1. Iehova ese ena hesiai taudia ta ta be ede e lalodia tomamu?

IEHOVA ese ena hesiai taudia ta ta na e lalokau henidiamu bona ena kongrigeisin lalonai e abidia dae. Ena be kongrigeisin ai iseda ḡaukara na idauidau, to Dirava ese ita ta ta na e laloda badamu. Aposetolo Paulo ese e durudamu una mai anina bada ḡauna baita lalopararalaia totona. Edena dala ai?

2. Efeso 4:16 heḡereḡerena, dahaka dainai baita hemataurai heheni bona baita ḡaukara hebou na mai anina bada?

² Ina stadi ena siri badana ai Paulo ese e hahedinaraia heḡereḡerena, Iehova ena hesiai tauna ta ese ma ta na basine hereva henia, basineto ‘Asi emu ḡaukara egu ai.’ (1 Kor. 12:21) Bema ita na ta uramu kongrigeisin ai maino baine mia, namona na baita hemataurai heheni bona baita ḡaukara hebou. (Efeso 4:16 ba duahia.) Unu baita kara tomamu neganai, tadikaka taihu iboudiai be helalokau hehenimu bona kongrigeisin be goadamu.

3. Ina stadi ai be dahaka baita herevalaimu?

³ Ededia dala ai baita hahedinaraia, ita ese kongrigeisin taudia ma haida na baita matauraidia? Ina stadi ai baita itaiamu, ededia dalai elda taudia bae hemataurai heheni be namo. Bena baita itaiamu, ededia dalai singul taudia baita matauraidia be namo. Bona dokonai baita itaiamu, ededia dalai ita ese idau gado taudia baita matauraidia o baita lalokau henidia be namo.

4. Roma 12:10 ai elda taudia ese edena sisiba bae badinaia na ḡau badana?

⁴ Kongrigeisin elda taudia iboudiai na Iehova ese lauma helaḡa amo e abidia hidi. To, idia ta ta edia aonega bona goada na idauidau. (1 Kor. 12:17, 18) Haida be elda matamatadia dainai, edia ekspiriens na dia bada. Ma haida be buruka o gorere dainai, ḡaukara haida mo bae kara diba. To, namona na elda ta ese ma elda ta na basine hereva henia, basineto ‘Asi emu ḡaukara egu ai.’ Lasi, namona na elda ta ta ese Baibul bukana Roma ai Paulo ese e torea sisibana baine badinaia.​—Roma 12:10 ba duahia.

5. Ededia dalai elda taudia bae hemataurai heheni be namo, bona dahaka dainai unu bae kara toma na mai anina bada?

⁵ Elda taudia bae hemataurai heheni dalana ta be, hakala namonamo karana. Oibe, elda oreana e heboumu bena mai anina bada ḡaudia haida e herevalai heboumu negadiai, hakala heheni namonamo karana na mai anina bada. Dahaka dainai? The Watchtower, October 1, 1988 etomu: “Elda taudia ese be itaiamu ḡauna ta binai, Keriso na lauma helaḡa amo elda oreana ena elda ta ta baine durua diba, bena una elda ese Baibul ena sisiba o hahekau herevana ta baine gwauraia, unu amo elda taudia iboudiai bae diba edena dala ai hekwakwanai ta bae hamaoromaoroa eiava disisin badana ta bae karaia. (Apos. 15:6-15) Lauma helaḡa na kongrigeisin elda iboudiai be durudiamu, a dia elda tamona.”

6. Edena dalai elda taudia na bae ḡaukara hebou namonamo diba, bona una ese kongrigeisin be ede be durua tomamu?

⁶ Elda taudia ma haida e matauraidiamu elda tauna na hebou lalonai basine hereva gunagunamu. Hebou ai ia mo basine herevamu, bona ia na basine ura dikamu, basine tomamu ena lalohadai na hanaihanai mamaoro. Lasi, to ia na mai manauna ida ena lalohadai be gwauraiamu. Ia ese haida edia lalohadai e hakala henidia namonamomu. Bona ḡau badana binai, nega momo ia ese Baibul ena sisiba e gwauraiamu, bona “hesiai tauna mai ena kamonai, bona mai ena kara maoromaoro” ena hahekau  dalana e badinaiamu. (Mat. 24:45-47) Elda taudia na mai lalokaudia bona hematauraidia ida be herevaherevamu neganai, Dirava ena lauma helaḡa na idia padadiai be ḡaukaramu, bona idia ese be karamu disisin idauidau ese kongrigeisin be hagoadaiamu.​—Iak. 3:17, 18.

7. Iesu ese singul taudia be ede e matauraidia tomamu?

⁷ Hari, kongrigeisin ai headava taudia bona ruma bese baita davaridiamu. To danu, baita davaridiamu taudia momo na do asie headava. Unu singul tadikaka o singul taihu be ede baita matauraidia toma? Namona na Iesu ena lalohadai baita abia. Tanobada ai hesiai ḡaukara e karaia neganai, Iesu na se headava. Ia na singul dainai, ena nega bona goada ibounai ida Dirava e hesiai henia. Iesu na taravatu ta se gwauraia, seto, Kristen taudia na bae headava, eiava seto, Kristen taudia na basie headava. Lasi, to ia na eto, haida na basie uramu headava. (Mat. 19:11, 12) Iesu na singul taudia e matauraidiava. Ia na seto, headava taudia ese singul taudia e hereadia, eiava seto, singul taudia na ḡau haida ai e dabumu.

8. 1 Korinto 7:7-9 ai Paulo ese Kristen taudia e hagoadadia dahaka bae kara totona?

⁸ Aposetolo Paulo danu ena hesiai ḡaukara e karaia neganai, ia na singul. Ia na taravatu ta se gwauraia, seto, Kristen taudia bae headava na kerere. Ia dibana daika e uramu baine headava na ia sibona ena abia hidi. To Paulo ese Kristen taudia e hagoadadia, asie headavamu taudia ese Iehova bae hesiai henia be namo. (1 Korinto 7:7-9 ba duahi.) Oibe, Paulo na seto, Kristen headava taudia ese singul taudia na e hereadia. Lasi, badina ia ese singul tadikakana, Timoteo, e abia hidi ḡaukara badadia baine kara. * (Fili. 2:19-22) Una ese e hahedinaraiamu, herevana tadikaka ta e headava o lasi, to ia ese ḡaukara idauidau na baine hua namonamo diba.​—1 Kor. 7:32-35, 38.

9. Headava taudia bona singul taudia be ede baita herevalaidia toma?

⁹ Iesu eiava Paulo na taravatu ta se gwauraia, seto, Kristen taudia na bae headava, eiava seto, Kristen taudia na basie headava. To, iseda lalohadai be edeheto? The Watchtower, October 1, 2012 ena hereva na namo herea, eto: “Momokani, baita gwau dibamu idia [headava taudia bona singul taudia] na harihari ḡaudia Dirava amo. . . .  Iehova na se tomu, [singul taudia] bae hemarai be namo eiava bae lalohisihisi be namo.” Sisiba unuhetomadia daidiai, namona na kongrigeisin taudia ese singul tadikaka o singul taihu bae matauraidia.

10. Edena dalai ita ese singul taudia baita matauraidia be namo?

¹⁰ Edena dalai ita ese singul taudia edia hemami baita matauraia? Nega iboudiai baita laloa tao, singul taudia haida na asie uramu headava. Idia haida be e uramu bae headava to reana idia ese bae adavaia tadikakana o taihuna ta do asie davaria. To, ma haida be reana dogae o vabu. Herevana daika e headava o lasi, to kongrigeisin taudia na asi edia maoro singul taudia bae nanadaia dahaka dainai ia na do se headava, bona idia na asi edia maoro singul ta bae noia idia ese ia bamona ta bae tahua totona. Vaia, singul taudia haida be heduru unuhetomana be noiamu. To bema singul taudia ese iseda heduru basie noia, o laloamu iseda henanadai kavakavadia ese singul taudia edia hemami be ede be tomaiamu? (1 Tes. 4:11; 1 Tim. 5:13) Mani singul taudia haida edia hereva aita itadia.

11-12. Ededia dalai singul taudia edia hemami baita hadikaia dibamu?

¹¹ Singul tadikaka ta na ena seket ḡaukara e karaia namonamomu dainai, ia na e laloamu singul ena namo na momo. To ia na e gwaumu, nega haida una na auka, badina tadikaka taihu namodia haida ese ini be nanadaia tomamu: “Dahaka dainai oi do so headava?” Brens ofes ai singul tadikaka ta na e gwaumu: “Nega haida, tadikaka taihu haida ese singul taudia e bogadia hisimu. Una dainai, nega haida launa na laloamu singul na dia harihari ḡauna, to mauri dikana.”

¹² Betele ai singul taihu ta e gwaumu: “Pablisa haida na e gwaumu singul taudia iboudiai na adavadia e tahumu bona e laloamu moale gabudiai adavadia be davaridiamu. Nega ta ai lau na gabu ta nala egu Betele ḡaukara ta ikarana totona, bona lau na kau hanuaboina ai na hebou negana. Lau baina noho rumana biaguna​—taihu ta​—e vasi gwau, ‘Ina kongrigeisin ai na tadikaka rarua, edia mauri laḡani na oiemu ida heḡereḡere.’ Ia ma e gwa, ‘lau na uramu oi bamomu ta baina tahua.’ Kingdom Hall ai a vareai neganai, maoromaoro ia ese e hakaugu lao tadikaka raruosi baina hedavari henidia. Baina gwau diba, una negai lau bona unu tadikaka raruosi na a hemarai dikadika.”

13. Daidia edia haheitalai ese singul taihu ta e durua?

¹³ Betele ai singul taihu ma ta e gwaumu: “Lau ese na dibadia singul taudia haida na laḡani momo lalodiai painia ḡaukara mo e laloa badamu, e karaia nohomu, edia namo se lalomu, e moalemu, bona idia ese kongrigeisin e duruamu. Idia ese edia singul maurina e moalelaiamu, bona asie tomu, idia na ma haida e hereadia badina idia na singul, eiava asie tomu, idia na e moalemu badina asi adavadia bona asi natudia.” Una dainai, kongrigeisin ai haida ese oi be matauraimumu neganai, bo moalemu. Bona oi na o dibamu, tadikaka bona taihu ese oi na se bogamu hisi kavamu, se mama henimumu, se dadaraimumu, bona se gwaumu idia ese oi na e hereamu. Bona oi na o dibamu, idia ese oi na e lalokau henimumu.

14. Edena dalai baita hahedinaraia ita ese singul taudia na ta matauraidiamu?

¹⁴ Singul tadikaka bona singul taihu na be moalemu bema edia kara namodia baita lalodia badamu, a dia idia na singul dainai baita bogadia hisi kava. Lasi, to baita moale badina idia na e gini goadamu. Ita na asita uramu singul tadikaka bona singul taihu bae laloa, ita ese idia na ta hamaorodia: “Asi emui ḡaukara egu ai.” (1 Kor. 12:21)  Lasi, to idia bae diba ita ese kongrigeisin ai idia na ta matauraidiamu.

15. Pablisa momo be dahaka sensi haida e kara, unu amo haroro ḡaukara e habadaiamu?

¹⁵ Vanega laḡanidiai, pablisa momo na e hekwarahi idau gado ma ta e dibaia, unu amo haroro ḡaukara e habadaiamu. Unu e kara tomamu taudia ese sensi haida bae kara na namo. Idia ese edia gado korikori e ḡaukaralaiamu kongrigeisin e rakataniamu, unu amo e laomu gado matamata e dibaiamu bona una gado e ḡaukaralaiamu kongrigeisin e duruamu badina be pablisa na dia momo. (Apos. 16:9) Bona idia sibodia ese disisin unuhetomadia e karamu, badina e uramu Basileia ena ḡaukara bae durua. Ena be gado matamata na doini e dibaiamu, to idia ese dala idauidau a kongrigeisin e duruamu. Idia ese edia kara namodia bona ekspiriens amo tadikaka bona taihu e hagoadadiamu. Tadikaka bona taihu unuhetomadia na baita matauraidia!

16. Edena dalai elda oreana ese bae tahua tadikaka ta be heḡereḡere elda o ministerial servant ai bainela eiava lasi?

¹⁶ Elda orea haida na e uramu do bae nari ela bona tadikaka ta na kongrigeisin ena gado baine dibaia namonamo guna, una murinai baine heḡereḡere elda o ministerial servant ai bainela. Una na dia maoro, to dala maorona binai, bema elda oreana ese e itaiamu, tadikaka ta ese dagi ena taravatu Baibul ai na e badinaia, una anina na ia na heḡereḡere elda o ministerial servant ai bainela totona.​—1 Tim. 3:1-10, 12, 13; Tito 1:5-9.

17. Ruma bese haida na tano matamatana ta e laomu neganai, ededia henanadai e lalomu?

¹⁷ Kristen ruma bese haida na tano matamatana ta e laomu badina edia tano ai mauri na auka, eiava badina moni ḡaukara e tahumu. Bona idia natudia na skul e laomu neganai, teacher ese edia tano matamata ena national language o gado badana amo idia e hadibadiamu. Reana tama o sina danu una gado badana e dibaiamu, badina moni ḡaukara bae davaria dalana ta be una. To, bema kongrigeisin taudia o grup taudia na tama o sina mai dibadia gadona e ḡaukaralaiamu be edeheto? Namona be ruma bese be edena kongrigeisin baela? Idia be gado badana e ḡaukaralaiamu kongrigeisin baela, eiava tama o sina mai dibadia gadona e ḡaukaralaiamu kongrigeisin baela?

18. Galatia 6:5 heḡereḡerena, edena dalai ruma bese kwarana ena disisin baita matauraia?

¹⁸ Ruma bese edena kongrigeisin bainela ena abia hidi na ruma bese kwarana ese baine karaia na maoro. Tau ese ena ruma bese ena namo baine lalohadailaia na iena maduna. (Galatia 6:5 ba duahia.) Una dainai, ia ena disisin baita matauraia na mai anina bada. Oibe, iboudai ese iena disisin baita abia dae bona ena ruma bese na  eda kongrigeisin ai baita welkam henidia.​—Roma 15:7.

19. Ruma bese kwaradia ese dahaka bae ḡuriḡurilai bona bae lalohadailai namonamo be namo?

¹⁹ Tama o sina haida be reana mai dibadia gadona e ḡaukaralaiamu kongrigeisin e laomu, to natudia be una gado asi dibadia namonamo. Bema una kongrigeisin e gini gabunai taunimanima na gado badana e ḡaukaralaiamu, reana natu na be hekwarahimu hebou ena tok bae lalopararalaia o lauma dalanai basie goadamu. Dahaka dainai? Badina skul ai natu na gado badana ai mo e herevamu, a dia tamadia sinadia edia gado. Bema unuheto, namona na tau ese una baine lalohadailaia namonamo bona baine ḡuriḡuri Iehova ese baine durua abia hidi maorona baine karaia, heḡereḡere natu baine durua Iehova bona ena taunimanima dekedekediai baine noho. Eiava namona na tama o sina ese edia gado na natudia bae hadibalaidia, eiava namona na kongrigeisin matamatana baela badina natudia na gado matamata mai dibadia bona lauma dalanai be goadamu. Herevana tau ese dahaka disisin baine karaia, to kongrigeisin taudia ese ia bona ena ruma bese na bae matauraidia.

20. Edena dalai gado matamata e dibaiamu tadikaka bona taihu baita matauraidia diba?

²⁰ Tame herevalai badi idauidau daidiai, kongrigeisin momo ai, tadikaka bona taihu na e hekwarahimu gado matamatana ta bae dibaia totona. Reana idia e uramu gado matamatana ai edia lalohadai bae herevalaia na auka. To idia ese gado e herevalaiamu dalana mo basita laloa, to baita laloa bada ḡauna ta binai: Idia ese Iehova e lalokau heniamu bona e uramu ia bae hesiai henia. Una ese ita be durudamu idia baita matauraidia totona. Herevana idia ese eda gado na do asie herevalaia namonamomu, to idia na basita hereva henidiamu basita tomamu, “Asi emui ḡaukara egu ai.”

21-22. Iehova ese dahaka hahenamo be ita e henida?

²¹ Iehova ese ena kongrigeisin ai ita ta ta na ḡaukara ta ta e henida. Herevana ita na tau o hahine, mero o kekeni, headava o singul, eregabe o buruka, bona gado ta ta herevalaia namonamomu eiava lasi, to Iehova bona taunimanima ma haida ese ita na e laloda badamu.​—Roma 12:4, 5; Kol. 3:10, 11.

²² Paulo ese e gwauraia tauanida ena haheitalai amo ḡau namodia momo baita dibadia noho be namo. Unu amo ita na dala idauidau ai tadikaka bona taihu baita hagoadadiamu, bona una ese be durudamu nega iboudiai idia baita lalokau henidiamu bona baita matauraidiamu.