1. Малэсь куштӥськыны дась тросэз христианъёс но малы?

 АСЬМЕ нуналъёсы Инмарлэн трос миллион ужась-тыршисьёсыз малэсь ке но куштӥськыны дась. Тросэз вын-агайёс но сузэр-апайёс ужпум кутӥзы кузпалъяськытэк улыны. Кузпалъёс ужпум кутӥзы кӧня ке дыр ӵоже нылпи вайытэк улыны. Нош соос, кинъёслэн нылпиоссы вань, ужпум кутӥзы трос коньдон но ваньбур люкатэк улыны. Таӵе быръён лэсьтон понна, соослэн вань кулэ луись мугзы — Иеговалы ужан-тыршонын лэсьтыны ваньзэ, мае быгато. Та христианъёс туж шумпото но оско, Иегова кулэяськонъёссы сярысь сюлмаськоз шуыса. Быдэсмоз-а соослэн осконзы? Быдэсмоз. Малы ми озьы вераськомы? Малы ке шуоно вашкала дыръёсы но Иегова ужась-тыршисьёсызлы ваньзэ кулэзэ сётъяз. Кылсярысь, со бакель кариз Авраамез, «ваньмызлэсь Инмарлы оскисьёслэсь атайзэс» (Рим. 4:11).

2. а) Малы Авраам Ур карез кельтыны дась вал, Еврейёслы 11:8—10, 16 лыдэ басьтоно ке? б) Мае ми эскеромы та статьяын?

² Авраам, дась луыса, Ур карысь майбыр улонзэ кельтӥз. Малы? Малы ке шуоно со «бырисьтэм инъет вылэ пуктэм городлэсь вуэмзэ витиз». (Лыдӟе Еврейёслы 11:8—10, 16.) Мае возьматэ та «город»? Кыӵе шуг-секытъёсын пумиськиз Авраам, та «городэз» возьмакуз? Но кызьы ми адӟем карыны быгатӥськомы Авраамлэсь но соослэсь, кинъёс асьме нуналъёсы солэсь адӟем каро?

3. Кыӵе городэз возьмаз Авраам?

³ «Город», кудзэ туж возьмаз Авраам,— со Инмарлэн Эксэйлыкез. Отчы пыро Иисус Христос но 144 000 зырӟем христианъёс.  Павел та Эксэйлыкез «улэп Инмарлэн городэз, Инмысь Иерусалим» шуыса нимаз (Евр. 12:22; Усьт. 5:8—10; 14:1). Иисус аслэсьтыз дышетскисьёссэ та Эксэйлык сярысь ик вӧсяськыны дышетӥз: со мед лыктоз но Инмарлэсь эриксэ мед быдэстоз музъем вылын но, инмын кадь ик (Матф. 6:10).

4. Улон-вылонэз 17:1, 2, 6 лыдэ басьтыса, мае тодӥз Авраам «город» сярысь, яке Эксэйлык сярысь, кудзэ кылдытыны кылзэ сётӥз Иегова?

⁴ Тодӥз-а Авраам, кызьы Инмарлэн Эксэйлыкез радъямын луоз? Ӧз, ӧз тоды. Трос дауръёс ӵоже со «ватӥськыса улӥсь зэмлык» вал (Еф. 1:8—10; Кол. 1:26, 27). Озьы ке но Авраам тодӥз: солэн выжыысьтыз потэмъёс пӧлысь куд-огъёсыз эксэйёс луозы. Со сярысь ачиз Иегова вераз. (Лыдӟе Улон-вылонэз 17:1, 2, 6.) Авраам Иеговалэн кылсётонъёсызлы сокем юн оскиз, со адӟиз кадь сое, кин зырӟемын вал, яке Мессияез, кудӥз Инмарлэн Эксэйлыказ Эксэй луыны кулэ вал. Тӥни малы Иисус иудей калыклы вераз: «Тӥляд Атайды Авраам Мынэсьтым нуналме адӟо шуыса шумпотэмын вал: адӟиз но шумпотӥз» (Иоанн 8:56). Валамон луэ: Авраам тодӥз, солэн выжыысьтыз потэмъёс Инмарлэн Эксэйлыказ кивалтозы шуыса, озьы ик со дась вал возьманы со дырез, куке Инмар сётэм кылзэ быдэстоз.

5. Кытысь ми тодӥськомы, Авраам Инмарен кылдытэм «городэз» возьмаз шуыса?

⁵ Кызьы Авраам возьматӥз, «городэз», яке Инмарен пуктэм Эксэйлыкез, возьма шуыса? Нырысетӥез, музъем вылысь нокыӵе эксэйлыклэн кивалтэмез улсын со ӧз улы. Со интыысь интые ветлыса улӥз, одӥг интые но улыны ӧз интыяськы, озьы ик музъем вылысь одӥг эксэй пала но ӧз кариськылы. Со сяна, Авраам аслэсьтыз эксэйлыксэ кылдытыны ӧз тыршы. Со Иеговалэсь кылзӥськиз но возьмаз, ку Иегова аслэсьтыз кылсётонзэ быдэстоз. Озьы Авраам Иеговалы туж юн осконзэ возьматӥз. Ойдолэ эскеромы, кыӵе шуг-секытъёсын со пумиськиз но малы ми солэсь дышетскыны быгатӥськомы.

6. Кыӵе вал Ур кар?

⁶ Авраам кошкиз Ур карысь, кудаз улыны кышкыт ӧй вал но улон понна ваньмыз вал, озьы ик отын улӥсь адямиос умой дышетскемын но узыресь вал. Со бадӟым борддоръёсын но куинь палласянь вукыремен  котыртэмын вал. Ур карын улӥсьёс быгатӥзы лыдӟиськыны, гожъяськыны но лыдъяськыны. Ужбергатонэн герӟаськем документъёсъя, кудъёссэ археологъёс шедьтӥзы, валаны луэ, карын вузкаронэн выризы шуыса. Адямиослэн коркаоссы кирпичлэсь пуктэмын, борддоръёссы волятэмын но тӧдьы буёлэн буямын вал. Куд-ог коркаосын 13—14 комнатаос вал, нош азбаръёссылэн выжзы излэсь лэсьтэмын вал.

7. Малы Авраамлы юн оскон кулэ вал, Иегова сое но солэсь семьязэ утёз шуыса?

⁷ Авраамлы юн оскон кулэ вал, Иегова сое но солэсь семьязэ утёз шуыса. Малы? Малы ке шуоно Авраам но Сарра кельтӥзы Ур карысь умой корказэс, кудаз улыны кышкыт ӧй вал. Соос Ханаан музъемын интыысь интые кӧчылыса улыны кутскизы. Табере бадӟым борддоръёс но мур вукырем Авраамез но солэсь семьязэ ӧз уте ни. Соос вылэ шӧдтэк шорысь тушмонъёссы урдскыны быгатӥзы.

8. Кыӵе шуг-секытъёсын одӥг пол пумиськиз Авраам?

⁸ Авраам Инмарлэсь эриксэ быдэсъяз ке но, одӥг дыре семьязэ сюдыны солы секыт луиз. Отчы, кытчы мыныны сое куриз Иегова, кышкыт сютэм ар вуиз. Югдур сокем секыт луиз, Авраам семьяеныз ужпум кутӥз кӧня ке дыр ӵоже Египетын улыны. Нош Египетысь фараон солэсь кышнозэ ас юртаз улыны басьтӥз — солэн сое аслыз кышно каремез потӥз. Пуктэ син азяды, мае чидано луиз Авраам со дырозь, куке Иегова фараонэз косӥз Авраамлы Сарраез берыктыны! (Ул.-выл. 12:10—19).

9. Кыӵе шуг-секытъёсыз вал Авраамлэн семьяяз?

⁹ Авраамлэн семьяяз но бадӟым шуг-секытъёс вал. Сарра, яратоно кышноез, нылпи вайыны ӧз быгаты. Трос дасо аръёс ӵоже соос таин сэрен сюлмаськыса улӥзы. Соин ик Сарра Авраамлы Агарь нимо медо нылзэ сётӥз, со соослы нылпиос мед ваёз шуыса. Нош Измаилэн пияно луыса, Агарь «кузё кышнозэ синазькыль карыны кутскиз». Югдур сокем секыт луиз, Сарра Агарез ултӥяса возьыны кутскиз но, Агарь дорысьтыз пегӟоно ик луиз (Ул.-выл. 16:1—6).

10. Кыӵе учыръёсы Авраамлэн Иеговалы осконэз эскериськиз?

¹⁰ Дыр ортчыса, Сарра ачиз пияно луиз но Авраамлы пи вайиз. Авраам пиезлы Исаак ним понӥз. Со яратӥз кык пиоссэ ик — Измаилэз но, Исаакез но. Нош бадӟымез пиез пичиеныз ассэ урод сямен возиз, соин ик Авраам Измаилэз но Агарез дорысьтызы улляно луиз (Ул.-выл. 21:9—14). Трос аръёс ортчыса, Иегова Авраамез куриз курбонлы вайыны Исаакез (Ул.-выл. 22:1, 2; Евр. 11:17—19). Кыказ ик учыръёсын Авраамлы юн осконо вал, Иегова Исаакен но Измаилэн герӟаськем кылсётонъёссэ быдэстоз шуыса.

11. Малы Авраамлы Иеговаез чидаса возьмано вал?

¹¹ Трос дасо аръёс ӵоже Авраамлы чидаса возьмано вал, ку Иегова сётэм кылзэ быдэстоз. Куке Авраам семьяеныз ӵош Ур карысь кошкиз, солы 70 ареслэсь тросгес вал, дыр (Ул.-выл. 11:31—12:4). 100 арлэсь но кемагес со улӥз шатёръёсын, Ханаантӥ интыысь интые ветлыса. Со кулӥз 175 арес дыръяз (Ул.-выл. 25:7). Авраам ӧз адӟы, кызьы Иегова солэн выжыысьтыз потэмъёслы сӥзем музъеме пырыны лэзиз. Озьы ик со ӧз улы со дырозь, куке пуктэмын вал «город», яке Инмарлэн Эксейлыкез, кудзэ со туж возьмаз. Авраам трос шуг-секытъёсын пумиськиз ке но, со быгатӥз юн осконэн улыны но Иеговаез возьманы дась вал. Мар солы юрттӥз? Быдэс улонэз ӵоже Иегова Авраамез утиз но сое эшеныз лыдъяз (Ул.-выл. 15:1; Ис. 41:8; Иак. 2:22, 23).

12. Мае ми ваньмы возьмаськомы? Мае ми эскеромы?

¹² Ми, Авраам сямен, возьмаськомы «бырисьтэм инъет вылэ пуктэм городэз». Зэм но, милемлы возьмано ӧвӧл, ку со пуктэмын луоз, малы ке шуоно 1914-тӥ арысен Инмарлэн Эксейлыкез инмысен кивалтэ ини (Усьт. 12:7—10). Но ми возьмаськомы, ку со музъемен  кивалтыны кутскоз. Нош туннэ ми пумиськиськомы сыӵе шуг-секытъёсын, кудъёсыныз пумиськылӥзы Авраам но Сарра. Кызьы ми соослэсь адӟем карыны быгатӥськомы? «Возьмаськон башняын» печатлам улон сюресъёсысь адӟыны луэ, туннэ но Иеговалэн трос ужась-тыршисьёсыз, Авраам но Сарра сямен, осконзэс но чиданзэс возьмато шуыса. Ойдолэ тодамы ваёмы куд-ог сыӵе улон сюресъёсты но малпаськомы, малы соос милемыз дышето.

13. Малы дышетэ тӥледыз Билл Уолден агайлэн учырез?

¹³ Малэсь ке но куштӥськыны дась луэ. Милям потэ ке Эксэйлык улонамы тужгес но валтӥсез мед луоз шуыса, милемлы но, Авраамлы кадь ик, малэсь ке но куштӥськыны дась луоно, Инмарез шумпоттон понна (Матф. 6:33; Мар. 10:28—30). Эскеромы Билл Уолден агайлэсь учырзэ b. 1942-тӥ арын со йылпумъяны кулэ вал университетын дышетсконзэ, собере со инженер-архитектор луысал. Соку со тодматскиз Иеговалэн Адӟись-Ивортӥсьёсыныз, кудъёсыз ӵектӥзы солы Библиез дышетыны. Берлогес университетысь дышетӥсез одӥг фирмаен вераськиз, Билл, дышетсконзэ йылпумъямез бере, отын ужалоз шуыса, нош Билл соглаш ӧз кариськы. Со валэктӥз, бадӟым уждунэн ужлы соглаш кариськем интые, солэн, вань кужымзэ сётыса, Инмарлы ужамез-тыршемез потэ шуыса. Соберегес ик Биллэз армие басьтыны малпазы, нош со лякытэн валэктӥз, соглаш кариськыны уг быгаты шуыса. Со понна солы бадӟым штраф сётӥзы но вить арлы пытсэтэ пуктӥзы. Куинь ар ортчыса, Биллэз мозмытӥзы. Берлогес со Галаад школаын дышетскиз но Африкаын миссионер луыса ужаны-тыршыны кутскиз. Кӧня ке дыр ортчыса, Билл кышно басьтӥз Ева нимо сузэрез. Соос Африкаын миссионеръёс луыса ужазы-тыршизы, со понна трос малэсь ке куштӥськоно луиз ке но. Кӧня ке аръёс ортчыса, соос Огазеяськем Штатъёсы доразы берытскизы, Биллэн анаез сярысь сюлмаськон понна. Тани мар вераз Билл аслаз улонэз сярысь: «Мон туж шумпотӥсько но тау карисько,  куке малпаськисько, макем бадӟым дан мыным Иегова сётӥз — 70 арлэсь но кемагес солы ужаны-тыршыны. Мон ӵем Иеговаез тау карисько, со мыным быдэс улонэ ӵоже солы ужаны-тыршыны юрттӥз шуыса». Нош быгатӥськоды-а тӥ, вань дырдэс висъяса, Иеговалы ужаны-тыршыны?

14, 15. Малы дышетэ тӥледыз Апостолидис кузпалъёслэн учырзы?

¹⁴ Эн малпалэ, шуг-секытъёсын уд пумиське шуыса. Кызьы адӟиське Авраамлэн учырысьтыз, соос но, кинъёс вань улонзы ӵоже Иеговалы ужало-тыршо, шуг-секытъёсын пумиськоно луо (Иак. 1:2; 1 Пётр 5:9). Тае адӟыны луэ Аристотелис Апостолидис агайлэн учырысьтыз но c. Со пылатӥськиз 1946-тӥ арын Грециын, нош 1952-тӥ арын Элени нимо сузэрлы кышно басьтыны кылзэ сётӥз. Та сузэрлэн, солэн кадь ик, вань кужымзэ сётыса, Иеговалы ужамез потэ вал. Нош Элени секыт висьыны кутскиз: эмъясьёс йырвиымысьтыз опухользэ шедьтӥзы. Солы операция лэсьтӥзы но опухользэ басьтӥзы, нош кузпалъяськемзы бере кӧня ке ар ортчыса, висёнэз нош ик берытскиз. Кыкетӥ операция бере Эленилэн мугорызлэсь оглюкетсэ парализовать кариз, озьы ик солы вераськыны секыт луиз. Тазалыкеныз герӟаськем шуг-секытъёсыз вал ке но, озьы ик Грециысь кивалтӥсьёс Адӟись-Ивортӥсьёслэн ужзылы люкетӥзы ке но, Элени ӟырдыт мылкыдын тодытон уже пыриськемысь ӧз дугды.

¹⁵ Аристотелис 30 ар ӵоже висись кышноез сярысь сюлмаськиз. Та аръёс ӵоже со ужаз-тыршиз тӧро луыса, конгрессъёслэн пӧртэм комитетъёсазы, озьы ик Конгрессъёсты ортчытон юртъёсты пуктонэ пыриськиз. 1987-тӥ арын Элениез, тодытон уже пыриськыкуз, бадӟым корт ӧс шуккиз но, со туж вӧсь луиз. Куинь ар ӵоже со комаын кыллиз но собере кулӥз. Аслаз улонэз сярысь малпаса, Аристотелис вера: «Вань улонэ ӵоже мынам вал трос шуг-секытъёсы, соос пӧлысь куд-огъёсыз малпамтэ шорысь кылдылӥзы. Соос пыр потон понна, мыным чиданы но юн луыны кулэ вал. Со понна Иегова котьку но тырмыт кужым сётылӥз» (Пс. 93:18, 19). Иегова туж яратэ аслэсьтыз ужась-тыршисьёссэ, кудъёсыз  вань сюлмысьтызы солы ужало-тыршо, нокыӵе визь сынаськонъёс шоры учкытэк!

16. Кыӵе визь-кенеш Нейтан Норр аслаз кышноезлы сётӥз?

¹⁶ Тодады возе вуоно бакель каронъёс сярысь. Авраам тодаз возиз, кызьы Иегова кылзэ сётӥз сое бакель карыны, но со юрттӥз солы шуг-секытъёс пыр потыны. Одри Хайд сузэр но вуоно бакель каронъёс сярысь малпаськыны тыршиз, нырысетӥ картэз, Нейтан Норр, ракен висьыса кулӥз ке но, нош кыкетӥез, Гленн Хайд, Альцгеймер висёнэн курадӟиз ке но d. Одри вералляз, солы юртто шуыса кылъёс, кудъёссэ Норр агай вераз кулон азяз кӧня ке арняослы азьлогес. Одри вераз: «Нейтан мыным тодам вайытӥз: „Кулонэн ваньмыз уг быры. Милям вань юн осконмы. Выльысь курадӟоно ми ноку ум луэ“. Собере со мынэсьтым мылкыдме ӝутӥз: „Учкы азьлань, отчы, кытын тынад кузьымед“ [...] Со ватсаз на: „Тэк эн пукы — мукет адямиос понна мар ке но карыны тыршы. Со юрттоз тыныд шумпотыса улыны“». Кыӵе умой визь-кенеш: мукетъёсыз понна мар ке но умойзэ карыны но осконмылы шумпотыны! (Рим. 12:12).

17. а) Малы ми азьпала юн осконэн учкыны быгатӥськомы? б) Кызьы Михейлэсь 7:7 гожтэм кылъёс юрттозы милемлы Иеговалэсь бакель каронъёссэ басьтыны?

¹⁷ Тужгес но туннэ тодамы возьыны кулэ вуоно бакель каронъёс сярысь. Дуннеысь югдуръёс возьмато, ми берпум нуналъёслэн пумаз улӥськомы шуыса. Ӝоген милемлы возьманы кулэ уз луы ини со дырез, куке «бырисьтэм инъет вылэ пуктэм город» быдэс дуннеен кивалтоз. Шумпотон понна милям трос мугъёсмы луозы. Кылсярысь, ми адӟиськомы матысь адямиосынымы, кудъёсыз улӟытэмын луозы. Со дыре Авраам но бакель каремын луоз осконэз но чиданэз понна. Иегова солы но солэн семьяезлы пырак улон кузьмалоз. Ми туж шумпотӥськомы, соосын тодматскыны быгатомы шуыса. Тӥляд сыӵе луонлыкты луоз, куке тӥ, Авраам сямен, Инмарлэн Эксэйлыкез понна малэсь ке куштӥськыны дась луиськоды, юн осконэн улӥськоды но Иеговаез чидаса возьманы дышетскиськоды. (Лыдӟе Михейлэсь 7:7.)