1. Na cava e cakava o Jiova vei ira na nona dausokalou yalodina?

E LOMANI ira na nona dausokalou yalodina o Jiova, e vakadonuya mera lewe ni nona ivavakoso. E duidui na noda itavi, ia eda yaga kece, eda dau veivukei. E vukei keda na yapositolo o Paula meda kila na tikina bibi qori. Ena sala cava?

2. Me vaka e tukuni ena Efeso 4:16, na cava meda mareqeti ira kina na tacida da qai cakacaka vata?

² Nida raica na tikinivolatabu e yavutaki kina na ulutaga qo, e vakabibitaka o Paula nida sega ni rawa ni tukuna vei ira na tacida, “O sega ni yaga vei au.” (1 Kor. 12:21) Ke da vinakata meda veiyaloni ena ivavakoso, e bibi meda mareqeti ira na tacida, meda cakacaka vata tale ga. (Wilika Efeso 4:16.) Nida cakacaka ena duavata, ena dei na ivavakoso, eda na veilomani tale ga.

3. Na cava eda na veivosakitaka ena ulutaga qo?

³ Na cava eso na sala eda na vakaraitaka kina nida dokai ira na tacida ena ivavakoso? Eda na veivosakitaka ena ulutaga qo, na sala era na vakaraitaka kina na qase nira dokai ira na vo ni qase. Eda na qai veivosakitaka na sala meda dokai ira kina na tacida dawai. Eda na veivosakitaka tale ga na sala meda dokai ira kina na sega ni kila vinaka na noda vosa.

4. Na ivakasala cava e vola o Paula ena Roma 12:10 mera muria na qase ni ivavakoso?

⁴ Era lesi ena yalo tabu i Jiova na qase kece ni ivavakoso. Ia e duidui na nodra isolisoli kei na taledi. (1 Kor. 12:17, 18) De dua eso era se qai qase vou, era se sega tale ga ni kila vinaka na nodra itavi. Eso tale e vakaiyalayala na ka era rawata nira sa itabaqase se tautauvimate. Ia e sega ni dodonu me tukuna e dua na qase vua e dua tale na qase, “O sega ni yaga vei au.” E bibi ga mera muria na qase na ivakasala i Paula ena Roma 12:10.—Wilika.

5. Era vakaraitaka vakacava na qase nira dokai ira na vo ni qase? Cava e bibi kina qori?

⁵ Era vakaraitaka na qase nira dokai ira na vo ni qase nira rogoci ira vinaka. E bibi sara qo ni bosea na ilawalawa qase eso na ka bibi. Na vuna? Dikeva na ka e tukuni ena Vale ni Vakatawa Okotova 1, 1988. E kaya: “Era kila na qase ni o Karisito e rawa ni vakayagataka na yalo tabu me uqeta e dua ena ilawalawa qase me tukuna e dua na ivakavuvuli vakaivolatabu me wali kina e dua na ituvaki, se me vakatulewataki kina e dua na ka bibi. (Caka. 15:6-15) Na yalo tabu ena sega ni dusimaka tiko ga e dua ena ilawalawa qase.”

6. E rawa vakacava nira cakacaka ena duavata na qase? Ena yaga vakacava ena ivavakoso nira cakava qori?

⁶ Na qase e dau dokai ira na vo ni qase ena sega ni saga me dau vosa tu ga e liu ena gauna ni bose. Ena sega ni vosa tu ga ena veigauna, ena sega tale ga ni nanuma ni donu tu ga. Ia ena yalomalumalumu ni tukuna nona rai. Ena dau rogoci ira vinaka eso tale. Koya e bibi sara, e tu vakarau me wasea eso na ivakavuvuli vakaivolatabu, me muria tale ga na veidusimaki ni “dauveiqaravi yalodina e vuku.” (Maciu 24:45-47) Nira vakaraitaka na qase na veilomani kei na veidokai ena gauna ni bose, ena tokoni ira na yalo tabu me  rawa nira vakatulewataka na ka e yaga ena ivavakoso.—Jeme. 3:17, 18.

7. E raici ira vakacava na dawai o Jisu?

⁷ Nikua, era lewe ni ivavakoso e levu na veiwatini kei na vuvale. Era lewe tale ga ni ivavakoso e levu na tacida dawai. Eda na raici ira vakacava na tacida qori? Dikeva mada na rai nei Jisu me baleti ira na dawai. A sega ni vakawati o Jisu ni qarava tiko nona itavi e vuravura. Na vuna? E kauaitaka vakalevu na nona ilesilesi, e vakayagataka kina e levu nona gauna. A sega ni vakavulica o Jisu ni dodonu meda vakawati se dawai. E kaya ga ni so na lotu vaKarisito era vakatulewataka mera kua ni vakawati. (Maciu 19:11, 12) O Jisu e dokai ira na dawai. E sega ni beci ira, se nanuma nira sega ni rawata e dua na ka.

8. Me vaka e tukuni ena 1 Korinica 7:7-9, na cava e uqeta na yapositolo o Paula?

⁸ Me vakataki Jisu, a sega ni vakawati na yapositolo o Paula ni qarava nona cakacaka vakaitalatala. A sega ni vakavulica o Paula ni cala mera vakawati na lotu vaKarisito. E kila ni qori eda na dui vakatulewa kina. Ia e uqeti ira na lotu vaKarisito ke rawa nira qaravi Jiova nira dawai. (Wilika 1 Korinica 7:7-9.) E macala ga ni sega ni beci ira na lotu vaKarisito dawai o Paula. E lesi Timoci mada ga, e dua na gonetagane dawai me qarava eso na itavi bibi ena ivavakoso. * (Fpai. 2:19-22) Ena cala gona ke vakatautaki nona lesi e dua na tacida tagane ena nona vakawati se dawai.—1 Kor. 7:32-35, 38.

9. Meda raica vakacava na vakawati kei na bula vakadawai?

⁹ Erau sega ni vakavulica o Jisu kei Paula mera vakawati na lotu vaKarisito se ra dawai tiko ga. Me vakacava gona noda rai me baleta na vakawati kei na dawai? E vakamacalataki vinaka ena Vale ni Vakatawa Okotova 1, 2012: “Na vakawati kei na dawai erau isolisoli ruarua ni Kalou. . . . Ia e sega ni raica o Jiova na bula vakadawai me vakavu rarawa kei na madua.” E bibi gona meda dokai ira na tacida dawai ena ivavakoso.

10. Eda na dokai ira vakacava na tacida dawai?

 ¹⁰ Eda na doka vakacava nodra rai na tacida dawai? E vinaka meda nanuma tiko nira vakatulewataka eso na tacida mera dawai tu ga. Eso tale era via vakawati, era se sega ni raica e dua na kedra isa vinaka. Eso tale sa rairai mate o watidra. Vakacava e dodonu meda taroga na vuna era dawai tiko ga kina, se da vakatututaka e dua me kedra isa? E macala ga ni so na lotu vaKarisito dawai era rairai kerea qori. Ia ke ra sega ni kerea ena vakacava nodra rai keda tarogi ira va qori? (1 Ces. 4:11; 1 Tim. 5:13) Meda dikeva mada na ka era tukuna eso na tacida dawai yalodina.

11-12. Eda na rawa ni vakayalolailaitaki ira vakacava na dawai?

¹¹ E kaya e dua na ivakatawa ni tabacakacaka e dau qarava vinaka nona ilesilesi ni yaga sara na bula vakadawai. Ia e kaya ni rawa ni vakavu yalolailai nodra kauai na tacida nira taroga: “Na cava o sega ni vakawati kina?” E kaya e dua na tacida tagane e veiqaravi ena dua na valenivolavola ni tabana: “So na gauna na ka era tukuna na tacida au lai nanuma kina ni keimami vakaloloma na dawai. Qo e rawa ni nanumi kina ni vaka tu e dua na icolacola na bula vakadawai, e sega ni isolisoli.”

¹² E kaya e dua na tacida yalewa e veiqaravi e Peceli: “Era nanuma eso na dautukutuku ni o ira kece na dawai era vaqara tiko na kedra isa, se ra lako ena soqo cokovata mera vaqara kina na kedra isa. Dua na gauna niu lai qarava na noqu ilesilesi ena dua tale na vanua, au donuya yani na soqoni ena lomanimacawa. E kaya na tacida yalewa au vakaicili kina, ni tiko ena ivavakoso e rua na tacida tagane keitou via tabavata. E kaya ni sega ni saga tiko me vaqara e dua na kequ isa. Na gauna ga au yaco kina ena valenisoqoni, e kauti au sara vei rau na tacida tagane. Meu kaya vakadodonu au madua sara ga, o rau tale ga na tacida tagane.”

13. Na ivakaraitaki cava e uqeta e dua na tacida yalewa dawai?

¹³ E kaya e dua tale na tacida yalewa e veiqaravi e Peceli: “Au kila eso na tacida painia itabaqase era dei tu ga ena nodra veiqaravi. Era vakuai ira, era marautaka tu nodra veiqaravi, era yaga tale ga vakalevu ena ivavakoso. E donu nodra rai me baleta na bula vakadawai. Era sega ni nanuma nira vinaka cake nira dawai. Se rarawa nira sega ni vakawati se vakaluveni.” Eda marau nida lewena na ivavakoso era dokai keda era mareqeti keda tale ga. Era sega ni nanuma ni o vakaloloma se vuvutaki iko, era sega ni vakawaleni iko se ra nanuma ni o vinaka cake. Na ka ga o kila ni o lomani.

14. Eda na vakaraitaka vakacava nida dokai ira na dawai?

¹⁴ Era na marau na tacida dawai nida mareqeti ira ena nodra itovo vinaka, sega ni nodra bula vakadawai. Meda kua ni lomalomani ira, meda marautaka ga nodra yalodina. Na vuna? Era na sega ni nanuma nida tukuna tiko vei ira: “O sega ni yaga vei au.” (1 Kor. 12:21) Era na kila ga nida dokai ira, eda marautaka tale ga nira lewe ni ivavakoso.

15. Na veiveisau cava era cakava eso mera vakarabailevutaka na nodra veiqaravi?

¹⁵ Era saga e levu na dautukutuku mera vulica e dua tale na vosa mera  vakarabailevutaka na nodra cakacaka vakaitalatala. E vinakati gona mera cakava na veiveisau. Era biuta na tacida qori na ivavakoso e vosataki kina na nodra vosa, mera lai veiqaravi ena ivavakoso e duatani na kena vosa e lailai kina na dautukutuku ni matanitu. (Caka. 16:9) Qori na ka era dui vakatulewataka, mera vakarabailevutaka na nodra veiqaravi. Ena rairai taura e vica vata na yabaki mera qai kila vinaka na vosa qori. Ia era yaga vakalevu. Na nodra itovo vinaka kei na kila e uqeti ira na tacida ena ivavakoso. Eda mareqeti ira na tacida qori ena nodra vakuai ira!

16. Na yavu cava era dikevi kina na tacida era vakatututaki mera qase se dauveiqaravi ni ivavakoso?

¹⁶ Ni vakatututaka na ilawalawa qase me dua e qase ni ivavakoso se dauveiqaravi, ena sega ni vakatau ena nona kila vinaka sara na vosa e vakayagataki ena ivavakoso. Era na dikeva na nona ivakaraitaki e dua na tacida tagane, ni yavutaki ena ivakatagedegede vakaivolatabu me baleti ira na qase kei na dauveiqaravi. Ena sega ni yavutaki ena nona kila vinaka na vosa ena ivavakoso se sega.—1 Tim. 3:1-10, 12, 13; Taito 1:5-9.

17. Na cava era na taroga eso na vuvale nira toki ina dua tale na vanua?

¹⁷ Eso na vuvale lotu vaKarisito era toki ina dua tale na vanua nira drovaka na ituvaki dredre mai nodra vanua, se ra qara cakacaka. Era na rairai vulica gona na luvedra na vosa ni vanua era toki kina. De dua ena vinakati tale ga qori vei ira na itubutubu nira vaqara cakacaka. Vakacava ke tiko na iwasewase se na ivavakoso ena nodra vosanisucu? Na ivavakoso cava me ratou lewena? Me ratou lewena na ivavakoso e vakayagataki kina na vosa ni vanua ya se na nodratou vosa?

18. Me vaka e tukuni ena Kalatia 6:5, eda na doka vakacava nona vakatulewa o ulunivuvale?

¹⁸ Ena vakatulewataka na ulunivuvale na ivavakoso me ratou lewena. Na vakatulewa qori e baleta sara tiko ga na nona vuvale, bibi gona me vakasamataka na ka ena vinaka vei ratou. (Wilika Kalatia 6:5.) E dodonu meda doka na nona vakatulewa o ulunivuvale. Se mani cava e vakatulewataka, meda ciqoma qai kidavaki ratou ena ivavakoso.—Roma 15:7.

19. Na cava me vakasamataka qai masulaka o ulunivuvale?

¹⁹ Eso na itubutubu era veiqaravi ena ivavakoso e vosataki kina nodra vosanisucu, ia era sega ni kila vinaka qori na luvedra. Ke tiko na ivavakoso qori ena vanua e sega ni vosataki kina nodrau  vosanisucu ena rairai dredre vei ratou na gone me ratou kila na ka e vulici ena soqoni, me ratou toso tale ga vakayalo. Na vuna? De dua eratou vuli tiko na gone ena koronivuli e vakayagataki kina na vosa ni vanua ya, sega ni nodrau vosanisucu na itubutubu. E bibi gona me vakasamataka vinaka qai masulaka o ulunivuvale na ka me caka me ratou toro voleka kina na luvena vei Jiova, kei ira na nona tamata. E rawa ni rau vakavulici luvedrau vinaka ena nodrau vosanisucu se me ratou toki ena ivavakoso e vosataki kina na vosa eratou kila vinaka na gone. Se mani cava e vakatulewataka o ulunivuvale, e bibi me ratou kila ni ratou dokai eratou mareqeti tale ga ena ivavakoso eratou lewena.

20. Eda na dokai ira vakacava na tacida era vulica tiko e dua na vosa vou?

²⁰ Me vaka eda sa vulica mai, e levu na ivavakoso era tiko kina na tacida era saga tiko mera vulica e dua na vosa vou. Ena rairai dredre mera vakamacalataka na nodra rai. Meda kua ni kauaitaka vakalevu nodra sega ni kila vinaka na vosa. Nida cakava qori, eda na raica nodra lomani Jiova, era via qaravi koya tale ga. Qori ena uqeti keda meda mareqeti ira vakalevu. Eda na dokai ira tale ga. Eda na sega ni kaya “o sega ni yaga vei au,” baleta wale ga nira sega ni kila vinaka noda vosa.

21-22. Na cava eda vakavinavinakataka?

²¹ Eda vakavinavinaka ni lesia vei keda o Jiova na itavi ena ivavakoso. Ke da tagane se yalewa, dawai se vakawati, qase se gone, kila vinaka e dua na vosa se sega, eda talei kece vei Jiova, vei ira tale ga na tacida.—Roma 12:4, 5; Kolo. 3:10, 11.

²² Meda muria mada ga na veika totoka eda vulica ena vosa vakatautauvata i Paula me baleta na yago. Qori ena uqeti keda meda mareqeta tiko ga noda itavi ena ivavakoso i Jiova, eda na mareqeti ira tale ga na tacida.