1. Ashtaca millón huauquipanicunaca ¿imatallata Jehovata sirvingapaca rurashca?

ASHTACA millón huauquipanicunami Jehovata ashtahuan sirvingapaj munashpa huaquingunaca soltero o soltera quidashca. Cutin cazadocunaca Jehovata ashtahuan sirvingapaj munashpami huahuacunata ama charingapaj decidishca. Shinallata huaquingunaca minishtirishcaguhuanlla causanatami decidishca. Cai huauquipanicunaca Jehová Dios cuidanapimi tucui shunguhuan confian. Paicunaca punda tiempopi Jehová Dios paipa sirvijcunata cuidashcatami yaria causan. Por ejemplo, Abrahán runagutaca Jehová Diosca ninandami bendiciarca. Abrahán runaguca ‘tucui crijcunapa taitami tucurca’ (Rom. 4:11).

2. a) Hebreos 11:8-10, 16​pi nishca shinaca ¿imamandata Abrahán runaguca Ur llactamanda rirca? b) Cunanga ¿ima tapuicunamandata yachajugripanchi?

² Abrahán runaguca Ur llactapimi causarca. Ur llactapi alipacha causashpa, tucuita charishpapash chai llactamanda llujshishpami rina tucurca. ¿Imamandata chaimanda rirca? ‘Abrahanga shinllitapacha churashca pueblopi causagrinata shuyaimandami’ Ur llactamandaca rirca (Hebreos 11:8-10, 16, liingui). Abrahán shuyajushca ‘puebloca’ ¿imata can? Abrahanga ¿ima llaquicunatallata charirca? Ñucanchicunaca ¿imashinata Abrahanshna, shuj huauquipanicunashnapash caita ushapanchi? Cunanga cai tapuicunamandami yachajupashun.

3. Abrahán shuyajushca ‘puebloca’ ¿imata can?

³ Abrahán shuyajushca ‘puebloca’ Diospa Reinomi can. Chai Reinopimi Jesucristoca 144 mil ungidocunahuan mandanga. Apóstol Pabloca Diospa Reinomanda parlashpaca ‘causajuj Taita Diospa jahua pachapi tiajuj Jerusalén’ nircami (Heb. 12:22; Apoc. 5:8-10; 14:1). Jesús cai Alpapi cashpaca Diospa Reinomanda mañachunmi paipa catijcunataca yachachirca (Mat. 6:10).

4. Génesis 17:1, 2, 6​pi nishca shinaca Diospa Reinomandaca ¿imatata Abrahanga ña yacharca?

⁴ Jehová Diospa Reino imashapacha cashcataca Abrahanga na cabalta yacharcachu. Chai Reinoca ashtaca huatacunatami “pacalla” cuenda carca (Efes. 1:8-10; Col. 1:26, 27). Shina na cabalta yachashpapash Abrahanba familia ucupuramanda jatun mandajcuna llujshinataca Abrahanga alipachami yacharca (Génesis 17:1, 2, 6, liingui). Jehová Diospa nishcacunapica Abrahanga tucui shunguhuanmi crin carca. Chaimi Mesías Jehovapa Reinopi mandanataca ali yacharca. Jesús cai Alpapi cashpaca judiocunataca nircami: “Cangunapaj ñaupa taita Abrahamga, cai pachaman ñuca shamujpi, ricunata yachashpami cushijurca. Ña shamujta ricushpaca, ninandami cushijurca nijurcami” (Juan 8:56). Abrahanba familia ucupuramanda jatun mandajcuna llujshishpa Jehovapa Reinopi mandana cashcataca Abrahanga alimi yacharca. Jehová Dios paipa nishcacunata pactachingacamanga Abrahanga tucui shunguhuan crishpami catirca.

5. Jehovapa Reino mandanata shuyajushcataca ¿imashinata Abrahanga ricuchirca?

⁵ Jehovapa Reino mandanata shuyajushcataca ¿imashinata Abrahanga ricuchirca? Abrahanga ni maipi na causangapaj quidarcachu. Shinallata maijan reytapash na apoyarcachu. Pai rey tucungapapash na munarcachu. Chaipa randica Jehovatami cazurca. Paipa nishcacuna pactarinatapashmi tucui shunguhuan crirca. Cunanga Abrahán ima llaquicunatalla charishcata, ñucanchicuna paimanda imata yachajui ushashcatami yachajupashun.

6. Ur llactaca ¿imashinata carca?

⁶ Ur llactaca ¿imashinata carca? Ur llactaca juyailla, ashtaca negocio tiaj llactami carca. Ushashca jatun pircacuna, yacu chaupipimi chai llactaca carca. Chaipi causajcunaca alipacha estudiashcacuna, negociopapash alipachacunami carca. Chai negociantecunapa papelcunatami arqueologiata estudiashcacunaca tarishca. Ur llactapica ladrillohuan juyailla rurashca jatun huasicunami tiarca. Huaquin huasicunapicarin shuj jatun patio muyundipimi 13 o 14 cuartocuna tian carca. Chai llactapimi Abrahanga causarca.

7. Abrahanga ¿imatata seguropacha carca?

⁷ Abrahán, paipa familiapash Ur llactapica seguromi causanajurca. Shinapash Canaán llactaman causangapaj rishpaca carpa huasicunapillami causagrinajurca. Canaán llactapica paipa contracunapash talvez imatapash rurashpami llaquichinman carca. Shinapash Abrahanga paita paipa familiatapash Jehová Dios cuidanataca seguropachami carca.

8. ¿Ima llaquicunatata Abrahanga charirca?

⁸ Abrahanga Jehovapa munaitami siempre ruran carca. Shinapash Canaán llactapi micuna tucurijpimi paipash paipa familiapash shuj tiempotaca yarjai pasanajurca. Chaimi Abrahanga paipa familiata apashpa Egipto llactaman rirca. Egiptopi cajpimi faraonga paipa huarmi cachun Sara huarmigutaca aparca. Shina apashcamandaca Abrahanga llaquillapachami carianga. Shinapash Sara huarmiguta tigrachichunmi Jehová Diosca faraonda mandarca (Gén. 12:10-19).

9. Abrahán paipa huarmigupash ¿imamandata llaquilla causanajurca?

⁹ Sara huarmigu huahuata na chari ushajpimi Abrahanbash Sarapash llaquilla causanajurca. Tiempohuanga Sara huarmiguca paipa sirvij Agar huarmigutami paipa cusaman curca huahuaguta charichun nishpa. Chai huahuaca Ismael shutimi cagrijurca. Chai jipaca Agar huarmiguca vijsayumi quidarca. Vijsayu quidashpami Sara huarmigutaca nalicachishpa, na ricunayachi callarirca. Chaimi Sara huarmiguca Agar huarmitaca paipa huasimanda llujchishpa cacharca (Gén. 16:1-6).

10. Abrahán runaguca ¿imatallata rurana tucurca?

¹⁰ Tiempohuanga Sara huarmiguca vijsayumi quidarca. Chai huahuagutami Isaac shutita churarca. Abrahanga Ismaelta, Isaactapash ninandami juyan carca. Shinapash Ismael Isaacta nali tratashcamandami Abrahanga Ismaelta paipa mamatapash llujchishpa cacharca (Gén. 21:9-14). Huatacuna jipaca Jehová Diosca Abrahandaca canba churi Isaacta huañuchishpa ñucaman cuhuai nircami (Gén. 22:1, 2; Heb. 11:17-19). Shinapash Abrahanga paipa ishcandi churicunapi imacunalla pactarinataca tucui shunguhuanmi confiarca.

11. Llaquicunata charishpapash ¿imatata Abrahanga seguro carca?

¹¹ Jehovapa nishcacuna pactarinatami Abrahanga shuyajurca. Ur llactamanda llujshishpaca 70 yali huatacunatami charishcanga (Gén. 11:31–12:4). Canaanbica casi 100 huatacunatami carpa huasicunapi Abrahanga causarca. Paica 175 huatacunata charishpami huañurca (Gén. 25:7). Chai tiempopica Jehovapa nishcacuna pactarijtaca na ricui usharcachu. Shinallata Diospa Reino mandai callarishcatapash na ricurcachu. Shinapash Bibliapica ‘alipacha rucuyashpa ashtaca huatacunata causashca’ jipami tranquilo huañushcata ricuchin (Gén. 25:8). Abrahanga ashtaca llaquicunata charishpapash Jehovapa ali amigo caimandami llaquicunataca aguantai usharca. Paica Jehovapi tucui shunguhuan  crimandami Jehová Dios paita cuidanataca seguropacha carca (Gén. 15:1; Is. 41:8; Sant. 2:22, 23).

12. a) Jehovata sirvijcunaca ¿imatata shuyanajupanchi? b) Cunanga ¿imatata yachajugripanchi?

¹² Abrahán cuendami ñucanchicunapash Diospa Reino mandachun shuyanajupanchi. Diospa Reinoca huata 1914​pimi cielopi mandai callarirca (Apoc. 12:7-10). Ñucanchicunaca cai alpapi Diospa Reino mandachunmi shuyanajupanchi. Shinapash Diospa Reino mandangacamanga Abrahashna, Sara huarmigushnallatami ñucanchicunapash ashtaca llaquicunata charipashun. Cunanbipashmi Jehovata sirvijcunaca Abrahanba, Sarapa ejemplomanda yachajushca. Paicuna imata yachajushcataca Villajun revistapi Jehovata sirvijcunapa causai nishcapimi llujshishca. Cunanga ñucanchicunapash paicunamanda imata yachajui ushashcata ricupashunchi.

13. Bill huauquimandaca ¿imatata yachajupanchi?

¹³ Jehovata ashtahuan sirvingapaj esforzaripashunchi. Jehovata ashtahuan sirvingapaj munashpaca Abrahanshnallatami ñucanchicunaca Jehovapa ñaupajpi ali ricuringapaj esforzarina capanchi (Mat. 6:33; Mar. 10:28-30). Cunanga Bill Walden shuti huauquipa causaimanda yachajupashunchi. * Paica Estados Unidos llactapimi 1942 huatapica arquitecto shina graduarigrijurca. Shinapash chai huatapillatami Testigocunahuan Bibliamanda yachajui callarirca. Universidadmanda shuj profesorca graduarishca jipa Bill Walden trabajachunmi shuj alipacha trabajota ofrecirca. Shinapash Bill huauquica Jehovata ashtahuan sirvingapaj munaimandami chai trabajotaca na chasquirca. Chai jipallami gobiernoca cuartelman ringapaj presentarichi nishpa mandarca. Cuartelman na ringapaj munajpimi Bill huauquitaca 10 mil dolarcunata gobiernoca multarca. Shinallata 5 huatacunatami carcelpi churarca. Shinapash quimsa huata jipallami libre quidarca. Chai jipallami Galaad Escuelaman invitarca. Chaimi África llactamanga  misionerotashna cacharca. Bill huauquiguca Eva huarmiguhuan cazarashpami África llactapi sirvishpa catirca. Huatacuna jipaca Bill huauquipa mamata cuidangapami Estados Unidosman tigrana tucurca. Bill huauquica ninmi: “70 yali huatacunata Jehovata sirvi ushashcamandaca ninandami cushijupani. Cada punllami Jehovataca paita sirvi ushashcamanda agradicipani”. ¿Quiquinbashchu Bill huauquishna Jehovata sirvingapaj munapangui?

14, 15. Apostolidis cusahuarmimandaca ¿imatata yachajupanchi?

¹⁴ Jehovata sirvimandaca llaquicunata charipashunmi. Abrahanga Jehovata sirvishpapash llaquicunata charircami. Shinallatami ñucanchicunapash llaquicunata chari ushapanchi (Sant. 1:2; 1 Ped. 5:9). Cunanga Aristotelis Apostolidis shuti huauquimanda yachajupashunchi. * Paica 1946 huatapimi Grecia llactapi bautizarirca. Huata 1952​pica Eleni shuti panigutami cazarangapaj maquita mañarca. Chai jipallami Eleni paniguca irquiyarca. Chaimi doctorpaman rijpi shuj tumortami umagupi charingui nirca. Ña operashca jipaca ashata alimi tucurca. Shina alillata caimandami paicunaca cazararca. Shinapash huatacuna jipaca chai tumorca cutinmi ricurirca. Chaimi cutin operarirca. Chai jipaca Eleni paniguca ñana fácil parlai usharcachu. Imatapash fácil ruraitapash ñana usharcachu. Chai tiempopica gobiernocunaca Testigocuna villachichunga na saquinllu carca. Eleni paniguca masqui na villachichun saquijpipash, irquillagu cashpapash villachishpami catirca.

¹⁵ Aristotelis huauquica 30 huatacunatami paipa huarmiguta cuidarca. Shina cuidajushpapash Aristotelis huauquica anciano, comité de asambleacunapipashmi ayudarca. Shuj Jatun Tandanajui Huasitapashmi shayachichun ayudarca. Huata 1987​pica Eleni panigu villachijushpami llaqui aparca. Chaimi 3 huatacunata casi huañushcashna quidarca. Chai jipallami huañurca. Aristotelis  huauquica ninmi: “Cai tucui huatacunata shina llaquicunata charishpapash Jehová Diosta sirvinataca na saquircanchichu. Jehovata sirvishpa catingapami ninanda esforzarircanchi. Shina catichunga Jehová Diosmi fuerzata cushpa ayudarca” nin (Sal. 94:18, 19). Ima llaquicunata charishpapash Jehovata sirvingapaj esforzarijta ricushpaca Jehová Diosca ninandami cushijun.

16. Nathan Knorr huauquica ¿imatata paipa huarmigumanga nishcarca?

¹⁶ Paraisopi causanata yaria causapashunchi. Abrahanga Jehová Dios carasha nishcacunata yaria causashpami llaquicunata aguantai usharca. Audrey Hyde shuti panigupashmi shinallata rurarca. Paipa punda cusa Nathan Knorr huauquica cancerhuanmi huañurca. Cutin cati cusa Glenn Hyde huauquica Alzheimer nishca ungüitami charirca. * Audrey paniguca paipa punda cusa nara huañushpallata imata nishcatami yarin. Paimanga cashnami nishcarca: “Shuj punllaca cashna llaquicunahuanga ñana causashunllu. Llaquicuna tucurijpica cushillami causashun”. Shinallata nircapashmi: “Jehová Dios carasha nishcacunataca siempremi yarina cangui. Huauquipanicunata ayudangapaj ninanda esforzari. Shina rurashpami cushilla causangui”. Chai nishcaca alipachami carca (Rom. 12:12).

17. a) ¿Imamandata paraisopi causanata yaria cana capanchi? b) Miqueas 7:7​pi shimicunaca ¿imashinata ñucanchitaca ayudanga?

¹⁷ Paraisopi causanataca siempremi yarishpa causana capanchi. Cunanbi ashtaca llaquicunata ricushpaca tucuri punllacunapa último punllacunapi causanajushcatami cuenta japipanchi. Shuj punllaca cai alpataca Jehovapa Reinomi mandanga. ¿Ima bendiciongunatata chaipica charipashun? Ñucanchi familia huañushcacunapash cutin causarijpimi ñucanchica cutin paicunata ricushun. Shinallata Abrahán Jehovapi tucui shunguhuan crishcamandami paita, paipa familiatapash cai alpapi causachinga. ¿Paicunata chasquingapaca chaipicha cashun? Shinaca Abrahanshnami Jehovapi tucui shunguhuan crishpa catingapaj esforzarina capanchi. Chaipaca ima llaquicunata charishpapash Jehová ayudanapimi seguro cana capanchi (Miqueas 7:7, liingui).