1. Kahacecay madimadiay midoko ci Yihofaan a tamdaw pairaan Ningra ko maanan?

KAHACECAY madimadiay midoko ci Yihofaan a tamdaw pairaan Ningra ko saaroˈan i kasakopang. Soˈlin cowa ka lecad ko mihadakan no kahacecay tamdaw a ˈicel, kawra kalimlaan a maemin, cowa ka ngaˈay malawa. Pakayni tonini, nengnengen ita samanay ko sowal no tarokos ci Pawlo.

2. Mikitini Ifiso 4:16, hano oha masasingodo, madadama kita hani?

² Malecad o masowalay no lalangian a sinael, milengoay ci Pawlo cowa ka ngaˈay kita misakahmaw to roma salikaka, malecad o pasowalay cangranan: “Malomaan ako kiso.” (1 Korinto 12:21) Makalimay kita sakarihadayaw no kasakopang, oha masasingodo, madadama. (ˈOsien ko Ifiso 4:16.) Mihaen, o mamatinako no kahacecay tamdaw ko olah, o mamacowat ko kasakopang.

3. Oniya lalakaw wa milengo to maanan?

³ Sasamaan kita mikangodo to salikaka i kasakopang hani? Oniya lalakaw wa milengo to tolo a pakayraan. Saka 1, o malohemay malitengay sasamaan a makakangodo? Saka 2, sasamaan kita mikangodo to awaay ko ramod a salikaka? Saka 3, pakayra i cowa ka malaymay to sowal ita a salikaka, sasamaan kita a mikangodo cangranan?

4. O malohemay malitengay mamitoor to maanan a limoˈot i Loma 12:10 hani?

⁴ O malohemay malitengay i kasakopang sahtoay o tano fangcalay saocor ni Yihofa a nilnilen, kawra cowa ka lecalecad  ko inaneng ato ˈicel nangra. (1 Korinto 12:17, 18) O roma malohemay malitengay cowaho ka halafin manilnil, mimingayho ko milifetan. O roma malohemay malitengay pakayni katoˈas ato tatiih no tireng, citolasay ko midemakan. Kawra, o cecacecay a malohemay malitengay cowa ko ngangaˈay misakahmaw to roma malohemay malitengay, malecad o pasowalay: “Malomaan ako kiso.” Kahacecay a malohemay malitengay mamitoor to limoˈot ni Pawlo i Loma 12:10.—ˈOsien.

5. Samaan ko demak no malohemay malitengay o makakangodoay hani? Mihaen to demak hano kalimlaan hani?

⁵ Masasingodo ko malohemay malitengay, wa misongilaˈ mitengil to sowal no tao. Ano malalengo ko malohemay malitengay to kalimlaan a demak i, mihaen to demak o kalimlaan. Misamanay hani? Mikecolay Saka10 Folad 1, 1988, no Padaka lalakaw sanay ko sowal: “Kafanaˈ ko malohemay malitengay, ano o mananto ko sasaysayen a demak, misaˈosi to maanan kalimlaan a demak, wa ngaˈay pakaynien ni Yis Kristo i fangcalay saocor padama to kahacecay a malohemay malitengay mihadak to matatodongay a safalod no Fangcalay Cudad. (Dmak 15:6-15) O polong a malohemay malitengay i kasakopang wa milifok to sapadama no fangcalay saocor, cowa ko cecayay aca nangra.”

6. Sasamaan ko malohemay malitengay madadama hani? Mihaen ko demak nangra wa ira ko maanan a haepoc no kasakopang hani?

⁶ O cecay malohemay malitengay mikangodo to roma malohemay malitengay, ano malalengo i cowa ko mamiˈafas a somowal anca awa ko tolas no sowal, cowa ko mamiharateng to matatodongay ko niyah a harateng. Wa misapoener cingra a mihadak to harateng no niyah, wa misongilaˈ mitengil to sowal no tao. Sakakaay i, mamisarocod cingra mihadak to safalod no Fangcalay Cudad, ato midofdof to sakayat no ‘madimadiay citanengay a koli.’ (Matay 24:45-47) Ano malalengo to pasangaray demak masasingodo ko malohemay malitengay, paihkal to olah, o papadamaen no fangcalay saocor cangra, mikayat cangranan matatodong ko misaˈosian, palemed to polong kasakopang.—Yakop 3:17, 18.

7. Samanay ko pinengneng ni Yis to cowa ciramod a tamdaw?

⁷ O roma salikaka i kasakopang ciraramodayto, iraay ko niyah a paro no lomaˈ, kawra iraay ko cowa ciraramod a salikaka. Mihaenay, sasamaan ko pinengneng ita to awaay ko ramod a salikaka hani? Haratengen ita ko pinengneng ni Yis. Itini hekal ci Yis cowa ka ciraramod, padotocay cingra caka ciramod, misaka dademakan ko toki ato ˈicel i patorodan no Kawas cingranan a tayal. Cowa pasowal ci Yis, caciramod anca aka ciramod ko nisawawaan ningra. Kawra somowalay cingra, o roma tamdaw misaˈosiay eca ka ciramod. (Matay 19:11, 12) O masafaay ko cowa ciramod a tamdaw cowa kasaan ci Yis, anca cowa ka renec ko kaˈorip nangra saan a miharateng, tada mikangodoay cingra to cowa ciramod a tamdaw.

8. Mikitini 1 Korinto 7:7-9, pakalalokay ci Pawlo to Krisciyang misimsim to maanan?

⁸ Malecaday ci Pawlo ci Yisan, matayal saki Kawas a tatokian padotocay eca ka ciramod. Eca ka ciramod cowa ko mararaway sanay ci Pawlo, mafanaˈay cingra caciramod hokira oniyah a saˈosi. Kawra pakalalokay ci Pawlo to Krisciyang padotoc a caka ciramod, mihaen o mamisamacay matayal saki Yihofaan. (ˈOsien ko 1 Korinto 7:7-9.) Cowa ko papakatoor ko awaay ko ramod a Krisciyang to ciramoday a Krisciyang cowa ka haen ko harateng ni Pawlo, soˈlinay i, na paikenan ningra ko kalimlaan a tayal i kapah caay ka ciramod a Timotian. * (Filipi 2:19-22) Mihaenay, caay kangaˈay o ciramoday anca cowa ciramod ko sapisaˈosi ita to mamadangal ningra ko tayal hokira.—1 Korinto 7:32-35, 38.

9. Sasamaan ko pinengneng ita to raramod ato awaay ko ramod hani?

⁹ Ci Yis aci Pawlo cowa pasowal to caciramod anca aka ciramod ko Krisciyang. Mihaenay, sasamaan ko pinengneng ita to raramod ato caka ciramod hani? Mikecolay Saka 10 Folad 1, 2012, sanay: ‘Sowal no Fangcalay Cudad, ciraramoday ato awaay ko ramod sahtoay o sapatelong no Kawas. . . . Awaay ko ramod a tamdaw, miharateng ci Yihofa cowa ko hakangodoan ato kasomadan ko hatiniay pakayraan.’ Mihaenay, o awaay ko ramod a salikaka iraay ko saaroˈan i kasakopang, o kakangodoen ita cangra.

10. Ano mikangodoay kita to awaay ko ramod a salikaka, aka midemak to maanan?

¹⁰ Sasamaan ko hademak ita, paihkal to mikangodoay  kita to awaay ko ramod a salikaka, miharateng to nafalocoˈan ato pakayraan nangra hani? Haratengen ita o roma tamdaw oniyah ko misaˈosiay to caka ciraramod; roma tamdaw saka ciramodaw, kawra awaayho ko matatodongay a haramod; roma tamdaw mapatayay ko ramod. Ano samaanto ko pakayraan, ano milicay ko tamdaw i kasakopang to hano caka ciraramod cangra, anca misiwkay to haramod nangra, matatodongay koniya demak han? Manaokaniw, o roma salikaka misaaliay to sapadama no tao misiwkay to hatatodong, kawra ano cowa pisaali cangra to papadamaen, talaˈayaw saan ko tao mihaen to demak, sasamaan ko harateng nangra hani? (1 Tisalonika 4:11; 1 Timoti 5:13) Nengnengen ita samanay ko sowal no awaay ko ramod a salikaka.

11-12. O masamanay a demak o papakangodo to awaay ko ramod a tamdaw?

¹¹ Cecay awaay ko fafahi a kasakilac kantok ngaˈayay ko katayal, adihayay ko kangaˈayan awa ko ramod sanay miharateng, kawra ˈalomanay ko milicayay cingranan: “Hano caka ciraramod kiso?” Matoleday ko falocoˈ ningra. Roma awaay ko ramod a salikaka itiniay i Pitil matayal, sanay: “Mahapinangay ako, miharateng ko salikaka kasiniˈadaan ko awaay ko ramod a tamdaw, awa ko ramod cowa ko sapatelong no Kawas, o karetengay ˈinorong sanay.”

¹² Itiniay i Pitil matayal awaay ko ramod a fafahiyan salikaka sanay: “Harateng no roma salikaka, polong awaay ko ramod a tamdaw mikilimay to hatatodong, hanaca ano ira ko toki mafanaˈ to tao cowa ka pilawa. Kinacecayay pakayni tayal no Pitil tayraay kako i roma pala, toya dadaya iraay ko saˈopo itira. Micadaay takowanan a fafahiyan salikaka pasowalay takowanan. Itira kasakopang nangra iraay ko tatosa faˈinayan salikaka malecaday ko mihecaan takowanan. Soˈlin cowa ko misiwkayay cingra takowanan, kawra tahira kami kasaˈopoan, mitengtengan ningra kako minengneng toya tatosaay faˈinayan. Tada mangodoay kami tatolo itiya.”

13. O cecay awaay ko ramod a fafahiyan salikaka maˈaraway ko maanan ngaˈayay a taˈarawan?

¹³ O roma matayalay i Pitil awaay ko ramod a fafahiyan salikaka sanay: “Mafanaˈay kako to awaay ko ramod a misakafahay, ikakaay ko mihecaan nangra takowanan. Matenesay cangra, makahiay padama to tao, lipahakay to katayalan no niyah, adihayay ko sapadama nangra to kasakopang. Pakayni ka eca ciraramod, matatodongay ko pinengneng nangra. Cowa ka pakayni ko pisatakaraw nangra, cowa pakayni ka awa no raramod ato wawa a cangoˈot to maanan.” Ano masasiolah ko kasakopangay tamdaw, makakangodo, o rarihaday kita maemin. Cowa ko mamiharateng ko tamdaw to kasiniˈadaan anca kaˈinapan no tao ko niyah, cowa ko caciharateng to misakahmawan anca pakidemen a misaareteng no tao, mihaen, o masalalomaˈay no taˈangayay paro no lomaˈ ko niyah wa saan ko piharateng.

14. Misamaan kita wa matinako no awaay ko ramod a tamdaw to mikangodoay kita cangranan?

¹⁴ Ano masemer kita to ngaˈayay capeling no awaay ko ramod a salikaka, wa lipahak cangra. Hamaan pakayni ka eca ciraramod cangra a siniˈada cangranan, ka pakayni ka madimadi nangra a midoko to Kawas a misalimla cangranan. Mihaen, ecato piharateng cangra to papasowal kita cangranan: ‘Malomaan ako kiso.’ (1 Korinto 12:21) Wa matinako nangra to mikangodoay kita cangranan, misalimlaayho to nano demak nangra i kasakopang.

15. Sapitongalaw to mitosilay a tayal, o roma tamdaw samanay ko demak hani?

¹⁵ Toniya pina miheca, ˈalomanay salikaka sapitongalaw to mitosilay a tayal, misatapangay  minanam to faelohay a sowal. Mihaen ko demak nangra, adihayay ko kafalic no kaˈorip. Saka dademakaw to misaaliay to adihayay mitosilay a kilac, wa miliyas cangra tono wina ko sowal a kasakopang, mirienang to roma ko sowal a kasakopang. (Dmak 16:9) Mihaen ko saˈosi nangra, pakayniay sapitongalaw to tayal saki Yihofaan. Soˈlin pina miheca ngaˈ malaymay to faelohay a sowal, kawra wa ngaˈay adihay ko sadama nangra to kasakopang. O makapahay a capeling ato nalifetan nangra wa ngaˈay pakalalok to salikaka, wa patanektek to kasakopang. Oniya cowa pisateked a kinafalah nangra, tada masemeray kita cangranan.

16. Ano miharateng ko malohemay malitengay minilnil to salikaka malo dama sikawdan anca malohemay malitengay, mamitoor to maanan a palinian hani?

¹⁶ O kasacefang no malohemay malitengay cowa ko papakayni ka eca malaymay no salikaka to sowal, hawad han a minilnil malo dama sikawdan ato malohemay malitengay. Ano miharateng ko malohemay malitengay minilnil to salikaka i, o palinian no Fangcalay Cudad ko haharatengen, cowa ko inaneng noniya salikaka a somowal ko piˈarawan.—1 Timoti 3:1-10, 12, 13; Titus 1:5-9.

17. Ano mafolaw ko paro no lomaˈ tayra i roma kitakit, o wama wina wa misaˈosi to manan a demak hani?

¹⁷ O roma salikaka pakayni pilaliw to pades ato mikilim to katayalan, miˈorongay to paro no lomaˈ mafolaw tayra roma kitakit. Mahaen ko pakayraan, o wawa nangra itini picudadan mafanaˈay tono itiraay a sowal. O wama wina pakayni tayal wa minanam to itiraay a sowal. Itira ano iraay ko somowalay to kananaman nangra a sowal a kasakopang anca kasakapot, o icowaay a kasakopang ko rarienangen nangra hani? Ono kafanaˈan a sowal a kasakopang, anca ono itiraay ko sowal a kasakopang hokira?

18. Mikitini Kalatiya 6:5, samaan ko demak ita o mikangodoay to saˈosi no tawki no lomaˈ hani?

¹⁸ O tawki no lomaˈ wa mitamorong to ˈinorong, misimsim to o maanan ko sakangaˈay no paro no lomaˈ, itiya a misaˈosi to masamanay ko sowal a kasakopang ko rienangen. (ˈOsien ko Kalatiya 6:5.) O nangra a saˈosi konini, o kakangodoen ita. Ano icowaayto a kasakopang ko mirienangan nangra, o mamahemek kita a militemoh cangranan, paihkal to olah cangranan.—Loma 15:7.

19. O tawki no lomaˈ wa mitolon micangacang to sakayat no Kawas cangranan samaan ko pisaˈosi hani?

¹⁹ O roma paro no lomaˈ mirienangay tono wama wina ko sowal a kasakopang, kawra o kitiraan no kasakopang a kilac ono itiraay ko sowal, wa pasangar ko wawa cipinang to lalakaw no saˈopo alatek, papasangar a miingid ci Yihofaan. Misamanay hani? Samanen itini picudadan ono itiraay ko sowal, cowa ka nanam to sowal no wama wina. Ano mahaen i, sapadamaaw to wawa miingid ci Yihofaan ato salikaka, o tawki no lomaˈ mamisongilaˈ misimsim, hanaca mitolon micangacang to sakayat no Kawas inaneng ko misaˈosian. O papadama to  wawa nangra minanam to sowal nangra, anca malinah tayra ino itiraay ko sowal a kasakopang, mihaen o mamadolo ko wawa cipinang to lalakaw no saˈopo. Ano samaanto ko saˈosi nangra mirienang to icowaay kasakopang, o kakangodoen no salikaka cangra, paihkal to olah cangranan.

20. Sasamaan kita paihkal to pikangodo to minanamay to faelohay sowal a salikaka hani?

²⁰ Pakayni masowalay i fafekang masakenaay a lalangian, itini adihayay kasakopang iraay ko salikaka minanamay to faelohay a sowal. Pakayni cangranan, sapaihkalaw to harateng no niyah ato nafalocoˈan pasangaray alatek. Kawra, ano eca pisamacay kita to ngaˈayay anca tatiihay ko sowal nangra, mamahapinang to maolahay cangra ci Yihofaan, makalimay sapidokoaw Cingraanan. Ano maˈaraw ita ko makapahay a capeling nangra, wa matongal ko kasemer cangraanan, mikangodo cangraanan. Mihaen, cowato ko papakayni ka eca ka malaymay ko sowal nangra a misakahmaw cangranan, malecad o pasowalay cangranan: “Malomaan ako kiso.”

21-22. Hano tada aakoˈiden ita ci Yihofa?

²¹ Pairaan ni Yihofa ko saaroˈan no kahacecay tamdaw i kasakopang, tada aakoˈiden ita Cingra. Ano faˈinayan anca fafahiyan salikaka kita, o awaay ko ramod anca ciraramoday, o kaemangay anca matoˈasay, inanengay anca mafokilay caciyaw, pakaynien ci Yihofaan ato salikaka, sahtoay o kalimlaan.—Loma 12:4, 5; Kolosay 3:10, 11.

²² Patinakoen ni Pawlo ko kasakopang to tireng, oniya sapatinako adihayay ko mananamay ita. Nanay saka dademaken ita ko mananamay, mihaen oha mameten ita ko toki padama to kasakopang, wa matongal ko pikangodo to salikaka i kasakopang.