1. Wayi wakɔnge anto efula oyapekalawɔ, edjinge ladjikɛnge oyapekalawɔ nghɔsɔ?

LƆƆKO kɛnɛ, miliyɔ yɛ ankambi wa Ndjambe wayapekala wayi lombombe. Efula kɛ wananyɔ la wakaana walekɔ nsɔna djɛ ntshikala m’polo. Antshukanyi amɔtshi ndɔsaka akano wa nsamba mbota wina wɔnɛ. Nkfumbo efula watona ndjala la n’kete efula. Anto ankfumɔ wasɔ wɔsaka akano wasɔ ngo m’ɔtɛ wɔ n’kambo mɔ djɛ djonyi, iwɔ nkɔpaka nkambela Yehova efula. Iwɔ walekɔ l’osasa edjinge la djawo ambɔ Yehova angawakfeyɛ k’enkfumɔ koyɛwɔ la djonyi. Iwɔ, wangoyapɛla m’ɔkɔngɔ? Lako! Ladjikɛnge awolaso n’kambo n’tshɔ? Elonga kɛmɔtshi nde, Yehova asakolaka Abrahama, ‘ise k’anto ankfumɔ walekɔ la djawo.’​—Ɔrɔ. 4:11.

2. a) Lá nkilika Hebero 11:8-10, 16, ladjikɛnge Abrahama ndawola nyima má Ura? b) Kɛkɔnge k’ohonaso ndjeka lá djamba djɛnɛ?

² Abrahama awolaka ntshika lowiko lɔnde lɔ wɔlɔ l’indasɛnaka lá ngando kɛ Ura. Ladjikɛnge? Ladjikɛnde nde akongaki ‘ngando kelekɔ l’epikamelo kɛ wɔlɔ.’ (Wala Hebero 11:8-10, 16.) ‘Ngando’ kɛkɔnge kɛsɔ? Ekakasano wɛkɔnge wepomanisa la Abrahama wina wɔ ndakongaka djɛ ngando kɛkɔ mpikama? Edjinge wopo wɔkɔnge wokakaso ndjokola Abrahama l’anto we l’etsho wɛso wɛnɛ wakilikisa ndjɔmbɔmba kɛnde?

3. ‘Ngando’ kɛkɔnge kɛ Abrahama ndakongaka?

³ Ngando kɛ Abrahama ndakongaka kɛsɔ oyɛwɔnde Onkfumi wɔ Ndjambe. Onkfumi wɔkɔ mpikama le Yeso Kristo ny’Akristo wankfutami w’avuta 144 000. Poolo antepelaka n’kambo dj’Onkfumi wɔkɔ ngete ‘ngando kɛ Ndjambe kewika, Jerusalɛmɛ yel’olongo.’(Heb. 12:22; Ndj. 5:8-10; 14:1) Yeso alakanyɛka ambeki wande dj’iwɔ ndɔmbaka djɛ Onkifumi wɔsɔ ndonangha ɛkɔpa kɛ Ndjambe lá looko ngete onanghemawɔ l’olongo.​—Mat. 6:10.

4. Lá nkilika Ewangelo 17:1, 2, 6, kɛkɔnge kɛ Abrahama ndewaka lá n’kambo djɛ ngando kana Onkfumi, wɔ Ndjambe ndalake?

 ⁴ Abrahama ewaki akambo ankfumɔ walendanaki la Onkfumi wɔ Ndjambe? Lako. Lá deko mɔtshi, akambo wasɔ wayalaka ‘w’iseke y’ekina.’ (Ɛfɛ. 1:8-10; Kɔl. 1:26, 27) Koko Abrahama ayewaki ante tonkanola tɔnde tɔmɔtshi tongoyala ankfumi, ladjikɛnde Yehova olakaka daka djɛsɔ. (Wala Ewa 17:1, 2, 6.) Abrahama ayalaka la djawo djɛ wolo efula l’alaka wa Ndjambe wasɔ etengo nde ɛnaka Onkfutami w’avuta, ntepela ente Mesiya, loyisa ladjɛ ndoyala Owadji wɔ Onkfumi wɔ Ndjambe. Djɛkondeke Yeso ndashimela ase Juda wa l’etsho wɛnde ante: ‘Abrahama papa kɛnyo asaasangaka efula wina wɔ ndakongelaka djɛ nyɛna loshi lɔmi edjinge nde ɛnaka loshi lɔkɔ ko ayalaka la osasa.’ (Dj. 8:56) Nsɔsɔlɔ, Abrahama ewaki djɛ tonkanola tɔnde wango kfumba Onkfumi wongoposɛ Yehova edjinge nde ayalaka entshupa djɛ nkonga ekotshamelo kɛ daka djɛ Yehova.

5. Wopo wɔkɔnge w’ewaso djɛ Abrahama akongaki ‘ngando’ kepikamisa me Ndjambe?

⁵ Wopo wɔkɔnge Abrahama ndɛnyɛ djɛ nde akongaki ngando, kana Onkfumi wopikamisa me Ndjambe? Ntondontondo, lako kaanga onkfumi ɔmɔ wɔ Abraham ndayale wɔna mbadja. Nde atakinanse lá mbandja kɛmɔ edjinge atasuka kaanga owadji ɔmɔ wɔ wɔna onto. Lonkina, Abrahama atahona djɛ mpika onkfumi wɔnde nyɔmɛlɛ. Koko nde ayalaka la ntshunamo te Yehova edjinge akongaki djɛ Nde nkotshɛ alaka Wande. Má nangha nghɔsɔ, ndeke ndɛnyɛ djawo djɛ nsɔsɔlɔ te Yehova. Nyotshɔ tokolenda ekakasano wepomanisa lande edjinge wopo wokokaso ndjokola ndjɔmbɔmba kɛnde.

6. Ura, iyayalaka ngando kɛ wopo wɔkɔnge?

⁶ Ngando kɛ Abrahama ndatshike keyalaka l’okfudji efula, edjinge k’apɛyɛki mvu la lotoyi ntshitshi. Ngando k’alamaki ladjikɛnde keyalaka la m’pele djɛ n’kekete edjinge ɛkɛndji w’apeku wá washi wɛ n’kekete l’enkoko wɛkɔ esato. Anto wayalaki lá ngando kɛkɔ kɛ Ura, wewaki nfuna edjinge wayalaki la balo lá wayi wa nkamba akumi. Nyɛnamaka ngete, ngando kɛsɔ keyalaka ngando kɛ wayi w’onkándá, wisolaka efula k’enkanda welendana la wayi w’enkándá lá ngando kɛ Ura. Amvulu yel’eteyi yepikamaka ngo l’abrikɛ, m’pele djɛwɔ djeyalaki ngo ɔsɛlɔ la mukubu wɔ mpɛmbɛ. Mvulu imɔtshi yeyalaki la toshambrɛ 13 kana 14 la badja djɛ lopango djenanghemaka la lowomba.

7. Ladjikɛnge Abrahama ndahombe ndjala la djawo ante Yehova angolama nde nya nkfumbo kɛnde?

 ⁷ Abrahama ayalaka ladjɛ ndjala la djawo ante Yehova angolama nde nya nkfumbo kɛnde. Ladjikɛnge? Vungɔ ente Abrahama nya Sara watshikaka mvulu kɛwɔ k’apɛyɛki m’vu la lotoyi ntshitshi lá ngando kɛ Ura djɛnde ntitatshɛ lá mvulu y’ampɛma, lá towawandja te lá Canana. Nde nya nkfumbo kɛnde watalamema lonkina má m’pele djɛ n’kekete edjinge ɛkɛndji w’apekfu wɛ washi. Ko lá wina wɔsɔ, amboyala wɔdju djɛ antonyi ndananghela nyɛtshi.

8. Ekakasano wɛkɔnge wepomanisa l’Abrahama lá wina wɛmɔtshi?

⁸ Kaanga Abrahama ndananghaka ɛkɔpa kɛ Ndjambe, nde ayalaka la okakasano l’etena kɛmɔtshi djɛ ndesɛ nkfumbo kɛnde. Ndjala k’ekekete keyɛka ndoyala lá owila wɔ Yehova ndotome djɛ tintansɛ. Ndjala kɛsɔ keyɛka ndoyala wolo ko Abrahama ɔsaka n’kano djɛ n’tshɔ nya nkfumbo kɛnde tintansɛ ndambo l’Edjipito. Koko, wina wɔ ndayalaka l’Edjipito, Farawɔ, kanga lɔlɔndjɛki owila wɔkɔ, ɔsaka wadjɛnde. Kokanela efula k’okiyano wɔ Abrahama ndakoke ndjoka tii wina wɔ Yehova ndatshinde Farawɔ djɛ nkawoyɛ Sara te Abrahama.​—Ewa. 12:10-19.

9. Ekakasano wɛkɔnge wepomanisa l’Abrahama lá nkfumbo kɛnde?

⁹ Abrahama apomanaka l’ekakasono kaanga lá nkfumbo kɛnde. Wadjɛnde windakɔpaka efula, Sara, atawotaka. Iwɔ wɛnaka ndjolo l’okakasano wɔsɔ l’ila k’ɛnɔnyi efula. Ekomo ko, Sara apɛyɛka Abraham os’olemo wɔnde wɔ womoto wiyetaka Hangara djɛnde mbotela Abraham nya Sara wɔna. Koko wina wɔ Hangara ndatshu djemi djɛ Ishimayɛlɛ, nde atateyɛka nyɔnyɔla Sara. N’kambo n’tshɔ nkiyanyɛka Sara efula ndeke ndakilika Hangara ma lopango.​—Ewa. 16:1-6.

10. Akambo wakɔnge walendana la Ishimayɛlɛ nya Isaka wilisa djawo djɛ Abrahama te Yehova l’ohemba?

¹⁰ Lɔkɔngɔdjiko Sara ayɛkandotshɔ djemi edjinge awotelaka Abrahama wɔna mpame, ko ɔpɛyɛka djina ante Isaka. Abrahama akɔpaki wana wande ape, Ishimayɛlɛ nya Isaka. Koko ladjikɛnde Ishimaɛlɛ ɛnyɛki Isaka ndjolo, Abrahama atshindamaka djɛ nkilika wɔnande Ishimayɛlɛ nya nyɔkɛnde Hangara. (Ewa. 21:9-14) Ɛnɔnyi efula m’ɔkɔngɔ, Yehova alɔmbaka Abrahama djɛnde ndolambola Isaka ngete olambo. (Ewa. 22:1, 2; Heb. 11:17-19) Akambo ape wasɔ wilaka djawo djɛ Abrahama l’ohemba, nde ayalaka ladjɛ ndaashikikɛ ante Ndjambe angonangha wepo enkfumɔ djɛ akambo mpeta wɔlɔ te wana wande ape wakɔ.

11. Ladjikɛnge Abrahama ndayale ladjɛ nkonga Yehova la bale ntshitshi nkfumɔ?

¹¹ L’ila k’ɛnɔnyi enkfumɔ wɛsɔ, Abrahama ayalaka ladjɛ ndjeka djɛ nkonga Yehova labale ntshitshi nkfumɔ. Nkoka ndjala, nde imaka nya nkfumbo kɛnde má Ura wina wɔ ndayalaka l’ɛnɔnyi ndekana 70. (Ewa. 11:31–12:4) Ko l’ila k’ɛnɔnyi nkama, nde atintatshɛki la atasɛkɔsɛkɔki l’amvulu y’apɛma yɛl’owila wɔ Kanana. Abrahama amvɔka l’ɛnɔnyi 175. (Ewa. 25:7) Koko nde atɛna ekotshamelo kɛ alaka wa Yehova ndoshimela djɛ mpɛyɛ tonkana la tonkanola tɔnde owila wɔ ndakinyasɛka. Edjinge nde atasɛna ila djɛ nyɛna ngando, Onkfumi wɔ Ndjambe ndaposɛ. Kaanga oyɛwɔ nghɔsɔ, Bible ntepelaka djɛ Abrahama ante nde avɔka ‘ekokolo kɛmbɔtɔ ntshukunu edjinge ambokfupa andja.’ (Ewa. 25:8) Kaanga ndapomana l’efula k’ekakasano, Abrahama ayalaka ngo la djawo djɛ wolo edjinge awolaka l’osasa djɛ nkonga Yehova. Ladjikɛnge ndayale l’akoka wa nkfulumeyɛ nghɔsɔ? Ladjikɛnde Yehova alamaka Abrahama lowiko lɔnde l’otondo la onghelaka akambo ngete ilongo.​—Ewa. 15:1; Iza. 41:8; Dja. 2:22, 23.

12. Okongaso nge, edjinge kɛkɔnge kɔkɔpaso ndjeka?

¹² Tolekɔ nkonga ngando kelekɔ l’epikamelo kɛ wɔlɔ etengo Abrahama. Koko, iso topakonge djɛ owila wɔkɔ mpikama, ladjikɛnde  Onkfumi wɔ Ndjambe womboshiyɛka mposa edjinge wombotateyɛka ndɔndjɛ l’olongo má 1914. (Ndj. 12:7-10) Koko tokonga djɛnde ndɔndjɛ edjinge lá looko. Wina wokongaso djɛnde ntateyɛ ndɔndjɛ, tongopomana la ekakasano efula etengo wɛnɛ wepomanisa l’Abrahama nya Sara. Ankambi wa Yehova wɛ lɔɔko kɛnɛ, wangokilikake ndjɔmbɔmba k’Abrahama? Ekɔndɔ wɛ lɔsɛnɔ weposa lá Etange k’Olami wɛtɛnyɛ djɛ, etengo Abrahama nya Sara, efula k’anto lɔɔko kɛnɛ walekɔ nyɛnyɛ ndjawo edjinge bale ntshitshi djɛwɔ. Nyotshɔ tokolenda ndjɔmbɔmba imɔtshi l’ateyi k’ɛkɔndɔ wɛsɔ edjinge elakanyelo wokokaso mba ma Ndjɔmbɔmba yɛwɔ.

13. Olakanyelo wɔkɔnge ngombowa lá ndjɔmbɔmba kɛ wɔnanyɔ Bill Walden?

¹³ Yala entshupa djɛ wɛ ndapekala akambo amɔtshi lá n’kambo djɛ Ndjambe. Ntsha iso nkɔpaka mpetshɛ ngando kɛ Ndjambe, ntepela ente Onkfumi wɔnde l’edjena kɛ ntondo kɛ lowiko lɔso, ngo iso ndjokola Abrahama, loyalisa entshupa djɛ ndapekala lá n’kambo djɛ nde nangha ɛkɔpa kɛ Ndjambe. (Mat. 6:33; Mar. 10:28-30) Tokotepela la yopasɛ, ndjɔmbɔmba kɛ wɔnanyɔ ɔmɔtshi wetawɔ Bill Walden. * Lá 1942, Bill atateyɛka ndjeka Bible l’Ewakɛ wɛ Yehova, lasɔko, nde akɔpa ndongola m’pɔlɔmɛ djɛnde etengo ɛgɛniɛrɛ w’architecte m’ɔkɔngɔ wɔnde ndjingela ɛnɔnyi efula l’univɛrsite imɔtshi yel’États-Unis. Wetsha wɔnde ɔmɔtshi woyalaki ɛgɛniɛrɛ, owayelaka olemo, koko Bill atonaka olemo wɔkɔ. Nde oshimelaka ante ntsha nde ambotona olemo wɔsɔnde, nde akɔpaka ndapɛyɛ efula l’olemo wɔ Ndjambe. Ndambo daambi m’ɔkɔngɔ, wowetaka djɛnde nkamba olemo w’angala. Bill atonaka la dilɛmwɛlɔ nkfumɔ djɛ nangha olemo wɔsɔ, ko w’owilaka amandɛ w’adɔlara 10 000 edjinge ɛnɔnyi etano wɛ lokando. Nde atshungɔka má lokando m’ɔkɔngɔ w’ɛnɔnyi esato. M’ɔkɔngɔ, wowetaka lá Nkalasa kɛ Giliyadɛ edjinge wotomaka ngete misiɔnɛrɛ l’Afrique. M’ɔkɔngɔ Bill ayɛka ndotshukana nya Eva, ko wakambelaka Yehova esanga l’Afrique, n’kambo ntshɔ mpakisolaka djɛ wayapekalaka akambo efula. L’ɔkɔngɔ djiko wakalɔka  l’États-Unis djɛ ntokotshɛ mama kɛ Bill. Djɛ nkomɛ ɔkɔndɔ wɔ lowiko lɔndɛ, Bill antepelaka ante: “Wina wokanelami lomu l’ekekete l’imawa djɛ nkambela Yehova l’ila k’ɛnɔnyi 70 wetondo, lemi ndjalaka l’ɔngɛnɔnɔ efula edjinge la djedjɛ dj’efula. Lemi ndokawoyɛka losaka mbala efula wopo wɔnda ndɔndjɛ l’olemo wɔ wɔlɔ efula wɔsɔ.” Kowɛ, okoka nangha dj’olemo wɔ n’tena tshɛ ndjala olemo wɔ lowiko lɔko?

14-15. Olakanyelo wɔkɔnge ngombowa ma kɛnɛ kekomelisa wɔnanyɔ Apostolidis nya wadjɛnde?

¹⁴ Ila lá wɔɔngɔ djɛ ongopomana l’ekakasano. Ndjɔmbɔmba k’Abrahama ntekɛka djɛ kaanga anto wapɛyɛ lowiko lɔwɔ l’otondo djɛ nkambela Yehova mpomanaka l’ekakasano. (Dja. 1:2; 1 Pɛ. 5:9) Kɛnɛ kekomelisa Aristotelis Apostolidis tɛnyɛka n’kambo n’tshɔ. * Nde alongolaka batisimu lá Grèce, lá 1946, edjinge lá 1952 nde akomaka oshile wɔ nkaana Eleni. Ole Eleni ayalaka la n’kano ngo mɔ djɛ nkambela Yehova ngete nde. Koko nde ayɛka ndɔkfɔ olando, wowisolaka n’tshuku lá wɔɔngɔ. Wowimɛka n’tshuku djɛkɔ, koko m’ɔkɔngɔ w’ɛnɔnyi emangha toko w’iwɔ ntshukana, n’tshuku djɛkɔ djefulaka lonkina. Wa dɔktɛrɛ wataka Eleni lonkina, koko nde atshikalaka l’ɛkɔmɔ, atakokaki ntepela wɔlɔ lonkina ngete wopo windatepelaka ntondo. Koko, nde akindjɛka ndjala l’osaasalo l’olemo wipoposanyɛ kaanga l’olando wɔnde wɔsɔ, l’ɛhɛnyɔhɛnyɔ enkina weme ewandji wɛ lɛɛta, iyɛnyɛka Ewakɛ ndjolo l’etsho wɛsɔ.

¹⁵ L’ila k’ɛnɔnyi 30 Aristotelis alamaka wadjɛnde l’olando wɔnde, kaanga ndakambaka ngete ikokolo, ndakambaka lá kɔmite kɛ wayi walendana la nsanghanyɛ yɛ n’ketete, la ndakotshɛka olemo w’opikelo wɔ Mvulu kɛ nsanghanyɛ yɛ n’ketete. Masɔ, l’ɔnɔnyi wɔ 1987, Eleni ananghaka aksida wina windayalaka l’olemo w’ipoposanyɛ. Nde atshikalaka lá mbeto apawetshɔ, kana nyemala nyɔmɛlɛ, ko ayɛka ndovɔ m’ɔkɔngɔ w’ɛnɔnyi esato. Aristotelis atepelaka la yopasɛ wopo wɔ ndoyawokaka ante: “L’ila k’ɛnɔnyi efula, mpomanaka l’ekakasano wɛ wolo efula edjinge l’akambo w’isashimoyɛ wa wolo nfulumeyɛ, ndjalaka la djonyi djɛ pikama djɛ nfumeyɛ edjinge m’pa ntshika kaanga n’kambo mɔ ndɛmbɛ lemi. Nsɔsɔlɔ, Yehova ampɛyɛki wina tshɛ wolo wimayalaka la djonyi djɛ nkfumeyɛ ekakasano wɛsɔ.” (Yee. 94:18, 19) Ɛɛ, Yehova nkɔpaka anto wanangha k’enkfumɔ  k’okokawɔ nangha lá n’kambo djɛnde kaanga la ntondo k’ekakasano wɛ wolo!

16. Dako djɛ wɔlɔ djɛkɔnge wɔnanyɔ Knorr ndapɛyɛ wadjɛnde?

¹⁶ Kindjɛ nkanela lá n’kambo djɛ n’kongi djɛko djeyaye. Abrahama akindjɛki nkanela ɛtshɔkɔ wɛ Yehova ndongɔpɛyɛ, edjinge n’kambo n’tshɔ okotshɛka djɛ nde nkfulumeyɛ ekakasano wepomanisa lande. Nkaana Audrey Hyde ekaka nama ikanyi yɛ wɔlɔ yɛ nghɔsɔ, kaanga wina wovwisa womɛnde wɔ ntondo, Nathan Knorr la cancer, edjinge womɛnde wape Glenn Hyde, ndoovɔka lonkina l’olando wɔ Alzheimer. * Nde atepelaka ante kɛnɛ kenkotshisa efula nde, kɛnɛ koshimelisa wɔnanyɔ Knorr mbengo imangha la ntondo kɛ nyɔyi kɛnde. Nde atepela ante: “Nathan amvungolaka ante: ‘N’kongi djɛso djokongelaso m’ɔkɔngɔ wɔ nyɔyi djengokotshama m’pa l’ehamu, ko topangɛna ndjolo lonkina.’ Nde anshimelaka lonkina ante: ‘Pika wiso l’etsho weyaye, ladjikɛnde ɛtshɔkɔ wɛso welekɔ lá ntondo.’ Nde akfɛka ante: ‘Tshikala l’olemo, hona djɛ nkamba la lowiko lɔko djɛ n’kambela anto akina. N’kambo n’tshɔ ngokokotshɛ djɛ ndjala l’osasa lá lowiko lɔko.’” Ntshikala l’olemo wɔ nanghela anto ankina wɔlɔ edjinge ‘nsaasanga lá n’kongi’ alekɔ nsɔsɔlɔ dako djɛ wɔlɔ!​—Ɔrɔ. 12:12.

17. a) Donga djɛkɔnge djokostshɛso djɛ mpika wiso tá etsho weyaye? b) Ntsha tombokola ndjɔmbɔmba kɛ Mika kotanaso lá Mika 7:7, ɛtshɔkɔ wɛkɔnge wɛsongowa?

¹⁷ Lɔɔko kɛnɛ, ndeke isomboleka mba donga djɛ mpika wiso waso l’etsho w’eyaye. Akambo waheta l’andja wotondo nyɛnyɛka papoo djɛ tolekɔ nsɛna l’ekomo k’etsho wekomo k’akambo wanɛ. Lako ila, topangoyala lonkina la djonyi djɛ nkonga djɛ ngando kelekɔ l’epikamelo kɛ wɔlɔ ndɔndjɛ looko. L’anteyi k’ɛtshɔkɔ w’isongowa, enkfundwelo k’anto wɔkɔpaso efula kelekɔ. Lá wina wokongelaso wɔsɔ, Yehova angosakola Abrahama lá djawo djɛnde la bale ntshitshi djɛnde má ndonkfundola, nde nya nkfumbo kɛnde dj’iwɔ ndɔsɛna lá looko. Wɛ ongoyala l’eteyi djɛ ndasangela? Okoka ndjala l’eteyi, ntsha olekɔ entshupa djɛ ndaasambɛ lá n’kambo djɛ Onkfumi wɔ Ndjambe, ntsha ombolama djawo djɛko wolo kaanga la ntondo k’ekakasano, la ntsha ongeka djɛ nkonga Yehova la bale ntshitshi nkfumɔ entengo Abrahama.​—Wala Mika 7:7.