1. Avyani vino e Yehova wapa awawomvi wakwe awacisinka?

E YEHOVA wapa awawomvi wakwe imilimo ya kuwomba mwi wungwe. Swensinye twacindama nanti aca kuti tukawomba imilimo imilekanelekane mwi wungwe. Umutumwa Paulo watwavwizye sana ukwivwicisya co-o icisinka. Uzye watwavwizye wuli?

2. Ukulingana na Waefeso 4:16, amulandu ci wuno tuzipizile twacindikana nukuwombela ponga?

² Ukulingana ni waliko pano pafumile lyo-o isambililo, e Paulo walanzile sana pa cisinka ca kuti kusi umuwomvi wa kwe Yehova uwili wensinye wino anganena umuwuye ukuti: “Nsakukulonda.” (1 Kor. 12:21) Acino nga tukulonda ukuti mwi wungwe muwe umutende tuzipizile twacindikana nu kuwombela ponga. (Wazyani Waefeso 4:16.) Nga tulemenkine, tulikundana sana swinya iwungwe liliwomelako.

3. Avyani vino twandi tusambilile mwe co-o icipande?

³ Amwinye mumwi muno tungalanjizya ukuti twacindika awanawitu na wankazi mwi wungwe? Mwe co-o icipande twandi tulole vino waeluda wangalanjizya ukuti wacindikana. Swinya twandi tusambilile na vino tungalanjizya ukuti twacindika awanawitu na wankazi awasimbe. Twakwiza tulecelezye nukusambilila vino tungalanjizya ukuti twacindika awanawitu na wankazi wano wakusambilila icitundu cinji.

4. Akusunda ci ukwa pa Waroma 12:10 kuno waeluda wazipizile ukukonka?

⁴ Wa eluda wonsinye wakasontwa nu muzimu uwutele. Nanti aca kuti watawa ni cawila icili conga. (1 Kor. 12:17, 18) Wamwi wakawa awapya pa mulandu wakuti apano wasonsilwe. Ne wanji  wakapotwa ukuwombesya pa mulandu wakulwalilila nu wusongo. Lelo nanti cingawa wo-o, kusi eluda nanti wumwi wino azipizile alola ngati waeluda wanji wano wasyala pasi na cino wakacita. Amuno wonsinye wakakonka ukusunda kwa pa Waroma 12:10.​—Wazyani.

5. Uzye waeluda wangalanjizya wuli ukuti wacindikana swinya amulandu ci wuno ukucita wo-o kucindamizile?

⁵ Waeluda wakalanjizya ukuti wacindikana nga cakuti wakuwika amano kwe vino wa eluda muwuye wakulanda. Ukucita wo-o kwacindama nkaninye maka maka pano wakulanzyanya vino vikumile iwungwe. Amulandu ci? Mulole icasuko mu Ulupungu lwa kwe Malonda ulwa October 1, 1988, lwatili: “Waeluda wazipizile ukumanya ukuti e Klistu angawomvya umuzimu uwutele ukwavwa eluda uwili wensinye ukwelenganya pi waliko limwi lino lingavwa waeluda wonsinye ukupingulapo icete. (Imili. 15:6-15) Nanti ciwe wo-o umuzimu wa kwe Leza wusikwavwa vye e eluda wumwi lelo wukakwavwa waeluda wonsinye.

6. Uzye waeluda wangawombela wuli ponga mukulemenkana, swinya iwungwe likanoncelamo wuli?

⁶ E eluda wino wacindika awawuye akalindilila wanji awalandapo. Swinya asilola ukuti vino walanda avino na wanjinye wafwile ukukonka. Lelo akalanda pe vino akwelenganyapo mukuyicefya. Akawikako sana amano kwe vino waeluda wawuye wakulandapo. Ni cicindamisye aca kuti akawomvya sana ivisinka vya mu mawaliko nu kukonka uwutunguluzi “wa muzya wa cisinka swinya uwa mano.” (Mat. 24:45-47) Waeluda nga wakulanjizya umucinzi nu lukundo pano wakulanzyanya, umuzimu wa kwe Leza wuliwa nawo. Swinya wuliwawavwa ukupingulapo icete pe vino vingawomya iwungwe.​—Jemu. 3:17, 18.

7. Uzye e Yesu walolanga wuli awasimbe?

⁷ Mu mawungwe mwawa awatwalane ni ndupwa. Lelo mwawa na wasimbe. Uzye tuzipizile twalola wuli awanawitu na wankazi awasimbe? Tuzipizile ukukolanya e Yesu vino walolanga uwusimbe. E Yesu asitela atwalepo uwumi  wakwe wonsinye pano wawombanga umulimo wakwe munsi. Watwalilizile ukuwa umusimbe swinya wawisile amano kwe cino wizizile mu nsi. Asitela alandepo ukuti uwili wensinye azipizile ukutwala,, ukutwalwa nanti ukutwalilila ukuwa umusimbe. Lelo walanzile vye ukuti awina Klistu wamwi wangasolapo ukutwalilila mu wusimbe. (Mat. 19:11, 12.) E Yesu wacindisile nkaninye awasimbe. Atawalolanga ukuti watacindama nanti ukuti wayipusulanga vimwi mu wumi wawo.

8. Ukulingana ne 1 Wakorinte 7:7-9, acani cino e Paulo wawomelezizye awina Klistu ukwelenganyapo sana?

⁸ E Paulo nawenye watwalilizile ukuwa amusimbe pano wawombanga umulimo wa kuwizya. Lelo atalanzilepo ukuti aciwipe ku mwina Klistu ukutwala nanti ukutwalwa. Amuno wamanyile ukuti cila muntu azipizile ukuyisolela. Lelo wawomelezizye awina Klistu ukwelenganyapo sana nga wangasolapo ukuwombela Yehova mu wusimbe. (Wazyani 1 Wakorinte 7:7-9.) Ukwasowa nu kuvwilika e Paulo atalolanga awina Klistu awasimbe ukuti watacindama. Ica kuti wasozile nu mwanawitu uwacitici umusimbe e Timoti, ukuwombako imilimo imicindame mu mulimo wa kwe Yehova. * (Flpi. 2:19-22) Fwandi citange cizipe ukupimila umwanawitu ukuti afisilepo ukuwomba imilimo yimwi mwi wungwe pa mulandu wa wusimbe nanti ukutwala.​—1 Kor. 7:32-35, 38.

9. Avyani vino tungalanda pa kutwalwa nu kutwala nga nu wusimbe?

⁹ E Yesu ne Paulo watalanzilepo ukuti awina Klistu wazipizile vye ukwinjila mwi twala nanti ukutwalilila vye ukwikala uwusimbe. Nomba fwandi acani cino tungalanda pa kutwala nanti ukutwalwa nu wusimbe? Ulupungu lwa kwe Malonda ulwa October 1, 2012, lwalanzile icete sana pe co-o icisinka ukuti: “Ukutwala nu kutwalwa nanti uwusimbe vyonsinye avya wupe ukufuma kwe Leza. . . . E Yehova asikwelenganya ukuti awasimbe wazipizile wawa ni nsoni nanti uwulanda pa mulandu wa kuti awasimbe. Co-o cikutwavwa vye ukumanya ukuti tuzipizile twacindika awanawitu na wankazi awasimbe mwi wungwe.

10. Tungalanjizya wuli ukuti twacindika awanawitu na wankazi awasimbe?

¹⁰ Tungalanjizya wuli ukuti tukacindika awanawitu na wankazi pe vino wasolapo ukucita na vino wakayivwa? Tuzipizile twakwizuka ukuti wamwi wasolapo vye aweneco ukwikala  uwusimbe. Wamwi wakalonda ukutwalwa nanti ukutwala nomba watani wazane wino angawayana ukutwalana nawe. Ne wanji wafwilwa umulume nanti umuci. Asa mulandu na cino calenga, cisi acizima ku wa mwi wungwe ukutalika ukuwakolowozya umulandu wuno watani watwalilwe nanti kutwala. Swinya citanga cizipe ukutalika ukuwavwambila wino wangatwalana nawe. Kweni awasimbe wamwi wangaminena ukuti muwavweko mu vya musango wo-o. Lelo nga ca kuti wataminenilepo, cingazipa ukwelenganyapo sana vino umwanawitu nanti e nkazi umusimbe angayivwa nga mwatalika ukucita vino ataminenile. (1 Tes. 4:11; 1 Tim. 5:13) Lekani tuloleko vimwi vino awanawitu na wankazi wamwi awasimbe walandapo.

11-12. Uzye awanawitu na wankazi mwi wungwe wangafupula wuli awasimbe?

¹¹ E kangalila wamuputule wumwi umusimbe wino akawomba icete sana wo-o umulimo akalola ukuti uwusimbe wazipa nkaninye. Lelo walanzile ukuti cisikwivwika icete nga cakuti awanawitu na wankazi wikalizile vye ukukukolowozya ukuti: “Amulandu ci wuno utatwalila?” Umwanawitu wumwi umusimbe wino akawombela pa musambo watili: “Impindi zimwi vino awanawitu na wankazi wakacita vikalenga caloleka ngati awasimbe watanga wawe ni nsansa. Co-o cikalenga uwusimbe waloleka ngati asa cawupe.”

¹² E nkazi umusimbe wino akawombela pa musambo watili: “Awanawitu na wa nkazi mu mawungwe wakalola ngati awasimbe wonsinye wakavwamba vye uwa kutwalana nawe. Nanti ukuti nga wali pa wantu awavule apano wakawa nu longo lwakulola wino angayana ukutwalana nawe. Impindi yimwi pano nayile mukuwomba ku nsi yinji umulimo wumwi, nayile inzanwako mu kulongana kwi wungwe lino lyalongananga uwusiku. E nkazi wino twikalanga nawe wambuzizye ukuti mwi wungwe mwalinji awanawitu wawili awa ciimo cane. Walanzile ukuti atanvwambilanga uwakutwalwako. Nomba twalile twinjila vye mu Ng’anda ya Wufumu wansenzile nu kuntwala kuno kwalinji wa-a awanawitu wawili pa kuti nkawalole. Ala citazifile. Swensinye twivwile vye insoni.”

13. Aca kulolelako ci cino cawomizye e nkazi wumwi umusimbe?

¹³ E nkazi winji umusimbe wino akawombela pa musambo watili: “Namanya wapainiya awasimbe wasongo wano wakawombesya nkaninye. Wa-a awanawitu na wankazi wawika nkaninye amano ku mulimo wuno wakawomba. Swinya wawa ni nsansa ica kuti wakakwavwa na wa mwi wungwe. Wasikwivwa uwuwi pa mulandu wa kuti awasimbe. Wasikwelenganya nu kuti wacindama pa mulandu wa kuti awasimbe. Swinya wasilola nu kuti watanga wawe ni nsansa pa mulandu wakuwa awasimbe nu kukanawa na wana.” Awuli umulandu wuno cazipila ukuwa mwi wungwe muno mwawa awanawitu na wankazi wano wacindikana. Wano wakalola wensinye mwi wungwe ukuti wacindama. Wasikwivwila uluse awasimbe, nanti ukucindicisya wano watwala nanti ukutwalwa. Wasilola nu kuti wumwi wacindama ukucila wanji swinya wasisula awasimbe. Lelo wakalanjizya ulukundo.

14. Tungalanjizya wuli ukuti twacindika awanawitu na wankazi awasimbe?

¹⁴ Awanawitu na wankazi waliwawa ni nsansa nkaninye nga ca kuti tukuwalanjizya ukuti twawacindika pa mulandu ni miwele yawo imizima. Tutazipizile twakwivwila awanawitu na wankazi uwulanda pa mulandu wakuti awasimbe. Lelo tuzipizile twasalifya pe vino wakatwalilila ni cisinka. Nga twacita wo-o, waliwalola ukuti wawa nu mulimo mwi wungwe swinya watalitela wivwe nge tukuwanena ukuti: “Nsakukulonda.” (1 Kor. 12:21) Lelo  walimanya ukuti twawacindika swinya waliwawomba imilimo yawo ni nsansa.

15. Akupiluka ci kuno awanawitu na wankazi wacita pakuti wawombesya mu mulimo wa kuwizya?

¹⁵ Pe yo-o impindi wakawizya awavule wasolapo ukusambilila icitundu cinji pa kuti wawombesya mu mulimo wa kuwizya. Ukucita wo-o kukasanzyamo nu kupiluka mu vivule. Wa-a awanawitu na wankazi wakasya amawungwe kuno wakawomvya icitundu cino wamanya nu kuya mukusambilila icitundu cinji kwi wungwe kuno wakawizya wacepa. (Imili. 16:9) Aweneco nye awano wakayisolelapo ukucita wo-o pakuti wawombele sana e Yehova. Wakakwavwa nkaninye iwungwe kuno wacintila asa mulandu ni myaka yino wangasumba ukumanya icitundu icipya. Imilimo yawo na vino wapitamo vikawomya sana awa mwi wungwe. Tukasalifya nkaninye pe vino wa-a awanawitu na wankazi wakayipelesya!

16. Acani cino waeluda wakawomvya pa kumanya nga cakuti umwanawitu wumwi afisilepo ukuwomba wu eluda nanti uwutumikila?

¹⁶ Waeluda watazipizile ukukana ukusonta umwanawitu pa wueluda nanti pa wutumikila pa mulandu vye wakuti asilanda icete icitundu cino awa mwi wungwe wakawomvya. Lelo wakawika amano pe vino Amawaliko yakalanda pa eluda na watumikila. Asa pe vino akalanda icitundu cino awa mwi wungwe wakawomvya.​—1 Tim. 3:1-10, 12, 13; Tait. 1:5-9.

17. Acani cino awakwasi wangasolapo nga wacintila ku nsi yinji?

¹⁷ Awina Klistu wamwi ni ndupwa zyawo wakasamalila ku nsi yinji pa mulandu ni ntazi munsi yawo. Nanti pamulandu wakuvwamba incito. Nga cawa wo-o, impindi zimwi awana wawo wangatalika ukuya ku sukulu lino likawomvya icitundu cinji ica kwe yoyonye insi. Awakwasi nawo wangatalika ukusambilila co-o icitundu pa kuti wazane incito. Lelo nga cakuti mwi wungwe muno waficizile mwawa ni wumba lino likalanda icitundu ca kumwawo. Umutwe wa lupwa azipizile ukwelenganyapo sana nga angasolapo ukuti wacintile mwi wungwe lino likalanda icitundu ca ku mwawo nanti ukutwalilila ukuwa mwi wungwe lino likalanda icitundu ca munsi yino wacintizile.

18. Ukulingana na Wagalatiya 6:5, tungalanjizya wuli ukuti twacindika vino umutwe walupwa wapingulapo?

¹⁸ Umutwe wa lupwa awino azipizile ukupingulapo iwungwe lino akulonda ulupwa lwakwe lwayako. Lelo azipizile ukwelenganyapo sana vino vingazipila ulupwa lwakwe. (Wazyani Wagalatiya 6:5.) Tuzipizile ukucindika vino umutwe walupwa wapingulapo amuno yo-o amilandu yino cila muntu azipizile ukuyipingulilapo. Tungalanjizya umucinzi nga ca kuti twawapocelela mwi wungwe ni nsansa swinya tukuwalanjizya ukuti twawakunda.​—Roma. 15:7.

19. Avyani vino umutwe wa lupwa azipizile ukwelenganyapo sana nu kupepelapo?

 ¹⁹ Indupwa zimwi zikasolapo ukulongana mwi wungwe muno wakawomvya icitundu ca kumwawo cino awana wawo watamanya nkani. Nga cawa wo-o, lyo awana wawo wangapotwa ukwivwicisya vino wakusambilila mukulongana swinya wangapotwa nu kupalamila kwe Yehova. Amulandu ci wuno cingawatamizya? Amuno awana wangawaya kwi sukulu lino lisiwomvya icitundu ca wakwasi wawo lelo lino likawomvya icitundu ca mwe yoyonye insi. Pa-a apano umutwe wa lupwa azipizile ukwelenganyapo sana nu kupepa kwe Yehova ukuti amupe amano aya kupingulapo icete vino vingavwa awana ukupalamila kwe Yehova na ku wantu wakwe. Awakwasi walipingulapo nampo nga akusambilizya awana wawo icitundu ca ku mwawo nanti ukucintila vye mwi wungwe lino likawomvya icitundu cino awana wawo wakakwivwa. Icili consinye cino umutwe wa lupwa wasolapo, awa mwi wungwe kuno wacintila wazipizile ukulenga awa mu lupwa ukwivwa ukuti wacindama nkaninye mwi wungwe.

20. Tungalanjizya wuli ukuti twacindika awanawitu na wankazi wano wakusambilila icitundu icipya?

²⁰ Ukulingana ni milandu yonsinye yino twalandapo, mu mawungwe mungawa awanawitu na wankazi wano wakwelezya na maka ukusambilila icitundu icipya. Ica kuti cingawawomela nu kulanda vino wakwelenganya. Lelo nga tusakuwika vye amano pe vino wakalanda coco icitundu, tulilola vino wakunda Yehova na vino wakalondesya ukumuwombela. Nga twacita wo-o tuliwawacindika swinya tulimanya ukuti wawa nu mulimo mwi wungwe lya kwe Yehova. Swinya tutalitela tulande ukuti “Ntakukulonda” pa mulandu vye wa kuti watakulanda icete icitundu citu.

21-22. Alongo ci luno twawa nalo?

²¹ Tukasalifya nkaninye e Yehova pa mulandu wa kuti swensinye watupa umulimo wakuwomba mwi wungwe. Asa mulandu na vino twawa nampo nga swe wonsi nanti awanaci, swe wasimbe, wasongo na watici nanti ngatukalanda icete icitundu nanti tusilanda icete, swensinye twacindama nkaninye kwe Yehova na ku wanawitu.​—Roma. 12:4, 5; Kolo. 3:10, 11.

²² Lekani swensinye tutwalilile ukuwomvya vino twasambilila ku cakulolelako cino e Paulo wawomvizye ica muwili. Nga twacita wo-o, tulimanya vino tungawomelezya awanawitu na wankazi. Tuliwalanjizya ukuti twawakunda swinya twawacindika.