1. Ni enki eki Yehova yahire buri muhereza weye?

YEHOVA akikiriza buri muhereza weye wena kugira omurimo omu kibina ceye. N’obu emirimo yitu etari kushushana, twena turi ab’omuhendo kandi nitwetengana. Entumwa Paulo natukwasa kushoborocerwa eri shomo ry’omugasho. Ata shi?

2. Tukuratize ebiri omu Baefeso 4:16, ahabw’enki tushemerire kureba buri omwe omu kibina nk’ow’omugasho kandi tukakorera hamwe?

² Nk’oku kiri kugambwa omu mutwe gw’eki kicweka, Paulo akereka ku hatariho omuhereza wa Yehova ori kubasa kureba ondijo ngu amugire ngu: ‘Tonyinire mugasho.’ (1 Kor 12:21) Ekibina caba kiri kukoringana omu businge nikituma twareba buri omwe nk’ow’omugasho kandi tukorera omu bumwe. (Shoma omu Baefeso 4:16.) Ku turi kukorera omu bumwe omu kibina nikituma twayombekana omuri rukundo.

3. Ni enki eki twaza kushwijuma omuri eki kicweka?

³ Ni mu buha buryo obu turi kubasa kwerekamu ku nituha ekitinisa abandi omu kibina? Omuri eki kicweka twaza kushwijuma oku abazehe bari kubasa kuha ekitinisa abazehe bagenzi babo. Nambwenu twaza kushwijuma oku twena turi kubasa kureba benetata na banyanyazi abatakatahire omu bushwere nk’ab’omugasho. Nitwija kuhendera turi kushwijuma oku turi kubasa kwereka ku nitukunda abatari kumanya ge orurimi rwitu.

4. Ni buha buhabuzi bwa Paulo oburi omu Barooma 12:10 obu abazehe bashemerire kukuratiza?

⁴ Abazehe bona omu kibina nibatoranwa ahabw’omwika oguri kwera. Konka buri omwe ayine ekiconco ekitari kushushana n’ec’ondijo. (1 Kor 12:17, 18) Abamwe nibaba bacari basya batine obumanyi nk’abamazire obwire. Abandi nibaba batacabasa  kukora byingi ahabw’okukura ninga shi ebizibu by’oburwire. Konka tihariho omuzehe ori kubasa kureba mugenzi weye ngu amugambire ngu: ‘Tonyinire mugasho.’ Ahobwe, buri muzehe nakuratiza obuhabuzi bw’entumwa Paulo oburi omu Barooma 12:10.—Hashome.

5. Ni bata oku abazehe bari kwereka ku nibaha ekitinisa bagenzi babo, kandi shi ahabw’enki kiri ec’omugasho bakikora?

⁵ Abazehe nibaha ekitinisa bagenzi babo bari kubahurikiza betonzire. Eco ni ec’omugasho munonga abazehe babugana nk’akakiko ngu baganire aha nshonga egumire. Ahabw’enki? Yetegereze eki Omunara g’Omurinzi, 1 Okwikumi 1988 omu Rungereza, gwagambire: “Abazehe nibikiriza ku Kristo ari kukoresa omwika oguri kwera omu kukwasa buri muzehe omu kakiko k’abazehe kuronda omusinge g’omuri Bibuli oguri kubasa kubakwasa kukora ensharamu ndungi aha kibuzo nanka. (Byak 15:6-15) Omwika oguri kwera nigukorera aha mutwe gw’abazehe, tiguri kukorera aha muzehe omwe wenka omu kakiko.”

6. Ni enki ekiri kukwasa abazehe kukorera hamwe omu bumwe, kandi shi ni bata oku ekibina kiri kugasirwa bakikora basyoya?

⁶ Omuzehe ori kuha abazehe bagenzi beye ekitinisa tashemerire kuba ni we owagamba wenka omu nama y’akakiko k’abazehe, kandi naba atari kwenda ngu ebitekateko byeye abandi barebe ku ni byo ebihikire. Ahobwe, nahayo ekitekateko ceye omu bucurezi. Kandi nahurikiza ayetonzire ebitekateko by’abandi. Kandi ec’omugasho munonga, naba ayetegwire kuganira n’abandi aha misinge y’omuri Bibuli n’okorobera obuhabuzi bw’‘omwambari w’omwesigwa kandi w’omunyabwenge.’ (Mat 24:45-47) Abazehe baganira aha nshonga nanka omuri rukundo kandi bari kuhana ekitinisa, omwika oguri kwera niguba guriho ngu gubakwase kuhika aha nsharamu ndungi eri kombeka ekibina.—Yak 3:17, 18.

7. Yesu akaba nareba ata benetata abatakatahire omu bushwere?

⁷ Omuri obu bwire ekibina nikiba kirimu abashija n’abakazi hamwe n’abine abana.  Kandi nambwenu nikiba kirimu benetata na banyanyazi abatakatahire omu bushwere. Nitureba tuta abo benetata na banyanyazi abatakatahire omu bushwere? Tekateka aha ku Yesu yabire nabareba. Omu bwire bw’omurimo gwa Yesu omu nsi taratahize. Akaguma ari wenka, yaguma atire omutima aha kuhikiriza omurimo gweye. Yesu taregesize ngu Omukristo ashemerire kutasa ninga kutatasa. Konka akagamba ku hariho Abakristo abashaziremu kutataha omu bushwere. (Mat 19:11, 12) Yesu akaba naha ekitinisa benetata na banyanyazi abatakatahire omu bushwere. Akaba atari kubareba nk’ab’ahaasi ninga ngu arebe ku hariho eki babuzire.

8. Tukuratize ebiri omu 1 Bakorinso 7:7-9, ni enki eki Paulo yahigire Abakristo kutekatekaho?

⁸ Nka Yesu, entumwa Paulo na we akakora omurimo gweye ari wenka. Paulo na we taregesize ngu Omukristo yatasa naba yakora kubi. Akaba nayikiriza ku eyo eri ensharamu y’omuntu. Kandi Paulo akahiga Abakristo kweshariramu yaba bari kubasa kukorera Yehova bari bonka. (Shoma omu 1 Bakorinso 7:7-9.) Nambwenu Paulo tararebire Abakristo abatakatahire omu bushwere nk’abatine mugasho. Ahobwe akatorana Timoseo owabire acari muto kandi atakatahize kugira ngu akore byingi omu murimo gwa Yehova. * (Fil 2:19-22) Kikaba kiri kibi kutekateka ku mwenetata ari kubasa kuhebwa obujunanizibwa ngu ni oku yatahize ninga shi atakatahize.—1 Kor 7:32-35, 38.

9. Ni enki eki turi kubasa kugamba aha bikwatirine n’okutasa ninga okutatasa?

⁹ Ahagati ya Yesu na Paulo tihariho n’omwe owayegesize ku Abakristo bashemerire kutasya ninga kutatasya. Ni enki eki turi kubasa kugamba aha bikwatirine n’okutasya ninga okutatasya? Omunara g’Omurinzi, 1 Okwikumi 2012 omu Rungereza, gukatuha ecokugarukamu kirungi c’eco kibuzo guri kugira ngu: “Buzima, okutasya ninga shi okutatasya ni ekiconco ekiri kuruga ahari Ruhanga. Yehova tari kureba kuguma ori wenka nk’ekiri kwisa enshoni ninga omuceeno.” Obwe rero, tukuratize obwo buhabuzi tushemerire kuha ekitinisa benetata na banyanyazi abatakatahire omu bushwere abari omu kibina.

10. Ni bata oku turi kwereka ku nituha ekitinisa benetata na banyanyazi abatakahire omu bushwere?

¹⁰ Ni bata oku turi kubasa kwereka ku nitufa aha nyehurira n’aha mbera za benetata na banyanyazi abatakatahire omu bushwere? Tushemerire kwijuka ku Abakristo abamwe bashaziremu kuguma bari bonka. Abandi bo nibasharamu kutaha omu bushwere, konka  baba batakabwine owu bari kubasa kubuganisa. Abandi nibabasa kuba barafisize abakundwa babo. Mbehi kihikire ab’omu kibina kubuza Omukristo otakatahire omu bushwere ngu ‘ahabw’enki wagumire ori wenka ninga nkurondere owu muri kubasa kubuganisa?’ N’obu hariho benetata bamwe abari kubasa kushaba obwo buyambi, konka yaba mwenetata atabikushabire, tekateka aha ku mwenetata ninga munyanyazi ari kwehurira wamugambira eby’okumurondera owu bari kubasa kubuganisa? (1 Tes 4:11; 1 Tim 5:13) Reka tushwijume eki benetata na banyanyazi b’abesigwa abatakatahire omu bushwere bagambire.

11-12. Ni enki ekiri kubasa kumara amani benetata na banyanyazi abatakatahire omu bushwere?

¹¹ Omureberezi ori kutayayira ebibina otakatahize ori kukunda omurimo gweye akagamba ku kuhereza Yehova ori wenka harimu ebirungi byingi. Konka, akagamba ku cabire kiri kumumara amani obu benetata na banyanyazi babire nibamubuza ngu: ‘Ahabw’enki otari kutasya?’ Mwenetata otakatahize ori kuhereza ahari Beteli akagamba ngu: “Hariho obu benetata na banyanyazi bari kuhurira basaasibwa abatakatahire omu bushwere. Eco nikituma nahurira kuguma ndi omwojo kiri nk’omugogo omu mwanya g’okuba ekiconco.”

¹² Omunyanyazi ori kuhereza ahari Beteli ocari wenka akagamba ngu: “Benetata na banyanyazi abamwe nibatekateka ku abatakahize bona bari kuba bari kuronda abu baribuganisa ninga batekateka ku baba bari hamwe n’abandi bari kuba bari kutisa aha kuronda owu baritaha hamwe omu bushwere. Nagumizamu ngu: Izoba rimwe obu nabire ntayayire akacweka kamwe k’ihanga ryitu ndi omu murimo, nkaza omu nterane. Omunyanyazi owu twabire twemerire hamwe akangambira ngu omu kibina cabo harimu benetata babiri b’orwingano rwange. Akampamiza ku ari kubasa kunyamba kutunga ow’okutaha na we omu bushwere. Ku twatahire omu Nju y’Obukama, akankurura yantwarira abo benetata. Eco kikatushwaza nyowe n’abo benetata.”

13. Ni kiha cokureberaho ecagarwiremu amani omunyanyazi omwe?

¹³ Ondijo munyanyazi ori kuhereza ahari Beteli ocari wenka akagamba ngu: “Nimanya abapayoniya abakuzire kandi batakatahire omu bushwere abine entego ndungi, abetegwire kukwasa abandi kandi abashemerirwe omu murimo gwabo; nibakora byingi omu kibina. Bine emitekatecere eringanire aha kuguma bari bonk; tibari kutekateka ku bari barungi kukira abandi ahabw’okuguma bari bonka ninga shi ngu bahurire batashemerirwe.” Nikishemeza kuba omu kibina, ahu buri omwe ari kuha ekitinisa mugenzi weye kandi akamureba nk’ow’omugasho. Benetata na banyanyazi ni baba batakwinire ihari, batari kukwehuzya ninga ngu barebe ku ori murungi kubakira. Ahobwe nomanya ku bari kukunda.

14. Ni bata oku turi kubasa kwereka ku nituha ekitinisa Abakristo abatakatahire omu bushwere?

¹⁴ Benetata na banyanyazi abatakatahire omu bushwere nibashemererwa twabareba nk’ab’omuhendo ahabw’emitwarize yabo mirungi atari ahabw’okubasaasibwa ngu bari bonka. Omu mwanya g’okubasaasibwa, nitubasima ahabw’okuguma bari abesigwa. Eco kiryatuma benetata na banyanyazi bareka kutekateka ngu nitubareba nk’‘abatatwinire mugasho.’ (1 Kor 12:21) Ahobwe, baryamanya ku turi kubaha ekitinisa kandi ku turi kubareba nk’ab’omugasho omu kibina.

15. Ni ziha mpindahinduka ezi bamwe bakozire kugira ngu bongere aha buhereza bwabo?

¹⁵ Omuri obu bwire, ababurizi bingi nibeteraho entego y’okwega orundi rurimi kugira  ngu babase kukora byingi omu murimo. Kugira ngu babase kukihikaho nikibashaba kukora empindahinduka omu kubaho kwabo. Abo benetata na banyanyazi nibasiga ebibina ebiri kukoresa orurimi rwabo kugira ngu baze kuyamba ebindi bibina ebiri kukoresa orundi rurimi ebiri kwetenga obuyambi. (Byak 6:9) Eyi ni ensharamu eyi buri Mukristo ari kubasa kukora kugira ngu akore byingi omu murimo. N’obu kiri kubasa kubatwara emyaka myingi kugira ngu bamanye ge orundi rurimi, nibakora bingi omu kibina kisya. Emicwe yabo mirungi hamwe n’obumanyi obu bari kuba bine nibigumya benetata na banyanyazi omu kibina. Mbehi abo benetata na banyanyazi abari kweferereza titushemerire kubareba nk’ab’omuhendo!

16. Ni enki eki akakiko k’abazehe kari kushwijuma kugira ngu mwenetata abe omuzehe ninga omuhereza?

¹⁶ Akakiko k’abazehe tikashemerire kugamba ku mwenetata atari kubasa kuba omuzehe ninga shi omuhereza ahabw’okuba atari kumanya ge orurimi rw’ekibina kiri kukoresa. Akakiko k’abazehe nikaha obujunanizibwa mwenetata kurugirira aha bi Bibuli eri kugamba ebiri kushabwa ori kwenda kuba omuzehe ninga omuhereza; ti okurugirira aha ku ari kugamba orurimi rw’ekibina eki arimu.—1 Tim 3:1-10, 12, 13; Tit 1:5-9.

17. Ni biha bizibu ebi abazire bari kubugana bafurukira omu gandi mahanga?

¹⁷ Abakristo abamwe bakahungira omu gandi mahanga ninga shi bazayo ahabw’omurimo. Obwe rero, aha ishomero abana babo nibaba nibega omu rurimi rw’ihanga eri bafurukiramu. Abazire na bo nibaba bashemerire kwega orurimi rw’ihanga kugira ngu babase kutunga omurimo. Mbwenu shi bakakora ki batungire ekibina ninga shi omutwe oguri kukoresa orurimi rwabo? Mbehi ni kiha kibina eki bashemerire kuteraniramu? Mbehi bakaza omu kibina ekiri kukoresa orurimi rw’ihanga ninga ni omu kiri kukoresa oruri rwabo?

18. Tukuratize ebiri omu Bagalatia 6:5, ni bata oku turi kubasa kwereka ku nitworobera ensharamu y’omwebembezi w’eka?

¹⁸ Omwebembezi w’eka naba ashemerire kusharamu ekibina eki eka yeye eriteraniramu. Ahabw’okuba eco kiri ekintu c’omugasho munonga ashemerire kutekateka aha kiragasire ab’omu ka yeye bona. (Shoma omu Bagalatia 6:5.) Tushemerire korobera ensharamu y’omwebembezi w’eka. Ensharamu yona eyi yakukora, reka twikirize ensharamu yeye kandi twakire ab’omu ka yeye tubarebe nk’ab’omuhendo omu kibina.—Rom 15:7.

19. Ni enki eki omwebembezi w’eka ashemerire kutekatekaho ayetonzire?

¹⁹ Omu bundi buryo, ab’omu ka nibabasa kwekwatanisa n’ekibina ekiri kukoresa orurimi rwabo konka abana babo batari kurumanya ge. Kandi yaba eco kibina kiri omu kacweka kari kukoresa orurimi rw’ihanga,  abana nikibagumira kuhurikiza omu nterane kandi tibakagira entunguka omu by’omwika. Ahabw’enki? Ahakuba abana nibaba bari kwega omu mashomero agari kukoresa orurimi rw’ihanga kandi ti rwo orw’abazire bari kuba bari kugamba. Eco ku kiri kubaho omwebembezi w’eka naba ashemerire kushaba munonga kugira ngu amanye eki ashemerire kukora ngu ayambe abana beye kuhika hihi ya Yehova n’abahereza beye. Nibaba bashemerire kukwasa abana babo kumanya ge orurimi rwabo ninga shi basharamu kuza omu kibina ekiri kukoresa orurimi oru abana babo bari kumanya ge. Ahabw’eyo nsharamu y’omwebembezi w’eka, ab’omu kibina nibaba bashemerire kumuha ekitinisa we n’eka yeye kandi babareba nk’ab’omugasho.

20. Ni bata oku turi kubasa kwereka benetata na banyanyazi abari kwega orurimi rusya ku turi kubaha ekitinisa?

²⁰ Twareba ku benetata na banyanyazi bingi bari kubugana ekizibu c’okwega orurimi orusya. Kandi nikibagumira kwereka enyehurira zabo. Konka twaguma tutari kutekateka kusha aha ku bari kugamba orurimi orusya, nikija kutuma twareba ku bari kukunda Yehova kandi ku bari kwenda kumuhereza. Ku turarebe emitwarize mirungi yabo, kiryatuma twabaha ekitinisa kandi tubarebe nk’ab’omuhendo. Titurigamba ngu: ‘Tibatwinire mugasho’ ahabw’okuba batari kugamba ge orurimi rwitu.

21-22. Ni guha mugisha g’omuhendo ogu twine?

²¹ Yehova akatuha omugisha g’omuhendo g’okugira omwanya omu kibina ceye. Twaba turi abashija ninga abakazi, tutahize ninga tutakatahize, twakuba tucari bato ninga shi tukuzire, ninga turi kugamba orurimi ge ninga tutari kurumanya ge, turi ab’omuhendo ahari Yehova n’ahari bagenzi bitu.—Rom 12:4, 5; Kol 3:10, 11.

²² Mbehi titushemerire kugumizamu kuta omu nkora amashomo agu twayegera aha cokureberaho c’omubiri c’entumwa Paulo! Ku turikikora tusyoya nitwija kwereka Yehova ku nitumusima ahabw’omwanya ogu twine n’ogu Abakristo bagenzi bitu bine omu kibina!