1. Иегова кажыбыска ла нени берген?

БИСТИ сӱӱп турган Иегова Адабыс кажы ла чындык ишчизине бойыныҥ организациязында јер берип салган. Јуунда бистиҥ кажыбыста ла эдетен ижис бар. А Иегова ончобысты баалап јат. Бис бастырабыс бой-бойыска керектӱ болодыс. Бу јаан учурлу шӱӱлтени оҥдоорго, апостол Павелдиҥ самаралары болужат. Андагы кезик шӱӱлтелерди кӧрӱп ийектер.

2. Эфестегилерге 4:16-ла болзо, биске нениҥ учун ака-эјелерди тооп, олорло кожо иштенер керек?

² Бу јӧрмӧлдиҥ тӧс ӱлгери аайынча болзо, бисте Иегованыҥ ишчилерине: «Слер меге керек јок» — деп, айдатан арга јок (1 Кор. 12:21). Јуунда амыр-энчӱ болзын деп турган болзоос, биске ончо ака-эјелерди тоор керек ле олорло ӧмӧ-јӧмӧ иштенер керек. (Эфестегилерге 4:16 кычырыгар.) Ол тушта јуун ӧзӱп, сӱӱжи тыҥыыр.

3. Бис бу јӧрмӧлдӧ нени шӱӱжерис?

³ Јуундагы ака-эјелеристи тооп турганысты канайып кӧргӱзерис? Бу јӧрмӧлдӧҥ аксагалдар бой-бойын канайып тоор аргалу деп билип аларыс. Анайда ок бойдоҥ ака-эјелерди канайып баалап турганысты канайып кӧргӱзерин ле бистиҥ тилге јакшы куучындабай турган ака-эјелерди сӱӱп турганысты канайып кӧргӱзерин шӱӱжип ийерис.

4. Римдегилерге 12:10-до Павел аксагалдарга кандый јӧп берген?

⁴ Јуундагы кажы ла аксагал Иегованыҥ агару тыныла тургузылган. Аксагалдар башка-башка, олордыҥ айалгазы да, аргазы да башка (1 Кор. 12:17, 18). Кезиги бу јуукта аксагал болуп баштаган, оныҥ учун олордыҥ ченемели ас. Кезигиниҥ јажы јаанап калган эмезе су-кадыгы уйадап калган. Је аксагалдар бой-бойына: «Слер меге керек јок» — деп айтпай јат. Карын олордыҥ кажызы ла Римдегилерге 12:10-гы (кычырыгар) јӧпти бӱдӱрип јат.

5. Аксагалдарга бой-бойын нениҥ учун тооп турар керек ле олор мыны канайып эдет?

⁵ Аксагалдардыҥ бой-бойын тооп турганы олордыҥ бой-бойын лаптап угуп турганынаҥ кӧрӱнет. Аксагалдардыҥ јӧби јуулыжып, јаан учурлу сурактар шӱӱжип турза, анчада ла бой-бойын тоор керек. Нениҥ учун? 1988 јылдыҥ ӱлӱрген айыныҥ 1-кы кӱниниҥ английский тилге чыккан «Каруулчы шибеезинде» мынайып айдылган: «Аксагалдарга кӱч сурактыҥ аайына чыгарга эмезе јаан учурлу јӧп чыгарарга, кандый библиялык принцип јараарын Христос агару тынныҥ болужыла кажы бир аксагал ажыра кӧргӱзип берер аргалу деп оҥдоп турар керек (Ап. ижи 15:6—15). Агару тын јӱк ле бир аксагалга эмес, је аксагалдардыҥ ончозына теҥ берилет».

6. Аксагалдарга бой-бойыла ӧмӧ-јӧмӧ иштенерге не болужат, мынаҥ јуунга кандый туза болот?

⁶ Ӧскӧ аксагалдарды тооп турган аксагал кажы ла суракта бойыныҥ шӱӱлтезин јаантайын ла эҥ озо айдарга албаданбай јат. Аксагалдардыҥ шӱӱжип јаткан ӧйинде ол јаҥыс бойы куучындабай јат ла јӱк оныҥ кӧрӱми чын деп сананбай јат. Ол бойыныҥ кӧрӱмин јобош этире айдар ла аксагалдардыҥ айтканын лаптап угар. Је эҥ керектӱзи ого библиялык принциптерди шӱӱжерге ле «бӱдӱмјилӱ ле керсӱ кулдыҥ» башкартуларын угарга белен болор керек (Матф. 24:45—47). Бу ӧйдӧ аксагалдар бой-бойына  тоомјылу ла сӱӱштӱ баштанып турза, олордыҥ ортозында агару тын болор. Агару тын дезе, олорго јуунды тыҥыдатан шӱӱлтелер эдерге болужар (Иак. 3:17, 18).

7. Иисус биле тӧзӧбӧгӧн улуска канайып баштанган?

⁷ Бистиҥ јуундарда билелӱ де, биле тӧзӧбӧгӧн дӧ улус бар. Је биске биле тӧзӧбӧгӧн улуска кандый кӧрӱмдӱ болор керек? Иисустыҥ темин кӧрӱп ийектер. Јерде болордо, ол биле тӧзӧбӧгӧн. Иисус ӱренчиктерине биле тӧзӧӧр керек эмезе бир де биле тӧзӧбӧс керек деп качан да айтпаган. Је кезик христиандар биле тӧзӧбӧс деп айткан (Матф. 19:11, 12). Иисус андый ака-эјелерге тоомјылу баштанган. Ол андый улусты уйан кӧрбӧгӧн лӧ олорды карамдаар керек деп сананбаган.

8. 1 Коринфтегилерге 7:7—9-ла болзо, Павел нени сананып кӧрзин деп кӱӱнзеткен?

⁸ Апостол Павел Иисус ла чылап Кудайга иштеген тужында биле тӧзӧбӧгӧн. Павел христиандарды биле тӧзӧбӧзин деп качан да ӱретпеген. Ол бу суракты кажы ла кижи бойы кӧрӧт деп оҥдоп туратан. Је андый да болзо, ол христиандарды биле тӧзӧбӧй, Иеговага иштеп болор бо деп сананарга кӱӱнзеткен. (1 Коринфтегилерге 7:7—9 кычырыгар.) Павел биле тӧзӧбӧгӧн христиандарды качан да јаман кӧрбӧгӧн. Темдектезе, ол кижи албаган јиит Тимофейге јаан молјулар берген болгон (Флп. 2:19—22) *. Оныҥ учун ака кижи албаган ла дейле, каруулу молјулар бӱдӱрип болбос деп сананары јастыра болор эди (1 Кор. 7:32—35, 38).

9. Биске биле тӧзӧӧрине эмезе биле тӧзӧбӧй јӱрерине кандый кӧрӱмдӱ болор керек?

⁹ Айдарда, Иисус та, Павел де христиандар биле тӧзӧӧр учурлу эмезе биле тӧзӧбӧс учурлу деп качан да ӱретпеген. 2012 јылдыҥ ӱлӱрген айыныҥ 1-кы кӱниниҥ «Каруулчы шибеезинде» мынайып айдылган: «[Биле тӧзӧӧрин де, биле тӧзӧбӧй јӱрерин де] Кудайдыҥ сыйы деп айдарга јараар. [...] Иегованыҥ кӧрӱмиле болзо, бойдоҥ јӱрген ака-эјелерде јаҥыскан јӱргенинеҥ уйалатан эмезе кунугатан неме јок». Андый болордо, бистерге биле тӧзӧбӧгӧн ака-эјелерди тоор керек.

10. Биле тӧзӧбӧгӧн христиандарды тооп турганысты канайып кӧргӱзерис?

 ¹⁰ Бис биле тӧзӧбӧгӧн христиандарды тооп турганысты канайып кӧргӱзерис? Кезик ака-эјелер ӧнӧтийин биле тӧзӧбӧй јат деп, биске ундыбас керек. Ӧскӧлӧри дезе, биле тӧзӧӧр кӱӱндӱ де болзо, је јарагадый кижиге туштабаган. Анайда ок јуунда эш-нӧкӧри божогонынаҥ улам јаҥыскан артып калган ака-эјелер база бар. Кандый да болзо, андый ака-эјелер нениҥ учун биле тӧзӧбӧгӧнин сураарыс па эмезе кижи табып берерге албаданарыс па? Је та кем де бойы болуш сураар болор. А кем де болуш сурабаган болзо, а слер олорго болужарга албаданып турзагар, олор нени сезер болор? (1 Фес. 4:11; 1 Тим. 5:13). Мындый айалгага кирген кезик ака-эјелердиҥ учуралдарын кӧрӱп ийектер.

11, 12. Бис бойдоҥ ака-эјелерди канайып эби јок айалгага тургузардаҥ айабазыс?

¹¹ Иеговага кӧп иштеп турган, кижи албаган бир аймак кӧрӧӧчи кижи албаганынаҥ јаан туза кӧрӧт. Је кезикте ака-эјелер јакшы ла сананып: «Сен нениҥ учун эмдигенче кижи албагаҥ?» — деп сураганы кижиниҥ санаазын булгап ийет деп, ол айдат. Бет-Элде иштеп турган кижи албаган база бир ака мынайып айдат: «Кезикте ака-эјелер кижи албаган аканы эмезе кижиге барбаган эјени карамдап турган деп билдирет. Је мынаҥ улам биле тӧзӧбӧгӧн ака-эјелер, јаҥыскан јӱрери сый эмес, је уур јӱк деп сананардаҥ айабас».

¹² Бет-Элде иштеп турган бир эје мынайып куучындайт: «Кезик христиандардыҥ санаазыла болзо, биле тӧзӧбӧгӧн ака-эјелердиҥ ончозы кижи ле табып аларга албаданат. Оныҥ учун кайда ла јӱрзе, кемле-кемле таныжып ийер арга бедирейт. Бир катап мен Бет-Элдиҥ ижиле колбой, ороонныҥ ӧскӧ калазына баргам. Једип барган кӱнде јуунныҥ туштажузы болгон. А мени јатыргыскан эје, оныҥ јуунында мениле јажыт эки ака бар деп айткан. Ол меге кижи бедиребей јадым деген де болзо, је Каандыктыҥ Туразына кирип ле келеристе, байагы эки акала таныштырып баштаган. Мынаҥ улам бис ӱчӱ арай ла болзо јердиҥ алдына кире бербегенис».

13. Бир эјеге кемниҥ темдери болужат?

¹³ Бет-Элде иштеп турган база бир эјениҥ сӧстӧри: «Мен узак јылдарга пионер болуп, биле тӧзӧбӧй јӱрген кӧп ака-эјелер билерим. Олор амадуларына једерге албаданып турган, агару ижин сӱӱп турган ла бойын килебей, јуунга кӧп иш эдип турган тӧӧп улус. Андый ака-эјелер биле тӧзӧбӧй јӱрерине чын кӧрӱмдӱ болот, ӧскӧртӧ айтса билелӱ ака-эјелердеҥ бийиркенбей јат ла эш-нӧкӧри јӧк јӱргенинеҥ улам бойлорын уйан деп сананбай јат». Айдарда, кажызы ла бой-бойын тооп ло баалап турган јуунда болорго, кандый јакшы! Андый јуунда кем де кемге де кӱйӱнбей јат, кем де бийиркенбей јат, кемди де уйан кӧрбӧй јат ла кемди де эҥ артык деп кӧдӱрбей јат. Карын кажызы ла бой-бойыныҥ сӱӱжин кӧрӧт.

14. Биле тӧзӧбӧгӧн христиандарды тооп турганысты канайып кӧргӱзерис?

¹⁴ Бис бойдоҥ ака-эјелерди карамдабай, карын олордыҥ јакшы кылык-јаҥына ајару эдип турзаас, олор биске быйанду болор. Ол тушта бис: «Слер меге керек јок» — деп айдып турган улус ошкош болбозыс (1 Кор. 12:21). Анайып олор јуун олорды тооп ла баалап турган деп билип турар.

15. Кезик христиандар јарлаар иште кӧптӧдӧ иштеерге, јӱрӱмин канайып солыган?

¹⁵ Калганчы јылдарда кӧп јарчылар јарлаар иште кӧптӧдӧ туружарга, ӧскӧ тил ӱренип јат. Оныҥ учун олор јӱрӱминде јаан солынталар эткен. Андый ака-эјелер кӧп јарчылар керек болуп турган ӧскӧ јуундарга кӧчкӧн (Ап. ижи 16:9). Олор мындый алтамды Иеговага кӧптӧдӧ иштеерге болуп эткен. Олорго јаҥы тил ӱренерге канча да јыл керек болордоҥ айабас, је андый да болзо, олор јуунга јаан болуш болот. Олордыҥ сӱрекей јакшы кылык-јаҥы ла ченемели ака-эјелердиҥ бӱдӱмјизин тыҥыдат. Бис бойын килебес андый христиандарды тыҥ баалап јадыс!

16. Аксагалдар неге тайанып, аканы аксагал эмезе болушчы ишчи эдип кӧстӧп јадылар?

¹⁶ Аксагалдардыҥ јӧбине, ака јуунныҥ тилин јакшы билбес ле дейле, аксагал эмезе болушчы ишчи болор аргазы јок деп сананбас керек. Аксагалдар андый аканы јуунныҥ тилин канча кире јакшы билерине кӧрӱп кӧстӧӧр эмес, је кӧстӧлгӧн акаларга тургузылган библиялык некелтелерге тайанып кӧстӧӧр (1 Тим. 3:1—10, 12, 13; Тит. 1:5—9).

17. Ӧскӧ ороонго кӧчкӧн билелерге нени шӱӱп сананар керек?

¹⁷ Кезик христиан билелер ороонындагы кӱч айалганаҥ качып эмезе иш бедиреп, ӧскӧ ороонго кӧчкӧндӧр. Олордыҥ балдары школ барып турган болзо, школдо олор ороонныҥ тилине ӱренип турган болор. Олордыҥ ада-энелерине де ишке кирерге јаҥы тил ӱренерге келижет. Је анда олордыҥ тилине јуун эмезе кичинек бӧлӱк бар болзо, нени эдер керек? Олорго бойыныҥ тилиниҥ јуунына барар керек пе эмезе јербойыныҥ тилине ӧткӱрилип турган јуунга јӱрер керек пе?

18. Галаттарга 6:5-те айдылганыла, билениҥ бажыныҥ чыгарган јӧбин тооп турганысты канайып кӧргӱзерис?

¹⁸ Билениҥ бажына оныҥ билези кандый јуунга јӱрерин шӱӱп сананып алар керек. Мыны сананып тура, билениҥ керексиништерин ајаруга алар керек. (Галаттарга 6:5 кычырыгар.) Бу кажы ла кижи бойы кӧрӧтӧн сурак. Оныҥ учун билениҥ бажыныҥ чыгарган јӧбин тооп, бу билени бистиҥ јуунга келзе, јылу уткыыр керек (Рим. 15:7).

19. Билениҥ бажына нени мӱргӱп, шӱӱп сананар керек?

¹⁹ Кезик билелер ада-энелериниҥ тилине ӧдӱп турган јуунныҥ туштажуларына јӱрет, је балдар дезе бу тилди оҥдобой барган болор. Андый јерлерде улус кӧп сабада ороонныҥ тилине куучындажат, анайда ок балдар школдо ада-энезиниҥ тилине эмес, је ороонныҥ тилине ӱренет. Оныҥ учун балдарга  туштажуларды оҥдоорго ло кӧгӱс јанынаҥ ӧзӧргӧ кӱч болордоҥ айабас. Мындый айалгада билениҥ бажына бойыныҥ балдарына Иеговага ла оныҥ албатызына јуук болзын деп болужарга, ӱзе немени јазап шӱӱп сананып, Иегованаҥ ойгор сураар керек. Ада-энелер балдарын бойыныҥ тӧрӧл тилине ӱредер керек эмезе балдарына јарт тилге ӧдӱп турган јуунга кӧчӧрин сананар керек. Андый билениҥ бажы кандый да тӱп-шӱӱлтеге келзе, олордыҥ јӱретен јууны олорды тоор керек ле баалаар керек.

20. Јаҥы тил ӱренип турган ака-эјелерди тооп турганысты канайып кӧргӱзерис?

²⁰ Ӧрӧги айдылган кӱчтердеҥ улам јуундарда јаҥы тилди ӱренерге кӱч болуп турган ака-эјелер бар. Олорго бойыныҥ санаа-шӱӱлтезин айдарга кӱч болуп турган болор. Бис, олор бистиҥ тилиске канайып куучынданып турганына јаан ајару этпей турзаас, олор Иегованы акту јӱрегинеҥ сӱӱп турган ла ого иштеерге кӱӱнзеп турган деп, кӧрӱп ийерис. А олордыҥ јакшы кылык-јаҥдарын кӧрӱп, бис олорды тооп, баалап турарыс. Ака-эјелерди бистиҥ тилди јакшы билбес ле дейле олорго: «Слер меге керек јок» — деп айтпазыс.

21, 22. Бис Иеговага нениҥ учун быйанду болодыс?

²¹ Бис Иеговага оныҥ јуунында иштейтен арга бергенине јаан быйанду болодыс. Бис эр де ӱй де кижи болзоос, биле тӧзӧгӧн биле тӧзӧбӧгӧн дӧ болзоос, јажыс јаан да јиит те болзоос, бис ончобыс Иеговага ла бой-бойыска баалу болодыс (Рим. 12:4, 5; Кол. 3:10, 11).

²² Апостол Павелдиҥ эт-канныҥ ӱйелери керегинде айткан темин ундыбай турактар ла бу јӧрмӧлдӧ шӱӱшкенисти тузаланып јӱректер. Анайып бисте ака-эјелердиҥ кӱӱнин кӧдӱретен ле олорды сӱӱп, баалайтан јаҥы аргалар ачылар.