1. Adieyi Yave kazolele kwa konso selo kiandi kiakwikizi?

YAVE ozolele vo konso selo kiandi kiakwikizi kakala muna nkutakani andi. Kana una vo salu yaswaswana tusalanga muna nkutakani, yeto awonso mfunu twina ye tuzolele songa vo tuvuanga mpe akaka o mfunu. Paulu wa ntumwa watusadisa mu bakula e diambu diadi diamfunu. Mu nkia mpila?

2. Mun’owu wa sono kia Efeso 4:16, ekuma tufwete vuilanga akaka o mfunu yo sala yau kumosi?

² Nze una wasonama muna sono kibongelo e longi diadi, Paulu watoma dio kiesesa vo ke vena muntu ko olenda tala selo kiankaka kia Yave yo vova vo: “Kivuidi mfunu ko.” (1 Kor. 12:21) Avo tuzolele vo e nkutakani yakala mu luvuvamu, tufwete vuanga akaka o mfunu yo sala yau kumosi. (Tanga Efeso 4:16.) Vava tusalanga kumosi kuna ungudi, e nkutakani ikumamanga yo siamisa o zola.

3. Adieyi tuvovela mu longi diadi?

³ Aweyi tulenda songela vo tuzitisanga Akristu ankaka muna nkutakani? Mu longi diadi, tubadika una akuluntu balenda songela vo bezitisanga akwau akuluntu. I bosi, tuvovela una yeto awonso tulenda songela vo tuzitisanga e mpangi zeto ana bena vo ampumpa. Kuna mfoko, tuvovela una tulenda songela vo tuzitisanga awana ke betoma vovanga e nding’eto ko.

4. Nkia luludiku lwa Paulu lwasonama muna Roma 12:10 bafwete lemvokelanga akuluntu?

⁴ Akuluntu awonso a nkutakani betumbikwanga muna lusadisu lwa mwand’avelela a Yave. Kana una vo i wau, konso muntu muna yau una ye ngangu yovo tukau twaswaswana. (1 Kor. 12:17, 18) Nanga akaka muna yau ke kolo ko batumbikilu se akuluntu; muna kuma kiaki, ke bazeye mambu mayingi ko nze akuluntu ankaka. Akaka ke belendanga diaka vanga mayingi ko mu kuma kia kinunu yovo kimbevo. Kana una vo i wau, ke vena nkuluntu ko ofwete tala nkwandi nkuluntu yo vova vo: “Kivuidi mfunu ko.” Kansi, konso nkuluntu kafwete lemvokelanga o luludiku lwa Paulu luna lwasonama muna Roma 12:10.—Tanga.

5. Aweyi akuluntu balenda songela vo bezitisanga akwau akuluntu? Ekuma dinina diamfunu mu vanga wo?

⁵ Akuluntu besonganga vo bezitisanga akwau akuluntu vava betoma kubawinikinanga. Ediadi diamfunu kikilu musungula vava akuluntu a nkutakani bekutakananga mu fimpa mambu mamfunu. Ekuma? Tala dina divovanga Eyingidilu dia 1 Okutoba, 1988 mu Kingelezo: “Akuluntu bazeye wo vo Yesu olenda sadila mwand’avelela mu fila konso nkuluntu muna nkutakani mu yika e nkanikinu wa Bibila ulenda sadisa akuluntu mu zaya dina bafwete vanga mu konso diambu yovo muna baka nzengo zamfunu. (Mav. 15:6-15) Mwand’avelela ke usadisanga kaka nkuluntu mosi ko, kansi akuluntu awonso.”

6. Aweyi akuluntu balenda sadila kumosi kuna ungudi? Nkia nluta bevuanga ampangi muna nkutakani vava akuluntu bevanganga wo?

⁶ O nkuluntu ona ozitisanga akwandi, ke ntangwa zawonso ko kekalanga se muntu antete ovovanga muna lukutakanu lwa akuluntu. Ke yandi kaka ko ovovanga muna lukutakanu lwau ngatu yindula vo yandi kaka okalanga ye ngindu zambote. Kansi, osonganga e ngindu zandi kuna lulembamu lwawonso. Otoma winikinanga mana akwandi bevovanga. Edi disundidi o mfunu, okalanga ye tima dia songa e nkanikinu mia Bibila yo lemvokela o luludiku lwa “ntaudi akwikizi yo lulungalalu.” (Mat. 24:45-47) Vava akuluntu besonganga zola yo zitisa muntu yo nkwandi ekolo befimpanga e mambu, o mwand’avelela  a Nzambi ukala yau. O mwanda wau ukubasadisa mu baka nzengo zikumika e nkutakani.—Yak. 3:17, 18.

7. Aweyi Yesu kabadikilanga ampumpa?

⁷ O unu, muna nkutakani zawonso vena ye akazi, mase yo wana. Kansi, vena mpe ye mpangi zayingi bena vo ampumpa. Ozevo, aweyi tufwete badikilanga awana bena vo ampumpa? Yambula twavovela una Yesu kabadikilanga e kimpumpa. Ekolo Yesu kasamunanga e nsangu zambote ova ntoto, kasala sompa ko. Wakwamanana kaka mpumpa yo sia e sungididi muna salu kiandi. Yesu kasidi longa ko vo o Nkristu kafwete kaka sompa yovo lembi sompa. Kansi, edi kavova vo Akristu ankaka balenda baka e nzengo za lembi sompa. (Mat. 19:11, 12) Yesu wazitisanga ampumpa. Kayindulanga ko vo awana basompa basundidi ampumpa yovo diambu dikondelo muna zingu kiau wau vo ke basompa ko.

8. Mun’owu wa sono kia 1 Korinto 7:7-9, nkia diambu Paulu kakasakesa Akristu mu fimpa?

⁸ Nze Yesu, Paulu wa ntumwa mpe wakwamanana mpumpa ekolo kasalanga e salu kia samuna e nsangu zambote. Paulu kasidi longa ko vo diambi kwa Nkristu mu sompa. Kadi wazaya wo vo ezazi nzengo za konso muntu. Kana una vo i wau, Paulu wakasakesa Akristu kimana bafimpa kana vo balenda sadila Yave muna kimpumpa kiau. (Tanga 1 Korinto 7:7-9.) Paulu kayindulanga ko vo Akristu ana basompa basundidi Akristu ampumpa. Muna kuma kiaki, wasola nkutu nleke Timoteo ona wakala vo mpumpa mu vanga mambu mamfunu muna salu kia Yave. * (Fili. 2:19-22) Ozevo, diambi mu yindula vo mpangi kingandi wafwana kaka tambula e kiyekwa mu kuma kia sia vo wasompa yovo mpumpa.—1 Kor. 7:32-35, 38.

9. Adieyi tulenda vova mu kuma kia sompa yo lembi sompa?

⁹ Kiakala Yesu yovo Paulu, ke basidi longa ko vo o Nkristu kafwete kaka sompa yovo kwamanana mpumpa. Muna kuma kiaki, adieyi tulenda vova mu kuma kia sompa yo lembi sompa? Eyingidilu dia 1 Okutoba, 2012 mu Kimputu, divananga e mvutu za kiuvu kiaki mu mvovo emi: “Kieleka, e mambu mole mama [i sia vo, sompa yo lembi sompa] malenda yikilwa vo lukau lwa Nzambi. . . . Yave ke badikilanga e [kimpumpa] ko nze kuma kilenda fila o muntu mu fwa e nsoni yovo kendalala.” Muna kuma kiaki, tufwete zitisanga ampumpa muna nkutakani.

10. Aweyi tulenda zitisila mpangi zeto bena vo ampumpa?

 ¹⁰ Aweyi tulenda zitisila e ngindu ye mambu mankaka ma mpangi bena vo ampumpa? Tufwete sungamenanga vo akaka muna mpangi zeto bena vo ampumpa yau kibeni babaka e nzengo za lembi sompa. Akaka muna yau bazolele sompa, kansi ke basolwele ntete muntu ko balenda sompana yandi. Vena mpe ye akaka ana bafwilwa akazi au. Kiakala nkia kuma kifilanga ampangi mu kala ampumpa, nga diambote mu kubayuvula e kuma ke basompela ko? Yovo kubavavila o muntu balenda sompana yandi? Dialudi vo akaka muna mpangi bena vo ampumpa balenda lomba lusadisu lweto. Kansi avo ke balombele lusadisu ko, aweyi mpangi una vo mpumpa kemona avo mpangi ankaka umvene lusadisu muna solola muntu kesompana yandi? (1 Tes. 4:11; 1 Tim. 5:13) Owau, yambula twabadika e mambu mana mpangi bena vo ampumpa akwa kwikizi bavova.

11-12. Adieyi dilenda kendeleka ampangi bena vo ampumpa?

¹¹ Nkengi a zunga mosi una vo mpumpa ona otoma kuyivananga muna kiyekwa kiandi, omonanga vo nluta miayingi kevuanga muna kala mpumpa. Kansi wavova vo edi dikunkendelekanga i vava ampangi bekungiuvulanga ye kani diambote vo: “Ekuma kusompelanga ko?” Mpangi mosi una vo mpumpa osadilanga kuna vula wavova vo: “Ezak’e ntangwa imonanga vo mpangi zankaka beyindulanga vo bafwete fwila ampumpa e nkenda. Ediadi dilenda kutufila mu yindula vo o kala mpumpa ke lukau ko kansi zitu diampasi.”

¹² Mpangi ankento una vo mpumpa osadilanga kuna Betele wavova vo: “Mpangi zankaka beyindulanga vo ampumpa awonso bevavanga ndiona besompana yau yovo konso ntangwa bekalanga vamosi ye wantu ankaka bebadikilanga dio se lau diavava ndiona besompana yau. Lumbu kimosi vava yayenda ku zunga kiakaka muna nsi eto muna kwenda lungisa kiyekwa kiame, yayenda ku lukutakanu muna fuku. O mpangi ankento ona wantambula kuna nzo andi wanzayisa vo vena ye mpangi zole zamakala bena vo ampumpa muna nkutakani ana twakala ntela mosi. O mpangi ndioyo ankento wanzayisa mpe vo kavavanga kunsadisa ko mu solola e yakala ndenda sompana yandi. Kansi, vava twakota muna Seka dia Kintinu, wandata vana vakala e mpangi zole zazi kimana twazayana. Ke twazaya ko dina tuvova, kadi yeto ntatu twakala e pi-i.”

13. Nki kikasakesanga mpangi mosi ankento una vo mpumpa?

¹³ Mpangi ankaka ankento una vo mpumpa ona osadilanga kuna Betele wavova vo: “Nzeye aviti a nzila bena vo ampumpa, ana betoma kukivananga muna salu yau, bena ye makani masikididi, bezolanga sadisa akaka ye beyangalelanga e salu yau. Betoma sadisanga ampangi muna nkutakani. Bekalanga ye ngindu zasikila mu kuma kia kimpumpa. Ke beyindulanga ko vo yau basundidi akaka wau vo bakinu ampumpa ngatu yindula vo ke balendi kala ye kiese ko wau vo ke bena ye akazi ko ngatu wana.” Ekiaki i kuma dikadilanga diakiese muna nkutakani vava o wantu awonso bezitisanga akaka yo kubavua o mfunu. Kadi ozeye wo vo ampangi ke bekufwilanga nkenda ko yovo kumwena e kimpala, ke bekuvezanga ko ngatu yindula vo ongeye ubasundidi. Kansi, ozeye wo vo ampangi zola bekuzolanga.

14. Aweyi tulenda songela vo tuzitisanga ampangi bena vo ampumpa?

¹⁴ Mpangi zeto bena vo ampumpa bekala ye kiese avo tubazitisi mu kuma kia fu yau yambote ke mu kuma kia sia ko vo ampumpa. Vana fulu kia kubafwila e nkenda mu  kuma kia kimpumpa kiau, tufwete kubayangalelanga mu kuma kia kwikizi kiau. Avo tuvangidi wo, mpangi zeto bena vo ampumpa ke besinga mona ko nze yeto tukubavovesanga vo: “Kinuvuidi mfunu ko.” (1 Kor. 12:21) Kansi, bezaya wo vo tukubazitisanga ye tukalanga ye kiese kia kala yau kumosi muna nkutakani.

15. Nkia nzengo ateleki ayingi bebakanga muna sayanesa e salu kia samuna e nsangu zambote?

¹⁵ Mu mvu miaviokele, ateleki ayingi bayisila e kani dia longoka e ndinga yankaka muna sayanesa e salu kia samuna e nsangu zambote. Muna lungisa e kani diadi, diavava vo bavanga e nsobani muna zingu kiau. E mpangi zazi basisa e nkutakani zina zisadilanga e ndinga zau za kingutukila yo kwenda sadila muna nkutakani zisadilanga e ndinga zankaka ye zina zivuidi ateleki ayingi a Kintinu o mfunu. (Mav. 16:9) Ezazi i nzengo ateleki awaya babaka muna sadila Yave una ufwene. Kana una vo mvu miayingi miviokanga muna toma vova e ndinga yampa, besadisanga e nkutakani mu mpila zayingi. E fu yau yambote ye mpila bevangilanga o mambu ikumikanga ampangi muna nkutakani. Tuyangalelanga e mpangi zazi bekuyivananga kuna mvevo wawonso.

16. Nkia diambu akuluntu bafwete fimpa vitila batumbika mpangi mosi se nkuluntu yovo selo kia salu?

¹⁶ Akuluntu ke bafwete yindula ko vo mpangi kingandi kafwanukini ko mu tumbikwa se nkuluntu yovo selo kia salu kadi ke toma vovanga e ndinga ya nkutakani ko. Akuluntu bafwete fimpa o mpangi mun’owu wa nkanikinu mia Bibila mu kuma kia dina divavuanga kwa akuluntu ye selo ya salu, ke mu kuma kia sia ko vo batomene zaya e ndinga ya nkutakani.—1 Tim. 3:1-10, 12, 13; Tito 1:5-9.

17. Nkia yuvu mase mankaka bekukiyuvulanga vava beyalukanga ku nsi yankaka?

¹⁷ Akristu ankaka bena vo mase, beyalukanga kumosi ye esi nzo zau mu kwenda zingila ku nsi yankaka se mintayila yovo muna vava e salu. Muna kuma kiaki, o wan’au bekwendanga ku sikola yo longoka e nding’a nsi yayina. Divavanga mpe vo mase balongoka e nding’a nsi yayina muna solola e salu. Adieyi mase mama balenda vanga avo vena ye nkutakani yovo buka muna nding’au ya kingutukila? Nkia nkutakani esi nzo eno bafwete lunganena? Nga nufwete kala muna nkutakani ya nding’a nsi yayina yovo muna nkutakani ya nding’eno ya kingutukila?

18. Landila e sono kia Ngalatia 6:5, aweyi tulenda zitisila e nzengo za se yovo ngudi una vo Nkristu?

¹⁸ O se yovo ngudi una vo Nkristu yandi ofwete baka e nzengo kana nkia nkutakani esi nzo andi belunganena. O se yovo ngudi kafwete badika dina disundidi o wete kwa esi nzo andi. (Tanga Ngalatia 6:5.) Wau vo e nzengo zazi za muntu yandi kibeni, tufwete zo zitisa. Kiakala nkia nzengo kabakidi o se yovo ngudi,  tufwete toma kubatambula muna nkutakani eto yo kubasonga o zola.—Roma 15:7.

19. Nkia diambu difwete fila o se yovo ngudi mu toma fimpa yo samba?

¹⁹ Kuna diak’e sambu, esi nzo zankaka nanga mu nkutakani ivovanga e ndinga ya mase mau bena, kansi o wan’au nanga ke betoma vovanga e ndinga yayi ko. Avo e nkutakani eno ina muna zunga kivovanga e ndinga a nsi ina nuzingilanga, dilenda kala diampasi kwa wana mu bakula malongi muna tukutakanu yo nungunuka muna mwanda. Ekuma? Kadi kuna sikola o wana ndinga a nsi yayina besadilanga ke nding’a mase mau ko. Avo diadi dibwidi, mase bafwete samba yo badika mana bafwete vanga muna sadisa wan’au bafinama Yave yo nkangu andi. Nanga divava vo mase basadisa wan’au batoma zaya e nding’au ya kingutukila yovo bafwete fimpa kana vo besoba muna nkutakani ina isadilanga e ndinga betoma bakulanga o wan’au. Muna kuma kiaki, kiakala nkia nzengo kebaka o se yovo ngudi una vo Nkristu, ampangi muna nkutakani ina kesola bafwete zitisa o se yovo ngudi kumosi ye esi nzo andi yo kubasonga vo mfunu bena.

20. Aweyi tulenda songela vo tuzitisanga mpangi zeto belongokanga e ndinga yampa?

²⁰ Mu kuma kia mambu mawonso tuyikidi kala, nkutakani zayingi zina ye ampangi bevanganga ngolo mu longoka ndinga yampa. Diampasi dikalanga kwa yau muna songa e ngindu zau. Kansi, vana fulu kia sia e sungididi muna mpila bevovelanga e ndinga belongokanga, diambote twasianga e sungididi muna zola kwau muna Yave ye tima bena diau dia kunsadila. Avo tusidi e sungididi muna fu yayi yambote ya mpangi zeto, tutoma kubazitisa yo songa vo mfunu tukubavuanga. Muna kuma kiaki, ke tukubavovesa ko vo: “Kinuvuidi mfunu ko” wau vo ke betoma vovanga e nding’eto ko.

21-22. Nkia lau diampwena tuna diau?

²¹ Yave watuvana lau diampwena dia kala muna nkutakani andi. Kiakala vo tu akala yovo akento, ampumpa yovo awana basompa, aleke yovo ambuta, tutoma vovanga ndinga imosi yovo ve, yeto awonso mfunu twina vana meso ma Yave ye kwa akaka.—Roma 12:4, 5; Kol. 3:10, 11.

²² Yambula twakwamanana sadila mambu mayingi mamfunu tulongokele muna nona kia yîkwa ya nitu Paulu kasadila. Ediadi dikutusadisa mu vanga mawonso tulenda muna kasakesanga mpangi zeto. Dikutusadisa mpe mu toma kubazola yo kubazitisa.