1. Ano nga mga sakripisyo an ginhimo han damu nga surugoon han Dios, ngan kay ano nga ginhimo nira ito?

MINILYON han katawohan han Dios yana an naghihimo hin mga sakripisyo. Damu nga kabugtoan an nagdesisyon nga magpabilin nga solo. May mga mag-asawa nga nagdesisyon nga diri anay mag-anak. Ginpasimple han iba nga pamilya an ira kinabuhi. Hira ngatanan naghimo hini nga desisyon tungod han usa nga importante nga rason​—karuyag nira nga damu gud an ira mahimo ha pag-alagad kan Jehova tubtob ha ira makakaya. Kontento hira ngan nasarig nga ihahatag ni Jehova ha ira an ngatanan nira nga ginkikinahanglan. Makakalaom gud ba hira hito? Oo! Kay ano nga sigurado kita hito? Usa nga rason, tungod kay ginbendisyonan ni Jehova hi Abraham, an “amay . . . han ngatanan nga may pagtoo.”​—Roma 4:11.

2. (a) Sumala ha Hebreo 11:8-10, 16, kay ano nga kinaburut-on nga binaya hi Abraham ha Ur? (b) Ano an aton hihisgotan hini nga artikulo?

² Kinaburut-on nga ginbayaan ni Abraham an iya komportable nga kinabuhi ha syudad han Ur. Kay ano? Kay nagpipinamulat hiya han “syudad nga may tinuod nga mga pundasyon.” (Basaha an Hebreo 11:8-10, 16.) Ano ito nga “syudad”? Ano nga mga problema an gin-atubang ni Abraham samtang ginhuhulat niya nga maestablisar ito nga syudad? Ngan paonan-o kita magigin pariho kan Abraham ngan ha mga kabugtoan yana nga nagsusubad ha iya?

3. Ano an syudad nga ginpinamulat ni Abraham?

³ An syudad nga ginpinamulat ni Abraham amo an Ginhadian han Dios. Hi Jesu-Kristo ngan an 144,000 nga dinihogan nga mga  Kristiano an nagkukompwesto hito nga Ginhadian. Gintawag ni Pablo ito nga Ginhadian sugad nga “syudad han buhi nga Dios, an langitnon nga Jerusalem.” (Heb. 12:22; Pah. 5:8-10; 14:1) Gintutdoan ni Jesus an iya mga disipulo nga ig-ampo nga kumanhi ito nga Ginhadian basi matuman an kaburut-on han Dios dinhi ha tuna, sugad han ha langit.​—Mat. 6:10.

4. Sumala ha Genesis 17:1, 2, 6, mationan-o kadamu an hinbabaroan ni Abraham mahitungod ha syudad, o Ginhadian, nga iginsaad han Dios?

⁴ Maaram ba hi Abraham han mga detalye kon paonan-o maoorganisar an Ginhadian han Dios? Diri. Ha sulod hin hilawig gud nga panahon, “sagrado nga tinago” ito nga mga detalye. (Efe. 1:8-10; Col. 1:26, 27) Pero maaram hi Abraham nga magigin hadi an iba han iya mga tulin. Espisipiko nga iginsaad ito ni Jehova ha iya. (Basaha an Genesis 17:1, 2, 6.) May marig-on gud nga pagtoo hi Abraham ha mga saad han Dios salit sugad hin nakikita niya an Dinihogan, o Mesias, nga magigin Hadi han Ginhadian han Dios. Ito an rason nga ginsidngan ni Jesus an mga Judio hadto: “Hi Abraham nga iyo amay nalipay gud ha paglaom nga makita an akon adlaw, ngan nakita niya ito ngan nalipay hiya.” (Juan 8:56) Klaro, maaram hi Abraham nga an iba han iya mga tulin magigin bahin han usa nga Ginhadian nga ig-iestablisar ni Jehova, ngan andam hiya ha paghulat nga tumanon ni Jehova ito nga saad.

5. Paonan-o kita nahibaro nga ginpinamulat ni Abraham an syudad nga ginhimo han Dios?

⁵ Paonan-o iginpakita ni Abraham nga ginpinamulat niya an syudad, o Ginhadian, nga ginhimo han Dios? Una, waray magin tuminungnong hi Abraham ha bisan ano nga ginhadian dinhi ha tuna. Waray hiya mag-ukoy hin permanente ha usa nga lugar, nagburobalhin hiya ngan waray hiya sumuporta ha usa nga tawhanon nga hadi. Dugang pa, waray hiya mag-establisar hin kalugaringon nga ginhadian. Lugod, padayon niya nga ginsunod hi Jehova ngan ginhulat an katumanan han Iya saad. Pinaagi ha pagbuhat hito, iginpakita ni Abraham an iya daku gud nga pagtoo kan Jehova. Aton usisahon an pipira han mga problema nga iya gin-atubang ngan kitaon naton kon ano an aton mahibabaroan ha iya ehemplo.

6. Ano nga klase hin syudad an Ur?

⁶ An syudad nga ginbayaan ni Abraham protektado gud ngan komportable, ngan an mga  tawo didto edukado ngan riko. Protektado ito hin dagku nga pader ngan hin hilarom nga kanal ha tulo nga ligid hito. An mga tawo ha Ur maopay gud ha pagsurat ngan ha arithmetic. Ngan an syudad posible nga sentro han negosyo; damu nga dokumento ha negosyo an nadiskobrehan hito nga lugar han mga arkeologo. An mga balay hinimo ha briks; ginpalitadahan an mga bungbong hito ngan ginpintaran hin busag. An iba hini nga mga balay may-ada 13 o 14 nga kwarto nga nakapalibot ha bungsaran nga bato an salog.

7. Kay ano nga kinahanglan sumarig hi Abraham nga hi Jehova magpuproteksyon ha iya ngan ha iya pamilya?

⁷ Kinahanglan sumarig hi Abraham nga hi Jehova magpuproteksyon ha iya ngan ha iya pamilya. Kay ano? Hinumdumi nga ginbayaan nira Abraham ngan Sarah an ira talwas ngan komportable nga balay ha Ur basi mag-ukoy ha mga tolda ha kaumhan han Canaan. Hiya ngan an iya pamilya diri na protektado hin dagku nga pader ngan higlarom nga kanal. Masayon na hira yana maatake han mga kaaway.

8. Makausa, ano an naeksperyensyahan ni Abraham?

⁸ Ginbuhat ni Abraham an kaburut-on han Dios, pero makausa, nakurian hiya ha pagtagana hin pagkaon para ha iya pamilya. May-ada duro nga gutom ha lugar nga ginpakadtoan ha ira ni Jehova. Grabe gud ito nga gutom salit nagdesisyon hi Abraham nga temporaryo nga bumalhin ha Ehipto. Pero han nakadto na hira ha Ehipto, ginkuha ha iya han Paraon, nga magmarando han nasud, an iya asawa. Hunahunaa la an kabaraka nga inabat ni Abraham tubtob han ginkombinse ni Jehova an Paraon nga ibalik hi Sarah kan Abraham.​—Gen. 12:10-19.

9. Ano an nagin mga problema ni Abraham ha iya pamilya?

⁹ Nagkaada liwat seryoso nga mga problema an pamilya ni Abraham. An iya hinigugma nga asawa nga hi Sarah, diri nagkakaanak. Ha sulod hin damu ka tuig, nakapasubo ito ha ira. Ha urhi, iginhatag ni Sarah kan Abraham an iya surugoon nga babaye nga hi Hagar, basi magkaada hiya mga anak para kanda Abraham ngan Sarah. Pero han nagburod hi Hagar kan Ismael, gintamay niya hi Sarah. Nagin maraot gud an sitwasyon, salit linayas hi Hagar tungod kay ginpakaalohan hiya ni Sarah.​—Gen. 16:1-6.

10. Ano nga mga panhitabo may kalabotan kanda Ismael ngan Isaac an nagsari han pagsarig ni Abraham kan Jehova?

¹⁰ Ha urhi, nagburod hi Sarah ngan nanganak hin lalaki nga ginngaranan ni Abraham hin Isaac. Pariho hinigugma ni Abraham an iya mga anak nga hira Ismael ngan Isaac. Pero tungod han maraot nga pagtratar ni Ismael kan Isaac, napiritan hi Abraham nga paiwason hira Ismael ngan Hagar. (Gen. 21:9-14) Ha urhi, ginhangyo ni Jehova hi Abraham nga ihalad hi Isaac. (Gen. 22:1, 2; Heb. 11:17-19) Hiton duha nga kahimtang, kinahanglan sumarig hi Abraham nga tutumanon ni Jehova an iya mga saad mahitungod ha iya mga anak.

11. Kay ano nga kinahanglan maghulat hi Abraham kan Jehova hin mapailubon?

¹¹ Hito nga mga panahon, kinahanglan mahibaro hi Abraham ha paghulat kan Jehova hin mapailubon. Posible nga sobra 70 anyos hiya han binaya hiya ngan an iya pamilya ha Ur. (Gen. 11:31–12:4) Ngan ha sulod hin mga 100 ka tuig, nag-ukoy hiya ha mga tolda ngan nagburobalhin ha mga lugar ha Canaan. Namatay hi Abraham han 175 anyos hiya. (Gen. 25:7) Pero waray niya makita an katumanan han saad ni Jehova nga ihahatag ha iya mga tulin an tuna nga iya ginlaktan. Ngan waray niya maabti an kaestablisar han syudad, an Ginhadian han Dios. Bisan pa hito, iginhulagway hi Abraham nga namatay sugad nga “lagas na ngan kontento.” (Gen. 25:8) Bisan pa han mga problema nga gin-atubang ni Abraham, natipigan niya an iya marig-on nga pagtoo ngan malipayon nga naghulat kan Jehova. Kay ano nga nakapailob hiya? Kay ha bug-os nga kinabuhi ni Abraham, ginproteksyonan hiya ni Jehova ngan gintratar sugad nga sangkay.​—Gen. 15:1; Isa. 41:8; San. 2:22, 23.

12. Ano an aton ginpipinamulat, ngan ano an aton hihisgotan?

 ¹² Pariho kan Abraham, ginpipinamulat naton an syudad nga may tinuod nga mga pundasyon. Pero diri an kaestablisar hito an aton ginhuhulat. An Ginhadian han Dios naestablisar na han 1914 ngan bug-os nga nagmamando na ito ha langit. (Pah. 12:7-10) Pero ginhuhulat naton nga bug-os nga magmando ito ha tuna. Samtang ginhuhulat naton nga mahitabo ito, damu nga sitwasyon an kinahanglan naton atubangon nga puropariho han naeksperyensyahan nira Abraham ngan Sarah. Nasusubad ba han mga surugoon ni Jehova yana an ehemplo ni Abraham? An mga istorya han kinabuhi nga iginpupublikar ha An Barantayan nagpapakita nga pariho kanda Abraham ngan Sarah, damu yana an may pagtoo ngan pagpailob. Hisgotan naton an pipira hito ngan kitaon naton kon ano an aton mahibabaroan.

13. Ano an imo nahibaroan ha eksperyensya ni Brother Walden?

¹³ Magin andam ha pagsakripisyo. Kon karuyag naton unahon ha aton kinabuhi an syudad han Dios, an Ginhadian, kinahanglan magin pariho kita kan Abraham, nga nagin andam ha paghimo hin mga sakripisyo basi mapalipay an Dios. (Mat. 6:33; Mar. 10:28-30) Tagda an ehemplo han bugto nga hi Bill Walden. * Han 1942, hi Bill hirani na maggradwar ha usa nga unibersidad ha U.S. ha kurso nga architectural engineering han nagtikang hiya mag-aram ha mga Saksi ni Jehova. Gin-areglar han propesor ni Bill nga magkaada hiya trabaho pakagradwar dayon niya, pero waray niya ito karawata. Iginsaysay niya nga nagdesisyon na hiya nga bug-os nga mag-alagad ha Dios imbes nga kumarawat hin trabaho nga daku an sweldo. Waray pag-iha, gin-obligar hi Bill nga umapi ha militar. May respeto nga nagdumiri hiya ngan sugad nga resulta, ginpamulta hiya hin $10,000 ngan ginsentensyahan hin lima ka tuig nga kapriso. Ginpagawas hiya katapos hin tulo ka tuig. Ha urhi, gin-imbitar hiya nga umiskwela ha Gilead ngan nagin misyonero hiya ha Aprika. Katapos, ginpakaslan ni Bill hi Eva, ngan magkaupod nga nag-alagad hira ha Aprika, nga nagpapasabot nga kinahanglan nira maghimo hin mga sakripisyo. Paglabay  hin pipira ka tuig, binalik hira ha United States basi atamanon an nanay ni Bill. Hi Bill nagsiring mahitungod ha iya bug-os nga kinabuhi: “Nakakatangis ako kon ginhuhunahuna ko an makaruruyag gud nga pribilehiyo nga magamit ni Jehova ha pag-alagad ha iya hin sobra 70 ka tuig. Pirme ko hiya ginpapasalamatan nga gin-giyahan niya ako nga gamiton an akon kinabuhi ha pag-alagad ha iya.” Puydi mo ba liwat gamiton an imo kinabuhi ha bug-os-panahon nga pagministeryo?

14-15. Ano an imo nahibaroan ha eksperyensya nira Brother ngan Sister Apostolidis?

¹⁴ Ayaw paglaom nga magigin waray mga problema an imo kinabuhi. Nahibaroan naton tikang ha ehemplo ni Abraham nga bisan adton nag-aalagad kan Jehova ha ira bug-os nga kinabuhi may-ada la gihapon mga problema. (San. 1:2; 1 Ped. 5:9) Iginpapakita han eksperyensya ni Aristotelis Apostolidis nga tinuod ito. * Nabawtismohan hiya han 1946 ha Greece, ngan han 1952, nagkasabot hira han sister nga hi Eleni nga magpakasal ngan karuyag nira nga mag-alagad hin bug-os-panahon kan Jehova. Pero nagkasakit hi Eleni ngan nadayagnos nga may tumor ha utok. Gintanggal an iya tumor, pero paglabay la hin pipira ka tuig katapos nira makasal, nagkaada hiya utro tumor. Gin-operahan utro hi Eleni, pero may parte han iya lawas nga naparalisa, ngan naapektohan an iya pagyakan. Nagpabilin hiya nga madasigon nga ministro bisan pa han iya sakit ngan han pagtimaraot han gobyerno hito nga panahon.

¹⁵ Gin-ataman ni Aristotelis an iya asawa ha sulod hin 30 ka tuig. Hito nga panahon, nag-alagad hiya sugad nga tigurang, kaapi hiya ha mga komite ha asembleya, ngan binulig ha konstruksyon han usa nga Assembly Hall. Han 1987, naaksidente hi Eleni samtang nagsasangyaw. Na-coma hiya hin tulo ka tuig ngan katapos, namatay. Iginsaysay ni Aristotelis kon paonan-o nakaapekto ha iya ini nga mga eksperyensya: “Ha sulod hin mga tuig, nagkaada ako damu nga problema, ngan an iba hito tigda la ngan diri ginlalaoman. Salit kinahanglan ko gud magin determinado nga magpailob ngan diri tugotan an bisan ano nga magpaluya ha akon. Pero pirme ako gintatagan ni Jehova hin kusog basi makaya ini nga mga problema.” (Sal. 94:18, 19) Hinigugma  gud ni Jehova adton nagbubuhat han ngatanan nira nga mahihimo para ha iya bisan pa han ira mga problema!

16. Ano nga maopay nga sagdon an iginhatag ni Brother Knorr ha iya asawa?

¹⁶ Pagpokus ha tiarabot. Nagpokus hi Abraham ha mga bendisyon nga ihahatag ha iya ni Jehova ngan nakabulig ini ha iya nga makaya an mga problema. Hi Sister Audrey Hyde nangalimbasog nga magpabilin nga positibo, bisan kon an iya una nga asawa nga hi Nathan H. Knorr, namatay tungod han kanser ngan an iya ikaduha nga asawa nga hi Glenn Hyde, nagkasakit hin Alzheimer’s. * Nagsiring hiya nga nakabulig an ginsiring ha iya ni Brother Knorr pipira ka semana antes hiya mamatay. Hiya nagsiring: “Ginpahinumdoman ako ni Nathan nga kamatay naton, sigurado na an aton paglaom ngan diri na gud kita mag-aantos utro hin kasakit. Katapos, ginsagda niya ako: ‘Kitaa an aada ha unhan, tungod kay an imo balos aada ha tidaraon.’ . . . Hiya nagdugang: ‘Padayon nga magin okupado​—pangalimbasog ha paggamit han imo kinabuhi ha pagbuhat para ha iba. Mabulig ini ha imo nga malipay ha kinabuhi.’” Maopay gud ito nga sagdon nga padayon nga magin okupado ha pagbuhat hin maopay para ha iba ngan ‘magrayhak tungod han paglaom’!​—Roma 12:12.

17. (a) Kay ano nga may maopay kita nga rason nga magpokus ha tiarabot? (b) Paonan-o an pagsunod ha ehemplo nga nakarekord ha Micas 7:7 mabulig ha aton nga makarawat an tiarabot nga mga bendisyon?

¹⁷ Yana, mas damu gud an aton rason nga magpokus ha tiarabot. An mga panhitabo ha kalibotan klaro nga nagpapakita nga aanhi na kita ha ultimo nga bahin han kataposan nga mga adlaw hini nga sistema. Diri mag-iiha, diri na naton kinahanglan maghulat nga magmando ha bug-os nga tuna an syudad nga may tinuod nga mga pundasyon. Usa han damu nga bendisyon nga aton makakarawat amo an pagbanhaw han aton namatay na nga mga hinigugma. Hito nga panahon, babalosan ni Jehova hi Abraham tungod han iya pagtoo ngan pagpailob pinaagi ha pagbanhaw ha iya ngan han iya pamilya dinhi ha tuna. Aadto ka ba hito nga panahon basi tapoon hira? Mahitatabo ito kon pariho kan Abraham, andam ka ha paghimo hin mga sakripisyo para ha Ginhadian han Dios, kon titipigan mo an imo pagtoo bisan pa han mga problema, ngan kon mapailubon nga maghuhulat ka kan Jehova.​—Basaha an Micas 7:7.