. Билл Уолдени хабарӕй цӕбӕл ахур кӕнӕн?

¹³ Цӕттӕ уо дӕхе цӕмӕйдӕрти фӕццох кӕнунмӕ. Кӕд дӕ фӕндуй, цӕмӕй Хуцауи Паддзахадӕ дӕ царди фиццаг бунати уа, уӕд ду дӕр гъӕуама Авраами хузӕн цӕттӕ уай дӕхе цӕмӕйдӕрти фӕццох кӕнунмӕ (Матф. 6:33; Мар. 10:28–30). Ӕркӕсӕн ӕнсувӕр Билл Уолдени * хабармӕ. Билл университети архитекторбӕл ахур кодта ӕма 1942 анзи гъӕуама ахур фӕцайдӕ. Фал еци рӕстӕг Йегови Ӕвдесӕнти хӕццӕ Библи ахур кӕнун райдӕдта. Минкъий фӕстӕдӕр ӕ ахургӕнӕг цидӕр фирми хӕццӕ бадзубанди кодта, цӕмӕй Билл ахури фӕсте уоми косун райдӕдтайдӕ, фал Билл не ’сарази ӕй. Билл балӕдӕрун кодта, ӕ хъауритӕ ’й Хуцауӕн лӕггадӕ кӕнунбӕл харз кӕнун ке фӕндуй, аци дуйней ӕхцатӕ косунбӕл нӕ, фал. Минкъий фӕстӕдӕр ба имӕ ӕфсадмӕ дӕр фӕдздзурдтонцӕ. Уонӕн дӕр Билл ӕ гъуди уӕзданӕй балӕдӕрун кодта. Ке не ’сарази ӕй, уой туххӕй ин 10 000 доллӕри штраф рафинстонцӕ ӕма ’й 5 анземӕ ахӕстдони исбадун кодтонцӕ. Ӕртӕ анзи ку фӕббадтӕй, уӕд ӕй исуӕгъдӕ кодтонцӕ. Фӕстӕдӕр Галаади скъола фӕцӕй ӕма Африки миссионерӕй лӕггадӕ кӕнун райдӕдта. Цӕйбӕрцӕдӕр рӕстӕги фӕсте ба бийнонти гъуддаг дӕр бакодта, ӕма ӕ цардӕмбал Еви хӕццӕ идарддӕр дӕр миссионертӕй лӕггадӕ кодтонцӕ. Уӕхӕн лӕггади дӕр сӕ сӕхе цӕмӕйдӕрти цох кӕнун куд нӕ гъудайдӕ.  Цалдӕр анзей фӕсте ба Еугонд Штаттӕмӕ раздахтӕнцӕ, уомӕн ӕма Биллӕн ӕ мадӕмӕ кӕсун гъудӕй. Билл ӕ царди туххӕй загъта: «Мӕ цӕститӕ дӕр ма дони разелунцӕ, Йеговӕ мӕ цӕхуӕн устур кадӕй исхайгин кодта, уобӕл ку фӕссагъӕс кӕнун, уӕд. Ӕнӕгъӕнӕ 70 анзи ин фӕллӕггадӕ кодтон, ӕма Йеговӕн арӕх фӕййарфӕ кӕнун, уӕхӕн фадуат мин ке равардта, уой туххӕй». Дӕу бон ба адтайдӕ Йеговӕн ӕнхӕстрӕстӕг лӕггадӕ кӕнун?

14, 15. Аристотелис ӕма Элений хабарӕй цӕбӕл ахур кӕнӕн?

¹⁴ Уотӕ дӕмӕ ма кӕсӕд, ӕма зиндзийнӕдтӕй хизт уодзӕнӕ. Авраами хабарӕй ӕй зонӕн, Йеговӕн еузӕрдонӕй ка лӕггадӕ кӕнуй, уӕхӕнттӕ дӕр зиндзийнӕдтӕй хизт ке нӕ фӕуунцӕ (Иак. 1:2; 1 Пет. 5:9). Ӕркӕсӕн Аристотелис Апостолидиси * хабармӕ. Аристотелис донаргъуд райста 1946 анзи, Греций. 1952 анзи ба, ӕхе хузӕн нисӕнттӕ кӕмӕн адтӕй, уӕхӕн хуӕрӕ Элений хӕццӕ бафедудтонцӕ. Фал хуӕрӕ Эленийӕн ӕ сӕри рак иссирдтонцӕ ӕма ин операци кӕнун багъудӕй. Операций фӕсте сӕ цард байеу кодтонцӕ. Фал цалдӕр анзи ку рацудӕй, уӕд бабӕй ӕ нез ӕркуста. Дуккаг операций фӕсте ба хуӕрӕ Эленийӕн ӕ бауӕри кӕцидӕр хай нӕбал куста, удта дзӕбӕх дзорун дӕр ӕ бон нӕбал адтӕй. Фал уотемӕй дӕр хуӕрӕ Элени зингзӕрдӕй игъосун кодта, кӕд Греций хецауадӕ Йегови Ӕвдесӕнти нихмӕ цудӕнцӕ, уӕддӕр.

¹⁵ Аристотелис 30 анзей дӕргъи ӕ сӕйгӕ бийнойнаги фӕгъгъуд кодта. Еци ӕнзти хестӕр нӕлгоймагӕй лӕггадӕ кодта, удта конгрессти аллихузи комитетти архайдта ӕма Конгрессти залтӕ аразунмӕ дӕр ӕнхус кодта. 1987 анзи Элени игъосун кӕнгӕй фидбилизи бахаудтӕй. Ӕртӕ анзи ма коми фӕцӕй, уой фӕсте ба рамардӕй. Аристотелис ӕ биографий кӕрон загъта: «Царди берӕ зиндзийнӕдтӕ бавзурстон, ӕнгъл дӕр ке нӕ уинӕ, уӕхӕнттӕ дӕр. Уомӕ гӕсгӕ мӕ хъӕбӕр гъудӕй фӕразондзийнадӕ, цӕмӕй мин мӕ нифс маци басастайдӕ. Йеговӕ мин алкӕддӕр еци хъаурӕ лӕвардта» (Пс. 94:18, 19). Йеговӕн хъӕбӕр хъазар ӕнцӕ, зиндзийнӕдтӕ ӕвзаргӕй дӕр ин ӕгас зӕрдӕй ка фӕллӕггадӕ кӕнуй, еци хуӕртӕ ӕма ӕнсувӕртӕ.

16. Нейтӕн Норр ӕ бийнойнагӕн цӕхуӕн унаффӕ равардта?

 ¹⁶ Ци хуӕрзеуӕг дӕмӕ ӕнгъӕлмӕ кӕсуй, уой макӕд иронх кӕнӕ. Авраам некӕд иронх кодта, Йеговӕ ин ци хуӕрзеуӕгӕй зӕрдӕ байвардта, уой, ӕма ин е зиндзийнӕдти сӕрти хезунмӕ ӕнхус кодта. Хуӕрӕ Одри Хайдӕн * ӕ фиццаг лӕг Нейтӕн Норр раккӕй рамардӕй, ӕ дуккаг лӕг ба Альцгеймери незӕй садӕй. Фал Одри уӕддӕр ӕ нифс сӕттун нӕ бауагъта. Ӕнсувӕр Норр ин ӕ мӕлӕти размӕ ци загъта, е ин хъӕбӕр банхус кодта. Одри загъта: «Нейтӕн мин мӕ зӕрдӕбӕл ӕрлӕуун кодта, мӕлӕт кӕрон ке нӕй. Федар нифс, дан, нин ес, ке некӕдбал гъезӕмарӕ кӕндзиан. Уой фӕсте ба мин загъта: „Размӕ кӕсӕ – дӕ хуӕрзеуӕг кӕми ӕй, уордӕмӕ [...] Архайӕ! Дӕ бон куд ӕй, уотӕ иннетӕн ӕнхус кӕнӕ. Уой фӕрци царди цийнӕ кӕнун зондзӕнӕ“». Ӕцӕгӕйдӕр ин хуарз унаффӕ равардта: иннетӕн хуарздзийнадӕ кӕнӕ ӕма нин ци нифс ес, уобӕл цийнӕ кӕнӕ (Ром. 12:12).

17. а) Федӕнмӕ нифсгунӕй ӕнгъӕлмӕ кӕсун нӕ бон цӕмӕн ӕй? б) Михеййи 7:7 финст дзурдтӕ нин куд банхус кӕндзӕнцӕ, Йеговӕ нин ци хуӕрзеуӕг ӕрцӕттӕ кодта, уой райсунмӕ?

¹⁷ Абони махӕн уӕлдай ӕхсидзгӕ ӕй нӕ хуӕрзеуӕг нӕ зӕрдӕбӕл дарун. Зӕнхӕбӕл ци хабӕрттӕ цӕуй, етӕ хуарз ӕвдесунцӕ, аци дуйней фӕстаг бӕнттӕн сӕ кӕронбӕттӕни ке цӕрӕн. Тагъд рӕстӕги нӕ нӕбал багъӕудзӕй ӕнгъӕлмӕ кӕсун, зӕнхӕ Хуцауи Паддзахади дӕлбарӕ кӕд уодзӕй, еци рӕстӕгмӕ. Е хъӕбӕр дессаги рӕстӕг уодзӕй! Алкедӕр ни фӕууиндзӕй, берӕ ке уарзтан, фал ни мӕлӕт ке байста, еци адӕни. Еци рӕстӕги Авраам дӕр е ’ууӕндундзийнадӕ ӕма фӕразондзийнади туххӕй ӕ хуӕрзеуӕг райсдзӕй. Йеговӕ ин ӕхецӕн дӕр ӕма ӕ хеуӕнттӕн дӕр балӕвар кӕндзӕй ӕносон цард зӕнхӕбӕл. Ӕхцӕуӕн дин н’ адтайдӕ уони фӕууинун? Ӕма сӕ ӕнӕмӕнгӕй фӕууиндзӕнӕ, Авраами хузӕн, Хуцауи Паддзахади туххӕй дӕхе цӕмӕйдӕрти фӕццох кӕнунмӕ цӕттӕ ку уай, удта зин рӕстӕгути дӕр Йеговӕбӕл федарӕй ку ӕууӕндай ӕма имӕ фӕразонӕй ку ӕнгъӕлмӕ кӕсай, уӕд. (Бакӕсӕ Михеййи 7:7.)