Go na content

Go na table of contents

STUDIE-ARTIKEL 31

Yu e fruwakti „a foto di abi trutru fondamenti”?

Yu e fruwakti „a foto di abi trutru fondamenti”?

„A ben fruwakti a foto di abi trutru fondamenti. A sma di prakseri fa fu meki a foto dati èn di bow en, na Gado.”​—HEBR. 11:10.

SINGI 22 A Kownukondre seti kaba​—Meki a kon!

SAN WI O LERI *

1. Sortu bosroiti furu anbegiman fu Yehovah teki èn fu san ede den du dati?

MILYUNMILYUN anbegiman fu Yehovah na ini a ten disi teki son bosroiti fu man du moro gi en. Furu brada nanga sisa bosroiti fu no trow. Son trowpaar bosroiti fu no kisi pikin ete. Son papa bosroiti fu suku wan wroko di no e teki so furu fu den ten èn den osofamiri e horibaka gi den. Ala den sma disi teki den bosroiti dati fu di den wani du moro gi Yehovah. Den de tevrede èn den e frutrow taki Yehovah o gi den san den abi fanowdu. Fu san ede den kan de seiker taki Yehovah o yepi den? Fu di na ini a ten di pasa Yehovah ben sorgu gi den anbegiman fu en. Fu eksempre, a ben blesi Abraham, a „tata fu ala sma di e bribi”.​—Rom. 4:11.

2. (a) Soleki fa Hebrewsma 11:8-10, 16 e sori, dan fu san ede Abraham ben de klariklari fu gowe libi Ur? (b) San wi o luku na ini na artikel disi?

2 Abraham ben de klariklari fu froisi komoto na ini Ur pe a ben abi wan bun libi. Fu san ede? Fu di a ben fruwakti „a foto di abi trutru fondamenti”. (Leisi Hebrewsma 11:8-10, 16.) San na a „foto” dati? Sortu problema Abraham kisi aladi a ben e wakti a foto dati? Fa wi kan de neleki Abraham nanga den sma na ini a ten fu wi di teki na eksempre fu en? Na artikel disi o piki den aksi disi.

SAN NA „A FOTO DI ABI TRUTRU FONDAMENTI”?

3. San na a foto di Abraham ben e fruwakti?

3 A foto di Abraham ben e fruwakti na Gado Kownukondre. Yesus Krestes na a Kownu fu a Kownukondre dati. Boiti dati, 144.000 salfu Kresten o tiri makandra nanga en. Paulus ben kari a Kownukondre dati „a foto fu a libilibi Gado, a Yerusalem na hemel” (Hebr. 12:22; Openb. 5:8-10; 14:1). Yesus leri den disipel fu en fu begi gi a Kownukondre disi so taki a wani fu Gado kan pasa na grontapu soleki fa a e pasa na hemel.​—Mat. 6:10.

4. Soleki fa wi e leisi na Genesis 17:1, 2, 6, dan san Abraham ben sabi fu a foto, noso a Kownukondre di Gado ben pramisi?

4 Abraham ben sabi fa Gado Kownukondre ben o seti? Nôno. Hondrohondro yari langa dati ben de wan „santa kibritori” (Ef. 1:8-10; Kol. 1:26, 27). Ma Abraham ben sabi taki sonwan fu den bakapikin fu en ben o tron kownu. Na dati Yehovah ben pramisi en. (Leisi Genesis 17:1, 2, 6.) Abraham ben abi so wan tranga bribi na ini den pramisi fu Gado taki a ben de neleki a ben si a Salfuwan, noso a Mesias, di ben o de Kownu fu Gado Kownukondre. Dati meki Yesus ben kan taigi den Dyu fu a ten fu en: „Un tata Abraham ben prisiri srefisrefi fu di a ben fruwakti fu si a dei fu mi. We, a si en trutru èn a ben prisiri” (Yoh. 8:56). Sobun, Abraham ben sabi taki wan tu fu den bakapikin fu en ben o de na ini a Kownukondre fu Yehovah èn a ben de klariklari fu wakti teleki Yehovah du san a pramisi.

Fa Abraham sori taki a ben abi bribi na ini den pramisi fu Yehovah? (Luku paragraaf 5)

5. Fa wi du sabi taki Abraham ben e fruwakti a foto di Gado ben o seti?

5 Fa Abraham sori taki a ben e fruwakti a foto noso a Kownukondre fu Gado? Abraham no tron wan borgu fu wan kownukondre fu libisma. A no ben tan langa na wán presi èn noiti a horibaka gi wan libisma kownu. Boiti dati, Abraham no pruberi fu seti en eigi kownukondre. Na presi fu dati a tan gi yesi na Yehovah èn a wakti teleki Yehovah du san a pramisi. Den sani disi e sori taki Abraham ben abi wan tranga bribi na ini Yehovah. Meki wi poti prakseri now na wan tu problema di a ben kisi. Wi o luku tu san wi kan leri fu na eksempre fu en.

SORTU PROBLEMA ABRAHAM BEN KISI?

6. Fa a foto Ur ben de?

6 Abraham ben gowe libi wan foto di ben abi ala sani. A foto Ur ben abi bigi skotu èn na dri sei fu a foto yu ben abi dipi kanaal di ben kibri a foto. Den sma na ini a foto ben skoro. Den ben sabi leisi èn skrifi. Sma ben e du furu bisnis tu na ini a foto. Wi sabi disi fu di sabiman feni furu bisnis dokumenti na a presi pe a foto disi ben de. Den oso fu den sma ben meki fu ston, den muur ben grati èn den ben ferfi den weti. Sonwan fu den oso ben abi 13 noso 14 kamra èn den kamra ben de lontu wan dyari di ben abi wan ston vloer.

7. Fu san ede Abraham ben musu abi a frutrow taki Yehovah ben o kibri en nanga en famiri?

7 Abraham ben musu frutrow taki Yehovah ben o kibri en nanga en famiri. Fu san ede? Fu di Abraham nanga Sara gowe libi a moi oso fu den na ini Ur, fu go libi na ini tenti na ini Kanan. Den no ben abi hei skotu nanga dipi kanaal fu kibri den. Feanti ben kan kon feti nanga den makriki.

8. Sortu problema Abraham ben abi wan leisi?

8 Abraham ben du san Gado ben aksi en, ma wan leisi a no ben abi nofo nyanyan gi en famiri. Wan bigi angriten ben de na ini a kondre pe Yehovah ben seni en go. Na angriten ben hebi so te, taki Abraham nanga en famiri bosroiti fu go tan wan pisi ten na ini Egepte. Di a ben de drape, Farao, a kownu fu Egepte, tyari Sara go na en oso fu teki en leki en wefi. Ma te fu kaba Yehovah strafu Farao èn a meki a tyari Sara go baka na Abraham. Prakseri fa Abraham ben e firi a heri pisi ten di en wefi no ben de nanga en.​—Gen. 12:10-19.

9. Sortu problema Abraham ben abi na ini en osofamiri?

9 Abraham ben abi seryusu problema tu na ini en osofamiri. En wefi Sara di a ben lobi so te, no ben man kisi pikin. Furu yari langa a sani disi ben meki den sari. Te fu kaba Sara gi Abraham en umasrafu Hagar leki wefi so taki a ben kan kisi pikin gi den. Ma di Hagar kon de nanga bere, a ben e wisiwasi Sara. Sani ben kon so ogri, taki Sara yagi Hagar.​—Gen. 16:1-6.

10. Sortu sani di pasa nanga Ismael nanga Isak ben kan meki en muilek gi Abraham fu frutrow tapu Yehovah?

10 Te fu kaba Sara kon de nanga bere èn a kisi wan manpikin di Abraham kari Isak. Abraham ben lobi ala den tu boi fu en, Ismael nanga Isak. Ma fu di Ismael ben abi a gwenti fu pina Isak, meki Yehovah taigi Abraham fu seni Ismael nanga Hagar gowe (Gen. 21:9-14). Bakaten Yehovah aksi Abraham fu gi Isak leki ofrandi (Gen. 22:1, 2; Hebr. 11:17-19). Ala den tu leisi disi, Abraham ben abi a frutrow taki Yehovah ben o meki sani waka bun nanga den boi fu en.

11. Fu san ede Abraham ben musu wakti tapu Yehovah?

11 Abraham ben musu abi pasensi èn a ben musu wakti tapu Yehovah fu du san a pramisi. A kan taki a ben pasa 70 yari di en nanga en osofamiri gowe libi Ur (Gen. 11:31–12:4). Sowan wán hondro yari a libi na ini tenti na difrenti presi na ini a kondre Kanan. Abraham dede di a ben abi 175 yari (Gen. 25:7). A no si fa den bakapikin fu en kisi a kondre Kanan leki fa Yehovah ben pramisi. Èn a no si fa Gado seti a Kownukondre fu en. Toku Bijbel e taki dati Abraham ben „libi wan bun libi” (Gen. 25:8). Aladi Abraham kisi furu problema, toku a ben abi wan tranga bribi èn a ben wakti tapu Yehovah. San ben yepi en fu du dati? Yehovah ben de wan mati fu Abraham èn a ben kibri Abraham en heri libi langa.​—Gen. 15:1; Yes. 41:8; Yak. 2:22, 23.

Fa den anbegiman fu Yehovah e sori taki den abi bribi nanga pasensi neleki Abraham nanga Sara? (Luku paragraaf 12) *

12. San wi e wakti èn san wi o luku?

12 Neleki Abraham, wi e wakti tapu a foto di abi wan trutru fondamenti. Wi no e wakti fu a foto disi seti. Gado Kownukondre seti na ini 1914 èn a e tiri na ini hemel kaba (Openb. 12:7-10). Ma wi e wakti a ten te a o tiri heri grontapu. Teleki a ten dati doro, wi kan kisi problema neleki Abraham nanga Sara. Wi o man horidoro? Furu brada nanga sisa na ini a ten disi ben man horidoro neleki Abraham nanga Sara. Den ondrofenitori na ini den Waktitoren e sori taki den brada nanga sisa disi ben abi bribi nanga pasensi. Kon meki wi luku wan tu fu den ondrofenitori disi. Wi o si tu san wi kan leri fu den.

TEKI NA EKSEMPRE FU ABRAHAM

Bill Walden ben de klariklari fu libi son sani na baka èn dati meki Yehovah blesi en

13. San yu leri fu na ondrofenitori fu Brada Walden?

13 De klariklari fu libi son sani na baka. Efu wi wani poti a Kownukondre na a fosi presi na ini wi libi, wi musu de klariklari fu libi son sani na baka, neleki Abraham (Mat. 6:33; Mark. 10:28-30). Luku na eksempre fu wan brada di nen Bill Walden. * Na ini 1942, Bill bigin studeri nanga Yehovah Kotoigi di a ben de na ini a lasti yari na universiteit. Wan fu den professor na a universiteit ben seti sani gi Bill fu man bigin wroko, baka te a ben o klari a skoro. Ma Bill no ben wani a wroko. A ben taigi a professor taki a ben bosroiti fu du moro gi Gado na presi fu teki wan wroko pe a ben o meki furu moni. Syatu baka dati, Bill ben musu go na ini a legre. A weigri fu go èn a kisi wan butu fu 10.000 Amerkan dala. Boiti dati, a ben kisi wan strafu fu feifi yari. Baka dri yari a komoto na strafu-oso. Bakaten a go na Gileadskoro èn a dini leki zendeling na ini Afrika. Bill trow nanga Eva, èn makandra den dini na Afrika. A libi no ben makelek gi den na ini Afrika. Baka wan pisi ten den drai go baka na Amerkankondre fu sorgu gi a mama fu Bill. Bill e taki: „Mi ai e furu nanga watra te mi e prakseri a moi grani di mi abi fu wroko gi Yehovah moro leki 70 yari. Furu leisi mi e taigi en tangi taki a yepi mi fu dini en na a fasi disi.” Yu man du a furuten diniwroko tu?

Eleni nanga Aristotelis Apostolidis kisi krakti fu Yehovah

14-15. San yu leri fu na ondrofenitori fu Brada nanga Sisa Apostolidis?

14 No denki taki yu no o kisi problema. Na eksempre fu Abraham e leri wi taki srefi den wan di e dini Yehovah fayafaya o kisi problema (Yak. 1:2; 1 Petr. 5:9). Na so a ben de nanga Brada Aristotelis Apostolidis. * A dopu na ini 1946 na ini Grikikondre èn na ini 1952 a ben meki mofo fu trow nanga wan sisa di nen Eleni. Eleni ben wani du moro gi Yehovah neleki en. Ma Eleni kisi kanker na en edetonton. Den datra ben man yepi en, ma baka di den trow wan tu yari a kanker kon baka. Den datra koti en baka, ma baka dati a kon lan na wan sei èn a no ben man taki so bun moro. Eleni ben tan preiki fayafaya aladi a ben siki èn aladi lanti ben gens den Kotoigi na a ten dati.

15 Moro leki 30 yari Aristotelis sorgu gi en wefi. Na ini a pisi ten disi a ben dini leki owruman, a ben de na ini a Kongreshal Komte èn a ben yepi bow wan kongreshal. Na ini 1987, Eleni kisi wan hebi mankeri di a ben de na ini a preikiwroko. Dri yari langa a ben de na ini coma. Baka dati a dede. Aristotelis e fruteri fa den sani disi ben abi krakti na en tapu. A e taki: „Na ini den yari di pasa, mi kisi furu problema èn sonwan fu den mi no ben fruwakti. Dati meki a ben prenspari taki mi horidoro èn mi no lasi-ati. Ma ala ten Yehovah gi mi a krakti fu man pasa den problema disi” (Ps. 94:18, 19). Yehovah lobi den anbegiman fu en di e du ala san den man gi en aladi den e kisi problema!

Audrey Hyde tan prakseri a moi howpu di wi abi

16. Sortu bun rai Brada Knorr ben gi en wefi?

16 Tan prakseri fa sani o de na ini a ten di e kon. Abraham ben e prakseri a pai di Yehovah ben o gi en èn a sani disi yepi en fu horidoro. Na dati Sisa Audrey Hyde ben du tu. * A ben tan prakseri a moi howpu fu wi aladi en fosi masra Brada Nathan H. Knorr dede fu di a ben abi kanker. Boiti dati, a di fu tu masra fu en Glenn Hyde kisi a siki Alzheimer. A sani di Brada Knorr taigi en wan tu wiki fosi a dede yepi en furu. A e taki: „Nathan ben taigi mi: ’Te wi dede, dan wi de seiker taki wi o kisi a sani di wi ben howpu na tapu èn taki noiti moro wi o pina.’ Baka dati a taigi mi: ’Luku go na fesi, fu di yu o kisi yu pai na ini a ten di e kon.’ Nathan ben taki moro fara: ’Tan wroko tranga; pruberi fu gebroiki yu libi fu du sani gi tra sma. Disi o yepi yu fu kisi prisiri na ini a libi.’” A rai disi fu tan du bun gi trawan èn fu „prisiri nanga a howpu” di wi abi na bun rai.​—Rom. 12:12.

17. (a) Fu san ede a moro prenspari now fu prakseri a howpu fu wi? (b) Te wi e luku san Mika 7:7 e taki, dan san wi musu du fu kan kisi blesi na ini a ten di e kon?

17 Now a moro prenspari srefi fu prakseri a howpu fu wi. Den sani di e pasa na grontapu e sori taki wi de na ini a lasti pisi fu den lasti dei fu a grontapu disi. A no o teki langa moro fosi Gado Kownukondre o tiri heri grontapu. Wan fu den sani di o meki taki wi o prisiri, na taki den lobiwan fu wi di dede o kisi wan opobaka. Na a ten dati, Yehovah o gi Abraham nanga en famiri wan opobaka, fu di den ben abi bribi èn pasensi. Yu o de drape fu gi den wan switikon? Yu o de drape efu yu de klariklari fu libi son sani na baka, efu yu e horidoro aladi yu e kisi problema èn efu yu e wakti Yehovah nanga pasensi.​—Leisi Mika 7:7.

SINGI 74 Kon meki wi singi a Kownukondre singi!

^ paragraaf 5 Te wi musu wakti langa tapu wan sani di wan sma pramisi wi, dan wi kan lasi pasensi èn son leisi wi no e bribi moro taki wi o kisi a sani. Fa na eksempre fu Abraham kan yepi wi fu wakti nanga pasensi teleki Yehovah du san a pramisi? Èn san wi kan leri fu anbegiman fu Yehovah na ini a ten fu wi?

^ paragraaf 13 Na ondrofenitori fu Brada Walden de na ini A Waktitoren fu 1 december 2013, blz. 8-10.

^ paragraaf 14 Na ondrofenitori fu Brada Apostolidis de na ini A Waktitoren fu 1 februari 2002, blz. 24-28.

^ paragraaf 16 Na ondrofenitori fu Sisa Hyde de na ini A Waktitoren fu 1 yuli 2004, blz. 23-29.

^ paragraaf 56 SAN WI E SI TAPU DEN PRENKI: Wan owru trowpaar e tan dini Yehovah awinsi a no makelek gi den. Fu di den e tan prakseri den pramisi fu Yehovah, meki den abi wan tranga bribi.