1. ¿Ambeksï úxaki uánikua erachicha ka andi?

INI jurhiatikuecha jimbo, uánikua erachicha ka pirenchichaksï uánikua ambe úxati jimbokaksï uékasïnga Jeobani marhuakuni na engaksï xáni uáka. Uánikuechaksï erakusti no tembuchani o uambuchani. Máru temungurhirichaksï erakusti eskaksï iáiasï no káuaka sapiichani. Ka uánikua familiechaksï arisku sáni irekaxati. Iáminduechaksï tsípikua jingoni irekaxati ka mintsikani eska Jeoba íntsauaka ambe engaksï sési jimbo uétarhinchajka, ka Jeoba ísï uáti. ¿Andichisï ísï uandajki? Jimboka ióntki, Tata Diosï kuájchakuaska imeri marhuarichani. Por ejemplu, újchakuraspti Abraanini, ima enga jindeka “táti jémba iámindu jakajkuticheri” (Rom. 4:11).

2. a) Eska na uandajka Ebreu 11:8-10, 16, ¿andisï Abraani jurajkupi ireta Uri? b) ¿Ambechi exea ini jorhenguarhikua jimbo?

² Abraani erakuspti jurajkuni iámindu ambakiti ambe enga Uri japka. ¿Andi? Jimboka erokuarhixapka imani iretani enga sési uaxastakata jaka (arhinta je Ebreu 11:8-10, 16). ¿Nákiski ima “ireta”? ¿Náki uandanhiatechani jatsiaspi Abraani enga jamberi erokuarhini japka eska japiringa ima ireta? Ka ¿nénachi uá májkueni úni eska Abraani ka eska imecha engaksï májkueni úni jaka ini jurhiatikuecha jimbo? Ini jorhenguarhikua jimbo, mókuantanchi jauaka ini kurhamarhikuechani.

3. ¿Nákiski ima “ireta” enga Abraani erokuarhini japka?

³ Ireta enga Abraani erokuarhini japka, jindesti Tata Diosïri Reinu nani enga tata Jesukristu ka 144,000 erakukatechaksï juramuaka. Pablu arhisïndi ini Reinuni, ireta “enga Diosïrika enga tsípitika, ka enga jindeka ireta Jerusaleni auandarhu anapu” (Ebr. 12:22; Jaŋ. 5:8-10; 14:1). Jesusi jorhendaaspti imeri  chúxapatichani paraksï kurhajkuarhini eska janopiringa Reinu paraka úkuarhipiringa ambe enga Tata Diosï uéjka “ixú parhakpinirhu májkueni jásï eska na úkuarhijka auandarhu” (Mat. 6:10).

4. Eska na uandajka Génesis 17:1, 2, 6, ¿ambe mítespi Abraani imani ireteri o Reinueri ambe enga Tata Diosï aiatspepka?

⁴ Abraani no sési mítespti néna úkata japirini Tata Diosïri Reinu. Uánikua uéxurhinicha jimbo jindespti ambe ma enga Tata Diosï no nemani aiangupka (Efes. 1:8-10; Kol. 1:26, 27). Peru ambe enga kʼóru Abraani mítepka, jindespti eskaksï máru imeri uájpecha niárapiringa reini, jimboka Jeoba ísï aiakuspka (arhinta je Génesis 17:1, 2, 6). Jimboka xáni mintsikasïrenga ambe enga Tata Diosï aiakupka, ísïspti enajki exepirini Tata Diosïri Erakukatani o Mesiasini enga Reipiringa Tata Diosïri Reinurhu. Jimbosï Jesusi arhiapti judiuechani: “Chári táti Abraani tsípesïrendi jimboka exepiringa juchiti jurhiatikuani, ka exestia ka tsípisti” (Juanu 8:56). Xarharasïndi eska Abraani mítespka eskaksï imeri uájpecha japiringa Juramukuarhu ma jimbo enga Jeoba uaxastapiringa ka ima eratsetixapti erokuarhini astaka Jeoba úpiringa ambe enga aiakupka.

5. ¿Nénachi míteski eska Abraani erokuarhixapka imani iretani enga Tata Diosï uaxastaka?

⁵ ¿Néna xarhataspi Abraani eska erokuarhixapka imani iretani —o Reinuni— enga Tata Diosï uaxastaka? Orheta, jimboka no niáraspka parhakpini anapu reinu ma jingoni kuenta úkuarhini. No niáraspti irekani ma lugari jimbojku ni niárapi juramutini ma jingoni jámani. Ístu, ima no méni eratsespti juramukua ma uaxastani. Sánderu sési, méntkisï kurhajchaspti Jeobani ka erokuarhispti eska ima úpiringa ambe enga aiakupka. Ísï xarhataspti eska kánikua mintsikasïrenga Tata Diosïni. Ju je exeni máru uandanhiatechani enga orhepani uérakuapka ka ambechi jorhenguarhisïni imeri ambe.

6. ¿Nénaespi ireta Uri?

⁶ Ireta Uri enga Abraani jurajkupka, sési jarhaspti ka kuájchakukata, ka jima anapu kʼuiripu sési jorhendakata jarhaspti ka ístuksï jatsikuarherispti. Kʼéri barda ma jukaspti ka iurhekua ma enga kánikua jauamipka tanipurisï uirhipandaspti. Uri anapu kʼuiripuechaksï kánikua mítekuspti karani ka kuenta pʼikuni. Peeka imani ireta jimbo uánikua ambe íntspikuarhinhenga,  jimbokaksï imecha engaksï ióntki anapu ambe jirinhantajka, sïranda ambeksï exentaska enga i ambe xarhatajka. Kʼumanchikuechaksï tabiki jingoni úkata jarhaspti ka urapitiksï atantskata jarhaspti. Máru kʼumanchikuecharhuksï 13 o 14 kuartuecha jarhasïrendi ekuaru ma uirhipandani enga tsakapu jatandenga.

7. ¿Andisï Abraani jatsipi para mintsikani eska Jeoba kuájchakupiringa imani ka imeri familiani?

⁷ Abraani jatsispti para mintsikani eska Jeoba kuájchakupiringa imani ka imeri familiani. ¿Andi? Ju je miáni eska ima ka témba Sara, iámu ambeksï jurajkuspka paraksï nani uéjkisï irekani jini Kanaani kʼumanchikuecha jimbo engaksï takusïripka o sïkuiriri. Nóteruksï kuájchakukata jarhasptia kʼéri barda ma jimbo o iurhekua jimbo. Iásï, sánderu fasilipirindia paraksï no sési úricha no sési úkuani.

8. ¿Ambe niáraspi ma xanhari nitamakuarhini Abraani?

⁸ Nájkiruka Abraani úpka ambe enga Tata Diosï uékenga, ma xanhari no úspti iámindu ambe kéndani imeri familiani. Jatsispti para orhepani uérani, jimboka imani echeri jimbo enga Jeoba axapka, kʼarhingua jarhaspka iápurisï. Xáni úkua jukanchaspti enga jamberi niárapka Ejiptu mótseni ma tiempu jimbo. Peru enga Ejiptu japkia, jima anapu juramuti enga jindepka faraoni, Sarani euaspti. ¿Úsïnchi eranhaskani na enga xáni uandanhiani japka Abraani astaka Jeoba úpka eska faraoni íntskuntapiringa témbani? (Gén. 12:10-19).

9. ¿Náki uandanhiatecha niáraspi jatsiani Abraani imeri familiarhu?

⁹ Abraaniri familia niáraspti kʼérati uandanhiatechani jatsiani. Sara, imeri uarhiiti enga ima xáni xénchenga, no úsïrendi sapiichani kánguarhiani. Iónksï jamberi kómu pʼikuarheraspti indeni ambe jimbo. Tátsekua, Sara íntskuspti Abraanini imeri jántspirini Agarini para imeri témbeni. Ka ísïksï úpirindia sapiichani kánguarhiani Agarini jimbo. Peru enga Agari mítepka eska Ismaelini kánguarhipiringuia, uénaspti kánikua no sési kámani Sarani. Niárasptiksï xáni no sési pájperani enga jamberi Sara úpka eska Agari máteru nanisï nipiringa irekani (Gén. 16:1-6).

10. ¿Ambe nitamakuarhispi Ismaeli ka Isaaki enga úpiringa úni eska Abraani úkua jukanchapiringa mintsikani Jeobani?

¹⁰ Tátsekua, Sara kánguarhispti tataka sapichuni ma ka Abraani arhiraspti Isaaki. Abraani xénchaasïrendi imeri sapiichani, Ismaelini ka Isaakini. Peru jimboka Ismaeli no sési kámaspka Isaakini, Abraani chúntaspti imani ka Agarini (Gén. 21:9-14). Uánikua uéxurhini tátsekua, Jeoba arhispti Abraanini eska kéjtsïtapiringa Isaakini para ima (Gén. 22:1, 2; Ebr. 11:17-19). Ini tsimani xanhari, Abraani jatsispti para mintsikani eska Jeoba kumpliripiringa ambe enga aiakupka imeri sapiicheri ambe.

11. ¿Andisï Abraani jatsipi para tekaantskua jingoni erokuarhini astaka Jeoba úpiringa ambe ma?

¹¹ Iámu ini tiempu jimbo, Abraani tekaantskua jingoni erokuarhispti eska Jeoba úpiringa ambe ma. Jamberi ima jukari 70 uéxurhini jatiriptia enga uéakupka Uri imeri familia jingoni (Gén. 11:31–12:4). Ka ma sieni uéxurhinisï, irekaspti kʼumanchikuecha jimbo engaksï takusïripka o sïkuiriri ka iápuru Kanaani ísï jámaspti. Uarhispti enga 175 uéxurhini jatiripka (Gén. 25:7). Peru no exespti enga Jeoba íntsaapka imeri uájpechani imani echeri nani enga ísï ima jámapka, ísï eska na aiakupka. Ístu, no exespti imani iretani enga ima erokani japka, Tata Diosïri Reinu. Peru nájkiruka ísï úkuarhipka, Biblia uandasïndi eska uarhispka kánikua sési pʼikuarheraparini imeri irekua jimbo (Gén. 25:8). Nájkiruka uánikua uandanhiatechani jatsiapka, méntkisï kánikua mintsikaspti Jeobani ka eratsetixapti erokuarhini astaka Jeoba úpiringa ambe ma. ¿Néna úspi tekaantani? Jimboka Jeoba méntkisï kuájchakuspka ka ambakiti pájperakuaksï ma jatsispti tsimarhani (Gén. 15:1; Is. 41:8; Sant. 2:22, 23).

12. a) ¿Ambechi erokuarhixaki Tata Diosïri marhuaricha? b) ¿Ambechi exea iáiasï?

 ¹² Májkueni eska Abraani, juchajtuchi erokuarhixaka iretani enga sési uaxastakata jaka. Ísïsti, juchachi no erokuarhixaka eska i ireta uénaakia jarhani jimboka Tata Diosïri Reinu uaxastanhaskia 1914 jimbo ka iámu auandarhu juramuxatia (Jaŋ. 12:7-10). Peru ambe engachi kʼóru erokuarhini jaka jindesti eska uénaakia iámu Echerirhu juramuni. Enga Jamberi niáraaka ima jurhiatikua, jatsiskachi para orhepani uérakuani xárhati uandanhiatechani engaksï Abraani ka Sara nitamakuarhiapka. Ini jurhiatikuecha jimbo, uánikua Jeobaeri marhuarichaksï májkueni úxati eska Abraani. Rebistarhu Aianhpiri, jarhastiksï uánikua erachicheri eksperiensiauecha engaksï niáraka xarhatani jakajkukua ka tekaantskua májkueni eska Abraani ka imeri témba. Ju je ménderu exeani máru eksperiensiauechani ka exeakachi ambe engachi uáka jorhenguarhini.

13. ¿Ambejtsï jorhenguarhisïni cha, erachi Billiri eksperiensia jingoni?

¹³ Ju je jurajkuni máru ambe parachi Jeobani marhuakuni. Engachi uéjka orheta peerani Tata Diosïri iretani o Reinuni, jatsiskachi para ísïni eska Abraani ka jurajkuni máru ambe para Tata Diosïni jaiapanherantani (Mat. 6:33; Mar. 10:28-30). Ju je exeni ejemplu erachiri Bill Walden. * Uéxurhini 1942, erachi Bill kʼamarapirindia karrera ma jini Estados Unidos enga uénapka Bibliaeri ambe jorhenguarhini Jeobaeri testiguecha jingoni. Imeri maestru ma, ánchikuarhita ma jirinhakuspti para jiáni enga uéntapiringuia unibersidadirhu, peru Bill no jiókuarhispti. Uandaspti eska erakuspka sánderu marhuakuni Tata Diosïni ka eska ánchikuarhita ma jatsini enga kánikua tumina andapiringa. Sánisï tátsekua, gobiernu arhispti eska soldaduecha jingoni úkuarhipiringa. Peru ima janhanharhikua jingoni uandaspti eska no nipiringa ka 10,000 dolariksï euaspti ka arhisptiksï eska sinku uéxurhini ónhakata japiringa. Peru solu tanimu uéxurhintku ónhakata jarhaspti. Tátsekua pʼímarhispti para Galaadiri Jorhentperakuarhu nirani ka África axanhaspti komu misioneru. Bill tembuchaspti Eva jingoni ka márkuksï marhuaspti  jini África nani engaksï uánikua ambe jatsipka para úni. Ísï ióni jimbo, kʼuanhatsentasptiksï Estados Unidos paraksï Billiri amambani kuidarini. Enga miántajka iámu ambe enga nitamakuarhika, Bill uandasïndi: “Uenhenchasïnga engani eratsejka eska kʼéri kóntperata máeska Jeobani marhuakuni jukari setenta uéxurhini jimbo. Someni grasiasi íntskuntasïnga Jeobani engarini jurajkuka kʼamakʼamasï marhuakuni”. ¿Úpirintsï chájtu úrani chári tsípikuani parajtsï kʼamakʼamasï marhuakuni Jeobani?

14, 15. ¿Ambeksïni jorhendasïni erachi ka pirenchi Apostolidisiri eksperiensia?

¹⁴ Ju je no eratseni eskachi no méni jatsiauaka uandanhiatechani. Abraaniri ejemplujtsïni jorhendasïndi eska asta imechaksï jatsiasïnga uandanhiatechani engaksï kʼamakʼamasï marhuakujka Jeobani (Sant. 1:2; 1 Ped. 5:9). Inde ambesï nitamakuarhipti erachi Aristotelis Apostolidis. * Grecia itsï atakuarhispti 1946 jimbo. Ka 1952 jimbo, arhispti Elenini para imeri témbeni, tsimarhanksï uékasïrendi kʼamakʼamasï marhuakuni Jeobani. Peru Eleni pʼamenchaspti ka doktorichaksï tumori ma exekuntaspti éjpurhu. Operarisptiksï, peru ísï no ióni jimbo engaksï na tembuperapkia, tumori ménderu xarhantaspti. Ménderuksï operarispti peru nóteru úsptia xáni sési manakuarhini ka kánikua úkua jukanchasïrendi uandani. Nájkiruka pʼamenchani japka ka ístu imani jurhiatikuecha jimbo juramutichaksï no sési kaani Testiguechani, Eleni no méni jurajkuspti tsípikua jingoni aianhpini.

¹⁵ Aristotelis treinta uéxurhini kuidarispti imeri témbani. Iámu imani tiempu jimbo, Aristotelis orhejtsïkutispti, grupurhu ma jarhaspti enga kʼéri tánguarhikuecheri ambe exenga ka jarhuajpispti Kʼumanchikua ma úni para Kʼéri tánguarhikuecha. Tátsekua, 1987, Eleni no sési úkuarhinchaspti enga aianhpini jámani japka. Tanimu uéxurhini, ísï jarhaspti enajki uarhirini japi ka tátsekua uarhisptia. Aristotelis arini ambe uandantaspti imeri ambe: “Iámu ini tiempu jimbo, niáraska úkua jukanchani, kʼéri uandanhiata ambe jatsini ka imani ambe engani no erokuarhienga peru i ambe úspti eskani jánguarhintapiringa orhepani uérani ka no méni kuatantani. Nájkirukani iámu ini ambe nitamakuarhika, Jeobarini méntkisï íntskusti uinhapikua parani úni orhepani uérani”  (Sal. 94:18, 19). Ísïsti, Jeoba kánikua xénchaasïndi imechani engaksï jánguarhintajka marhuakuni nájkirukaksï uandanhiatechani jatsiauaka.

16. ¿Náki ambakiti konseju íntskuspi erachi Knorr imeri témbani?

¹⁶ Ju je méntkisï eratseni ambe enga úkuarhiaka sánderu orhepani. Jimboka Abraani méntkisï miásïrenga na enga Jeoba újchakurapiringa sánderu orhepani, úspti tekaantani uandanhiatechani enga jatsiapka. Pirenchi Audrey Hyde jánguarhintaspti méntkisï miáni ambe enga Tata Diosï aiatspeka nájkiruka imeri orheta acheeti, Nathan Knorr, kanseri jimbo uarhipka ka tátsekua máteru imeri acheeti, Glenn Hyde, niárapka Alzheimer pʼamenchani. * Pirenchi uandantasïndi eska kánikua jarhuataspka ambe enga erachi Knorr arhipka máru semana ante de uarhini. Erachi arhispti: “Engachi na uarhijka, seguruesïndia eskachi intsïnhaaka ambe engachi erokuarhini jaka, ka nóteruchi méni no sési pʼikuarheraakia”. Tátsekua ístu arhispti: “Méntkisï miá ambe engari erokuarhini jaka sánderu orhepani, jimboka ima jindeska chíti kóntperata”. Ka ístu uandaspti: “Méntkisï úni ja ambe ma, méntkisï jánguarhinta jarhuataani máteruechani. Inde ambekini jarhuataati parani tekaantani”. Ambakiti konseju máesti para méntkisï ambakiti ambe úni máteruechani jimbo ka tsípikua jingonchi irekani imani ambe jimbo engachi erokuarhini jaka (Rom. 12:12).

17. a) ¿Andichisï jatsi para miáni jarhani ambe engachi erokuarhini jaka? b) ¿Nénajtsïni jarhuataa Miqueas 7:7 parachi sánderu orhepani úni jatsiani kóntperatechani?

¹⁷ Iásï, sánderuchi uétarhisïnga miáni ambe engachi erokuarhini jaka. Ambe enga parhakpinirhu úkuarhini jaka xarhatasïndi eskachi imani jurhiatikuechani jimbo irekaxaka engaksï kʼamakurhiakia i parhakpiniri últimu jurhiatikuecha. No ióni jimbo, ima ireta enga sési uaxastakata jaka uénaatia juramuni iámu Echerirhu. Uánikua kóntperatechanchi jatsiauaka ka ma jindesti eskachi exeantauaka imechani engachi uarhiranchaaka. Jimajkani, Jeoba kóndintaati Abraanini imeri jakajkukua ka tekaantskua jimbo enga tsítantaaka imani ka imeri familiani ixú Echerirhu. ¿Cha jima jauaka parajtsï eroantani? Uákajtsï jima jarhani engajtsï, májkueni eska Abraani, jurajkuska máru ambe parajtsï orheta peerani Tata Diosïri Reinuni, engajtsï méntkisï mintsikaska Jeobani nájkirukajtsï uandanhiatechani jatsiauaka ka engajtsï tekaantskua jingoni erokuarhiska astaka Jeoba uáka ambe ma (arhinta je Miqueas 7:7).