1. Ɛbɛ Yehowa ha paa ɛ-sɛyʋ siɣsiɣ tʋ weyi lɛ?

YEHOWA sɔɔlɩ faaa nɛ ɛha paa ɛ-sɛyʋ siɣsiɣ tʋ weyi lɛ lone naɖɩyɛ ɛ-ɛgbɛyɛ taa. Paa ɖɩlakɩ tʋma ndɩ ndɩ yɔ, ɖa-tɩŋa ɖɩmʋ ñɩm nɛ ɖa-tɩŋa ɖɩwɛ ɖama wazaɣ. Apostoloo Pɔɔlɩ sɩɣnɩ-ɖʋ se ɖɩkpɛlɩkɩ lɔŋ kɩbaŋ ɛnɩ. Ɛzɩma tɩyɛ?

2. Ɛzɩ Efɛɛzɩ mba 4:16 yɔɔdʋʋ yɔ, ɛbɛ yɔɔ pɩcɛyaa se ɖɩña ɖama nɛ ɖɩkpɛndɩ nɛ ɖɩla tʋmɩyɛ?

² Ɛzɩ pɔyɔɔdʋʋ tɔm ñʋʋ kʋnɛ kɩ-mayaɣ taa yɔ, Pɔɔlɩ ñɩɣ niye se ɖa-taa nɔɔyʋ ɛɛpɩzɩɣ nɛ ɛcɔnɩ Yehowa sɛyʋ lɛlʋ nɛ ɛyɔɔdɩ se: “Ŋfɛyɩ-m wazaɣ nakɛyɛ.” (1 Kɔr. 12:21) Ye ɖɩsɔɔlaa se laŋhɛzɩyɛ ɛwɛɛ ɛgbɛyɛ taa yɔ, pɩwɛɛ se ɖɩña ɖama nɛ ɖɩkpɛndɩ nɛ ɖɩla tʋmɩyɛ. (Kalɩ Efɛɛzɩ mba 4:16.) Alɩwaatʋ ndʋ ɖɩkpɛndɩɣ nɛ ɖɩlakɩ tʋmɩyɛ nɔɔ kʋɖʋmaɣ taa yɔ, ɛgbɛyɛ kpaɣ ɖoŋ nɛ ɖɩcɛyɩsɩ sɔɔlɩm taa.

3. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

³ Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩñaŋ Krɩstʋ ñɩma lalaa ɛgbɛyɛ taa yɔ, ɩ-taa nɩɩyɩ lɛ weyi? Tɔm ñʋʋ kʋnɛ kɩ-taa, ɖɩkaɣ naʋ ɛzɩma ɛgbɛyɛ taa ɛzʋtʋyaa pɩzɩɣ nɛ pawɩlɩ se pañaŋ ɖama yɔ. Pʋwayɩ lɛ, ɖɩkaɣ naʋ ɛzɩma ɖa-taa paa anɩ pɩzɩɣ nɛ ɛwɩlɩ se koobiya aɖamɛɛ mʋ ñɩm ɛ-ɛsɩndaa yɔ. Nɛ kɛdɛzaɣ ɖeɖe lɛ, ɖɩkaɣ naʋ ɛzɩma ɖɩpɩzɩɣ nɛ ɖɩwɩlɩ se ɖɩñaŋ ɛyaa mba paayɔɔdʋʋ ɖa-kʋnʋŋ camɩyɛ yɔ.

4. Lɔŋ weyi Pɔɔlɩ tasɩ Roma mba 12:10 taa nɛ pɩpɔzʋʋ se ɛgbɛyɛ taa ɛzʋtʋyaa ɩɖɔ ɩ-yɔɔ?

⁴ Yehowa fezuu kiɖeɖeu ɖiyina nɛ palɩzɩ ɛgbɛyɛ taa ɛzʋtʋyaa tɩŋa. Paa mbʋ yɔ, pa-taa paa anɩ wɛnɩ kʋjɔŋ ndɩ ndɩ nɛ ɛwɛ niye hɔɔlɩŋ ndɩ ndɩ taa. (1 Kɔr. 12:17, 18) Pɩtɩla  pahaʋ pa-taa nabɛyɛ waɖɛ se pɛkɛ ɛgbɛyɛ taa ɛzʋtʋyaa yɔ pitileɖita, nɛ pɛfɛyɩ niye ɛzɩ mba pɛkɛ ɛzʋtʋyaa pɩlakɩ alɩwaatʋ sakɩyɛ yɔ. Pɩtɩla akpadɩyɩtʋ yaa kʋdɔŋ yɔɔ lɛ, lalaa ɩɩpɩzɩɣ nɛ palakɩ tʋma sakɩyɛ. Paa mbʋ yɔ, pɩtɩmʋna se ɛzʋtʋyʋ nɔɔyʋ ɛcɔnɩ ɛzʋtʋyʋ lɛlʋ nɛ ɛyɔɔdɩ se: “Ŋfɛyɩ-m wazaɣ nakɛyɛ.” Ɛlɛ, pɩwɛɛ se paa ɛzʋtʋyʋ weyi lɛ, ɛɖɔ Pɔɔlɩ lɔŋ tasʋʋ mbʋ pɩwɛ Roma mba 12:10 taa yɔ pɩ-yɔɔ.—Kalɩ Roma mba 12:10.

5. (a) Ɛzɩma ɛgbɛyɛ taa ɛzʋtʋyaa wɩlɩɣ se pañaŋ ɛzʋtʋyaa lalaa? (b) Nɛ ɛbɛ yɔɔ pɩcɛyaa se pala mbʋ?

⁵ Ɛgbɛyɛ taa ɛzʋtʋyaa wɩlɩɣ se pɛwɛnɩ ñamtʋ ɛzʋtʋyaa lalaa yɔɔ, ye pewelisiɣni-wɛ camɩyɛ yɔ. Pɩcɛyaa se ɛgbɛyɛ taa ɛzʋtʋyaa ɩla mbʋ kɔzɩ kɔzɩ alɩwaatʋ ndʋ pekpeɣliɣ se patazɩ tɔm kɩcɛyɩtʋ natʋyʋ taa yɔ. Ɛbɛ yɔɔ? Na tɔm ndʋ 1^er octobre 1988 tɛ Feŋuu Tilimiye (aŋglɛɛ taa) yɔɔdaa yɔ: “Pɩwɛɛ se ɛzʋtʋyaa ɩtɩlɩ se Krɩstʋ pɩzɩɣ nɛ ɛtɩŋnɩ fezuu kiɖeɖeu yɔɔ nɛ eɖiyi ɛzʋtʋyaa ŋgbɛyɛ naɖɩyɛ taa paa ɛzʋtʋyʋ weyi lɛ ɛ-maɣzɩm, nɛ ɛlɛ labɩnɩ tʋmɩyɛ Bibl paɣtʋ kiɖe naɖɩyɛ nɛ pɩsɩna nɛ pɔcɔnɩ tɔm natʋyʋ ɖeɖe yaa pakpaɣ lɩmaɣzɩyɛ kɩcɛyɩyɛ naɖɩyɛ. (Tʋma 15:6-15) Fezuu kiɖeɖeu sɩɣnɩ ɛgbɛyɛ taa ɛzʋtʋyaa tɩŋa, pɩtɩkɛ pa-taa kʋɖʋm ɖeke kɩsɩɣna.”

6. (a) Ɛzɩma ɛzʋtʋyaa pɩzɩɣ nɛ pɛkpɛndɩ nɛ pala tʋmɩyɛ nɔɔ kʋɖʋmaɣ taa? (b) Nɛ ye palabɩ mbʋ yɔ, ɛzɩma pɩwazɩɣ ɛgbɛyɛ?

⁶ Ɛzʋtʋyʋ weyi ɛñaŋ ɛgbɛyɛ taa ɛzʋtʋyaa lalaa yɔ, ɛɛñakɩ pana paa ɛzɩmtaa se ɛnʋ ɛcalɩnɩ yɔɔdʋʋ ɛgbɛyɛ taa ɛzʋtʋyaa kediɣzisi taa. Ɛɛkpakɩɣ alɩwaatʋ hɔɔlʋʋ sɔsɔʋ nɛ ɛyɔɔdʋʋna, nɛ ɛɛmaɣzɩɣ se ɛ-lɩmaɣza wɛnɩ ɖeu paa ɛzɩmtaa. Ɛlɛ ɛyɔɔdʋʋ ndʋ ɛmaɣzɩɣ yɔ nɛ tɩ luzuu. Ewelisiɣ ndʋ lalaa yɔɔdʋʋ yɔ camɩyɛ. Kɔzɩ kɔzɩ lɛ, etisiɣ faaa nɛ ɛlakɩnɩ tʋmɩyɛ Bibl paɣtʋ kila nɛ ɛɖɔŋ lɔŋ weyi “yom siɣsiɣ tʋ nɛ lɔŋsɩnɖʋ” tasɩɣ yɔ ɩ-yɔɔ. (Mat. 24:45-47) Ye ɛzʋtʋyaa ɩwɩlɩɣ ɖama sɔɔlɩm nɛ ñamtʋ alɩwaatʋ ndʋ patazɩɣ tɔm natʋyʋ taa yɔ, Ɛsɔ fezuu kiɖeɖeu kaɣ wɛʋ pɔ-cɔlɔ nɛ kɩkaɣ-wɛ ɖiyuu nɛ pakpaɣ lɩmaɣza wena akpazɩɣ ɖoŋ ɛgbɛyɛ yɔ.—Yak. 3:17, 18.

7. Lɩmaɣza wena Yesu kaawɛnɩ ɛɖandʋ caɣʋ yɔɔ?

⁷ Sɔnɔ, ɛyaa mba pɔɖɔkɩ nesi yɔ, pɛwɛ ɛgbɛyɛ taa nɛ pa-taa nabɛyɛ wɛnɩ piya. Ɛlɛ, koobiya sakɩyɛ wɛ ɖɩ-taa ɖɔɖɔ nɛ patɩɖɔkɩ nesi. Lɩmaɣza wena pɩwɛɛ se ɖɩwɛɛnɩ mba pɛkɛ aɖamɛɛ yɔ pɔ-yɔɔ? Iyele nɛ ɖɩna lɩmaɣza wena Yesu kaawɛnɩ ɛɖandʋ caɣʋ yɔɔ yɔ. Alɩwaatʋ ndʋ ɛlakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, ɛtaaɖɔkɩ nesi. Ɛɛcaɣ ɛɖandʋ nɛ ɛkpaɣ ɛ-alɩwaatʋ nɛ ɛlabɩnɩ ɛ-Ɛsɔ sɛtʋ tʋmɩyɛ nɛ ɛka ɛ-lɩmaɣza ɖɩ-yɔɔ. Yesu tɩwɩlɩ kaaʋ se pɩcɛyaa se Krɩstʋ tʋ ɛɖɔkɩ nesi yaa ɛcaɣ ɛɖandʋ. Ɛlɛ, ɛyɔɔdaa se Krɩstʋ ñɩma nabɛyɛ pɩzɩɣ nɛ palɩzɩ se paaɖɔkʋʋ nesi. (Mat. 19:11, 12) Yesu kaawɛnɩ ñamtʋ mba pataaɖɔkɩ nesi yɔ pɔ-yɔɔ. Ɛtaamaɣzɩɣ se mba pɔɖɔkɩ nesi yɔ pakpaɖɩ aɖamɛɛ yaa se aɖamɛɛ tɛɖɩɣ nabʋyʋ.

8. Ɛzɩ 1 Kɔrɛntɩ mba 7:7-9 yɔɔdʋʋ yɔ, tɔm ndʋ yɔɔ Pɔɔlɩ seɣti Krɩstʋ ñɩma se pamaɣzɩ?

⁸ Ɛzɩ Yesu yɔ, apostoloo Pɔɔlɩ kaakɛ ɛɖanɛ alɩwaatʋ ndʋ ɛlakaɣ ɛ-Ɛsɔ sɛtʋ tʋmɩyɛ yɔ. Pɔɔlɩ tɩwɩlɩ kaaʋ se pɩkɛnɩ kɩwɛɛkɩm se Krɩstʋ tʋ nɔɔyʋ ɛɖɔkɩ nesi. Eeɖiɣzinaa se paa weyi ɛsɛtɩɣnɩ ɛ-tɩ tɔm hɔɔlʋʋ ŋgʋ kɩ-taa. Ɛlɛ, Pɔɔlɩ kaaseɣti Krɩstʋ ñɩma se pamaɣzɩ nɛ pana se papɩzɩɣ pacaɣ ɛɖandʋ nɛ pɛsɛɛ Yehowa yaa paapɩzɩɣ. (Kalɩ 1 Kɔrɛntɩ mba 7:7-9.) Pɩtʋʋ fɛyɩ se Pɔɔlɩ taamaɣzɩɣ se Krɩstʋ ñɩma mba pɔɖɔkɩ nesi yɔ, pakpaɖɩ aɖamɛɛ. Ɛlɛ ɛlɩzɩ pɩɣa evelaɣ Timootee weyi ɛɛkɛ ɛɖanɛ yɔ se ɛla tʋma sɔsɔna naayɛ Yehowa sɛtʋ taa. * (Fil. 2:19-22) Ye mbʋ, pɩwɩlɩɣ kpayɩ kpayɩ se pɩfɛyɩ ɖeu se ɛyʋ ɛcɔnɩ nesi ɖɔkʋʋ yaa ɛɖandʋ caɣʋ ɖeke na nɛ ɛmaɣzɩ se koobu nɔɔyʋ mʋnaa yaa ɛtɩmʋna se ɛla tʋma naayɛ ɛgbɛyɛ taa.—1 Kɔr. 7:32-35, 38.

9. Suwe ɖɩpɩzɩɣ nɛ ɖɩyɔɔdɩ nesi ɖɔkʋʋ nɛ ɛɖandʋ caɣʋ pɔ-yɔɔ?

⁹ Yesu nɛ Pɔɔlɩ pa-taa nɔɔyʋ tɩwɩlɩ se pɩpɔzʋʋ se Krɩstʋ ñɩma ɩɖɔkɩ nesi yaa pɩpɔzʋʋ se pacaɣ ɛɖandʋ. Ye mbʋ, suwe ɖɩpɩzɩɣ nɛ ɖɩyɔɔdɩ nesi ɖɔkʋʋ nɛ ɛɖandʋ caɣʋ yɔɔ? 1^er octobre 2012 tɛ Feŋuu Tilimiye (fransɩɩ taa) cosi tɔm ndʋ tɩ-yɔɔ camɩyɛ. Ðɩyɔɔdaa se: “Toovenim taa lɛ, papɩzɩɣ nɛ pakpaɣ nesi ɖɔkʋʋ nɛ ɛɖandʋ caɣʋ ɛzɩ kʋjɔŋ weyi ɩlɩnɩ Ɛsɔ cɔlɔ yɔ. . . . Yehowa ɛɛmaɣzɩɣ se ɛɖandʋ caɣʋ kɛ fɛyɛ tɔm yaa laŋwɛɛkɩyɛ tɔm.” Ye mbʋ, pɩcɛyaa se ɖɩña ɛgbɛyɛ taa koobiya mba pɛkɛ aɖamɛɛ yɔ.

10. Ɛzɩma ɖɩpɩzɩɣ nɛ ɖɩwɩlɩ se ɖɩñaŋ ɖo-koobiya mba pɛkɛ aɖamɛɛ yɔ?

 ¹⁰ Ɛzɩma ɖɩpɩzɩɣ nɛ ɖɩwɩlɩ se ɖɩnɩɣ ɖo-koobiya aɖamɛɛ lɩmaɣza nɛ wɛtʋ ndʋ tɩ-taa pɛwɛɛ yɔ tɩ-taa? Pɩwɛɛ se ɖɩtɔzɩ se koobiya mba pɛkɛ aɖamɛɛ yɔ, pa-taa nabɛyɛ maɣmaɣ kpaɣnɩ lɩmaɣza se paaɖɔkʋʋ nesi. Koobiya nabɛyɛ lɛ, pɔsɔɔlaa se pɔɖɔkɩ nesi, ɛlɛ petihiɣ ɛyʋ weyi ɛmʋnɩ-wɛ yɔ. Pɩtɩla nɔɔyʋ lɛ, elesi ɛ-tɛŋga. Paa pɩtɩɩkɛ suwe yɔ, pɩtɩmʋna se ɛgbɛyɛ taa mba ɩpɔzʋʋ koobiya mba patɩɖɔkɩ nesi yɔ se ɛbɛ yɔɔ patɩɖɔkɩ nesi, yaa peheyi-wɛ se pasɩɣnɩ-wɛ nɛ pehiɣ nɔɔyʋ. Pɩkɛ toovenim se koobiya mba pɛkɛ aɖamɛɛ yɔ, pa-taa nabɛyɛ pɩzɩɣ nɛ pɔpɔzɩ se pasɩnɩ-wɛ hɔɔlʋʋ ŋgʋ kɩ-taa. Ɛlɛ, ye koobu nɔɔyʋ ɛkɛ ɛɖanɛ nɛ ɛtɩpɔzɩ se pasɩnɩ-ɩ nɛ nɔɔyʋ ñɩnɩɣ se ɛsɩnɩ-ɩ yɔ, ɛzɩma pɩpɩzɩɣ nɛ pɩlabɩ-ɩ? (1 Tes. 4:11; 1 Tim. 5:13) Iyele nɛ ɖɩna tɔm ndʋ koobiya aɖamɛɛ siɣsiɣ ñɩma nabɛyɛ yɔɔdaa yɔ.

11-12. Ɛzɩma ɖɩpɩzɩɣ ɖiyele nɛ pitii aɖamɛɛ yɔɔɔ?

¹¹ Egeetiye yɔɔ cɔnɩyʋ nɔɔyʋ kɛ ɛɖanɛ nɛ ɛwɛ niye siŋŋ ɛ-tʋmɩyɛ labʋ taa. Ɛmaɣzɩɣ se wazasɩ sakɩyɛ wɛ ɛɖandʋ caɣʋ taa. Ɛlɛ, ɛyɔɔdaa se pɩpɩzɩɣ nɛ pitii ɛyʋ yɔɔɔ alɩwaatʋ ndʋ koobiya ñakɩ pana se pasɩnɩ-ɩ nɛ pɔpɔzʋʋ-ɩ se: “Ɛbɛ yɔɔ ŋtɩɖɔkɩ nesi?” yɔ. Koobu abalɩñɩnʋ nɔɔyʋ lakɩ tʋmɩyɛ ɛgbɛyɛ piliŋa nakɛyɛ taa nɛ ɛkɛ ɛɖanɛ. Ɛyɔɔdaa se: “Nabʋyʋ taa, koobiya yeki nɛ pɩlakɩ-m ɛzɩ mba pɛkɛ aɖamɛɛ yɔ, pacaɣ pʋtɔdɩyɛ yɔ. Pɩpɩzɩɣ piyele nɛ pɩwɛɛ ɛzɩ ɛɖandʋ caɣʋ tɩkɛ kʋjɔʋ, ɛlɛ tɩkɛ sʋʋtʋ natʋyʋ yɔ.”

¹² Koobu halɩñɩnʋ nɔɔyʋ kɛ ɛɖanɛ nɛ ɛlakɩ tʋmɩyɛ Betɛɛlɩ. Ɛyɔɔdaa se: “Koobiya nabɛyɛ maɣzɩɣ se ɛyaa mba pɛkɛ aɖamɛɛ yɔ, pa-tɩŋa pɛwɛɛ nɛ pañɩnɩɣ nɔɔyʋ se pa nɛ ɩ pɔɖɔkɩ nesi, yaa pa-tɩŋa pamaɣzɩɣ se alɩwaatʋ ndʋ payɩ pa nɛ ɛyaa pekpeɣliɣ ɖoli yɔ, pɩkɛnɩ-wɛ waɖɛ se pañɩnɩ nɔɔyʋ nɛ pa nɛ ɩ pɔɖɔkɩ nesi. Kɩyakʋ nakʋyʋ mowobi ɖɛ-ɛjaɖɛ hɔɔlʋʋ nakʋyʋ taa se mala tʋmɩyɛ naɖɩyɛ. Mantalɩ peeɖe ɖanaɣ yɔɔ, nɛ palakaɣ kediɣzaɣ ɖanaɣ ŋga. Koobu halɩñɩnʋ weyi ɛmʋ-m ɛ-tɛ yɔ, eheyi-m se koobiya abalɩñɩma nabɛyɛ naalɛ wɛ pɛ-ɛgbɛyɛ taa nɛ pɛkɛ man-ɖaɣʋnaa. Eheyi-m ɖɔɖɔ se mantaamaɣzɩ se ɛnʋ wɛɛ ɛñɩnɩɣ-m walʋ na. Ɛlɛ, ɖɩtɩɩsʋ Kewiyaɣ Kpaaŋ taa lɛ, ewoni-m ɖenɖe koobiya abalɩñɩma mba paawɛɛ yɔ se pɩsa ma nɛ wɛ ɖɩkatɩ. Toovenim taa lɛ, pɩɩcɛyɩ ma nɛ koobiya mba pa-naalɛ siŋŋ.”

13. Kɩɖaŋ weyi kpazɩ ɖoŋ koobu halɩñɩnʋ ɛɖanɛ nɔɔyʋ?

¹³ Koobu halɩñɩnʋ nɔɔyʋ kɛ ɛɖanɛ ɖɔɖɔ nɛ ɛlakɩ tʋmɩyɛ Betɛɛlɩ. Ɛyɔɔdaa se: “Mansɩm paa ɖooye nʋmɔʋ lɩzɩyaa nabɛyɛ; pɛkɛ aɖamɛɛ nɛ pɔsɔsaa pazɩ. Pɛkɛ ɛyaa mba pɛwɛnɩ lɩmaɣza kɩbana yɔ, pɛ-ɛsɩyɛ sɛnɩ pa-nʋmɔʋ lɩzʋʋ tʋmɩyɛ, petisiɣ faaa nɛ pasɩɣnɩ lalaa, nɛ pɛwɛ taa leleŋ taa. Pasɩɣnɩ ɛgbɛyɛ siŋŋ. Pɛwɛnɩ lɩmaɣza kɩbana pɛ-ɛɖandʋ caɣʋ yɔɔ, paamaɣzɩɣ se pɛkɛ aɖamɛɛ yɔ pʋyɔɔ lɛ, pakɩlɩ lalaa; nɛ paamaɣzɩɣ ɖɔɖɔ se patɩɖɔkɩ nesi nɛ pɛfɛyɩnɩ piya yɔ pʋyɔɔ lɛ, pɛtɛɖɩɣ nabʋyʋ.” Pʋyɔɔ lɛ, ye ɛyʋ ɛwɛ ɛgbɛyɛ nɖɩ ɖɩ-taa paa weyi ɛñaŋ lalaa nɛ ɛkpakɩɣ-wɛ se pamʋ ñɩm yɔ yɔ, pɩwɛ ɖeu siŋŋ. Pɩwɩlɩɣ se ño-koobiya ɩɩkpakɩɣ-ŋ se ŋkɛ pʋtɔdɩyɛ tʋ nɛ paasʋsʋʋ-ŋ; paaposuuni-ŋ nɛ paamaɣzɩɣ se ŋkɩlɩ-wɛ. Ŋnaɣ se pɔsɔɔlɩ-ŋ.

14. Ɛzɩma ɖɩpɩzɩɣ nɛ ɖɩwɩlɩ se ɖɩñaŋ koobiya mba pɛkɛ aɖamɛɛ yɔ?

¹⁴ Ye ɖɩcɔŋnɩ ɖo-koobiya mba pɛkɛ aɖamɛɛ yɔ pɛ-wɛtʋ kɩbandʋ nɛ ɖɩkpakɩɣ-wɛ se pamʋ ñɩm, nɛ ɖɩɩcɔŋnɩ-wɛ se pɛkɛ pʋtɔdɩyɛ tɩnaa yɔ, pɩkaɣ-wɛ kɛdɩnʋʋ siŋŋ. Mbʋ ɛzɩ ɖɩɩmaɣzaa se pacaɣ pʋtɔdɩyɛ lɛ, pɩwɛɛ se pe-siɣsiɣ wɛtʋ ɛmʋ ñɩm ɖɛ-ɛsɩndaa. Ye ɖɩlakɩ mbʋ yɔ, ɖo-koobiya mba pɛkɛ aɖamɛɛ yɔ, paakaɣ maɣzʋʋ kpa se ɖɩwɛɛ ɖiheyiɣ-wɛ se:  “Ɩfɛyɩ-m wazaɣ nakɛyɛ.” (1 Kɔr. 12:21) Ɛlɛ pakaɣ naʋ se ɖɩñaŋ-wɛ, nɛ ɖa-taa wɛ leleŋ se pɛwɛ ɛgbɛyɛ taa.

15. Lɛɣzɩtʋ ndʋ nabɛyɛ laba se pɩsa nɛ pawalɩsɩ pɔ-tɔm susuu tʋmɩyɛ?

¹⁵ Pɩnzɩ nzɩ sɩɖɛwa pitileɖita yɔ sɩ-taa, tɔm susuyaa sakɩyɛ ɖʋ pa-tɩ kaɖʋwa se pɛkpɛlɩkɩɣ kʋnʋŋ lɛɛkʋ nɛ pɩsa nɛ pawalɩsɩ pɔ-tɔm susuu tʋmɩyɛ. Pɩsa nɛ pala mbʋ lɛ, pɩɩpɔzaa se pala lɛɣzɩtʋ pe-wezuu caɣʋ taa. Koobiya mba, peyebi agbaa wena a-taa pɔyɔɔdʋʋ pa-kʋnʋŋ yɔ se pɩsa nɛ powolo nɛ paɖʋ nesi wena a-taa pɔyɔɔdʋʋ kʋnʋŋ lɛɛkʋ nɛ pɩpɔzʋʋ tɔm susuyaa yɔ. (Tʋma 16:9) Krɩstʋ ñɩma mba, pa-maɣmaɣ pakpaɣnɩ lɩmaɣzɩyɛ nɖɩ se pɩsa nɛ Kewiyaɣ tʋma ɖɛɛnɩ ɛsɩndaa. Paa pɩpɩzɩɣ nɛ pɩpɔzɩ se pakpaɣ pɩnzɩ sakɩyɛ nɛ pɛkpɛlɩkɩnɩ kʋnʋŋ kɩfalʋʋ nɛ pɔyɔɔdɩ-kʋ camɩyɛ yɔ, pasɩɣnɩ ɛgbɛyɛ hɔɔlɩŋ sakɩyɛ taa. Pɛ-wɛtʋ kɩbandʋ nɛ pɛ-lɛɣtʋ kpazɩɣ ɖoŋ ɛgbɛyɛ taa koobiya. Koobiya mba, pɛwɛnɩ tɩ laʋ lɩmaɣza nɛ pamʋ ñɩm ɖɛ-ɛsɩndaa!

16. Ɛgbɛyɛ taa ɛzʋtʋyaa kaatazɩɣ se pana se koobiya abalɩñɩma mʋnaa se pɛkɛ ɛzʋtʋyaa nɛ ɛgbɛyɛ taa tʋmlaɖaa yaa patɩmʋna lɛ, ɛbɛ yɔɔ pɩwɛɛ se pamaɣzɩ?

¹⁶ Pɩtɩpɔzɩ se ɛgbɛyɛ taa ɛzʋtʋyaa ŋgbɛyɛ naɖɩyɛ ekizi se paahaɣ koobu abalɩñɩnʋ nɔɔyʋ waɖɛ se ɛkɛ ɛgbɛyɛ taa ɛzʋtʋyʋ yaa ɛgbɛyɛ taa tʋmlaɖʋ, mbʋ pʋyɔɔ yɔ ɛɛyɔɔdʋʋ kʋnʋŋ ŋgʋ kɩ-taa palakɩ kediɣzisi ɛgbɛyɛ taa yɔ camɩyɛ. Ɛgbɛyɛ taa ɛzʋtʋyaa kaatazɩɣ se pana se koobu nɔɔyʋ mʋnaa se paha-ɩ waɖɛ naɖɩyɛ yaa ɛtɩmʋna lɛ, pɩwɛɛ se pamaɣzɩ wɛtʋ ndʋ Bibl pɔzʋʋ ɛzʋtʋyaa nɛ ɛgbɛyɛ taa tʋmlaɖaa se pɛwɛɛna yɔ tɩ-yɔɔ, nɛ pɩtaakɛ ɛzɩma koobu ɛnʋ ɛyɔɔdʋʋ ɛgbɛyɛ taa kʋnʋŋ yɔ pɩ-yɔɔ.—1 Tim. 3:1-10, 12, 13; Tiiti 1:5-9.

17. Lɩmaɣza wena pɩpɔzʋʋ se hɔʋ nakʋyʋ ɛkpaɣ alɩwaatʋ ndʋ kʋkʋyʋʋ nɛ kiwolo ɛjaɖɛ lɛɛɖɛ taa yɔ?

¹⁷ Krɩstʋ ñɩma hɔŋ nɩɩyɩ kʋyaa nɛ iwolo ajɛɛ lɛɛna taa se ɩɖʋ kʋyʋʋ yaa se ɩñɩnɩ tʋmɩyɛ. Pʋyɔɔ lɛ, pɩtɩla ajɛɛ kɩfana wena a-taa koobiya mba powoba yɔ, a-kʋnʋŋ pɔyɔɔdʋʋ sukulinaa mba pa-taa powokini pe-piya yɔ. Pɩpɩzɩɣ nɛ pɩpɔzɩ se lʋlɩyaa ɖɔɖɔ ɩkpɛlɩkɩ ɛjaɖɛ nɖɩ ɖɩ-taa powoba yɔ ɖɩ-kʋnʋŋ se pɩsa nɛ pehiɣ tʋmɩyɛ. Ye ɛgbɛyɛ naɖɩyɛ yaa ɛgbɛyɛ cikpeɖe naɖɩyɛ ɛwɛ peeɖe nɛ pɔyɔɔdʋʋ pa-kʋnʋŋ ɖɩ-taa yɔ, ɛbɛ pɩpɔzʋʋ se pala? Ɛgbɛyɛ nɖɩ taa pɩpɔzʋʋ se hɔʋ ewolo? Pɩwɛɛ se kiwolo ɛgbɛyɛ nɖɩ ɖɩ-taa pɔyɔɔdʋʋ ɛjaɖɛ nɖɩ ɖɩ-kʋnʋŋ yɔ ɖɩ-taa yaa ɛgbɛyɛ nɖɩ ɖɩ-taa pɔyɔɔdʋʋ kʋnʋŋ ŋgʋ hɔʋ yɔɔdʋʋ yɔ ɖɩ-taa?

18. Ɛzɩ Galaatii mba 6:5 yɔɔdʋʋ yɔ, ɛzɩma ɖɩpɩzɩɣ nɛ ɖɩwɩlɩ se ɖɩñaŋ lɩmaɣzɩyɛ nɖɩ hɔʋ ñʋʋdʋ kpakɩɣ yɔ?

¹⁸ Pɩwɛɛ se hɔʋ ñʋʋdʋ ɛkpaɣ lɩmaɣza pɩlɩɩnɩ ɛgbɛyɛ nɖɩ ɖɩ-taa pɩwɛɛ se ɛ-hɔʋ ewolo yɔ. Paa weyi pɩwɛɛ se ɛkpaɣ lɩmaɣza hɔɔlʋʋ  ŋgʋ kɩ-taa nɛ pʋyɔɔ lɛ, pɩwɛɛ se ɛmaɣzɩ mbʋ pɩwazɩɣ ɛ-hɔʋ yɔ pɩ-yɔɔ. (Kalɩ Galaatii mba 6:5.) Pɩwɛɛ se ɖɩña lɩmaɣzɩyɛ nɖɩ hɔʋ ñʋʋdʋ kpakɩɣ yɔ. Paa lɩmaɣzɩyɛ nɖɩ ɛkpaɣaa yɔ, pɩpɔzʋʋ se ɖitisi ɖɩ-yɔɔ nɛ ɖɩmʋ ɛ nɛ ɛ-hɔʋ camɩyɛ nɛ ɖɩwɩlɩ se ɖɩsɔɔlɩ-kʋ.—Roma 15:7.

19. Tɔm ndʋ yɔɔ pɩwɛɛ se hɔŋ ñʋndɩnaa ɩmaɣzɩ camɩyɛ nɛ patɩmɩ tɩ-yɔɔ?

¹⁹ Pɩtɩla hɔŋ nɩɩyɩ wɛ agbaa wena a-taa pɔyɔɔdʋʋ lʋlɩyaa kʋnʋŋ yɔ, ɛlɛ pɩtɩla piya ɩɩyɔɔdʋʋ kʋnʋŋ ŋgʋ camɩyɛ. Pɩwɩlɩɣ se ɛgbɛyɛ nɖɩ ɖɩ-taa hɔʋ wɛɛ yɔ, ɖɩɖɩ wɛ egeetiye nɖɩ ɖɩ-taa pɔyɔɔdʋʋ kʋnʋŋ ŋgʋ piya yɔɔdʋʋ sukuli taa yɔ ɖɩ-taa. Ye mbʋ pɩpɩzɩɣ nɛ pɩla piya kaɖɛ se sɩnɩɩ kediɣzisi taa nɛ sɩɩpɩzɩɣ nɛ sɩɖɛɛnɩ ɛsɩndaa fezuu taa. Ɛbɛ yɔɔ? Mbʋ pʋyɔɔ yɔ, pɩtɩla kʋnʋŋ ŋgʋ pɔyɔɔdʋʋ piya sukuli taa yɔ, pɩtɩkɛ ŋgʋ sɩ-lʋlɩyaa yɔɔdʋʋ. Ye pɩkɛ mbʋ yɔ, pɩwɛɛ se hɔŋ ñʋndɩnaa ɩmaɣzɩ camɩyɛ nɛ patɩmɩ nɛ pɔpɔzɩ lɔŋsɩnɖɛ nɛ pɩsɩnɩ-wɛ nɛ patɩlɩ mbʋ pɩwɛɛ se pala nɛ pasɩnɩ pe-piya nɛ sɩñɔtɩnɩ Yehowa nɛ ɛ-samaɣ yɔ. Pɩkaɣ pɔzʋʋ se lʋlɩyaa ɩsɩnɩ pe-piya nɛ sɩyɔɔdɩ sɩ-kʋnʋŋ camɩyɛ yaa pɩkaɣ pɔzʋʋ se powolo ɛgbɛyɛ nɖɩ ɖɩ-taa pɔyɔɔdʋʋ kʋnʋŋ ŋgʋ pe-piya yɔɔdʋʋ camɩyɛ yɔ ɖɩ-taa. Paa lɩmaɣzɩyɛ nɖɩ hɔʋ ñʋʋdʋ ɛkpaɣaa yɔ, pɩwɛɛ se ɛgbɛyɛ nɖɩ ɖɩ-taa palɩzaa se powoki yɔ, ɖɩ-taa ñɩma iyele nɛ ɛ-hɔʋ ɖiɣzina se pañaŋ-kʋ nɛ kɩmʋ ñɩm pɛ-ɛsɩndaa.

20. Ɛzɩma ɖɩpɩzɩɣ nɛ ɖɩwɩlɩ se ɖɩñaŋ ɖo-koobiya mba pɛwɛɛ nɛ pɛkpɛlɩkɩɣ kʋnʋŋ kɩfalʋʋ nakʋyʋ yɔ?

²⁰ Lɩmaɣza wena payɩ a-taa ɖɩtazaa nɛ pɩɖɛɛ yɔ a-yɔɔ lɛ, agbaa sakɩyɛ taa koobiya nabɛyɛ wɛɛ nɛ pañakɩ pana se pɛkpɛlɩkɩ kʋnʋŋ kɩfalʋʋ. Pɩpɩzɩɣ nɛ pɩwɛɛ-wɛ kaɖɛ se pɔyɔɔdɩ ndʋ pamaɣzɩɣ yɔ. Ɛlɛ ye ɖɩɩmaɣzɩɣ ɛzɩma pɔyɔɔdʋʋ kʋnʋŋ kɩfalʋʋ yɔ pi-ɖeke pɩ-yɔɔ yɔ, ɖɩkaɣ naʋ se pɔsɔɔlɩ Yehowa nɛ pɔsɔɔlaa se pɛsɛɛ-ɩ. Ye ɖɩcɔŋnɩ koobiya mba pɛ-wɛtʋ kɩbandʋ ndʋ yɔ, pakaɣ mʋʋ ñɩm ɖɛ-ɛsɩndaa siŋŋ nɛ ɖɩkaɣ-wɛ ñam siŋŋ. Ðɩɩkaɣ yɔɔdʋʋ se “Ɩfɛyɩ-m wazaɣ nakɛyɛ” mbʋ pʋyɔɔ yɔ paayɔɔdʋʋ ɖa-kʋnʋŋ camɩyɛ.

21-22. Waɖɛ sɔsɔɖɛ nɖɩ ɖɩwɛna?

²¹ Ðɩwɛnɩ ɛsɩmɩyɛ siŋŋ Yehowa yɔɔ mbʋ pʋyɔɔ yɔ, ɛha ɖa-taa paa anɩ waɖɛ se ɛla tʋmɩyɛ nɖɩ ɖɩmʋ ñɩm yɔ ɛ-ɛgbɛyɛ taa. Paa ɖɩkɛ abalʋ yaa halʋ, ɛɖanɛ yaa ɖɩɖɔkɩ nesi, pɩɣa yaa sɔsɔɔ, ɖɩyɔɔdʋʋ kʋnʋŋ nakʋyʋ camɩyɛ yaa pɩwɛ-ɖʋ kaɖɛ se ɖɩyɔɔdɩ kʋnʋŋ nakʋyʋ yɔ, ɖɩmʋ ñɩm Yehowa ɛsɩndaa nɛ ɖɩmʋ ñɩm ɖama ɛsɩndaa.—Roma 12:4, 5; Kol. 3:10, 11.

²² Tɛtɛ nɛ ɖiwolo pɩ-yɔɔ nɛ ɖɩɖɔŋ lɔŋ kɩbaŋ sakɩyɛ weyi ɖɩkpɛlɩkɩ ɛyʋ tomnaɣ kɩɖaʋ ŋgʋ Pɔɔlɩ labɩnɩ tʋmɩyɛ yɔ ɩ-yɔɔ. Pɩkaɣ-ɖʋ sɩnʋʋ nɛ ɖɩna mbʋ ɖɩpɩzɩɣ ɖɩla nɛ ɖɩkpazɩ ɖoŋ ɖo-koobiya yɔ. Pɩkaɣ-ɖʋ sɩnʋʋ ɖɔɖɔ se ɖɩsɔɔlɩ-wɛ nɛ ɖɩñam-wɛ paa ɛzɩmtaa.