1. Jehova aplea dor eka visvaxi sevokak koso lekhta?

APLEA sobhent aslolea dor eklea visvaxi sevokacho Jehova mog korta, ani tacho valor korta. Ami sobhent veg-vegllem kam korunk puro, tori astana ami soglim valorachim. Ani amkam eka-mekachi goroz asa. Hem mhotvachem lisanv somzonk apostl Paulu amkam koso modot korta?

2. Efezkarank 4:16 pormonnem, ami eka-mekacho valor korun, sangata mellon kiteak kam korunk zai?

² Hea lekhachea mukhel versant Paulun hea eka vixoi-acher zor dilo. Ami soglim Jehovachim sevok zalolean ami amchea bhav-bhoinnank, “Mhaka tuji goroz na” oxem mhunnonk zaina mhunn tannem dakhoun dilem. (1 Kor. 12:21) Amkam sobhent xanti zai zalear ami eka-mekacho valor korunk zai ani sangata mellon kam korunk zai. (Efezkarank 4:16 vachat.) Ami ekvottan kam kortat tednam sobhentlea sogleank apunn valorache oxem distolem ani sobha ghott zatoli.

3. Hea lekhant ami kitem xiktolim?

³ Sobhentlea bhav-bhoinnank ami khoinchea thoddea vattamnim man diunk zata? Hea lekhant, vhoddilamnim dusrea vhoddilank koso man diunk zata tea vixim ami poilim polloitolim. Uprant, amchea ankvar bhav-bhoinnancho ami koso valor korunk zata, tea vixim bhasabhas kortolim. Ani xevottak, amchi bhas bore toren ulounk iena tosleank ami koso man diunk zata, tem xiktolim.

4. Romkarank 12:10-ant Paulun dil’lo khoincho sol’lo vhoddilamnim apnnaunk zai?

⁴ Sobhentlea soglea vhoddilank Jehovan aplea povitr xokte udexim nemleat. Punn, dor eka vhoddilak veg-vegllim dennim ani tank asa. (1 Kor. 12:17, 18) Thodde halinch vhoddil zaleat astole ani taka lagon dusrea vhoddilam itlo tankam onnbhov na zait. Ani thodde zantteponnak lagon, vo bolaikek lagon chodd korunk xokonant astole. Tori punn, khoinchea-i eka vhoddilan, dusro vhoddil faideacho nhoi mhunn chintunk zaina. Bodlek, Romkarank 12:10-ant (Vachat) Paulun dil’lo sol’lo dor eka vhoddilan apnnaunk zai.

5. Vhoddilamnim eka-mekak koso man diunk zata, ani hem korop kiteak mhotvachem?

⁵ Vhoddilamnim eka-mekak koso man diunk zata? Tannim eka-mekachem kan diunk aikonk zai. Chodd korun gombir vixoi-ancher ulounk te ektthaim zaun ietat tednam tannim oxem korop khub gorjechem. Kiteak? Otumbr 1, 1988-acho The Watchtower masik kitem sangta tacher dhean diat: “Eka poristhitint kitem korchem, ho ek mhotvacho nirnnoi gheunk poddtta tednam povitr xoktechea modotin Jezu Krist khoinchea-i eka vhoddilak uzar korun Bible adarit sol’lo diun margdorxon diunk xokta mhunn te vollkhon ghetat. (Itihas 15:6-15) Povitr xokti ekleak nhoi, punn soglea vhoddilank modot korta.”

6. Vhoddilank ekvottan kam korunk kitem modot korunk xokta, ani oxem kelolean sobhek koso faido zata?

⁶ Ek vhoddil dusrea vhoddilak man dita zalear to vhoddilanchea mittinge vellar dusreank poilim ulounk sondhi ditolo. To apunnuch soglea vellar ulouncho na. Ani aple vichar sodanch sarke mhunn to somzuncho na. Bodlek, apleak kitem sangonk zai tem to khaltikaien sangta. Ani dusre vhoddil uloitat tednam to kan diun aikota. Chodd mhotvachem mhunnttlear, Bible-antlean ani ‘visvaxi ani xannea chakra” thaun ieta tem margdorxon pallunk to toiar asta. (Mt. 24:45-47) Oslea mittingamnim vhoddil respedan ani mogan uloitat tednam, Devachi povitr xokti  tancher astoli ani sobha ghott korunk lagon bore nirnnoi gheunk, povitr xokti tankam modot kortoli.—Jak. 3:17, 18.

7. Ankvar asat tanchea vixim Jezuk koxem dislem?

⁷ Amchea sobhamnim, kazari zoddpim ani famili asat. Punn amchea modem zaitim ankvar bhav-bhoinnam pasun asat. Tor hea bhav-bhoinnank ami koxem lekhunk zai? Jezun tankam koxim lekhlim tem ami polloum-ia. Jezu prithumer aslo tednam to ankvar aslo. Ankvar aslolean Jehovachi seva korunk to vell ani dhean diunk xoktalo. Eka Kristanvan kazar zaunk zai vo ankvar ravonk zai hem tannem sangonk na. Punn, thoddim Kristanvam ankvar ravonk vinchunk xoktat mhunn tannem sanglem. (Mt. 19:11, 12.) Jezun ankvar asloleank man dilo. Kazari asat tim tanchea poros vortim mhunn tannem chintunk na. Vo ankvar asat tanchea jivitant kitem tori unnem asa mhunn pasun tannem chintunk na.

8. 1 Korintkarank 7:7-9-ant Paulun Kristanvank kitem korunk urba dili?

⁸ Jezu bhaxen apostl Paulun pasun apli seva ankvar ravon keli. Eka Kristanvan kazar zavop chukichem oxem tannem kednanch chintunk na. Karonn ho dor ekleacho svotacho nirnnoi mhunn to zannam aslo. Tori astana, Kristanvank Jehovachi seva, ankvar ravon korunk Paulun urba dili. (1 Korintkarank 7:7-9 vachat.) Tor kazari aslolim Kristanvam, ankvar aslolea Kristanvam poros vortim asat mhunn tannem chintunk na. Tannem eka ankvar tornnattea bhavak, mhunnche Timotak, Jehovachea sevent mhotvacheo zobabdareo gheunk vinchlo. * (Filp. 2:19-22) Tor ek bhav purto asa vo na, tem to kazari asa vo na tacher tharavop chukichem zatolem.—1 Kor. 7:32-35, 38.

9. Kazar zaunchea vixim ani ankvar ravchea vixim ami kitem mhunnonk xoktat?

⁹ Kristanvamnim kazar zaunchem vo ankvar ravchem tem Jezun vo Paulun sangonk na. Tor kazar zaunchea vixim vo ankvar ravchea vixim ami kitem mhunnonk xoktat? Hea vixim Otumbr 1, 2012-chea The Watchtower masikent borea toren somzail’lem asa. Thoim mhunntta: “Khorench, kazar zavop vo ankvar ravop Jehova thaun dennem zaun asa . . . Ankvar asloleamnim kazar zaunk na mhunn loz bhogonk zai vo dukhi zaunk zai mhunn Jehova chintina.” Tor, sobhent aslolea ankvar bhav-bhoinnank ami man diunk zai.

10. Ami amchea ankvar bhav-bhoinnank man dinant mhunn koxim dakhounk xoktat?

 ¹⁰ Ami ankvar bhav-bhoinnanchim bhavnam dukhounk zaina. Ankvar ravonk tankam veg-vegllim karonnam asonk xoktat mhunn ami ugddas dovrunk zai. Thoddea ankvar bhav-bhoinnamnim ankvar ravcho nirnnoi ghetla. Thoddeank kazar zaunchi khuxi asta, punn tankam zai toslo sangati mellona. Ani thoddeamnim aplea sangateak mornnant hogddaila. Tim khoinchea-i karonnak lagon ankvar asum, tim kiteak kazar zaunk nant mhunn sobhentlea bhav-bhoinnamnim vicharunk zai kai? Thoddim ghoddie modot magonk puro. Punn tim modot magonant ani ami tankam modot zai kai mhunn vichartat zalear tankam koxem distolem? (1 Tes. 4:11; 1 Tim. 5:13) Visvaxi aslolim thoddim ankvar bhav-bhoinnam kitem mhunnttat tem polloiat.

11-12. Kitem kelem zalear ankvar bhav-bhoinnank ami nirax kortolim?

¹¹ Ek ankvar aslolo sorkittacho dekh-rekh korpi aplem kam borea bhaxen korta. Ani ankvar aslolean apleak khub boreak poddtta oxem taka dista. Punn bhav-bhoinnam tachem borem chintun, “Tum kiteak kazar zaunk na?” mhunn vichartat. Tea vellar apunn nirax zata mhunn to bhav sangta. Xakha ofisant kam korpi ek ankvar bhav mhunntta: “Mhaka dista, ankvar bhav-bhoinnam vixim tankam churchure disonk zai mhunn thoddim bhav-bhoinnam chintat. Tankam oslem chintop asa dekhun ankvarponn amkam ek dennem nhoi, punn ek somosia koxi disonk lagta.”

¹² Bethel-ant seva korpi ek ankvar bhoinn oxem mhunntta: “Soglim ankvar bhav-bhoinnam sodanch eka kazari sangateak sodhit astat mhunn thoddim chintat. Vo bhav-bhoinnam mellon ietat tednam, ankvar aslolim bhav-bhoinnam thoim eka kazari sangateak sodhunk ietat oxem tankam dista. Ek pavtti Bethel kamak lagon hanv dusrea eka zagear gel’lem tednam thoinchea eka bhoinnichea ghorant ravlolem. Mittingek voichea poilim, tichea sobhent mhojea piraieche don bhav asat mhunn tea bhoinnin mhaka sanglem. Ani magir tinnem, apunn tuka ek kazari sangati sodhunk modot korta oxem chintinaka mhunn pasun sanglem. Punn, ami Raj-ghorant pavtanch, tinnem mhaka tea don bhavam mukhar vhoron ubem kelem. Hem mhaka ani tea bhavank khub lojechem aslem.”

13. Eka ankvar bhoinnik konnachea udaronnam thaun urba mell’lli?

¹³ Bethel-ant seva korta ti anik ek ankvar bhoinn oxem sangta: “Zaitim vorsam visvaxiponnan Jehovachi seva kelolea ankvar pioneer bhav-bhoinnank hanv vollkhotam. Tim sotant ghott asat ani sota pasot khub teag kortat. Tim Jehovachea sevent khub khuxal asat ani sobhent zaiti modot kortat. Ankvar aslolean apunn dusream poros vortim mhunn tim somzonant, ani apunn kazar zaunk na vo apnnank bhurgim nant mhunn tim nirax zainant.” Taka lagon, soglim eka-mekak man ditat ani valor kortat toslea sobhent asonk khub borem dista. Tumi ankvar asat mhunn oslea eka sobhentlea bhav-bhoinnank churchure disona. Tankam tumchi nattkai zaina vo tim tumchea poros vortim mhunn tim chintinant. Tachea bodlek, tim tumcho valor kortat. Ani oslea sobhent, soglim zannam tumcho mog kortat mhunn tumkam khatri asta.

14. Ami ankvar bhav-bhoinnank koso man diunk zata?

¹⁴ Amchim bhav-bhoinnam ankvar asat mhunn ami tanchem churchure korchea bodlek tanchea borea gunnancho ani tanchea visvaxiponnacho valor kortat tednam tim khuxal astolim. Hea toren, amchea ankvar bhav-bhoinnank, ami tankam “Mhaka tuji  goroz na,” oxem mhunnttat mhunn dischem na. (1 Kor. 12:21) Bodlek, ami tankam man ditat ani tim sobhent asat dekhun ami khuxal asat mhunn tankam khatri zatoli.

15. Apli seva vaddounk thoddea porgottnnaramnim kosle bodlav keleat?

¹⁵ Halinchea vorsamnim, zaite porgottnnar apli seva vaddounk ek novi bhas xikonk proitn kortat. Hem korunk tankam zaite bodlav korche poddleat. Hem korunk lagon, apli mai-bhas uloitat ti sobha soddun tankam chodd porgottnnaranchi goroz aslolea dusri ek bhas uloitat toslea eka sobhent vochon seva korunk poddlea. (Itihas 16:9) Jehovachi seva anik purnn toren korunk, hea Kristanvamnim ghetlole nirnnoi tancho svotacho zaun asa. Tim xiktat ti novi bhas bore toren ulounk tankam zaitim vorsam lagonk puro. Punn sobhek, tim zaitea vattamnim modot korunk pavtat. Tanchem bore gunn ani onnbhovak lagon sobha ghott zata. Osle teag korpi bhav-bhoinnancho ami valor kortat.

16. Ek bhav vhoddil vo sobhecho sevok zaunk purto asa vo na tem vhoddil kiteachea adaran tharaitat?

¹⁶ Chintat eka bhavak sobhechi bhas bore toren ulounk iena. Heach eka karonnak lagon to sobhecho sevok vo vhoddil zaunk purto na mhunn vhoddil nirnnoi gheunchem nant. To bhav sobhechi bhas kitlea bore toren uloita tachea pormonnem nhoi, bodlek vhoddilank ani sobheachea sevokank kosle gunn asonk zai mhunn Bible sangta tachea pormonnem to purto asa vo na tem tharaitat.—1 Tim. 3:1-10, 12, 13; Titak 1:5-9.

17. Ek famil dusrea eka desant vochon ravta tednam, avoi-bapaink kitea vixim nirnnoi gheuncho poddtta?

¹⁷ Aplea desant chodd tras asat mhunn thoddeo Kristi famil kam sodhunk vo ravonk dusrea desant geleant. Toslea familintlim bhurgim, tea novea desantli bhas xikleant astolim. Toxench, kam mellonk tanchea avoi-bapaink pasun ghoddie ti bhas xikonk poddot. Tanchea mai-bhaxent ek sobha vo ek zomo asa zalear tea familin khoinchea bhaxechea sobhent vochonk zai? Tannim tea zagea voilea bhaxechea sobhek vochonk zai vo tanchea mai-bhaxent aslolea sobhent vochonk zai?

18. Galasiekarank 6:5-ant sanglolea pormonnem, familichea vhoddilan ghetololea nirnnoi-ak ami koso man diunk zata?

¹⁸ Apli famil khoinchea sobhent voitoli tem familintlea vhoddilan tharaunk zai. Ho tancho svotacho nirnnoi aslolean, familik kitem boreak poddtta tem tannem chintunk zai. (Galasiekarank 6:5 vachat.) To kosle-i nirnnoi gheum, tachea nirnnoi-ak ami man diunk zai. Ani tachea familik amchea sobhent ieukar diun tankam mog dakhounk zai.—Rom. 15:7.

19. Familichea vhoddilamnim kitea vixim bore bhaxen chintun magnnem korunk zai?

¹⁹ Thoddeo famili avoi-bapaichea mai-bhaxent aslolea sobhent asat astolim.  Punn tanchea bhurgeank ti bhas ghoddie titlea bore toren kollona. Karonn tim tea novea desachi bhas xikleant astolim. Tim bhurgim aplea avoi-bapaichea mai- bhaxent nhoi, punn tea novea desachea bhaxent aslolea iskolant voitat astolim. Tor tankam mittingent kitem ghoddtta tem somzonk kotthin zata astolem ani tim Jehova sangata ghott ixttagot korunk ghoddie pavonant. Oslea familint bhurgeamnim Jehova lagim ani bhav-bhoinnam lagim soronk, kitem korop gorjechem tem tea familichea vhoddilamnim magnnem korun nirnnoi gheunk zai. Tim aplea bhurgeank apli mai-bhas bore toren xikounk xoktat vo tannim aplea bhurgeank bore toren somzota tosli bhas uloitat tea sobhek vochonk nirnnoi gheun zata. Tea familichea vhoddilan koslo-i nirnnoi gheum, ti famil jea sobhek voita thoinchea bhav-bhoinnamnim tankam man diunk zai ani tancho valor korunk zai.

20. Ek novi bhas xiktolea amchea bhav-bhoinnank ami koxe toren man diunk xoktat?

²⁰ Atam meren ami polloilam tea pormonnem veg-vegllea sobhamnim bhav-bhoinnam ek novi bhas xikonk zaito proitn kortat. Tim kitem chintat tem sangonk tankam ghoddie kotthin zaunk puro. Tori astana tim, ti novi bhas koxim uloitat tacher dhean diunchea bodlek, tankam Jehova pasot aslolo mog ani tachi seva korunk asloli itsa hacher ami dhean diunk zai. Tanche he bore gunn polloitat tednam ami hea bhav-bhoinnank valor ani man ditolim. Tankam amchi bhas bore toren ulounk iena mhunn ami tankam, “Mhaka tuji goroz na” oxim mhunnchim nant.

21-22. Ami kitea vixim Jehovache upkari asonk zai?

²¹ Jehovan aplea sobhent amkam ek valorachem kam dilam mhunn ami tache khub upkari asat. Ami ek dadlo vo bail asum, ankvar vo kazari asum, tornnattim vo zanttim asum, amkam ek bhas bori ieum vo na, ami soglim Jehova Devak ani eka-mekak moladik zaun asat.—Rom. 12:4, 5; Kol. 3:10, 11.

²² Paulun dilolea munxachea kuddichea udharonnantlean amkam zaitim lisanvam xikonk mell’llim. Ami tim lisanvam amchea jivitant lagu korum-ia. Him lisanvam amkam amchea bhav-bhoinnank urba diunk ani ami kitem korunk zata tem zannam zaunk modot kortolim. Toxench, tankam mog ani man diunk pasun amkam modot zatoli.