1. Sininke musinke ga pa Jehova vakareli vendi wovalimburukwi?

JEHOVA kwa pulisira vakareli vendi navenye va kare mombungakriste. Nampili ngomu atu rugana yitumbukira yokulisiga-siga mombungakriste, natuvenye mulyo kwendi. Mupositoli Paurusa kwa tumbwire sininke somulyo esi nasi tu vatera tu kwate egano sitwa oso.

2. Kuliza noVaefeso 4:16, morwasinke natu tarera wopeke asi mulyo ntani nokuruganena kumwe nawo?

² Etjangwa omu sina demenene siparatjangwa setu, Paurusa kwa nkondopekere asi kwato gumwe gwetu ogu nauyunga asi: “Ame kapi nina mu hepa.” (1 Kol. 12:21) Nsene tuna hara mombungakriste mu kare mbili, twa hepa kutara nkenye gumwe asi mulyo ntani nokuruganena kumwe. (Resa Vaefeso 4:16.) Nsene tu ruganena kumwe, ayo nga yi ninkisa mbungakriste zi kure meharo ntani zi nkondopare.

3. Yisinke natu ka zogera mosirongwa esi?

³ Mononkedi musinke dimwe omu natu likida efumadeko kwava womombungakriste? Mosirongwa esi na tu ka zogera omu vakuronambunga nava likida asi awo va fumadeka vakuronambunga vakwawo. Ntani natu ka zogera omu natu vhura kufumadeka vadike. Ntani natu ka lironga omu natu likida efumadeko kwava ava dili kuuyunga eraka lyetu nawa.

4. Epukururo musinke ga geve Paurusa eli lya kara moVaroma 12:10, eli nava kwama vakuronambunga?

⁴ Vakuronambunga navenye kuvahorowora mpepo zaJehova. Nye navenye va kara noyitumbukira yokulisiga-siga. (1 Kol. 12:17, 18) Vamwe nampo ntani tupu ka va va horowere ntani kapi va kara noudivi ngwendi vakuronambunga vakwawo. Ano vamwe nampo kapi ava rugana yirugana yoyinzi morwa ukurupe ndi kuvera-vera. Nye nampili ngoso, kwato mukuronambunga ogu na tantera mukuronambunga mukwawo asi “Ame kapi nina mu hepa.” Nkenye mukuronambunga ga hepa kukwama epukururo eli lya kara moVaroma 12:10.—Resa.

5. Ngapi omu vakuronambunga nava likida efumadeko kovakwawo, ntani morwasinke ya karera nomulyo?

⁵ Vakuronambunga kulikida asi va fumadeka vakwawo pokuvapurakena. Unene po, apa ava kara nepongo lyovakuronambunga nsene kuna kuzogera yininke yomulyo unene. Morwasinke? Ruhungu romo-1 Sikukutu 1988, kwa uyungire asi: “Vakuronambunga va yi dimburura asi Jesus kuruganesa mpepo zokupongoka, yipo zi va vatere va gazadare nompango domoBibeli edi nadi va vatera mwankenye ukaro ndi nsene kwa kutulisa po matokoro gomulyo. (Yirug. 15:6-15) Mpepo zokupongoka kuvatera vakuronambunga navenye, nye kapisi gumwe tupu.”

6. Ngapi omu nava ruganena kumwe vakuronambunga ntani ngapi womombungakriste nava gwanena mo mauwa?

⁶ Mukuronambunga ogu ga fumadeka vakwawo, age kuvapulisira va hove kuuyunga apa ava kara nomapongo gawo. Age kapi a uyunga unene ntani kapi a tara magano gendi asi mulyo kupita govakwawo. Nye age kugava magano gendi monkedi zelinunupiko. Age kupurakena nawa komagano govakwawo. Unene po, age kuruganesa magano gomoBibeli ntani gokutunda “komukareli gokulimburukwa gonondunge.” (Mat. 24:45-47) Apa vakuronambunga ava zogere kumwe neharo  ntani nokulifumadeka, mpepo zokupongoka kukara kumwe nawo ntani kuvavatera yipo va vhure kutulisa po matokoro gomawa.—Jak. 3:17, 18.

7. Ngapi omu Jesus ga tere vantu ava va dilire kukwara?

⁷ Mombungakriste mwa kara valikwali ntani mapata. Nye simpe mwa kara vanavazinyetu ava va dira kukwara. Ngapi omu natu tara ava va dira kukwara? Twa hepa kuhonena omu Jesus ga tere vantu ava va dilire kukwara. Apa Jesus ga kere pevhu, age kapi ga kwere. Age kwa kere mudike ntani kwa demenenene kosirugana sendi. Jesus kapi ga rongere asi Vakriste va hepa kukwara ndi va kare ngorooro vadike. Nye age kwa uyungire asi Vakriste vamwe kutokora kudira kukwara. (Mat. 19:11, 12) Jesus ga fumadekere vantu ava va dilire kukwara. Age kapi ga va mwene asi awo kwato mulyo ndi a gazare asi koyili yininke yimwe eyi ya va ninkisire va dire kukwara.

8. Kuliza no-1 Vakolinte 7:7-9, yisinke Paurusa ga korangedere Vakriste?

⁸ Ngwendi Jesus, Paurusa nage kwa rugene sirugana sendi ngomudike. Paurusa kapi ga rongere asi ayo epuko koMukriste mokukwara. Age ga yi dimbwilire asi alyo kwa kere etokoro lyankenye muntu. Nye nampili ngoso, Paurusa kapi ga uyungire asi muntu ga hepa kukara mudike ntani na vhura kukarera Jehova. (Resa 1 Vakolinte 7:7-9.) Paurusa kapi ga tere vantu wokudira kukwara asi kwato mulyo. Paurusa kwa horowere mudinkantu Timoteusa ogu ga kere mudike, yipo a rugane sirugana somulyo mosirugana saJehova. * (Fil. 2:19-22) Yosili, ayo epuko kugazara asi muntu mokugwana situmbukira ga hepa kukwara ndi kukara mudike.—1 Kol. 7:32-35, 38.

9. Ngapi natu tara nonkwara noudike?

⁹ Paurusa naJesus kapi va rongere asi Mukriste ga hepa kukwara ndi a kare mudike. Ngapi nye natu tara nonkwara noudike? Ruhungu romo-1 Sikukutu 2012, kwa uyungire asi: “Udike nononkwara nayinye uhwi wokutunda kwaJehova. Jehova kapi a tara udike asi sininke seswau.” Yipo nye, twa hepa kufumadeka vanavazinyetu wovadike.

10. Ngapi natu likida efumadeko kovanavazinyetu ava va dira kukwara?

¹⁰ Ngapi natu likida efumadeko komalizuvho  nokomaukaro govanavazinyetu ava va dira kukwara? Twa hepa kudiva asi vanavazinyetu vamwe nyamwawo va tokora kudira kukwara. Ano vamwe kwa hara kukwara, nye kapi va gwana mulikwali gokuwapera. Ntani vamwe kwa zumbanesa vahali vawo monomfa. Yi kare asi moukaro musinke, womombungakriste kapi ta va vhuru ku pura vadike konda zeyi va dilira kukwara ndi asi va va peko magano yipo va gwane mulikwali gokuwapera. Nampili ngoso, vamwe kuvhura va pure evatero lyangoso. Nye nsene kapi vana pura evatero lyangoso, ngapi omu na yi vhura kuvakundama? (1 Tes. 4:11; 1 Tim. 5:13) Tu zeni tu ka zogere ko eyi va uyunga ko vanavazinyetu vamwe wovadike.

11-12. Yininke musinke yimwe eyi atu rugana eyi ayi dompesa vadike?

¹¹ Mutareli gumwe gomudike ogu a rugana nawa mosirugana sendi kulizuvha asi mauwa manzi ga kara mo moudike. Nye age kwa uyunga hena asi ayo kumudompesa apa vanavazinyetu ava mu pura asi: “Morwasinke wa dilira kukwara?” Munazinyetu gomudike ogu a rugana koBeteli kwa tanta asi: “Poyiruwo yimwe, vanavazinyetu kugazara asi vadike kuna kuhepa unene. Eyi kuninkisa udike u moneke ngwendi kapisi uhwi.”

¹² Munazinyetukadi gomudike ogu a rugana koBeteli kwa tanta asi: “Vanavazinyetu vamwe kugazara asi vadike navenye kuna kupapara mulikwali ntani awo kugazara asi apa vadike ava kara ponopati, awo kupapara valikwali. Sikando simwe apa va tumine nge noyirugana yokoBeteli kosirongo simwe, ame kwa ka gwene vanavazinyetu kuna kurugana epongo kongurova. Munazinyetukadi ogu na ka tungire nage kwa tanterere nge asi pwa kere vanavazinyetugara vavali womombungakriste ava va kere pepupi lyange. Nye age kwa tanterere nge asi sitambo sendi eyi ga yi ruganenene kapisi asi a paparere nge mulikwali. Tupu twa ka sikire moSinyanga age kwa twere nge kovanavazinyetugara owo vavali. Yosili, name novanavazinyetugara owo vavali kwa li zuvhire eswau lyenene.”

13. Yihonena musinke ya korangedere munazinyetukadi gomudike?

¹³ Munazinyetukadi gomudike ogu a rugana moBeteli kwa tanta asi: “Ame nadiva vazuvhisi wokukarerera wovadike ava ava demenene koyitambo yawo ntani va kara neharo lyokuvatera wopeke, ntani awo kwa kara noruhafo, awo kuvatera sili vapuli vakwawo mombungakriste. Awo va kara nomutaro gomuwa koudike ntani kapi ava lizuvhu asi awo mulyo yeeyi va kara vadike ndi va li zuvhe asi kapi tava vhuru kuhafa yeeyi va dira kukwara nokukara novana. Aso sininke sili sosiwa mokukara mombungakriste omu mwa kara vantu ava ava lifumadeke-fumadeke ntani nokulitara asi nkenye gumwe mulyo. Aso sininke sosiwa pokudiva asi vanavazinyetu kapi ava kuzuvhire mfudu ntani kapi ava gazara asi, ove mulyo kupitakana awo.

14. Ngapi natu likida efumadeko kovadike?

¹⁴ Vanavazinyetu awo ngava hafa nsene tu va pandadeka koyikara yawo yoyiwa. Mevango lyokuvagazarera asi kuna kuhepa, twa hepa kuvapandura koyirugana yawo yoyiwa. Ngoyitundwamo, vanavazinyetu owo wovadike kapi ngava lizuvha asi: “kapi tuna va hepa.” (1 Kol. 12:21) Awo ngava lizuvha asi twa va fumadeka ntani ose kuhafera yirugana yawo, ntani awo mulyo mombungakriste.

15. Malizambero musinke va tura po vamwe yipo va tamunune sirugana sawo sokuzuvhisa?

¹⁵ Monomvhura edi dantani, vazuvhisi wovanzi kwa litulira po sitambo va lironge eraka  lyapeke, yipo va tamunune sirugana sawo sokuzuvhisa. Pokuyirugana oyo, awo kwa tura po malizambero. Vanavazinyetu owo kwa siga nombungakriste omu ava uyunga maraka gawo, yipo va ze monombungakriste edi adi uyunga maraka gapeke oku vana hepa vazuvhisi. (Yirug. 16:9). Alyo kuna kara etokoro lyankenye gumwe nsene ana hara kukarera Jehova momunene. Nampili yi guse nomvhura dononzi mokudiva nawa eraka, awo kuvatera unene nombungakriste. Yikara yawo yoyiwa kuvatera womombungakriste va nkondopare. Ose twa hara vanavazinyetu owo!

16. Yisinke va hepa kutara vakuronambunga nsene tava horowora munazinyetu gumwe a kare mukuronambunga ndi mukwafimbunga?

¹⁶ Vakuronambunga kapi tava vhuru kutokora asi munazinyetu gongandi kapi ta kara mukuronambunga ndi mukwafimbunga morwa yeeyi ga dira kudiva nawa eraka. Nye va hepa kutokora kuliza nomagano gomoBibeli, mevango lyokutokora kuliza nomu ga diva eraka muntu ogo.—1 Tim. 3:1-10, 12, 13; Tit. 1:5-9.

17. Mapuro musinke va hepa kulipura vakondi nsene vana dirukire kosirongo sapeke?

¹⁷ Mapata gamwe kwa dirukira kosirongo sapeke morwa kwa tjwayuka ndi yipo va ka papare yirugana. Ngoyitundwamo, vana vawo kukatameka kuza kosure meraka eli ava uyunga mosirongo oso sosipe. Vakurona nawo kulironga eraka lyomosirongo oso yipo va gwane yirugana. Ngapi nsene mosirongo oso mwa kara mbungakriste ndi kambungagona kemeraka lyawo? Mombungakriste musinke nava vhura kukapongera? Ngoso kuvhura va pongere mombungakriste ezi azi ruganesa eraka lyomosirongo oso va dirukira ndi tava pongere mombungakriste zemeraka lyawo?

18. Kuliza noVagarata 6:5, ngapi natu likida efumadeko ketokoro eli aga tura po mapata?

¹⁸ Nturagumbo ga hepa kutokora asi mbungakriste musinke na li pongera epata lyendi. Eli kuna kara etokoro lya nkenye gumwe, nye ga hepa kutokora asi yipi yomulyo po kepata lyendi. (Resa Vagarata 6:5.) Twa hepa kulikida efumadeko komatokoro aga a tura po nturagumbo. Twa hepa kutambura nkenye matokoro aga nava tura po ntani noku va tara asi awo mulyo mombungakriste.—Rom. 15:7.

19. Yisinke va hepa kutarurura vanturagumbo?

¹⁹ Mapata gamwe kupongera mombungakriste ezi ava uyunga eraka lyawo, nye vanona nampo kapi va diva nawa eraka lyovakondi vawo. Eyi kuvhura yi digopere vanona kukwata egano eyi ava uyunga kepongo ntani kapi ta va tura po ezokomeho. Morwasinke? Morwa vanona kudimbira kosure ezi ava ruganesa eraka lyapeke, lya hana asi lyovakondi vawo. Momaukaro gangoso, nturagumbo ga hepa kugazadara ko nawa eyi na vhura kurugana yipo a vatere vana vendi va nkondopeke  elikwatakano lyawo naJehova ntani nombunga zendi. Age ga hepa kutokora nsene asi ta vatere vana vendi yipo va dive nawa eraka lyawo ndi tava dirukire kombungakriste zeraka eli ava zuvhu nawa vana vendi. Yi kare asi etokoro musinke na tulisa po, vanavazinyetu ava va kara mombungakriste ezi vana dirukire va hepa kufumadeka epata olyo ntani nokuvamona asi awo mulyo kombungakriste.

20. Ngapi natu likida asi twa fumadeka vanavazinyetu ava vana kulironga eraka lyapeke?

²⁰ Kugusa ko nokonda odo tuna zogere, monombungakriste dononzi mwa kara vanavazinyetu ava vana kukondja kulironga eraka lyapeke. Kuvhura yiva karere udigu kututantera omu vana kulizuvha. Kapisi tu demenene monkedi omu ava uyunga eraka olyo vana kulironga. Nsene tu yi rugana ngoso, ose ngatu dimburura asi awo va hara Jehova ntani va hara kumukarera. Nsene tu dimburura yikara yawo yoyiwa ayo ngayi tu ninkisa tu va hare ntani nokuvafumadeka. Ose kapi ngatu uyunga asi: “kapi tuna mu hepa”, morwa asi yeeyi ava dili kuuyunga eraka lyetu nawa.

21-22. Situmbukira musinke twa kara naso?

²¹ Tatu pandura Jehova kweyi ga tu pa situmbukira sokukara mombungakriste. Yi kare asi tu vagara ndi vakadi, twa kwara ndi kapi twa kwara, tuvanona ndi tuvakondi, kuuyunga eraka lyongandi nawa ndi hawe, natuvenye mulyo kwaJehova ntani kovakwetu.—Rom. 12:4, 5; Koros. 3:10, 11.

²² Tu twikireni kutura pasirugana eyi tuna lirongo mosifanekeso saPaurusa sokuhamena rutu romuntu. Monkedi ozo, ayo nga yi tu vatera tu dive omu ngatu korangeda vanavazinyetu ntani ayo nga yi tu vatera tu va hare ntani nokuvafumadeka.