1. Kola žrtve but manuša čerdže hem sose?

AVDIJE, milionija e Jehovase sluge čerdže žrtve. Na primer, but phralja hem phenja odlučindže te ačhon kokri. Disave bračna parija odlučindže akana te na ovel len čhave. Isto adžahar, disave porodice odlučindže te ovel len jednostavno dživdipe. On sare andže asavke odluke sebepi jekh važno razlog, sose mangena te služinen e Jehovase kobor god šaj. Zadovoljna tane hem isi len poverenje so o Jehova ka del len sa so čače valjani lendže. Da li tane razočarime? Na. Sose šaj te ova sigurna ko odova? Jekh razlog tano sose o Jehova blagoslovindža e Avrahame, kova tano „dad sarinendže kola verujinena“ (Rimlj. 4:11).

2. (a) Premalo Jevrejima 11:8-10, 16, sose o Avraham hine spremno te mukhel i diz Ur? (b) So ka razmotrina ko akava članko?

² O Avraham hine spremno te mukhel o udobno dživdipe kova hine le ki diz Ur. Sose? Odolese so ov adžičerdža „i diz koja isi la prava temeljija.“ (Čitin Jevrejima 11:8-10, 16.) Soj tani odija „diz“? Kola problemija hine le o Avraham dži adžičerdža odija diz te ovel izgradimi? Hem sar šaj te oponašina e Avrahame hem okolen kola ko amaro vreme oponašinena oleso primer?

3. Soj tani i diz koja o Avraham adžičerdža?

³ I diz koja o Avraham adžičerdža tani e Devleso Kraljevstvo. O Isus Hrist tano Kralj ando odova Kraljevstvo. Isto adžahar, o 144 000 pomazime hrišćanija ka vladinen oleja. O Pavle phendža so o Kraljevstvo tano sar „diz ando dživdo Devel, a odova tano o nebesko Jerusalim“ (Jevr. 12:22; Otkr. 5:8-10; 14:1). O Isus sikavdža pe učenikonen te molinen pe  odova isto Kraljevstvo te avel te šaj te čerel pe e Devlesi volja ki phuv sar so čerela pe ko nebo (Mat. 6:10).

4. Premalo Postanak 17:1, 2, 6, so o Avraham džandža andi diz, odnosno ando Kraljevstvo kova o Jehova obećindža?

⁴ Da li o Avraham džandža o detaljija ando odova sar e Devleso Kraljevstvo ka ovel organizujimo? Na. Vekonencar, odola detaljija hine „sveto tajna“ (Ef. 1:8-10; Kol. 1:26, 27). Ama, o Avraham džandža so disave ando olese potomkija ka oven kraljija sebepi so o Jehova obećindža lese odova. (Čitin Postanak 17:1, 2, 6.) O Avraham hine le odobor zorali vera ko e Jehovase obećanja so samči šajindža te dikhel e Pomazaniko, e Mesija, kova ka ovel kralj ko e Devleso Kraljevstvo. Sebepi odova, o Isus šajindža te phenel e Jevrejendže ko po vreme: „O Avraham tumaro dad but radujindža pe ki nada so ka dikhel mo dive. Ov dikhlja le hem radujindža pe“ (Jov. 8:56). Jasno tano, so o Avraham džandža so disave ando olese potomkija ka oven deo ando Kraljevstvo kova o Jehova ka uspostavini hem hine spremno te adžičeri o Jehova te ispunini odova obećanje.

5. Sar džanaja so o Avraham adžičerdža i diz kaso graditelj tano o Devel?

⁵ Sar o Avraham mothovdža so adžičerdža i diz ja o Kraljevstvo, kaso graditelj tano o Devel? Najangleder, o Avraham na ulo podanik ando nijekh kraljevstvo ki phuv. Ov živindža sar nomad, odnosno putujindža kotar than ko than, nigde na ačhilo trajno te živini hem niked na podržindža dijekhe kraljo ki phuv. Uzo odova, o Avraham na pokušindža te uspostavini po kraljevstvo. Umesto odova, ov hem ponodri šundža e Jehova hem adžičerdža Ov te ispunini po obećanje. Sebepi odova, o Avraham mothovdža so hine le zorali vera ko Jehova. Akana ka razmotrina kola problemija hine le o Avraham hem ka dikha so šaj te sikljova ando oleso primer.

6. Savi diz hine o Ur?

⁶ I diz koja o Avraham mukhlja hine šukar zaštitimi, udobno aso dživdipe hem o manuša uduri hine školujime hem barvale. Odija diz hine zaštitimi adžahar so hine la bare hem zorale zidija hem ko trin strane hine okružimi e kanaleja ko kova hine pani. O  manuša ko Ur džandže šukar te pisinen hem te računinen. Izgleda so but manuša čerdže buti ki odija diz, odolese so ked o arheolozija handže i phuv kuri hine odija diz, arakhlje but dokumentija kola koristindže pe asi buti. E manušenge čhera hine čerde ando cigle, malterišime hem okrečime ki parni boja. Disave čhera hine len 13 ja 14 sobe hem olengo dvoro hine popločimo.

7. Sose o Avraham morandilo te ovel le poverenje so o Jehova ka zaštitini ole hem olese porodica?

⁷ O Avraham morandilo te ovel le poverenje so o Jehova ka zaštitini ole hem olese porodica. Sose? Setin tut so o Avraham hem i Sara mukhlje po bezbedno hem udobno čher ki diz Ur hem dželje te živinen ko šatorija, avrijal o dizja ki hanansko phuv. Ole hem olese porodica više na zaštitindže o bare hem o zorale zidija hem o kanali kova hine pherdo panjeja. Umesto odova, o neprijateljija šajindže lokho te napadinen len.

8. Sova jekh vreme o Avraham borindža pe hem so sikljovaja ando odova izveštaj?

⁸ O Avraham čerdža e Jehovasi volja, ama jekh vreme na hine le dovoljno habe pe porodicače. Ki phuv ki koja o Jehova phendža lese te džal, hine baro bokhalipe. O bokhalipe hine odobor baro so o Avraham odlučindža te selini pe pekle porodicaja privremeno ko Egipat. Ama, dži hine ko Egipat, o faraon, o vladari ki odija phuv, ljelja olese romnja olestar. Zamislin kobor o Avraham brinindža pe dži o Jehova na kaznindža e faraone hem dži o faraon na irindža la lese (Post. 12:10-19).

9. Kola problemija o Avraham hine le ki pi porodica?

⁹ Ki e Avrahamesi porodica hine bare problemija. Olesi mangli romni i Sara naštindža te ovel la čhave. Beršencar, on hine but razočarime sebepi odova. Ko krajo, i Sara dindža e Avrahamese pe sluškinja, e Agara, te šaj te bijani čhaven olače hem olake romese. Ked i Agara ačhilji khamni e Ismaileja, počmindža te marel muj e Sarače. I situacija ulji odobor phari so i Sara uspudindža e Agara ando čher (Post. 16:1-6).

10. Ko kola situacije e Avrahameso poverenje ko Jehova hine ispitujimo?

¹⁰ Ko krajo, i Sara ačhilji khamni hem bijandža e Avrahamese jekhe čhave, kase ov čhivdža anav Isak. O Avraham manglja hem e Ismaile hem e Isake. Sebepi so o Ismail lošno ponašindža pe premalo Isak, o Jehova phendža e Avrahamese, te uspudini e Ismaile hem e Agara ando čher (Post. 21:9-14). Kasnije, o Jehova phendža e Avrahamese te del e Isake sar žrtva (Post. 22:1, 2; Jevr. 11:17-19). Solduj putija, o Avraham morandilo te ovel le poverenje upro Jehova, so ko krajo ka ispuninen pe o obećanja ando olese čhave.

11. Sose o Avraham morandilo strpljivo te adžičeri upro Jehova?

¹¹ Dži trajindža odova vreme, o Avraham morandilo te sikljol strpljivo te adžičeri upro Jehova. Hine le verovatno prekalo 70 berš ked ov hem olesi romni mukhlje i diz Ur (Post. 11:31 – 12:4). Oko 100 berš živindža ko šatorija, hem putujindža prekali phuv Hanan. O Avraham mulo ked hine le 175 berš (Post. 25:7). Ama, ov na dikhlja sar o Jehova ispunini po obećanje, te del olese čhavendže i phuv ki koja ov phirdža. Isto adžahar, ov na živindža dovoljno dugo te dikhel i diz, odnosno sar uspostavini pe e Devleso Kraljevstvo. Ama, ki Biblija pisini so o Avraham mulo „phuro hem zadovoljno e dživdipaja“ (Post. 25:8). Iako o Avraham morandilo te istrajini ko but pharipa, olesi vera ačhilji zorali hem hine spremno te adžičeri upro Jehova. Sose šajindža te istrajini? Odolese so ko celo oleso dživdipe, o Jehova zaštitindža le hem ponašindža pe premalo leste sar premalo po amal (Post. 15:1; Is. 41:8; Jak. 2:22, 23.)

12. So amen adžičeraja hem so ka razmotrina?

 ¹² Sar o Avraham, amen adžičeraja i diz koja isi la prava temeljija. Ama, amen na adžičeraja oj te ovel gradimi, sose e Devleso Kraljevstvo tano uspostavimo ko 1914. berš hem već vladini ko celo nebo (Otkr. 12:7-10). Ama, amen adžičeraja odova Kraljevstvo te vladini upri celo phuv. Dži adžičeraja odova te ovel, šaj ka ovel amen slična problemija sar so hine len o Avraham hem i Sara. Sar e Jehovase sluge ko amaro vreme šaj te oponašinen e Avrahameso primer? O iskustvija kola tane pisime ki Stražarsko kula, mothovena so but e Devlese sluge hine len vera hem strpljenje sar o Avraham hem i Sara. Akana ka razmotrina samo nekobor olendar hem ka dikha so šaj te sikljova.

13. So sikljiljan ando iskustvo kotar o phral Valden?

¹³ Ov spremno te čere žrtve. Ako amen mangaja te čhiva o Kraljevstvo ko prvo than ko amaro dživdipe, mora te ova sar o Avraham kova spremno čerdža žrtve te šaj te ugodini e Devlese (Mat. 6:33; Mar. 10:28-30). Te dikha o primer ando phral kova vičini pe Bil Valden. * Ko 1942. berš, o Bil valjandža te diplomirini ko američko univerziteti sar inženjer andi arhitektura. Tegani, ov počmindža te proučini e Jehovase svedokonencar. E Bileso profesor arakhlja lese buti koja valjandža te počmini te čerel palo diplomiranje, ama o Bil odbindža. Umesto te prihvatini odija buti koja tani šukar platimi, ov objasnindža lese so akana odlučindža te služini e Devlese pobuter. Hari palo odova, o vlastija vičindže e Bile te džal ki vojska. Iako mothovdža poštovanje, ov odbindža hem sebepi odova dobindža kazna ando 10 000 dolarija hem hine osudimo 5 berš ko phanlipe. Palo trin berš hine oslobodimo. Palo odova, hine vičimo te džal ki škola Galad hem služindža sar misionari ki Afrika. Tegani, o Bil ženindža pe e Evaja hem on zajedno služindže ki Afrika, so značindža so valjandže te čeren  bare žrtve. Palo nekobor berš, on irindže pe ki Amerika te brininen pe andi e Bilesi daj. Ked razmislini ando celo po dživdipe, o Bil phenela: „But hijum bahtalo hem zahvalno ked razmislinava andi bari čast koja hine man te služinav e Jehovase pobuter ando 70 berš. But putija zahvalinava man olese sebepi so pomožindža man te koristinav mo dživdipe te služinav olese.“ Da li hem tu šaj te koristine to dživdipe te služine e Jehovase ki punovremeno služba?

14-15. So sikljoveja ando iskustvo kotar o bračno par Apostolidis?

¹⁴ Ma mislin so na ka ovel tut problemija. Ando e Avrahameso primer sikljovaja so čak hem okola so celo po dživdipe služinena e Jehovase ka ovel len problemija (Jak. 1:2; 1. Petr. 5:9). Adžahar hine hem e phraljeja kaso anav tano Aristotelis Apostolidis. * Ov krstindža pe 1946. berš, ki Grčka hem 1952. berš verindža pe e phenjaja Elenaja, koja hine la ista ciljija sar ov. Ama, i Elena naborsaljilji hem o doktorija phendže lače so isi la tumor ko šero. On operisindže la, ama samo nekobor berš palo odova so ljelje pe, palem irindža pe lače o tumor. O doktorija palem operisindže la, ama i Elena ačhilji delimično paralizovano hem naštindža više normalno te vačeri. Iako hine nabormi hem iako ki odija phuv hine progonstvo, oj hem ponodri ačhilji revno phen.

¹⁵ Oko 30 berš, o Aristotelis brinindža pe andi pi romni. Uzo odova, ov služindža sar starešina, čerdža ko kongresna odborija hem pomožindža te gradini pe i Kongesno dvorana. Ama, ko 1987. berš, dži propovedindža, i Elena doživindža jekh nezgoda. Sebepi odova, oj trin berš hine ki koma hem palo odova mulji. O Aristotelis objasnini sar sa akala buča utičindže upro leste. Ov phenela: „Sar nakhlje o berša, hine man but phare problemija, a disave olendar ni na očekujindžum. Odolese, valjandžum te ovav odlučno te istrajinav hem te na dozvolinav nisose te obeshrabrini man. Ama, o Jehova uvek dindža man snaga te istrajinav ko odola problemija“ (Ps.  94:18, 19). Kobor o Jehova samo mangela okolen kola dena sa pestar te služinen olese, iako borinena pe pekle problemencar!

16. Kova šukar savet o phral Nor dindža pe romnjače?

¹⁶ Usredsredin tut ki budućnost. O Avraham usredsredindža pe ko buduća blagoslovija kola o Jehova ka del le, hem odova pomožindža lese te istrajini ko pe trenutna problemija. I phen Odri Hajd * pokušindža te ačhol pozitivno, čak iako olako prvo rom, o Natan Nor, mulo ando rak, a olako dujto rom, o Glen Hajd, hine le Alchajmer. Oj phenela so but pomožindža lače diso so phendža o phral Nor, samo nekobor kurče angleder so mulo. Oj phenela: „O Natan phendža maje: ’Palo meribe amari nada tani sigurno hem više niked na ka valjani te patina.‘ Palo odova podstaknindža man: ’Dikh anglal, sose uduri tani ti nagrada.‘ ... Ov pana phendža: ’Hem ponodri koristin to dživdipe te čere diso šukar averendže. Odova ka pomožini tuče te ove bahtali.‘“ Kobor šukar savet tano te da sa amendar te čera šukar averendže hem te radujina amen sebepi amari nada (Rimlj. 12:12).

17. (a) Sose isi amen šukar razlog te usredsredina amen ki budućnost? (b) Premalo Mihej 7:7, so šaj te pomožini amen te uživina ko blagoslovija kola adžičerena amen ki budućnost?

¹⁷ Avdije, isi amen pobuter razlogija nego angleder te usredsredina amen ki budućnost. O buča kola ovena ko sveto jasno mothovena so amen živinaja ko završno deo ando poslednja dive. Pana hari, amen više na ka valjani te adžičera e Devleso Kraljevstvo te vladini upri celo phuv. Maškaro but blagoslovija ko kola ka uživina, ka ovel hem odova so amare manglje ka uskrsninen. Ko odova vreme, o Jehova ka nagradini e Avrahame asi olesi vera hem aso strpljenje, adžahar so ka uskrsnini ole hem olese porodica ki phuv. Da li ka ove odothe te adžičere len? Tu šaj te ove odothe ako, sar o Avraham hijan spremno te čere žrtve aso e Devleso Kraljevstvo, arakheja ti vera iako isi tut problemija hem ako sikljoveja strpljivo te adžičere upro Jehova. (Čitin Mihej 7:7.)