1. Jewba, ¿chem elukefi kake kiñeke tañi pu che?

CHAW JEWBA piwkeyenkechi elueiñmu taiñ koneltuleal tañi trokiñche mu. Kom iñchiñ kakerume dungu femkeiñ ti trawünche mu, welu kom iñchiñ falin-ngeiñ ka welukonkechi duamniewiyiñ. Ti apostol Pablo kellukeeiñmu taiñ adümafiel feytachi dungu, ¿chumngechi am? Peafiyiñ.

2. Ñi feypin Efesio 4:⁠16, ¿chumngelu welukonkechi falintuwaiñ ka kiñewkülen küdawaiñ?

² Pablo feypi ngelay taiñ feypiafiel taiñ pu peñi ka pu lamngen: “Iñche ta duamtulaeyu” (1 Kor. 12:⁠21). Feymu welukonkechi falintuwaiñ ka kiñewkülen küdawaiñ, femngechi tüngküleay ti trawünche (papeltunge Efesio 4:⁠16). Kiñewkülen mu ti trawünche, pu peñi ka pu lamngen doy küme duamkey ka doy faliluwkey.

3. ¿Chem ngüneduamaiñ tüfachi chillkatun mu?

³ Fillke dungu mu pengelafuiñ taiñ falintukefiel taiñ pu peñi ka pu lamngen. Feytachi chillkatun mu peaiñ chumngechi welukonkechi yamniewafuy ka falintuwafuy pu longkolelu. Ka peaiñ chumngechi falintuafuiñ taiñ pu peñi kurengenolu ka taiñ pu lamngen fütangenolu. Ka peaiñ chumngechi falintuafuiñ pu petu kimlu taiñ kewün dungu.

4. Pu longkolelu, ¿chumngechi inayafuy ñi feypin Romanu 12:⁠10?

⁴ Kom pu longkolelu Jewba tañi newen mu elfalkünungeyngün ñi femal feychi küdaw, welu kakerumey tañi adümuwün engün (1 Kor. 12:⁠17, 18). Kiñeke longkolelu fentren tripantu yeniey feychi küdaw mu, feymu rume küme adümuwkeyngün. Welu kakelu peñi we longkolerpuyngün, feymu müte pepikawkülelayafuyngün chi. Kakelu longkolelu tañi füchan mu kam kutrankülen mu, pepi femkelayngün tunte tañi ayükefel. Welu felefule rume, kom pu longkolelu welukonkechi falintuwkey, femngechi inakefi Pablo ñi ngülam mülelu ti lifru Romanu (papeltunge Romanu 12:⁠10).

5. 1) Pu longkolelu, ¿chumngechi pengelafuy tañi falintuwken engün? 2) ¿Chemu mülefuy tañi femal engün?

⁵ Tati pu longkolelu müley tañi küme welukonke allkütuwal engün, femngechi pengelayngün tañi welukonkechi falintuwken. Trawüluwle engün tañi ngüneduamal falinke dungu, doy mülefuy tañi küme welukonke allkütuwal engün. ¿Chemu am? Kuyfi tüfachi revista feypi: “Pu longkolelu kimniey Kristo rakiduamelafuy chem longkolelu rume kiñe ngülam Biblia mu tripalu, femngechi kimafuyngün chem tañi femal engün (Hecho 15:⁠6-15). Chaw Dios tañi newen kellukelafi kiñe longkolelu müten, kom kellukefi engün” (La Atalaya tripalu 1 konchi octubre 1988 tripantu).

6. 1) ¿Chem müley ñi femal pu longkolelu ñi kiñewküleal? 2) Femle pu longkolelu, ¿chumleay tati trawünche?

⁶ Trawün mu pu longkolelu, ¿chumngechi pengelafuy tañi welukonke falintuwken? Pu longkolelu ngelay tañi kimkawal ñi nütramal kidu ñi rakiduam müten. Ka “iñche ñi feypin müten femngepe” pikelay tañi rakiduam mu. Pu longkolelu ñom piwke mu feypikey tañi rakiduam ka küme  allkütukefi kakelu tañi pu chaf longkolelu. Ka femngechi pu longkolelu doy müley ñi inayal Biblia ñi ngülam ka ñi feypin ti “kim manelfal kona”, esclavo fiel y prudente pingelu (Mat. 24:⁠45-47, TNM). Pu longkolelu falintuwle ka yamuwle, Chaw Dios ñi newen kelluaeyew tañi küme dullial tañi chem chumal engün, fey küme feleay tati trawünche (Sant. 3:⁠17, 18).

7. ¿Chem rakiduamkefuy Jesus pu kurengenolu ka pu fütangenolu mu?

⁷ Taiñ trawünche mu müley ta kurewen ka müley ta familia. Welu ka femngechi müley ta kurengenochi peñi ka fütangenochi lamngen. ¿Chem piafuiñ tüfa engün? Inayentuafiyiñ Jesus tañi rakiduamkeel. Mülepalu Jesus Mapu mu kurengelay. Rakiduamkülefuy ñi kimeltucheal müten. Turpu feypilafi pu cristiano ñi nieal kam ñi nienoal afkadi. Welu feypi kiñeke cristiano dullikey ñi kurengenoal ka fütangenoal (Mat. 19:⁠11, 12). Jesus yamniekefuy ka rume falintukefuy feytichi fütangenolu ka kurengenolu, ka awüngechi che trokikelafi engün.

8. Ñi feypin 1 Korintio 7:⁠7-9, ¿chem mülefuy ñi rakiduamal pu cristiano?

⁸ Jesus reke, ka femngechi Pablo kurengelafuy. Pablo feypilay ñi kümenon kurengeal kam fütangeal. Kimniefuy kiduke pu cristiano müley tañi dullial tüfachi dungu mu. Welu ngülamtufi pu cristiano ñi rakiduamal ñi kurengenoal kam fütangenoal, fey ñi doy serfiafiel ta Jewba (papeltunge 1 Korintio 7:⁠7-9). Pablo illamkakelafuy pu kurengenolu ka fütangenolu, feymu dullifi ta Timotew. Tüfa kurengelafuy, welu elufi falinke küdaw (Filip. 2:⁠19-22).⁠ * Feymu feypilayafuiñ tunte ñi pepikawkülen kiñe peñi tañi kurengen mu kam kurengenon mu (1 Kor. 7:⁠32-35, 38).

9. Famülke mu, ¿chem piafuiñ pu kurengenolu ka pu fütangenolu?

⁹ Jesus ka Pablo feypilayngu pu cristiano müley ñi kurengeal kam ñi fütangeal. Ka femngechi feypilay tañi femnoal engün. ¿Famülke mu kay? ¿Chem piafuiñ? Kuyfi tüfachi revista feypi: “Nieal afkadi fey ta kiñe regalo reke müley Jewba mew küpalu. Ka femngechi kurengenoal kam fütangenoal  kiñe regalo reke müley Jewba mu küpalu. [...] Jewba ñi adkiñ mu yewen-ngelay ka weñangkün-ngelay kurengenoal kam fütangenoal” pi tati revista (La Atalaya tripalu 1 konchi octubre 2012 tripantu). Feymu llemay falintuafiyiñ taiñ pu peñi kurengenolu kam taiñ pu lamngen fütangenolu.

10. ¿Chumngechi pengelafuiñ taiñ falintukefiel pu kurengenolu ka pu fütangenolu?

¹⁰ Trawünche mu, ¿chumngechi pengelafuiñ taiñ yamniefiel ka falintukefiel pu kurengenolu ka pu fütangenolu? Müley taiñ longkontukual kiñeke peñi ka kiñeke lamngen kidu dullikey tañi kurengenoal kam fütangenoal. Kakelu cristiano petu pelayngün iney engu tañi niewal. Kakelu lantuyngün. Turpu ramtulayafiyiñ engün: “¿Chemu am petu kurengelaymi? ¿Chemu am petu fütangelaymi?”. Ka ngelay taiñ feypiafiel: “Iñche kintulelafeyu kiñe afkadi”. Kiñeke mu, kiñeke peñi kam kiñeke lamngen “kelluafen ñi peñmual kiñe küme afkadi” piafeiñmu. Femfule, weda dungu no. Welu “kelluen” pingenoliyiñ, ¿kümepeafuy may taiñ kintulelafiel engün? ¿Chem pimi? (1 Tes. 4:⁠11; 1 Tim. 5:⁠13). Peafiyiñ ñi chem pin kiñeke peñi kurengenolu ka kiñeke lamngen fütangenolu.

11, 12. ¿Chem dungu femlayafuiñ taiñ weda duamelnoafiel pu kurengenolu ka pu fütangenolu?

¹¹ Kiñe peñi kurengenolu witranmamekey kiñeke trawünche. Tüfachi peñi feypikey kümey ñi petu kurengenon. Welu kiñeke peñi ka lamngen ramtukeeyew chemu tañi kurengenon, fey kiñeke mu weda duamnagkey. Ka kiñe peñi kurengenolu, küdawkelu Betel mu, feypi: “Trawünche kiñeke mu, kuñifallkülelu trokingekey ti pu kurengenolu ka pu fütangenolu. Femngechi femlu engün, ‘weñangkün-ngey kurengenoal ka fütangenoal’ pikeyngün reke” pi taiñ peñi.

¹² Kiñe lamngen fütangenolu, küdawkelu Betel mu, feypi: “Kiñeke lamngen rakiduamkey ‘kom pu kurengenolu ka kom pu fütangenolu ayüniey tañi peñmual kiñe afkadi’ pikeyngün. ‘Chew rume tañi miyawken, kintuyawülmukey afkadi’ pikey ñi rakiduam mu engün. Kiñe antü werküngen tañi küdawmeal ka mapu. Üyew, ti lamngen tañi llowetew feypienew: ‘Tañi trawünche mu müley epu wentru lamngen petu kurengenolu. Feypimekeeyu müten, kintulelmekelaeyu füta’ pienew. Welu konpulu müten ti Trawünwe Ruka mu iñche, pürüm yefemenew feychi epu wentru lamngen mu taiñ kimuwal. ¡Müna fütra yeweiñ!” pi taiñ lamngen.

13. ¿Chem yafültukueyew kiñe lamngen fütangenolu?

¹³ Ka kiñe lamngen fütangenolu, küdawkelu Betel mu, feypi chem dungu ñi yafültukuetew. Feypi: “Kimniefiñ kiñeke wünelekelu amuldungun mu, yenielu fentren tripantu tañi kurengenon kam ñi fütangenon. Tüfa engün küme yenieyngün tañi mongen, kimnieyngün tañi chem chumürpual, eluwküley tañi kellucheal ka ayüwkülekeyngün, feymu rume kelluntukukeyngün trawünche mu. Tüfachi pu lamngen tunte nienofule rume afkadi kam familia, küme duamkülekeyngün, welu doykülelu ti pu kurewen mu trokiwkelayngün” pi taiñ lamngen. Feymu llemay, müna kümey taiñ welukonke yamniewal ka falintuniewal trawünche mu. Taiñ pu peñi ka pu lamngen iñchiñ welukonkechi ütriruwkelaiñ ka kuñifallkülelu trokiwkelaiñ rume. Famentuwkelaiñ ka doykülelu kakelu che mu trokiwkelaiñ. Kimnieiñ taiñ welukonkechi piwkeyewken.

14. ¿Chumngechi pengelafuiñ taiñ falintukefiel pu kurengenolu ka pu fütangenolu?

 ¹⁴ Rakiduamlayaiñ ñi kuñifallkülen pu kurengenolu ka pu fütangenolu. Falintukeafiyiñ engün tañi küme piwkengen mu ka tañi küme serfikefiel mu ta Jewba engün, femngechi taiñ pu peñi ka pu lamngen turpu rakiduamlayayngün taiñ falintukenofiel engün (1 Kor. 12:⁠21). Doy may kimayngün taiñ respetakefiel ka ayüwünkechi müleayngün taiñ trawünche mu engün.

15. ¿Chumkeyngün kiñeke peñi ka lamngen ñi doy amuldungucheal?

¹⁵ Famülke mu fentren peñi ka lamngen eluwkeyngün ñi kimal kake kewün dungu tañi doy amuldungucheal engün. Feymu elkünukeyngün tañi trawünche, fey mülenagpukeyngün ka trawünche mu ka kewün dungu nielu (Hecho 16:⁠9). Kake kiñeke engün dullingün femal tüfa ñi doy küme küdawelafiel ta Jewba. Fentren tripantu rupayafuy ñi adümürpuafiel ti we kewün dungu, welu rume kellukefingün ti trawünche. Tañi küme piwkengen mu ka tañi kümeke ngülam mu, yafültukukefingün pu peñi ka pu lamngen. ¡Rume falintufali engün!

16. Pu longkolelu, ¿chumngechi kimafuy ñi pepikawkülen kiñe peñi ñi longkoleal kam siervo ministerial ngeal?

¹⁶ Kiñe peñi müte kimnole ti we kewün dungu, pu longkolelu rakiduamlayafuy ñi pepikawkülenon tañi longkolerpual kam siervo ministerial ngerpual. Doy may ngüneduamayngün Biblia ñi chem pilen, femngechi kimayngün ñi pepikawkülen kam ñi pepikawkülenon. Ngelay ñi ngüneduamngeal tunte ñi kimürpufiel ti we kewün dungu (1 Tim. 3:⁠1-10, 12, 13; Tito 1:⁠5-9).

17. Pu ngen familia wiñamtuwlu ka mapu tañi pu che engün, ¿chem müley tañi dullial engün?

¹⁷ Kiñeke familia wiñamtuwkeyngün ka mapu ka kewün dungu nielu, tañi küdawmeal ka ñi doy küme feleal. Feytachi we kewün dungu dungungekey küdaw mu, colegio mu ka trawünche mu, feymu müley tañi adümürpuafiel engün. Welu kiñeke mu ka mülekey trawünche kidu engün ñi kewün dungu mu. Feymu ti ngen familia müley ñi dullial chem trawünche mu tañi amual engün.

18. Ñi feypin Galata 6:⁠5, ¿chumngechi yamnieafuiñ ñi dulliel pu ngen familia?

¹⁸ Ti chaw müley ñi dullial chem trawünche mu ñi amual tañi pu che. Welu poyenofile ta Jewba, ti ñuke may ta müley ñi dullial. Fey ti chaw kam ñuke müley ñi rakiduamal chumngechi ñi doy kümelkaleal tañi pu che. Biblia feypi: “Kake kiñeke pu che müley ñi wechurpual kidu tañi küdaw” (Galata 6:⁠5, TNM). Kiduke pu ngen familia müley ñi dullial tañi chem chumal, feymu müley taiñ yamafiel tañi chem pin. Chem  trawünche mu rume mülepufule engün, yamafiyiñ ñi dulliel ka piwkeyenkechi llowafiyiñ engün (Rom. 15:⁠7).

19. Pu pichikeche küme adümnofile ñi chem pingen trawün mu, ¿chem müley ñi femal tati ngen familia?

¹⁹ Kiñeke familia wiñamtuwlu ka mapu amukey trawün mu kidu engün tañi kewün dungu mu, welu pu pichikeche doy adümafuy feytichi kewün dungu ñi dungungekeel colegio mu. Fey müte adümlayafuy chem pingeken ti trawün mu, feymu küdawtuafuyngün ñi fülkonküleal Jewba mu engün. Femngechi dungu rupafule, ti ngen familia müley ñi ngillatual ka küme rakiduamal chumngechi kelluafuy tañi pu che ñi doy fülkonküleal Jewba ka tañi trokiñche mu. Pu chaw dulliafuy ñi küme kimeltulelafiel kidu ñi kewün dungu tañi pu pichikeche, kam dulliafuy chi tañi mülepual kiñe trawünche mu chew ñi dungungeken feychi kewün ñi doy adümken tañi pu pichikeche. Chem dungu rume dullifule ti familia, ti trawünche falintuaeyew ka yamnieaeyew.

20. ¿Chumngechi falintuafuiñ pu petu kimlu kiñe kewün dungu?

²⁰ Chumngechi ngüneduampeiñ, fentren peñi ka lamngen eluwkey tañi adümürpual kiñe we kewün dungu. Kiñeke engün küdawtukeyngün ñi adümürpuafiel. Welu ngüneduammekelayafiyiñ müten tunte ñi küdawtukefiel ti we kewün. Doy may ngüneduamafiyiñ tunte ñi piwkeyefiel ta Jewba engün ka tañi küpa serfikefiel. Femngechi kom taiñ piwke mu falintuafiyiñ ka piwkeyeafiyiñ engün. Tunte kimnofule rume iñchiñ taiñ kewün dungu, turpu rakiduamlayaiñ ñi falin-ngenon kam ñi duamfalngenon engün.

21, 22. ¿Chemu am fente mañumniefiyiñ ta Jewba?

²¹ Chaw Jewba elukeeiñmu kom kake kiñeke iñchiñ falinke küdaw ti trawünche mu, feymu müna mañumniefiyiñ. Wentru ngeliyiñ, domo ngeliyiñ rume, kurengeliyiñ kam fütangeliyiñ kam femnofuliyiñ rume, tremchengeliyiñ kam wechengeliyiñ rume, kam tunte adümnierpufiliyiñ kiñe kewün dungu, kom iñchiñ falintukeeiñmu Jewba ka kom iñchiñ falintukeeiñmu taiñ pu peñi ka taiñ pu lamngen (Rom. 12:⁠4, 5; Kol. 3:⁠10, 11).

²² Feytachi epu chillkatun mu, ngüneduamiyiñ Pablo ñi trürümkünufiel ti trawünche kiñe cuerpo engu, fey fillke kümeke kimeltun entuiñ. Inafiliyiñ, doy küme yafültukuafuiñ taiñ pu peñi ka pu lamngen. Kafey doy piwkeyeafiyiñ ka doy falintuafiyiñ engün.