1. ?Jehova i givim wanem long wanwan long yumi?

JEHOVA i lavem ol man blong hem, mo i givim wok long wanwan long olgeta long kongregesen. Nating se ol wok blong yumi oli no sem mak, yumi evriwan i impoten mo yumi nidim yumi. Aposol Pol i halpem yumi blong luksave impoten lesen ya. ?Hem i mekem olsem wanem?

2. Folem Efesas 4:16, ?from wanem yumi mas tinghae long ol narafala mo wok gud tugeta?

² Olsem stamba vas blong stadi ya i talem, Pol i makem se i no gat wan long yumi i save talem long wan narafala man blong Jehova se: “Mi mi no nidim yu.” (1 Kor. 12:21) Sipos yumi wantem se i gat pis long kongregesen, yumi mas tinghae long narafala mo wok gud tugeta. (Ridim Efesas 4:16.) Taem yumi evriwan i joen gud blong wok tugeta, kongregesen i gru mo i kam strong from lav.

3. ?Bambae yumi tokbaot wanem long stadi ya?

³ ?Wanem sam samting we yumi save mekem blong soem respek long ol narafala Kristin long kongregesen? Long stadi ya, bambae yumi tokbaot olsem wanem ol elda oli save soem respek long ol nara elda. Biaen, bambae yumi tokbaot olsem wanem blong soem se yumi tinghae long ol brata mo sista we oli no mared. Mo laswan, bambae yumi lanem olsem wanem blong soem respek long olgeta we oli no toktokgud lanwis blong yumi.

4. ?Ol elda oli mas folem wanem advaes long Rom 12:10?

⁴ Tabu spirit blong Jehova i putumap olgeta elda long kongregesen. Mo olgeta wanwan oli gat defdefren presen mo oli naf blong mekem ol defdefren wok. (1 Kor. 12:17, 18) Maet sam oli niu mo oli no gat plante ekspiriens. Sam narafala, maet oli no naf blong mekem plante wok from we oli olfala mo oli siksik. Nating se i olsem, wan elda i no mas lukluk nogud long nara elda mo tingting se: “Mi mi no nidim yu.” Be i gud we wanwan elda i folem advaes blong Pol long Rom 12:10.—Ridim.

5. ?Olsem wanem ol elda oli soem se oli respektem ol nara elda? ?Mo from wanem i impoten we oli mekem olsem?

⁵ Ol elda oli soem se oli respektem ol nara elda taem oli lesingud long olgeta, speseli taem oli mit olsem wan bodi blong tokbaot ol impoten bisnes blong kongregesen. ?From wanem? Makem poen we i stap long Wajtaoa blong 1 Oktoba 1988, we i se: “Ol elda bambae oli luksave se Kraes i save yusum tabu spirit blong pulum tingting blong eniwan long bodi blong ol elda, blong i givim sam tingting long Baebol we i stret long eni situesen, o blong mekem eni impoten desisen. (Wok 15:6-15) Long taem ya, tabu spirit i no stap long wan elda nomo.”

6. ?Olsem wanem ol elda oli save wok gud tugeta, mo hemia i givhan long kongregesen olsem wanem?

⁶ Taem ol elda oli stap long miting blong olgeta, wan elda we i respektem ol narafala, hem i no traem oltaem blong i faswan blong toktok. Hem i no traem blong winim ol narafala long ol toktok blong hem, mo hem i no mas ting se tingting blong hem i stret oltaem. Be, hem i toktok wetem tingting daon mo i no flas. Hem i lesingud taem ol narafala oli talemaot tingting blong olgeta. Samting we i moa impoten se, hem i wantem tumas blong serem ol rul blong Baebol, mo i folem advaes we i kam long “gudfala slef we i waes.” (Mat. 24:45-47) Taem ol elda oli tokbaot ol bisnes blong kongregesen long wan fasin we i soem lav mo respek, tabu spirit blong God bambae i stap long medel blong olgeta, mo i lidim  olgeta blong oli mekem ol desisen we i givhan blong mekem kongregesen i strong.—Jem. 3:17, 18.

7. ?Wanem tingting blong Jisas long olgeta we oli singel?

⁷ Long kongregesen tede, i gat ol kapol we oli mared mo ol famle. Be i gat plante brata mo sista tu we oli no mared. ?Yumi mas gat wanem tingting long olgeta we oli singel? Traem luk tingting blong Jisas long fasin ya blong stap singel. Taem Jisas i stap long wol ya, hem i no mared. Hem i singel, mo i yusum ful taem blong hem long minista wok, mo i putum tingting blong hem i stap fulwan long wok ya nomo. Jisas i neva putum rul se man i mas mared o i mas stap singel. Nating se i olsem, hem i talem se sam Kristin bambae oli jusum blong no mared. (Mat. 19:11, 12) Jisas i respektem olgeta we oli no mared. Hem i no luk olgeta we oli singel se oli daon moa long ol narafala o oli mestem sam samting long laef.

8. Folem 1 Korin 7:7-9, ?Pol i leftemap tingting blong ol Kristin blong oli mekem wanem?

⁸ Olsem Jisas, aposol Pol tu i singel taem hem i mekem minista wok blong hem. Pol i neva tijim se i rong blong wan Kristin i mared. Hem i luksave se hemia desisen blong wanwan man. Be yet, Pol i leftemap tingting blong ol Kristin blong oli luk sipos oli save stap singel, blong mekem wok blong Jehova. (Ridim 1 Korin 7:7-9.) I klia se Pol i no lukluk daon long ol Kristin we oli singel. Tingbaot se hem i jusum yangfala Timoti we i wan singel brata, blong i lukaot long sam impoten wok. * (Fil. 2:19-22) Taswe i rong blong skelem wan brata se hem i naf o i no naf blong mekem wan wok, jes from we hem i mared o i singel.—1 Kor. 7:32-35, 38.

9. ?Yumi save talem wanem long saed blong mared mo fasin ya blong stap singel?

⁹ Jisas mo Pol oli no tijim se ol Kristin oli mas mared, o oli mas stap singel. ?Taswe yumi save talem wanem long saed blong mared mo fasin ya blong stap singel? Wajtaoa blong 1 Oktoba 2012, i talem klia se: “I tru we yumi save talem se fasin ya blong mared mo blong stap singel, i wan presen we i kam long God. . . . Jehova i no luk fasin ya blong stap singel olsem wan fasin blong sem o blong harem nogud.” Wetem tingting ya, yumi mas respektem ol singel brata mo sista long kongregesen.

10. ?Olsem wanem blong soem respek long ol singel brata mo sista?

 ¹⁰ ?Olsem wanem yumi save soem respek long filing mo situesen blong ol singel brata mo sista blong yumi? I gud yumi tingbaot se sam singel Kristin oli jus blong no mared. Sam narafala singel Kristin oli wantem mared, be oli no faenem yet wan we i stret long olgeta. Mo sam narafala bakegen, hasban o waef blong olgeta i ded. Nomata se i olsem wanem, ?yu ting se i stret blong ol brata sista long kongregesen oli askem long olgeta se from wanem oli no mared, o oli traem faenem wan fren blong olgeta? I tru se maet sam singel Kristin oli askem narafala blong oli givhan olsem. Be sipos oli no askem mo yu yu mekem, ?yu ting se bambae oli harem olsem wanem? (1 Tes. 4:11; 1 Tim. 5:13) Naoia bambae yumi luk tingting blong sam gudfala singel brata mo sista.

11-12. ?Olsem wanem nao yumi save mekem tingting blong olgeta we oli singel i foldaon?

¹¹ Wan eria elda we i singel mo we i mekem gud wok blong hem, i harem se taem hem i stap singel, hem i save mekem plante gudfala samting. Be hem i makem tu se ol brata sista oli wantem givhan, be oli no luksave se oli daonem tingting blong hem taem oli askem se: “?From wanem yu no mared?” Wan singel brata we i wok long wan branj ofis, i talem se: “Samtaem mi luk se ol brata sista oli harem se oli mas sore long mi from we mi singel. Hemia i mekem mi harem olsem se fasin ya blong stap singel i nogud, i no wan presen.”

¹² Wan singel sista we i wok long Betel i talem se: “Sam pablisa oli ting se evriwan we oli singel oli wantem mared, o taem oli joen tugeta long wan grup, oli ting se hemia janis blong kasem wan fren. Wan taem mi travel i go narasaed long kantri blong mekem wan wok, mo mi kasem ples long naet, long taem blong miting. Sista we mi stap wetem hem, i talem se i gat tu brata long kongregesen we oli gat sem yia olsem mi. Hem i talem se hem i no stap traem blong mekem rod blong mi. Be taem mifala i go insaed long Haos Kingdom nomo, hem i girap i pulum mi mi go mitim tufala brata ya. Tru, long taem ya mitrifala i sem we i sem.”

13. ?Wanem eksampol i leftemap tingting blong wan singel sista?

¹³ Wan narafala singel sista we i wok long Betel, i talem se: “Mi save sam olfala singel paenia we oli gat gudfala tingting, oli tingting nomo long wok blong olgeta, oli rere blong halpem ol narafala, mo oli glad nomo long wok we oli mekem. Olgeta ya oli givhan bigwan long kongregesen. Oli gat stret tingting long singel laef blong olgeta, oli no harem se oli gud moa long ol narafala from we oli stap singel longtaem, mo oli no harem se oli mestem sam samting from we oli no gat wan patna mo famle.” Hemia nao from wanem yu save harem gud long wan kongregesen we evriwan i respektem yu, mo i tinghae long yu. Yu no harem se oli sore o oli jalus long yu, o oli no wantem save long yu, o oli leftemap yu bitim mak. Yu save se hemia stret ples blong yu.

14. ?Olsem wanem yumi save soem se yumi respektem olgeta we oli singel?

¹⁴ Ol singel brata mo sista bambae oli harem gud tumas sipos yumi tinghae long olgeta from ol gudfala fasin we oli gat, be i no from we oli mared o oli singel. Bitim we yumi sore long olgeta, i moagud yumi glad we oli holemstrong long Jehova. Olsem nao, ol singel brata mo sista blong yumi bambae oli neva filim olsem we yumi stap talem long olgeta se: “Mi mi no nidim yu.” (1 Kor. 12:21) Be bambae oli save se yumi respektem olgeta mo yumi glad se oli joen long kongregesen.

15. ?Wanem jenis we samfala oli mekem blong minista wok blong olgeta i kam bigwan moa?

¹⁵ Long ol yia we i jes pas, plante pablisa oli gat mak ya blong lanem narafala lanwis, blong mekem minista wok blong olgeta i kam bigwan moa. Oli mas jenisim sam samting blong oli save mekem olsem. Ol brata mo sista ya oli lego kongregesen we i toktok lanwis blong olgeta, blong go joen long wan nara kongregesen we i toktok narafala lanwis mo i nidim moa pablisa. (Wok 16:9) Ol Kristin ya oli mekem desisen ya from wok blong Kingdom. Oli mekem plante gudfala wok, nomata se maet i tekem plante yia blong oli toktokgud niufala lanwis. Ol gudfala fasin mo ekspiriens blong olgeta i mekem kongregesen i kam strong mo i stap gud. !Yumi tinghae long hadwok blong ol brata mo sista ya!

16. ?Olsem wanem ol elda oli save skelem sipos wan brata i save kam elda o man blong givhan?

¹⁶ Bodi blong ol elda i no mas wet se wan brata i toktokgud lanwis blong kongregesen fastaem, bifo we oli talem se hem i save kam elda o man blong givhan. Ol elda bambae oli skelem wan brata folem ol fasin we Baebol i talem se elda o man blong givhan i mas gat, be i no se i toktokgud lanwis blong kongregesen o nogat.—1 Tim. 3:1-10, 12, 13; Taet. 1:5-9.

17. ?Wanem kwestin we sam famle oli mas tingbaot taem oli muv i go long nara kantri?

¹⁷ Sam Kristin famle oli mas muv i go long narafala kantri blong faenem wok o ronwe long trabol. Taem samting ya i hapen, maet ol pikinini blong olgeta oli go skul long lanwis blong niufala kantri ya. Maet ol perens tu oli mas lanem men lanwis blong kantri ya, blong oli save faenem wok. ?Be olsem wanem sipos i gat wan kongregesen o grup long prapa lanwis blong olgeta? ?Famle ya bambae i go long weswan kongregesen? ?Bambae oli go long kongregesen we i toktok men lanwis blong kantri, o long kongregesen we i toktok prapa lanwis blong olgeta?

18. Folem Galesia 6:5, ?olsem wanem blong soem se yumi respektem desisen blong hed blong famle?

¹⁸ Hed blong famle i mas mekem desisen se famle bambae i joen long weswan kongregesen. Hemia wan desisen we famle ya nomo i mas mekem, taswe hem i mas tingbaot wanem i save givhan moa long famle blong hem. (Ridim Galesia 6:5.) Yumi mas respektem desisen blong hed blong famle. Nomata wanem desisen hem i mekem, i gud yumi akseptem mo yumi welkamem famle ya, mo luk olgeta se oli impoten tumas long kongregesen blong yumi.—Rom 15:7.

19. ?Hed blong famle i mas prea mo tingting gud long wanem?

¹⁹ Sam famle, maet oli joenem kongregesen we i toktok prapa lanwis blong ol perens, be maet ol pikinini oli no toktokgud lanwis ya.  Sipos kongregesen ya i stap long wan eria we ol man blong hem oli toktok lanwis blong kantri, maet bambae i had blong ol pikinini oli kasemsave long ol miting mo oli no gohed gud long spirit. ?From wanem? From we maet ol pikinini ya oli go long skul blong lanwis blong kantri, be i no prapa lanwis blong ol perens blong olgeta. Long taem olsem, hed blong famle i mas prea mo tingting gud long samting we famle i mas mekem, blong halpem ol pikinini blong oli frengud wetem Jehova mo ol man blong hem. Oli mas jusum se: Oli givhan long ol pikinini blong oli toktokgud prapa lanwis blong olgeta, o oli mas muv i go long wan kongregesen we i toktok lanwis we ol pikinini oli kasemsave long hem. Nomata wanem desisen we hed blong famle i mekem, kongregesen we oli joen long hem i mas respektem olgeta mo tinghae long olgeta.

20. ?Olsem wanem yumi save soem se yumi respektem ol brata mo sista we oli stap lanem wan niufala lanwis?

²⁰ Olgeta risen we yumi tokbaot finis, oli mekem se long plante kongregesen, bambae i gat ol brata mo sista we oli stap traehad blong lanem wan niufala lanwis. Maet bambae i had long olgeta blong oli talemaot tingting blong olgeta. Be yet, sipos yumi no tingbaot lanwis, bambae yumi luksave lav we oli gat long Jehova mo strong tingting we oli gat blong mekem wok blong hem. Sipos yumi luk ol naesfala fasin ya, bambae yumi gat bigfala respek mo yumi tinghae long ol brata mo sista ya. Nao bambae yumi no save talem se: “Mi mi no nidim yu,” jes from we oli no toktokgud lanwis blong yumi.

21-22. ?Yumi glad tumas long wanem?

²¹ Yumi glad tumas we Jehova i mekem yumi evriwan i gat wok insaed long kongregesen blong hem. Nomata se yumi man o woman, singel o mared, yangfala o olfala, yumi toktokgud wan lanwis o smol nomo, yumi evriwan i impoten long ae blong Jehova mo long yumi evriwan.—Rom 12:4, 5; Kol. 3:10, 11.

²² I gud yumi gohed blong folem ol nambawan lesen we yumi lanem long pijatok blong Pol long saed blong bodi. Long fasin ya, bambae yumi traehad moa blong lukaotem rod blong tinghae long wok blong yumi mo blong ol narafala, long kongregesen blong Jehova.