1. Саве жртве керѓе бут џене, хем соске?

АВДИВЕ, милиоња слуге е Девлескере керена несаве жртве. Бут пхраља хем пхења одлучинѓе те на кхувен ко брако. Несаве брачна парија одлучинѓе те на овен лен чхаве. Несаве фамилие биринѓе те водинен едноставно живото. Сарине акала анѓе асавке одлуке соске мангена те служине е Јеховаске кобор со шај ки побари мера. Ола тане бахтале хем иси лен доверба кај о Јехова ка дел лен са адава сој ленге потребно. Дали ка разочаринен пе? На! Соске шај те ова сигурна ко адава? Адалеске со о Јехова ко пурано време грижинела пе сине башо са о потребе пле слугенгере. На пример, о Јехова денѓа берекети е Авраамеске кова со сине „о дад са околенгоро со иси лен вера“ (Рим. 4:11).

2. а) Спрема Евреите 11:8-10, 16, соске о Авраам сине спремно те мукхел и диз Ур? б) Со ка дикха ки акаја статија?

² О Авраам сине спремно те мукхел пло удобно живото ки диз Ур. Соске? Адалеске со аџикерела сине „и диз со иси ла чачутне темелија“. (Читин Евреите 11:8-10, 16.) Сој тани адаја „диз“? Саве проблемија сине е Аврааме џикоте аџикерѓа те овел „градими“ акаја диз? Сар шај те ова сар о Авраам хем о јавера слуге е Девлескоро таро амаро време со џана сине пало лескоро пример?

3. Сој тани и диз со аџикерела ла сине о Авраам?

³ И диз со аџикерела ла сине о Авраам тани е Девлескоро Царство. О цари тано о Исус Христос, а заедно леа  ка владинен о 144.000 помазиме христијања. О Павле вакерѓа кај акава Царство тани „и диз е џивде Девлескири, о небесно Ерусалим“ (Евр. 12:22; Отк. 5:8-10; 14:1). О Исус сикавѓа пле ученикон те молинен пе те авел адава Царство те шај те керел пе е Девлескири волја хем ко небо хем ки Пхув (Мат. 6:10).

4. Спрема 1. Мојсеева 17:1, 2, 6, со џанела сине о Авраам баши „диз“, или башо Царство со ветинѓа ле о Девел?

⁴ Дали о Авраам џанела сине са о деталија башо е Девлескоро Царство? На. Веконцар акала деталија сине „свето тајна“ (Еф. 1:8-10; Кол. 1:26, 27). Сепак, о Авраам џанља кај несаве таро лескере потомција ка овен царија соске о Јехова ветинѓа леске адава. (Читин 1. Мојсеева 17:1, 2, 6.) Адалеске со сине ле бут силно вера ко е Девлескере ветувања, о Авраам сар те пхене дикхела сине е Помазанико, или е Месија, кова со ка владинел сине сар Цари ко е Девлескоро Царство. Адалеске о Исус вакерѓа акала лафија е Евреенге ко лескоро време: „Тумаро дад о Авраам сине бут бахтало баши надеж кај ка дикхел о диве кеда ка авав, хем дикхља ле хем сине бахтало“ (Јован 8:56). Јасно тано кај о Авраам џанља кај несаве таро лескере потомција ка овен дело таро јекх Царство кова со ка овел воспоставимо таро Јехова, хем ов сине спремно те аџикерел о Јехова те исполнинел адава ветување.

5. Котар џанаја кај о Авраам аџикерела сине и диз сој тани керди таро Девел?

⁵ Сар о Авраам сикавѓа кај аџикерела сине и диз, или о Царство, сој тани керди таро Девел? Прво, ов на сине жители ко нисаво царство ки Пхув. Ов на живинела сине само ко јекх тхан, него патујнела сине таро јекх тхан ко јавер хем на дела сине поддршка нијекхе манушикане цареске. Исто аѓаар, ов на мангља те керел песке пло царство. Наместо адава, о Авраам ачхило послушно е Јеховаске хем аџикерѓа ов те исполнинел адава со ветинѓа. Ко асавко начин о Авраам сикавѓа посебно вера ко Јехова. Те разгледина несаве предизвикија со сине е Аврааме хем те дикха со шај те сикљова таро лескоро пример.

6. Сави диз сине о Ур?

⁶ О Авраам гело песке таро Ур, кова со сине барвало, удобно хем релативно безбедно  тхан. Акаја диз сине заштитими баре ѕидонцар хем таро трин стране сине опколими хор каналенцар пхерде пани. О мануша таро Ур џанена сине шукар те читинен хем те пишинен, а исто аѓаар шукар џанена сине математика. Изгледа и диз сине центар баши трговија, адалеске со ко адава тхан о археолозија аракхле бут бизнис документија. О кхера сине керде таро цигле, а о ѕидија сине малтериме хем макхле киречи. Несаве таро акала кхера сине лен дворија плочкенцар таро бар хем сине лен 13 или 14 собе околу о дворо.

7. Соске е Аврааме мора сине те овел ле доверба кај о Јехова ка заштитинел ле заедно лескере фамилијаја?

⁷ Е Аврааме мора сине те овел ле доверба кај о Јехова ка заштитинел ле заедно лескере фамилијаја. Соске? Адалеске со мукхља пло удобно хем безбедно тхан ки диз Ур те шај те живинел ко шаторија ко Ханаан. Ов хем лескири фамилија на сине више заштитиме таро тхуле ѕидија хем хор каналија. Адалеске шај сине о душмања локхесте те нападинен лен.

8. Со уло е Авраамеске ки јекх прилика?

⁸ Иако о Авраам керела сине е Девлескири волја, ки јекх прилика нашти сине те обезбединел доволно храна пле фамилијаке. Ки пхув коте со бичхалѓа ле о Јехова сине бут баро бокхалипе. О бокхалипе сине добором баро со о Авраам решинѓа несаво време те селинел пе ко Египет пле фамилијаја. Ама, џикоте сине адатхе, о фараони кова со владинела сине ко Египет, леља е Сара хем ингарѓа ла ки пли палата. Замислин туке кобор сине загрижимо о Авраам са џикоте о Јехова на теринѓа е фараоне те иранел е Сара (1. Мој. 12:10-19).

9. Саве проблемија сине е Аврааме ки пли фамилија?

⁹ Ки е Авраамескири фамилија исто аѓаар сине бут проблемија. Лескири мангли ромни, и Сара, нашти сине те овен ла чхаве. Бершенцар сине бут разочариме башо адава. Ко крајо, те шај те овел лен чхаве, и Сара денѓа пле слугинка е Агара е Авраамеске. Ама, кеда и Агара ачхили кхамни е Исмаелеа, почминѓа те на поштујнел е Сара. И ситуација сине добором пхари со и Сара палдинѓа ла кхералдан (1. Мој. 16:1-6).

10. Сар адава со уло е Исмаелеа хем е Исакоја шај сине те керел пхаро е Авраамеске те овел ле доверба ко Јехова?

¹⁰ Конечно и Сара ачхили кхамни хем бијанѓа е Авраамеске мурш, со викинела пе сине Исак. О Авраам мангела сине солдује чхавен, хем е Исако хем е Исмаеле. Ама адалеске со о Исмаел постапинела сине лошно е Исакоја, о Авраам мора сине те вакерел е Агараке хем е Исмаелеске те џан песке (1. Мој. 21:9-14). Пало бут берша, о Јехова родинѓа е Аврааместар те дел жртва пле чхаве е Исако (1. Мој. 22:1, 2; Евр. 11:17-19). Ко солдуј случаја о Авраам мора сине те сикавел кај о Јехова ко крајо ка грижинел пе е солдује чхавенге.

11. Соске о Авраам мора сине стрпливо те аџикерел ко Јехова?

¹¹ Башо са адава време, о Авраам мора сине стрпливо те аџикерел ко Јехова. Веројатно ле сине ле повише таро 70 берш кеда заедно пле фамилијаја мукхља о Ур (1. Мој. 11:31 — 12:4). А пало адава, околу 100 берш живинѓа ко шаторија хем патујнела сине ки ханаанско пхув. О Авраам муло кеда сине ле 175 берш (1. Мој. 25:7). Ама на ресља те дикхел сар о Јехова исполнинела пло ветување кај адаја пхув ка наслединен ла лескере потомција. А исто аѓаар, на ресља те дикхел сар сине чхивде о темелија тари „и диз“, или таро е Девлескоро Царство. Сепак, и Библија вакерела кај о Авраам муло „пхуро хем задоволно“ (1. Мој. 25:8). Иако е Аврааме сине ле бут проблемија, лескири вера сине зорали хем ов сине  спремно те аџикерел о Јехова те исполнинел пло ветување. Со поможинѓа леске те истрајнел? Адава со о Јехова заштитинѓа ле цело лескоро живото хем понашинела пе сине леа сар лескоро амал (1. Мој. 15:1; Иса. 41:8; Јак. 2:22, 23).

12. Со аџикераја амен, хем со ка разгледина?

¹² Исто сар о Авраам, амен да аџикераја и диз со иси ла чачутне темелија. Ама, амен на аџикераја ој те овел градими. Е Девлескоро Царство сине воспоставимо 1914 берш хем више целосно владинела ко небо (Отк. 12:7-10). Амен аџикераја исто аѓаар те владинел упри цели Пхув. Џикоте аџикераја те овел адава, мора те борина амен пхаре ситуациенцар ко живото сар со сине е Аврааме хем е Сара. Дали е Јеховаскере слуге ко авдисутно време шај те џан пало е Авраамескоро пример? Оја шај. О искуствија кола со икљона ки Стражарско кула сикавена кај буте џенен авдиве иси лен исто асавки вера хем тане стрплива сар со сине о Авраам хем и Сара. Те разгледина само некобор лендар, хем те дикха со шај те сикљова.

13. Со сикљовеа таро пример е пхралескоро Валден?

¹³ Ов спремно те кере жртве. Ако мангаја те чхива о Царство ко прво тхан ко амаро живото, мора те ова сар о Авраам кова со сине спремно те керел жртве те шај те угодинел е Девлеске (Мат. 6:33; Мар. 10:28-30). Те дикха о пример е пхралескоро Бил Валден. * Ко 1942 берш, англедер те дипломиринел сар градежно инженери ко јекх универзитети ко САД, ов почминѓа те проучинел и Библија е Јеховаскере сведоконцар. Лескоро професори аракхља леске бути која со шај сине те почминел одма пало дипломирибе, ама ов одбинѓа. Ов објаснинѓа леске кај одлучинѓа те служинел е Девлеске ки побари мера наместо те керел песке кариера. Кратко пало адава, о Бил добинѓа покана те џал ки војска. Адалеске со одбинѓа мора сине те платинел казна таро 10.000 доларија хем сине осудимо  ко панџ берш затвор. Сине ослободимо таро затвор пало трин берш. Покасно, ов сине канимо те џал ки Школа Гилеад хем служинѓа сар мисионери ки Африка. О Бил женинѓа пе е Еваја, хем ола заедно служинѓе ки Африка, коте со на сине ленге локхо. Пало несаве берша иранѓе пе ко САД те шај те грижинен пе е Билескере дајаке. О Бил башо цело пло живото вакерела: „Ме јакхја пхерѓона асва кеда мислинава сави чест сине ман те служинав е Јеховаске повише таро 70 берш. Често пхенава фала е Јеховаске со поможинѓа манге те биринав и најшукар кариера ко мло живото“. Дали ту да шај те служине е Девлеске ки полновремено служба?

14-15. Со сикљовеа таро искуство е пхралескоро хем е пхењакоро Апостолидис?

¹⁴ Ма очекујн тло живото те овел бизо проблемија. Таро е Авраамескоро пример сикљоваја кај чак окола со цело живото служинена е Јеховаске мора те боринен пе проблеменцар (Јак. 1:2; 1. Пет. 5:9). Акава доживинѓа о пхрал Аристотелис Апостолидис. * Ов крстинѓа пе ко 1946 берш ки Грција, хем ко 1952 берш веринѓа пе јекхе пхењаја, и Елени, кола со сине ла иста целија сар лесте. Ама, и Елени насвалили хем о докторија вакерѓе лаке кај иси ла тумор ко шеро. Откеда икалѓе латар о тумор, ола венчинѓе пе. Ама, пало некобор берша, о тумор палем појавинѓа пе лаке. Сине ла панда јекх операција, хем и Елени ачхили делумно парализирими хем нашти сине шукар те керел лафи. Сепак, ој ачхили ревно ки служба иако сине насвали хем сине прогонство ко адава време.

¹⁵ О Аристотелис грижинѓа пе пле ромњаке 30 берш. Цело адава време ов служинѓа сар старешина, сине члени ко конгресна одборија хем поможинѓа те градинел пе јекх конгресно сала. Пало адава, ко 1987 берш, и Елени сине повредими ки јекх несреќа џикоте сине ки служба. Ој сине ки кома трин берш хем пало адава мули. О Аристотелис објаснинѓа сар са акава влијајнѓа упри лесте. Ко пло искуство, ов вакерѓа: „Са акала берша, сине ман бут проблемија хем несаве лендар сине изненадена хем неочекувана. Адалеске ваљани сине одлучно те истрајнав хем ма те мукхав ништо те обесхрабринел ман. О Јехова  секогаш денѓа ман и сила со ваљанѓа манге те шај те накхавав акала проблемија“ (Пс. 94:18, 19). О Јехова бут мангела околен со дена пестар са те служинен леске иако иси лен бут проблемија!

16. Саво шужо совет денѓа о пхрал Нор пле ромњаке?

¹⁶ Мислин ки иднина. О Авраам мислинела сине ки награда со о Јехова ветинѓа кај ка дел ле, хем адава поможинѓа леске те истрајнел ко проблемија со сине ле. И пхен Одри Хајд трудинѓа пе те овел ла асавко позитивно стави иако лакоро прво ром, о Натан Нор, муло таро рако, а о дујто ром, о Глен Хајд, насвалило таро Алцхајмер. * Ој пхенѓа кај бут поможинѓа лаке адава со вакерѓа лаке о пхрал Нор некобор курке англедер те мерел. Ко пло искуство, ој вакерѓа: „О Натан сетинкерѓа ман: ’Пало мерибе, амари надеж тани сигурно, хем никогаш више нане те трпина дукх‘. Пало адава поттикнинѓа ман: ’Дикх англе, соске адатхе тани тли награда... Ов зафатими — трудин тут те користине тло живото те кере нешто е јаверенге. Акава ка поможинел туке те ове бахтали ко живото‘“. Акава тано чаче шужо совет аменге да! Те ова зафатиме аѓаар со ка кера шукарипе е јаверенге хем те ова бахтале баши амари надеж (Рим. 12:12).

17. а) Соске иси амен шукар причине те мислина ки иднина? б) Сар адава со ка овел амен исто стави сар со пишинела ко Михеј 7:7 ка поможинел амен те добина берекетија ки иднина?

¹⁷ Авдиве, повише таро било кеда англедер, иси амен шукар причине те мислина баши иднина. О буќа со случинена пе авдиве ко свето јасно сикавена кај живинаја ко последна диве. Панда хари, на ка ваљани те аџикера е Девлескоро Царство те владинел ки цели Пхув. Јекх таро бут буќа со ка керен амен бахтале тано адава со амаре најмангле со муле ка воскреснинен. Тегани о Јехова ка наградинел е Аврааме баши лескири вера хем стрпливост аѓаар со ка воскреснинел хем ле хем лескере фамилија те живинен акате ки Пхув. Ка ове ли ту да адатхе те доџакере лен? Ка ове адатхе ако сар о Авраам спремно кереа жртве башо е Девлескоро Царство, ако ачховеа верно иако иси тут проблемија хем ако сикљовеа стрпливо те аџикере ко Јехова те исполнинел пле ветувања. (Читин Михеј 7:7.)