1. Was kept Yeehoowa fer yeete eene fon sayn troye tiiner?

YEEHOOWA, mit liip, kept een plats fer yeete eene fon sayn troye tiiner in te kemaynt. Opwool meyer unerxiitliche teele in te kemaynt hon, meyer al hon fiil weyert un prauche mer eene te aner hon. Ti aphostel Phaul heleft uns tiise wichtich lisyoon ferxteen. Wii soo?

2. Tëm noo Efésios 4:16, warom sole mer weyert eene fer ti anere kepe un mitsamer xafe?

² Soo wii xteet in tëm haupste tekst fon tiise artikel, Phaul hot taytlich kelos tas nimant fon uns sol fer een aner tiiner fon Yeehoowa kuke un saan: “Ich prauche tich net.” (1 Cor. 12:21) Wën mer wole tas es friit in te kemaynt kept, mise mer weyert eene fer ti anere kepe un mitsamer xafe. (Lees Efésios 4:16.) * Wën meyer in eenichkheet xafe, tuun al sich keliipt xpiire un ti kemaynt wërt xtark.

3. Was tuun mer in tiise artikel lërne?

³ In was fer aate khene mer respëkt tsayche fer yeete krist in te kemaynt? In tiise artikel, tuun mer siin wii khene ti elteste sich naner respëkt tsayche. Noo heyer, tuun mer xpreche wii khene mer al tsayche tas mer weyert kepe fer ti priiter un ti xwestere woo net kehayrat sin. Un, am ën, tuun mer lërne wii khene mer respëkt tsayche fer tii woo tuun net unser xprooch kuut xpreche.

4. Was fer aanreet, woo in Romanos 12:10 xteet, sole ti elteste aan wëne?

⁴ Al ti elteste in te kemaynt sin fon Yeehoowa sayn hayliche kayst in kesetst. Noch soo, yeete eene hot unerxiitliche apiliteete. (1 Cor. 12:17, 18) Khan sin tas etliche sin kraat in kesetst kep un, weeche tas, hon se net fiil speryens. Anere khene net soo fiil mache weeche sayn altheet orer kesuntheet. Soo wii soo, khee elteste sol fer een aner elteste kuke un inwëntich saan: ‘Ich prauche tich net.’ Xtats tas, yeete elteste sol Phaul sayn aanreet aan wëne, woo in Romanos 12:10  * xteet. (Lees.)

5. Wii tsayche ti elteste tas tii tuun sich naner respektiire, un warom is soo wichtich tas tii soo mache?

⁵ Ti elteste tsayche tas tii tuun ti anere elteste respektiire wën se mit acht tëne heere. Tas is noch wichticher wën ti elteste tuun sich fersamele fer iwer ërnste sache xpreche. Weeche was? Kuk mool was A Sentinela 1^te Oktooper fon 1988 hot kesaat: ‘Ti elteste erkhëne tas Yeesus khan te hayliche kayst penutse fer yeete elteste in te kemaynt helfe in een piiplix printsiipye tenke, woo richtich phast mit te situatsyoon un mit te ëntxlus woo tii mache mise. (Atos 15:6-15) Te hayliche kayst heleft al ti elteste in te kemaynt, net ploos eene fon tëne.’

6. Wii khene ti elteste eenich xafe, un wii tuut ti kemaynt nutse kriin wën tii soo mache?

⁶ Eene elteste woo ti anere respektiirt, fersuucht net imer te eyerste sin woo xprecht in een elteste fersamlung. Tee fersuucht net tas kexpreech aleen fiire un tenkt net tas eyer imer te recht hot. Xtats tas, tuut eyer teemuut saan was eyer tenkt. Tee heert mit acht was ti anere mëne. Un, tas haupste, tee is imer fërtich fer iwer piiplixe printsiipye xpreche, un te lënkung fon tëm “troy un ferninftiche sklaaw” aan nëme. (Mat. 24:45-47) Wën ti elteste tuun sich naner respëkt un liip tsayche, wën se iwer een sache xpreche, Kot sayn hayliche kayst tuut mit tëne sin un tëne fiire fer ëntxlise mache woo ti kemaynt ferxtërke. (Tia. 3:17, 18)

7. Wii hot Yeesus ti leetiche aan kesiin?

⁷ Hayt, in te kemaynt, fine mer ferhayrate pheyerche un familye. Awer, fine mer aach priiter un xwestere woo net ferhayrat sin. Wii sole mer ti leetiche aan siin? Kuk wii Yeesus tëne aan kesiin hot. Torich ti tsayt woo eyer uf te eyert waar, Yeesus hot sich net kehayrat. Yeesus is leetich keplip un hot sayn tsayt un acht im haupst in sayn insetsung penutst. Tee hot nii in kelërnt tas es neetich weyer fer een krist sich hayrate orer leetich plaype. Awer tee hot kesaat tas welche kriste teete ëntxlise sich net hayrate. (Mat. 19:11, 12; kuk te xtuutyum noote in Mateus 19:12) Yeesus hot respektiirt tii woo net ferhayrat waare. Tee hot aach net ti leetiche layt kesiin wii wën se weenicher weyere orer wii wën etwas teet in sayn leepe feele.

8. Tëm noo 1 Coríntios 7:7-9, aan was hot Phaul ti kriste uf kemuut traan se tenke?

⁸ Soo wii Yeesus, te aphostel Phaul is torich sayn tiinst leetich keplip. Phaul hot nii in kelërnt tas es ferkheert weyer fer een krist sich hayrate. Tee hot erkhënt tas yeete eene khont tas raus suuche. Soo wii soo, Phaul hot ti kriste uf kemuut fer se traan tenke op tii khonte wii leetiche Yeehoowa tiine. (Lees 1 Coríntios 7:7-9.) * Sicher, Phaul hot net ketenkt tas ti leetiche waare weenicher wii ti ferhayrate kriste. In woerheet, tee hot te yunge Timoteus — eene leetiche pruuter — raus kesuucht fer wichtiche flichte uf phase. * (Fil. 2:19-22) Soo, es is taytlich tas es weyer ferkheert tenke tas eene pruuter is mee orer weenicher kwalifitsiirt, ploos wayl eyer ferhayrat is, orer net. (1 Cor. 7:32-35, 38)

9. Iwer sich hayrate orer leetich plaype, wii is ti richtich aat fer tas siin?

⁹ Yeesus un Phaul hon net in kelërnt tas een krist mus sich hayrate orer leetich plaype. Tan, wii is ti richtich aat fer tas siin? A Sentinela 1^te Oktooper fon 2012 kept een kuut antwort fer tas. Tii hot aus keleet: ‘In woerheet, sich hayrate orer leetich plaype, khan pexraypt wëre wii een kexenk fon Kot. Yeehoowa tuut net tenke tas ti leetiche sole sich xeeme orer traurich xpiire wayl se net ferhayrat  sin.’ Mit tas in unser khop, meyer mise tas plats fon te leetiche priiter un xwestere in te kemaynt respektiire.

10. Wii khene mer respëkt tsayche fer unser leetiche priiter un xwestere?

¹⁰ Wii khene mer respëkt tsayche fer ti xpiirunge fon unser leetiche priiter un xwestere? Meyer sole uns erinere tas priiter un xwestere tuun weeche unerxiitliche uersache leetich sin. Tsum payxpiil, etliche leetiche kriste hon ëntxlist sich net hayrate. Anere teete kërn sich hayrate, awer hon noch net te richtiche persoon kefun. Un noch anere hon sayn man orer fraa im toot ferloer. Ekaal te uersach, es weyer net richtich tas tii in te kemaynt fer ti leetiche kriste frooe teete warom hon se sich net kehayrat. Orer sich aan piite fer tëne helfe yemant fine. Sicher, welche leetiche kriste fiilaycht tuun tiise hilef ferlange. Awer, wëns net, wii teet een leetich pruuter orer xwester sich xpiire wën yemant hilef aan piite teet fer yemant fer tëne fine? (1 Tes. 4:11; 1 Tim. 5:13) Wole mer yets noo kuke was etliche troye leetiche priiter un xwestere hon too triwer kesaat.

11-12. Wii khene mer fiilaycht ti leetiche oone muut lose?

¹¹ Eene leetiche sirkuyt superintentent, woo tuut sayn flicht kuut erfiile, tenkt tas es kept fiile nutse in leetich wëre. Awer, tee hot kemërkt tas es khan tëm oone muut lose wën etliche priiter un xwestere, woo wole tëm helfe, iim frooe: “Warom pist tuu net ferhayrat?” Eene leetiche pruuter, woo in Petël xaft, saat: “Welche tsayte, khan ich mërke tas etliche priiter un xwestere tenke tas se sole sich tauere weeche tii woo leetich sin. Tii khene aus siin mache tas leetich plaype is een last, xtats een kexenk.”

¹² Een leetich xwester, woo in Petël tiint, saat: “Welche puplikatoore tenke tas al ti leetiche sin imer yemant am suuche. Orer tas al ti leetiche tenke tas yeete mool tas tii sin mit een krup fon layt, tas is een kuut keleechenheet fer yemant fine. Een mool, hon ich pis een aner teel fom lant kereest, weeche mayn Petël aarwayt. Ich sin khom in een nacht woo een fersamlung waar. Ti xwester woo hot mich in sayn haus aan kenom, hot mich kesaat tas in te kemaynt waare tswaay priiter woo soo alt wii ich waare. Tii hot mich ferxproch tas tii teet net fersuuche mich helfe een xetsye fine. Awer kraat wii mer in tëm Raych Saal rin kang sin, tii hot mich kelënkt fer ti tswaay priiter khëne lërne. Ich prauche kaar net saan tas es kans xpasich waar, fer mich un ti tswaay priiter.”

13. Was fer payxpiile hon een leetich xwester uf kemuut?

¹³ Een aner leetich xwester, woo in Petël tiint, hot kesaat: “Ich khëne elter leetiche pioneere woo aanmeesich sin, hon taytliche tsiile, sin wilich fer anere helfe un tsufriite mit sayn tiinst. Tii sin aach een kroos hilef fer ti kemaynt. Tii tuun sich selepst mit tëm richtiche moos siin; tii tuun sich net peser wii ti anere fine ploos wayl tii sin leetich keplip un tii tuun sich aach net traurich xpiire wayl se hon sich net kehayrat orer khiner kriit.” Tas is woo macht tas een kemaynt soo eene xeene plats wërt — eene plats woo al tuun sich naner respektiire un weyert kepe. Tuu weest tas tayn priiter tuun tich net tauere orer nayte; tii tuun tich net uf sayt lose orer tich hooch xtele. Tat, finst tuu tich tehëm.

14. Wii khene mer tsayche tas mer ti leetiche respektiire?

¹⁴ Unser leetiche priiter un xwestere tuun petanklich sin wën mer weyert fer tëne kepe weeche sayn xeene kwaliteete un net uns fon tëne tauere wayl tii leetich sin. Xtats tas mache, es is peser weyert fer sayn troyheet kepe. Wën soo, unser leetiche priiter  un xwestere tuun nii sich xpiire wii wën mer fer tëne saan teete: “Ich prauche tich net.” (1 Cor. 12:21) Xtats tas, tuun se wise tas mer tëne respektiire un weyert fer tëne sayn plats in te kemaynt kepe.

15. Was fer ënerunge hon etliche in sayn leepe kemacht, fer mee in Yeehoowa sayn tiinst mache?

¹⁵ In te letste yoere, fiile puplikatoore hon ëntxlist een aner xprooch lërne fer sayn preetich aarwayt ferprayte. Fer tas se mache, mise se ënerunge in sayn leepe mache. Tiise priiter un xwestere sin fon een kemaynt woo sayn muter xprooch penutst fer een aner kemaynt kang, woo een anerst xprooch penutst un woo praycht mee puplikatoore hon. (Atos 16:9) Tas is een perseenlich ëntxlus woo tiise kriste mache, tas tii khene mee in Yeehoowa sayn tiinst mache. Opwool es khan phaar yoere tauere pis wën se ti nay xprooch kuut xpreche, tii tuun fiil in te kemaynt mit helfe. Tëne sayn xeene kwaliteete un speryens tuun ti kemaynt ferxtërke. Meyer kepe fiil weyert fer tiise priiter un xwestere, woo wilich sin fer ti anere helfe!

16. Aan was mise ti elteste sich traan hale fer se ëntxlise op eene pruuter khan eene elteste orer ministeryaal tiiner wëre?

¹⁶ Ti elteste sole net ëntxlise tas eene pruuter khan net elteste orer ministeryaal tiiner wëre, ploos wayl eyer tuut noch net ti xprooch fon te kemaynt kuut xpreche. Ti elteste tuun sich traan hale aan was ti Piipel saat iwer wii eene elteste orer ministeryaal tiiner sin sol, un net iwer wii kuut tiise persoon ti xprooch fon te kemaynt xprecht. (1 Tim. 3:1-10, 12, 13; Tito 1:5-9)

17. Was fer frooche tuun foer khome wën etliche familye tuun sich fer een aner lant wanere?

¹⁷ Welche kristliche familye sin fer een aner lant kang fer aus rayse fon te xweyere situatsyoone fon sayn lant orer fer een aarwayt fine. Ti resultaat is tas sayne khiner fiilaycht mise in een xuul keen in te haupst xprooch fon tiise naye lant. Khan sin aach tas ti eltere prayche tiise haupst xprooch lërne fer een aarwayt fine. Awer, wën es kept een kemaynt orer krup in sayn muter xprooch ticht pay woo se woone? In was fer kemaynt sole se keen — in een kemaynt woo ti haupst xprooch fons lant xprecht orer in een kemaynt woo sayn muter xprooch xprecht?

18. Tëm noo Gálatas 6:5, wii khene mer respëkt tsayche fer ti ëntxlus fon tëm familye xëf?

¹⁸ Te familye xëf mus ëntxlise in was fer kemaynt tuut sayn familye sich samele. Wayl tas een perseenlich ëntxlus is, eyer mus tenke aan was is tas peste fer sayn familye. (Lees Gálatas 6:5.) * Meyer mise te familye xëf sayn ëntxlus respektiire. Ekaal was eyer raus  suucht, mise mer es aan nëme, ti familye wilkhome un liip fer tëne tsayche. (Rom. 15:7)

19. Iwer was sole ti familye xëfe mit kepeet traan tenke?

¹⁹ Welche familye tiine in een kemaynt woo penutst ti muter xprooch fon te eltere; awer khan sin tas ti khiner tuun net tiise xprooch soo kuut xpreche. Wën tiise kemaynt xteet in een plats woo ti haupst xprooch fons lant xprecht, fiilaycht ti khiner fine es xweyer ti fersamlunge ferxteen un tuun net kaystlich forem keen. Warom? Wayl ti khiner, im xtant, in een xuul keen woo penutst ti haupst xprooch fons lant un net ti muter xprooch fon sayn eltere. Wën tas pasiirt, ti familye xëfe sole traan tenke un kluucheet im kepeet ferlange, fer tëne helfe ëntxlise was khene se mache fer sayn khiner helfe tichter tsu Yeehoowa un sayn folek khome — tëne sayn khiner helfe sayn muter xprooch kuut xpreche, orer sich fer een kemaynt wanere woo penutst een xprooch woo ti khiner laycht ferxteen. Een tuun te familye xëf sayn ëntxlus, ti kemaynt woo ti familye raus suucht sol tëne respektiire un weyert kepe.

20. Wii khene mer respëkt tsayche fer unsere priiter un xwestere woo sin am een nay xprooch lërne?

²⁰ Weeche al ti uersache woo mer kexprooch hon, in fiile kemaynte, fine mer priiter un xwestere woo sin am sich aan xtrenge fer een nay xprooch lërne. Fiilaycht, tii fine es xweyer saan was se tenke tuun. Awer, wën mer uns net traan hale aan te feeler woo se mache wën tii unser xprooch xpreche, tuun mer tëne sayn liip tsu Yeehoowa siin un sayn wunx fer tëm tiine. Wën mer tiise xeene kwaliteete siin, tuun mer tiise priiter un xwestere respektiire un fiil weyert fer tëne kepe. Meyer tuun net saan ‘Ich prauche tich net’, ploos wayl se net unser xprooch kans kenau xpreche.

21-22. Was fer wunerlich priwilëj hon mer?

²¹ Yeehoowa kept uns een wunerlich priwilëj: een plats in sayn kemaynt hon. Ekaal wën mer mëner orer fraae sin, leetich orer ferhayrat, alt orer yung, wën mer een xprooch kuut xpreche orer net soo kenau — meyer hon fiil weyert foer Yeehoowa un eene fer ti anere. (Rom. 12:4, 5; Col. 3:10, 11)

²² Sicher, lërne mer fiil wunerliche lisyoone mit Phaul sayn ferklaychung fon te mënxliche khërper! Tes weeche, wole mer unser pestes mache fer tëne aan wëne. Soo, tuun mer tsayche tas mer weyert kepe fer unser plats un tas plats fon te anere in Yeehoowa sayn kemaynt.