1. Wetin Jiova dɔn gi ɔl in fetful savant dɛn?

JIOVA lɛk ɔl in fetful savant dɛn, so i dɔn mek am pɔsibul fɔ lɛ dɛn ɔl gɛt wok na in kɔngrigeshɔn. Pan ɔl we i bi se wi ɔl gɛt difrɛn wok dɛn, wi ɔl gɛt valyu ɛn wi nid wi brɔda ɛn sista dɛn na di kɔngrigeshɔn. Di apɔsul Pɔl bin ɛp wi fɔ ɔndastand dis impɔtant lɛsin. Aw i du dat?

2. Frɔm wetin de na Ɛfishians 4:​16, wetin mek wi nid fɔ valyu wi brɔda ɛn sista dɛn ɛn wok togɛda?

² Jɔs lɛk wetin de na di tim skripchɔ fɔ dis atikul, Pɔl bin tɔk klia wan se nɔn pan wi nɔ fɔ tɛl Jiova in savant se: “A nɔ nid yu.” (1 Kɔr. 12:​21) Fɔ lɛ pis kɔntinyu fɔ de na di kɔngrigeshɔn, wi fɔ valyu wi brɔda ɛn sista dɛn ɛn wok togɛda. (Rid Ɛfishians 4:​16.) We wi wok togɛda wit wanwɔd, di kɔngrigeshɔn go go bifo ɛn ɔlman go lɛk in kɔmpin.

3. Wetin wi go tɔk bɔt insay dis atikul?

³ Us we dɛn wi go sho rɛspɛkt fɔ wi brɔda ɛn sista dɛn na di kɔngrigeshɔn? Insay dis atikul, wi go tɔk bɔt aw ɛlda dɛn fɔ sho rɛspɛkt to dɛn kɔmpin ɛlda dɛn. Wi go tɔk bak bɔt aw wi ɔl go sho se wi valyu wi brɔda ɛn sista dɛn we nɔ mared. Dɔn, wi go lan aw wi go sho se wi rɛspɛkt di wan dɛn we nɔ de tɔk wi langwej fayn fayn wan.

4. Us advays Pɔl gi na Romans 12:​10 we ɛlda dɛn fɔ fala?

⁴ Na Jiova in oli spirit de pik ɔl di ɛlda dɛn na di kɔngrigeshɔn. Bɔt ɔlman gɛt in yon gift ɛn wetin i sabi fɔ du. (1 Kɔr. 12:​17, 18) I go bi se sɔm dɛn jɔs bi ɛlda ɛn dɛn nɔ gɛt bɛtɛ ɛkspiriɛns. Ɔda wan dɛn nɔ kin ebul fɔ du  bɔku tin bikɔs dɛn dɔn ol ɛn dɛn gɛt wɛlbɔdi prɔblɛm. Bɔt no ɛlda nɔ fɔ trit in kɔmpin ɛlda di kayn we we i tan lɛk i de tɛl am se, “A nɔ nid yu.” Bifo dat, ɔl di ɛlda dɛn fɔ fala wetin Pɔl se na Romans 12:​10.—Rid.

5. Aw ɛlda dɛn go sho se dɛn rɛspɛkt dɛn kɔmpin ɛlda dɛn? Wetin mek i impɔtant fɔ du dat?

⁵ Ɛlda dɛn go sho se dɛn rɛspɛkt dɛn kɔmpin ɛlda dɛn bay we dɛn de tek tɛm lisin to dɛn. Dɛn nid fɔ du dis mɔ we dɛn kin gɛt mitin fɔ tɔk bɔt impɔtant tin dɛn. Wetin mek? Di Ɔktoba 1, 1988, Wachtawa se: “Ɛlda dɛn fɔ no se Jizɔs Krays de yuz di oli spirit fɔ ɛp ɛni ɛlda fɔ tink bɔt Baybul prinsipul we go ɛp dɛn fɔ no wetin fɔ du we dɛn de disayd bɔt impɔtant tin. (Akt 15:​6-15) Nɔto wan ɛlda nɔmɔ di oli spirit de yuz.”

6. Wetin go ɛp ɛlda dɛn fɔ wok togɛda wit wanwɔd? Aw di kɔngrigeshɔn go bɛnifit we dɛn du dat?

⁶ Ɛlda we rɛspɛkt in kɔmpin ɛlda dɛn nɔ kin tray fɔ bi di fɔs pɔsin we fɔ tɔk ɔltɛm we dɛn gɛt mitin. Nɔto in wan de tɔk ɔltɛm, ɛn i nɔ de tink se wetin i tɔk kɔrɛkt ɔltɛm. Bifo dat, i de tɔk wetin i tink ɔmbul wan. I de tek tɛm lisin to wetin in kɔmpin ɛlda dɛn de se. Di tin we impɔtant pas ɔl na dat i rɛdi fɔ tɔk bɔt di prinsipul dɛn frɔm di Baybul ɛn fala di tin dɛn we “di slev we fetful ɛn gɛt sɛns” dɔn se. (Mat. 24:​45-47) We ɛlda dɛn de sho lov ɛn rɛspɛkt fɔ dɛn kɔmpin dɛn, dat kin mek Gɔd in oli spirit de wit dɛn, ɛn i go gayd dɛn fɔ disayd fɔ du tin dɛn we go ɛp di kɔngrigeshɔn.—Jems 3:​17, 18.

7. Wetin Jizɔs bin tink bɔt pipul dɛn we nɔ mared?

⁷ Tide, di kɔngrigeshɔn gɛt pipul dɛn we mared ɛn sɔm pan dɛn gɛt pikin dɛn. Bɔt i gɛt bɔku brɔda ɛn sista dɛn bak we nɔ mared. Aw wi fɔ si di wan dɛn we nɔ mared? Tink bɔt di we aw Jizɔs bin de  si di wan dɛn we nɔ mared. We i bin de du di prichin wok na dis wɔl, insɛf nɔ bin mared. I kɔntinyu fɔ pe atɛnshɔn pan di wok we i bin gɛt. Jizɔs nɔ ɛva tich se na bay fos fɔ mek pɔsin mared ɔ nɔ fɔ mared. Bɔt i bin se sɔm Kristian dɛn go disayd nɔ fɔ mared. (Mat. 19:​11, 12) Jizɔs bin rɛspɛkt di wan dɛn we nɔ mared. I nɔ ɛva si dɛn as pipul dɛn we nɔ impɔtant ɔ pipul dɛn we de mis sɔntin na dɛn layf.

8. Frɔm wetin de na 1 Kɔrintians 7:​7-9, wetin Pɔl bin ɛnkɔrej Kristian dɛn fɔ tink bɔt?

⁸ Lɛk Jizɔs, apɔsul Pɔl insɛf nɔ bin mared we i de du di prichin wok. Pɔl nɔ ɛva tich se i bad fɔ mek Kristian mared. I bin no se dat na tin we pɔsin fɔ disayd fɔ insɛf. Bɔt stil, Pɔl bin ɛnkɔrej Kristian dɛn fɔ tink if dɛn go ebul fɔ sav Jiova dɛn nɔ mared. (Rid 1 Kɔrintians 7:​7-9.) Pɔl nɔ bin tink se Kristian dɛn we mared bɛtɛ pas di wan dɛn we nɔ mared. Infakt, i bin pik yɔŋ Timoti we nɔ mared, fɔ du impɔtant wok dɛn. * (Fil. 2:​19-22) Dis sho klia wan se i nɔ go fayn fɔ mek wi tink se bikɔs pɔsin mared dat mek i kwalifay fɔ du sɔntin ɔ bikɔs i nɔ mared dat mek i nɔ kwalifay bɛtɛ fɔ du sɔntin.—1 Kɔr. 7:​32-35, 38.

9. Wetin wi go se bɔt fɔ mared ɔ nɔ fɔ mared?

⁹ Jizɔs ɛn Pɔl nɔ bin tich se Kristian dɛn fɔ mared ɔ dɛn nɔ fɔ mared. So wetin wi go se bɔt fɔ mared ɔ nɔ fɔ mared? Di Ɔktoba 1, 2012, Wachtawa bin se: “Fɔ tru, [if pɔsin mared ɔ i nɔ mared] ɔl tu na gift frɔm Gɔd. . . . Jiova nɔ de fil se pɔsin fɔ shem ɔ in at fɔ pwɛl bikɔs i nɔ mared.” Dis de mek wi mɛmba se wi fɔ rɛspɛkt di wok we di wan dɛn we nɔ mared de du na di kɔngrigeshɔn.

10. Aw wi go sho se wi rɛspɛkt wi brɔda ɛn sista dɛn we nɔ mared?

¹⁰ Aw wi go sho se wi rɛspɛkt di we aw wi brɔda ɛn sista dɛn we nɔ mared de fil ɛn di tin dɛn we de apin to dɛn? Wi fɔ mɛmba se sɔm Kristian dɛn dɔn mek am dɛn gol se dɛn nɔ go ɛva mared. Ɔda Kristian dɛn we nɔ mared go want fɔ mared, bɔt dɛn nɔ fɛn di rayt pɔsin yet. Sɔm ɔda wan dɛn man ɔ wɛf dɔn day. Ilɛk wetin mek dɛn nɔ mared, yu tink se wi fɔ bigin de aks dɛn wetin mek dɛn nɔ mared ɔ ɛp dɛn fɔ fɛn pɔsin fɔ mared?  Na tru se sɔm Kristian dɛn we nɔ mared kin aks fɔ mek dɛn ɛp am fɔ fɛn pɔsin fɔ mared. Bɔt if dɛn nɔ aks yu fɔ du dat, aw yu tink se dɛn go fil if yu tɛl dɛn se yu want fɔ fɛn pɔsin fɔ dɛn? (1 Tɛs. 4:​11; 1 Tim. 5:​13) Lɛ wi si wetin sɔm fetful brɔda ɛn sista dɛn we nɔ mared bin tɔk.

11-12. Wetin wi go du we go mek di wan dɛn we nɔ mared fil bad?

¹¹ Wan sakit ovasia we nɔ mared de du in wok fayn fayn wan, ɛn i tɔk se bɔku bɛnifit de we pɔsin nɔ mared. Bɔt i bin tɔk bak se i kin fil bad we brɔda ɛn sista dɛn we nɔ kin min bad de aks am se: “Wetin mek yu nɔ mared?” Wan brɔda we nɔ mared we de wok na wan branch ɔfis bin tɔk se: “Sɔntɛnde, a kin si se sɔm brɔda ɛn sista dɛn kin sɔri fɔ di wan dɛn we nɔ mared. Bifo dɛn si am as gift, dɛn kin mek i tan lɛk se if pɔsin nɔ mared i dɔn lɔsis.”

¹² Wan sista we nɔ mared we de wok na Bɛtɛl bin se: “Sɔm pɔblisha dɛn kin fil se ɔlman we nɔ mared de fɛn pɔsin fɔ mared ɔ we dɛn kin de usay pipul dɛn bɔku, dɛn kin yuz dat as chans fɔ fɛn pɔsin fɔ mared. Wan tɛm we a bin go du mi Bɛtɛl wok na wan ɔda pat na di kɔntri, dɛn bin gɛt mitin di de we a rich. Di sista we a bin lɔj to bin tɛl mi se tu brɔda dɛn de na di kɔngrigeshɔn we na mi ej grup. I tɛl mi se nɔto man i de tray fɔ fɛn fɔ mi. Bɔt as wi rich insay di Kiŋdɔm Ɔl, nain i go wit mi usay di tu brɔda dɛn de. Dat bin mek mi ɛn di brɔda dɛn rili shem.”

13. Udat in ɛgzampul dɛn bin ɛnkɔrej wan sista we nɔ mared?

¹³ Wan ɔda sista we nɔ mared we de wok na Bɛtɛl bin tɔk se: “A sabi payɔnia dɛn we nɔ mared we de pe atɛnshɔn pan dɛn wok, dɛn rɛdi fɔ ɛp ɔda pipul dɛn, dɛn gladi, dɛn de du tin fayn, ɛn dɛn de rili ɛp na di kɔngrigeshɔn. Dɛn de tink di rayt we bɔt dɛnsɛf. Dɛn nɔ de tink se dɛn bɛtɛ pas ɔda pipul dɛn bikɔs dɛn nɔ mared ɔ dɛn nɔ gɛt gladi-at bikɔs dɛn nɔ gɛt man ɔ wɛf ɛn dɛn nɔ bɔn pikin dɛn.” Na dat mek i rili fayn fɔ de na kɔngrigeshɔn usay ɔlman rɛspɛkt ɛn valyu in kɔmpin. I fayn bikɔs yu no se yu brɔda ɛn sista dɛn nɔ de sɔri fɔ yu ɔ jɛlɔs yu. Dɔn bak, dɛn nɔ de trit yu lɛk se yu nɔ impɔtant ɛn dɛn nɔ de tink se yu bɛtɛ pas dɛn. Yu jɔs no se dɛn lɛk yu.

14. Aw wi go sho se wi rɛspɛkt di wan dɛn we nɔ mared?

¹⁴ Wi brɔda ɛn sista dɛn we nɔ mared go gladi if wi valyu dɛn bikɔs ɔf dɛn fayn kwaliti dɛn, nɔto bikɔs dɛn nɔ mared. Bifo wi sɔri fɔ dɛn, wi fɔ sho se wi gladi fɔ we dɛn fetful. If wi du dat, dɛn wi brɔda ɛn sista dɛn ya nɔ go ɛva fil se wi de tɛl dɛn se: “A nɔ nid yu.” (1 Kɔr. 12:​21) Bifo dat, wi go sho se wi rɛspɛkt dɛn ɛn wi valyu dɛn wok na di kɔngrigeshɔn.

15. Us chenj dɛn sɔm brɔda ɛn sista dɛn dɔn mek fɔ lɛ dɛn du mɔ na di prichin wok?

¹⁵ Dis biɛn tɛm, bɔku brɔda ɛn sista dɛn dɔn mek am dɛn gol fɔ lan ɔda langwej so dat dɛn go du mɔ na di prichin wok. Dɛn nid fɔ chenj bɔku tin dɛn fɔ lɛ dɛn ebul fɔ du dat. Dɛn brɔda ɛn sista dɛn ya dɔn lɛf dɛn kɔngrigeshɔn usay dɛn de tɔk dɛn yon langwej fɔ go na kɔngrigeshɔn usay dɛn de tɔk ɔda  langwej. Dɛn kin du dis bikɔs dɛn want fɔ go na say usay dɛn nid mɔ pipul dɛn fɔ prich. (Akt 16:​9) Na dɛnsɛf sɛf kin disayd fɔ du mɔ fɔ sav Jiova. Pan ɔl we i kin te bifo dɛn sabi tɔk di nyu langwej fayn fayn wan, dɛn kin ɛp di kɔngrigeshɔn pan bɔku tin dɛn. Dɛn fayn kwaliti ɛn ɛkspiriɛns de ɛp di brɔda ɛn sista dɛn na di kɔngrigeshɔn. Wi rili valyu dɛn wi brɔda ɛn sista dɛn ya we de put wetin ɔda pipul dɛn want bifo dɛn yon.

16. Wetin ɛlda dɛn fɔ yuz fɔ chɛk if brɔda kwalifay fɔ bi ɛlda ɔ ministerial savant?

¹⁶ Di ɛlda dɛn na di kɔngrigeshɔn nɔ fɔ se bikɔs brɔda nɔ sabi tɔk di langwej fayn fayn wan, i nɔ fɔ bi ɛlda ɔ ministerial savant. Di ɛlda dɛn fɔ yuz wetin di Baybul se go mek pɔsin fit fɔ bi ɛlda ɔ ministerial savant, nɔto bikɔs i nɔ sabi tɔk di langwej na di kɔngrigeshɔn.—1 Tim. 3:​1-10, 12, 13; Taytɔs 1:​5-9.

17. Us kwɛstyɔn dɛn we sɔm famili dɛn fɔ aks dɛnsɛf we dɛn muf go ɔda kɔntri?

¹⁷ Sɔm Kristian famili dɛn dɔn muf go na ɔda kɔntri as rɛfyuji ɔ fɔ fɛn wok. We dɛn pikin dɛn kin go skul, sɔntɛm na di men langwej na di kɔntri na in dɛn kin tich dɛn. I go bi se di mama ɛn papa dɛnsɛf go nid fɔ lan di men langwej na di kɔntri so dat dɛn go ebul fɔ fɛn wok. Wetin dɛn go du if dɛn gɛt kɔngrigeshɔn ɔ grup na da kɔntri de we de tɔk dɛn yon langwej? Us kɔngrigeshɔn di famili fɔ atɛnd? Fɔ se na di kɔngrigeshɔn usay dɛn de tɔk di men langwej na di kɔntri ɔ na di kɔngrigeshɔn usay dɛn de tɔk di famili dɛn yon langwej?

18. Frɔm wetin de na Galeshians 6:​5, aw wi go sho se wi rɛspɛkt wetin di wan we de oba in famili disayd?

¹⁸ Di wan we de oba di famili fɔ disayd us kɔngrigeshɔn in famili go atɛnd. So i fɔ tink bɔt wetin go bɛnifit in famili. (Rid Galeshians 6:​5.) Bikɔs dis na tin we pɔsin fɔ disayd fɔ insɛf, wi fɔ rɛspɛkt wetin di pɔsin disayd fɔ du. Ilɛk wetin di wan we de oba in famili disayd fɔ du, lɛ wi sho se wi gladi fɔ dɛn bay we wi go wɛlkɔm di famili ɛn sho se wi valyu dɛn na wi kɔngrigeshɔn.—Rom. 15:​7.

19. Wetin di wan dɛn we de oba dɛn famili fɔ tek tɛm tink ɛn pre bɔt?

¹⁹ Ɔda famili dɛn kin de na kɔngrigeshɔn usay dɛn de tɔk di mama ɛn papa dɛn langwej, bɔt i go bi se di pikin dɛn nɔ sabi di langwej fayn fayn wan. If di kɔngrigeshɔn de usay dɛn de tɔk di men langwej na di kɔntri, i go bi se di pikin dɛn de stren fɔ ɔndastand na mitin, ɛn dat go mek dɛn nɔ go bifo pan Gɔd biznɛs. Wetin mek? Bikɔs i go bi se di pikin dɛn de go skul usay dɛn de tɔk di men langwej na di kɔntri, ɛn nɔto di  langwej we dɛn mama ɛn papa de tɔk. We dis kayn tin apin, di wan we de oba di famili fɔ tink gud wan ɛn pre fɔ lɛ Jiova gi am sɛns so dat i go no wetin fɔ du fɔ ɛp di pikin dɛn fɔ kam nia Jiova ɛn in pipul dɛn. Sɔntɛm di mama ɛn papa dɛn go nid fɔ tich dɛn pikin dɛn aw fɔ tɔk dɛn langwej fayn ɔ dɛn go nid fɔ go na kɔngrigeshɔn usay dɛn de tɔk di langwej we di pikin dɛn de ɔndastand fayn fayn wan. Ilɛk wetin di wan we de oba di famili go disayd fɔ du, di wan dɛn we de na di kɔngrigeshɔn we i disayd fɔ go fɔ mek in ɛn in famili no se dɛn rɛspɛkt ɛn valyu dɛn.

20. Aw wi go sho se wi rɛspɛkt wi brɔda ɛn sista dɛn we de lan nyu langwej?

²⁰ Wi dɔn tɔk bɔt difrɛn rizin dɛn we kin mek sɔm brɔda ɛn sista dɛn go na ɔda kɔngrigeshɔn. So bɔku kɔngrigeshɔn dɛn gɛt brɔda ɛn sista dɛn we de tray tranga wan fɔ lan nyu langwej. I nɔ kin izi fɔ lɛ dɛn tɔk ɔl wetin de na dɛn at. Bɔt if wi nɔ pe atɛnshɔn to di we aw dɛn de tɔk wi langwej, wi go si se dɛn lɛk Jiova ɛn dɛn rili want fɔ sav am. If wi de notis di fayn kwaliti dɛn we dɛn gɛt, dat go mek wi rili valyu ɛn rɛspɛkt dɛn brɔda ɛn sista dɛn ya. Wi nɔ go tɛl dɛn se “a nɔ nid yu” jɔs bikɔs dɛn nɔ de tɔk wi langwej fayn fayn wan.

21-22. Us big big ɔnɔ wi gɛt?

²¹ Na big big ɔnɔ wi gɛt fɔ wok insay Jiova in kɔngrigeshɔn. Ilɛk wi na man ɔ uman, wi mared ɔ wi nɔ mared, wi yɔŋ ɔ wi ol, wi sabi tɔk wan langwej fayn ɔ wi nɔ sabi, wi ɔl gɛt valyu to Jiova ɛn wi kɔmpin Kristian dɛn.—Rom. 12:​4, 5; Kol. 3:​10, 11.

²² Lɛ wi kɔntinyu fɔ fala di fayn lɛsin dɛn we wi dɔn lan frɔm di ɛgzampul we Pɔl bin yuz bɔt mɔtalman bɔdi. Dis go mek wi kɔntinyu fɔ luk fɔ we dɛn fɔ sho se wi valyu wi wok ɛn di wok we ɔda brɔda ɛn sista dɛn de du na Jiova in kɔngrigeshɔn.