1. Baingi beferiize bintu ki, kandi habwaki babyeferiize?

OBUKAIKURU n’obukaikuru bw’abaheereza ba Ruhanga kasumi kanu beferiize ebintu bingi. Ab’oruganda na banyaanya itwe baingi bacwiremu kutataaha obuswere. Abakristaayo abamu abali omu buswere bacwiremu kutazaara abaana hati. Kandi amaka g’Abakristaayo baingi gacwiremu kutakanyisa itungo. Ensonga enkuru habwaki Abakristaayo banu boona beferiize ebintu binu, eri ngu nibagonza kuheereza Yahwe bataine ekirukubahugura. Bamarwa ebintu ebibaine kandi besiga ngu Yahwe naija kubaha ebintu byona ebibarukwetaaga. Tugambe ngu nibaija kweijukya? Nangwa! Habwaki nitugamba tuti? Ensonga ey’okubanza eri ngu Yahwe akaha Iburahimu emigisa, ‘isenkuru boona abanyakuikiriza.’​—Bar. 4:11.

2. (a) Kusigikirra ha Abaheburaniya 11:8-10, 16, habwaki Iburahimu yaikirize kuruga Uru? (b) Kiki ekiturukwija kubazaaho omu kicweka kinu?

² Iburahimu akaikiriza kuruga omu nyikara enungi ey’akaba arumu omu rubuga rwa Uru. Habwaki? Habwokuba akaba alindiriire “orubuga oru orunyakuyina emiganda [rundi emisingi yonyini].” (Soma Abaheburaniya 11:8-10, 16.) “Orubuga” oru niruha? Bizibu ki Iburahimu ebiyarabiremu obwakaba alindiriire orubuga oru kwombekwa? Kandi nitusobora tuta kwegera ha kyokurorraho kya Iburahimu hamu n’abandi abahondiire ekyokurorraho kye omu kasumi kanu? Ekicweka kinu nikiija kutukonyera kutunga eby’okugarukamu eby’ebikaguzo binu.

3. Rubuga ki Iburahimu akaba alindiriire?

³ Orubuga Iburahimu akaba alindiriire nubwo Obukama bwa Ruhanga. Yesu Kristo nuwe Mukama ow’Obukama bunu. Kandi abaseserweho amagita 144,000 nubo barukwija kulema hamu  na uwe. Paulo ayeta Obukama bunu “orubuga rwa Ruhanga omwomezi, Yerusalemu orwomu iguru.” (Baheb. 12:22; Kus. 20:4,6; 14:1) Yesu akegesa abegeswa be kusaba Obukama obu kwija nukwo Ruhanga eby’agonza bikorwe omu nsi nk’oku bikorwa omu iguru.​—Mat. 6:10.

4. Kusigikirra ha Okubanza 17:1, 2, 6, biki Iburahimu eby’akaba amanyire hali orubuga, rundi Obukama Ruhanga akaba araganiize?

⁴ Iburahimu akaba amanyire omulingo Obukama bwa Ruhanga bwali nibugenda kutekanizibwamu? Nangwa. Kumara akasumi kaingi ensonga enu ekaba eri “ensita [erukwera].” (Bef. 1:8-10; Bak. 1:26, 27) Baitu Iburahimu akaba akimanyire ngu abamu h’abaijukuru be bakaba nibagenda kufooka bakama habwokuba Yahwe akaba akimuraganiize. (Soma Okubanza 17:1, 2, 6.) Iburahimu akaba aine okwikiriza okw’amaani omu mirago ya Ruhanga kandi haluwe kikasisana oti rundi narora ow’aseserweho amagita rundi Masiya ow’akaba nagenda kufooka Omukama w’Obukama bwa Ruhanga. Enu niyo ensonga habwaki Yesu yagambiire Abayudaaya ab’omu kasumi ke ati: “Iburahimu isenkuru inywe akasemererwa okurora ekiro kyange; kandi akakirora nasemererwa.” (Yoh. 8:56) Hataroho kugurukyagurukya, Iburahimu akaba akimanyire ngu abamu h’abaijukuru be bakaba nibagenda kufooka kicweka ky’Obukama Yahwe akaba nagenda kutandikaho, kandi akaba ayetekaniize kulindirra akasumi Yahwe alihikirizaamu omurago ogu.

5. Nitumanya tuta ngu Iburahimu akaba alindiriire orubuga Ruhanga oruyateriire pulaani?

⁵ Iburahimu akooleka ata ngu alindiriire orubuga rundi Obukama Ruhanga obuyateriire pulaani? Eky’okubanza, Iburahimu atafooke mutaka omu bukama bwona omu nsi. Ataikale omu kiikaro kimu kandi atasagike obukama bwona obw’abantu. Ekindi, Iburahimu atalengeho kwekorra obukama obwe. Baitu akaikara nayorobera Yahwe, kandi yamulindirra kuhikiriza omurago Gwe. Habw’okukora eki, Iburahimu akooleka ngu aine okwikiriza okw’embaganiza muno. Leka tubazeeho ebizibu ebimu ebiyarabiremu kandi turole ekitusobora kwegera ha kyokurorraho kye.

6. Uru rukaba rubuga rwa mulingo ki?

⁶ Orubuga Iburahimu yarugiremu rukaba rwine obulinzi, rurumu ebintu arukwetaaga, kandi n’abantu abaikaramuga bakaba basomere kandi baguuda. Orubuga oru rwali rwetoroirwe  ekisiika eky’amaani hamu n’amaizi ha mbaju isatu, agarukugera kandi agahamire muno. Abantu ba Uru bakaba bakugu omu kuhandiika n’okubara. Kandi nikizooka ngu abantu baingi basuburraga omu rubuga runu habwokuba abarukuseruliiriza bakasanga ebihandiiko by’obusubuzi bingi omu kiikaro nambere orubuga runu rukaba ruli. Amaju abantu bararamuga gaali g’amatafaali, ebisiika bitiirwe pulasita, kandi bisiigirwe erangi erukwera. Gamu h’amaju ganu gaali gaine ebisiika 13 rundi 14 kandi ezigati zaago zikaba zombekerwe n’amabaale.

7. Habwaki Iburahimu akaba aine kwesiga ngu Yahwe naija kumulinda hamu n’eka ye?

⁷ Iburahimu akaba aine kwesiga ngu Yahwe naija kumulinda hamu n’eka ye. Habwaki? Oijuke ngu Iburahimu na Sara bakaruga omu ka yabo enungi omu rubuga rwa Uru kandi batandika kwikara omu heema omu bwerre bwa Kanaani. Hati Iburahimu n’eka ye bakaba batakyaine obulinzi obw’ebisiika eby’amaani hamu n’amaizi. Kandi n’abanyanzigwa baali nibasobora kubatahirra bwangu habwokuba bakaba batakyaine bulinzi.

8. Kiki ekyahikireho Iburahimu?

⁸ Iburahimu nobworaaba akaba n’akora Ruhanga eby’agonza, haroho obuyabuzirwe eby’okulya eby’okuliisa eka ye. Akaba aine kugumira enjara eyagwire omu nsi ya Kanaani. Enjara egi akaba y’amaani muno yaletera Iburahimu kutwara eka ye omu ihanga lya Misiri habw’akaire kake. Baitu obw’akaba ali Misiri, Faraho omwebembezi w’ihanga eri akamwihaho mukazi we. Tekerezaaho okweralikirra Iburahimu yatungire Yahwe obwakaba atakaletiire Faraho kumugarurra mukazi we Sara.​—Kub. 12:10-19.

9. Bizibu ki Iburahimu yatungire omu ka ye?

⁹ Iburahimu akatunga n’ebizibu by’amaani omu ka ye. Mukazi we Sara ouyagonzaaga muno akaba ali ngumba. Kumara emyaka nyingi, baketuntura muno habw’ekizibu kinu. Obwire bukahika, Sara yaha Iburahimu omuzaana we Hagara nukwo abazarre abaana. Baitu Hagara obuyatwaire enda, akatandika kurabyamu Sara amaiso. Enyikara ekeyongera kuguma Sara yahika n’okubinga Hagara omu ka.​—Kub. 16:1-6.

10. Kiki ekyahikire hali Isameri na Isaka, ekyalengere okwikiriza kwa Iburahimu?

¹⁰ Hakumalirra Sara akatwara enda yazarra Iburahimu omwana omwojo kandi Iburahimu akamuruka Isaka. Iburahimu yagonzaaga batabani be boona, Isameri na Isaka. Baitu Isameri akatwaza kubi Isaka ekyaletiire Yahwe kugambira Iburahimu kuragira Isameri na Hagara kuruga omu ka. (Kub. 21:9-14) Hanyuma y’emyaka nyingi kurabaho, Yahwe akasaba Iburahimu kuhayo omwana we Isaka nk’ekihongwa. (Kub. 22:1, 2; Baheb. 11:17-19) Omu nyikara zinu ibiri, Iburahimu akaba aine kwesiga ngu Yahwe naija kuhikiriza emirago ye erukukwata ha batabani be.

11. Habwaki Iburahimu akaba aine kulindirra Yahwe aine okugumiisiriza?

¹¹ Omu bwomeezi bwe bwona, Iburahimu akaba aine kwega kugumiisiriza omu kulindirra Yahwe. Nikizooka ngu nambere yarugiire Uru n’eka ye, akaba ahingwize emyaka 70. (Kub. 11:31–12:4) Kumara nk’emyaka 100, akaikara omu heema omu bicweka ebirukwahukana omu nsi ya Kanaani. Iburahimu akafa aine emyaka 175. (Kub. 25:7) Baitu atarole Yahwe nahikiriza omurago Gwe ogw’okuha baijukuru be ensi eya Kanaani. Akalindwa yafa atakarozere orubuga, rundi Obukama bwa Ruhanga butandikirweho. Eki n’obukiraaba nukwo kyabaire, Iburahimu akafa ali “mugurusi, kandi nahurra amazirwe.” (Kub. 25:8, NW) N’obukiraaba ngu Iburahimu akaraba omu bizibu bingi, akaikara aine okwikiriza okugumire kandi alindiriire Yahwe aine okusemererwa. Habwaki yasoboire kugumiisiriza? Habwokuba omu bwomeezi bwe bwona Yahwe akamulinda kandi yamutwaza nk’enganjani ye.​—Kub. 15:1; Is. 41:8; Yak. 2:22, 23.

12. Kiki ekitulindiriire, kandi ekiturukugenda kubazaaho?

¹² Nka Iburahimu, tulindiriire orubuga orwine emisingi yonyini. Baitu itwe titukulinda  rwombekwe, habwokuba omu 1914 Obukama bwa Ruhanga bukatandikwaho kandi hati nubwo bwonka burukulema omu iguru. (Kus. 12:7-10) Baitu hati tulindiriire butandike n’okulema ensi. Omu kulindirra kunu, haroho enyikara nyingi ezirukusisana n’eza Iburahimu na Sara barabiremu ezitusemeriire kugumira. Abaheereza ba Yahwe omu kasumi kanu basoboire kwegera ha kyokurorraho ekya Iburahimu. Ebyafaayo eby’ab’oruganda na banyaanya itwe ebiturukira omu Omunaara gw’Omulinzi nibyoleka ngu Abakristaayo baingi omu kasumi kanu baine okwikiriza kandi nibagumiisiriza nka Iburahimu na Sara. Katubazeeho abamu kandi turole ekitusobora kubegeraho.

13. Ekyokurorraho eky’Ow’oruganda Walden nikikwegesa ki?

¹³ Ikara oyetekaniize kwefeereza. Obuturaaba nitugonza kwebembeza orubuga rwa Ruhanga rundi Obukama bwe omu bwomeezi bwaitu, tusemeriire kuba nka Iburahimu ayaikiriize kwefeereza ebintu ebimu kusobora kusemeza Ruhanga. (Mat. 6:33; Mar. 10:28-30) Tekerezaaho ekyokurorraho eky’ow’oruganda arukwetwa Bill Walden. * Omu 1942, Bill akatandika kwega Baibuli n’Abakaiso ba Yahwe, obwakaba ali ha yunivasite omu Amerika kandi akaba ali haihi kumalirra emisomo ye ey’okufooka inginiya ow’okuteera pulaani ez’ebyombeko. Omu h’abapurofesa ba Bill akaba amukoliire entekaniza ey’okutunga omulimo hanyuma y’okumalirra emisomo ye, baitu Bill akanga. Akamusoborra ngu akaba acwiremu kuheereza Ruhanga omu bwijwire omu kiikaro ky’okutunga omulimo ogurukusasura sente nyingi. Hakarabaho akaire kake, gavumenti yaragira Bill kutaaha amahe. Omu mulingo ogw’okwebundaaza akanga, kandi habw’ensonga egi bakamuteera faini eya doola 10,000 kandi bamucwera emyaka etaano omu nkomo. Bakamulekera hanyuma y’emyaka esatu. Akagenda omu isomero lya Gilead kandi yaheereza nk’omumisani omu Afrika. Hanyuma Bill akaswera Eva, kandi baheereza hamu omu Afrika ekintu ekyali nikibetaagisa kwefeereza ebintu ebimu. Hanyuma y’akasumi, bakagaruka omu Amerika kurolerra nyina Bill. Omu bugufu, Bill nabazaaho ebiyarabiremu omu  bwomeezi bwe ati: “Amaziga ganyija omu maiso obuntekerezaaho omugisa ogw’amaani Yahwe y’ampaire ogw’okumuheereza kumara emyaka erukuhingura omu 70. Nkira kumusiima muno habw’okunkonyera kukozesa obwomeezi bwange kumuheereza.” Naiwe nosobora kwebembeza obuheereza obw’akasumi koona omu bwomeezi bwawe?

14-15. Ekyokurorraho eky’Ow’oruganda Apostolidis na mukazi we nikikwegesa ki?

¹⁴ Otatekereza ngu obwomeezi bwawe tiburukwija kubamu ebizibu. Ekyokurorraho kya Iburahimu nikitwegesa ngu naabo abehayo kukozesa obwomeezi bwabo bwona kuheereza Yahwe nabo baine kugumira ebizibu. (Yak. 1:2; 1 Pet. 5:9) Kinu nitukirorra ha kyokurorraho eky’Ow’oruganda Aristotelis Apostolidis. * Akabatizibwa omu 1946 omu Greece kandi omu 1952 akajumbira munyaanya itwe arukwetwa Eleni, ow’akaba aine ebigendererwa nk’ebye. Baitu Eleni akarwara kandi obu bamukebiire bakasanga aine ekizimba omu bwongo. Ekizimba kinu bakakimwihamu, baitu hanyuma y’emyaka nke bamazire kutaaha obuswere, akatunga ekizimba kindi omu bwongo. Badakitaali bakongera bamusemeza baitu akasarara ebicweka ebimu kandi yaleka kubaza kurungi. N’obwaraaba akaba arwaire kandi na gavumenti ekaba etangire omulimo ogw’Abakaiso ba Yahwe omu kasumi ako, akaikara ali mutebezi omwekambi.

¹⁵ Aristotelis akamara emyaka 30 najanjaba mukazi we. Omu kasumi ako akaba naheereza nk’omugurusi w’ekitebe, naheereza ha butebe obw’ensorrokano enkooto, kandi akakonyera n’omu kwombeka Ekyombeko eky’Ensorrokano Enkooto. Hanyuma, omu 1987, Eleni akatunga butandwa obw’akaba n’atebeza. Akamara emyaka esatu akabire kandi hanyuma yafa. Omu bigufu Aristotelis n’abazaaho ebiyarabiremu ati: “Kumara emyaka nyingi, ntungire ebizibu bingi, kandi ebimu bikagwaho bugwaho ntarukubinihira. Nahabweki nkaba nyine kucweramu kimu kubigumira kandi n’okutaikiriza ekintu kyona kumaramu amaani. Baitu, Yahwe aikaire nampa amaani agandukwetaaga kusobora kuraba omu bizibu binu.” (Zab. 94:18, 19) Mali Yahwe n’agonza muno abaheereza be abarukukora kyona ekirukusoboka kumuheereza n’obukiraaba ngu baine ebizibu.

16. Buhabuzi ki oburungi Ow’oruganda Knorr yahaire mukazi we?

 ¹⁶ Teeka omutima ha busumi obw’omu maiso. Iburahimu akateeka omutima gwe ha migisa Yahwe akaba n’agenda kumuha omu busumi obw’omu maiso, kandi kinu kikamukonyera kugumira ebizibu bye. Munyaanya itwe Audrey Hyde akalengaho kwikara aine okunihira, n’obukiraaba ngu musaija we ow’okubanza Nathan H. Knorr akaitwa kansa, kandi musaija we owakabiri Glenn Hyde, akarwara oburwaire obwa Alzheimer obw’amuletiire kwebwa ekihinguraine. * Munyaanya itwe nagamba ngu akakonyerwa ebigambo Ow’oruganda Knorr yamugambiire omu wiiki nke obw’akaba atakafiire. Nagamba ati: “Nathan akangambira ati: ‘Hanyuma y’okufa busaho kintu kyona ekisobora kutwihaho okunihira okutwine, kandi titulyongera kubonabona.’ Akamutererra ati: ‘Ikara norora omu maiso, habwokuba empeera yaawe nuho eri.’ Kandi akongeraho ati: ‘Ikara oine bingi eby’okukora kandi lengaho kukozesa obwomeezi bwawe kukonyera abandi. Kinu nikiija kukukonyera kutunga okusemererwa.’” Mali kitukonyera muno obutwekamba kukorra abandi ebirungi kandi ‘n’okusemerererwa omu kunihira’!​—Bar. 12:12.

17. (a) Nsonga ki enungi ezisemeriire kutuletera kuteeka omutima ha busumi obw’omu maiso? (b) Habwaki kuhondera amagezi agali omu Mika 7:7 nigaija kutukonyera kutunga emigisa omu kasumi ak’omu maiso?

¹⁷ Omu kasumi kanu, twine ensonga nyingi ezisemeriire kutuleetera kuteeka omutima gwaitu ha busumi obw’omu maiso. Ebintu ebirukubaho omu nsi kasumi kanu nibyolekera kimu ngu tuli omu biro eby’okumalirra eby’ebiro ebyaha mpero. Omu kasumi akatali kahara Obukama bwa Ruhanga nibwija kutandika kulema ensi yoona. Kimu ha bintu ebirituletera okusemererwa nukwo kurora abagonzebwa baitu nibahumbuuka. Omu kasumi ako, Yahwe naija kuha Iburahimu empeera habw’okwikiriza hamu n’okugumiisiriza kwe, kuraba omu kumuhumbuura n’eka ye kugaruka hanu omu nsi. Orabayo nukwo osobole kubatangirra? Noija kubayo, kakuba nka Iburahimu oyefereeza ebintu ebimu habw’Obukama bwa Ruhanga, oikara oine okwikiriza n’obworaaba oine ebizibu kandi n’obw’orayega kulindirra Yahwe oine okugumiisiriza.​—Soma Mika 7:7.