1. Eaha te mau haapaeraa ta te mau tavini a Iehova i rave e no te aha?

 I TEIE mahana e rave rahi tavini a Iehova tei rave i te mau haapaeraa. Ua maiti vetahi mau taeae e tuahine i te ore e faaipoipo, i te ore e fanau i te tamarii e i te ore e titau rahi i te moni aore ra i te taoˈa. Eaha te tumu? No to ratou hinaaro e tavini hope roa ia Iehova. Te mauruuru nei teie mau taeae e tuahine i to ratou oraraa ma te tiaturi atoa e horoa mai Iehova i te mau mea atoa ta ratou e hinaaro mau. Ua tano anei ratou i te tiai, aore ra i te tiaturi, ia Iehova? E! Ua haamaitai Iehova i ta ˈna mau tavini i tahito mai ia Aberahama, te “metua no te feia atoa i faatupu i te faaroo.” E na reira atoa ïa oia no teie mau taeae e tuahine.—Roma 4:11.

2. (1) Ia au i te Hebera 11:8-10, 16, no te aha Aberahama i faarue ai i te oire o Ura? (2) Eaha ta tatou e hiˈopoa i roto i teie tumu parau haapiiraa?

² Ua ineine Aberahama i te faarue i to ˈna oraraa fanaˈo i te oire o Ura. No te aha? No te mea ua tiai oia i “te oire e niu mau to te reira.” (A taio i te Hebera 11:8-10, 16.) Eaha tera “oire”? Eaha te mau fifi ta Aberahama i faaruru a tiai ai oia ia patuhia tera oire? E e nafea tatou e riro ai mai ia Aberahama e te feia e pee nei i to ˈna hiˈoraa i teie mahana?

3. Eaha te oire ta Aberahama i tiai na?

³ Te oire ta Aberahama i tiai na, o te Faatereraa arii ïa ta te Atua i tuu i roto i te rima o Iesu Mesia e na 144 000 Kerisetiano faatavaihia. Ua faahiti Paulo i te Faatereraa arii  mai “te oire o te Atua ora, te Ierusalema i te raˈi.” (Heb. 12:22; Apo. 5:8-10; 14:1) Ua haapii Iesu i ta ˈna mau pǐpǐ ia ani na roto i te pure ia tae mai tera Faatereraa arii no te faatupu i te hinaaro o te Atua i te fenua nei, mai i te raˈi atoa na.—Mat. 6:10.

4. Ia au i te Genese 17:1, 2, 6, eaha ta Aberahama i ite no nia i te oire ta te Atua i fafau?

⁴ Ua ite anei Aberahama i te faanahoraa o te oire, aore ra Faatereraa arii a te Atua? Aita! E rave rahi matahiti, ua riro noa te reira ei “parau huna moˈa.” (Eph. 1:8-10; Kol. 1:26, 27) Ua ite râ Aberahama e riro mai vetahi o to ˈna huaai ei arii no te mea na te Atua iho i faaite ia ˈna. (A taio i te Genese 17:1, 2, 6.) Ua tiaturi papu Aberahama i te mau parau fafau a te Atua mai te huru ra te ite ra oia i te Mesia ia riro mai ei arii no te Faatereraa arii a te Atua. No reira Iesu i nehenehe ai e parau i te mau ati Iuda i to ˈna tau: “Ua oaoa roa Aberahama to outou metua i te tiaturiraa e ite i to ˈu mahana. Ua ite oia e ua oaoa.” (Ioa. 8:56) Ua ite ïa Aberahama e ô vetahi o to ˈna huaai i roto i te Faatereraa arii haamauhia e Iehova, e ua tiai maite oia ia faatupu Iehova i tera parau fafau.

5. Mea nafea tatou i te iteraa ua tiai Aberahama i te oire fafauhia e te Atua?

⁵ Mea nafea Aberahama i te faaiteraa ua tiai oia i te oire, aore ra Faatereraa arii, fafauhia e te Atua? Na mua roa, aita Aberahama i turu noa ˈˈe i te tahi faatereraa i te fenua nei. Ua taui noa oia i te vahi, aita roa i faatia i te hoê nohoraa tamau no ˈna e aita atoa i turu i te tahi faatereraa taata. Hau atu â, aita Aberahama i tamata i te haamau i ta ˈna iho faatereraa. Ua auraro oia ia Iehova e ua tiai noa ia tupu ta ˈna i fafau. Ua faaite mau Aberahama i te faaroo puai ia Iehova. E hiˈopoa anaˈe te tahi mau fifi ta ˈna i faaruru e e nafea tatou ia pee i to ˈna hiˈoraa.

6. Mai te aha te huru o te oire o Ura?

⁶ E oire paruru-maitai-hia e te naho ta Aberahama i faarue. E patu rahi e e pape te haaati ra ia Ura. Mea aravihi te feia no  ǒ i te papai e te numera, e e au ra e oire tapihoo atoa. E rave rahi parau faaau ta te mau ihipǎpǎ i ite i reira. I Ura, ua hamanihia te mau fare i te ofai araea e ua paraihia te mau pǎpai i te puˈa. E 13 aore ra 14 piha to te tahi mau fare e ua apapahia te reira ati aˈe i te hoê aua faanehenehehia i te ofai.

7. No te aha i titauhia ˈi ia Aberahama ia tiaturi ia Iehova no te paruru ia ˈna e i to ˈna utuafare?

⁷ Ua titauhia ia tiaturi Aberahama ia Iehova no te paruru ia ˈna e i to ˈna utuafare. I matau na hoi raua Sara i te ora i roto i te hoê oire paruru-maitai-hia e te naho, i teie nei râ, te ora ra oia i raro aˈe i te fare ie na te tuhaa fenua o Kanaana. Aita e patu rahi e e pape faahou no te paruru i to ˈna utuafare, e nehenehe noa te enemi e hamani ino ia ratou!

8. I te hoê taime, eaha te fifi ta Aberahama i farerei?

⁸ Ua rave Aberahama i te hinaaro o te Atua, i te hoê râ taime, ua ere o ˈna e to ˈna utuafare i te maa. Ua tupu te oˈe i te fenua ta Iehova i faaue ia ˈna ia haere. E oˈe rahi mau i faaoti ai Aberahama e haere i Aiphiti no te hoê taime poto. A ora ˈi râ ratou i tera fenua, ua ani Pharao ia afaihia te vahine a Aberahama i to ˈna fare. Auê paha Aberahama i te peapea! Auaa râ Iehova, faahoˈi atura Pharao i te vahine a Aberahama.—Gen. 12:10-19.

9. Eaha te fifi tei tupu i roto i te oraraa utuafare o Aberahama?

⁹ E rave rau atoa fifi tei tupu i roto i te oraraa utuafare o Aberahama. Aita ta ˈna vahine here o Sara i nehenehe e fanau i te tamarii. E rave rahi matahiti raua i te otoraa no te reira. I muri mai, ua horoa Sara i ta ˈna tavini vahine o Hagara ia Aberahama ia fanau mai oia i te tamarii na raua. I to Hagara râ hapûraa ia Isemaela, haamata ˈtura oia i te faahaehaa ia Sara. Ua ino roa mai te tupuraa, tiahi atura Sara ia Hagara.—Gen. 16:1-6.

10. Eaha na tupuraa tei tamata i te faaroo o Aberahama?

¹⁰ I te pae hopea, hapû mai nei Sara e fanau maira ta raua tamaiti o Isaaka. Mea here na Aberahama i ta ˈna na tamaiti o Isemaela e o Isaaka. No te ino râ o Isemaela i nia ia Isaaka, ua titauhia ia tiavaru Aberahama ia ˈna e to ˈna mama. (Gen. 21:9-14) I muri aˈe, ua ani Iehova ia Aberahama ia pûpû ia Isaaka ei tusia. (Gen. 22:1, 2; Heb. 11:17-19) I roto teie na tupuraa e piti, ua titauhia ia tiaturi Aberahama e aupuru iho â Iehova i ta ˈna na tamaiti.

11. No te aha i titauhia ia tiai maite Aberahama ia Iehova?

¹¹ I te roaraa o te mau matahiti, ua titauhia ia haapii Aberahama i te tiai maite ia Iehova. I to ratou faarueraa ia Ura, e au ra ua hau atu i te 70 matahiti to Aberahama. (Gen. 11:31–12:4) I ora na oia i raro aˈe i te fare ie na te tuhaa fenua o Kanaana hau atu i te hanere matahiti. E 175 matahiti to Aberahama i to ˈna poheraa. (Gen. 25:7) Aita râ oia i ite i te tupuraa o ta Iehova parau fafau e horoa i te fenua tǎpǔhia i to ˈna huaai. Ua pohe ê na Aberahama hou te Faatereraa arii a te Atua a haamauhia ˈi. Noa ˈtu râ, ua mauruuru oia i to ˈna oraraa. (Gen. 25:8) Noa ˈtu te mau fifi, ua faatupu noa Aberahama i te faaroo puai e ua oaoa atoa i te tiai ia Iehova. Maoti te aha i faaoromai tamau ai oia? Maoti ïa te Atua, ua paruru e ua here hoi Iehova i to ˈna hoa ra ia Aberahama.—Gen. 15:1; Isa. 41:8; Iak. 2:22, 23.

12. Eaha ta tatou e tiai nei e eaha ta tatou e hiˈopoa mai?

 ¹² Mai ia Aberahama, te tiai atoa ra tatou i te oire e niu mau to te reira. Aita tatou e tiai ra ia patuhia te reira. Ua haamauhia hoi te Faatereraa arii a te Atua i te matahiti 1914 e ua faatere ê na te reira i te raˈi. (Apo. 12:7-10) Te tiai nei râ tatou ia faatere atoa mai te reira i te fenua. Tera râ, mai ia Aberahama raua Sara, hou te reira a tupu ai, e faaruru tatou i te fifi e rave rahi. E tia anei i te mau tavini a Iehova o teie tau ia pee i te hiˈoraa o Aberahama? Te haapapu ra te mau faatiaraa i roto i Te Pare Tiairaa, e rave rahi i teie mahana o te faaite ra i te faaroo e te faaoromai mai ia Aberahama raua Sara. E hiˈopoa anaˈe i te tahi mau hiˈoraa e i te haapiiraa ta tatou e huti mai.

13. Eaha ta oe e haapii mai i te hiˈoraa o taeae Bill Walden?

¹³ A rave i te haapaeraa. Ia tuu tatou i te Faatereraa arii a te Atua i te parahiraa matamua, e rave tatou i te haapaeraa no te faatupu i te hinaaro o te Atua mai ia Aberahama. (Mat. 6:33; Mar. 10:28-30) A feruri na i te hiˈoraa o te taeae Bill Walden. * I te matahiti 1942, te titau ra Bill i te parau tuite no te toroa hamani hohoˈa fare i te tahi haapiiraa teitei i Marite. I tera taime o ˈna i te haamataraa i te haapii i te Bibilia e te mau Ite no Iehova. Ua rave ê na to Bill orometua haapii i te faanahoraa no te hoê ohipa na ˈna i muri aˈe i ta ˈna parau tuite, aita râ Bill i farii. Ua maiti o ˈna i te tavini atu â i te Atua, eiaha râ i te ohipa aufau-maitai-hia. Tau taime rii i muri aˈe, ua titauhia Bill i te aua faehau. Aita râ oia i farii, faautuahia ˈtura oia ia aufau 10 000 tara Marite, hau atu i te 1 000 000 farane, e hurihia ˈtura e pae matahiti i roto i te fare tapearaa. E toru râ matahiti i muri aˈe, matara mai nei oia i te fare tapearaa. I muri mai, ua titau-manihini-hia Bill ia apiti i te Haapiiraa no Gileada e tonohia ˈtura oia ei mitionare i Afirika. Ua faaipoipo oia ia Eva e ua tavini  amui raua ia Iehova i Afirika, ua titauhia râ ia rave i te haapaeraa. Tau matahiti i muri aˈe, ua hoˈi raua i Marite no te haapao i to Bill mama. A feruri ai i to ˈna oraraa, te na ô ra Bill: “E tahe to ˈu roimata ia feruri au i to Iehova faaohiparaa ia ˈu hau atu i te 70 matahiti i roto i te taviniraa. E haamauruuru tamau vau ia ˈna i te tautururaa mai ia ˈu ia faaohipa i to ˈu oraraa no te tavini ia ˈna.” E oe, ua ineine anei oe i te tavini ia Iehova ma te taime taatoa?

14-15. Eaha ta oe e haapii mai i te hiˈoraa o taeae Aristotelis e to tuahine Eleni?

¹⁴ Eiaha e manaˈo eita oe e faaruru i te fifi. Ia au i te hiˈoraa o Aberahama, e faaruru atoa te mau tavini a Iehova i te fifi. (Iak. 1:2; Pet. 1, 5:9) Ta te hiˈoraa ïa o te taeae Aristotelis Apostolidis e haapapu ra. * Ua bapetizohia oia i te matahiti 1946 i Heleni e i te matahiti 1952, ua faaipoipo Aristotelis ia tuahine Eleni tei hinaaro atoa mai ia ˈna e tavini hope roa ia Iehova. Ua maˈihia râ Eleni e itehia ˈtura e maˈi to roto i to ˈna roro. Ua tatara te mau taote i te reira, tau matahiti râ i muri aˈe i to raua faaipoiporaa, ua hoˈi mai â te maˈi. Ua tâpû â te mau taote ia ˈna, aita râ Eleni i nehenehe faahou e hautiuti e e paraparau maitai. Ua faaitoito râ oia i te poro tamau noa ˈtu to ˈna maˈi e te hamani-ino-raa.

¹⁵ E 30 matahiti te maoro to taeae Aristotelis haapaoraa i ta ˈna vahine. I tera maororaa, ua tavini oia ei matahiapo, ei mero i roto i te tomite tairururaa e ua apiti atoa i te paturaa o te tahi Piha tairururaa. I te matahiti 1987, ua û Eleni i te pereoo a poro ai o ˈna. Ua topa Eleni i roto i te coma e toru matahiti te maoro e pohe atura. Te na ô ra taeae Aristotelis: “I te roaraa o te mau matahiti, ua faaruru vau i te fifi e rave rau, vetahi, ua tupu taue noa. Ua titauhia ïa ia faaoromai tamau e ia ore e haaparuparu. Ua tamau râ Iehova i te horoa mai i te puai i titauhia i mua i tera mau fifi.” (Sal. 94:18, 19) Mea  here roa na Iehova te feia o te tamau i te tavini ia ˈna noa ˈtu te mau fifi!

16. Eaha te aˈoraa maitai ta taeae Knorr i horoa i ta ˈna vahine?

¹⁶ A tiatonu i to a muri aˈe. Ua tiatonu Aberahama i te mau haamaitairaa ta Iehova e horoa ia ˈna e na te reira i tauturu atu ia faaoromai i te fifi. Ua tapea te tuahine Audrey Hyde i te feruriraa maitai noa ˈtu ua pohe ta ˈna tane matamua o taeae Nathan Knorr i te mariri ai taata, e oia atoa te piti o ta ˈna tane o Glenn Hyde tei roohia i te maˈi Alzheimer. * Tau hebedoma na mua ˈˈe i to ˈna poheraa, ua faahiti taeae Knorr i te tahi parau tei tauturu ia Audrey. Te na ô ra oia: “Ua haamanaˈo mai Nathan ia ˈu ma te parau mai: ‘Ia pohe tatou, mea papu to tatou tiaturiraa e eita roa tatou e mauiui faahou.’ I muri iho, ua na ô mai oia: ‘A hiˈo i mua, tei ǒ ta oe haamaitairaa’ . . . Ua parau atoa mai: ‘A tamau i te ohipa, a faaohipa i to oe oraraa no te tauturu ia vetahi ê, i reira oe e oaoa ˈi!’” E aˈoraa maitai roa tera no tatou. E tamau anaˈe ïa i te hamani maitai ia vetahi ê e i te ‘oaoa i to tatou tiaturiraa.’—Roma 12:12.

17. (1) No te aha mea faufaa roa ˈtu â no tatou ia tiatonu i to a muri aˈe? (2) E nafea te Mika 7:7 e tauturu ai ia tatou ia fanaˈo i te mau haamaitairaa no a muri aˈe?

¹⁷ I teie mahana, mea faufaa roa ˈtu â no tatou ia tiatonu i to a muri aˈe. Te faaite ra te mau ohipa e tupu ra na te ao fatata roa te mau mahana hopea o teie faanahoraa o te ao i te hope. Fatata roa te Faatereraa arii a te Atua, te oire e niu mau to te reira, i te faatere i te fenua taatoa. E rave rahi haamaitairaa ta tatou e fanaˈo mai te farerei-faahou-raa i te feia herehia tei pohe. I tera taime, e haamaitai Iehova ia Aberahama no to ˈna faaroo puai e to ˈna faaoromai ma te faatia mai ia ˈna e i to ˈna utuafare i te ora. Tei reira anei oe no te farii ia ratou i tera taime? E, mai te peu e pee oe i te hiˈoraa o Aberahama. Mai ia ˈna, a rave i te mau haapaeraa no te Faatereraa arii a te Atua, a faaite i te faaroo puai noa ˈtu te mau fifi e a tiai maite ia Iehova.—A taio i te Mika 7:7.