1. Yehowa gaw sadi dung ai mayam langai hpra hpe hpa jaw da ai kun?

YEHOWA gaw sadi dung ai mayam langai hpra hpe tsawra nna, nawku hpung hta mung shara jaw da ai. N bung ai magam lit ni nga tim, anhte yawng gaw manu dan ai ni rai nna, shada da mung karum shingtau hkat ra ai. Ndai ahkyak ai lam hpe chye na na matu, kasa Pawlu anhte hpe karum ya wa ai. Gara hku nna kun?

2. Ehpesu 4:16 hku nga yang shada da manu shadan nna hpa majaw bungli arau galaw ra ai kun?

² Ndai sumhpa a madung Chyum daw hta, Yehowa a mayam shada da gaw, ‘ngai nang hpe n ra ma de ai’ ngu n mai tsun ai lam hpe Pawlu ahkyak shatai nna tsun da ai. (1 Ko 12:21) Nawku hpung hta simsa ai lam nga na matu, shada da manu shadan nna bungli arau galaw ra ai. (Ehpesu 4:16 hpe hti u.) Rai yang, shada da tsawra wa nna nawku hpung mung ngang kang wa na re.

3. Ndai sumhpa hta hpa lam hkaja mat na kun?

³ Nawku hpung hta nga ai ni hpe hkungga ai lam gara hku madun lu na kun? Ndai sumhpa hta, myitsu salang shada da hkungga ai hpe madun mai ai lam, dinghku n de ai hpunau nauna ni hpe manu shadan mai ai lam, anhte a amyu ga sharin la nga ai ni hpe hkungga mai ai lam ni hpe hkaja mat na re.

4. Roma 12:10 hta myitsu salang ni hkan sa ging ai gara hpaji jaw ga hpe Pawlu tsun da ai kun?

⁴ Nawku hpung hta nga ai myitsu salang yawng gaw, Yehowa a chyoi pra ai wenyi hte aya tang da ai ni re. Shanhte  langai hpra hta n bung ai atsam ningja ni hte shaman chyeju ni nga ai. (1 Ko 12:17, 18) Nkau mi gaw aya tang hkrum ai nau n na shi ai ni rai nna, mahkrum madup ni mung nau n nga shi ai. Nkau mi gaw asak aprat hte hkamja lam a majaw, shadawn sharam sha lu galaw ai. Gara myitsu salang raitim, myitsu salang shada da hpe ‘ngai nang hpe n ra ma de ai’ ngu nna n tsun ging ai. De a malai, myitsu salang langai hpra gaw, Roma 12:10 (hti u) hta tsun da ai Pawlu a hpaji jaw ga hpe hkan sa ging ai.

5. Myitsu salang shada da hkungga ai lam gara hku madun na kun? Dai hku galaw na matu hpa majaw ahkyak ai kun?

⁵ Myitsu salang ni gaw, shada da tsun ai ga hpe atsawm madat ya ai hku nna hkungga ai lam madun ma ai. Laksan hku nna, nawku hpung a ahkyak ai lam ni hpe bawngban ai shaloi hta re. Hpa majaw kun? 1988, October 1, Sin Langchyi-E hta ndai hku tsun da ai: “Gara masa, gara ahkyak ai dawdan lam hpe raitim, Chyum Laika npawt tara hte maren, myitsu salang ni atsawm hparan lu hkra, Yesu gaw chyoi pra ai wenyi hpe akyu jashawn ai lam myitsu salang ni hkap la ma ai. (Kas 15:6-15) Chyoi pra ai wenyi gaw myitsu salang yawng hpe karum ya nga ai.”

6. Myitsu salang ni gaw kahkyin gumdin let gara hku galaw lu ai kun? Nawku hpung gaw gara hku akyu lu la na kun?

⁶ Myitsu salang shada da hpe hkungga ai myitsu salang langai gaw, myitsu salang zuphpawng hta tinang sha shingkang ka-up na matu, shaga na matu n shakut ai. Tinang a ningmu sha jaw ai ngu nna n shadu ai. De a malai, tinang a ningmu hpe shagrit shanem let tsun dan ai. Kaga ni tsun ai hpe mung atsawm madat ya ai. Grau nna gaw, Chyum Laika npawt tara hte maren bawngban na matu jin jin rai nna, “sadi ai hte myit su ai mayam” kaw na sa ai lam matsun hpe hkan sa ai. (Mat 24:45-47) Myitsu salang ni gaw, tsawra myit hte hkungga let bawngban na nga yang, chyoi pra ai wenyi lu la na re. Nawku hpung hpe shangang shakang ya lu ai dawdan lam ni jahkrat lu na re.​—Yak 3:17, 18.

7. Dinghku n de ai ni hpe Yesu gara hku mu mada ai kun?

⁷ Nawku hpung hta kun dinghku ni nga ai zawn, dinghku n de ai hpunau nauna law law mung nga ai. Dinghku n de ai ni hpe gara hku mu mada ging ai kun? Shanhte hpe Yesu gara hku mu mada wa ai lam hkaja yu ga. Ginding aga hta Yesu magam gun wa ai shaloi, dinghku n de wa ai. Shi a aten ni yawng hpe magam lit hta sha myit maju jung wa ai. Dinghku de ra ai, n de ra ai ngu nna galoi mung n sharin ya wa ai. Raitim, Hkristan nkau gaw dinghku n de na matu lata na re ngu Yesu tsun wa ai. (Mat 19:11, 12) Dinghku n de ai ni hpe Yesu hkungga wa ai. Grit nem ai, gawngkya ai ni hku nna mung n mu mada wa ai.

8. 1 Korinhtu 7:7-9 hta Pawlu gaw Hkristan ni hpe gara hku n-gun jaw da ai kun?

⁸ Yesu zawn kasa Pawlu mung, dinghku n nga ai prat hte magam gun wa ai. Hkristan langai dinghku de ai gaw, shut ai ngu nna Pawlu galoi n sharin ya ai. Dai gaw tinang a dawdan lam sha re ai hpe shi chye ai. Raitim, Pawlu gaw Hkristan ni hpe dinghku n de ai prat hte Yehowa a magam gun lu na kun? ngu ai hpe myit na matu n-gun jaw wa ai. (1 Korinhtu 7:7-9 hpe hti u.) Dinghku n de ai Hkristan ni hpe Pawlu yu kaji ai lam n nga ai. Shi gaw dinghku n de ai ramma Timohti hpe ahkyak ai lit ni gunhpai na matu lata wa ai. * (Hpl 2:19-22) Hpunau langai hpe dinghku de ai, n de ai ngu ai hta madung nna atsam hpring ai, n hpring ai hpe dawdan ai gaw shut ai.​—1 Ko 7:32-35, 38.

9. Dinghku de ai, n de ai hte seng nna hpa lu tsun ai kun?

⁹ Yesu hte Pawlu gaw, Hkristan ni dinghku de ra ai (sh) n mai de ai ngu nna n tsun ai. Dai majaw, dinghku de ai, n de ai hte seng nna, anhte hpa lu tsun ai kun? Dai lam hte seng nna 2012, October 1, Sin Langchyi-BU hta ndai hku mahtai jaw da ai: “Dinghku de ai hte n de ai prat lahkawng yan gaw, Karai Kasang kaw na lu la ai shaman chyeju re ngu nna anhte lu tsun ai. Dinghku n de ai prat gaw, kaya jahpa (sh) yawn hpa hku nna Yehowa n mu mada ai.” Dai majaw, nawku hpung hta nga ai dinghku n de ai hpunau nauna ni hpe hkungga ra ai.

10. Dinghku n de ai hpunau nauna ni hpe hkungga ai lam gara hku madun na kun?

 ¹⁰ Dinghku n de ai hpunau nauna ni a masa lam hte hkamsha lam hpe hkungga ai lam gara hku madun na kun? Hkristan nkau gaw, dinghku n de ai sha nga na matu dawdan da ai hpe anhte chye da ra ai. Nkau gaw tinang hte htap htuk ai ningrum ningtau n mu tam shi ai majaw, n hkungran shi ai re. Nkau gaw ningrum ningtau ni si mat ai rai chye ai. Gara hku mi raitim, dinghku n de ai Hkristan ni hpe, hpa majaw dinghku n de ai rai? manang tam ya ra na i? ngu nna san ai gaw htap htuk na kun? Nkau mi chyawm gaw karum hpyi wa chye ai. Raitim, shanhte karum n hpyi ai sha, manang tam ya na ngu sa tsun ai nga yang, shanhte gara hku hkamsha na kun? (1 Tm 5:13) Sadi dung ai dinghku n de ai hpunau nauna ni a tsun ai lam hpe yu yu ga.

11-12. Dinghku n de ai ni hpe gara hku nna myit daw shangun chye ai kun?

¹¹ Magam lit ni hpe atsawm gunhpai nga ai dinghku n de ai hpung kawan hpunau langai gaw, dinghku n de ai prat gaw akyu law law lu shangun ai ngu shi hkamsha ai. Raitim, hpunau nauna ni gaw, myit majing hte “hpa majaw dinghku n de ai rai?” ngu nna san ai shaloi hta gaw, myit daw ai ngu nna tsun ai. Ginjaw garan rung kaw magam gun nga ai dinghku n de ai hpunau langai ndai hku tsun ai: “Dinghku n de ai prat gaw matsan mayam re ngu ngai hkamsha hkra kalang lang hpunau nauna ni galaw ai. Shaman chyeju re ngu nna mu na malai, manghkang re ngu nna pyi hkamsha wa ai.”

¹² Behtela hta magam gun ai dinghku n de ai nauna langai ndai hku tsun ai: “Hkaw tsun masha nkau gaw, dinghku n de ai yawng gaw ningrum ningtau tam nga ai (sh) kanawn mazum ai lam gaw ningrum ningtau tam na matu ahkaw ahkang hku mu mada ma ai ngu shanhte shadu ma ai. Kalang mi hta lit langai a matu ngai kaga de hkawm ai shaloi, zuphpawng galaw ai shana hta du mat ai. Ngai manam ai nta madu nauna gaw, nawku hpung hta ngai hte asak bung ai hpunau lahkawng nga ai ngu tsun ai. Ngai hpe matut ya na matu n re ai ngu nna gaw tsun ai. Raitim, nawku htingnu de shang ai hte kalang ta, dai hpunau lahkawng hpang de ngai hpe dun mat ai. Dai hpunau lahkawng mung, ngai mung grai nga yak mat ai.”

13. Dinghku n de ai nauna langai hpe gara kasi ningli ni gaw n-gun lu shangun ai kun?

¹³ Behtela hta magam gun ai kaga nauna langai ndai hku tsun ai: “Rap ra ai ningmu nga ai, magam lit hta myit maju jung ai, kaga ni hpe sharawng awng let karum ya ai, grai ngwi pyaw nga ai asak kaba ai dinghku n de ai ningshawng ni hpe ngai chye ai. Shanhte gaw nawku hpung hpe karum ya ma ai. Dinghku n de ai prat hpe rap ra ai ningmu nga ai. Dinghku n de ai majaw, kaga ni hta grau ai (sh) ningrum ningtau n nga ai, ma ni n nga ai majaw garen gari ai ngu nna mung n hkamsha ai.” Shada da hkungga nna manu shadan hkat ai nawku hpung hta nga lu ai gaw grai kabu hpa re. Hpunau nauna ni gaw shada da hpe matsan mayan re ai ni zawn n mu mada ai, manawn ai myit n nga ai, n kabai da ai, maren mara sha kanawn mazum ai, tsawra ai hpe chye da ai majaw re.

14. Dinghku n de ai ni hpe hkungga ai lam anhte gara hku madun na kun?

¹⁴ Dinghku n de ai majaw n re ai sha, kaja ai atsam ningja ni a majaw, manu shadan hkrum ai nga yang, dinghku n de ai hpunau nauna ni grai chyeju dum nga na re. Shanhte hpe matsan dum nga na malai, shanhte a sadi dung ai lam hpe manu shadan ya ging ai.  Rai yang, ‘ngai nang hpe n ra ma de ai’ ngu nna tsun nga ai zawn shanhte hkamsha sana n re. (1 Ko 12:21) De a malai, shanhte hpe hkungga ai, nawku hpung hta shanhte a shara hpe manu shadan ai ngu nna hkamsha wa na re.

15. Hpunau nauna nkau gaw hkaw tsun magam hpe grau rawt jat hkra hpa galaw wa ai kun?

¹⁵ Ndai shaning ni laman hta, hkaw tsun masha law law gaw hkaw tsun magam hpe maden jat lu hkra, kaga amyu ga ni hpe sharin la ma ai. Dai majaw, galai shai ai lam ni galaw ra ai. Dai hpunau nauna ni gaw, hkaw tsun masha grau ra ai shara hta magam gun na matu, shanhte a amyu ga shaga ai nawku hpung hpe tawn da kau nna, kaga amyu ga shaga ai nawku hpung de htawt ma ai. (Kas 16:9) Yehowa a magam hpe grau nna gun lu hkra shanhte nan dawdan ma ai. Amyu ga nnan hpe atsawm shaga lu hkra, shaning hku aten la ra tim, nawku hpung hpe atsawm karum ya lu ma ai. Shanhte a kaja ai atsam ningja ni hte mahkrum madup ni gaw, nawku hpung hpe shangang shakang ya lu ai. Dai zawn sak jaw ai hpunau nauna ni hpe anhte manu shadan ga ai.

16. Myitsu salang ni gaw hpunau ni hpe myitsu salang (sh) magam tau hku nna magam gun na matu gara atsam ningja ni hta madung nna dawdan ai kun?

¹⁶ Nawku hpung hta shaga ai amyu ga hpe atsawm n lu shaga ai majaw, hpunau langai hpe magam tau (sh) myitsu salang n mai byin ai ngu nna, myitsu salang ni n dawdan ging ai. Nawku hpung hta shaga ai amyu ga hpe shaga lu ai atsam hta n re ai sha, Chyum Laika atsam ningja ni hta madung tawn nna myitsu salang ni gaw dawdan na re.​—1 Tm 3:1-10, 12, 13; Tit 1:5-9.

17. Kaga mungdan de htawt mat wa ai dinghku ni gaw gara dawdan lam ni jahkrat ra ai kun?

¹⁷ Hkristan dinghku nkau gaw, shingbyi na matu (sh) bungli galaw na matu kaga mungdan de htawt ma ai. Shanhte a ma ni gaw dai mungdan a amyu ga hte jawng lung ra na re. Kanu kawa ni mung bungli galaw na matu, dai ga hpe sharin la ra sana re. Dai mungdan hta tinang a amyu ga hte shaga ai nawku hpung (sh) hpung kaji ni nga yang gara hku galaw na kun? Dai mungdan a amyu ga shaga ai nawku hpung ni hta lung ging ai kun? Shing nrai, tinang a amyu ga shaga ai nawku hpung hta lung ging ai kun?

18. Galati 6:5 hku nga yang dinghku hpe woi awn ai wa a dawdan lam hpe hkungga ai lam gara hku madun na kun?

¹⁸ Nta masha yawng gara nawku hpung hta lung na ngu ai hpe dinghku hpe woi awn ai wa gaw dawdan ra ai. Yawng a matu kaja htum gaw hpa re ai hpe shi myit ra ai. (Galati 6:5 hpe hti u.) Dinghku hpe woi awn ai wa gaw gara hku mi dawdan tim, anhte hkungga ra ai. Shanhte hpe hkap tau la nna tsawra myit madun ra ai.​—Rom 15:7.

19. Dinghku hpe woi awn ai wa gaw hpa hpe atsawm myit nna akyu hpyi ra ai kun?

 ¹⁹ Dinghku nkau gaw, tinang a amyu ga shaga ai nawku hpung hta lung ai. Raitim, ma ni gaw dai amyu ga hpe atsawm n chye na ma ai. Rai yang, ma ni gaw zuphpawng hta chye na na matu, wenyi lam hta rawt jat na matu yak chye ai. Hpa majaw kun? Ma ni a jawng hta shaga ai ga gaw kanu kawa ni a ga n re ai sha, dai mungdan a madung ga re ai majaw re. Dai majaw, dinghku hpe woi awn ai wa gaw ma ni hpe Yehowa, hpunau nauna ni hte hku hkau wa hkra, karum ya lu ai dawdan lam ni jahkrat lu na matu akyu hpyi ging ai. Kanu kawa ni gaw tinang a amyu ga hpe ma ni atsawm chye na wa hkra sharin ya ra na (sh) ma ni atsawm chye na ai amyu ga shaga ai nawku hpung de htawt ra na re. Dinghku hpe woi awn ai wa gaw, gara hku mi dawdan tim, nawku hpung gaw shanhte hpe hkungga nna, manu shadan ging ai.

20. Amyu ga nnan sharin la nga ai hpunau nauna ni hpe hkungga ai lam gara hku madun na kun?

²⁰ Hkaja wa sai hte maren, nawku hpung law law hta amyu ga nnan sharin la nga ai hpunau nauna ni nga ai. Shanhte a hkamsha ai lam ni hpe tsun dan na matu yak chye ai. Shanhte a amyu ga nnan shaga lu ai atsam hpe n re ai sha, Yehowa hpe tsawra ai myit hte nawku daw jau mayu ai myit hpe myit maju jung ging ai. Dai atsam ningja ni hpe mu wa yang, shanhte hpe grau manu shadan nna, grau hkungga wa na re. Anhte a amyu ga hpe atsawm n lu shaga ai majaw sha, ‘ngai nang hpe n ra ma de ai’ ngu nna galoi mung tsun na n re.

21-22. Yehowa hpe anhte hpa a majaw chyeju dum ging ai kun?

²¹ Nawku hpung hta, anhte langai hpra hpe shara jaw da ai majaw Yehowa hpe grai chyeju dum ga ai. Anhte yawng gaw anum, ala, dinghku nga ai, n nga ai, asak kaji ai, kaba ai, amyu ga hpe atsawm lu shaga ai, n lu shaga ai raitim, Yehowa hte shada da a matu manu dan ai.​—Rom 12:4, 5; Kol 3:10, 11.

²² Hkum hkrang hte seng ai Pawlu a ga shadawn kaw nna anhte sharin la wa ai lam ni hpe matut hkan sa mat ga. Rai yang, Yehowa a nawku hpung hta tinang a shara hte kaga ni a shara hpe grau nna manu shadan chye wa na re.