1. Bõe la a Zeova kõ ned ning fãa sẽn maand sɩd ne-a?

NE NONGLEM, a Zeova kɩtame tɩ ned ning fãa sẽn maand sɩd ne-a tar a zĩig a tigingã pʋgẽ. Baa ne d tʋʋmã sẽn yaa toor-toor tigingã pʋgẽ wã, d ned kam fãa tara yõod wʋsgo, n dat taab sõngre. Tʋm-tʋmd a Poll sõng-d lame tɩ d bãng tɩ sɩd yaa woto. Wãn to la a sõng-do?

2. Wa Efɛɛz rãmb 4:16 sẽn wilgdã, bõe yĩng tɩ d segd n nand taab la d zemsd taab n tʋmdẽ?

² Wa vɛrse ning zug sõs-kãngã sẽn tikã sẽn wilgdã, a Poll wilga vẽeneg t’a Zeova Kaset soab baa a ye pa tog n yeel a to tɩ: “Mam pa rat fo sõngr ye.” (1 Kor. 12:21) D sã n dat tɩ bãan la laafɩ kell n zĩnd tigingã pʋgẽ, yaa tɩlɛ tɩ d nand taab la d naagd taab n tʋmdẽ. (Karm-y Efɛɛz rãmb 4:16.) D sã n zemsd taab n tʋmdẽ, tigingã neb na n nonga taaba, tɩ b tẽebã pãng me paasdẽ.

3. Bõe yell la d na n gom sõs-kãngã pʋgẽ?

³ Bõe la d tõe n maan n wilg tɩ d nanda d tẽed-n-taasã tigingã pʋgẽ? Sõs-kãnga pʋgẽ, d na n yãa kãsem-dãmbã sẽn tõe n maan to-to n wilg tɩ b nanda kãsem-dãmb a taabã. Sẽn paase, d na n yãa tõnd ned kam fãa sẽn tõe n wilg to-to t’a nanda d tẽed-n-taas nins sẽn pa kẽ kãadmã. La sẽn na n baase, d na n yãa d sẽn tõe n wilg to-to tɩ d nanda neb nins sẽn pa gomd d buud-gomdã sõma wã.

4. Sagl-bʋg la a Poll kõ Rom dãmb 12:10 pʋgẽ, tɩ kãsem-dãmbã segd n tũ?

⁴ Yaa ne vʋʋsem sõngã maasem la b yãkd tigingã kãsem-dãmbã. La kãsem-soab fãa minim yaa toor ne a to. (1 Kor. 12:17, 18) Kẽer sẽn lebg kãsem-dãmb nan pa kaoose, tɩ b minimã pa ta kãsem-dãmb a taabã ye. Sãnda pa le tõe n maan bũmb kẽere, b sẽn kʋʋl wall b laafɩ wã sẽn pa le waoogã yĩnga. Baa ne rẽ, kãsem-soab pa segd n yeel a to tɩ: “Mam pa rat fo sõngr ye.” Kãsem-soab fãa segd n tũu saglg ning a Poll sẽn kõ tɩ be Rom dãmb 12:10.—Karm-y.

5. Bõe la kãsem-soab tõe n maan tɩ wilg t’a nanda kãsem-dãmb a taabã, la bõe yĩng tɩ rẽ maaneg tar yõodo?

⁵ Kãsem-soab sã n maagd a yĩng n kelgd kãsem-dãmb a taabã, wilgdame t’a nand-b lame. Woto tara yõodo, sẽn yɩɩd fãa b sã n wa tigim taab n na n sõs yell ning zugu. Bõe yĩnga? Yʋʋmd 1988 zĩ-likr kiuug pipi daar Gũusg Gasgã pʋgẽ, b yeelame: “Kãsem-dãmbã segd n sak n deegame tɩ ne vʋʋsem sõngã maasem, Kiristã tõe n kɩtame tɩ kãsem-soab ning togs saglg sẽn yit Biiblã pʋgẽ, tɩ sõng kãsem-dãmbã sull tɩ b bãng b sẽn na n maaneg yell ning wɛɛngẽ, wall b tõog n yãk yam tɩ yɩ sõma. (Tʋʋ. 15:6-15) Yaa tigingã kãsem-dãmbã fãa la vʋʋsem sõngã sõngda, pa b nin-yend bal ye.”

6. Bõe n na n sõng kãsem-dãmbã tɩ b zemsd taab n tʋmdẽ, la wãn to la rẽ nafd tigingã?

⁶ Kãsem-soab sã n nand a taabã, b sã n wa tigim taaba, a pa na n bao n na n soog goamã ye. A pa na n tagsdẽ tɩ yẽ sẽn na n yeelã bal la sõma ye. A pʋd n segd n togsa a sẽn tagsdã ne sik-m-menga. A segd n kelga a taabã sẽn na n yeelã neere. Sẽn yɩɩd fãa, a raab yaa a togs Biiblã sẽn yetã, la a sakd n tũud “tʋm-tʋmd sẽn tũud sɩd la sẽn tar yamã” sẽn kõt sagls ninsã. (Mat. 24:45-47) Kãsem-dãmbã sã  n wa sõsd yell ning zugu, tɩ b sõsgã wilgdẽ tɩ b nonga taab la b nand taaba, Wẽnnaam vʋʋsem sõngã na n zĩnda ne-ba, n sõng-b tɩ b tõog n yãk yam sẽn na n naf tigingã.—Zak 3:17, 18.

7. A Zeezi manesem da yaa wãn ne sẽn pa kẽ-b kãadmã?

⁷ Rũndã-rũndã, neb sẽn kẽ kãadem la zags rãmb bee d tigimsã pʋsẽ. D tẽed-n-taas wʋsg me n be tigimsã pʋsẽ, n pa kẽ kãadem ye. D manesem segd n yɩɩ wãn ne sẽn pa kẽ-b kãadmã? D ges a Zeezi manesem sẽn yɩ to-to ne nin-kãensã. A Zeezi sẽn wa n moond koɛɛgã, a ra pa kẽ kãadem ye. A kell n yɩɩ rakõore, n kẽes a sẽkã fãa koɛɛgã mooneg pʋgẽ. A Zeezi zɩ n yeel tɩ yaa tɩlɛ tɩ kiris-ned kẽ kãadem wall a ra kẽ ye. La a yeelame tɩ kiris-neb kẽer na n yãka yam n pa na n kẽ kãadem ye. (Mat. 19:11, 12) A Zeezi ra nanda sẽn pa kẽ-b kãadmã. A ra pa get nin-kãensã wa neb sẽn pa ta sẽn kẽ-b kãadmã, wall neb bũmb sẽn paoog ye.

8. Wa 1 Korẽnt rãmb 7:7-9 sẽn wilgdã, sagl-bʋg la a Poll kõ kiris-nebã?

⁸ Wa a Zeezi, tʋm-tʋmd a Poll me sẽn wa n moond koɛɛgã, a ra pa kẽ kãadem ye. A Poll zɩ n yeel tɩ kiris-ned sã n kẽ kãadem yaa wẽng ye. A ra miime tɩ yaa ned kam fãa ne a yam-yãkre. La a sagla kiris-nebã tɩ b ges b sã n pa tõe n kell n tũ a Zeova, n pa kẽ kãadem. (Karm-y 1 Korẽnt rãmb 7:7-9.) Yaa vẽeneg t’a Poll ra pa get sẽn pa kẽ-b kãadmã wa neb sẽn pa ta sẽn kẽ-b kãadmã ye. Sɩd me, a Poll yãka a Tɩmote sẽn da yaa bi-bɩɩg n pa kẽ kãadmã, n kõ-a tʋʋm sẽn tar yõod wʋsgo. * (Fili. 2:19-22) Dẽnd yaa vẽeneg tɩ d sã n dat n yãk saam-biig t’a lebg kãsem-soaba, pa sõma tɩ d tik a sẽn kẽ kãadem bɩ a sẽn pa kẽ kãadem zug bal ye.—1 Kor. 7:32-35, 38.

9. Bõe la d tõe n yeel kãadmã la rakõtã wɛɛngẽ?

⁹ A Zeezi bɩ a Poll zɩ n yeel tɩ yaa tɩlɛ tɩ kiris-ned kẽ kãadem wall a ra kẽ kãadem ye. Woto wã, bõe la d tõe n yeel kãadmã la rakõtã wɛɛngẽ? Yʋʋmd 2012 zĩ-likr kiuugã pipi daar Gũusg Gasgã sẽn leokd sok-kãngã to-to wã bee yamleoogo. B  yeela be yaa: “D sẽn tõe n kẽ kãadmã, la d sẽn tõe n yãk yam n pa kẽ kãadmã yaa Wẽnnaam kũuni. . . . Sã n yaa ne a Zeova, ned sẽn pa kẽ kãadem pa segd get rẽ wa bũmb sẽn yaa yãnde, wall a bas tɩ rẽ sãam a sũur ye.” Woto yĩnga, d segd n nanda d tẽed-n-taas nins sẽn be tigingã pʋgẽ n pa kẽ kãadmã.

10. Bõe la d tõe n maan n wilg tɩ d nanda d tẽed-n-taas nins sẽn pa kẽ kãadmã?

¹⁰ Bõe la d tõe n maan n wilg tɩ d nanda d tẽed-n-taas nins sẽn pa kẽ kãadmã, la tɩ d pa ningd-b taale? D segd n ninga d yamẽ tɩ kiris-neb kẽer yãka yam n pa na n kẽ kãadem ye. Kẽer nongẽ lame n kẽ kãadem, la b nan pa paam ned sẽn zems ne-b ye. Sãnda yaa b pagã bɩ b sɩdã n maan kaalem. Sẽn yaa a soab fãa, tigingã ned tõe n soka a tẽed-n-taag bõe yĩng t’a pa kẽ kãadem, wall a bao n sõng-a t’a paam ned bɩ? Sɩd-sɩda, kiris-neb kẽer tõe n kos-d lame tɩ d sõng-ba. La d sã n bao n na n sõng d saam-biig bɩ d saam-bi-poak t’a yaool n pa kos-do, a manesem tõe n yɩɩ wãna? (1 Tes. 4:11; 1 Tɩm. 5:13) D ges saam-biis la saam-bi-pogs sẽn pa kẽ kãadem sẽn yeel rẽ wɛɛngẽ.

11-12. Bõe n tõe n sãam sẽn pa kẽ-b kãadmã sũyã?

¹¹ Tigims sull yel-gɛt a ye sẽn pa kẽ kãadem, n tar yẽesem wʋsg a Zeova tʋʋmdã pʋgẽ yeelame tɩ f sã n pa kẽ kãadem, nafa wã yaa wʋsgo. La a paasame tɩ d tẽed-n-taag sã n sok-a tɩ “bõe yĩng t’a pa kẽ kãadem,” sãamda sũuri. Saam-biig sẽn tʋmd filiyall a ye pʋgẽ yeelame: “Wakat ninga, m tẽed-n-taasã manesem kɩtdame tɩ yaa wa sẽn pa kẽ-b kãadmã yaa nimbãan-neba. Woto kɩtdame tɩ yaa wa rakõtã yaa zɩɩb la pa Wẽnd kũun ye.”

¹² Saam-bi-poak a ye sẽn pa kẽ kãadem, n tʋmd Betɛllẽ yeelame: “Koe-moondb kẽer tagsdame tɩ neb nins fãa sẽn pa kẽ kãadmã baooda neda, wall tɩ b sã n wa be ne neba, yaa segb b sẽn tõe n tũnug n paam ned n kẽ kãadem. Vugri, m toga sor n kẽng tẽn-kɩrenga, Betɛllã tʋʋm yĩnga. M taa tigsg daar zaabre. Mam sẽn sig saam-bi-poak ning nengẽ wã yeela maam tɩ saam-biis a yiib n be tigingã pʋgẽ n yaa m rog-taase. A yeelame tɩ pa sẽn na n sõng-m tɩ m paam sɩd ye. La d sẽn ta Rĩungã roogẽ wã bala, a talla maam n kẽng saam-biis a yiibã nengẽ, n dat tɩ d sõse. Togs sɩdã, yãndã ra tara maam ne saam-biis a yiibã fãa.”

13. Bõe n keng saam-bi-poak a ye sẽn pa kẽ kãadem raoodo?

¹³ Saam-bi-poak a to sẽn pa kẽ kãadem, n tʋmd Betɛllẽ yeelame: “Mam mii so-pakdb sẽn maan yʋʋm wʋsg n pa kẽ kãadem, n yaa maan-tɩ-zems rãmba, n mi b sẽn dat bũmb ning b vɩɩmã pʋgẽ, n sõngd b taabã ne b sũy fãa, n tar sũ-noog b tʋʋmdã pʋgẽ, la b sõngd tigingã sõma. B tara tagsg sẽn zems rakõtã wɛɛngẽ, n pa tagsd tɩ b sãoo sẽn kẽ-b kãadmã, wall b tagsd tɩ bãmb meng pa tar sũ-noogo, b sẽn pa tar pag bɩ sɩd wall kamb yĩng ye.” F sã n be tiging pʋgẽ tɩ nebã nand taab la b waoogd taaba, yaa sũ-noog tɛkẽ. F miime tɩ f tẽed-n-taasã pa get foo wa nimbãan-neda, bɩ n maand sũ-kiir ne-fo, wall n raag-f n base, pa rẽ bɩ n tags tɩ f sãoo f taabã ye. F miime bal tɩ b nong-f lame.

14. Bõe la d tõe n maan n wilg tɩ d nanda sẽn pa kẽ-b kãadmã?

¹⁴ D sã n nand d tẽed-n-taas nins sẽn pa kẽ kãadmã, b sẽn tar zʋg-sõma yĩng la pa b sẽn pa kẽ kãadmã yĩnga, noom-b lame.  D pẽg-b b wẽn-sakrã yĩnga, la d ra tagsd tɩ b yaa nimbãan-neb ye. D sã n maand woto, b pa na n toll n tags tɩ d yet-b lame tɩ: “Mam pa rat fo sõngr ye.” (1 Kor. 12:21) B na n bãngame tɩ d sɩd nand-b lame, la d getẽ tɩ b tara b zĩig tigingã pʋga.

15. Bõe la neb kẽer maan sẽn na yɩl n moon neb wʋsg koɛɛgã?

¹⁵ Yʋʋma noorã, koe-moondb wʋsg yãka yam n zãms buud-gomd a to, n na n moon neb wʋsg koɛɛgã. Yɩɩ tɩlɛ tɩ b toeem bũmb kẽer b vɩɩmã pʋgẽ. D tẽed-n-ta-kãensã basa tigims sẽn gomd bãmb buudã gomde, n na n tɩ sõng buud-gom-zẽng tigims sẽn dat koe-moondb wʋsgo. (Tʋʋ. 16:9) Yaa bãmb mensã n yãk yam-kãnga, n na n paam n tũ a Zeova sõma n paase. Baa sẽn tõe n kaoos yʋʋm wʋsg tɩ b yaool n wa tõe n gom buud-gom-kãng sõma wã, b tʋmda wʋsg n sõngd tigimsã. B zʋg-sõma wã ne b minimã nafda tigimsã wʋsgo. D nanda d tẽed-n-ta-kãensã sẽn mongd b mens bũmb kẽer saam-biisã yĩngã.

16. Bõe la kãsem-dãmbã tikd n yãk saam-biig t’a lebg kãsem-soab bɩ kãsemb-sõngda?

¹⁶ Saam-biig sã n pa tõe n gom tigingã buud-gomd sõma, pa bʋʋm kãsem-dãmbã sull sẽn segd n tik n pa yãk-a t’a lebg kãsem-soab bɩ kãsemb-sõngd ye. Yaa zʋg-sõma nins saam-biig sẽn segd n bɩɩs n tõog n lebg kãsem-soab bɩ kãsemb-sõngdã la b segd n gese, la pa a sã n gomda tigingã buud-gomdã sõma ye.—1 Tɩm. 3:1-10, 12, 13; Tɩt 1:5-9.

17. Kiris-neb kẽer sã n wa yik ne b zak rãmb n kẽng tẽng a to, bõe la b segd n sok b mense?

¹⁷ Kiris-neb kẽer yika ne b zak rãmb n kẽng tẽng a to, n na n põs zu-loɛɛga, bɩ n na n tɩ bao tʋʋmde. Woto wã, tõe tɩ b kambã na n tɩ karma lekoll b sẽn pa gomd b buudã gomde. Tõe tɩ b roagdbã na n zãmsa tẽngã buud-gomde, sẽn na yɩl n paam tʋʋmde. La tiging bɩ sull sẽn gomd bãmb buud-gomdã sã n beeme, b na n maana wãna? Yaa tigin-bʋg la b na n kẽnda? Segd n yɩɩ tẽngã buud-gomd tiging bɩ, bɩ tiging sẽn gomd b zakã rãmb buud-gomde?

18. Wa Galat rãmb 6:5 sẽn wilgdã, bõe la d tõe n maan n wilg tɩ d saka zak soab yam-yãkre?

¹⁸ Zakã soab n segd yãk zakã rãmb sẽn na n kẽnd tiging ninga. A tog n yãka sẽn na n naf zakã neb fãa. (Karm-y Galat rãmb 6:5.) Sẽn mik tɩ yaa ned fãa ne a yam-yãkrã, d pa segd n ning zakã soab taal ye. Sẽn wa n yaa yam ning fãa la a yãk-yã, d segd n sakame, la d reeg zakã rãmb sõma tigingã pʋgẽ, n wilg tɩ d nong-b lame.—Rom. 15:7.

19. Bõe wɛɛngẽ la zak soab segd n tags sõma la a pʋʋs a Zeova?

 ¹⁹ Wakat ninga, zak rãmb tõe n kẽnda tiging sẽn gomd bãmb mengã buud-gomde, tɩ b kambã yaool n pa wʋmd buud-gom-kãng sõma ye. Tigin-kãng sã n bee zĩig b sẽn gomd tẽngã buud-gomde, tõe n yɩɩ toog ne kambã tɩ b wʋm tigissã võore. La rẽ tõe n kɩtame tɩ b tẽebã pa paam pãng ye. Bõe yĩnga? Bala kambã tõe n kẽnda lekoll sẽn gomd tẽngã buud-gomde, la pa b roagdbã buud-gomd ye. Sã n wa yaa woto, zakã soab segd n kosa a Zeova yam, n bãng b sẽn na n maan to-to n sõng kambã tɩ b paam zood sõma ne a Zeova la a nin-buiidã. B tõe n zãmsa b kambã b roagdbã buud-gomdã sõma, wall b kẽng tiging sẽn gomd buud-gomd ning kambã sẽn wʋmd sõma wã. Sẽn wa n yaa yam ning fãa la zakã soab yãk-yã, tigingã segd n deega zakã rãmb sõma, n wilg tɩ b nand-b lame la b nong-ba.

20. Bõe la d tõe n maan n wilg tɩ d nanda d tẽed-n-taas nins sẽn zãmsd buud-gom-zẽngã?

²⁰ D sẽn yã bũmb ninsã fãa wilgdame tɩ d tẽed-n-taas n be tigims wʋsg pʋsẽ, n maood n na n zãms buud-gom-zẽnga. Tõe n yɩɩ toog ne-b tɩ b sõs ne-d n togs b tagsgo. La d sã n getẽ tɩ zʋʋg b sẽn gomd d buud-gomdã to-to wã, d na n yãame tɩ b sɩd nonga a Zeova, la b tʋll ne b sũy fãa n tũ-a. D sã n ne b zʋg-sõma wã, d na n sɩd nand-b lame la d nong-ba. D pa na n yeel tɩ “mam pa rat fo sõngr ye,” b sẽn pa gomd d buud-gomdã sõma wã yĩng ye.

21-22. Bõe la a Zeova kõ tõnd tɩ yaa d zu-zẽkre?

²¹ D sũur nooma wʋsgo, d sẽn paam t’a Zeova kõ d ned kam fãa tʋʋmd sẽn tar yõod a tigingã pʋgẽ wã. D yaa pag tɩ d yaa raoa, d kẽe kãadem tɩ d pa kẽ me, d yaa bi-bɩɩg wall d yʋʋmã vẽsgame, pa rẽ bɩ d gomda buud-gomd ning sõma wall d pa gomd-a sõma, d fãa tara yõod wʋsg a Zeova nifẽ, la d taabã nifẽ.—Rom. 12:4, 5; Kol. 3:10, 11.

²² D yãame tɩ tʋm-tʋmd a Poll makr ning sẽn gomd ninsaal yĩngã yellã sõngda tõnd tɩ d bãng bũmb wʋsgo. Bɩ d kell n modg n tũ sagl-kãensã fãa. Woto, d na n gũusd n geta d sẽn tõe n maan n keng d tẽed-n-taasã raoodo. Na n sõng-d lame me tɩ d ket n nand d tẽed-n-taasã la d nong-ba.