1. ¿Achca huauqui panicunaca imata ruranatataj decidishcacuna?

CUNAN punllacunapica achca huauqui panicunami Jehová Diosta sirvingapaj huaquin sacrificiocunata rurashca. Maijancunaca mana cazaranata decidishcacunachu. Shujtajcunaca cazarashca cashpapish huahuacunata mana charinatami decidishcacuna. Cutin achca familiacunaca minishtirishca cosascunallahuanmi causancuna. Paicunaca Jehová Dios tucuipi ayudanata yachashpami contentos sintirincuna. ¿Imamantataj Jehová Dios ayudanata seguros canchij? Ñaupa punllacunapica Diosca paita sirvijcunatami cuidarca. Por ejemplo, Abrahamtaca achcatami bendiciarca. Romanos 4:11-pica: ‘Abrahamca crijcunapaj yayami can’ ninmi.

2. a) Hebreos 11:8-10 y 16-pi nishca shinaca ¿Abrahamca imamantataj Ur llajtamanta llujshirca? b) ¿Cai yachaipica imatataj yachashun?

² Abrahamca Ur llajtapi imalla charishcacunata alaja causaitami saquirca. ¿Imamanta? Paica, ‘alli sinchita shayachishca pueblota shuyacushcamantami’ chashna rurarca (Hebreos 11:8-10, 16-ta liyipai). ¿Chai puebloca imatataj ricuchin? ¿Chai pueblota shuyacushpaca Abrahamca ima llaquicunatataj chꞌimbapurarca? ¿Abrahampaj ejemplomanta, cunan punllacunapi Diosta sirvijcunapaj ejemplomantaca imatataj yachai tucunchij? Cai yachaipimi cai tapuicunamantaca yachashun.

3. ¿Abraham shuyacushca puebloca imatataj ricuchin?

³ Abraham shuyacushca puebloca, Diospaj Gobiernotami ricuchin. Cai Gobiernopica Jesucristo, 144.000  agllashcacunami mandangacuna. Pabloca Diospaj Gobiernotaca “causaj Diospaj jahua pacha causaj Jerusalén” ninmi (Hebreos 12:22; Apocalipsis 5:8-10; 14:1). Jesusca paipaj discipulocunamanca: ‘Cambaj Gobierno ña chayamuchun. Ima shinami jahua pachapi can munashcata ruracun, shinallataj cai pachapipish can munashcata rurachun’ nishpa Yaya Diosta mañanguichij nircami (Mateo 6:10).

4. Génesis 17:1, 2 y 6-pi nishca shinaca ¿Abrahamca Diospaj Gobiernomantaca imatataj yacharca?

⁴ Abrahamca Diospaj Gobierno ima laya cashcataca mana tucuita alli yacharcachu. Achca huatacunatami cai Gobierno ima cashcata pi mana yachai tucurca (Efesios 1:8-10; Colosenses 1:26, 27). Pero Jehová huillashca shinaca Abrahamca paipaj huahua huahuacuna mandaj tucuna cashcatami alli yacharca. Paica Jehová Dios ima huillashcata pajtachingacamami shuyana carca (Génesis 17:1, 2, 6-ta liyipai). Abrahamca sinchi feta charishcamantaca Diospaj Gobiernopi agllashca Reyta ricucuj shinami carca. Chaimantami Jesusca judiocunamanca: “Cancunapaj ñaupa yaya Abrahamca, ñuca shamuna punllata ricuna cashcamanta cushicurcami. Ricushpacarin, ashtahuanmi cushicurca” nirca (Juan 8:56).

5. ¿Abrahamca Diospaj Gobierno mandachun shuyacushcataca ima shinataj ricuchirca?

⁵ ¿Abrahamca Diospaj Gobierno mandachun shuyacushcataca ima shinataj ricuchirca? Paica shuj solo llajtacunapi causanataca mana agllarcachu. Cai Allpapi tiyaj gobiernocunapaj partepish mana tucurcachu. Shinallataj paipaj propio mandanatapish mana rurarcachu. Chaipaj randica Jehová Diostaca tucuipimi cazurca. Shinallataj Dios cusha nishcacunapimi shuyarca. Chashnami Jehová Diospi sinchi feta charishcata ricuchirca. Cunanca, Abraham ima llaquicunata charishcata, paipaj ejemplomanta imata yachai tucushcatami ricushun.

6. ¿Ur llajtaca ima shinataj carca?

⁶ Abraham causashca Ur llajtapica alli, tranquilo causaimi tiyarca. Chai llajtapica quimsa ladocunatami muyujta shuj jatun larca yacu  tiyarca. Shinallataj jatun pircacunahuanpish muyuchishcami carca. Ur llajtapi causajcunaca escribinata, matematicastapish allimi yachajcuna carca. Chai llajtapica cꞌatushpa, randishpami causajcuna carca. Historiamanta yachajcunaca maipimi Ur llajta cashcapica negociocunapaj documentocunata japishcacuna. Huasicunataca ladrillocunahuanmi rurashcacuna carca. Patacunatapish enlucishpa, yurajllatami pintashcacuna carca. Huaquin huasicuna chaupipica rumicunahuan rurashca patiomi tiyarca. Chai patio muyundijpica 13 o 14 cuartocunami tiyarca.

7. ¿Imamantataj Abrahamca Jehová Diospi confiana carca?

⁷ Abrahamca paipaj familiahuanmi Ur llajtamanta llujshishpa, Canaán llajtapi causanaman rircacuna. Chai llajtapica carpa huasicunapimi causai callarircacuna. Canaán llajtapica jatun pircacunata, jatun larca yacutaca mana charircacunachu. Chaimi contracunaca paicunataca jahualla llaquichinman carca. Chaimantami Abrahamca Jehová Dios paipaj familiata cuidanapi confiana carca.

8. ¿Abrahamca ima llaquicunahuantaj chꞌimbapurarca?

⁸ Abrahamca Diospaj munaitami pajtachirca. Pero shuj cutinca, Canaán llajtapi jatun yaricai tiyashcamantami paipaj familiacunaman carangapajca mana tanto micuna tiyarca. Chaimi paipaj familiacunahuanca Egipto llajtapi causanaman rirca. Pero paicuna Egipto llajtapi cajpica, chai llajtata mandaj faraonca Abrahampaj huarmi Saratami quichurca. Qꞌuipaca Jehová Diosca faraontaca Abrahampaj huarmita tigrachichunmi mandarca. Tigrachingacamaca Abrahamca achcatami preocuparishcanga (Génesis 12:10-19).

9. ¿Abrahamca paipaj familia ucupica ima problemacunatataj charirca?

⁹ Abrahamca sinchi problemacunatami charirca. Paipaj cꞌuyashca huarmi Saraca huahuacunataca mana chari tucurcachu. Chaimantami achca huatacunataca llaquilla causarcacuna. Saraca huahuacunata mana chari tucushcamantami Abrahamtaca: “Ñucata sirvij Agar huarmihuan huahuacunata chari” nirca. Pero Agarca Ismaelta chichu saquirishpaca Sarataca pꞌiñai callarircami. Chaita ricushpami Saraca Agartaca llaquichi callarirca. Chaimi Agarca miticushpa rirca (Génesis 16:1-6).

10. ¿Abrahamca imamantataj Jehová Diospi confiashcataca ricuchina carca?

¹⁰ Qꞌuipaca Saraca Isaac shuti huahuatami charirca. Abrahamca Ismaeltapish, Isaactapishmi cꞌuyaj carca. Pero Ismael Isaacta mana alli tratajta ricushpami Abrahamca Agartapish Ismaeltapish huasimanta llujshichishpa cacharca (Génesis 21:9-14). Achca huatacuna huashaca, Jehová Diosca Abrahamtaca paipaj churi Isaacta shuj ofrendata shina cuchunmi mandarca (Génesis 22:1, 2; Hebreos 11:17-19). Cai ishqui cutinmi Abrahamca Jehová Dios paipaj churicunapi ima nishcata pajtachinata crirca.

11. ¿Imamantataj Abrahamca Jehová Diospi pacienciahuan shuyarca?

¹¹ Abrahamca Ur llajtamanta paipaj familiahuan llujshishpaca 70 yalli huatacunatami charishcanga (Génesis 11:31–12:4). Paica casi 100 huatacunatami carpa huasicunapi tucui Canaán llajtapi causarca. 175 huatacunata charishpami huañurca (Génesis 25:7). Paica Jehová Dios Canaán allpata paipaj huahuacunaman cushcataca mana ricurcachu. Shinallataj Diospaj Gobierno mandai callarishcataca mana ricurcachu. Chaita mana ricushpapish, Bibliapica: ‘Abrahamca uni huatacunatami cushilla causarca’ ninmi (Génesis 25:8). Achca problemacunata charishpapish sinchi fetami charirca. Achca tiempotami Abrahamca Jehová Dios cusha nishcacunata  pajtachichun pacienciahuan shuyarca. ¿Imamanta? Jehová Dioshuan alli amigo cashcamanta, Jehová Dios paita cuidashcamantami pacienciahuan shuyarca (Génesis 15:1; Isaías 41:8; Santiago 2:22, 23).

12. a) ¿Diosta sirvijcunaca imatataj shuyacunchij? b) ¿Cunanca imatataj yachagrinchij?

¹² Ñucanchijpish Abraham shinami “alli shayachishca pueblota” shuyacunchij. Pero cai pueblota pi shayachichunca mana shuyanchijchu. Cai puebloca Diospaj Gobierno cashcamantami 1914 huatamanta jahua pachapi ña mandai callarirca (Apocalipsis 12:7-10). Pero cai Allpata Diospaj Gobierno mandachunmi shuyacunchij. Cai Gobierno mandangacamaca Abraham, Sara shinami achca llaquicunata charishun. Cunan punllacunapish maijan huauqui panicunaca Abrahampaj, Sarapaj ejemplotami catishcacuna. Paicunamantaca La Atalaya revistapimi yachai tucunchij. Cunanca paicunamanta yachashun.

13. ¿Huauqui Billpaj causaimantaca imatataj yachanchij?

¹³ Diosta ashtahuan sirvingapaj esforzarishunchij. Diospaj Gobiernota punta lugarpi churangapajca Abraham shinami huaquin cosascunata saquingapaj listos cana canchij (Mateo 6:33; Marcos 10:28-30). Huauqui Bill Waldenpaj causaimanta yachashun. * 1942 huatapica manaraj ingeniero tucushpami testigo de Jehovacunahuan Bibliamanta estudiai callarirca. Shuj profesorca, universidadmanta Bill manaraj llujshijpimi shuj trabajota mashcashpa curca. Pero paica chai trabajotaca mana chasquircachu. Jehová Diosta ashtahuan sirvinata munashcamantami ingeniero shina mana trabajanata decidirca. Qꞌuipaca gobiernoca cuartelman richunmi cayarca. Paica respetohuanmi mana risha ninichu nishpa intindichirca. Mana risha nishcamantami 10 mil dolarcunata pagachirca. Shinallataj 5 huatacunapajmi carcelpi churarca. Pero quimsa huatacuna qꞌuipallami carcelmanta llujshirca. Asha tiempo huashaca Escuela de Galaadmanmi invitarcacuna. Graduarishca qꞌuipaca, misionero shina, África llajtapi sirvichunmi cacharcacuna. Billca  Eva shuti panihuanmi cazararca. Paicunaca Jehová Diosta África llajtapi sirvingapajmi achcata esforzarircacuna. Huaquin huatacuna qꞌuipaca Billpaj mamata cuidangapajmi, Estados Unidosman tigrarcacuna. Billca ima shina causashcata yuyarishpaca cashnami nirca: “70 huatacunata yalli Jehová Diosta sirvishcamantami achcata cushicuni. Ñuca tucui causaipi paita sirvichun ayudashcamantami Jehová Diostaca pagui nini”. Canpish Jehová Diostaca ¿tiempo completotachu sirvisha ningui?

14, 15. ¿Huauqui Aristotelesmanta, pani Elenimantaca imatataj yachanchij?

¹⁴ Llaquicuna illaj causanata ama shuyashunchij. Abrahampaj ejemploca Diosta sirvijcunapish llaquicunata charinatami ricuchin (Santiago 1:2; 1 Pedro 5:9). Huauqui Aristoteles Apostolidispaj causaimanta yachashun. * Paica 1946 huatapimi Grecia llajtapi bautizarirca. 1952 huatapimi Diosta alli sirvij Eleni huarmihuan cazarangapaj maquita mañarca. Pero Elenipaj umapi shuj tumor llujshishcatami doctorcunaca japirca. Chai tumortami doctorcunaca anchuchircacuna. Asha huatacuna cazarashca qꞌuipaca cutinmi chai tumorca umapi ricurirca. Chaimantami cutin tigra operarcacuna. Operarishca huashaca paipaj tucui cuerpotaca mana cuyuchi tucurcachu. Alli parlanatapish mana pudircachu. Chai tiempopi testigo de Jehovacunata gobierno catirashpa llaquichijpipish Elenica ungushca cashpapish cushillami predicashpa catirca.

¹⁵ Huauqui Aristotelesca paipaj huarmitaca 30 huatacunatami cuidarca. Chai tucui tiempopica ancianomi carca. Shinallataj jatun tandanacuicunata organizangapaj, shuj Jatun Tandanacuna Huasita rurangapajmi ayudarca. 1987 huatapica Elenica predicacushpami shuj accidenteta charirca. Chaimantami quimsa huatacunata comapi saquirirca. Qꞌuipaca huañurcami. Aristotelesca pai ima shina causashcamanta parlashpaca: “Achca huatacunatami mana yuyashcapi llaquicunahuan chꞌimbapurarcani. Shinapish Jehová Diosta sirvinataca manataj saquircanichu.  Llaquicunata ahuantashpa catingapajca Jehová Diosmi fuerzata curca” nircami (Salmo 94:18, 19). Problemacunata charijpipish paita sirvishpa catijcunataca Jehová Diosca achcatami cꞌuyan.

16. ¿Huauqui Knorrca imatataj paipaj huarmimanca nirca?

¹⁶ Dios cusha nishcacunapi yuyashunchij. Abrahamca Jehová Dios cusha nishcacunapi shuyashpami llaquicunata ahuantarca. Pani Audrey Hydeca llaquicunata charishpapish cushillami ahuantai tucurca. Por ejemplo, paipaj punta cusa Nathan Knorrca cáncer ungüihuanmi huañurca. Cutin, paipaj qꞌuipa cusa Glenn Hydeca Alzheimer nishca ungüitami charirca. * Pani Audreyca paipaj punta cusa ima nishcatami yuyarirca. Paipaj cusa Knorrca manaraj huañushpaca caitami nirca: “Huañushpapish Dios cusha nishcacunatami chasquishun. Ima llaquicunatapish mana charishunchu. Chaimanta Dios cusha nishcacunapi yuyai. Chaica jatun bendicionmi canga. Shinallataj shujtajcunata ayudashpa causai. Chashnami cushilla causangui”. Ñucanchijpish shujtajcunata ayudashpa Dios cusha nishcacunata japina yuyailla cashpaca cushillami causashun (Romanos 12:12).

17. a) ¿Imamantataj Dios cusha nishcacunapi shuyana canchij? b) Miqueas 7:7-pi nishca shinaca ¿Dios cusha nishcacunata chasquingapajca imatataj rurana canchij?

¹⁷ Tucuri punllacunapi causacushcamantami chꞌican chꞌican llaquicuna ricurin. Chaimantami Dios cusha nishcacunapi shuyashpa causana canchij. Ñallami Diospaj Gobierno cai Allpata mandanga. Ña mandai callarijpica achca bendicioncunatami charishun. Huañushca familiacunatapishmi cutin ricushun. Abraham sinchi feta charishcamanta, pacienciahuan shuyashcamantami paitapish, paipaj familiatapish Jehová Diosca causachinga. Paraisopi paicunata chasquingapajca ¿imatataj rurana canchij? Abraham shinami Diospaj Gobiernotaca punta lugarpi churana canchij. Llaquicunahuan chꞌimbapuracushpapish sinchi fetami charina canchij. Shinallataj Jehová Dios cusha nishcacuna pajtaringacamami pacienciahuan shuyana canchij (Miqueas 7:7-ta liyipai).