1. Yehova umio kaka ma kani ni jurutic pare ma gibegwoko bedoleng’ migi ire?

YEHOVA umaru jurutic pare ceke ma gibegwoko bedoleng’ migi ire, uketho emio igi kaka ma gibed ko i cokiri pare. Kadok ng’atuman m’i kindwa utie ku tic ma tung’ tung’ i cokiri de, re wan ceke piwa tie tek, man ng’atuman utie ku yeny pa wadi. Jakwenda Paulo ukonyowa nenedi ninyang’ i lembe maeno?

2. Nimakere ku Juefeso 4:16, pirang’o ukwayu wanen ng’atuman ni gin ma pire tek i cokiri, man watim tic i acel?

² I giragora ma thiwiwec maeni ucungo i wie, jakwanda Paulo unyutho kamaleng’ nia ng’atu moko mbe i kindwa m’umaku uwac ni wadi nia “kony peri mbe i bang’a.” (1 Kor. 12:21, B.L.L.) Ka wamito kwiocwiny ubed i cokiri, ukwayu wanen ng’atuman ni gin ma pire tek man watim tic i acel. (Som Juefeso 4:16.) Ka wabetimo tic i acel, ng’atuman binwang’u nia jumare man cokiri bicungo ma tek.

3. Wabiweco iwi lembang’o i thiwiwec maeni?

³ Wacopo nyutho woro ni umego ku nyimego mwa mi cokiri i yo ma kani? I thiwiwec maeni, wabiweco iwi kite ma judong’ cokiri gicopo nyutho ko woro i kindgi. Wabiweco bende iwi kite ma wan ceke wacopo nyutho ko woro ni umego  ku nyimego mwa ma gi jumusuma. Man i ng’eye, wabineno kite ma wacopo nyutho ko nia wamaru Jukristu wadwa ma giweco dhok mwa cuu ngo.

4. Judong’ cokiri gicikiri niworo juk ma kani ma jakwenda Paulo ukiewo ma wang’ere i Jurumi 12:10?

⁴ Judong cokiri ceke tipo ma leng’ pa Yehova re m’ung’iogi. Ng’atuman m’i kindgi utie ku copo m’ukoc ku pa wadi. (1 Kor. 12:17, 18) Ju moko m’i kindgi copo bedo ngo ku ng’eyong’ec ma rom ku mi juwadi, pilembe nwang’u fodi gidoko judong cokiri i nindo ma nok. Jumange ke, peko mi tio ku remo copo cerogi nitimo lembe dupa. Kadok kumeno de, jadit cokiri moko mbe m’ucikere nicayu wadi, m’ewac ko ire nia, “kony peri mbe i bang’a.” Jadit cokiriman ucikere niworo juk ma jakwenda Paulo ukiewo ma nwang’ere i Jurumi 12:10.​—Som.

5. Judong cokiri gicopo nyutho woro i kindgi nenedi, man pirang’o pire tie tek?

⁵ Judong cokiri copo nyutho woro i kindgi nwang’u ng’atuman ubewinjo wadi kilili kinde ma gibeweco. Asagane kinde ma gibeweco iwi lembe moko i guriri mi judong cokiri. Pirang’o? Otkur ma Wiw mi nindo 1, dwi mir 10, oro 1988 (mi Français), uwacu kumae: “Judong cokiri ging’eyo nia ku kony mi tipo ma leng’, Kristu copo telo wi paru pa jadit cokiri moko ci mi guriri, pi ninwang’u cik mir ukungu mi Biblia ma copo konyogi niyiko lembe man ma copo ketho gimaku yub ma pire tek. (Tic. 15:6-15) Jadit cokiri moko mbe m’ucikere niweco kwa kende i saa mi coko mi judong cokiri.”

6. Judong cokiri gicopo timo tic i acel nenedi man eno copo mio kony ma kani ni cokiri?

⁶ Jadit cokiri m’ubeworo judong cokiri wagi, sayu ngo nia elar ewec kwa en kinde ma gibetimo coko karacelo ku juwagi. Emito ngo ewec kwa kende man ecerere ngo nia lembe m’eyero re m’utie ma cuu. Ento eyero paru pare ku jwigiri man ewinjo lembe ma juwagi beyero kilili. Musagu zoo, emaru nitio ku cik mir ukungu mi Biblia man elubo telowic pa  “jamiru mandha [man] ma riek.” (Mat. 24:45-47) Ka judong cokiri gibenyutho mer man woro i kindgi kinde ma gibeweco iwi lembe moko, tipo ma leng’ pa Mungu bedo kugi man etelo wigi kara gimak yub ma copo tielo cokiri.​—Yak. 3:17, 18.

7. Yesu ubino ku paru ma kani iwi bedo musuma?

⁷ I cokiri, junwang’u ju m’ugamiri m’awiya migi mbe ku m’awiya migi nuti. Re junwang’u bende umego ku nyimego ma jumusuma. Dong’ ukwayu wabed ku nen ma nenedi iwi jumusuma? Wakenen paru ma Yesu ubino ko iwi bedo musuma. Yesu ubino jamusuma i nindo ceke m’etimo ie tic pare iwi ng’om. Etio ku saa pare man eketho wie akeca i kum tic m’umiyere ire. Eponjo ngo nia ukwayu julubne gigamiri kokoro, kunoke gibed jumusuma. Ento ewacu nia Jakristu copo ng’io en gire nibedo jamusuma kunoke ngo. (Mat. 19:11, 12) Yesu ubed unyutho woro ni jumusuma. Ebed eneno ngo nia ju m’ugamiri pigi tek niloyo jumusuma, kunoke nia jumusuma gikoso piny moko ma pire tek i kwo migi, pilembe gigamiri ngo.

8. Nimakere ku 1 Jukorinto 7:7-9, Paulo uketho cwiny Jukristu nia gitim ang’o?

⁸ Calu Yesu, jakwanda Paulo bende ubino jamusuma kinde m’ebino timo tic mi rweyo lembanyong’a. Paulo uponjo ngo nyanok de nia etie rac nigamiri. Eng’eyo nia eno tie lembe ma ng’atini ng’io en gire. Re eketho cwiny Jukristu nia ginen gin gigi ka nyo ecopere igi nibedo jumusuma pi nitimo ni Yehova. (Som 1 Jukorinto 7:7-9.) M’umbe jiji, Paulo ubed ucayu ngo Jukristu ma jumusuma. Lembuno unen kamaleng’ kinde m’eng’io Timoteo ma de ubino jamusuma pi nitimo tic ma pire tek. * (Flp. 2:19-22) Pieno, etie ber ungo niparu nia umego m’ugamere ci uromo nitimo lembe moko, jamusuma ke nia uromo ngo.​—1 Kor. 7:32-35, 38.

9. Ukwayu wabed ku nen ma kani iwi gamiri man iwi bedo musuma?

⁹ Yesu giku Paulo ceke giponjo ngo nia Jakristu ucikere nigamere kokoro kunoke ebed jamusuma. Dong’ wacopo bedo ku nen ma kani iwi gamiri man iwi bedo musuma? Dwoko wang’ penji maeno nwang’ere i Otkur ma Wiw (mi Français), mi nindo 1, dwi mir 10,  oro 2012, m’uwacu kumae: “I andha, [gamiri ku bedo musuma] ceke utie giramia m’uai i bang’ Mungu. . . . Yehova neno ngo bedo musuma ni gin ma mio lewic ni ng’atini kunoke ma mio can.” Pieno, ukwayu wanen umego ku nyimego ma jumusuma nia pigi tie tek i cokiri.

10. Ka wamito wanyuth woro ni umego ku nyimego ma jumusuma, ukwayu kud watim ang’o?

¹⁰ Wacopo nyutho woro nenedi ni umego ku nyimego mwa ma jumusuma pi kite ma giwinjiri ko man pi lembe ma gibekadhu kud i ie? Ukwayu wang’ei nia Jukristu moko gimaku yub mi bedo jumusuma i kwo migi. Jumange ke utie ku yeny mi gamiri, ento fodi ginwang’u ngo ng’atu ma cuu ma gigamiri kugi. Jumange lundo judhoggi mi gamiri utho athoa. Kadok kumeno de, nyo wacikara nipenjogi nia pirang’o gibegamiri ngo, kunoke nikwayu nia wakonygi ninwang’u ng’atu moko ma gicopo gamiri kugi? Saa moko jumusuma copo kwayu kony i lembe maeno. Re kagikwayu ngo nia ikonygi, gicopo winjiri nenedi pi kony m’ibemio igine? (1 Tes. 4:11; 1 Tim. 5:13) Wakenen lembe moko m’umego ku nyimego ma jumusuma giyero.

11-12. Lembang’o ma copo turo cwiny jumusuma?

¹¹ Jaliew mi twidiri moko ma jamusuma m’ubino timo tic pare mi liewo cokiri ma ber, unwang’u nia bedo jamusuma utie ku bero dupa. Re ewacu nia lembe ma time rac utie kan umego ku nyimego gibepenje nia “pirang’o fodi igamu ngo?” Umego mange ma jamusuma ma timo i Bethel uwacu kumae: “Saa moko umego ku nyimego giketho juparu nia ve jumusuma gibeneno can lee. Eno ketho juneno ve bedo musuma utie ngo giramia ento etie ter.”

¹² Nyamego moko ma jamusuma, ma en bende etimo tic i Bethel uwacu nia, “Umego ku nyimego moko giparu nia jamusuma ci utie ng’atu m’ubesayu jadhoge ma gigamiri kude. Man nia jumusuma ceke neno lembe ma coko dhu dhanu, ni yo ma gicopo nwang’u ko judhoggi mi gamiri. Nindo moko kinde ma Bethel uora nicitimo tic kaka moko, atundo tap i ceng’ ma jutimo ie coko. Nyamego ma jugonja i bang’e uwacu ira nia, umego moko ario ma jumusuma utie i cokiri pare, ma oro migi urombo tap ku para. Re ewacu ira nia, ebeyero ngo lembene ma nia kara wagamara kugi. Re kinde ma fodi wamondo amanda i Ot Ker ci, etera wang’acel i bang’ umegonegi kara wawec kugi. Wakud umegonegi ceke, wiwa wok ukwot ku lewic mi tuko ngo!”

13. Lapor ma kani m’utielo cwiny nyamego moko ma jamusuma?

¹³ Nyamego mange ma jamusuma ma en de etimo tic i Bethel, ukoro kumae: “Ang’eyo juyab yo moko ma jumusuma ma oro migi dong’ ucidho, re gibedo ma ber. giketho wigi i kum tic migi, gibemiiri nikonyo jumange, gitie kud anyong’a i tic migi man gibemio kony lee ni cokiri. Giparu ngo nia gitie jumusuma ci ya pigi tie tek nisagu jumange, kunoke nia tijgi mbe pilembe gigamiri ngo man awiya migi de mbe.” Etie lembe ma ber dit nibedo i cokiri ma ng’atuman m’i ie neno wadi ni gin ma pire tek. Ng’atu moko mbe ma ketho iwinjiri nia ve ibeneno can. Man ng’atu ma kumira nege i kumi de mbe, m’ubevoni de mbe, kadi m’ubeneno nia isagu dhanu ceke de mbe. Ento ing’eyo kende kende nia jumeri.

14. Wacopo nyutho woro nenedi ni umego ku nyimego mwa ma jumusuma?

¹⁴ Umego ku nyimego mwa ma jumusuma gibedo kud anyong’a tek wabeneno nia pigi tie tek i iwa pi kite migi ma beco, ento ungo pilembe nia musuma uketho gineno can. Mito wafoigi pi gwoko bedoleng’  migi. Eno biketho gibiparu ngo nia wabeyero igi kumae: “kony peri mbe i bang’a.” (1 Kor. 12:21, B.L.L.) Ento gibing’eyo nia wamarugi, wanyutho igi woro man pigi tie tek i cokiri.

15. Jukristu moko gitimo alokaloka ma kani pi nitimo lee i tic mi lembanyong’a?

¹⁵ I oro m’ukadhu ceng’ni eni, jurwei lembanyong’a dupa giketho lembakeca mi ponjo dhok ma nyen, pi nitimo lee i tic mi lembanyong’a. Gitimo alokaloka lee i kwo migi pi nitundo i kum lembakeca maeno. Giweko cokiri mi dhok migi mir anyoli man gidok i cokiri mi dhok mange ma yeny mi jurwei lembanyong’a tie lee i ie (Tic. 16:9) Eno tie yub ma Jakristuman maku en gire pi nitimo lee ni Yehova. Kadok ning’eyo dhok ma nyen cuu copo camu oro dupa de, re eno ubecerogi ngo nitimo lembe dupa ma beco i cokiri. Kite mabeco ma gitie ko man lembe ma ging’eyo ubekonyo cokiri nidoko tek. Umego ku nyimego ma giwodhiri kumeno pigi tie tek lee i iwa!

16. Pi ning’io nia umego moko uromo nibedo jadit cokiri kunoke jakony tic, ukwayu judong cokiri gijengiri iwi ang’o?

¹⁶ Guriri mi judong cokiri ucikere ngo nicero umego moko nidoko jakony tic kunoke jadit cokiri kende kende pilembe ya eweco dhok mi cokiri cuu ngo. Ukwayu judong cokiri gijengiri iwi giragora pi nineno nia umego moko uromo nibedo jadit cokiri kunoke jakony tic, ento ungo iwi dhok mi cokiri m’umegone ng’eyo cuu kunoke ngo.​—1 Tim. 3:1-10, 12, 13; Tit. 1:5-9.

17. Junyodo ma gidok kud awia migi i ng’om mange, gicopo nwang’iri i wang’ ng’iong’ic ma kani?

¹⁷ Jukristu moko lembe mi lwiny man sayu tic uketho gidok i ng’om mange. Eno ketho awiya migi caku somo daraza i dhok mi ng’om ma gibenwang’iri i ie. Ecopo kwayere nia junyodo bende giponj dhok mi ng’ombe kara ginwang’ tic. Gicopo timo ang’o tek giwok ginwang’u cokiri mi dhok migi mir anyoli kuca? Nyo gicopo cidho i cokiri mi dhok ma kani? Nyo gicikiri nibedo i cokiri mi dhok migi mir anyoli, kunoke mi dhok mi ng’om ma gidok i ie?

18. Nimakere ku Jugalatia 6:5, wacopo nyutho nenedi nia wabeworo yub ma jawiot umaku?

¹⁸ Jawiot re m’ucikere ning’io nia juruot pare ubed i cokiri ma kani. Calu etie ng’iong’ic migi gigi, jawiotman ucikere nineno nia juruot pare ubed i cokiri mi dhok ma kani nimakere ku yeny migi. (Som Jugalatia 6:5.) Ukwayu wawor yub ma jawiot umaku. Wacikara ngo nicayu yub m’emaku kadok nwang’u yubne ukoc ku ma wabino paru de. Ento ukwayu wajol juruotne man waketh ginen nia gin bende pigi tie tek i cokiri mwa.​—Rum. 15:7.

19. Lembang’o m’ukwayu jawiot unyam ie cuu man erwo pire?

¹⁹ Juruot moko copo nwang’iri i cokiri mi  dhok ma junyodo re m’ung’eyo, ento nwang’u lundo awiya migi ung’eyo dhokne cuu ngo. Ka cokirine nwang’ere kaka ma juweco i ie dhok ma juponjo ni awiya i kalasi, eno copo ketho awiya nyang’ ungo cuu i coko man gicopo mediri ngo i thenge mi tipo. Pirang’o? pilembe dhok ma jubeponjo igi i somo ukoc ku dhok mi junyodo migi. Saa maeno mito won ot unyam i lembene cuu man ekway Yehova ukonye kara eng’ei gin m’ecopo timo pi nikonyo awiya pare ubed ku winjiri ma ceng’ini ku Yehova man ku dhanu pare. Ka won otne ung’iyo nia ukwayu gibed i cokiri mi dhok pare mir anyoli ke, mito eponj awiya pare de ging’ei dhokne cuu, kunoke gidok i cokiri mi dhok m’awiya pare nyang’ i ie cuu. Ukwayu umego ku nyimego mi cokiri ma juruot maeno gidok i ie, giketh juruotne unen nia gin bende pigi tie tek man jumarugi.

20. Wacopo nyutho woro nenedi ni umego ku nyimego mwa ma gibeponjo dhok ma nyen?

²⁰ Calu ma waweco i wie, cokiri moko tie kud umego ku nyimego ma gibetimo kero niponjo dhok ma nyen. Ecopo bedo igi lembe ma tek nikoro paru migi thwolo thwolo. Ento tek wabeketho ngo wiwa i kum dhok ma nyen m’ubesendogi, wabineno mer migi ma gimaru ko Yehova man amora migi ma gitimo ko ire. Ka waketho wiwa i kum kite maeno ma beco ma gitie ko, wabinyutho igi woro man pigi bibedo tek lee i iwa. Wabiyero ngo igi nia “kony peri mbe,” pi lembe nia giweco dhok mwa cuu ngo.

21-22. Watie ku rwom ma lee ma kani?

²¹ Watie ku rwom ma lee pilembe Yehova uketho wabedo i cokiri pare. Kadok wabed dhanu ma co kunoke ma mon, jumusuma kunoke ju m’ugamiri, aradu kunoke ju m’utii, man kadok waweco dhok moko cuu kunoke ngo de, re wan ceke piwa tie tek i i Yehova man i ng’atuman m’i kindwa.​—Rum. 12:4, 5; Kol. 3:10, 11.

²² Dong’ wek watiu ku lembe ceke ma waponjo niai kud i lapor ma jakwenda Paulo ukiewo, m’eporo ko kumjo ku cokiri. Ka watimo kumeno, wabinwang’u yo mange dupa ma bikonyowa nineno nia piwa man pi jumange bende tie tek i cokiri pa Yehova.