1. Itthu xeeni anna akina apanke aya, ni exeeni ewiirinhe opaka?

IMILYAU sinceene sa arumeyi a Yehova olelo-va, anniimananiha vanceene. Maana anna ni arokora anceene aathanla ohithela wala ohitheliwa. Nave anamathelana anceene annithanla ohaayara anamwane niinaano-va. Nave-tho, imusi sinceene sinnikhweiherya okumi aya. Exeeni ewiirinhe anna awo opaka soothanla iyo? Okhala wira aniphavela ovara vanceene muteko wa Yehova. Awo annihakalala ni itthu arina aya, nave annikupali wira Yehova onimwaavaha itthu sikina sinaathowa. Niireke anna awo anoothanana muhoolo? Nnakhala vakhaani! Exeeni ennikupaliha eyo? Etthu emosa ennikupaliha, okhala wira Yehova aahaakhapelela arumeyi awe a khalai. Mwa ntakiheryo, Yehova aahimureeliha Abrahamu yoowo ori “tithi aya atthu othene animwamini Muluku”.—aRom. 4:11.

2. (a) Moovarihana ni aHéberi 11:8-10, 16, xeeni vahaamukhweelale aya Abrahamu okhuma Uri? (b) Exeeni ninrowa ahu othokorerya mwaha ola?

² Abrahamu aahikhalana makhalelo ooloka epooma ya wUri. Hata vaari siiso owo aahikhuma. Mwaha wa xeeni? Mwaha woowi “aniwehererya muttetthe otekiwe mmathipeloni” mwekekhai. (Mmusome aHéberi 11:8-10, 16.) Muttetthe xeeni Abrahamu aawehererya awe? Mixankiho xeeni Abrahamu aarina awe olipelelaka otekiwa muttetthe owo? Nto ninrowa omutakiha sai Abrahamu, hiyo ni ale aniimananiha otthara ntakiheryo nawe?

3. Epooma xeeni Abrahamu aawehererya awe?

³ Epooma Abrahamu aawehererya awe, Omwene wa Muluku. Nto Omwene owo onilamuleliwa ni Yesu vamosa ni maKristau oothanliwa 144,000. Nave murummwa Paulo aahihimya wira Omwene owo  “muttetthe wa Muluku mukumi, oYerusalemu wa wirimu”. (aHéb. 12:22; Wis. 5:8-10; 14:1) Yesu aahaaleela awiixutti awe ovekela Omwene owo ni wira orwe opake yootthuna ya Muluku valaponi ntoko wiirimu.—Math. 6:10.

4. Moovarihana ni Maphattuwelo 17:1, 2, 6, exeeni Abrahamu aasuwela awe voohimya sa epooma wala Omwene Muluku aaleihenrye awe?

⁴ Niireke Abrahamu aanisuwela itthu sotheene sa moota Omwene wa Muluku waarowa aya otthokihiwa? Nnaari. Maana mwa iyaakha sinceene, itthu iyo sotheene sa Omwene saari “esiri yaipithihiwe”. (aÉf. 1:8-10; aKol. 1:26, 27) Masi Abrahamu aanisuwela wira osuulu awe mukina waarowa okhala mamwene. Yehova aahimuleiherya eyo Abrahamu. (Musome Maphattuwelo 17:1, 2, 6.) Nto Abrahamu aaniwaamini vanceene anatiri a Muluku vanakhala ntoko wira aanimoona ole Othanliwe wala Mesiya wira okhale Mwene a Omwene wa Muluku. Tivonto Yesu aalenle awe aYuda a mahiku awe wira: “Abrahamu, tith’ihu, ahitteliwa murima aroromelaka wona nihiku naka: ohòna tthiri, khusareya otteliwa murima”. (Yoh. 8:56) Vannooneya wira Abrahamu aanisuwela wira osuulu awe waamwiirela mpantta Omwene yoowo onikhaliheriwa ni Yehova. Nave Abrahamu aanilipelela okathi Yehova aarowa awe omaliherya yooleiherya awe.

5. Ninsuwela sai wira Abrahamu aanilipelela epooma epakiwe ni Muluku?

⁵ Abrahamu oonihenrye sai wira aanilipelela epooma wala Omwene opakiwe ni Muluku? Yoopacerya, Abrahamu khiirela mpantta omwene wa valaponi. Owo aamakela othaamela mapuro makina ni khaakhaliherya ikuvernu sa apinaatamu. Nave, Abrahamu kheerenrye opaka omwene awe. Ohiya opaka eyo, Abrahamu aanimwiiwelela Yehova, olipelelaka wira Muluku aamwaamaliherya anatiri awe. Mwaha woopaka eyo, Abrahamu aahooniherya wira aanimwaamini vanceene Yehova. Vano nrowe niwehe mixankiho Abrahamu aarina awe ni noone etthu onniixuttiha awe.

6. Yaari sai epooma ya wUri?

⁶ Epooma ya wUri Abrahamu aakhala awe, yaari yoovareleleya, yooloka ni yoothaaciri. Nave epooma ele yaanikhapeleliwa ni muuru woorakama ni woolipa, mipantta miraru saahikhala miro soowiixa vanceene. Nave atthu a Uri yaanisuwela osoma, olepa ni matemaatika. Ohiya-vo, vanikhala ntoko wira epooma ya Uri naari  nipuro aapakiwa nakoso, maana alipa anthipa mapuro yaakhaliwa khalai aaphwanya opuro ole idukumento saarumeeliwa okathi wa nakoso. Epooma ele, ipa sikina saatekiwa ni itixolu, ixiri saya saanirepokariwa ni opintariwa ni ekoore yootteela. Ipa sikina saanikhalana ikwaartu 13 wala 14, seiyo saarukurerya nivate naaheliwa maluku.

7. Xeeni vaatthuneya aya Abrahamu omuroromela Yehova?

⁷ Wira okhume epooma ele yaakhapeleliwa ni yoothaaciri, Abrahamu ahaana okupali wira Yehova ammukhapelela owo ni emusi awe. Mwaha wa xeeni? Mwaha woowi Abrahamu ni Sara yaarowa okhalaka muheemani ni vanlakani vene epooma ya oKanani. Vano awo khiyaakhapeleliwa ni muuru woorakama wa itixolu nnakhala miro soowiixa. Nto vaamukhweya Abrahamu ni emusi awe otupheliwa ni awanani awe.

8. Okathi omosa, exeeni yaamwiiranenle Abrahamu?

⁸ Abrahamu aanipaka yootthuna ya Muluku, hata vaari siiso, waahikhala okathi ahaawerya awe olyiha emusi awe. Mwa ntakiheryo, okathi omosa muttetthe Abrahamu aarummwale awe ni Yehova wira othaamele, yaahivola etala yinceene. Nto okathi owo Abrahamu khaawerya olyiha emusi awe. Tivonto owo aalakenle awe othaamela wExiitu okathi vakhaani ni emusi awe. Masi nlelo ori ene wExiitu, namalamulela a elapo ele iihaniwa Farawo, aahimukuxa mwaarawe Abrahamu. Nto Yehova aahimuleela Farawo wira omuttikiherye Abrahamu Sara. Masi eyo ehinatthi okhumelela, nkahaya muupuwele oxanka Abrahamu aarina awe.—Maph. 12:10-19.

9. Mixankiho xeeni Abrahamu aarina awe vatthokoni vawe?

⁹ Abrahamu aahikhalana mixankiho sikina vatthokoni vawe. Mwaarawe amphenta awe vanceene iihaniwa Sara, khaayara. Nto yaahaana ovilela muxankiho ole mwa iyaakha sinceene. Muhoolo mwaya, Sara aahoona oreerela onvaha Abrahamu epottha awe yiihaniwa Hagari. Sara uupuwela wira yena ni iyawe yaamukhalana anamwane mwaha wa Hagari. Masi okathi Hagari oonale awe wira aahirupala, owo aahipacerya omuthanya wala ohimuttittimiha Sara. Nto muxankiho ole waahinnuwa mpakha Hagari otthyawa etthoko ele.—Maph. 16:1-6.

10. Exeeni yaamwiiranenle Iximayeli ni Isakhi yeeherenrye ororomeleya wawe Abrahamu wa Yehova?

¹⁰ Muhoolo mwaya, Sara aahirupala khumuyarela Abrahamu mwaana mwaamulopwana, yoowo iihaniwa Isakhi. Abrahamu aanaaphenta anaawe oowanli Iximayeli ni Isakhi. Masi, okhala wira Iximayeli aanimuhasula Isakhi, Abrahamu aahaana omoomola Iximayeli ni Hagari. (Maph. 21:9-14) Iyaakha sinceene muhoolo mwaya, Yehova aahinvekela Abrahamu wira onvahe mukuttho Isakhi. (Maph. 22:1, 2; aHéb. 11:17-19) Sowiiraneya iyo soopiili, Abrahamu aahaana omuroromela Yehova wira aamwaamaliherya anatiri awe aapanke awe voohimya sa anaawe Abrahamu.

11. Xeeni Abrahamu aamulipelela awe Yehova moopixa murima?

¹¹ Okumi awe wotheene, Abrahamu aahiixutta omulipelela Yehova moopixa murima. Vanikhala ntoko wira okathi aakhumme awe ni emusi awe epooma ya wUri, Abrahamu aarina iyaakha 70. (Maph. 11:31–12:4) Nave mwa iyaakha 100, Abrahamu aakhala muheemani ni aamakela othaamela mapuro oovirikana elapo ya oKanani. Abrahamu okhwiiye orina ene iyaakha 175. (Maph. 25:7) Abrahamu khaawenhe osuulu awe okelaka elapo yooleiheriwa. Nave khaawenhe etekiwaka epooma aalipelela awe, eyo piiyo, Omwene wa Muluku. Hata vaari siiso, Biibiliya onihimya wira Abrahamu okhwiiye ‘uluvanle ene vanjene’. (Maph. 25:8) Nnaamwi Abrahamu aarina mixankiho sinceene, owo khaahiyale olipiha waamini wawe ni omulipelela Yehova moopixa murima ohakalalaka. Exeeni yaamukhalihenrye Abrahamu ovilela? Etthu yaamukhalihenrye okumi awe wotheene, okhala wira aahoona wira aanikhapeleliwa ni Yehova ni aari  mpatthani awe.—Maph. 15:1; Yes. 41:8; Yak. 2:22, 23.

12. Exeeni ninlipelela ahu? Ninrowa othokorerya exeeni?

¹² Ntoko Abrahamu, hiyo ninnilipelela epooma erina mathipelo eekeekhai. Masi khahiyo wira ninlipelela otekiwa wa epooma eyo. Maana Omwene wa Muluku wookhalihiwa wiirimu mwaakha wa 1914 ni woopacerya olamulela wiirimu wotheene. (Wis. 12:7-10) Masi hiyo ninlipelela okathi Omwene owo onrowa awe olamulelaka valaponi. Nlipelelaka eyo wiiraneya, nihaana ovilela mixankiho sinceene sinlikana ni sa Abrahamu ni Sara. Niireke arumeyi a Yehova olelo-va anniwerya otthara ntakiheryo na Abrahamu? Sowiiraneya sa mweekumini sinikumiheriwa erevista Owehaweha, sinnooniherya wira anna ni arokora anceene olelo-va, aakhalana waamini ni opixa murima ntoko wa Abrahamu ni Sara. Nrowe nithokorerye sowiiraneya vakhaani sa mweekumini ni niwehe ele nniixutta ahu.

13. Yowiiraneya ya munna Bill, ewiixuttinheni exeeni?

¹³ Mwiimananiheke oleva itthu sikina mwaha wa Muluku. Naaphavelaka wira epooma ya Muluku, niire so, Omwene okhale nipuro noopacerya mookumini mwahu, nihaana oleva itthu sikina wira nimuhakalaliheke Muluku, ntoko Abrahamu. (Math. 6:33; Mar. 10:28-30) Nwehe ntakiheryo na munna iihaniwa Bill Walden. * Okathi Bill aapacenrye awe omusoma Biibiliya ni Anamoona a Yehova mwaakha wa 1942, aahanle vakhaani okaratuwariwa ntoko nxinyeryo universidade yuulupale ya wEstados Unidos. Prusoore awe aaphavela wira nuumala okratuwari Bill avareke muteko, masi Bill aahikhootta. Owo aahimutthokiherya prusoore ole wira aaphavela ovirihaka okathi munceene ovaraka muteko wa Muluku ohiya okhala nxinyeryo. Voohipisa Bill aahilattuliwa etoropa. Mwa nttittimiho Bill aahikhootta, nto mwaha wookhootta aahileeliwa wira aamuliva 10.000 dolar ni anviriha iyaakha 5 ori ene mukhatteya. Nto ahikumihiwa mukhatteya nuumala oviriha iyaakha 3. Muhoolo mwaya, Bill aahilattuliwa Exikola ya oGileadi, nuumala-vo aahiroihiwa wÁfrica wira akhale misionaario. Nuumala-vo, Bill aahimuthela Eva ni yaahaana wiimananiha wira yarumeeleke wÁfrica. Moohipisa, awo yaahitthikela  wEstados Unidos wira yamukhapeleleke maama awe Bill. Olavulaka mookwasa, Bill onihimya so: “Kinnihakalala vanceene vaavo kinuupuwela aka eparakha yuulupale kaarina aka ya orumeeliwa ni Yehova mwa iyaakha sinivikana 70. Okathi wotheene kinnimuxukhurela okikhaliherya othanla muteko wootepexa oloka”. Niireke nyuwo munniphavela ovara muteko wa Muluku okathi wotheene?

14-15. Yowiiraneya ya anamathelana Apostolidis, ewiixuttinheni exeeni?

¹⁴ Muhuupuweleke wira khamunrowa okhalana mixankiho. Ntakiheryo na Abrahamu noonooniherya wira hata atthu yaale aniviriha okumi aya wotheene amurumeelaka Muluku, annikhalana mixankiho. (Yak. 1:2; 1 Ped. 5:9) Nkahaya moone moota eyo yaamwiiranenle aya munna Aristotelis Apostolidis. * Owo aapatisiwe 1946, oGrécia, nto 1952 aahimunoivari murokora iihaniwa Eleni. Owo aarina yoolukama emosaru ni munna Aristotelis. Masi Eleni aahipacerya owereiwa, nto waahooniwa wira oramattha wala ottoopare awe waahiipa. Opuro ole wiipale aya waahikumihiwa, masi iyaakha vakhaani nuumala othelana, owo aahitthikela wiipa. Mameediku awe yaahitthikela omooperari Eleni, masi owo khaawerya olavula oratteene. Nnaamwi ahaawerya olavula saana ni yaalupatthiwa vanceene ni kuvernu, awo khiyaahiyale oluttuweliwa olaleerya.

¹⁵ Munna Aristotelis aahimukhapelela mwaarawe iyaakha 30. Okathi owo wotheene munna ole aahirumeela ntoko mutokweene, ekomisau ya asembeleya ni konkresu ni aahikhaliherya oteka Empa ya Asembeleya. Nto mwaakha wa 1987, Eleni aahivulalihiwa vanceene ni mukhora olaleeryaka. Owo aahiviriha iyaakha tthaaru ohiweryaka weetta mwaha woowereiwa, nuumala-vo aahikhwa. Munna Aristotelis onihimya so: “Mwa iyaakha sinceene saahikikhumelela sooweeha, mixankiho ni itthu kahaalipelela aka. Nto kaahaana wiimananiha ovilela ni oheemererya mixankiho iyo sikikhulumulaka. Okathi wotheene, Yehova aahikivaha ikuru wira kiwerye oxintta”. (Esal. 94:18, 19) Yehova onnaaphenta vanceene atthu yaale hata arina ene mixankiho aniimananiha omurumeela.

16. Miruku xeeni sooloka munna Knorr anvanhe awe mwaarawe?

¹⁶ Muupuweleke itthu sa muhoolo. Abrahamu aanuupuwela mareeliho Yehova aarowa awe onvaha,  nto eyo yaahimukhaliherya ovilela mixankiho sawe. Murokora Audrey Hyde aahiimananiha okhalana moonelo wooloka nuumala iyawe oopacerya Nathan Homer Knorr okhwa mwaha wa kanser ni iyawe a nenli, Glenn Hyde owereiwa vanceene oretta oniihaniwa Alzheimer. * Etthu yaamukhalihenrye ti yeele Munna Knorr aahimmye awe isumana vakhaani ohinatthi okhwa. Audrey onihimya so: “Nathan aahikuupuxerya wira: ‘Nuumala okhwa yoolipelela ahu ti yekeekhai ni khaninrowa okhalana-tho mixankiho’. Nuumala-vo, aahikitumererya oriki: ‘Muupuweleke nlipelelo ni etthuvo anyu ya muhoolo’. . . . Aahincererya oriki: ‘Muluttuweliweke ovara muteko, okathi wotheene mwaakhaliheryeke atthu akina. Eyo enimookhaliheryani ohiyeleela ohakalala wanyu’”. Iye saari miruku sooloka sa oluttuweliwa ni waakhaliherya atthu akina ‘nitteliwaka murima mororomelani’.—aRom. 12:12.

17. (a) Xeeni nrina ahu mathowa manceene wira niwehexexeke itthu sa muhoolo? (b) Moota xeeni ovarihela muteko malakiheryo ari Mikeya 7:7, anrowa aya onikhaliherya ophwanya mareeliho muhoolo?

¹⁷ Olelo-va, nookhalana mathowa manceene wira niwehexexeke itthu sa muhoolo. Itthu siniiraneya molumwenkuni sinnooniherya wira ninkhala mpantta wookiserya wa mahiku ookiserya a olumwenku ola wootakhala. Moohipisa, khaninrowa olipelelaka wira epooma erina mathipelo eekeekhai epacerye olamulela valaponi. Ninnilipelela mareeliho manceene, ohela muhina okathi ninrowa ahu waaweha ale nnaaphenta ahu akhwiiye aahihimuxiwaka. Okathi owo, Yehova onoomureeliha Abrahamu mwaha wa waamini wawe ni opixa murima omuhihimuxaka owo ni emusi awe wira akhaleke valaponi. Niireke nyuwo munookhala okathi owo wira nwaakhele atthu awo? Munookhala, akhala wira ntoko siisaale Abrahamu munooleva itthu sikina mwaha wa Omwene wa Muluku, khamunihiya waamini wanyu hata murina ene mixankiho ni mwiixutta omulipelela Yehova moopixa murima.—Mmusome Mikeya 7:7.