1. Wanem sakrifaes nao staka mekem, and why nao olketa duim datwan?

DISTAEM staka million pipol blo God mekem olketa sakrifaes. Staka brata and sista chus for no marit. Staka couple chus for no garem pikinini yet. Staka famili mekem laef blo olketa simpol. Evriwan hia disaed olsem bikos lo wanfala important reason, olketa laek for duim best blo olketa for servem Jehovah. Olketa satisfae nomoa and trustim dat Jehovah bae provaedem evri samting wea olketa needim. Waswe, bae olketa regretim disison wea olketa mekem? Nomoa. Why nao iumi sure lo diswan? Iumi sure lo datwan bikos lo bifor Jehovah hem blessim Abraham, wea hem “dadi bilong evriwan wea garem faith.”—Rome 4:11.

2. (a) Olsem Hebrew 11:8-10, 16 storyim, why nao Abraham willing for lusim Ur? (b) Wanem nao iumi bae storyim lo disfala article?

² Abraham willing for lusim gudfala living wea hem garem lo taon blo Ur. Why? Bikos hem willing for weitim “datfala taon wea garem strongfala faondeson.” (Readim Hebrew 11:8-10, 16.) Wanem nao datfala “taon”? Wanem challenge nao Abraham feisim taem hem gohed weitim datfala taon for olketa buildim? And hao nao iumi savve olsem Abraham and olketa wea followim example blo hem lo taem blo iumi?

3. Wanem nao datfala taon wea Abraham weitim?

³ Datfala taon wea Abraham weitim, hem nao datfala Kingdom blo God. Jesus Christ and 144,000 anointed Christian nao insaed lo datfala Kingdom. Paul storyim datfala Kingdom olsem “wanfala taon bilong datfala God wea laef.” Datfala taon  hem nao “Jerusalem long heven.” (Heb. 12:22; Rev. 5:8-10; 14:1) Jesus teachim olketa disaepol blo hem for prea for datfala sem Kingdom, and ask for datfala Kingdom for duim samting lo earth olsem hem duim lo heven.—Matt. 6:10.

4. Olsem Jenesis 17:1, 2, 6 showimaot, haomas information nao Abraham savve lo hem abaotem datfala taon, or Kingdom, wea God promisim?

⁴ Waswe, Abraham savve lo evri samting abaotem hao datfala Kingdom blo God bae set ap? Nomoa. For staka handred year olketa information hia hem wanfala “holy secret.” (Eph. 1:8-10; Col. 1:26, 27) Bat Abraham savve dat samfala lo olketa pikinini blo hem bae kamap king. Bikos Jehovah hem barava talem datfala promis lo hem. (Readim Jenesis 17:1, 2, 6.) From Abraham garem strong faith lo olketa promis blo God, hem olsem hem lukim finis datfala Anointed Wan, or Messiah, wea bae kamap King lo Kingdom blo God. From datwan, Jesus talem olketa Jew lo taem blo hem: “Grani bilong iufala, Abraham, barava luk forward long samting wea mi bae duim. Hem lukim datwan and hem hapi tumas.” (John 8:56) So hem klia hao Abraham savve dat olketa pikinini lo laen blo hem bae kamap part lo wanfala Kingdom wea Jehovah nao hem setim ap, and hem willing for weit for Jehovah for fulfillim datfala promis.

5. Hao nao iumi savve dat Abraham hem weit for “taon” wea God designim?

⁵ Hao nao Abraham showimaot hem weitim datfala taon, or Kingdom, wea God designim? First samting, Abraham hem no part lo eni kingdom lo earth. Hem disaed for no setol lo wanfala ples and sapotim eni king lo disfala earth. And tu, Abraham no trae for setim ap kingdom blo hemseleva. Bat, hem gohed obeyim Jehovah and weit for olketa promis blo Jehovah for fulfill. Taem hem duim olsem, Abraham showimaot hem barava garem strongfala faith lo Jehovah. Distaem, bae iumi storyim samfala challenge wea hem feisim and bae iumi lane from example blo hem.

6. Ur hem wanem kaen taon?

⁶ Datfala taon lo Ur wea Abraham lusim, hem wanfala ples wea sef and naes tumas for stap, pipol lo there olketa skul gud and rich  tu. Bigfala wall protectim datfala taon and wanfala wata hem stap raonem thrifala saed blo hem. Pipol lo Ur savve lo maths and olketa savve tumas hao for raet. And luk olsem datfala taon hem ples wea olketa duim staka bisnis lo hem bikos olketa archaeologist faendem olketa document blo bisnis lo datfala ples. Pipol wakem olketa haos blo olketa from brik and olketa plasterem insaed lo haos and paintim witim white paint. Samfala lo olketa garem olketa big haos, wea garem 13 or 14-fala rum wea stap raonem wanfala area wea olketa kolem lo courtyard.

7. Why nao Abraham need for trustim Jehovah for protectim hem and famili blo hem?

⁷ Abraham need for barava trustim Jehovah for protectim hem and famili blo hem. Why? Tingim hao Abraham and Sarah bin stap lo taon blo Ur, wea sef and garem olketa naes haos insaed. Then hem mas muv go lo land blo Canaan and stap insaed lo olketa tent lo olketa open area nomoa. Hem and famili blo hem no garem nao eni big wall for protectim olketa. Bat, olketa stap lo ples wea isi nomoa for olketa enemy attakim olketa.

8. Wanem nao wanfala samting wea Abraham mas deal witim?

⁸ Abraham followim wanem God laekem, bat wantaem hem stragol for provaedem kaikai for famili blo hem. Hem mas deal witim wei wea wanfala bigfala hangre hem kasem land wea Jehovah sendem hem for go stap lo hem. Datfala hangre hem barava big tumas so Abraham disaed for tekem full famili blo hem go lo Egypt for stap lelebet taem. Bat taem hem kasem Egypt, Pharaoh, wea hem ruler blo datfala kantri, tekem waef blo hem from hem. Tingim hao masbi Abraham hem wari tumas go kasem taem wea Jehovah talem Pharaoh for givim bak Sarah lo hem.—Jenesis 12:10-19.

9. Wanem problem nao Abraham garem insaed famili?

⁹ Abraham feisim olketa problem tu insaed famili. Waef blo hem wea hem lovem tumas, Sarah, hem no savve garem pikinini. For staka year diswan mekem tufala feel sorre tumas. Gogo, Sarah givim servant blo hem, Hagar, lo Abraham mekem hem savve garem pikinini for Abraham and Sarah. Bat taem Hagar hem babule, hem start for ting daonem Sarah. Gogo datfala situation hem kamap hard fogud so Sarah hem raosem Hagar nao.—Jenesis 16:1-6.

10. Wanem samting nao happen lo Ishmael and Isaac wea testim wei wea Abraham trustim Jehovah?

¹⁰ Gogo, Sarah hem babule and garem wanfala son and Abraham nemim hem lo Isaac. Abraham lovem tufala son blo hem, Ishmael and Isaac. Bat from Ishmael treatim nogud Isaac, Abraham kasem komand for talem Ishmael and Hagar for mas go nao. (Jenesis 21:9-14) Bihaen, Jehovah askem Abraham for sakrifaesim Isaac. (Jenesis 22:1, 2; Heb. 11:17-19) Lo tufala taem hia, Abraham mas trustim dat Jehovah bae lukaftarem tufala son blo hem.

11. Why nao Abraham hem patient for weit lo Jehovah?

¹¹ Nomata Abraham feisim olketa challenge olsem, hem lane for patient and weit lo Jehovah. Luk olsem Abraham hem winim 70 years old taem hem and famili blo hem lusim Ur. (Jenesis 11:31–12:4) And for samting olsem wan handred year, hem stap insaed olketa tent, and muv raon insaed land blo Canaan. Abraham dae taem hem 175 years old. (Gen. 25:7, NW) Abraham dae bifor Jehovah fulfillim datfala promis for givim datfala land wea hem wakabaot insaed for olketa pikinini blo hem. And tu, hem no laef kasem taem wea Kingdom blo God hem start. Nomata olsem, taem Abraham dae, Bible hem sei hem satisfae lo laef blo hem. (Gen. 25:8, NW) Nomata hem mas deal witim staka challenge, Abraham hem garem strongfala faith and hem hapi for weit  lo Jehovah. Why nao hem fit for gohed and no givap? Bikos lo full laef blo Abraham, Jehovah protectim hem and hem olsem wanfala fren blo hem.—Jenesis 15:1; Aesaea 41:8; Jas. 2:22, 23.

12. Wanem nao iumi gohed for weitim, and wanem nao iumi bae story raonem?

¹² Olsem Abraham, iumi gohed for weitim datfala taon wea garem strong faondeson. Bat iumi no weit for Jehovah buildim datfala taon bikos Kingdom blo God hem start finis lo 1914 and hem tek kontrol finis lo heven. (Rev. 12:7-10) Bat iumi weit for hem kontrolem evri samting lo disfala earth. Taem iumi weit for datwan happen, staka situation nao iumi mas deal witim wea semsem witim wanem Abraham and Sarah feisim. Waswe, olketa servant blo Jehovah distaem olketa followim example blo Abraham? Olketa laef story wea stap lo Wastaoa magasin showim hao staka distaem garem faith and olketa patient olsem Abraham and Sarah. Distaem bae iumi story raonem samfala lo olketa example hia and lukim wanem nao iumi savve lanem.

13. Wanem nao iu lanem from experience blo Brata Walden?

¹³ Mas willing for mekem olketa sakrifaes. Sapos iumi laek for putim Kingdom blo God olsem first samting lo laef, iumi mas olsem Abraham, iumi mas willing for mekem olketa sakrifaes for mekem God hapi. (Matt. 6:33; Mark 10:28-30) Tingim example blo wanfala brata wea nem blo hem Bill Walden. * Lo 1942, Bill hem redi for graduate lo wanfala university lo U.S. for tekem wanfala degree for architectural engineering, lo datfala taem tu hem start for study witim olketa Jehovah’s Witness. Professor blo Bill arrangem for Bill duim wanfala waka bihaen hem graduate, bat Bill hem no acceptim. Hem explainim hao hem bae no duim datfala waka bat hem bae servem Jehovah full-taem. No longtaem bihaen olketa askem Bill for joinim military service. Lo wei wea showimaot respect, hem talem olketa hem bae no joinim army, from datwan hem mas fine  $10,000 and olketa putim hem lo prison for faevfala year. Hem release bihaen thrifala year. Then olketa invaetem hem for attendim Gilead Skul and hem serve olsem missionary lo Africa. Then Bill maritim Eva, and tufala serve lo Africa, diswan minim tufala mas mekem olketa sakrifaes. Gogo tufala mas go bak lo United States for lukaftarem mami blo Bill. Lo end blo laef story blo Bill, hem sei: “Tias kamap lo eye blo mi taem mi tingim nambawan privilege wea Jehovah iusim mi for duim for winim 70 year. Staka taem mi savve thankiu lo Hem from hem helpem mi for duim disfala full-taem service.” Waswe, iu fit for duim full-taem service?

14-15. Wanem nao iu lanem from experience blo Brata and Sista Apostolidis?

¹⁴ No expectim dat bae iu free from problem. Example blo Abraham helpem iumi for luksavve nomata olketa wea givim full laef blo olketa for servem Jehovah still olketa mas deal witim olketa problem. (Jas. 1:2; 1 Pet. 5:9) Diswan happen lo Aristotelis Apostolidis. * Hem baptaes lo 1946 lo Greece, and lo 1952 hem engage witim wanfala sista wea nem blo hem Eleni, tufala evriwan garem olketa sem goal. Bat, Eleni hem sik and hem garem wanfala brain tumor. Olketa aotem datfala tumor, bat tu-thri year bihaen tufala marit, datfala tumor hem kam bak moa. Olketa doctor operatim hem moa, bat bihaen datwan Eleni hem paralyze, and hem no savve toktok gud nao. Nomata hem barava sik, and nomata lo datfala taem olketa kasem persecution from gavman, hem gohed strong for preach.

¹⁵ Aristotelis lukaftarem waef blo hem for 30 years. Lo datfala taem, hem serve olsem elder, hem waka lo olketa assembly komiti, and help for buildim wanfala Assembly Hall. Then lo 1987, taem Eleni duim preaching, wanfala accident hem happen and hem barava garekil nogud, Eleni hem coma for thrifala year and then hem dae. Aristotelis storyim experience blo hem olsem: “Insaed olketa year wea go pas, olketa hardfala taem, challenge, and samting mi no expectim needim bigfala strong and wei for no givap. Bat Jehovah evritaem givim mi strong wea mi needim for winim olketa problem hia.” (Sams 94:18, 19) Jehovah lovem  olketa wea duim best blo olketa for hem, nomata olketa mas deal witim olketa problem.

16. Wanem gud advaes nao Brata Knorr givim lo waef blo hem?

¹⁶ Gohed tingim nomoa future. Abraham tingim nomoa olketa reward wea Jehovah bae givim hem lo future and datwan nao helpem hem for winim olketa challenge wea hem feisim. Sista Audrey Hyde trae for garem positive tingting nomata firstfala hasband blo hem Nathan Knorr, hem dae lo cancer and second hasband blo hem, Glenn Hyde, hem kasem disfala sik Alzheimer’s. * Hem sei samting wea helpem hem nao wanem Brata Knorr talem hem tu-thri week bifor hem dae. Hem sei: “Nathan talem mi moa: ‘Bihaen iumi dae, iumi bae kasem hope bilong iumi, and bae iumi no kasem pain moa.’ Then hem encouragem mi olsem: ‘Luk long front, from reward bilong iu long there.’ . . . Hem sei tu: ‘Go ahed for busy—trae for iusim laef bilong iu for duim samting for nara pipol. Diswan bae helpem iu for faendem hapi.’” Disfala advaes for gohed busy for duim gud samting for olketa narawan and “hapi long hope wea iufala garem” hem nambawan advaes!—Rome 12:12.

17. (a) Why nao iumi shud tingim nomoa future blo iumi? (b) Hao nao wei for followim example wea stap lo Maeka 7:7 helpem iumi for enjoyim olketa blessing wea bae kamap lo future?

¹⁷ Distaem winim enitaem bifor, iumi shud tingim nomoa future blo iumi. Staka samting wea happen distaem lo world hem showimaot iumi barava stap lo last part blo olketa last day blo disfala system. Klosap nao bae iumi no weit moa for datfala taon wea garem strong faondeson for hem kontrolem full world. Wanfala lo olketa staka blessing wea iumi bae enjoyim hem nao for iumi lukim moa olketa wea iumi lovem wea dae finis. Lo datfala taem, from faith and patient fasin blo Abraham, Jehovah bae blessim hem taem hem mekem Abraham and famili blo hem for laef bak moa lo disfala earth. Waswe, bae iu lo there for welkamim olketa? Iu savve stap lo there, olsem Abraham, sapos iu willing for mekem olketa sakrifaes for Kingdom blo God, sapos iu gohed keepim strong faith blo iu nomata iu feisim olketa problem, and sapos iu lane for patient for weit lo Jehovah.—Readim Maeka 7:7.