1. Jehova u vara vi ovakarere ve avehe ovaṱakame?

JEHOVA u vara omukarere we auhe otjomunanḓengu mombongo ye. Nandarire kutja tu noviungura pekepeke mombongo, atuhe oweṱe ovananḓengu nu tu hepasana. Omuapostele Paulus we tu vatera kutja tu zuve nawa epu enanḓengu ndo. Omomuano uṋe?

2. Otja kOvaefese 4:16, ongwaye tji matu sokuraisasana ondengero nokuungura kumwe nawa?

² Otja ketjangwa ku kwa zikamene orupa ndwi, Paulus wa raisa oukahu kutja kapena ngu ma sokuraera omukwao kutja, “hi nakukuhepa!” (1 Kor. 12:21) Indu tji matu vanga ohange mombongo, eṱe matu sokuraisasana ondengero nokuungura kumwe nawa. (Lesa Ovaefese 4:16.) Nu tji matu ungura kumwe mohange, omundu auhe ma munu kutja wa suverwa nu ombongo mai kuru.

3. Matu kahungirira ku ye morupa ndwi?

³ Omomiano viṋe tjiva mu matu yenene okuraisa ondengero kOvakriste ovakwetu mombongo? Morupa ndwi, matu katara kutja omomiano viṋe ovanene wombongo mu mave yenene okuraisasana ondengero. Nu okuzambo, matu kahungirira komuano atuhe mu matu raisa ondengero kovakambure ovakwetu ovakombe. Nu korusenina, matu ke rihonga omiano mu matu raisa orusuvero ku imba mbe ha hungire eraka retu nawa.

4. Ovaroma 12:10, ri na erakiza riṋe ra Paulus ovanene wombongo ndi ve sokukongorera?

⁴ Ovanene wombongo avehe va zikwa i Jehova nombepo ye ondjapuke. Nungwari, auhe u noviyandjewa mbya pewa. (1 Kor. 12:17, 18) Tjiva mape ya va zikwa oupe nu kave nondjiviro  ndji novakwao. Nu varwe mape ya kave yenene okuungura ovingi mena rozombura poo omitjise. Posi yokutja ape ningi omunene wombongo ngu ma tara komukwao nokumuna kutja eye ke nombatero. Nungwari, omunene wombongo auhe ma sokukongorera erakiza ra Paulus ndi ri mOvaroma 12:10.—Lesa.

5. Ovanene wombongo ve raisasana vi ondengero, nu ongwaye tje ri ohepero?

⁵ Omuano umwe ovanene wombongo mu ve raisasana ondengero omokupuratena kovanene wombongo ovakwao. Iho tjiri otjinanḓengu, tjinenenene indu ovanene wombongo tji mave ya pamwe okuhungirira komapu kaaṋi. Omena ratjike? Okambo kOruhungu 1 ku Oktoba, 1988, ka tja: “Ovanene wombongo ve tjiwa kutja Jesus ma yenene okuungurisa ombepo ondjapuke okuvatera omunene wombongo ngamwa auhe okuyandja ondunge ndja zikamene kOmbeibela ndji mai heperwa po okuṱuna ongaro ngamwa aihe poo okutjita ondando onanḓengu. (Oviung. 15:6-15) Ombepo ondjapuke i vatera ovanene wombongo avehe, nungwari kaumwe uriri.”

6. Ombongo i muna ouwa wa ye, indu ovanene wombongo tji ve nomaunguriro wakumwe omawa?

⁶ Omunene wombongo ngu nondengero kovakwao aruhe ka kondjo okutengera po okuhungira pozombongarero zovanene wombongo. Eye u kondja okuhinokuhungira tjinene nu kamunu kutja oumune we ombu ri nawa aruhe. Posi yokutja, u yandja oumune we nomerisusuparisiro. Eye u yandja ombango koumune wovakwao. Nu otjiṋa otjinanḓengu, u ri ra omupaturuke okuhungirira kondunge okuza mOmatjangwa nokukongorera omuhunga okuza ‘kOmukarere omuṱakame nomunazondunge.’ (Mat. 24:45-47) Indu ovanene wombongo tji mave raisasana ondengero norusuvero, ombepo ondjapuke i kara puna wo nu i ve hongorera po okutwapo ondyero ombwa okuyanḓiparisa ombongo.—Jak. 3:17, 18.

7. Jesus wa ri noumune uṋe ohunga nokurira omukombe?

⁷ Ndino tu novakupasane nomaṱunḓu pekepeke mozombongo. Nu wina mu novakambure  ovengi ovakombe. Tu sokukara noumune uṋe ohunga na imba ovakombe? Indjo tu tare komuano Jesus meeve vara. Indu Jesus tjaa zuvarisa kombanda yehi, eye kena pa kupire. Eye wa kara omukombe nu aa yandja ombango nokuungurisa oruveze rwe motjiungura tje. Jesus kena pa honga kutja ounahepero kOmukriste okukupa poo okukara omukombe. Posi yokutja, eye wa raisa kutja Ovakriste tjiva mape ya ave toorora okuhina okukupa poo okukupwa. (Mat. 19:11, 12) Jesus wa ri nondengero kuna imba mba ri ovakombe. Eye kaa munu kutja ovakombe ovandu wokehi pu imba mba kupasana poo pe notjiṋa tji mave hepa mehupo rawo.

8. Otja 1 Ovakorinte 7:7-9, otjikeṋa Paulus tja tunduuza Ovakriste okuripurira ko?

⁸ Tjimuna Jesus, omuapostele Paulus wa kara omukombe motjiungura tje tjokuzuvarisa. Paulus kena pa honga kutja ma rire navi kOmukriste okukupa. Eye aa tjiwa kutja iho matji zu komundu omuini. Posi yokutja, Paulus wa tunduuza Ovakriste okuripurira kokuhina okukupa poo okukupwa otja tji mave karere Jehova. (Lesa 1 Ovakorinte 7:7-9.) Oukahu kutja Paulus kaa vara Ovakriste ovakombe otjovandu wokehi pu imba mba kupasana. Nu nandarire wa toorora Timoteus, ngwa ri omukambure omutanda nomukombe, okuungura oviungura ovinanḓengu motjiungura tja Jehova. * (Fil. 2:19-22) Kunao, kamaa rire nawa okuripura kutja omurumendu omukambure ke nokuyenena okupewa omerizirira kaaṋi mombongo mena rokutja wa kupa poo omukombe.—1 Kor. 7:32-35, 38.

9. Oumune uṋe mbu matu sokukara nawo ohunga norukupo noukombe?

⁹ Jesus poo Paulus kave na pu va honga Ovakriste okukupasana poo okukara ovakombe. Nu, hapo eṱe tu noumune uṋe ohunga norukupo noukombe? Okambo kOruhungu 1 ku Oktoba 2012, ka yandja eziriro ewa kepuriro ndo, nu ka tja: “Ouatjiri kutja orukupo noukombe oviyandjewa okuza ku Mukuru. . . . Jehova ka munu kutja oukombe otjiṋa tji tja sokuyandja ohoṋi poo omerikendero komundu.” Kunao, eṱe matu hepa okuraisa ondengero kovakambure ovakwetu ovakombe mombongo.

10. Matu yenene vi okuraisa ondengero kovakambure ovakwetu ovakombe?

¹⁰ Hapo matu yenene vi okuraisa ondengero koumune nongaro yovakambure ovakwetu ovakombe? Ngatu tjiwe nawa kutja  Ovakriste tjiva va tya okukara ovakombe. Ovakriste varwe ovakombe mape ya ve vanga orukupo, posi yokutja ngunda kave ya muna omundu omusemba. Nu tjiva va zepaisa ovasuverwa vawo. Kunao, imba mbe ri mombongo ka hepero okupura Ovakriste ovakombe kutja, ongwaye tji ve hiya kupa nokukupwa poo okuvepahera omundu okukupasana. Otjingaperi kutja, Ovakriste ovakombe tjiva mape ya ave ningire ombatero ndjo. Nu indu tji ve ha ningirire ombatero ndjo, ripura omuini uriri kutja hapo mave kara noumune uṋe indu tji we ve ningire okuvepahera epanga rwomorusuvero? (1 Tes. 4:11; 1 Tim. 5:13) Indjo tu tare koumune tjiva wovakambure ovakwetu ovakombe.

11-12. Omomuano uṋe mu mape ya atu teya ombango yovakambure ovakwetu ovakombe?

¹¹ Omutarere umwe worukondwa ngu hiya kupa nu ngu ungura oviungura vye nawa, u muna kutja okokuwa okurira omukombe. Eye wa tja, u teka ombango indu ovakambure ovakwao tji mave mu pura momuano omuwa kutja,“Ongwaye tji u hiya kupa?” Omurumendu omukambure omukombe ngu karera porutavi rwomberoo wa tja: “Povikando tjiva mbi muna kutja ovakambure tjiva ve ripura kutja, mave sokuṱira imba mbe hiya kupa ondjenda. Ouripura mbwo u tjita kutja pe munike aayo oukombe katjiyandjewa okuza ku Jehova nungwari otjiṋa tji matji ku pe ouzeu.”

¹² Omukazendu omukambure ngu hiya kupwa ngu karera po Betel wa tja: “Ovakambure tjiva ve ripura kutja ovandu avehe ovakombe ve paha epanga romorusuvero poo ve muna kutja omeero wapamwe aehe wondjoroka ooruveze oruwa okupaha omundu okukupasana. Otjikando tjimwe tji mbaire noviungura vyo Betel korukondwa rwarwe rwehi mba ka vaza ngurova aku nombongarero yombongo. Omukazendu omukambure pu mba ka kara we ndji raera kutja mombongo mu novarumendu vevari ovakambure wotjiwondo tjandje. Nu we ndji raera kutja ke nokundjipahera epanga romorusuvero. Nungwari tjimanga tji twa uta okuhita mEtuwo rwOmerikotameneno, eye we ndji twara okukahakaena novarumendu ovakambure mbo. Iho tjiri tja ri otjiṋa otjiyandja hoṋi kweṱe atuyetatu.”

13. Ovihorera viṋe mbya tunduuza omukazendu omukambure omukombe?

¹³ Omukazendu omukambure warwe ngu karera po Betel wa tja: “Ami me tjiwa ovakandjira ovakombe ovanene pwami, mbe nozondando ozombwa, mbe nonḓero okuvatera varwe nu mbe nondjoroka. Nu owo ombatero onene kombongo. Owo ve noumune ouwa ohunga nokuhinokukupwa. Nu kave rimunu kutja ovananḓengu pu varwe mena rokutja ovakombe nu wina kave rimunu okuhinondjoroka mena rokutja kave novarumendu poo ovanatje.” Okukara mombongo ovandu mu ve raisasana ondengero nokumuna kutja omundu auhe omunanḓengu, tjiri tji yandja ondjoroka. Ove u tjiwa kutja ovakweṋu kamaave ku ṱire ondjenda poo eruru nokutjita tjimuna kave nokukumuna, nu kave ripura kutja oove omunanḓengu pu wo. Aruhe u tjiwa kutja owo ve ku suvera.

14. Omomuano uṋe mu matu raisire ovakambure ovakwetu ovakombe ondengero?

¹⁴ Ovakambure ovakwetu ovakombe mave kara nondjoroka indu tji tu hi nokuveṱira ondjenda, nungwari tji matu ve vara mena rovikaṋena vyawo oviwa. Pendje nokuveṱira ondjenda, matu sokuveraisira ondengero kouṱakame wawo. Kunao, ovakambure ovakwetu ovakombe kamaave munu aayo eṱe matu ve raere kutja, “Hi nakukuhepa!” (1 Kor. 12:21) Nungwari, mave tjiwa kutja twe ve  tenga nu tu nondjoroka kutja owo orupa rwombongo.

15. Omarundurukiro yeṋe ovakambure tjiva ngu va tjita kutja ve ungure ovingi motjiungura tjokuzuvarisa?

¹⁵ Ndino, ovakambure ovengi va twapo ondando yokurihonga eraka rarwe kokutja ve vatere ku ku nouhepe wovazuvarise meraka ndo. Owo ve hepa okutjita omarundurukiro mehupo rawo, kutja ve yenenise ondando ndjo. Ovakambure mbo va isa ozombongo zeraka rawo kokutja ve kakarere mombongo yeraka rarwe mu mu nouhepe wovazuvarise. (Oviung. 16:9) Imbo omukambo Ovakriste mbo mbu ve rityera oveni kutja ve ungurire Jehova. Nandarire kutja ku kambura ozombura ku wo okutjiwa eraka ndo nawa, owo ve vatera ombongo momiano omingi. Ovikaṋena vyawo oviwa nondjiviro yawo vi yanḓiparisa ombongo. Eṱe tjiri tu nondangi komeriyandjerero wovakambure mbo.

16. Ovanene wombongo ve tara ku ye indu tji mave toorora omukambure okurira omunene wombongo poo omuvatere wombongo?

¹⁶ Orutu rwovanene wombongo kamaaru tjaere omurumendu omukambure okurira omunene wombongo poo omuvatere wombongo, mena rokutja eye ka hungire eraka ndi hungirwa mombongo ndjo nawa. Ovanene wombongo ve sokuungurisa Omatjangwa tji mave vanga okutoorora omunene wombongo poo omuvatere wombongo, nungwari kave sokutara kutja omukambure ngo u hungira vi eraka rombongo ndjo.—1 Tim. 3:1-10, 12, 13; Tit. 1:5-9.

17. Ovanene mave sokuripura omapuriro yeṋe tjiva indu tji mave tjindire kehi rarwe?

¹⁷ Omaṱunḓu tjiva wOvakriste ya tjindira kehi rarwe okukapaha ko omaundiro poo oviungura. Kunao, ovanatje vawo mape ya ave hiti oskole meraka ndi hungirwa mehi ndo. Ovanene wina mape ya ave hepa okurihonga eraka rehi ndo, kutja ve yenene okumuna oviungura. Hapo tjike indu tji pe nombongo poo okambumba ku kehungira eraka rawo? Eṱunḓu ndo ma ri sokuyenda kombongo iṋe? Hapo mave sokuyenda kombongo yeraka ndi hungirwa mehi ndo poo kombongo yeraka rawo oveni?

18. Otja kOvagalate 6:5, matu raisa vi ondengero kondyero ndja tuwapewa i yotjiuru tjeṱunḓu?

¹⁸ Otjiuru tjeṱunḓu matji sokutya kutja eṱunḓu mari sokukahita kombongo iṋe. Mena rokutja indji ondyero yomundu omuini kourike we, eye ma sokuripurira ku ihi tji tji ri otjiwa keṱunḓu re. (Lesa Ovagalate 6:5.) Eṱe matu hepa okutenga ondyero yotjiuru tjeṱunḓu. Eṱe ngatu yakure ondyero aihe ndja twapo, nu tu yakure eṱunḓu ndo otja ouṋepo ounanḓengu wombongo yetu.—Rom. 15:7.

19. Ovikeṋa oviuru vyomaṱunḓu mbi mave sokuripura nokukumbira ko?

¹⁹ Nu mozongaro zarwe, omaṱunḓu tjiva  mape ya aye kara mombongo mu mu hungirwa eraka rawo, posi yokutja ovanatje ave ha tjiwa eraka ndo nawa. Ndovazu ombongo yeraka rawo ndjo iri momaturiro mu mu hungirwa eraka rehi, mape ya arire ouzeu kovanatje okuzuva nawa oviṋa mbi mave hongwa mombongo nu iho a tji tjiti kutja ave ha yenene okukurisa oupanga wawo kuna Jehova. Omena raye? Mena rokutja mape ya ovanatje ve hita oskole mu mu hungirwa eraka rehi ndo, nungwari ndi heri eraka rawo oveni. Indu tji pe nongaro otja indjo, oviuru vyomaṱunḓu vi sokuripura nawa nokuningira ounongo ku Jehova mbu mau ve vevatere okutjiwa kutja ngave tjite vi kutja ve vatere ovanatje vawo okutumbuka popezu na Jahova novakambure ovakwao. Povikando tjiva ve hepa okuvatera ovanatje vawo okutjiwa eraka rawo nawa, poo okutjindira kombongo ndji ungurisa eraka ovanatje ndu ve zuva nawa. Ombongo ndja toororwa i otjiuru tjeṱunḓu, mai sokutjita kutja eṱunḓu ndo ri mune kutja ra yakurwa nondengero nu ma ri varwa otjorupa rwombongo.

20. Matu yenene vi okuraisa ondengero kovakambure ovakwetu mbe rihonga eraka epe?

²⁰ Omapu aehe ngu twa hungirire ko maye raisa kutja mozombongo ozengi ma mu kara ovakambure ovakwetu mbe kondja oukukutu okurihonga eraka rarwe. Mape ya arire ouzeu kuwo okuhungira oumune wawo. Posi yokutja tji matu ripurire korusuvero rwawo ku Jehova nonḓero ndji ve nayo okumukarera, kamaatu ripurire komuano mu mave hungire eraka ndo. Tji matu tara kovikaṋena vyawo oviwa mbyo, matji tu hingi kutja tu raisire ovakambure ovakwetu mbo ondengero nokuveyozika. Eṱe kamaatu tja, ‘ka tu nokuvehepa’ mena rokutja kave nokuhungira eraka retu nawa.

21-22. Ondjingonekero iṋe ndji tuna yo?

²¹ Tjiri ondjingonekero kweṱe kutja Jehova wa yandja otjiungura otjinanḓengu ku auhe wetu mombongo ye. Nandarire kutja oweṱe ovakombe poo twa kupa nokukupwa, kutja twa kurupa poo oweṱe omitanda, kutja tu tjiwa poo katu tjiwa eraka rorive nawa, oweṱe ovananḓengu ku Jehova nu tu hepasana.—Rom. 12:4, 5; Kol. 3:10, 11.

²² Ngatu kayende komurungu okuṱakamisa omapu omengi ngu twe rihongo okuza komasasanekero wa Paulus ohunga norutu rwomundu. Indu tji twa tjiti nao, maku tu vatere okutjiwa kutja ovakambure ovakwetu matu ve tunduuza vi. Nu wina maku tu vatere okuvesuvera nokuveyozika.