1. ¿Imakunatan iñiqmasinchiskuna ruwashanku Jehová Diosta astawan servinankupaq?

KAY tiempopi iñiqmasinchiskunaqa imaymanatan ruwashanku Jehová Diosta astawan servinankupaq. Chaymi wakinqa solterolla kashanku, wakin casarasqakunapas mana wawallayoq kashanku. Wakintaq pisi kaqnillayoq kaspapas Jehová Diosta servishanku. Chaywanpas iñiqmasinchiskunaqa Jehová Diospin confianku, manataqmi paypa yanapayninmantaqa iskayankuchu. ¿Imaraykun mana Diospa yanapayninmanta iskayankuchu? Ñaupa tiempopi Jehová Dios Abrahanta cuidasqanrayku. Abrahanqa allin iñiyniyoqmi karan chaymi Jehová Diosqa cuidaran bendeciran ima. Paymantan Biblia nin: “Abrahanqa iñisqankurayku llapa chaninpaq jap’isqa kaqkunaq taytan kapuran”, nispa (Rom. 4:11).

2. a) Hebreos 11:8-10, 16 nisqan jina, ¿imaraykun Abrahán Ur llaqtanmanta juj ladoman ripuran? b) ¿Imakunamantan kay yachachikuypin yachasunchis?

² Abrahanqa Ur llaqtanpi kaqninkunata saqespan juj ladoman ripuran. ¿Imaraykun chayta ruwaran? ‘Cheqaq cimentacionniyoq llaqtata suyakusqanrayku’ (leey Hebreos 11:8-10, 16). ¿Imataq chay ‘cheqaq cimentacionniyoq llaqtari’? ¿Ima sasachakuykunapin Abrahán tarikuran chay “cheqaq cimentacionniyoq llaqtata” suyakushaspa? ¿Imaynatan noqanchispas Abrahán jina, kay tiempopi wakin iñiqmasinchiskuna jina, ‘cheqaq cimentacionniyoq llaqtata’ pacienciawan  suyakusunman? Kay yachachikuypin chaykunamanta yachasunchis.

3. ¿Iman cheqaq cimentacionniyoq “llaqta”?

³ Abrahanpa suyakusqan ‘cheqaq cimentacionniyoq llaqtaqa’ Jehová Diospa gobiernonmi. Chay gobiernopiqa Jesusmi 144.000 ajllasqa runakunapiwan janaq pachamanta kamachikamunqaku. Chay gobiernomantan apóstol Pablo niran: ‘Kausaq Diospa llaqtanmi, arí, janaq pacha Jerusalenmi’, nispa (Heb. 12:22; Apo. 5:8-10; 14:1). Jesuspas yachachiranmi Diospa gobiernonmantaqa, chaymi khaynata mañakunankupaq qatikuqninkunaman yachachiran: “Gobiernoyki jamuchun. Munayniyki kay pachapi ruwakuchun imaynan janaq pachapipas ruwakun jinata”, nispa (Mat. 6:10).

4. Génesis 17:1, 2, 6 nisqan jina, ¿imakunatan Abrahán yacharan Jehová Diospa gobiernonmanta?

⁴ Abrahanqa manan llapantachu Diospa gobiernonmantaqa yacharan. Chay gobiernonmanta yachayqa unay tiempon pakasqa kasharan (Efes. 1:8-10; Col. 1:26, 27). Pisillataña Diospa gobiernonmanta yacharan chaypas, Abrahanqa yacharanmi paypa mirayninmanta reykuna lloqsinanta (leey Génesis 17:1, 2, 6). Chaymi Jesusqa Abrahanmanta judiokunaman niran: “Taytaykichis Abrahanqa maytan munaran imakunatachus ruwanay karan chayta rikuyta, chaypi piensaspan payqa anchata kusikuran, rikurantaqmi kanpas, chaywanmi payqa anchata kusikuran”, nispa (Juan 8:56). Abrahanqa yachallarantaqmi mirayninmanta kaqkuna Diospa gobiernonpi kamachikamunankuta, chaytan pacienciawan suyakuran.

5. ¿Imaynapin yachanchis Abrahán cheqaq cimentacionniyoq llaqtata pacienciawan suyakusqanta?

⁵ ¿Imaynatan Abrahán rikuchiran cheqaq cimentacionniyoq ‘llaqtallata’ suyakusqanta? Ñaupaqta, payqa manan mayqen gobiernomanpas sayapakuranchu, nitaqmi juj gobiernotapaschu sayarichiran. Aswanpas Jehová Diosta kasukuspan promesankunapi confiaran. Chhaynapin rikuchiran allin iñiyniyoq kasqanta. ¿Ima sasachakuykunapin Abrahán tarikuran chay “cheqaq cimentacionniyoq llaqtata” suyakushaspa? Chaymanta astawan yachasun.

6. ¿Imaynan Ur llaqta karan?

⁶ Abrahanpa saqesqan Ur llaqtaqa sumaqmi karan. Chay llaqtaqa muyuriqninpi jatun perqakunawanmi allin waqaychasqa kasharan, chaymantapas kinsa ladonkunapin jatun sankhakuna kasharan. Ur llaqtapi tiyaq runakunaqa allintan qelqayta yacharanku, allintan negociokunatapas ruwaqku. Allin yachaq runakunan Ur llaqtapi tariranku Abrahanpa tiemponpi negocio ruwasqanku qelqakunata. Chay llaqtapi wasikunaqa allin ruwasqa allin pintasqa iman karan, chaymantapas yaqa 14 cuartokunayoqmi karan, pationkupas rumikunawan allin ruwasqan karan.

7. ¿Imaraykun Abrahán Jehová Diospi confianan karan?

⁷ Abrahán familianpiwan Ur llaqtamanta ripuspaqa Jehová Diospin confianan karan. ¿Imarayku? Ur llaqtamanta lloqsiy mana facilchu kasqanrayku. Abrahanpas esposanpaqpas Ur llaqtapiqa imaymanayoqmi karanku, chaymanta lloqsispan ichaqa Canaán suyupi carpakunallapi tiyananku karan. Chaymantapas Canaán suyupiqa manañan muyuriqninkupi jatun sankhakunapas ni perqakunapas karanñachu enemigonkunamanta pakaykunanpaq.

8. ¿Ima sasachakuykunapin Abrahán tarikuran?

⁸ Abrahanqa Jehová Diostan kasukuran. Ichaqa imaymana sasachakuykunapin tarikuran. Juj kutinmi tiyasqan ladopi sinchi yarqay karan, chaymi Egipto llaqtaman familianwan ripuran. Egipto llaqtaman chayaqtinkutaq Egipto reyqa esposan Sarata qechupuran. Chaymi Abrahanqa sinchi llakisqa kasharan. Jehová Diosmi ichaqa faraonta niran esposanta Abrahanman kutichipunanpaq (Gén. 12:10-19).

9. ¿Ima sasachakuykunapin tarikullarantaq Abrahán?

⁹ Abrahanqa juj sasachakuykunapin tarikullarantaq. Paypa esposanqa manan wawayoq kayta atiranchu, chhaynapi tarikuyqa sinchi sasa paykunapaqqa karan. Wawayoq kayta munaspan Saraqa kamachin Agarta Abrahanwan puñunanpaq qoran. Agarqa onqoq kasqanta reparakuspan Sarata pisichayta qallariran. Chaymi Saraqa Agarta wasinmanta qarqopuran (Gén. 16:1-6).

10. ¿Imakunaraykun Abrahán Jehová Diospi confianan karan?

¹⁰ Qhepa tiempomanmi Saraqa onqoq rijurispa wawayoq kapuran, chay wawantan Isaac nispa Abrahanqa suticharan. Payqa anchatan munakuran Ismaelta wawan Isaactapas. Ismaelmi ichaqa mana allintachu Isaacta trataran, chayraykun Abrahanqa Ismaelta Agartawan wasinmanta qarqopuran (Gén. 21:9-14). Chaymantapas Abrahanqa Isaactan Jehová Diosman sacrificiopi jaywanan karan (Gén. 22:1, 2; Heb. 11:17-19). Chaymi Abrahanqa Jehová Diospa mirayninmanta prometesqanpi confianan karan.

11. ¿Imaraykun Abrahán Jehová Diospa promesankunata pacienciawan suyakunan karan?

¹¹ Abrahanqa Jehová Diospin confiaran, chaymi Jehová Diospa promesankuna junt’akunanta pacienciawan suyakuran. Abrahanqa 70 watanpin kashanman karan Ur llaqtanmanta lloqsipuspaqa (Gén. 11:31–12:4). Pachaj watakunataq Canaán suyupi carpa-carpakunapi tiyaran, jinaspan 175 watanpi kashaspa wañukapuran (Gén. 25:7). Abrahanqa manan rikuranchu mirayninmanta Jehová Diospa prometesqan imayna junt’akusqantaqa. Manallataqmi rikullarantaqchu ‘cheqaq cimentacionniyoq llaqtatapas’, chhaynaña kaqtinpas “unayta kausaspan thaj wañukapuran” (Gén. 25:8). Payqa  imaymana sasachakuykunapin tarikuran, chaywanpas allin iñiyniyoqmi karan, chaymi Jehová Diospa promesankunata pacienciawan suyakuran. ¿Iman Abrahanta yanaparan sasachakuykunata atipananpaq? Jehová Dioswan allin amigontin kasqanmi. Chaymantapas Jehová Diosqa imaymanapin Abrahanta yanaparan (Gén. 15:1; Is. 41:8; Sant. 2:22, 23).

12. a) ¿Imatan Jehová Diosta serviqkuna suyakushanchis? b) ¿Imatan kaypi yachasun?

¹² Jehová Diosta serviqkunapas Abrahán jinan “cheqaq cimentacionniyoq llaqtata” suyakushanchis. Chay “cheqaq cimentacionniyoq llaqtaqa” Jehová Diospa gobiernonmi. Chay gobiernoqa 1914 watamantapachan janaq pachapi kamachikushan (Apo. 12:7-10). Kay pachatapas kamachikamunantan noqanchispas suyakushanchis. Ichaqa chay gobierno chayamunankaman Abrahán esposan Sara jinan imaymana sasachakuykunapi tarikusunchis. Wakin iñiqmasikunapas imaymana sasachakuykunapin tarikuranku. Paykunaq vidanmantan Qhawaq qelqapi lloqsimuran, chaykunamantan kaypi yachasunchis.

13. ¿Imatan Bill Walden iñiqmasinchismanta yachasunman?

¹³ Jehová Diosta servinanchispaqqa imaymanatan saqenanchis kanqa. Jehová Diospa testigonkunaqa Diospa gobiernontan ñaupaqman churananchis, chaypaqqa yaqapaschá imaymanata saqenanchis kanqa (Mat. 6:33; Mar. 10:28-30). Chaytan ruwaran iñiqmasinchis Bill Waldenpas. * Payqa 1942 watapin ingeniero kananpaq Estados Unidos nacionpi estudiasqa, chayllamansi iñiqmasinchiskunawan Bibliamanta yachayta qallarisqa. Estudiayta tukushaqtinsi profesorninqa juj llank’anata paypaq maskhapusqa, paymi ichaqa Jehová Diosta serviyta munaspa mana chay llank’anata chaskikusqachu. Chay qhepallamanmi Billtaqa ejercitoman  wajasqaku, paymi ichaqa mana ejercitoman riyta munasqachu, chaymi 10.000 dólares qolqeta pagananpaq multasqaku. Jinaspapas kinsa watas carcelpi wisq’asqaku. Carcelmanta lloqsisqan qhepallamanmi Bill hermanonchistaqa Galaad Escuelaman invitasqaku, chaymantataq misionero jina África ladopi yanapakunanpaq kachasqaku. Chaypin hermanonchisqa Eva sutiyoq hermananchiswan casarakapusqa. Paykunaqa imaymanatas ruwasqaku Jehová Diosta astawan servishanallankupaq. Watakuna qhepamanmi ichaqa Estados Unidos nacionman kutipusqaku, Bill iñiqmasinchispa mamanta cuidanankupaq. Paymi nin: “Jehová Diosqa yaqa qanchis chunka watakunan payta servinaypaq yanapawaran, chaykunata yuyarispan mayninpiqa kusikuymanta waqaniraq, Jehová Diostan ‘gracias nini’ tukuy tiempo yanapawasqanmanta”, nispa.

14, 15. ¿Imatan Apostolidis iñiqmasinchiskunamanta yachasunman?

¹⁴ Jehová Diosta servispaqa imaymana sasachakuykunapin tarikusunchis. Abrahanpas Jehová Diosta servishaspaqa imaymana sasachakuykunapin tarikuran (Sant. 1:2; 1 Ped. 5:9). Chaymi pasaran Aristotelis Apostolidis iñiqmasinchiswan. * Payqa Grecia nacionpin 1946 watapi bautizakuran. 1952 watapitaq Eleni hermanawan casarakunanpaq rimanakuran. Chay qhepallamanmi Elenipi juj tumorta umanpi doctorkuna tariranku. Jinan chay tumorninmanta operachikuran. Ichaqa casarakusqan qhepallamanmi jujmanta umanpi tumornin rijurimullarantaq, chaymi jujmanta operachikullarantaq, ichaqa manañan allintachu rimaran, nitaqmi allintapaschu puriranpas. Chhayna sasachakuykunapiña iñiqmasinchis Eleni tarikuran chaypas tukuy sonqonwanmi Jehová Diosta servishallaran.

¹⁵ Aristotelis iñiqmasinchisqa 30 wata masmi esposanta cuidaran. Chaywanpas iñiq t’aqapin umalliq jina yanapakuran, yanapakullarantaqmi asambleakunapipas. Ichaqa 1987 watapin Diosmanta willashaspa esposan Eleniqa accidentakuran, kinsa wata pasaytataq wañukapuran. Aristotelis iñiqmasinchismi  nin: “Llapa chay watakunapin sinchi sasachakuykunapi tarikurani, ichaqa kallpachakuranin chay sasachakuykunata atipanaypaq. Jehová Diospas kallpachawashallaranmi ama pisikallpayanaypaq”, nispa (Sal. 94:18, 19). Jehová Diosqa anchatan munakuwanchis payta servinanchispaq kallpachakuqtinchisqa.

16. ¿Ima nispan Knorr iñiqmasinchis esposanta kallpacharan?

¹⁶ Ñaupaqllaman qhawasun. Abrahanqa Jehová Diospa promesankunapin yuyayninta churaran, chaymi yanaparan sasachakuykunata atipananpaq. Audrey Hyde iñiqmasinchitaspas chaymi yanaparan. Paypa ñaupaq qosanqa Nathan Knorrmi karan, Knorrqa cáncer onqoywanmi wañupuran. Iskay kaq qosantaqmi Glenn Hyde karan, paypas Alzheimer onqoyniyoq kapuran. * ¿Iman Audrey iñiqmasinchista yanaparan chay sasachakuykunata atipananpaq? Paymi nin: “Nathan qosaymi manaraq wañupushaspa niwaran: ‘Wañusqanchis qhepamanqa manan pipas sumaq suyakuyninchistaqa qhechuwasunmanchu, jamuq tiempopiqa manañan ima ñak’ariykunapas kanqañachu’, nispa. Chaymantapas niwallarantaqmi: ‘Ñaupaqllaman qhawashay, chaypin premionchisqa kashan, kallpachakushallaytaq Jehová Diosta servinaykipaq jujkunatapas yanapashanallaykipaq, chhaynapin kusisqa kanki’, nispa. Chay nisqanqa anchatan kallpachawaran”, nispa. Knorr iñiqmasinchispa nisqanqa noqanchistapas anchatan kallpachawanchis ñaupaqllaman qhawashananchispaq (Rom. 12:12).

17. a) ¿Imaraykun Jehová Diosta serviqkuna ñaupaqllaman qhawashananchis? b) Miqueas 7:7 nisqan jina, ¿iman yanapawasun jamuq tiempopi Jehová Diospa bendicioninkunata chaskinanchispaq?

¹⁷ Kay tiempopi Jehová Diosta serviqkunaqa ñaupaqllamanmi qhawananchis. Yachasqanchis jina, pisi tiempollamantan Diospa gobiernonqa kay pachata kamachinqa. Chay gobiernonpiqa sumaq bendicionkunatan chaskisunchis, jinaspapas wañupuq familianchiskunawanmi jujmanta tupasunchis. Abrahanpas familianpas kausarinpunqakun. ¿Munawaqchu paykunawan tupayta? Paykunawan tupanaykipaqqa kallpachakushanallaykin Jehová Diosta servishanallaykipaq. Chaymantapas pacienciawanmi Diospa promesankunata suyakushanallayki (leey Miqueas 7:7).