1. Ki kitsoz Zeova inn donn sakenn parmi so bann serviter fidel?

AVEK boukou lamour, Zeova inn donn sakenn parmi so bann serviter fidel enn plas dan lasanble. Mem si sakenn ena so plas dan lasanble, nou tou nou ena valer, ek nou tou nou bizin nou kamarad. Lapot Pol ti ansegn nou sa leson bien inportan la. Kouma?

2. Dapre Efezien 4:16, kifer nou bizin rekonet valer ki sakenn ena ek travay ansam?

² Dan verse prinsipal sa lartik-la, Pol inn montre dan enn fason bien kler ki personn parmi nou pa kapav dir enn lot serviter Zeova: “Mo pa bizin twa!” (1 Kor. 12:21) Si nou anvi ki ena lape dan lasanble, nou bizin rekonet valer ki sakenn ena ek nou bizin travay ansam. (Lir Efezien 4:16, NW. *) Kan nou travay ansam dan linite, lasanble pou grandi dan lamour ek pou vinn pli for.

3. Ki nou pou examine dan sa lartik-la?

³ Kouma nou kapav montre respe anver lezot dan lasanble? Dan sa lartik-la, nou pou trouve kouma bann ansien kapav montre respe anver lezot ansien. Nou pou osi trouve kouma nou kapav montre ki nou bann frer ek ser selibater ena valer pou nou. Ek apre sa, nou pou gete kouma nou kapav montre ki nou respekte bann dimounn ki pa koz bien nou lang.

4. Dapre Romin 12:10, ki konsey bann ansien bizin swiv?

⁴ Se lespri sin Zeova ki etabli tou bann ansien dan bann lasanble. Me sakenn ena diferan kapasite. (1 Kor. 12:17, 18) Sertin fek nome ansien ek zot pena boukou lexperyans konpare ar lezot ansien. Ena lezot ki pa kapav fer boukou akoz zot laz ouswa bann problem lasante. Selman, okenn ansien pa kapav dir enn lot ansien: “Mo pa bizin twa!” Okontrer, sak ansien bizin swiv konsey ki lapot Pol inn done dan Romin 12:10.​—Lir.

5. Kouma bann ansien montre ki zot respekte bann lezot ansien, ek kifer li inportan ki zot fer sa?

⁵ Bann ansien montre ki zot respekte lezot ansien kan zot ekout zot kamarad avek boukou latansion. Sa li sirtou inportan kan bann ansien zwenn ansam pou koz lor bann size inportan. Kifer? Get seki Latour Degard 1^e Oktob 1988 an Franse ti dir: “Bann ansien pou aksepte ki, gras-a lespri sin, Zezi kapav ed ninport ki ansien dan enn komite ansien pou dir ki prinsip pou aplike dan enn sitiasion ouswa ki prinsip bizin swiv pou pran enn desizion. (Zist. 15:6-15) Lespri sin ed tou bann ansien dan lasanble, pa zis enn parmi zot.”

6. Kouma bann ansien kapav travay ansam dan linite, ek ki bienfe lasanble gagne kan zot fer sa?

⁶ Enn ansien ki respekte lezot ansien pa pou touletan esey koz an premie dan bann renion ansien. Li pa esey dominn tou bann konversasion, ek li pa panse ki li touletan ena rezon. Okontrer, li ena limilite ek modesti kan li donn so lopinion, ek li ekout bien kan lezot koze. Me pli inportan, li servi bann prinsip Labib ek li swiv bann instriksion lesklav fidel ek saz. (Mat. 24:45-47) Kan ena lamour ek respe dan bann renion ansien, lespri sin Zeova pou avek zot ek pou gid zot pou pran bann desizion ki pou fortifie lasanble.​—Zak 3:17, 18.

7. Ki Zezi ti panse lor lavi selibater?

⁷ Azordi, dan lasanble, ena bann koup marye ek bann fami. Me ena osi bann frer ek ser selibater. Kouma nou bizin konsider bann selibater? Anou gete seki Zezi ti panse lor lavi selibater. Kan li ti lor later, Zezi pa ti marye. Li ti res selibater, ek li ti servi so letan ek so lafors pou akonpli travay ki Zeova ti donn li. Zame Zezi pa ti dir sipa enn Kretien bizin marye ouswa res selibater. Me selman, li ti dir ki sertin Kretien ti pou desid pou pa marye. (Mat. 19:11, 12) Zezi ti ena respe pou bann selibater. Li pa ti panse ki zot ti inferyer ouswa ki zot ti mank enn kitsoz dan zot lavi.

8. Dapre 1 Korintien 7:7-9, ki Pol ti ankouraz bann Kretien pou fer?

⁸ Parey kouma Zezi, lapot Pol osi ti res selibater pandan ki li ti pe akonpli so minister. Zame Pol pa’nn dir ki enn Kretien pa gagn drwa marye. Li ti kone ki sa ti enn desizion personel. Kanmem sa, Pol ti ankouraz bann Kretien pou examinn zot sitiasion ek gete si zot kapav res selibater pou servi Zeova. (Lir 1 Korintien 7:7-9.) Pol pa ti konsider bann selibater kouma bann dimounn ki ena mwins valer. An realite, li ti swazir Timote, enn zenn frer selibater, pou asim bann gran responsabilite. * (Fil. 2:19-22) Alor, fode pa nou panse ki enn frer li mwins kalifie ki enn lot zis parski li selibater.​—1 Kor. 7:32-35, 38, NW.

9. Ki nou kapav dir lor maryaz ek lavi selibater?

⁹ Ni Zezi ni Pol pa ti ansegne ki bann Kretien bizin marye ouswa res selibater. Me alor, ki nou kapav dir lor maryaz ek lavi selibater? Latour Degard 1^e Oktob 2012 an Franse ti donn enn zoli repons pou sa kestion-la. Li ti explike: “An realite, toulede [maryaz ek lavi selibater] se bann kado Bondie. . . . Zeova pa konsider [lavi selibater] kouma enn laont ouswa enn lavi ki tris.” Alor, nou bizin respekte bann frer ek ser selibater dan nou lasanble.

10. Kouma nou kapav montre ki nou respekte nou bann frer ek ser selibater?

¹⁰ Kouma nou kapav montre ki nou  respekte santiman ek sitiasion nou bann frer ek ser ki selibater? Nou bizin rapel ki sertin Kretien finn pran desizion pou res selibater. Ena lezot ki ti pou kontan marye, me zot pankor trouv personn. Ena lezot osi ki’nn perdi zot konzwin. Ninport ki rezon enn Kretien ena pou res selibater, eski bann frer ek ser bizin demann li kifer li selibater, ouswa propoz li pou rod enn kikenn pou li? Li vre ki sertin selibater kapav demann lezot pou ed li dan sa domenn-la. Me si li pa’nn demann personn pou ed li ek ki enn kikenn propoz li so led, ki li kapav resanti? (1 Tes. 4:11; 1 Tim. 5:13) Anou get sertin komanter ki nou bann frer ek ser selibater finn fer.

11-12. Ki kitsoz kapav dekouraz bann selibater?

¹¹ Enn responsab sirkonskripsion ki selibater ek ki asim bien so bann responsabilite, trouve ki ena boukou lavantaz pou res selibater. Selman, li’nn remarke ki sa kapav bien dekourazan kan bann frer ek ser ki ena bann bon lintansion demann li: “Kifer to pa marye?” Enn frer selibater ki servi dan Betel dir: “Parfwa, mo remarke ki sertin frer ek ser panse ki zot bizin ena pitie pou bann selibater. Se koumadir lavi selibater li enn problem, pa enn kado.”

¹² Enn ser selibater ki servi dan Betel dir: “Sertin frer ek ser panse ki tou bann selibater pe rod enn kikenn pou marye, ouswa zot panse ki, kan ena enn rasanbleman, bann selibater sezi sa lokazion-la pou rod enn konzwin. Enn fwa, mo ti bizin al dan enn lot landrwa pou mo servis dan Betel, ek mo ti ariv laba enn zour kot ti ena renion. Sa ser kot mo ti pe reste la ti dir mwa ki ena de frer dan so lasanble ki ena mem laz ki mwa. Li ti dir mwa ki li pa ti pe rod enn kikenn pou mwa. Me deswit kouma nou ti rant lasal, li ti amenn mwa get sa de frer-la pou ki nou fer konesans. Pa bizin dir ki nou toule trwa ti bien anbarase.”

13. Ki lexanp ti ankouraz enn ser selibater?

¹³ Enn lot ser selibater ki servi dan Betel dir: “Mo konn bann pionie ki selibater depi lontan ek ki bien ekilibre, ki ena bann bon lobzektif, ki dispoze pou ed lezot, ek ki ere. Zot fer boukou pou ed lasanble. Zot ena enn bon fason panse lor zot lavi selibater. Zot pa panse ki zot pli bon ki lezot akoz zot selibater, ek zot pa panse ki zot pa kapav ere parski zot pena enn konzwin ek zot pena zanfan.” Nou bien kontan kan nou dan enn lasanble kot sakenn respekte so kamarad! Personn pa zalou twa, pa inior twa, ek pa panse ki to pli bon ki zot. To kone ki zot kontan twa.

14. Kouma nou kapav montre ki nou respekte bann selibater?

¹⁴ Nou bann frer ek ser selibater pa anvi ki nou pitie zot akoz zot selibater. Zot anvi ki nou apresie zot pou zot bann zoli kalite. Alor, anou donn zot valer parski zot fidel. Lerla, nou bann frer ek ser zame pa pou panse ki ‘nou pa bizin zot.’ (1 Kor. 12:21) Okontrer, zot pou kone ki nou respekte zot ek ki nou kontan ki zot dan nou lasanble.

15. Ki sanzman sertin finn fer pou fer plis dan zot minister?

¹⁵ Sa bann dernie lane-la, boukou proklamater finn desid pou aprann enn nouvo lang pou ki zot fer plis dan zot  minister. Pou ki zot reisi fer sa, zot inn bizin fer bann sanzman dan zot lavi. Sa bann frer ek ser-la inn kit enn lasanble kot koz zot lang maternel ek zot inn al servi dan bann lasanble kot koz enn lot lang ek kot bizin plis proklamater. (Zist. 16:9) Sa bann Kretien-la finn pran sa desizion-la pou zot kapav fer plis pou Zeova. Mem si sa kapav pran boukou lane avan ki zot koz bien sa nouvo lang-la, zot ed zot lasanble dan boukou fason. Zot bann zoli kalite ek zot lexperyans ede pou fortifie bann frer ek ser. Sa bann frer ek ser ki fer sa bann sakrifis-la ena boukou valer pou nou!

16. Ki bann kondision enn frer bizin ranpli pou vinn ansien ouswa asistan ministeryel?

¹⁶ Mem si enn frer pa koz bien lang ki koze dan enn lasanble, fode pa ki bann ansien ezite pou rekomann li kouma ansien ouswa asistan ministeryel. Bann ansien pou gete si li ranpli bann kondision ki ena dan Labib konsernan bann ansien ek asistan ministeryel. Mem si frer-la pa koz bien lang sa lasanble-la, zot pa pou baz zot desizion lor la.​—1 Tim. 3:1-10, 12, 13, NW; Tit 1:5-9, NW.

17. Ki desizion bann fami bizin pran kan zot al res dan enn lot pei?

¹⁷ Ena bann fami Kretien osi ki’nn kit zot pei pou rod enn travay ouswa akoz bann sitiasion difisil ki ena dan zot pei. Lerla, zot bann zanfan al lekol dan sa pei kot zot inn ale la ek zot aprann koz lang sa pei-la. Bann paran-la osi kitfwa pou aprann lang sa pei-la pou zot gagn enn travay. Parfwa, zot kapav trouv enn lasanble ouswa enn group kot koz zot lang maternel. Lerla, sa bann Kretien-la ena enn desizion pou pran: Eski zot pou al dan enn lasanble kot koz lang sa pei-la, ouswa zot pou al dan enn lasanble kot koz zot lang maternel?

18. Dapre Galat 6:5, kouma nou kapav respekte desizion ki enn sef fami pran?

¹⁸ Se enn sef fami ki bizin deside dan ki lasanble so fami pou asiste renion. Se enn desizion personel, alor li pou bizin deside ki pli bon pou so fami. (Lir Galat 6:5.) Nou bizin respekte desizion ki sef fami-la pran. Ninport ki desizion li pran, anou aksepte so desizion. Anou akeyir fami-la ek montre zot ki nou kontan zot.​—Rom. 15:7.

19. Lor ki kitsoz bann sef fami bizin reflesi bien ek priye?

¹⁹ Sertin fami kitfwa finn al dan enn lasanble kot koz lang maternel bann paran-la, me zot zanfan pa tro konn sa lang-la. Lerla, kitfwa bann zanfan-la gagn difikilte pou konpran bann renion ek zot pa progrese lor plan spiritiel. Kifer? Parski zot al lekol ek zot aprann  lang ki koze dan pei-la, pa lang maternel zot paran. Dan sa ka-la, bann sef fami pou bizin reflesi bien ek priye pou demann Zeova sazes pou ki zot pran enn desizion ki pou ed zot zanfan vinn pros ar Zeova ek so pep. Zot pou bizin, swa ed zot zanfan pou aprann zot lang maternel, swa al dan enn lasanble kot koz lang ki zanfan-la konpran pli bien. Ninport ki desizion sef fami-la pran, bann frer ek ser dan lasanble kot li pou ale pou bizin respekte li ek so fami, ek kontan zot.

20. Kouma nou kapav montre ki nou respekte nou bann frer ek ser ki pe aprann enn nouvo lang?

²⁰ Kouma nou finn examine, ena plizir rezon kifer bann frer ek ser dan boukou lasanble pe fer bann gran zefor pou aprann enn nouvo lang, ek kitfwa zot gagn difikilte pou exprim seki zot panse. Me fode pa nou aret nou lor la. Nou anvi trouv lamour ki zot ena pou Zeova ek zot dezir pou servi Li. Lerla, nou pou respekte ek kontan sa bann frer ek ser-la. Nou pa pou dir: “Mo pa bizin twa” zis parski zot pa koz bien nou lang.

21-22. Ki gran privilez nou ena?

²¹ Se enn gran privilez pou form parti dan lasanble Zeova! Ki nou enn frer ouswa enn ser, selibater ouswa marye, zenn ouswa aze, ki nou koz bien enn lang ouswa non, nou tou nou ena valer pou Zeova ek pou nou bann frer ek ser.​—Rom. 12:4, 5; Kol. 3:10, 11, NW.

²² Anou kontign met an pratik bann zoli leson ki nou’nn aprann ar lexanp ki Pol ti servi lor lekor imin. Anou fer tou seki nou kapav pou ankouraz nou bann frer ek ser ek pou touletan kontan zot ek respekte zot.