1. Nti Yehova kahana kwe muna tisari tiandi tia kwikama?

NA LUZOLO lwalwansoni Yehova wahana kwe muna tisari tiandi tia kwikama tibuka mu timvuka. Ni bu sa ti, bisalu bieto bia swaswana biena, beto bansoni ntalu twena, mpe nsatu ya mpangi zeto ye neto. Bwe ntumwa Paulo kata tu bakisila mu bakula ndongosolo yo ya mfunu?

2. Tintwari na Bisi-Efeze 4:16, mu bungu dia nti tufweti zitisilaka mpangi zeto mpe tufweti salaka tintwari?

² Mu verse ya mutu-diambu, Paulo watomo songela ti ka kwena muntu mu beto ko wulendi tâ kwe tisari tiakaka tia Yehova ti: ‘Ka ndiena naku salu ko.’ (1 Kor. 12:21) Tala ti tuzololo ti timvuka tiasala mu tidzunu, tufweti zitisaka mpangi zeto mpe tufweti salaka tintwari. (Tanga Bisi-Efeze 4:16.) Bu tusalaka tintwari mu bumosi, muna muntu mbo kamonaka luzolo mpe timvuka mbo tikwizi bâka ngolo.

3. Nti tuzonzela mu timoko ti?

³ Ngano bwe tulendi zitisila Bakristo bakaka mu timvuka? Mu timoko ti, mbo tutaluzula bwe bakuluntu balendi zitisila bakuluntu bakaka. Mpe, mbo tuzonzela bwe beto bansoni tulendi zitisila mpangi zilembolo za kwela. Ha manima, mbo tulongoka bwe tulendi zitisila bô balembo tomo zonzaka zu dieto.

4. Ntia malongi ma Paulo me mu Bisi-Rome 12:10 bakuluntu bafweti landa?

⁴ Bakuluntu babansoni ba timvuka, mu mpeve santu ya Yehova babasolelaka. Kâ, bakuluntu babansoni ka bena na lenda dimosi ko. (1 Kor. 12:17, 18) Kampe bakaka ka ntama ko bayikiri bakuluntu mpe misamu ka miamingi’â ko bazebi. Bakaka ka balendi’â bayirika misamu miamingi ko mu bungu ti ba nuna bena mpe tikolela tiawu ka tiena tia lunga ko. Kâ, ka kwena mukuluntu ko wulendi tâ kwe bakuluntu bakaka ti: ‘Ka ndiena neno salu ko.’ Kani basila bo, muna mukuluntu wufweti landa malongi ma Paulo me mu Bisi-Rome 12:10.​—Tanga.

5. Bwe bakuluntu bazitisilaka bakuluntu bakaka, mpe mu bungu dia nti we mfunu basila bo?

⁵ Bakuluntu mbo bazitisaka bakuluntu bakaka, mu ntangu yi batomo ba wirikilaka. Musamu wo nkatika mfunu wena, nsungula bu vukanaka bakuluntu mu zonzela misamu mia minene. Mu bungu dia nti? Nzo ya Zangama ya Munkengi ya 1 ngonda ya kumi ya 1988-F, yatâ ti: “Bakuluntu bazebi ti, mu nzila ya mpeve santu, Kristo lendi twarisa mabanza ma mukuluntu ni mukuluntu ngatu wazonzela mutieno wa Bibila wuta delakana na musamu wumosi peleko wulendi ba bakisa mu bonga nzengolo ni nzengolo ya mfunu. (Bisalu 15:6-15) Mpeve santu bakuluntu babansoni ba timvuka yibakisaka, kâ, ka mukuluntu wumosi’â ko kwa ha kati diawu.”

6. Bwe bakuluntu balendi sarila tintwari mu bumosi, mpe bwe timvuka tibakilaka ndandu bu basarilaka bo?

⁶ Mukuluntu wuzitisaka bakuluntu bakaka, ntangu zazansoni, ka wuyêlaka ko mu bâ muntu wa ntete mu zonza bu bavukanaka bawu na bawu. Ka wudingakaka ko ti bawâ kwa yandi, mpe ka banzaka ko ti mabanza ma yandi ma mbote kwa mabâka ntangu zazansoni. Kâ, na kuluka kwakwansoni kazonzelaka mabanza mandi. Mbo katomo wirikilaka misamu mi tâka bampwana’andi. Musamu wuyôkele mfunu, mbo kazoloko mu zonzela Zu dia Nzambi na mu landa lutwalusu lwa “ngamba ya kwikama na ya ndwenga.” (Mat. 24:45-47, NWT) Bakuluntu bu bazonzelaka misamu  mu luzolo na mu buzitu, mpeve santu ya Nzambi mbo yibâka nawu, mpe mbo yibatwarisaka mu bonga nzengolo ziyikaka timvuka ngolo.​—Zaki 3:17, 18.

7. Bwe Yezu keri bongelaka bumpumpa?

⁷ Mu timvuka lumbu ti, mwe na bantu ba kwelana mpe na makanda. Kâ, mwe mpe na mpangi zilembolo za kwela. Bwe tufweti bongelaka bampumpa (mpangi zo zilembolo za kwela)? Tataleno bwe Yezu keri bongelaka bumpumpa. Mu ntangu yi keri ha mutoto, Yezu ka bâ wa kwela ko. Watatamana mu bâ mpumpa, mpe ntangu zazansoni watûla mabanza mandi mu tisalu tiandi. Kani kabwe, Yezu ka tâ ko ti ntumunu yeri mu kwela peleko mu bâ mpumpa. Kâ, watâ ti Bakristo bakaka mbo baketi sola mu lembo kwela. (Mat. 19:11, 12) Yezu mbo keri zitisaka bô balembo bâ ba kwela. Keri’â monaka ko ti bantu ba kwela bayôka bantu balembo bâ ba kwela peleko bantu balembo bâ ba kwela, tima tieri ba kondoko mu luzingu lwawu.

8. Tintwari na 1 Bisi-Korente 7:7-9, ntia musamu Paulo katindisila Bakristo mu tiyulaka?

⁸ Ntiana Yezu, ntumwa Paulo watatamana mu bâ mpumpa bu keri kwe sari tisalu tiandi. Kani kabwe, Paulo ka tâ ko ti musamu wa mbi weri kwe Mukristo mu kwela. Wazaba ti nzengolo yeri, muna muntu yi kaketi bonga. Kâ, Paulo watindisa Bakristo mu tiyula tala ti mbo baketi lenda mu sarila Yehova mu bumpumpa. (Tanga 1 Bisi-Korente 7:7-9.) Kampe Paulo ka banza ko ti Bakristo ba kwela bayôkele Bakristo balembolo ba kwela. Paulo wasola Timote yeri ntwenia mpe yeri mpangi ya mpumpa, mu sala tisalu tia mfunu mu bungu dia Yehova. * (Flp. 2:19-22) Wa matieleka, ka wubâ musamu wa mbote ko mu banza ti tala ti mpangi lenda dia sarila diadingi die nandi peleko dia fioti die nandi, mu bungu ti wa kwela wena peleko kâni.​—1 Kor. 7:32-35, 38.

9. Bwe tulendi tâ mu bungu dia makwela na bumpumpa?

⁹ Yezu na Paulo ka batâ ko ti Bakristo bafweti kwela peleko bafweti tatamana mu bâ bampumpa. Kâ, bwe tulendi tâ mu bungu dia makwela na bumpumpa? Nzo ya Zangama ya Munkengi ya 1 ngonda ya kumi 2012-F, yahana mvutu ya mbote mu tiyuvu tio, yatâ ti: “Wa matieleka, tulendi tâ ti [makwela na bumpumpa] makabu ma Nzambi mena . . . Yehova ka bongelaka bumpumpa ko ntiana tima tinataka nsoni peleko mpasi.” Na mabanza mo mu  mutu, tufweti zitisaka tibuka tia mpangi zilembolo za kwela mu timvuka.

10. Bwe tulendi zitisila mpangi zeto zilembolo za kwela?

¹⁰ Bwe tulendi zitisila mbanzulu na misamu mi turilaka mpangi zeto ze mpumpa? Tufweti bambuka ti Bakristo bakaka bayizi bonga nzengolo ya tatamana mu bâ ba mpumpa. Brakisto bakaka ba mpumpa bazololo bakwela, kâ ka beka’eti baka muntu wa mbote ko. Bakaka bayizi fwilulu mulumi’awu peleko mukazi’awu. Ngano wufwanakane ti bô bê mu timvuka bayulaka kwe Bakristo ba mpumpa mu bungu dia nti balembolo ba kwela peleko bababakisa mu baka muntu? Diangana, Bakristo bakaka ba mpumpa balendi dinga lubakusu lo. Kâ, tala ti ka balombele’â lubakusu ko, bwe mpangi zeto ze mpumpa zimona ku mutima tala ti tubatêlele tababakisa mu baka muntu? (1 Tes. 4:11; 1 Tim. 5:13) Tataluzuleno misamu mia tâ mpangi za kwikama zilembolo za kwela.

11-12. Bwe tulendi kotesela bantu balembolo ba kwela mu bunokena?

¹¹ Munkengi wumosi wa tizunga we mpumpa wutomo salaka tisalu tiandi watâ ti ndandu yayingi ye kô mu bâ mpumpa. Kâ, têle ti wulendi bâ musamu wunôkesaka bito mu ntangu mpangi zidingaka mu mu bakisa mpe zimuyulaka: “Mu bungu dia nti lembolo wa kwela?” Mpangi yimosi ya yibakala ya mpumpa yisalaka ku Betele yitêle ti: “Ntangu zakaka, mbo nimoka mpangi zi banzaka ti bafweti fwila bampumpa tiari. Musamu wo wulendi songela ti bumpumpa dema diena kani diabâ kabu.”

¹² Mpangi yimosi ya yikento ya mpumpa yisalaka ku Betele yitêle ti: “Mpangi zakaka zibanzaka ti bantu babansoni balembolo ba kwela nsatu kwela yibâka nawu peleko mbo zibanzaka ti, bantu balembolo ba kwela bu bavukanaka ni mu dinga muntu wu bakwela. Lumbu timosi naye sala mu bungu dia Betele ku tizunga tiakaka. Mu nkokela bu nayenda ku lukutakanu, mpangi ya yikento yakumbwana ku nzo’andi yakuntêla ti mu timvuka mwe na mpangi zole za zibakala zi tweri mvula zimosi. Wakungwisa ti, keri’â dingaka ko mu kumbakisa mu baka muntu wukunkwela. Kâ, ntangu fioti ha manima, bu takota mu Nzo ya Nsambululu, mpangi yo yakunata kwe mpangi zo za zole za zibakala ngatu tazabasana. Wa matieleka, musamu wo nkatika nsoni watutâ beto batatu.”

13. Ntia bifwani bia tindisa mpangi yimosi ya yikento ya mpumpa?

¹³ Mpangi yakaka ya yikento ye mpumpa yisalaka ku Betele yitêle ti: “Mipasuri-nzila mia mpumpa nzebi mie na mabanza ma delakana, mitomono zaba makani mawu, mie mia kubama mu tomo bakisa bampwana’awu mpe mie na nsayi mu tisalu. Lubakusu lwalwingi bahanaka mu timvuka. Mabanza ma delakana me nawu mu bungu dia bumpumpa bawu. Ka babanzaka ko ti bayôkele bampwana’awu mu bungu ti mpumpa zena peleko ka babanzaka ko ti ka balendi babâ na nsayi ko mu bungu ti ka bêna na muntu wu bakwelana ko, mpe ka bêna na bala ko.” Diangana musamu wa nsayi wena mu bâ mu timvuka ti babongelaka bantu mu buzitu mpe ti bahanaka bantu ntalu. Zebi ti mpangi zaku ka zikubongelaka ntiana muntu we mu tiari ko, ka zikudienokenaka ko, ka zikuzimbakanaka ko mpe ka zibanzaka ko ti nge bayôkele. Nge zizololo.

14. Bwe tulendi zitisila bô balembolo ba kwela?

¹⁴ Mpangi zeto zilembolo za kwela, mbo zikwizi tondaka mu ntangu yi tubazitisaka mu bungu dia bifu biawu bia mbote kani tabazitisa mu bungu dia bumpumpa bwawu. Kani tabafwila tiari mu bungu ti mpumpa zena, wufwanakane tazoloko tifu tiawu tia kwikama. Buna, mpangi zeto zilembolo za kwela, kani kabwe, ka zimona ko ti ntiana bawu tuta têla:  “Ka ndiena neno salu ko.” (1 Kor. 12:21) Kâ kani babâ na mabanza mo, mbo bakwizi bakula ti bawu tuzitisaka mpe mbo tubâka mu nsayi bu bêna mu timvuka.

15. Ntia nsobolo mpangi zakaka za sa mu kurisa tisalu tiawu tia samuna?

¹⁵ Mu mivu miayôkele, bisamuni biabingi biayizi bâ na kani dia longoka zu diakaka ngatu biakurisa tisalu tiawu tia samuna. Mu lenda, wafwanakana basa nsobolo mu luzingu lwawu. Mpangi zo, zayizi bika bimvuka biawu mu beri zonzaka zu diawu dia mbutukulu, mu kwenda mu bimvuka bi bazonzaka zu diakaka bieri na nsatu bisamuni. (Bis. 16:9) Bakristo bo, bawu beni babongaka nzengolo mu tomo vutu sarila Yehova. Ni bu sa ti balendi yôkesa mvula zazingi mu tomo zaba mu zonza zu di bata longoka, mbo babakisaka bimvuka mu mpila zazingi. Bifu biawu bia mbote na misamu mi bazebi mbo bisikamasaka bimvuka mpe mbo biyikaka bimvuka ngolo. Buzitu bwabwingi bu bâka neto mu bungu dia mpangi zo ze na tifu tia tihana!

16. Bakuluntu mu nti bafweti sikamanaka bu babongaka nzengolo ya sola mpangi mu bâ mukuluntu peleko tibakisi mu tisalu?

¹⁶ Bakuluntu ka bafweti’â babonga nzengolo ya lembo sola mpangi mu bâ mukuluntu peleko tibakisi mu tisalu ko, mu bungu ti ka zebi’â tomo zonza zu di bazonzaka mu timvuka ko. Bakuluntu mbo basikamana mu Bibila tala ti bazololo basola mpangi ngatu yabâ mukuluntu peleko tibakisi mu tisalu; kâ ka mu mpila yi kazonzelaka zu dia timvuka ko.​—1 Tim. 3:1-10, 12, 13; Tite 1:5-9.

17. Ntia biyuvu makanda makaka ma tiyulaka mu ntangu yi makwendaka ku nsi ya nzenza?

¹⁷ Makanda makaka ma Bakristo mayenda ku nsi ya nzenza mu kwe swama peleko mu kwe dinga tisalu. Mu misamu mia mpila yo, bala bawu bafweti kwe longoka ku lukolo mu zu di bazonzaka ku nsi yo ya môna. Bibuti mpe bilendi dinga mu longoka zu dio ngatu babaka tisalu. Ngano nti basa tala ti timvuka tie kô ti bazonzaka zu diawu dia mbutukulu? Ngano mu ntia timvuka bakwenda? Ngano mu timvuka ti bazonzaka zu diawu dia mbutukulu bakwenda peleko mu timvuka ti banzonaka zu dia nsi yo ya nzenza bakwenda?

18. Tintwari na Bisi-Ngalate 6:5, bwe tulendi zitisila nzengolo ya mfumu-kanda?

¹⁸ Mfumu-kanda fweti bonga nzengolo ya sola timvuka ti kwenda kanda diandi mu bungu dia lukutakanu. Mu bungu ti nzengolo yo mfumu-kanda kwa yitariri, fweti taluzula ka ntia nsololo yibâ ya mbote mu bungu dia kanda diandi. (Tanga Bisi-Ngalate 6:5.) Tufweti zitisa nzengolo yibonga mfumu-kanda. Nzengolo ni nzengolo yibonga mfumu-kanda, tufweti ya tambula, tufweti bwana mpe tufweti songela luzolo kwe kanda dio.​—Rom. 15:7.

19. Ntia misamu mfumu za makanda zifweti tomo dimbitila mu lusambulu?

¹⁹ Makanda makaka malendi bâ mu bimvuka  bibazonzaka zu dia mbutukulu dia bibuti, kâ bala balendi lembo tomo dia zonza. Tala ti timvuka tio mu tizunga ti bazonzaka zu di balongeselaka bala ku lukolo tiena, wulendi bâ musuma wa mpasi kwe bala mu bakula misamu mi batâka ku tukutakanu na mu bâ na tindiku na Yehova. Mu bungu dia nti? Mu bungu ti bala balendi kotela ku lukolo lu balembo zonzaka zu dia mbutukulu dia bibuti biawu. Musamu wo mbo wutulaka, mfumu za makanda zifweti tomo ndimbitila mpe zifweti sambila mu baka ndwenga zibabakisa mu bonga nzengolo mu mio mi bafweti sa mu bakisa bala bawu mu bâ na tindiku na Yehova mpe na kanda diandi. Bibuti bifweti longesa bala bawu mu zonza zu diawu dia mbutukulu peleko bafweti kwenda mu timvuka ti bazonzaka zu ditomo bakulaka bala bawu. Nzengolo ni nzengolo yibonga mfumu-kanda, timvuka ti basolele mu kwenda tifweti sa ti mfumu-kanda na kanda diandi diamona ti zitisa babazitisaka mpe tifweti songela ti bawu bazololo.

20. Bwe tulendi zitisila mpangi zeto zilembo tomo zonzaka zu dieto?

²⁰ Mu misamu miamiansoni mi tuzonzele, bimvuka biabingi bikwizi bâ na mpangi zisarilaka ngolo mu longoka zu dia môna. Wulendi bâ musamu wa mpasi kwe bawu mu zonzela mabanza mawu. Kâ, tamana lembo kipa kwa mpila yi bazonzelaka zu diawu dia môna mbo tumona luzolo lwawu mu Yehova na nsatu’awu ya mu sarila. Tala ti tumweni bifu biawu bia mbote, mbo tutomo zolo mpe mbo tutomo zitisa mpangi zeto. Ka tukwizi’â tâ ko ti “Ka ndiena neno salu ko” mu bungu ti ka batomo’â zonzaka zu dieto ko.

21-22. Ntia bweso bwa toma bwe neto?

²¹ Yehova watuhana bweso bwa toma bwa bâ na tibuka mu timvuka tiandi. Ni bu sa ti wa bakala twena peleko mukento, mpumpa peleko wa kwela, ntwenia peleko tibunda, ni bu sa ti zu die kô tuzonzaka bubote peleko kâni, ntalu twena ha meso ma Yehova na ha meso ma mpangi zeto.​—Rom. 12:4, 5; Kol. 3:10, 11.

²² Buna tatamaneno mu sarila nzanda malongi ma mbote ma tulongokele mu tifwani tia sarila Paulo mu musamu wutariri nitu ya muntu. Mu mpila yo, mbo tutomo dinga mpila zi tuzitisila tibuka tieto na tibuka tia bantu bakaka mu timvuka tia Yehova.