1. Jehovah nih zumhawk a tlakmi a salle pakhat cio kha zeidah a pek hna?

JEHOVAH nih Khrihfabu chungah zumhawk a tlakmi a salle pakhat cio kha dawtnak in dirhmun a pek hna. Kan rian cu aa lo cio lo nain kan dihlak in a sunglawimi kan si i pakhat le pakhat kan i herh. Lamkaltu Paul nih mah a biapimi kong kha hngalh awkah a kan bawmh. Zeitin in dah?

2. Efesa 4:16 ningin pakhat le pakhat i sunsak in rian ṭuanṭi cu zeicah a herh?

² Hi capar i cherhchanmi Baibal caang nih a chim bantukin, Paul nih Jehovah salle hna kha “kaan herh lo” tiah kan ti hna awk a si lo ti kha a hleiin a kan cawnpiak. (1 Kor. 12:21) Khrihfabu ah daihnak um seh ti kan duh ahcun pakhat le pakhat kha i sunsak in rian kan ṭuanṭi a hau. (Efesa 4:16 rel.) Lungrual tein rian kan ṭuanṭi ahcun Khrihfabu ah dawtnak a um lai i a hlawh a tling lai.

3. Hi capar ah zei kong dah kan i ruah hna lai?

³ Khrihfabu chungah unau dang pawl kan upat hna kha zeiti lam in dah kan langhter khawh? Hi capar ah Khrihfa upa hna nih a dang Khrihfa upa hna cungah zeitindah upatnak an langhter khawh timi kong kan i ruah hna lai. Cun kan dihlak in nupi, va a ngei lomi unau pawl kan sunsak hna kha zeitindah kan langhter khawh timi kong zong kan i ruah hna lai. A donghnak ah kan holh ṭha tein a thiam lomi pawl kan sunsak hna kha zeitindah kan langhter khawh timi kong zong kan i ruah hna lai.

4. Khrihfa upa hna nih Rom 12:10 ah a chimmi Paul i zei ruahnak cheuhnak dah an zulh awk a si?

⁴ Khrihfa upa pawl cu an dihlak in Jehovah thiang thlarau thawngin rian pek an si. Asinain pakhat cio nih aa lo lomi sining  le laksawng an ngei. (1 Kor. 12:17, 18) Cheukhat cu Khrihfa upa an sinak a sau rih lo caah a dang Khrihfa upa tlukin hmuhtonnak an ngei lo. Cheukhat cu an kum a upat asiloah an ngan a dam lo ruangah rian tampi an ṭuan kho ti men lai lo. Asinain Khrihfa upa hna nih a dang Khrihfa upa pawl kha “kaan herh lo” tiah an ti hna awk a si lo. Mah canah Khrihfa upa kip nih Rom 12:10 ah a chimmi Paul ruahnak cheuhnak kha an zulh awk a si.—Rel.

5. Khrihfa upa hna nih a dang Khrihfa upa pawl an upat hna kha zeitindah an langhter khawh, cutin tuah cu zeicah a biapit?

⁵ Khrihfa upa pawl nih a dang Khrihfa upa chimmi bia kha ṭha tein an ngaihnak thawngin an upat hnanak kha an langhter. Khrihfa upa pawl nih Khrihfabu he aa tlaiin a biapimi kong i ruah dingin an i ton tikah mah cu a hleiin a biapi tukmi a si. Zeicah? 1988, October 1 Vennak Innsang [English] nih hitin a ti: “Khrihfa upa hna nih zei bantuk thil sining asiloah a biapimi biakhiahnak kong he aa tlaiin zeidah tuah awk a si ti kha hngalh awkah Jesuh nih thiang thlarau hmangin Khrihfa upa ahopaoh kha Baibal phunglam ruah awkah a bawmh khawh hna ti kha an cohlan lai.” (Lam. 15:6-15) Thiang thlarau nih Khrihfa upa pakhat lawng si loin an dihlak in a bawmh hna.

6. Khrihfa upa pawl nih lungrual tein zeitindah rian an ṭuanṭi khawh, cutin an tuah tikah Khrihfabu ah zei ṭhatnak dah a chuak?

⁶ A dang Khrihfa upa a upatmi nih cun Khrihfa upa meeting an tuah tikah biachim hmasa dingin aa zuam zungzal lai lo. Bia tampi chim awkah aa zuam lai lo i a ruah ning cu a hmaan zungzal ti zongin a ruat lai lo. Mah canah a ruahnak kha toidor tein a chim lai. Midang an chimmi kha ṭha tein a ngaihpiak hna lai. Mah nakin a biapi deuhmi cu Baibal phunglam midang sin chim awk le “zumh awk a tlakmi le a fimmi sal” sinin a rami lamhruainak kha zulh awkah lungthawhnak a ngei lai. (Matt. 24:45-47) Thil pakhatkhat kong he aa tlaiin bia an i ruah tikah Khrihfa upa pawl nih dawtnak le upatnak an langhter ahcun Pathian thiang thlarau cu an sinah a um lai i Khrihfabu a ṭhancho nakhnga a ṭhami biakhiahnak tuah  khawh awkah lam a hruai hna lai.—Jeim 3:17, 18.

7. Jesuh nih nupi, va a ngei lomi hna kha zeitindah a hmuh hna?

⁷ Tuchan kan Khrihfabu ah aa ṭhiummi nuva hna le chungkhar tampi an um. Asinain nupi, va a ngei lomi unau tampi zong an um. Nupi, va a ngei lomi hna kha zeitindah kan hmuh hna awk a si? Jesuh nih nupi, va a ngei lomi a hmuh hna ning kha ruathmanh. Vawleicung a um lioah Jesuh cu nupi a rak ngei lo. Nupi ngeih loin a rak um i a rian le a caan ah lungthin a rak pek. Jesuh nih nupi, va ngeih ding asiloah ngeih lo ding tiin zeitik hmanhah a kan cawnpiak bal lo. Asinain Khrihfa cheukhat nih nupi, va ngeih lo dingin an i thim lai tiah a ti. (Matt. 19:11, 12) Jesuh nih nupi, va a ngei lomi kha a rak upat hna. Nupi, va a ngei lomi kha a nautami asiloah an nunnak ah pakhatkhat a chanbaumi in a hmu hna lo.

8. Paul nih Khrihfa hna kha 1 Korin 7:7-9 ningin zei kong ruah awkah dah tha a pek hna?

⁸ Lamkaltu Paul zong Jesuh bantukin nupi ngei loin a rian kha a rak ṭuan. Khrihfa pakhat nih nupi, va ngeih cu a palh tiah Paul nih zeitik hmanhah a cawnpiak bal hna lo. Mah cu anmah pumpak biakhiahnak a si ti kha a hngalh. Asinain Paul nih Khrihfa hna kha nupi, va ngeih loin Jehovah rian ṭuan awkah tha a pek hna. (1 Korin 7:7-9 rel.) Paul nih nupi, va a ngei lomi Khrihfa hna kha a nautat hna lo ti cu a fiang ko. Cucaah nupi a ngei lomi, mino Timote kha a biapimi Jehovah rian ṭuan awkah a rak thim. * (Fil. 2:19-22) Unaupa pakhat cu nupi a ngeih, ngeih lo cungah i hngat in sining a tlinh asiloah a tlinh lo tiah ruah cu a palhmi a si.—1 Kor. 7:32-35, 38.

9. Nupi, va a ngeimi le a ngei lomi hna kong he aa tlaiin zeidah kan chim khawh?

⁹ Jesuh le Paul nih Khrihfa hna cu nupi, va ngeih ding asiloah ngeih lo ding tiin an cawnpiak hna lo. Nupi, va a ngeimi le a ngei lomi hna kong he aa tlaiin zeidah kan chim khawh? 2012, October 1 Vennak Innsang nih hitin a ti: “A taktak ahcun [nupi, va a ngei mi he ngei lomi he] Pathian sinin hmuhmi laksawng an si tiah kan ti khawh. . . . Jehovah nih [nupi, va ngeih loin] um kha ningzah awk asiloah ngaihchiat awk in a hmu lo.” Cucaah Khrihfabu chungah a ummi nupi, va a ngei lomi unau pawl kha kan upat hna awk a si.

10. Nupi, va a ngei lomi unau pawl kan upat hna kha zeitindah kan langhter khawh?

 ¹⁰ Nupi, va a ngei lomi kan unau pawl an intuarnak le an sining kan upat hna kha zeitindah kan langhter khawh? Cheukhat Khrihfa pawl nih nupi, va ngeih lo dingin biakhiahnak an tuah ti kha kan i cinken awk a si. Cheukhat Khrihfa hna tu cu nupi, va ngeih an duh ko nain anmah he aa tlakmi an i hmuh lo caah a si men lai. Cheukhat cu an innchunghawi nih an thihtak hna caah a si men lai. Cucaah zei bantuk thil sining a si hmanhah nupi, va a ngei lomi Khrihfa unau pawl kha zeicah nupi, va na ngeih lo asiloah innchunghawi kawl dingin kan i bawmh lai tiah ti cu aa tlakmi a si maw? Cheukhat nupi, va a ngei lomi Khrihfa hna nih cu bantuk bawmhnak kha an in hal khawh men. Asinain bawmhnak aan hal lomi hna sinah innchunghawi kaan kawlpiak lai tiah nan ti hna ahcun zeitindah an intuar lai? (1 Thes. 4:11; 1 Tim. 5:13) Zumhfek tein a um i nupi, va a ngei lomi unau cheukhat nih an chimmi kong kha i ruah hna hmanh u sih.

11-12. Nupi, va a ngei lomi hna kha zeitindah an lung kan donghter khawh hna?

¹¹ Nupi a ngei lomi peng zohkhenhtu unaupa pakhat nih nupi a ngeih lo caah ṭhatnak tampi ka hmu tiah a ruah. Asinain unau cheukhat nih keimah bawmh awkah an i zuam i “zeicah nupi na ngeih lo?” tiah an ka hal tikah ka lung a dong tiah a ti. Zung ṭengnge ah rian a ṭuanmi, nupi a ngei lomi unaupa pakhat nih hitin a ti: “A caan ah unau cheukhat nih nupi, va a ngei lomi cu zaangfak an si timi ruahnak an ka ngeihter. Cucaah mah nih nupi, va ngeih loin um cu laksawng in hmuh canah thilrit in a ka hmuhter.”

¹² Bethel ah rian a ṭuanmi va a ngei lomi unaunu pakhat nih hitin a ti: “Unau cheukhat nih nupi, va a ngei lomi unau pawl nih innchunghawi an kawl dih asiloah unau pawl he tuahmi party poahpoah kha innchunghawi kawlnak caanṭha in an hmuh tiah an ruah. Voikhat cu Bethel i ka rian kong he aa tlaiin ramdang ka tlawn lioah ka phanh zan ah pumh a si. Kaa ṭhumhnak inn i unaunu nih kan Khrihfabu ah nangmah he ṭhikhat a simi unaupa pahnih an um tiah a ka ti. Mah unaunu nih innchunghawi ka hmuh nakhnga bawmh awkah aa zuammi cu a si lo. Asinain Biakinn chung kan luh tlawmpal ah mah unaupa pahnih he tonter awkah ka kut in a ka dawh. Mah nih keimah he unaupa pahnih he kan ning a kan zahter.”

13. Va a ngei lomi unaunu pakhat kha zeinihdah thazaang a ngeihter?

¹³ Bethel ah rian a ṭuanmi va a ngei lomi a dang unaunu pakhat nih hitin a ti: “Nupi, va ngei loin an kum a upat tiang hmaikal rian a ṭuanmi unau pawl cu a tlarimi, hmuitinh ṭha tein a ngeimi, midang bawmh a duhmi le aa nuammi an si ti kha ka hngalh. Annih cu Khrihfabu caah bawmtu ṭha taktak an si. Nupi, va an ngeih lonak kong he aa tlaiin a ṭhami hmuhnak an ngei. Nupi, va an ngeih lo caah midang nakin kan ṭha deuh tiah an ruat lo, asiloah innchunghawi le fa an ngeih lo caah kan i nuam kho lo ti zongin an ruat lo.” Khoika hmun i a ummi kan si hmanhah kan dihlak in pakhat le pakhat kan i upat i kan i sunsak ahcun mah nih Khrihfabu ah lunglawmhnak tampi a chuahter lai. Nupi va na ngeih lo ruangah unau pawl nih an in zaangfak lo asiloah an i nahchuah lo, zei rel loin an in um lo i anmah nakin a ṭha deuhmi zongin an in ruat lo ti kha na hngalh. Cun an i dawt ti zong kha na hngalh.

14. Nupi, va a ngei lomi pawl kan upat hna kha zeitindah kan langhter khawh?

¹⁴ Nupi, va an ngeih lo caah zaangfah si loin a ṭhami an sining tu kha kan sunsak ahcun nupi, va a ngei lomi kan unau pawl cu an i lawm tuk lai. Cun nupi, va an ngeih lo caah kan  zaangfah hna awk a si lo. Zaangfah canah an zumhfehnak tu kha kan sunsak awk a si. Cutin kan tuah ahcun nupi, va a ngei lomi unau pawl nih hitin an kan ti tiah an ruat bal lai lo: “Kaan herh lo.” (1 Kor. 12:21) Mah canah kan upat hna ti le Khrihfabu chung i an dirhmun kan sunsak ti kha an hngalh lai.

15. Mi cheukhat nih lohmun kauhter awkah zei thlennak dah an tuah?

¹⁵ Nai kum hna ah thawngthanhtu tampi nih a dang holh cawn dingin hmuitinh an ngeih caah lohmun kha an kauhter khawh. Cutin tuah awkah an nunning kha an thlen. Mah unau hna nih anmah holh a hmangmi Khrihfabu kha an kaltak i Pennak kong a chimtu thawngthanhtu a herh deuhnak hmun a dang holh a hmangmi Khrihfabu ah rian an ṭuan. (Lam. 16:9) Mah an biakhiahnak nih unau pawl kha Jehovah rian tam deuh in a ṭuanter khawh hna. Holh thar ṭha tein an thiam khawh nakhnga a caan tampi an rau ko nain Khrihfabu kha lam tampi in an bawmh khawh hna. A ṭhami an sining le an hmuhtonnak nih Khrihfabu unau pawl kha thazaang a ngeihter hna. Mah ca ṭhatnak a hlawmi mah unau pawl kha kan sunsak tuk hna.

16. Khrihfa upa pawl nih unaupa pakhat cu Khrihfa upa le bu rianṭuantu si dingin sining a tlinh maw, tlinh lo ti kha zei cungah i hngat in dah biakhiahnak an tuah awk a si?

¹⁶ Unaupa pakhat cu Khrihfabu nih an hmanmi holh kha ṭha tein a thiam rih lo caah Khrihfa upa phu nih Khrihfa upa pakhat asiloah bu rianṭuantu a si kho lai lo tiah bia an khiah awk a si lo. Khrihfabu nih an hmanmi holh zeitluk in dah a chim khawh timi cungah si loin Khrihfa upa le bu rianṭuantu caah Baibal halmi sining a tlinh maw, tlinh lo timi cung tu ah i hngat in biakhiahnak an tuah awk a si.—1 Tim. 3:1-10, 12, 13; Tit. 1:5-9.

17. Chungkhar pakhat cu ramdang ah an i ṭhial ahcun nulepa nih zei biakhiahnak dah an tuah a herh?

¹⁷ Chungkhar cheukhat cu an ram ah harnak an ton ca asiloah rian ṭha hmuh an duh caah ramdang ah an i ṭhial. Cucaah an fale cu an i ṭhialnak ram ah an hman bikmi holh in sianginn an kai men lai. Nulepa hna zong nih rian hmuh khawh awkah mah holh kha an cawn a hau men lai. An i ṭhialnak hmun ah anmah holh a hmangmi Khrihfabu asiloah phu an um ah tah zeitin? Zei Khrihfabu ah dah an i pumh awk a si? An umnak ram i an hman bikmi holh a hmangmi Khrihfabu ah maw asiloah an holh a hmangmi Khrihfabu ah dah an i pumh awk a si?

18. Galati 6:5 ningin chungkhar lu nih biakhiahnak a tuahmi kan upat kha zeitindah kan langhter khawh?

¹⁸ Chungkhar lu nih a chungkhar pawl he khoika Khrihfabu ah dah kan i pumh awk a si ti kha biakhiahnak a tuah awk a si. Mah cu pumpak kongkau a si caah a chungkhar nih zei holh dah an duh bik ti kha a ruah awk a si. (Galati 6:5 rel.) Chungkhar lu biakhiahnak kha kan upat a hau. Zei bantuk biakhiahnak a  tuah hmanhah a biakhiahnak kha cohlang in chungkhar cungah dawtnak langhter hna u sih.—Rom 15:7.

19. Chungkhar lu nih thalcam buin zei kong dah ṭha tein a ruah awk a si?

¹⁹ Chungkhar cheukhat cu an nu le an pa holh a hmangmi Khrihfabu ah an um men lai nain mah holh kha ṭha tein an thiam men lai lo. Mah Khrihfabu cu an i ṭhialnak hmun ah a um ahcun an fale caah pumhnak kha ṭha tein hngalhthiam awk le Jehovah naih awkah a harter khawh men. Zeicah? Zeicahtiah an nule an pa holh kha si loin an umnak ram holh a hmangmi sianginn ah an kai caah a si men lai. Mah bantuk thil a can tikah chungkhar lu nih ṭha tein thla cam in a fale nih Jehovah le a miphun pawl he an i naih khawh nakhnga zeidah tuah a hau ti kha ṭha tein a ruah awk a si. Nulepa nih an holh kha an fa le nih ṭha tein an thiam nakhnga an cawnpiak hna a hau lai asiloah an fale nih ṭha tein an hngalhthiammi holh a hmangmi Khrihfabu ah i ṭhial dingin an ruah a hau lai. Chungkhar lu nih zei bantuk biakhiahnak a tuah hmanhah, aa thimmi Khrihfabu kha a chungkhar pawl nih upat in an sunsak awk a si.

20. Holh thar a cawngmi unau pawl kan upat hna kha zeitindah kan langhter khawh?

²⁰ Kan i ruah cang bantukin Khrihfabu tampi ah unau pawl cu holh thar cawn awkah fakpi in an i zuam. Mah tikah an ruahnak kong chim kha an i harh men lai. Asinain holh thar an chim ning lawng kan ruah lo ahcun Jehovah an dawtmi le a rianṭuan an duhmi kha kan hmuh khawh lai. Mah a ṭhami an sining kha kan hmuh ahcun mah unau pawl kha kan sunsak hna lai i kan upat chinchin hna lai. Kan holh ṭha tein an thiam lo caah “kaan herh lo” tiah kan ti hna lai lo.

21-22. A ṭha tukmi zei tinvo sung dah kan ngeih?

²¹ Jehovah nih a Khrihfabu chungah a sunglawi tukmi dirhmun a kan pek. Pa kan si ah, nu kan si ah, nupi, va a ngei lomi kan si ah, a ngeimi kan si ah, mino kan si ah, upa kan si ah, kan umnak hmun holh ṭha tein a thiammi kan si ah, a thiam lomi kan si ah kan dihlak in Jehovah le midang caah a sunglawi tukmi kan si.—Rom 12:4, 5; Kol. 3:10, 11.

²² Paul chimmi minung pum tahchunhnak in a ṭha tukmi kong tampi kan cawn i zulh awkah kan i zuam peng. Mah nih unau pawl thazaang pek awkah zeidah kan tuah khawh ti kha hngalh awkah a kan bawmh lai. Cun unau pawl kha dawt awk le upat zungzal awk zongah a kan bawmh lai.