1. Йаһоԝа чь дайә һәр хьзмәткʹаре хԝә?

ЙAҺОԜА бь дьловани ролед щӧда данә һʹәму хьзмәткʹаре хԝә. Рола мә чь бә жи, әм гьшк бьԛимәт ьн у һʹәԝщәйи һәвду нә. Готьнед Паԝлосе шанди али мә дькьн кӧ әм ве дәрса фәрз фәʹм бькьн. Гәло ча?

2. Ль гора Әфәси 4:16, гәрәк әм чьма ԛимәте бьдьн һәвду у һәвкʹарийе бькьн?

² Ча рʹеза сәрәкә нишан дькә, тʹӧ кәс нькарә хушк у бьрайәки дьнрʹа бежә: «Тӧ кери мьн найейи!» (1 Корн. 12:21) Жь бо кӧ әʹдьлайийа щьвате хьраб нәбә, гәрәке әм ԛимәте бьдьн һәвду у һәвкʹарийе бькьн (Әфәси 4:16 бьхунә). Һәрге әм дь йәктийеда һәвкʹарийе бькьн, щьват ԝе бь һʹьзкьрьне гәш бьбә.

3. Ве готареда, әме чь бьбиньн?

³ Щьватеда, гәрәке әм кʹижан алийада ԛәдре һәвду бьгьрьн? Ве готареда, әме бьвиньн кӧ рʹуспийед щьвате ча дькарьн ԛәдре һәвду бьгьрьн. Паше, әме бьвиньн кӧ әм ча дькарьн ԛимәте бьдьн хушк у бьрайед нәзәԝьщи. Хьлазийеда жи, әме бьвиньн кӧ әм ча дькарьн ԛимәте бьдьн кәсед кӧ зьмане мә баш ньзаньн.

4. Ль гора Рʹомайи 12:10, ԝе баш бә кӧ рʹуспийед щьвате чь бькьн?

⁴ Һʹәму рʹуспийед щьвате жь алийе рʹӧһʹе пирозва  тен кʹьфш кьрьн, ле һʹӧнӧред һәр йәк жь ԝан жь һәв щӧда нә (1 Корн. 12:17, 18). Һьнә рʹуспийед щьвате бәлки тʹәзә һатьнә кʹьфш кьрьн, у щерʹьбанди ниньн. Һьнәк бәлки ида кал бунә, у сьһʹәта ԝан нә баш ә. Ле йәкә, тʹӧ рʹуспи рʹуспики дьнрʹа нькарә бежә: «Тӧ кери мьн найейи!» Ԝе баш бә кӧ һәр рʹуспи гӧһ бьдә ширәта кӧ Паԝлос Рʹомайи 12:10-да дабу (бьхунә).

5. Рʹуспийед щьвате ча дькарьн ԛәдре һәвду бьгьрьн, у әв йәк чьма фәрз ә?

⁵ Гәло рʹуспийед щьвате ча дькарьн ԛәдре һәв бьгьрьн? Мәсәлә, гәрәке әԝ рʹьнд гӧһ бьдьн һәвду, илаһи гава рʹуспийед щьвате ль һәв тʹоп дьбьн кӧ дәрһәԛа тʹемед фәрз хәбәр дьн. Гәло чьма? Журнала «Бьрща Ԛәрәԝьлийе» йа 1 Щотмәһе 1988, ӧса дьбежә: «Рʹуспийед щьвате гәрәке фәʹм бькьн кӧ Иса Мәсиһ дькарә бь сайа рʹӧһʹе пироз сәр йәк жь рʹуспийед щьвате һʹӧкӧм бькә кӧ әԝ бәʹса принсипәкә Кʹьтеба Пироз бькә, йа кӧ жь бо сафикьрьна проблемәке йан сафикьрьна фәрз лазьм ә (Кʹар. Шанд. 15:6-15). Кʹома рʹуспийед щьватеда, рʹӧһʹе пироз тʹӧ щара тʹәне сәр йәки жь ԝан һʹӧкӧм накә».

6. Рʹуспийед щьвате ча дькарьн дь йәктийеда һәвкʹарийе бькьн, у әв йәк чьма жь бо щьвате керһати йә?

⁶ Рʹуспийе щьвате, йе кӧ ԛәдре рʹуспийед дьн дьгьрә, накә кӧ щьвина рʹуспийед щьвате контрол бькә, у әԝ нафькьрә кӧ ньһерʹандьна ԝи һәр тʹьм рʹаст ә. Әԝ фькред хԝә бь мьлукти тинә зьмен, у әԝ рʹьнд гӧһ дьдә готьнед рʹуспийед дьн. Әԝ хирәт дькә кӧ дина ԝан бькʹьшинә сәр принсипед Кʹьтеба Пироз, у әԝ һазьр ә кӧ рʹебәрийа «хӧламе амьн у сәрԝахт» ԛәбул бькә (Мәт. 24:45-47). Һәрге нав рʹуспийед щьватеда һʹьзкьрьн у һӧрмәт һәбә, рʹӧһʹе пироз ԝе рʹебәрийа ԝан бькә кӧ әԝ ԛьраред баш бьдьн, йед кӧ ԝе жь бо щьвате керһати бьн (Аԛуб 3:17, 18).

7. Иса ль азәпбуне ча дьньһерʹи?

⁷ Щьватед мәда һьм хушк у бьрайед зәԝьщи, һьм жи гәләк хушк у бьрайед нәзәԝьщи һәнә. Гәрәк әм ль кәсед азәп ча бьньһерʹьн? Бинә бира хԝә кӧ Иса ль азәпбуне ча дьньһерʹи. Гава Иса ль дьнйайе бу, әԝ азәп ма, у бь тʹәмами һʹьш у дина хԝә дьда хьзмәта хԝә. Иса тʹӧ щара нәдьгот кӧ гәрәк шагьртед ԝи бьзәԝьщьн йан на. Ле бәле, ԝи гот кӧ һьнәк ԝе бьхԝазьн азәп бьминьн (Мәт. 19:11, 12). Иса ԛәдре кәсед азәп дьгьрт, у әԝ нәдьфькьри кӧ әԝ жь кәсед зәԝьщи ньмьзтьр ьн йан кӧ жийана ԝанда тьштәк кем ә.

8. Ль гора 1 Корьнтʹи 7:7-9, Паԝлос дьхԝәст кӧ шагьртед Иса сәр чь бьфькьрьн?

⁸ Ԝәк Иса, Паԝлос жи азәп ма. Ԝи ԛәбул дькьр кӧ әв йәк ԛьрарәкә шәхси йә. Ле диса жи, Паԝлос гот кӧ ԝе баш бә кӧ хьзмәткʹаред Хԝәде бьфькьрьн кʹа әԝ дькарьн хьзмәтеда азәп бьминьн йан на (1 Корьнтʹи 7:7-9 бьхунә). Паԝлос хушк у бьрайед азәп ньмьз һʹәсаб нәдькьр. Мәсәлә, ԝи хортәки азәп йе бь наве Тимотʹейо һьлбьжарт кӧ әԝ щабдарийед гьран бьстинә * (Фили. 2:19-22). Әв йәк кӧ кәсәк жь бо щабдарийа теократик һазьр ә йан на, бь азәпбун йан зәԝьщибуна ԝива гьредайи нинә (1 Корн. 7:32-35, 38).

9. Гәрәке әм ль зәԝащ у азәпбуне ча бьньһерʹьн?

⁹ Иса Мәсиһ у Паԝлосе шанди һин нәдькьр кӧ гәрәк шагьртед Иса бьзәԝьщьн йан азәп бьминьн. Һәгәр ӧса йә, гәрәке ньһерʹандьна мә йа ль сәр зәԝащ у азәпбуне ча бә? Журнала «Бьрща Ԛәрәԝьлийе» йа 1 Щотмәһе сала 2012, ӧса готьбу: «Бь рʹасти, һәр дӧ жи [зәԝащ у азәпбун] пʹешкʹешед жь Хԝәде нә. . . . Йаһоԝа азәпбуне ԝәк бебәхти йан тьштәки шәрм навинә». Ләма, гәрәк әм ԛәдре хушк у бьрайед азәп бьгьрьн.

10. Әм ча дькарьн ԛәдре хушк у бьрайед азәп бьгьрьн?

¹⁰ Әм ча дькарьн нишан бькьн кӧ әм һʹале хушк у бьрайед нәзәԝьщи фәʹм дькьн? Гәрәке әм бир нәкьн кӧ һьнә хушк у бьра хԝә бь хԝә ԛьрар дайә кӧ азәп бьминьн. Һьнә кәс жи бәлки дьхԝазьн бьзәԝьщьн, ле һʹәта ньһа,  ԝан кәсәки ль гора дьле хԝә нәдитийә. Ӧса жи, һьнә хушк у бьрайед мә би манә. Гәло ԝе ԝан хԝәш бе кӧ әм ԝан бьпьрсьн, кʹа әԝ чьма назәԝьщьн йан бежьн кӧ әме аликʹарийе бьдьнә ԝан, кӧ ԝанрʹа кәсәки лайиԛ бьбиньн? Дьбә кӧ һьнә хушк у бьрайед азәп жь мә бьхԝазьн кӧ әм али ԝан бькьн. Ле һәрге ԝан аликʹарикә ӧса нәхԝәстьбә, ма әԝ йәк ԝе ль ԝан хԝәш бе? (1 Тʹеслн. 4:11; 1 Тимтʹ. 5:13) Кʹа әм бьвиньн кӧ һьнә хушк у бьрайед азәп дәрһәԛа ве йәке чь дьбежьн.

11-12. Хушк у бьрайед азәп дькарьн сәва чь әʹщьз бьбьн?

¹¹ Бәрпьрсийарәки мьһале, йе кӧ шьхӧле хԝә бь аԝайәки пʹьрʹ баш тинә сери, дьфькьрә кӧ гәләк фәйдәйед азәпбуне һәнә. Ле йәкә пьрсед ԝәк «Тӧ чьма назәԝьщи?», чьԛас бь нетәкә ԛәнщ бен пьрсин жи, дькарьн дьле мәрьв тәнг бькьн. Бьрайәки азәп, йе кӧ ль Бәйтʹәле дьхәбьтә, ӧса дьбежә: «Һьнә хушк у бьра гӧне хԝә бь кәсед азәп тиньн. Ләма, азәпбун щара нә ԝәк пʹешкʹеш, ле ԝәк барәки гьран хӧйа дькә».

¹² Хушкәкә азәп, йа кӧ ль Бәйтʹәле хьзмәт дькә, ӧса дьбежә: «Һьнә мьзгинван дьфькьрьн кӧ һʹәму кәсед азәп дьхԝазьн хԝәрʹа кәсәки бьвиньн йан жи кӧ әԝ һʹәму кʹеф у шайа ԝәк мәщалед жь бо һәвнаскьрьне дьвиньн. Щарәке, гава әз сәва ише Бәйтʹәле чум бажарәки дьн, әз рʹожа щьвине гьһиштьм ԝе дәре. Хушка кӧ әз ль мала ԝе дьмам мьнрʹа гот кӧ щьватеда, дӧ бьрайед азәп һәнә, йед кӧ һәвсалийед мьн ьн. Ԝе гот кӧ нета ԝе нә әв ә кӧ мьн бь йәкирʹа бьдә нас кьрьн. Ле гава әм гьһиштьн Ода Щьвате, ԝе әз кʹаш кьрьм кӧ мьн жь дӧ бьрарʹа бьдә нас кьрьн. Мә һәр сека жи пʹьрʹ шәрм кьр».

13. Хушкәкә азәп жь мәсәла кʹе мерхаси станд?

¹³ Хушкәкә дьн, йа кӧ ль Бәйтʹәле хьзмәт дькә, сәр һьнә пешәнгед әʹмьрда мәзьн, йед кӧ нәзәԝьщи нә, ӧса дьбежә: «Әԝ пʹьрʹ гьһишти, зен, фәдакʹар у бь хьзмәта хԝә рʹази нә, у пʹьрʹ аликʹарийа щьвате дькьн. Ньһерʹандьна ԝан йа ль сәр азәпбуна хԝә маԛул ә; әԝ хԝә бьльнд һʹәсаб накьн жь бәр кӧ әԝ азәп манә, нә жи хԝә мәʹрьм һʹәсаб дькьн, чьмки әԝ зәԝьщи ниньн». Щьватәкә кӧ теда һәр кәс ԛәдре һәвду дьгьрә пʹьрʹ хԝәш ә. Щьватәкә ӧсада, тʹӧ кәс хԝә бәләнгаз һʹәсаб накә у чʹәʹвнәбарийа һәв накә. Тʹӧ кәс найе ньмьз йан бьльнд кьрьн. Һәр кәс хԝә лайиԛи щьвате һʹәсаб дькә.

14. Әм ча дькарьн нишан кьн кӧ әм ԛәдре кәсед азәп дьгьрьн?

¹⁴ Хушк у бьрайед мә йед азәп ԝе дьлхԝәш бьн һәрге әм дина хԝә бьдьн, нә азәпбуна ԝан, ле сәр һʹӧнӧред ԝан. Дәԝса кӧ әм гӧне хԝә бь ԝан биньн, ԝе баш бә кӧ әм ԛәдре ԝан бьгьрьн кӧ әԝ Йаһоԝарʹа амьн дьминьн. Һәрге әм ӧса бькьн, хушк у бьрайед мә йед азәп ԝе тʹӧ щара нәфькьрьн кӧ әм ԝанрʹа дьбежьн: «Тӧ кери мьн найейи!» (1 Корн. 12:21) Әԝе бьвиньн кӧ әм ԛәдре ԝан дьгьрьн у ԛимәте дьдьн ԝан.

15. Һьнә кәса чь кьр кӧ хьзмәта хԝә зедә бькьн?

¹⁵ Ван сала, гәләк мьзгинвана дәстпекьрьнә зьманәки ну һин бьн, жь бо кӧ әԝ хьзмәта хԝә зедә бькьн. Әв йәк бона ԝан нә һеса йә. Һьнәка щьвата  хԝә һиштийә у дәрбази щьватәкә бь зьманәки хәриб бунә, йа кӧ һе зедә һʹәԝщәйи мьзгинвана нә (Кʹар. Шанд. 16:9). Әв шагьртед Иса ве сафикьрьна шәхси дькьн кӧ бькарьбьн һе зедә Йаһоԝарʹа хьзмәт бькьн. Дьбә кӧ гәләк сал дәрбаз бьн һʹәта кӧ әԝ зьмане нуда һостә бьн, ле әԝ диса жи бь гәләк аԝайа аликʹарийа щьвате дькьн. Щерʹьбандьн у һʹӧнӧред ԝан йед баш, щьвате жь алийе рʹӧһʹанива ава дькьн. Ма әм пʹьрʹ ԛимәте надьн ван хушк у бьрайед фәдакʹар?

16. Гәрәк рʹуспийед щьвате ль гора чь сафи кьн кʹа бьрайәк һазьр ә кӧ щабдарики бьстинә йан на?

¹⁶ Әв йәк кӧ бьрайәк зьмане щьвате баш ньзанә гәрәк нәбә сәбәб, кӧ кʹома рʹуспийед щьвате ԝи ԝәк бәрдәстийе щьвате йан рʹуспи кʹьфш нәкьн. Гәрәке рʹуспийед щьвате нә ль гора ве йәке кӧ бьрайәк зьмане щьвате чьԛас баш занә, ле ль гора принсипед Кʹьтеба Пироз сафи бькьн кʹа әԝ һазьр ә кӧ бьбә бәрдәстийе щьвате йан рʹуспийе щьвате (1 Тимтʹ. 3:1-10, 12, 13; Тито 1:5-9).

17. Һьнә малбәтед кӧ дәрбази ԝәлатәки дьн бунә жь хԝә чь дьпьрсьн?

¹⁷ Һьнә малбәт сәва проблема дәрбази ԝәлатәки дьн бунә. Дьбәкә зарʹокед ԝан ида дьчьн мәкʹтәбе кӧ бь зьмане ви ԝәлати һинбуне бьстиньн. Ӧса жи, де у бав бәлки хирәт дькьн кӧ зьмане ну һин бьбьн жь бо кӧ әԝ карьбьн хԝәрʹа хәбатәке бьбиньн. Ле һәрге щьват йан кʹомәкә бь зьмане ԝан жи һәбә, гәло гәрәк әԝ һәрʹьн кʹижан щьвате? Гәло ԝе баш бә кӧ әԝ һәрʹьн щьватәкә бь зьмане ви ԝәлати йан щьватәкә бь зьмане хԝә?

18. Ль гора Галати 6:5, гәрәке әм чь бькьн?

¹⁸ Гәрәке сәре малбәте сафи кә кӧ малбәт һәрә кʹижан щьвате. Әв йәк мәсәләкә шәхси йә, у гәрәке әԝ бьфькьрә кӧ жь бо малбәта ԝи чь ԝе баштьр бә (Галати 6:5 бьхунә). Ԛьрара ԝи чь бә жи, гәрәке әм ԛәдре ве малбәте бьгьрьн у ԝана бь дьл у щан щьвата хԝәда ԛәбул бькьн (Рʹом. 15:7).

19. Гәрәке сәред малбәте ль сәр чь бьфькьрьн?

¹⁹ Һьнә малбәт дьчьн щьватәкә бь зьмане хԝә, ле дьбә кӧ зарʹокед ԝан ви зьмани баш ньзаньн, чьмки мәкʹтәбеда әԝ нә зьмане де у баве хԝә, ле зьмане һәреме бь кʹар тиньн. Ләма, әԝ бәлки бәрнама щьвина баш фәʹм накьн у жь алийе рʹӧһʹанива пешда начьн. Һәрге һʹал ӧса йә, гәрәк сәре малбәте дӧа бькә у рʹьнд бьфькьрә кʹа гәрәке әԝ чь бькьн кӧ зарʹокед ԝан һе незики Йаһоԝа у щьвате бьбьн. Ԝе баш бә кӧ әԝ йан али зарʹока бькьн кӧ әԝ зьмане хԝә рʹьндтьр һин бьбьн йан жи дәрбази щьватәкә бь зьманәки дьн бьбьн. Сафикьрьна сәре малбәте чь бә  жи, гәрәке хушк-бьрайед щьвата кӧ әԝ һьлдьбьжерә ԛимәте бьдә ԝи у малбәта ԝи.

20. Әм ча дькарьн нишан бькьн кӧ әм ԛәдре хушк у бьрайед кӧ зьманәки ну һин дьбьн, дьгьрьн?

²⁰ Гәләк щьватада, һьнә хушк у бьрайед кӧ зьмане щьвате баш ньзаньн, һәнә. Ԝан бәлки зор те кӧ фькред хԝә биньн зьмен. Ле һәрге әм нә тʹәне хәбәрдана ԝан бьньһерʹьн, әме бьвиньн кӧ әԝ чьԛас Йаһоԝа һʹьз дькьн у дьхԝазьн ԝирʹа хьзмәт бькьн. Гава әм ван һʹӧнӧред ԝанә хԝәш бьвиньн, әме жь дьл ԛимәте бьдьн ԝан. Әме нәбежьн «Тӧ кери мьн найейи!» жь бәр кӧ әԝ зьмане мә баш ньзаньн.

21-22. Әм жь бо чь шькьрдар ьн?

²¹ Әм жь Йаһоԝарʹа шькьрдар ьн жь бәр кӧ ԝи әм дь щьвата хԝәда ԛәбул кьрьнә. Жь бо Йаһоԝа фьрԛ накә кӧ әм мер йан жьн ьн, азәп йан зәԝьщи нә йан зьманәки баш заньн йан на. Йаһоԝа ԛимәте дьдә мә һʹәмуйа, у гәрәке әм жи ԛимәте бьдьн һәвду (Рʹом. 12:4, 5; Колс. 3:10, 11).

²² Мәсәла Паԝлос йа дәрһәԛа бәдәнеда гәләк дәрсед фәрз мә һин дькә. Бьра әм ван дәрса һәр тʹьм бира хԝәда хԝәй бькьн. Бь ви аԝайи, әме зедәтьр ԛимәте бьдьн һьм рола хԝә һьм жи рола кәсед дьн щьвата Йаһоԝада.