1. ¿Mbaʼépa Jehová omeʼẽ káda uno isiervokuéra ifiélvape?

JEHOVÁ ningo mborayhúpe omeʼẽ káda uno isiérvo ifiélvape peteĩ lugár ikongregasiónpe. Ha jajapóramo jepe diferénte mbaʼe, enterovénte ñandevalióso ha ñaikotevẽmba ojuehe. Apóstol Pablo ñanepytyvõ ñantende hag̃ua ko mbaʼe iñimportantetéva. ¿Mbaʼéichapa?

2. Heʼiháicha Efesios 4:16, ¿mbaʼérepa jajorrespeta vaʼerã ha ñambaʼapo oñondivepa?

² Pe téxto omopyendávape ko artíkulo, Pablo ohechauka porã vaʼekue avave ndaikatuiha omaña ótro Jehová siérvore, ha heʼi: “Naikotevẽi nderehe” (1 Cor. 12:21). Jaipotáramo oĩ pyʼaguapy kongregasiónpe, jajorrespeta vaʼerã ha ñambaʼapo oñondive (elee Efesios 4:16). Ñambaʼapo jave en unida, káda uno oñandúta ojehayhuha chupe ha pe kongregasión imbaretéta.

3. ¿Mbaʼépa jahecháta ko artíkulope?

³ ¿Mbaʼe situasiónpepa ikatu jahechauka ñamombaʼeha ñane ermanokuérape kongregasiónpe? Ko artíkulope jahecháta mbaʼéichapa ansianokuéra ikatu ohechauka orrespetaha umi ótro ansiánope. Upe rire ñaanalisáta mbaʼéichapa ikatu jahechauka javaloraha umi ñane ermáno ha ermána nomendáivape. Ha ultimoite, mbaʼéichapa ikatu jahechauka ñamombaʼeha umi ñane ermáno noñeʼẽporãivape ñane idióma.

4. ¿Mbaʼe konséhopa Pablo omeʼẽ vaʼekue Romanos 12:10-pe ha osegi vaʼerã umi ansiáno?

⁴ Enterove ansiáno oĩva kongregasiónpe ningo oñenombra  Jehová espíritu sánto rupive. Upéicharõ jepe, káda uno oreko diferénte avilida (1 Cor. 12:17, 18). Ikatu oime algúno ramoiténte oñenombra raʼe ha ndorekoguasúi experiénsia umi ótro ansiánoicha. Ikatu oime oĩ umi ndaikatuvéimava ojapo heta mbaʼe ijedáma térã hasykatu rupi. Péro ni peteĩ ansiáno nomañái vaʼerã ótro ansiánore ha heʼi: “Naikotevẽi nderehe”. Upéva rangue, káda ansiáno osegi vaʼerã pe konsého Pablo omeʼẽ vaʼekue Romanos 12:10-pe (elee).

5. ¿Mbaʼéichapa ansianokuéra ohechauka orrespetaha umi ótro ansiánope, ha mbaʼérepa iñimportantete ojapo upéicha?

⁵ Ansianokuéra ohechauka orrespetaha umi ótro ansiánope ojapysaka porãvo hesekuéra. Ha upéva koʼýte iñimportánte umi ansianokuéra oñembyaty jave oñeʼẽ hag̃ua umi mbaʼe iñimportántevare. ¿Mbaʼérepa? Pe Ñemañaha 1 de octubre de 1988 heʼi vaʼekue: “Ansianokuéra orrekonose vaʼerã Jesucristo ikatuha ojevale espíritu sántore oipytyvõ hag̃ua oimeraẽ ansiáno oĩvape kongregasiónpe, imanduʼa hag̃ua peteĩ konsého oĩvare la Bíbliape, ha péicha oipytyvõ chupekuéra oikuaa hag̃ua mbaʼépa ojapóta peteĩ situasiónpe, térã odesidíta jave peteĩ mbaʼe iñimportánteva (Hech. 15:6-15). Pe espíritu sánto ningo oipytyvõ enterove ansiáno oĩvape kongregasiónpe, ha ndahaʼéi peteĩme añónte”.

6. ¿Mbaʼépa oipytyvõ umi ansiánope ombaʼapo porã hag̃ua oñondive, ha mbaʼéichapa ou porã upéva pe kongregasiónpe?

⁶ Peteĩ ansiáno orrespetáva umi ótro ansiánope noñehaʼãmoʼãi siémpre oñeʼẽ raẽ umi rreunión de ansiánope. Ndahaʼéi haʼénte la oñeʼẽva tódo el tiémpo, ha nopensái haʼe heʼívante oĩ porãha siémpre. Upéva rangue, haʼe heʼi umíldemente umi mbaʼe opensáva, ha ojapysaka porã umi ótro heʼívare. Ha iñimportanteveha, haʼe kyreʼỹme oñeʼẽ umi konsého oĩvare la Bíbliape, ha osegi umi instruksión oúva pe “esklávo de konfiánsa ha iñarandúvagui” (Mat. 24:45-47). Umi ansiáno ohechaukáramo ojoayhu ha ojorrespetaha oñemongeta jave peteĩ témare, Jehová espíritu sánto oĩta hendivekuéra ha ogiáta chupekuéra odesidi hag̃ua umi mbaʼe  omombaretétava pe kongregasiónpe (Sant. 3:17, 18).

7. ¿Mbaʼépa Jesús opensa vaʼekue umi nomendáivare?

⁷ Koʼág̃arupi kongregasiónpe oĩ heta omendáva ha avei oĩ umi orekóva mitã. Péro oĩ avei heta ermáno ha ermána nomendáiva. ¿Mbaʼéichapa jatrata vaʼerã chupekuéra? Ñande ningo jahecha vaʼerã chupekuéra Jesús ojapo haguéicha. Haʼe oĩrõ guare ko yvy ape ári nomendái vaʼekue, haʼe opytánte vaʼekue soltéro, oipurupaite itiémpo ha oñekonsentra iñasignasiónre. Jesús arakaʼeve nomboʼéi vaʼekue peteĩ kristiáno tekotevẽha omenda térã opyta soltéro, péro heʼi vaʼekue oĩtaha umi kristiáno odesidíva nomendamoʼãiha (Mat. 19:11, 12). Jesús orrespeta vaʼekue umi nomendáivape. Haʼe nopensái umi soltéro menove iñimportanteha umi omendávagui, térã ofaltaha chupekuéra álgo hekovépe nomendái rupi.

8. Heʼiháicha 1 Corintios 7:7-9, ¿mbaʼépa Pablo omokyreʼỹ vaʼekue umi kristiánope ojapo hag̃ua?

⁸ Jesús ojapo haguéicha, apóstol Pablo opyta vaʼekue avei soltéro oservi hag̃ua Jehovápe. Pablo arakaʼeve nomboʼéi vaʼekue oĩ vaiha peteĩ kristiáno omenda. Haʼe oikuaa vaʼekue káda uno odesidi vaʼerãha upéva. Upéicharõ jepe, Pablo omboʼe vaʼekue umi kristianokuérape ohecha hag̃ua ikatúpa opyta soltéro oservi hag̃ua Jehovápe (elee 1 Corintios 7:7-9). Pablo nopensái vaʼekue umi kristiáno opytáva soltéro menove iñimportanteha. Haʼe oiporavo vaʼekue voi Timotéope, peteĩ kariaʼy soltérova ojapo hag̃ua heta mbaʼe iñimportánteva Jehová servísiope * (Filip. 2:19-22). Upévare, noĩporãmoʼãi ñapensáramo peteĩ ermáno ikatuha térã ndaikatumoʼãiha oreko peteĩ priviléhio, omenda térã soltéro haguérente (1 Cor. 7:32-35, 38).

9. ¿Mbaʼépa ikatu jaʼe pe matrimónio ha pe soltería rehe?

⁹ Jesús ni Pablo nomboʼéi vaʼekue kristianokuéra omenda térã opyta vaʼerãha soltéro. Upéicharõ, ¿mbaʼépa ikatu jaʼe ko mbaʼére? Ñemañaha 1 de octubre de 2012 ombohovái porã ko porandu. Upépe heʼi: “Añetehápe ikatu jaʼe pe matrimónio ha pe soltería haʼeha peteĩ rregálo oúva Ñandejáragui. Jehová nopensái pe nomendáiva otĩ térã ndovyʼái vaʼerãha nomendái haguére”. Jarekóvo upéva enkuénta tekotevẽ jarrespeta pe lugár orekóva  kongregasiónpe umi ermáno ha ermanakuéra nomendáiva.

10. ¿Mbaʼépa ndajajapomoʼãi jarrespetáramo umi ñane ermáno ha ermána nomendáivape?

¹⁰ ¿Mbaʼéichapa ikatu jahechauka jarrespetaha umi ermanokuéra soltéro sentimiénto? Ñanemanduʼa vaʼerã oĩha umi kristiáno odesidi vaʼekue opytatanteha soltéro. Oĩ avei umi omendaséva péro ndotopáinte gueteri iñirũrã haʼe oipotavaichagua, ha oĩ avei umi omano vaʼekue chugui hembiayhu. Tahaʼe haʼeháicha, ¿oĩ porãtapa ermanokuéra kongregasionpegua oporandúramo chupekuéra mbaʼérepa nomendái, térã oofrese chupekuéra imenarã térã hembirekorã? Añetehápe ningo ikatu oĩ algúno ojeruréva oñepytyvõ hag̃ua chupe. Péro oiméramo ndojeruréi raʼe ñandéve ñaipytyvõ hag̃ua chupe, ¿mbaʼéichapa oñeñandúne peteĩ ermáno térã ermána ñaipytyvõséramo chupe ojejuhu hag̃ua? (1 Tes. 4:11; 1 Tim. 5:13). Jahechamína koʼág̃a mbaʼépa heʼi vaʼekue umi ermáno ha ermána ijerovia mbaretéva ha nomendáiva.

11, 12. ¿Mbaʼéichapa nañañatendéiramo ikatu ñadesanima umi nomendáivape?

¹¹ Peteĩ superintendénte iguapoitereíva iñasignasiónpe ohechakuaa oĩha heta ventáha opyta haguére soltéro. Péro haʼe heʼi oñedesanimaha jepi oĩramo ermanokuéra, iñintensión porãramo jepe, oporandúva chupe: “¿Ha nde piko mbaʼére neremendái gueteri?”. Peteĩ ermáno soltéro oservíva Betélpe heʼi: “Sapyʼánte umi ermáno opensa oñemoaichejáranga vaʼerãha umi solterokuérape. Upévare ikatu voi oñepensa pe soltería haʼeha peteĩ provléma, haʼe rangue peteĩ rregálo”.

¹² Peteĩ ermána oservíva Betélpe heʼi: “Oĩ ermáno opensáva enterove solterokuéra ohekaha hína oikóvo iñirũrã. Térã enterove soltéro opensaha oiko jave peteĩ aty, haʼeha peteĩ oportunida ojejuhu hag̃ua. Peteĩ jey aviaha ótra siudápe akumpli hag̃ua peteĩ asignasión Betelpegua, ha ag̃uahẽha pyharépe, oikóta kuri rreunión. Pe ermána cherresivi vaʼekue hógape, heʼi chéve oĩha mokõi ermáno che aveguáva upe kongregasiónpe. Haʼe oasegura chéve noñehaʼãiha hína chekoloka, péro rog̃uahẽmíre pe Salónpe, haʼe chegueraháma oĩháme umi mokõi ermáno. Natekotevẽi voi ni jaʼe mbaʼeichaitépa ropyta rotĩ umi mokõi ermáno ha che”.

13. ¿Máva ehémplopa omokyreʼỹ peteĩ ermána soltérape?

¹³ Ótra ermána soltéra ombaʼapóva avei Betélpe heʼi: “Che aikuaa heta prekursór ha prekursóra oĩmava soltéro heta tiémpore, iñakãguapýva, oikuaa porãva mbaʼépa ohupytyse Jehová servísiope, ojesakrifikáva ótro rehehápe, ha ovyʼáva. Haʼekuéra ningo tuichaiterei oipytyvõ umi kongregasiónpe ha ohecha hendápe porã pe soltería. Haʼekuéra nopensái oĩ porãveha ótrogui soltéro haguére, térã nopensái ndaikatumoʼãiha ovyʼa nomendái ha naifamíliai haguére”. Upévare ojevyʼaiterei kongregasiónpe, pórke enterovépe ojerrespeta ha ojevalora. Jaikuaa porã umi ermáno ndoikomoʼãiha ñanemoaichejáranga, ni ñaneenvidia, nañandetratamoʼãi ku ndajaexistiriramoguáicha, ha nopensamoʼãinte avei ñaneimportanteveha chuguikuéra. Péro si jaikuaa haʼekuéra ñanderayhuha.

14. ¿Mbaʼéichapa ikatu jahechauka jarrespetaha umi nomendáivape?

¹⁴ Umi soltéro ha soltéra oĩva kongregasiónpe, oagradeseterei ñamombaʼéramo chupekuéra umi kualida porã orekóvare, ha ndajaikóiramo ñambyasy chupekuéra nomendái haguére. Jajapo rangue upéva, iporãta ñamombaʼéramo chupekuéra ifiél haguére. Upéicharõ, ñane ermáno ha ermanakuéra nomendáiva núnka noñandumoʼãi jaʼeha chupekuéra: “Naikotevẽi nderehe” (1 Cor. 12:21).  Upéva rangue, oñandúta hikuái jarrespetaha chupekuéra, ha javaloraha pe lugár orekóva hikuái kongregasiónpe.

15. ¿Mbaʼe kámbiopa heta ermáno ojapo oipytyvõ porãve hag̃ua predikasiónpe?

¹⁵ Ojapo unos kuánto áño, heta ermáno oñepyrũ hague oaprende ótro idióma oipytyvõ porãve hag̃ua predikasiónpe. Upearã ojapo vaʼerã kuri hikuái heta kámbio. Koʼã ermáno oheja pe kongregasión oñeñeʼẽhápe iñidióma oho hag̃ua oservi peteĩ kongregasión oñeñeʼẽhápe ótro idióma, ha ifaltaitereihápe puvlikadór (Hech. 16:9). Upéva ningo haʼekueraite voi odesidi ikatu hag̃uáicha oservi porãve Jehovápe. Jepe oraha chupekuéra heta tiémpo oñeʼẽ porã hag̃ua upe idióma, haʼekuéra tuichaiterei oipytyvõ pe kongregasiónpe. Umi kualida porã orekóva ha umi mbaʼe ohasa vaʼekue hikuái, omokyreʼỹ ha omombarete pe kongregasiónpe. Ñande ningo ñamombaʼeterei koʼã ermáno ha ermána ojesakrifikaitévape ótro rehehápe.

16. ¿Mbaʼépa oreko vaʼerã enkuénta umi ansiáno orrekomenda hag̃ua peteĩ ermánope oservi hag̃ua siérvo ministeriál térã ansiánoramo?

¹⁶ Umi ansiáno ndaikatúi odesidi norrekomendamoʼãiha peteĩ ermánope oservi hag̃ua siérvo ministeriál térã ansiánoramo, noñeʼẽporãi haguérente pe idióma oñeñeʼẽva upe kongregasiónpe. Umi ansiáno ohecha vaʼerã pe ermánopa okumpli umi rrekisíto oĩva la Bíbliape umi ansiáno ha siérvo ministeriálpe g̃uarã, ha ndahaʼéi oñeʼẽ porãpa hína pe idióma upe kongregasionpegua (1 Tim. 3:1-10, 12, 13; Tito 1:5-9).

17. ¿Mbaʼépa tekotevẽta odesidi umi tuakuéra ováramo ifamília reheve ótro paíspe?

¹⁷ Oĩ umi família ova vaʼekue ótro paíspe ijetuʼu rupi la situasión hetãme, térã oheka hag̃ua itravahorã. Upévare umi mitã koʼág̃a ohóma vaʼerã peteĩ eskuéla oñeñeʼẽhápe upe país idióma. Tekotevẽne raʼe avei umi tuakuéra oaprende upe idióma otopa hag̃ua itravahorã. ¿Péro mbaʼépa ojapóta hikuái upe lugárpe oĩramo peteĩ kongregasión, térã grúpo oĩva iñidiomakuérape? ¿Mbaʼe kongregasiónpepa oho vaʼerã upe família? ¿Oho vaʼerãpa hikuái pe kongregasión oñeñeʼẽhápe upe país idióma, térãpa oho vaʼerã pe oñeñeʼẽhápe ifamília idióma?

18. ¿Mbaʼéichapa ikatu jahechauka jarrespetaha pe odesidíva upe omoakãva peteĩ família?

¹⁸ Pe omoakãva pe família odesidi vaʼerã mbaʼe kongregasiónpepa ohóta hikuái. Haʼe ohecha vaʼerã mbaʼépa okonvenivéta ifamíliape (elee Gálatas 6:5). Upéva odesidíta upe omoakãva pe família, upévare ñande jarrespeta vaʼerã haʼe odesidíva. Tahaʼe haʼéva la odesidíva, ñande jaasepta vaʼerã, jarresivi porã pe famíliape kongregasiónpe, ha jahechauka jahayhuha chupekuéra (Rom. 15:7).

19. ¿Mbaʼe rehepa peteĩ omoakãva ifamília opensa ha oñemboʼe vaʼerã ipyʼaite guive?

 ¹⁹ Oĩ avei família oservíva peteĩ kongregasión oñeñeʼẽhápe umi tuakuéra idióma. Péro ikatu hína umi mitã noñeʼẽporãi upe idióma. Oiméramo pe kongregasión oĩ peteĩ lugár oñeñeʼẽhápe upe país idióma, ikatu umi mitãme ijetuʼu ontende hag̃ua umi rreunión, ha upévare ndaikatúi oprogresa. ¿Mbaʼérepa? Pórke oiméne umi mitã oho peteĩ eskuéla oñeñeʼẽhápe upe país idióma, ndahaʼéi ituakuéra idióma. Umícha jave umi omoakãva ifamília opensa ha oñemboʼe vaʼerã ipyʼaite guive, ikatu hag̃uáicha odesidi porã mbaʼépa ojapóta oipytyvõ hag̃ua ifamiliakuérape oñemoag̃ui hag̃ua Jehováre ha ipuévlore. Upearã ohecha vaʼerã omboʼétapa ifamíliape oñeʼẽ porã hag̃ua iñidiomakuéra, térãpa ováta hikuái peteĩ kongregasión oñeñeʼẽhápe pe idióma ontende porãvéva umi mitã. Tahaʼe haʼéva la odesidíva upe omoakãva ifamília, pe kongregasión ohohápe oservi haʼe ha ifamília, orrespeta ha omombaʼe vaʼerã chupekuéra.

20. ¿Mbaʼéichapa jahechauka jarrespetaha ñane ermanokuéra oaprendévape hína peteĩ idióma?

²⁰ Jahecháma haguéicha, oĩta katuete umi kongregasión oĩháme umi ermáno ha ermána oñehaʼãmbaitéva hína oaprende hag̃ua ótro idióma. Ikatu oime ijetuʼu chupekuéra heʼi hag̃ua umi mbaʼe opensáva. Péro ndajaikóiramo ñañatendénte mbaʼéichapa oñeʼẽ hikuái pe idióma, jahecháta haʼekuéra ohayhuha Jehovápe, ha oserviseha chupe. Jahecháramo umi kualida porãite orekóva hikuái, javaloraitereíta ha jarrespetáta koʼã ermáno ha ermánape. Ndajaʼemoʼãi chupekuéra: “Naikotevẽi nderehe”, noñeʼẽporãi haguérente ñane idióma.

21, 22. ¿Mbaʼe priviléhio ijojahaʼỹvapa jareko?

²¹ Jaagradesete ningo Jehovápe omeʼẽ haguére ñandéve peteĩ lugár ikongregasiónpe. Jehovápe noimportái oimépa ñande kuimbaʼe térã kuña, ñamenda térã nahániri, ñanemitã térã ñandeedáma, ñañeʼẽ porãpa peteĩ idióma térãpa ñandeforsaʼimi hína. Jehová ningo enterovépe ñanemombaʼeterei, ha ñande avei ñañomombaʼeterei (Rom. 12:4, 5; Col. 3:10, 11).

²² Jasegíkena jajapo umi mbaʼe porãite ñaaprende vaʼekue apóstol Pablo ehémplogui oñeʼẽva pe kuérpo umánore. Upéva ñanepytyvõta jahechakuaa hag̃ua mbaʼépa ikatu jajapo ñamokyreʼỹ hag̃ua ñane ermanokuérape. Avei ñanepytyvõta siémpre jahayhu ha jarrespeta hag̃ua chupekuéra Jehová kongregasiónpe.