1. Ka katei líchugubei Heowá houn kada aban hádangiñe lubúeingu?

LAU ÍNSIÑEHABUNI, ruti Heowá aban ubaraü lun kada aban hádangiñe lubúeingu. Íbini ámuñegueinarügüti lan dasi le wagunfulirubei, gebegitiwa sun wagía lun Heowá ani mégeiguatiwa wámagua. Íderagua lumutiwa apostolu Pábulu gunfurandei arufudahani súdiniti le. Ida?

2. Según Éfesuna 4:16, ka uagu lunti lubéi gebegi hamá wíbirigu woun ani ídeha wagíame wámagua?

² Kei larufuduni bérusu le ídangiñebei lasagarúa arütíkulu le, ariñagati Pábulu moun lumuti lan wariñagun luagu amu lubúein Heowá lidan wasaminan “Memegeirun numutibu” (1 Ko. 12:21). Lun ñein lan darangilaü lidan damuriguaü mosu gebegi hamá wíbirigu woun ani ídeha wagíame wámagua (aliiha huméi Éfesuna 4:16). Dan le lídanñanu lan aban íbirigu derebuguti hamadagua hámagua ani sanditiña hínsiñewa hamá.

3. Kaba wakutiha lidan arütíkulu le?

³ Ka burí ida katei gayara lan warufuduni inebe hamá wíbirigu woun? Lidan arütíkulu le, warihibei ida luba lan harufudun wéiyaaña lidan afiñeni inebehabúni hámagua. Lárigiñe, wakutihaba ida luba lan warufudun gebegi hamá íbirigu wügüriña hamá würiña ha mamarieidungiña woun. Ani lagumuhóun, warihibei ida luba lan warufuduni gebegi hamá íbirigu ha áfaagubaña lun hafurendeiruni wañeñe woun.

4. Ka adundehani lúmagiñeti Pábulu le adarirúbei lidan Rómana 12:10 lunbei hafalaruni wéiyaaña lidan afiñeni?

⁴ Iridúatiña sun wéiyaaña lidan afiñeni lau lídehan lani Heowá sífiri sandu, gama lumoun ámuñegueinarügüti iyarani le luágubei  kada aban (1 Ko. 12:17, 18). Másiñati málügili lan lúmagiñe hiridún fiu hádangiñe kei wéiyaaña lidan afiñeni ani ha híbiri, másiñati siñaali lan hadügün saragu ladüga harumudiri o luriban hátuadi. Íbini ítara, moun lumuti lariñagun aban wéiyaali lidan afiñeni lidan lisaminan luagu amu wéiyaali “Memegeirun numutibu”. Lubaragiñe lira, lunti hafalaruni sun hagía adundehani le líchugunbei Pábulu lidan Rómana 12:10 (aliiha huméi).

5. Ida liña harufudun wéiyaaña lidan afiñeni inebe hamá amu wéiyaaña houn, ani ka uagu mégeiwa lubéi lun hadügüni?

⁵ Arufudatiña wéiyaaña lidan afiñeni inebe hamá amu wéiyaaña houn lau híchugun arigei lun le hariñagunbei. Súdiniti katei le dántima le hóundaragun lun hayanuhan luagu katei súdiniti. Ka uagu? Ariha waméi le tariñagunbei La Atalaya to lánina 1 lidan diisi-hati, irumu 1988: “Lunti hasubudiruni wéiyaaña lidan afiñeni gayara lan layusurun Kristu lau lídehan lani Bungiu sífiri sandu furumiñeguarügü wéiyaali lun líchugun adundehani tídangiñeti Bíbülia lun laranserúniwa somu sügǘ o lun ladügǘniwa somu katei súdiniti (Adü. 15:6-15). Úati ni aban íbiri lun ligía lan lau lagumuhóun dimurei lidan hadamuridagun wéiyaaña lidan afiñeni”.

6. a) Kaba íderaguaña wéiyaaña lidan afiñeni lun hawadigimaridun lidan aban? b) Ida liña lahuudun katei le houn lílana damuriguaü?

⁶ Anhein inebe habéi amu wéiyaaña lun aban wéiyaali lidan afiñeni, máfaagunbei lun ligíaba lan furumiñeti ariñagei le lasaminarunbei dan le hadamuridagun. Mámarügübei ligíatima ayanuha, masaminarunbei giñe lúmañein lan lébuna sun katei. Lubaragiñe lira, lariñagubei le lasaminarubei lau ǘnabuguni ani laganbubei le hariñagubei ha híbiri. Lanwoun lira, aranseñu liña lun lakutihani adundehani le tídanbei Bíbülia luma lun lafalaruni adundehani le líchugubei ‘musu úaraguati ani gunfurandati’ (Mat. 24:45-47). Dan le haransehani wéiyaaña lidan afiñeni katei lau ínsiñehabuni luma inebesei, ñeinbei lani Bungiu sífiri sandu hama ani líderagubaña lira lun hanúadirun katei le ídehati lun derebugu lan hafiñen lílana damuriguaü (Sant. 3:17, 18).

7. Ka meha lariñagubei Hesusu hawagu ha mamarieidungiñabaña?

⁷ Lidan wadamuridagun mámarügüñanu añahein íbirigu maríeitiña hama iduheñu hau hasaanigu, añahein giñe íbirigu wügüriña hama würiña ha mamarieidungiña. Ida luba warihiniña íbirigu mamarieidungiña ha? Akutiha waméi le lariñagubei Hesusu hawagu ha mamarieidungiñabaña. Dan le ya lubéi ubouagu, mamarieidunti meha ani yusu lumuti sun lidaani lidan apurichihani. Marufudahanti ni aban wéiyaasu mosu lan hamarieidun kristiánugu o mosu lan herederun mamarieidunga. Gama lumoun, ariñagati ñéinbaña lan fiu kristiánugu anúadirutiña herederun mamarieidunga (Mat. 19:11, 12). Inebetiña meha lun ani masaminarunti meha ǘnabu hamá o mégeigiña lan somu katei lidan habagari.

8. Según lariñaguni Pábulu lidan 1 Korintuna 7:7-9, kaba uagu hasaminara kristiánugu?

⁸ Ítara kei meha Hesusu, seriwiti meha giñe apostolu Pábulu lun Bungiu mamarieidunga. Marufudahanti ni aban wéiyaasu wuriba lan lamarieidun gürigia. Subudi lumuti meha kada lan gürigia lunbei lanúadirun anhein lamarieiduba lubéi o mamarieidunbei lan. Íbini ítara, ínchaha lumutiña kristiánugu lun hasaminarun anhein gayara lubéi heseriwidun lun Heowá mamarieidunga (aliiha huméi 1 Korintuna 7:7-9). Chóuruti marihin lumutiña lan Pábulu ha mamarieidungiñabaña kei gürigia ǘnabutiña. Le linarün katei, anúadira lumuti Timotéu, aban nibureinti le meha mamarieidungili lun letenirun lun burí fiu dasi súdiniti (Fili. 2:19-22). * Ligíati, mabuidunti lun wasaminarun aranseeli lan aban íbiri o maranserungili lan lun lagunfulirun lau somu dasi ladügarügü maríeihali lan o mamarieidungili lan (1 Ko. 7:32-35, 38).

9. Ka gayaraabei wariñaguni luagu maríei luma luagu lerederun gürigia mamarieidunga?

⁹ Dandu Hesusu kei Pábulu marufudahantiña mosu lan lamarieidun aban gürigia o mosu lan lerederun mamarieidunga. Ligíati, ka gayaraabei wariñaguni luagu maríei luma luagu lerederun gürigia mamarieidunga? Afuranguagüda tumuti garüdia La Atalaya to lánina 1 lidan diisi-hati, irumu 2012 katei le buidu: “Le linarün katei, dandu maríei kei lerederun gürigia mamarieidunga aban idewesei lúmagiñeti Bungiu. [...] Marihin lumuti Heowá lerederun gürigia mamarieidunga kei aban katei le ruti  íruni luma busiganu”. Furanguti lunti lan inebe lan habara íbirigu mamarieidungiña ha lídanbaña damuriguaü woun.

10. Ida luba warufudun inebe hamá íbirigu ha mamarieidungiña woun?

¹⁰ Ida luba warufudun inebe lan le hasandirubei luma le gádanbaliña íbirigu ha mamarieidungiña woun? Lunti waritaguni añahein lan kristiánugu, hagía anúadirubalin houngua herederun mamarieidunga. Añahein amu hínsiñeti hamuga houn lun hamarieidun, gama lumoun madari hamagili o madari hamagiru tagürüga hanigi. Añahein giñe amu másiñati ladüga lan hilaali lan tani weiri o hilaaru lan lani weiriou. Meberesenga gádantiña, moun lumuti wálügüdüniña ka lan uagu mamarieidungiña lubéi ni lun wáfaagun wíderaguniña adarira aban úmari. Inarüni, háfuga hamuriahan fiu hádangiñe ídemuei wama. Gama lumoun, ánhaña mamuriahan ídemuei wama, lubaragiñe wáluahan wíderaguniña, samina wamá ida luba lan hamuga wadügün lun hasandiragun houngua (1 Tesa. 4:11; 1 Tim. 5:13). Ariha waméi le hariñagunbei fiu hádangiñe.

11, 12. Ida luba hamuga wírudagüdüniña íbirigu ha mamarieidungiña mabuserunga?

¹¹ Saminati aban óunigiruti sirkuitu le mamarieidungili ani le agunfulirubei lau lidasin buidu, barǘ lan lerederun gürigia mamarieidunga saragu buiti. Lau sun lira, ariñagati anihein lan dan lasandirun íruni dan le hálügüdüni somu íbirigu ka lan uagu mamarieidungili lubéi, íbini mama lan lau luriban aritaguni hálügüdaguei. Ariñagati aban íbiri mamarieidungili le eseriwidubei Betelirugu: “Anihein dan nasandirun ariha hamaniña fiu íbirigu, íbirigu ha mamarieidungiña lau saragu íruni kamá hamuga aban ihürügün lerederun gürigia mamarieidunga ani marihin hamuti kamá aban idewesei”.

¹² Ariñagatu aban íbiri mamarieidungiru to eseriwiduboun Betelirugu: “Añahein íbirigu saminatiña busentiña lan sun ha mamarieidungiña hamarieidun o ariha hamuti lan íbirigu mamarieidungiña hóundaragu íbirigu lidan somu isebáhari kei aban chansi lun háluahan hadari. Luagu aban dan, aba nóunahoun adüga aban wadagimanu lidan amu fulasu lidan ageiraü le ñein nubéi ani chülütina aban weyu guñoun le ídanbei ladügǘwa adamuridaguni. Ariñagatu íbiri to úmaboun neredera nun añahein lan bián íbirigu lidan damuriguaü le ñein tubéi ha niseisin ha mamarieidungiña. Chóurugüda tumuti nun mama lan táluahaña adari nun, gama lumoun dan le webelurunbei tidoun Luban Adamuridaguni aba tárügüdüni núhabu ani aba tanügünina le ñein habéi bián íbirigu hagía lun nabusuragun houn. Ma meha lueirin busiganu le wásügürübei ǘrüwagubei wagía!”.

13. Ka íchugubei gurasu tun aban íbiri mamarieidungiru?

¹³ Ariñagatu aban íbiri to eseriwiduboun Betelirugu ani mamarieidungiru: “Subuditiña prekursorugu nun ha mamarieidungiña ani wéinamugaaña, úaraguatiña lidan le hadügübei, chubalugutiña, wéiriti hetenirun lun hadasin, gúndaatiña lidan ani ídehatiña giñe saragu lidan damuriguaü le ñein habéi. Míñugunti hasandiragun houngua lau mamarieidungiña lan ani mǘnabunti giñe hasandiragun houngua ladügarügü mamarieidungiña lan ani masaanigu hagía”. Ma lubuidun lasandiragun aban gürigia lungua lidan aban damuriguaü le ñein lubéi louserúa lau inebesei, gebegi ligía houn lílana, marihin hamuti kei aban fugiabu, magimugarun haméi ani manügün haméi giñe kei ni kata ni lau uéiriguni. Sun íbirigu hagía, sandiguatiña houngua hínsiñewa hamá.

14. Ida liña warufuduni inebe hamá íbirigu mamarieidungiña woun?

¹⁴ Teinki hamutiwa íbirigu mamarieidungiña gebegi hamá woun luagu lubuidun hagaburi; lubaragiñe wayanuhan wuriba hawagu  luagu le gádanbaliña. Mariha wamaña kamá fugiabugu. Gebegi lan úaraguni le harufudubei woun. Ánhawa adügei ítara, maweiyasunbaña asandiragua houngua kamá hamuga wariñaguña houn “Memegeirun numutibu” (1 Ko. 12:21). Lubaragiñe lira, hasubudirubei inebe hamá woun ani gebegi lan habara woun lidan damuriguaü.

15. Ka burí asansiruni adüga hamaalibei fiu íbirigu lun haganwoundagüdüni hapurichihan?

¹⁵ Lidan burí irumu le ásügürübei, saragu íbirigu hafurendeiruña aban iseri iñeñein lun haganwoundagüdüni hapurichihan. Adügaali lira lun hadügün asansiruni. Águyaaña lidoun amu damuriguaü le ñein lubéi lemegeirúa ídemuei lidan apurichihani lidan iñeñein le hafurendeirubei (Adü. 16:9). Hagía houngua anúadirubalin katei le. Íbini barǘ lan saragu irumu lun hafurendeiruni iñeñein ligía, wéiriti ídemuei le híchugubei lun damuriguaü. Rútiña dǘgüdaguaü houn íbirigu lau lubuidun hagaburi luma burí le winwan hamaalibei. Ma wéiriti lebegi áfaaguni le adüga hamaalibei íbirigu ha woun?

16. Ka lunbei gabaroun hamani wéiyaaña lidan afiñeni lun híridun aban íbiri kei ídehati lidan damuriguaü o wéiyaali lidan afiñeni?

¹⁶ Buiti funa san lun míridun hamani wéiyaaña lidan afiñeni aban íbiri kei wéiyaali lidan afiñeni o kei aban ídehati lidan damuriguaü ladügarügü mayanuhan lani buidu iñeñein le lídanbei damuriguaü ligía? Uá. Lunti gabaroun hamani wéiyaaña lidan afiñeni adundehani le tídanbei Bíbülia luáguti liridún aban íbiri kei ídehati o kei wéiyaali lidan afiñeni, mama ladügarügü mayanuha lani iñeñein buidu (1 Tim. 3:1-10, 12, 13; Titu 1:5-9).

17. Ka lunbei hanúadiruni tílana muna ha águyubaña lidoun amu ageiraü?

¹⁷ Añahein tílana muna furihaña hageiragiñe ladüga héibaahouniwa o lun houdin áluaha wadagimanu. Másiñati ñüdün hamá hasaanigu leskuela lidan iñeñein le ayanuhóubei lidan iseri ageiraü le ñein habéi, másiñati giñe mosu lan hafurendeiruni agübürigu iseri iñeñein ligía lun hadarirun wadagimanu. Gama lumoun, samina wamá anihein lan aban damuriguaü o aban sétanu le ñein lubéi hererun. Kaba hamuga san idan damuriguaü o sétanu idan hadamuridagua? Le san ñein lubéi layanuhóua hererun o le ñein lubéi layanuhóua iñeñein le ayanuhóubei lidan ageiraü le ñein habéi?

18. Kei lariñaguni Galasiana 6:5, ida luba warufuduni inebe lan le lanúadirubei hachügüdina tílana muna woun?

¹⁸ Lunti lanúadiruni hachügüdina tílana muna kaba lan idan damuriguaü hadamuridagua. Ligíati, lunti gabaroun lani le buídutimabei houn tílana luban (aliiha huméi Galasiana 6:5). Kei ligía lan lunbei lanúadiruni katei le lunti inebe lan le lanúadirubei woun. Ani resibi waméi hau sun tílana luban lau ínsiñehabuni lidan damuriguaü (Rom. 15:7).

19. Ka lunbei ladügüni hachügüdina tílana muna anhein ua lubéi gunfuranda hamani lisaanigu iñeñein le ayanuhóubei lidan damuriguaü le ñein habéi?

¹⁹ Másiñati añahein lan agübürigu hau hasaanigu  lidan aban damuriguaü le ñein lubéi layanuhóua hererun hagübürigu. Gama lumoun, anhein lidan lubéi iñeñein le ayanuhóubei lidan ageiraü houdin hasaanigu leskuela, másiñati mayanuhan hamani hererun hagübürigu buidu. Ligíati hénrengu lubéi houn gunfuranda hamani le ariñawagúbei lidan adamuridaguni luma lun hederebudagüdüni hamadagua luma Bungiu. Lidan aban sügǘ ítarati, lunti lañuurun hachügüdina tílana muna asaminara ani furíei ligíame lun líderaguniña lisaanigu lúntima yarafañu hamá lun Heowá luma tun lóundarun. Mosu lanúadirun aban lídangiñe bián katei le: harufudahani hererun houn hasaanigu, o háguyun lidoun aban damuriguaü le ñein lubéi layanuhóua iñeñein le gunfuranda habéi hasaanigu buidu. Lidan furumiñeguarügü kesi, lunti hadügün lílana damuriguaü lun hasandiragun iseri íbirigu ha houngua inebewa hamá ani hínsiñewa hagía.

20. Ida liña warufudun inebe hamá ha afurendeirubaña amu iñeñein woun?

²⁰ Kei le ariha wamaalibei, lidan saragu damuriguaü añahein íbirigu ha áfaagubaña lun hafurendeirun aban iseri iñeñein. Háfuga hénrengu lan houn lun hafuranguagüdüni le hasandirubei lidan iseri iñeñein ligía, ánhawa gaguraasun habá warihibei hínsiñehabu luagu Heowá luma busén hamá heseriwidun lun. Ladügüba le lun inebe hamá woun gebegi hagíame woun tídangiñe sun wanigi. Masaminarunbadiwa memegeirun wamaniña ladügarügü mayanuhan hamani wererun buidu.

21, 22. Ka uagu weteingirei Heowá saragu?

²¹ Wéiriti weteingiruni Heowá luagu lígirun lun gabara wamá sun wagía lidan damuriguaü. Meberesenga anhein wügüriña wabéi o würiña, anhein mamarieidungidiwa lubéi o maríeihadiwa lan, anhein nibureingidiwa lubéi o derebuguhadiwa lan, anhein buidu lubéi wayanuhani aban iñeñein o lougua lan: sun wagía gebegitiwa lun Heowá luma houn wíbirigu (Rom. 12:4, 5; Kol. 3:10, 11).

²² Ma lubuidun ariñahani le furendei wamaalibei lídangiñe le larufudahabei Pábulu luáguti lumegegu hágubu gürigia. Ánhawa áyeihei larufudahan Pábulu, wáluahaba furumiñeguarügü igaburi lun warufuduni gebegi lan ubaraü le wámabei woun lidan damuriguaü luma habara amu lílana damuriguaü.