1. Eaa ta tetai aronga i akaatinga, e no teaa ra?

E MIRIONI ua atu tangata o te Atua i teia tuatau kua akaatinga ia ratou uaorai. Kua iki te au taeake e te au tuaine kia kore e akaipoipo. Iki te aronga akaipoipo kia kore e anau tamariki i teianei. Iki tetai ngutuare tangata i te oraanga kare e maata te apinga. Kua iki ratou e okotai tumu—kia tavini pu ratou ia Iehova. Mareka ua ratou e te irinaki e ka oronga mai a Iehova i ta ratou e anoano ra. Ka maromaroa ainei ratou? Kare! Eaa tatou i papu ei? Okotai tumu kua akameitaki a Iehova ia Aberahama, te “metua no te . . . akarongo.”—Roma 4:11.

2. (a) Ia Ebera 11:8-10, 16, eaa a Aberahama i akaruke ei ia Ura? (e) Eaa ta tatou ka uriuri i roto i teia atikara?

² Akaruke iora Aberahama i tona oraanga meitaki i te oire ko Ura. Eaa ra? No te mea te tapapa ra aia i “te oire tumu mou.” (E tatau ia Ebera 11:8-10, 16.) Eaa te reira “oire”? Eaa te au manamanata tei tupu kia Aberahama iaia e tapapa ra kia pātuia te reira oire? Akapeea tatou me aite kia Aberahama te tu e te aronga i teia tuatau tei aru i tona akaraanga?

3. Eaa te oire ta Aberahama e tapapa ra?

³ Te oire ta Aberahama e tapapa ra, ko te Patireia o te Atua. Ko Iesu Mesia e te 144,000 Kerititiano akatainuia tei roto i teia Patireia. Kapiki a Paulo i teia Patireia, ko “te oire o te Atua ora ra, ko Ierusalema i te ao ra.” (Ebe. 12:22; Apo. 5:8-10; 14:1) Kua apii a Iesu i tana au pipi kia pure i teia Patireia, kia tae mai kia akatupu i to  te Atua anoano i te enua nei e te rangi katoa.—Mata. 6:10.

4. Ia Genese 17:1, 2, 6, eaa te maata ta Aberahama i kite no teia oire, me kore te Patireia, ta te Atua i taputou?

⁴ Kua kite ainei a Aberahama akapeea me akaaereia te Patireia o te Atua? Kare. No tetai au anere mataiti, e “tuatua ngaro” te reira. (Ephe. 1:8-10; Kolo. 1:26, 27) Inara kua kite a Aberahama e ka riro tetai o tana uanga ei au ariki. Kua taputou a Iehova i te reira kiaia. (E tatau ia Genese 17:1, 2, 6.) Ngaueue kore to Aberahama akarongo i ta te Atua au taputou, mei tera te tu kua kite atura aia i Tei Akatainuia, me kore te Mesia, koia te Ariki no te Patireia o te Atua. No teia tumu, karanga a Iesu ki te ngati Iuda i tona tuatau: “I rekareka ana oki to kotou metua ko Aberahama i toku nei tuatau kia kite aia: e kite atura, e mareka atura oki.” (Ioa. 8:56) Taka meitaki, kua kite a Aberahama e ka akaaere tetai o tana uanga i te Patireia ta Iehova i akamou, kua tapapa marie aia ia Iehova kia akatupu i te reira.

5. Akapeea tatou i kite ei te tapapa ra a Aberahama i te oire o te Atua?

⁵ Akapeea a Aberahama i te akaari e te tapapa ra aia i te oire, me kore te Patireia o te Atua? Mea mua, kare a Aberahama i kapiti atu ki tetai ua atu patireia i te enua nei. Kua iki aia i te oraanga tuitarere, kare e noo tinamou ki tetai ngai e kare e turuturu i tetai ua atu ariki. Kare katoa a Aberahama i akanoo i tetai patireia nona. Mari ra, kua kauraro aia kia Iehova e kua tapapa Iaia kia akatupu i Tana taputou. Na te raveanga i teia, kua akarongo a Aberahama kia Iehova. Akara ana tatou i tetai o teia au turanga ngata tei tupu kiaia e eaa ta tatou ka apii mai.

6. Mei teaa te tu o te oire ko Ura?

⁶ Akaruke iora a Aberahama i te oire meitaki e te tau ua, ko Ura. Paruruia te reira e te au patu e te au ara vai i nga tua e toru. E aronga karape i te tata e te tarē te iti tangata o Ura. E oire puapinga no  te okooko; kua kitea mai te au tataanga taito no te angaanga pitiniti o te reira oire. Pātuia te au are ki te piriki e kua paraiia ki te pate e oti kua peniia kia teatea. Tetai o teia au are e 13 pia me kore e 14, kua koropiniia e te paepae.

7. Eaa a Aberahama i irinaki ei ka paruru a Iehova iaia e tona ngutuare?

⁷ Irinaki pu a Aberahama e ka paruru a Iehova iaia e tona ngutuare. No teaa ra? Akamanako ana e kua akaruke a Aberahama e Sara i to raua are meitaki e te manea i Ura, i te noo ki roto i te au puakapa i te enua o Kanaana. Kare e paruruia e te au punanga e te au ara vai oonu. Mari ra, ka viviki te au enemi i te tamaki e te takinga kino ia ratou.

8. Tetai atianga, eaa tei tupu kia Aberahama?

⁸ Kua rave a Aberahama i to te Atua anoano, inara i tetai atianga kare i rauka ana iaia i te akono i tona ngutuare. Kua tupu te onge ki te enua ta Iehova i tono atura iaia ei tuitarere. Kino tikai te reira e kua iki a Aberahama i te neke i tona ngutuare ki Aiphiti. Ia ratou i Aiphiti kua rave a Pharao te tutara o te reira enua i tana vaine, ei vaine nana. Taitaia iora a Aberahama e kua akaue atura Iehova ia Pharao kia akaoki ia Sara kia Aberahama.—Gene. 12:10-19.

9. Eaa te au turanga ngata i te ngutuare ta Aberahama i akakoromaki?

⁹ Tupu te oraanga ngata ki to Aberahama ngutuare. Kare ake tana vaine akaperepere ko Sara i anau tamariki. No tetai rau ngauru mataiti kua maromaroa raua i te reira. Aere ua rai, kua tuku a Sara i tona tavini vaine ko Hagara, kia Aberahama kia uanga raua. I te nui anga a Hagara ia Isemaela, akavaavaa iora aia i tona pu vaine ko Sara. No te kino i to raua turanga kua tuaru atura a Sara ia Hagara.—Gene. 16:1-6.

10. Eaa tei tupu kia Isemaela e Isaaka tei timataia to Aberahama irinaki anga ia Iehova?

¹⁰ Aere ua rai, kua nui a Sara e kua anau mai i tetai tamaiti ko Isaaka na Aberahama. Akaperepere iora Aberahama i tana nga tamaroa, ko Isemaela e Isaaka. No te kino i to Isemaela tu kia Isaaka, kua māroia a Aberahama kia tuaru ia Isemaela e Hagara. (Gene. 21:9-14) Muri maira, kua pati a Iehova kia Aberahama kia akaatinga ia Isaaka. (Gene. 22:1, 2; Ebe. 11:17-19) I nga atianga, kua irinaki a Aberahama ia Iehova kua tupu te meitaki ki tana nga tamariki tamaroa.

11. Eaa a Aberahama i tapapa marie ei ia Iehova?

¹¹ I te reira au taime, kua apii a Aberahama i te tapapa marie kia Iehova. E 70 tuma ona mataiti i te akaruke anga aia e tona ngutuare ia Ura. (Gene. 11:31–12:4) No tetai anere mataiti kua noo ana aia i roto i te puakapa, tona tuitarere anga i te enua o Kanaana. Mate iora a Aberahama e 175 mataiti. (Gene. 25:7) Kare aia i kite ana ia Iehova i te akatupu anga i Tana taputou, kia oronga i te enua ki tana uanga. Kare katoa aia i kite ana i te oire, te Patireia o te Atua, i te akamouia anga. Noatu rai, kua mate “ruaine e te mareka ua” a Aberahama. (Gene. 25:8) Noatu tona oraanga ngata, kua akaari ua a Aberahama i te akarongo matutu e kua mareka i te tapapa marie ia Iehova. Eaa te tumu? No te mea kua paruru a Iehova i to Aberahama oraanga e kua akariro iaia ei oa.—Gene. 15:1; Isa. 41:8; Iako. 2:22, 23.

12. Eaa ta tatou e tapapa ra, eaa ta tatou ka uriuri?

¹² Mei ia Aberahama, te tapapa nei  tatou i te oire tumu mou. Inara, kare tatou e tapapa nei e kia patuia te reira. Kua akamanaia te Patireia o te Atua i te 1914 e kua tutara i te rangi. (Apo. 12:7-10) Te tapapa nei tatou i te reira kia tutara i te au mea o te enua nei. Ia tatou e tapapa ra i te reira, e maata te au turanga ka akono tatou tei tupu ana kia Aberahama e Sara. Kua rauka ainei i te au tavini o Iehova i teia tuatau i te aru i to Aberahama akaraanga? Te au tua oraanga i roto i Te Punanga Tiaki, mei ia Aberahama e Sara te tu, kua akaari mai ratou e e akarongo e te akakoromaki to ratou. Ka uriuri tatou i tetai o teia au tua oraanga e ta tatou ka apii.

13. Eaa taau i apii mai mei te akaraanga o te Taeake Walden?

¹³ Puareinga ua i te akaatinga ia koe uaorai. Me ka tuku tatou i te oire o te Atua, tona Patireia, na mua ake i to tatou oraanga, kia aite tatou kia Aberahama te tu, tei puareinga ua i te akaatinga iaia uaorai no te akamareka i te Atua. (Mata. 6:33; Mare. 10:28-30) Akamanako ana i te akaraanga o te taeake ko Bill Walden. * I te 1942, kua vaitata a Bill i te akaoti i tana pepa apii no te architectural engineering i te apii teitei i Marike, i apii ei te Au Kite o Iehova i te Pipiria kiaia. Kua akanoonoo te puapii o Bill i tetai angaanga nana me oti tana apii, kare a Bill i āriki i te reira. Kua akamārama aia e kua iki aia i te tavini pu i te Atua, kare i te rave i tana angaanga kopapa. Kare i roa i muri akera, kua anoanoia a Bill kia rave i te angaanga vaeau. Ma te maru kua patoi aia i te reira e kua akautungaia aia e rima mataiti i roto i te are auri e kia tutaki e $10,000. Kua tukunaia mai aia kia vao e toru mataiti akera. Muri iora kua patiia aia ki te Apii Gileada e kua aere atura ei mitinari ki Aperika. E oti kua akaipoipo a Bill ia Eva, e kua angaanga kapiti raua i Aperika, ma te akaatinga ia raua uaorai. Aere ua rai  kua oki akaou raua ki Marike i te akono i te mama o Bill. No runga i tona oraanga, karanga a Bill: “Maringi ua toku roimata me akamanako au i te tikaanga manea kia taangaangaia e Iehova i te rave i tana angaanga no tetai 70 tuma mataiti. E akameitaki ua ana au iaia no te akakeu iaku i te rave i tana angaanga.” Ka rauka ainei ia koe i te akariro i te angaanga tutu evangeria ei oraanga tamou noou?

14-15. Eaa taau i kite mai mei te akaraanga o te Taeake e te Tuaine Apostolidis?

¹⁴ E tapapa i te oraanga taitaia. Mei te akaraanga o Aberahama ka kite tatou e ka tupu rai te manamanata ki te aronga tavini pu ia Iehova. (Iako. 1:2; 1 Pete. 5:9) Akamanako ana e kua tupu teia kia Aristotelis Apostolidis. * Papetitoia aia i te 1946 i Ereni, e i te 1952 kua tapao aia i te tuaine ko Eleni, tei inangaro katoa i te rave i te angaanga evangeria. Inara kua rokoia a Eleni e te maki tumor i roto i te roro. Kua vaʼiia te reira i roto i nga mataiti kua akaipoipo raua, inara kua oki akaou mai te reira maki. Kua vaʼi te taote iaia, e kua akatupu teia i te maki akamate ki tona kopapa i te tua kaui, e kare aia i meitaki akaou i te tuatua. Noatu tona maki kua maroiroi aia i te tutu aere e kua takinokinoia raua e te kavamani i te reira tuatau.

¹⁵ No tetai 30 mataiti, kua akono ua a Aristotelis i tana vaine. I teia taime e tangata pakari aia, koia tetai i roto i te kumiti uruoaanga, e kua tauturu i te pātu i te Are Uipaanga Akaputuputuanga. I te 1987, kua ō atu a Eleni ki roto i tetai ū, iaia e tutu evangeria ra. Kua akangoru tona kopapa e toru mataiti e kua mate aia. Karanga a Aristotelis no tona oraanga: “Te au mataiti tei aereia mai, kua tupu te oraanga ngata kiaku e te taitaia maata inara kua akakoromaki ua atu au kia kore e tuku i te au. Noatu te reira kua oronga ua mai a Iehova i te maroiroi kiaku kia akakoromaki.” (Sala. 94:18, 19) Akaperepere maata a Iehova i te aronga e maroiroi ra i te angaanga nona noatu te oraanga kino!

16. Eaa te akoanga meitaki ta te Taeake Knorr i tuatua ki tana vaine?

 ¹⁶ Akamou te manako ki te tuatau ki mua. Kua akamou a Aberahama i tona manako ki te au tutaki a te tuatau ki mua ta Iehova ka oronga kiaia, e kua tauturu atura iaia kia akakoromaki i tona manamanata. Kua aruaru katoa te Tuaine Audrey Hyde i te akaari i teia manako papu, noatu kua mate tana tane mua ko Nathan H. Knorr, i te maki cancer e te rua o tona tane ko Glenn Hyde kua tuiia e te maki Alzheimer. * Karanga mai aia e kua riro ta te Taeake Knorr i akakite kiaia, i mua ake ka mate ei, ei akamaroiroi iaia. Karanga aia: “Kua akamaara mai a Nathan kiaku: ‘Mate akera, e mea mou to taua manakonakoanga, e kore rava akera te mamae.’ E oti kua akamaroiroi aia iaku: ‘E akara ki mua, tei reira taau tutaki.’ . . . Akapera mai aia: ‘E angaanga maroiroi—e tauturu ua atu i tetai ke. Ka kitea e koe te mataora.’” Meitaki tikai teia akamaroiroi anga, kia rave i te meitaki ki tetai ke e “e rekareka i te inanakonako anga”!—Roma 12:12.

17. (a) Eaa te tumu meitaki kia akamou te manako no te tuatau ki mua? (e) Akapeea te akaraanga i roto ia Mika 7:7 me tauturu ia tatou kia kite i te au akameitakianga?

¹⁷ I teia tuatau, e tumu maata to tatou kia akamou te manako ki te tuatau ki mua. Akaari taka meitaki maira te au tupuanga i teianei ao e tei roto tatou i te tuanga openga o te tuatau openga o teia akatereanga. Kare e roa atu kare tatou e anoanoia kia tapapa i te oire tumu kia akaaere i te enua nei. Tetai au akameitakianga ka kite tatou me akatuia mai to tatou aronga akaperepere mei te mate. A te reira taime, ka tutaki a Iehova ia Aberahama no tona akarongo e te tapapa marie, na te akatu anga mai iaia e tona ngutuare i te enua nei. Ka aravei ainei koe ia ratou? Ka rauka me puareinga ua koe i te akaatinga ia koe no te Patireia o te Atua, kia vai tiratiratu e te tapapa marie ia Iehova.—E tatau ia Mika 7:7.