1. Нурғунлири қандақ қурбанлиқларни бәрди вә немә үчүн?

 БҮГҮНКИ КҮНДӘ миллионлиған Худа хизмәтчилири қурбанлиқларни бериватиду. Көплигән қериндашлар аилә қурмай яшашни таллиди. Бәзи әр-аяллар мошу күнләрдә балилиқ болмаслиқни қарар қилди. Бәзи аилиләр болса, аддий-саддә яшашқа бәл бағлиди. Мундақ муһим бир қарарларниң сәвәви — имканийәтниң баричә Худаға көпирәк хизмәт қилиш. Улар бариға шүкри қилип, Йәһва Худаниң өзлиригә керәклик һәммә нәрсини беридиғанлиғиға ишиниду. Улар үмүтсизлинип қаламду? Яқ. Биз уни нәдин билимиз? Өтмүштә Йәһва Өз хизмәтчилириниң барлиқ еһтияҗлирини тәминлигән. Мәсилән, Йәһва Худа етиқади барларниң атиси Ибраһимни бәрикәтлигән (Рим. 4:11).

2. а) Ибранийларға 11:8—10, 16-айәтләргә асасланғанда, немә үчүн Ибраһим Ур шәһирини ташлап кетишкә тәйяр болған? ә) Бу мақалидә биз немини көрүп чиқимиз?

² Ибраһим қолайлиқ Ур шәһирини ташлап кәтти. Немә үчүн? Чүнки у «һули мустәһкәм селинған» шәһәрни күткән еди (Ибранийларға 11:8—10, 16ни оқуң). Бу қандақ шәһәр? Ибраһим пәйғәмбәр бу шәһәрниң бена қилинишини күткәндә қандақ қийинчилиқларға дуч кәлгән? Биз Ибраһимдин вә бүгүнки күндә уни үлгә қилғанлардин немини үгинәләймиз? Бу мақалә, бизниң мошу соаллиримизға җавап тепишимизға ярдәм бериду.

3. Ибраһим қайси шәһәрни күткән?

³ Ибраһим күткән шәһәр — бу Худа Падишалиғи. Бу шәһәрниң падишаси Әйса Мәсиһ вә 144000 майланған униң билән һөкүмранлиқ қилиду. Әлчи Паул бу шәһәрни «тирик Худаниң шәһири, йәни әрштики Йерусалим», дәп атиған  (Ибр. 12:22; Вәһ. 5:8—10; 14:1). Әйса шагиртлириға Худаниң ирадисиниң асманда орунланғандәк, йәрдиму орунлиниши үчүн Падишалиқ кәлсун, дәп дуа қилишни үгәткән (Мәт. 6:10).

4. Яритилиш 17:1, 2, 6-айәтләргә асасән, Ибраһим Худа вәдә қилған Падишалиқ яки шәһәр тоғрилиқ немини билгән?

⁴ Ибраһим пәйғәмбәр Худа Падишалиғи қандақ тәшкил қилинғанлиғи һәққидә тәпсилатларни билгәнму? Яқ, билмигән. Көп әсирләр давамида, бу тәпсилатлар муқәддәс сир болуп кәлгән еди (Әфәс. 1:8—10; Кол. 1:26, 27). Лекин Ибраһим униң бәзи әвлатлириниң падишалар болидиғанлиғини билгән. Йәһва Худа униңға алаһидә бир вәдини бәргән (Яритилиш 17:1, 2, 6ни оқуң). Ибраһим пәйғәмбәрниң етиқади шунчилик мустәһкәм болғанки, һәтта у Худа Падишалиғиниң Падишаси болидиған Мәсиһни көргәндәк болған. Шу сәвәптин, Әйса өз вақтида йәһудийларға мошу сөзләрни ейтқан: «Атаңлар Ибраһим мениң күнүмни көрүшни үмүт қилип, наһайити хошал болған еди һәм у уни көрүп хурсән болди» (Йоһ. 8:56). Ениқки, Йәһваниң қоллап-қувәтлиши билән Өз әвлатлириниң бу Падишалиқни қуридиғанлиғини Ибраһим билгән еди. У Йәһваниң шу вәдисини әмәлгә ашурушни күтүшни халиған.

5. Ибраһимниң Худа лайиһилигән шәһәрни күтиватқанлиғини нәдин билимиз?

⁵ Худа лайиһилигән шәһәрни күтиватқанлиғини Ибраһим қандақ көрсәткән? Биринчи, Ибраһим йәрдики һечбир падишалиқларға қошулмиған. У көчмән чарвичи болуп яшап, һечбир йәрдә униң турақлиқ макан-җайи болмай, йәрдики һечқандақ падишаларни қоллап-қувәтлимигән. Иккинчи, у өз падишалиғини тикләшкә тиришмиған. Униң орниға, у Худаға итаәтчан болуп, Униң вәдиси орунлинидиған вақитни күткән. Шундақ қилип, Ибраһим пәйғәмбәр Йәһва Худаға болған бәкму күчлүк етиқадини көрсәткән. Келиңлар, у дуч кәлгән бирнәччә қийинчилиқларни көрүп чиқайли. Униң үлгисидин немини үгинидиғанлиғимизни көрәйли.

6. Ур қандақ шәһәр болған еди?

⁶ Ибраһим бехәтәр, қолайлиқ вә гүлләнгән баяшат шәһәрни ташлап кәткән еди.  Бу шәһәрни егиз-сепил тамлар вә үч тәрәптин чоңқур канал өстәңлири қоршап туратти. Шәһәрдики адәмләр йезиш вә математика тәрәптин уста-маһирлар еди. Униңдин башқа, бу шәһәр сода-сетиқ мәркизи болуп, археологлар бу шәһәрдин нурғун сода һөҗҗәтләрни тапқан. Йәрлик өйләр хиштин селинған болуп, қум силақ қилинған вә ақартилған еди. Бәзи өйләрниң 13 яки 14 еғиз бөлүм билән қоршалған таш бесилған һойлиси бар еди.

7. Немә үчүн Ибраһим уни вә униң аилисини Йәһваниң һимайә қилидиғанлиғиға ишәнгән?

⁷ Ибраһим уни вә униң аилисини Йәһваниң һимайә қилидиғанлиғиға ишиниши керәк еди. Немә үчүн? Есимизгә алайли, Ибраһим билән Сарә Ур шәһиридики қолайлиқ вә бехәтәр өйини ташлап кетип, Қананниң очуқ далалирида чедир тикип яшайдиған болған еди. Әнди уларни бурунқидәк қоғдайдиған мустәһкәм сепил тамлар яки чоңқур өстәңләр болмиған. Дүшмәнләр асанла уларға һуҗум қилалатти.

8. Ибраһим қандақ қийинчилиқларға дуч кәлгән?

⁸ Ибраһим Худаниң ирадисини орунлиған болсиму, бир вақитта, аилиси үчүн ашлиқ тәминләштә қийинчилиққа дуч кәлгән. Чүнки Худа уни әвәткән йәрдә қаттиқ ачарчилиқ апити йүз бәргән. Ачарчилиқ шунчә еғирлишип кәткәнки, Ибраһим аилиси билән Мисирға көчүшкә тоғра кәлгән. Бирақ, у Мисирда болғанда, пирәвн униң аялини еливалған еди. Тәсәввур қилип көрүң, Пирәвн Йәһваниң арилишиши билән Ибраһимға аяли Сарәни қайтуруп бәргичә, у қанчилик әндишә ичидә қалғанду-һә! (Ярит. 12:10—19)

9. Ибраһимниң аилә турмушида қандақ қийинчилиқлар болған?

⁹ Ибраһимниң аилә турмуши қийин болған. Униң яхши көридиған аяли бала йүзи көрәлмигән. Улар он нәччә жиллап еғир ачарчилиқни баштин өткүзгән. Ахирида улар бала йүзи көрүш үчүн Сарә Һәҗәрни Ибраһимға бәргән. Кейин Һәҗәр қосақ көтәргәндә Сарәни көзгә илмаслиққа башлиған. Бу әһвал кәскинлишип кәткәчкә, Сарә Һәҗәрни өйдин қоғлап чиқарған (Ярит. 16:1—6).

10. Қайси вәзийәтләр Ибраһимниң Худаға болған ишәнчисини синиған?

¹⁰ Ахири Сарә һамилдар болуп, униңға бир оғул Исһақ туғуп бәргән. Ибраһим икки оғли Исһақ билән Исмаилни яхши көрәтти. Амма Исмаил Исһақни бозәк қилғанлиқтин, Ибраһим Һәҗәрни оғли Исмаил билән йолға селип қоюшқа мәҗбур болған (Ярит. 21:9—14). Кейин Йәһва Худа Ибраһимдин оғли Исһақни қурбанлиқ қилишни сориған (Ярит. 22:1, 2; Ибр. 11:17—19). Бу икки вәзийәттә, Ибраһим Худаниң икки оғли һәққидә бәргән вәдисини әмәлгә ашуридиғанлиғиға ишиниши керәк еди.

11. Немә үчүн Ибраһим Йәһвани сәвир-тақәт билән күтүшкә тоғра кәлгән еди?

¹¹ Мошу вәзийәтләрдә Ибраһим Йәһвани сәвир-тақәт билән күтүшни үгинишкә тоғра кәлгән еди. У аилиси билән Ур шәһәрдин чиққанда, 70тин ашқан (Ярит. 11:31—12:4). У тәхминән йүз жилчә Қанан зиминда чедирларда яшиған. Ибраһим 175 яшқа киргәндә вапат болған еди (Ярит. 25:7). Амма Ибраһим Йәһва Худаниң бу зиминни униң әвлатлириға беримән дегән вәдисиниң орунлинишини өз көзи билән көрмигән. Шәһәрни, йәни Худа Падишалиғиниң тикләнгәнлигини көрмигән. Шундақ болсиму, Ибраһим «яшинип һәм һаятқа қанаәтлинип», ата-бовилириға қошулған (Ярит. 25:8). У бешидин өткүзгән қийинчилиқлар көп болсиму, күчлүк ишәнчисини көрситип, Йәһвани хошаллиқ билән күткән. У қандақму  шунчә сәвир-тақәт билән күтәлигән? Сәвәви Йәһва Өзи ярдәм бәргән, йәни Ибраһимни өмүр бойи қоғдап униңға достидәк муамилә қилған (Ярит. 15:1; Йәшая 41:8; Яқуп 2:22, 23).

12. Биз немини күтиватимиз вә немини көрүп чиқимиз?

¹² Ибраһимға охшаш биз «һули мустәһкәм селинған,... шәһәрни» күтиватимиз. Лекин биз униң бена қилинишини күтмәймиз. Худа Падишалиғи 1914-жили тикләнгән вә аллиқачан у асманда пүтүнләй һөкүмранлиқ қилишни башлиған (Вәһ. 12:7—10). Әнди биз Худа Падишалиғиниң йәр йүзидә пүтүнләй һөкүмранлиқ қилишини күтиватимиз. Биз буни күтүватқанда, Ибраһим билән Сарәгә охшаш һәр түрлүк вәзийәтләргә дуч келимиз. Бүгүнки күндә, Йәһва гувачилири Ибраһимни үлгә қиливатиду. «Күзитиш мунари» журналида йезилған тәрҗимиһаллар буни испатлайду. Ибраһим билән Сарәгә охшаш, нурғун қериндашлар сәвир-тақәт билән ишәнчисини көрсәтмәктә. Келиңлар, биз һазир бу қериндашларниң һекайилирини вә улардин немигә үгинәләйдиғанлиғимизни көрүп чиқимиз.

13. Билл бурадәрниң мисалидин немини үгинимиз?

¹³ Қурбанлиқ беришкә тәйяр болуң. Әгәр биз Худаниң шәһирини, йәни Падишалиғини һаятимизда биринчи орунға қойсақ, Ибраһимға охшаш болумиз. У Йәһвани хурсән қилиш үчүн қурбанлиқларни беришкә тәйяр болған (Мәт. 6:33; Марк 10:28—30). Һазир Билл Уолден b исимлиқ бурадәрниң мисалини көрүп чиқайли. 1942-жили Билл Америкидики бир университетиниң бинакарлиқ кәспини тамамлиған. Университет профессори Билл үчүн яхши бир хизмәтни тепип қойған. Лекин Билл уни рәт қилған. У жуқури маашлиқ иштин ваз кечип, Худаға көпирәк хизмәт қилишни қарар қилғанлиғини чүшәндүргән. Кейин көп өтмәй, Билл әскәрликкә беришқа чақирилған. Гәрчә у һөрмәт билән уни рәт қилсиму, һөкүмәт униңға 10000 доллар җәриманә қойған вә у 5 жиллиқ қамақ җазасиға һөкүм қилинған. 3 жилдин кейин түрмидин азат болған. Кейинирәк у Гилиад мәктивигә тәклип қилинип, миссионер болуп Африкиға әвәтилгән. Андин Ева исимлиқ қериндашқа  өйләнгән. Кейин улар иккилиси Африкида хизмәт қилип, чоң қурбанлиқларни бәргән. Ахирида улар Биллниң анисиниң һалидин хәвәр елиш үчүн Америкиға қайтишқа тоғра кәлгән. Билл өз һаяти тоғрилиқ хуласә қилип, мундақ дегән: «Йәһва Худа мени 70 жилдин көпирәк Униңға хизмәт қилиш шан-шәрипигә егә қилғини һәққидә ойлиғинимда көзлирим яшқа толиду. Худа Униңға хизмәт қилишимни мениң сөйүмлүк кәспим қилғини үчүн чәксиз миннәтдармән». Сизму толуқ вақитлиқ хизмәтни кәсипиңиз қилаламсиз?

14, 15. Апостолидис әр-аялниң вақийәсидин немигә үгинәләймиз?

¹⁴ Қийинчилиқлар болмайду дәп үмүт қилмаң. Ибраһимниң мисалидин шуни билимизки, Худаға һаятини беғишлап, өмүр бойи Униңға хизмәт қилғанларму һәртүрлүк қийинчилиқларға дучар болиду (Яқуп 1:2; Пет. 1-х. 5:9). Биз буни Аристотелис Апостолидис c исимлиқ бурадәрниң мисалидин көрүмиз. У 1946-жили Грециядә чөмдүрүлүш мәрасимидин өтүп, 1952-жили у өзигә охшаш мәхсәтләрни көзлигән Елени исимлиқ қериндаш билән той қилған. Амма Елинидә мейә өсмә кесили болған вә өсмә кесип еливетилгән еди. Лекин улар той қилип бир нәччә жилдин кейин өсмә қайтидин өскән. Дохтурлар қайта давалиған болсиму, Елени йерим паләч болуп қелип, адәттикидәк сөзлишиши қийин болуп қалған. У өзиниң кесилигә вә һөкүмәт тәрәптин кәлгән қаршилиқларға қаримастин, қизғинлиқ билән хизмәт қилишни давамлаштурған.

¹⁵ Аристотелис 30 жилчә, вақит аялиниң һалидин хәвәр елип кәлгән. Шу вақитларда у ақсақал болуп, конгресс комитетлирида хизмәт қилған вә конгресс сарайлирини қуруш ишлириға ярдәм бәргән. Кейин 1987-жили аяли Елени вәз қиливатқанда, униңға еғир төмүр ишик тегип кетип, қаттиқ яриланған. Андин у 3 жил һошсиз йетип қалғандин кейин вапат болған. Аристотелис өзиниң тәрҗимиһалини хуласиләп мундақ дегән: «Шунчә жиллардин буян һаятимда күтүлмигән вә туюқсиз вәзийәтләр билән қийинчилиқларға бәрдашлиқ бериш үчүн һәддидин зиядә қәйсәрлик керәк еди.  Қандақла болмисун, Йәһва Худа әшу қийинчилиқларни йеңиш үчүн маңа керәклик күч ата қилип кәлди» (Зәб. 94:18, 19). Синақларға қаримастин, қолидин кәлгиничә Өзигә хизмәт қилғанларни Йәһва Худа яхши көриду.

16. Норр бурадәр өз аялиға қандақ яхши нәсиһәт бәргән?

¹⁶ Келәчәккә көз тикиң. Ибраһим көзни келәчәктики мукапатқа тиккән. Бу униң қийинчилиқлирини йеңишкә ярдәм бәргән. Мәсилән, Одри Хайд қериндишимизниң биринчи йолдиши Нейтан Норр рак кесили билән өлүп кәткән. Иккинчи йолдиши болса, унтуғақлиқ кесилигә (Альцгеймер) гириптар d болған. Бу синақларға қаримастин, у иҗабий көзқарашни сақлап қалған. Биринчи йолдиши Норр өлүмидин бирнәччә һәптә авал Одриға ярдәм беридиған муһим бир нәрсини ейтқан: «Нейтан маңа мундақ дегән еди: “Өлүм билән һәммә немә пүтмәйду, чүнки бизниң үмүтимиз бар. Келәчәктә һеч қандақ азап-оқубәтләрни чәкмәймиз”. Йәнә у мени үндәп: “Сизни алдиңизда күтүп турған бәрикәтләргә көз тикиң... һәрдайим алдираш болуп, һаятиңизни башқиларға яхшилиқ қилиш үчүн беғишлаң. Бу сизниң хошаллиқ тепишиңизға ярдәм бериду”,— дегән»,— дәйду Одри. Башқиларға яхшилиқ қилиш билән бәнд болуң вә «үмүттә хурсән болуң», дегән мәслиһәт һәммимиз үчүн пайдилиқтур (Рим. 12:12).

17. а) Келәчәккә көз тикиш үчүн қандақ муһим сәвәпләр бар? ә) Мика 7:7-айәттики сөзләргә әмәл қилиш келәчәктики бәрикәтләрдин һузур елишқа қандақ ярдәм бериду?

¹⁷ Келәчәккә көз тикиш үчүн, бурунқиға қариғанда көп сәвәпләр бар. Дунияниң вәзийити бизниң ахир заманниң әң ахирқи күнлиридә яшаватқанлиғимизни көрситиватиду. Йеқинда «һули мустәһкәм селинған,... шәһәр» йәр йүзидә пүтүнләй һөкүмранлиқ қилидиған вақитни күтүшниң һаҗити қалмайду. Биздә көп бәрикәтләр болиду. Уларниң бири: тирилгән йеқинлиримиз билән җәм болуп хошал болумиз. Шу вақтида Йәһва Худа Ибраһимни ишәнчиси вә сәвир-тақити үчүн мукапатлайду. Шундақла Худа уни вә аилисини йәрдики җәннәттә тирилдүриду. Сиз уларни қарши елиш үчүн, шу йәрдә боламсиз? Әгәр сиз худди Ибраһимға охшаш Худа Падишалиғи үчүн қурбанлиқларни беришкә тәйяр болсиңиз, қийинчилиқларға қаримастин ишәнчиңизни сақлисиңиз вә Худани сәвир-тақәт билән күтсиңиз җәннәттә болалайсиз (Мика 7:7ни оқуң).