1. ¿Tlake tlamantli kinmaka Jehová sejse itekipanojkauaj?

JEHOVÁ tlauel techiknelia, yeka techmaka se tekitl ipan tlanechikoli. Maske amo tijchiuaj sanse tekitl, nochi tlauel topati uan moneki timopaleuisej. Apóstol Pablo techpaleuia ma tijkuamachilikaj ni tlamantli. ¿Kenijkatsa kichiua?

2. Kej kiijtoua Efesios 4:16, ¿kenke moneki tikinpatiitasej uan tikinpaleuisej toikniuaj?

² Kej kiijtoua nopa texto tlen ipan mokixtijtok ni tlamachtili, Pablo kiijtok amo uelis tikitasej se toikni uan timoiljuisej: “Ta axtimoneki” (1 Cor. 12:21). Tlaj tijnekij ipan tlanechikoli ma onka tlaseuilistli, moneki tikinpatiitasej toikniuaj uan tikinpaleuisej (xijpoua Efesios 4:16). Kema toikniuaj sansejko itstokej, moyolchikauaj uan moikneliaj.

3. ¿Tlake tikitasej ipan ni tlamachtili?

³ ¿Ipan tlake tlamantli uelis tijnextisej tikintlepanitaj toikniuaj? Ipan ni tlamachtili tikitasej eyi tlamantli: Se, tlake moneki kichiuasej ueuejtlakamej uan kiampa kintlepanitasej sekinok ueuejtlakamej. Ome, tikitasej kenijkatsa uelis tijnextisej tikinpatiitaj toikniuaj uan tosiuaikniuaj katli amo mosenkajtokej. Eyi, tikitasej kenijkatsa tijnextisej tikinpatiitaj toikniuaj katli ayamo kuali kiyekouaj totlajtol.

4. Kej kiijtoua Romanos 12:10, ¿tlake moneki kichiuasej ueuejtlakamej?

⁴ Maske nochi ueuejtlakamej kintlapejpeniaj ika toTeotsij itonal, amo nochi uelij kichiuaj sanse tlamantli (1 Cor. 12: 17, 18). Uelis sekij ueuejtlakamej namanok kintekimakakej uan ayamo kimatij kenijkatsa mochiua se tekitl uan uelis sekinok ayokmo tlauel tlapaleuiaj pampa ya uejueyij o mokokouaj. Yeka, amo kinamiki yon se ueuejtlakatl kiitas seyok ueuejtlakatl uan moiljuis: “Ta axtimoneki”. Nochi ueuejtlakamej moneki kichiuasej tlen Pablo kiijtok ipan Romanos 12:10 (xijpoua).

5 1) ¿Kenijkatsa ueuejtlakamej kinextiaj kintlepanitaj sekinok ueuejtlakamej? 2) ¿Kenke tlauel moneki kiampa kichiuasej?

⁵ Kema ueuejtlakamej kuali kintlakakiliaj sekinok ueuejtlakamej, kinextiaj kintlepanitaj. Uan ni tlauel moneki kichiuasej kema mosentiliaj uan kiitaj se keski tlamantli ipan tlanechikoli. ¿Kenke? Ma tikitakaj tlen kiijtok La Atalaya, octubre 1, 1988, nopaya kiijtoua: “Nochi ueuejtlakamej moneki kiilnamikisej Cristo uelis kiyakanas se ueuejtlakatl ika toTeotsij itonal uan kiampa kiijtos tlen Biblia tetlajtolmaka, uan ni kinpaleuis ma kisenkauakaj se tlamantli o kema kitlapejpeniaj kichiuasej se tlenijki (Hech. 15:6-15). ToTeotsij itonal kinpaleuia nochi ueuejtlakamej uan amo san se ueuejtlakatl”.

6. 1) ¿Tlake kinpaleuis ueuejtlakamej sansejko ma tekitikaj? 2) ¿Kenijkatsa kinpaleuia toikniuaj ipan tlanechikoli?

⁶ Kema se ueuejtlakatl kintlepanita sekinok ueuejtlakamej kema mosentiliaj, kichiua kampeka amo san ya kiijtos kenijkatsa mochiuas se tlamantli. Nojkia, amo san ya kamanalti uan moiljuia tlen ya kiijtoua eli tlauel kuali. Kema nopa ueuejtlakatl kinekis kiijtos se tlamantli, moneki kinextis amo moueyimati uan moiljuis amo nochi ueli kichiua, uan kuali kintlakakilis sekinok. Yeka, moneki kichiuas kampeka kiitas tlen Biblia tetlajtolmaka uan kichiuas tlen kiijtoua nopa “tlalnamijkatlatekipanojketl” (Mat. 24:45-47). Kema ueuejtlakamej kitlapejpeniaj se tlamantli, uan kinextiaj moikneliaj uan motlepanitaj, toTeotsij itonal kinpaleuia ma kitlapejpenikaj se tlamantli uan kiampa toikniuaj tlen tlanechikoli kuali itstosej (Sant. 3:17, 18).

7. ¿Kenijkatsa kinitayaya Jesús katli amo mosenkajtoyaj?

⁷ Ipan tlanechikoli amo san itstokej toikniuaj katli mosenkajtokej uan katli kinpiaj ininkoneuaj, nojkia itstokej toikniuaj uan tosiuaikniuaj katli amo mosenkajtokej. ¿Kenijkatsa moneki tikinitasej? Ma tikitakaj kenijkatsa Jesús kinitayaya katli amo mosenkajtoyaj. Kema Jesús itstoya ipan Tlaltipaktli amo mosiuajtik, ya mosentlalik san tlajtolmoyauas. Maske amo kema kiijtok se itokilijka monekiyaya mosiuajtis o amo, kena kiijtok se keskij itokilijkauaj amo kinekiskiaj mosenkauasej (Mat. 19:11, 12). * Jesús kintlepanitayaya katli amo mosenkajtoyaj uan amo moiljuiyaya inijuantij amo ininpati o kinpolouayaya se tlamantli ipan ininnemilis.

8. Kej kiijtok Pablo ipan 1 Corintios 7:7-9, ¿ipan tlake tlamantli moneki moiljuisej toikniuaj?

⁸ Pablo nojkia kichijki kej Jesús uan amo mosiuajtik. Maske ya kiampa kichijki, amo kema kiijtok amo kuali tlaj se akajya mosiuajtis. Ya kimajtoya se Cristo itokilijka monekiyaya kitlapejpenis tlaj mosiuajtiskia o amo. Pablo kinpaleuiyaya sekinok ma kiitakaj tlaj ueliskiaj kitekipanosej toTeotsij maske amo mosenkajtoyaj (xijpoua 1 Corintios 7:7-9). Pablo amo kema kinchikoitak katli amo mosenkajtoyaj. Yeka, kitlapejpenik Timoteo katli amo mosiuajtijtoya ma kichiua se keski tekitl ipan tlanechikoli (Filip. 2:19-22). * Yeka, amo kinamiki timoiljuisej se toikni kuali kichiua iteki san pampa mosenkajtok o amo (1 Cor. 7:32-35, 38).

9. ¿Kenijkatsa moneki tikinitasej katli mosenkajtokej uan katli amo?

⁹ Jesús uan Pablo amo kema kiijtojkej se Cristo itokilijka monekiyaya mosenkauas o amo. Uajka, ¿kenijkatsa moneki tikinitasej katli mosenkajtokej uan katli amo? La Atalaya, octubre 1, 2012 kiijtok: “Ni ome tlamantli moneki tikitasej kejuak se nemaktli tlen techmakatok toTeotsij. [...] Jehová amo kinita katli amo mosenkajtokej kejuak se pinaualistli”. Ni techmachtia moneki tikintlepanitasej  toikniuaj katli amo mosenkajtokej.

10. ¿Kenijkatsa uelis tijnextisej tikintlepanitaj katli amo mosenkajtokej?

¹⁰ Moneki tijnextisej tijtlepanitaj tlen kiyolmatij katli amo mosenkajtokej. ¿Kenijkatsa tijchiuasej? Moneki tikilnamikisej sekij toikniuaj kitlapejpenijtokej amo mosenkauasej, sekij maske kena kinekiskiaj amo kipantiaj iuaya ajkia mosenkauasej uan sekij ayokmo kipiaj ininnamik. Maske amo tijmatij kenke kiampa itstokej, amo kinamiki tikintlatsintokisej kenke amo mosenkajtokej yon tikiniljuisej uelis tikinpaleuisej ma kipantikaj ininnamik. Uelis sekij kena techiljuisej ma tikinpaleuikaj. Yeka, tlaj techiljuiaj o amo, moneki achtoui timoiljuisej kenijkatsa kiyolmatisej (1 Tes. 4:11; 1 Tim. 5:13). Ma tikitakaj tlake kiijtojtokej se keski toikniuaj.

11, 12. ¿Tlake tlamantli ueliskia kinyolkokos katli amo mosenkajtokej?

¹¹ Se toikni katli tepaxaloua chijchikuasej metstli uan amo mosiuajtijtok, kiijtoua tlauel kuali tlaj kiampa tiitstosej. Maske kiampa kiijtoua, kemantika moyolkokoua pampa sekij toikniuaj kiiljuiaj: “¿Kenke amo timosiuajtijtok?”. Se toikni katli tlatekipanoua Betel uan nojkia amo mosiuajtijtok kiijtoua: “Kemantika nimoiljuia sekij toikniuaj amo kuali kinitaj katli amo mosenkajtokej, kiitaj kejuak eliskia se tlamamali uan amo kiitaj kej se nemaktli tlen toTeotsij techmakatok”.

¹² Se tosiuaikni katli tlatekipanoua Betel uan amo monamiktijtok kiijtoua: “Miakej toikniuaj kiijtouaj nochi katli amo mosenkajtokej kinekij mosenkauasej. Nojkia kiijtouaj kema techtlaneuij timijtotitij, tiauij pampa timoiljuiaj uelis tijpantisej se akajya katli iuaya timosenkauasej. Se tonali nechtitlankej ipan seyok altepetl, uan kema niasito onkayaya tlanechikoli. Nopa tosiuaikni katli iuaya nimokauaskia ichaj, nechiljuik ipan itlanechikol itstoyaj omej telpokamej katli kipixtoyaj noxiui. Maske nechiljuik amo kiijtok nopa san pampa kinekiyaya nechpaleuis ma nijpanti se akajya, kema tiasitoj tlanechikoli nechmaitskik uan nechuikak kampa itstoyaj nopa telpokamej. Na, uan nopa telpokamej tlauel tiixpinajkej”.

13. ¿Tlake tlamantli kipaleuik se tosiuaikni?

¹³ Seyok tosiuaikni katli tlatekipanoua Betel uan amo monamiktijtok kiijtoua: “Nikinixmati toikniuaj katli elij precursores uan amo mosenkajtokej. Inijuantij kuali tlatekipanouaj, kinpaleuiaj sekinok uan tlauel yolpakij. Inijuantij kiitaj kej kinamiki, yeka amo moyolkokouaj yon amo moueyimatij pampa amo mosenkajtokej yon pampa amo kinpiaj ininkoneuaj”. Tlauel tiyolpakis kema ipan tlanechikoli mitstlepanitasej, mitspatiitasej, amo mitsyolkokosej, amo mitschikoitasej yon amo mitsueyichiuasej san pampa amo timosenkajtok o kena. Kema kintlepanitaj toikniuaj, nochi kuali kiyolmatij.

14. ¿Kenijkatsa tijnextiaj tikintlepanitaj toikniuaj katli amo mosenkajtokej?

¹⁴ Toikniuaj katli amo mosenkajtokej kitlaskamatij kema tijpatiitaj nopa kuajkuali tlamantli tlen kinextiaj uan amo tikinyolkokouaj san pampa amo mosenkajtokej. Ma tijpatiitakaj pampa kiampa itstokej uan amo ma tikinteikneltiitakaj. Tlaj tikinpatiitasej amo kema kiyolmatisej kejuak tikiniljuiaj “ta axtimoneki” (1 Cor. 12:21). Yeka, ma tikintlepanitakaj uan ma tikinpatiitakaj pampa ipan tlanechikoli inijuantij nojkia kipiaj se tekitl.

15. ¿Tlake tlamantli kichijtokej se keski toikniuaj uan kiampa nojua tlauel tlatekipanouaj?

¹⁵ Ipan ni tonali, miakej toikniuaj kichijtokej kampeka kiyekosej se tlajtoli uan kiampa nojua tlauel tlajtolmoyauasej. Yeka, kipatlatokej se keski tlamantli. Nama itstokej ipan seyok tlanechikoli kampa kamanaltij seyok tlajtoli pampa monekij tlajtolmoyauanij (Hech. 16:9). Ni tlamantli san inijuantij kitlapejpeniaj. Maske amo nima kiyekouaj nopa tlajtoli, tlauel tlapaleuiaj ipan tlanechikoli. ¿Kenke? Pampa kinextiaj kuajkuali tlamantli uan ika tlen kiyekojtokej, kinyolchikauaj toikniuaj. ¡Tlauel tijpatiitaj tlen kichiuaj!

16. ¿Tlake moneki kiitasej ueuejtlakamej kema kitekimakasej se toikni?

¹⁶ Ueuejtlakamej amo kinamiki kiijtosej se toikni amo uelis kitekimakasej kej ueuejtlakatl o tlapaleuijketl san pampa ayamo kuali kamanalti inintlajtol. Kema se akajya kitekimakaj kej ueuejtlakatl o tlapaleuijketl, ueuejtlakamej moneki moyakanasej ika tlen Biblia tlamachtia uan kiitasej tlaj kena uelis tlatekipanos, uan amo san pampa ayamo kuali kamanalti se tlajtoli (1 Tim. 3:1-10, 12, 13; Tito 1:5-9).

17. ¿Tlake moneki kitlapejpenisej tetajmej uan ininchampoyouaj kema yauij ipan seyok altepetl?

¹⁷ Se keskij tetajmej ininuaya ininchampoyouaj yajtokej ipan seyok altepetl pampa momanauitoj o pampa tekititoj. Yeka, uelis tetajmej monekis kiyekosej nopa tlajtoli tlen nopaya kamanaltij uan kiampa kipantisej tekitl, uan ininkoneuaj uelis nojkia monekis kiampa kichiuasej, kiampa uelis momachtisej. Nama, ¿tlake kichiuaskiaj tlaj kampa itstokej onka se tlanechikoli o mosentiliaj se keskij tlen kamanaltij inintlajtol? ¿Monekis yasej kampa kamanaltij inintlajtol o tlen kamanaltij ipan nopa altepetl?

18. Kej kiijtoua Gálatas 6:5, ¿kenijkatsa tijnextiaj tijtlepanitaj tlen kitlapejpeniaj tetajmej?

¹⁸ Tetajmej moneki kitlapejpenisej ipan tlake tlanechikoli yasej. Yeka, moneki kuali moiljuisej tlake tlamantli kinpaleuis ininchampoyouaj (xijpoua Gálatas 6:5). Kema tetajmej kitlapejpeniaj tlen kichiuasej, moneki tijtlepanitasej tlen kitlapejpenijkej uan kuali ma tikinselikaj ipan tlanechikoli (Rom. 15:7).

19. ¿Tlake moneki kichiuasej tetajmej tlaj ininkoneuaj amo kuali kikuamachiliaj se tlajtoli?

¹⁹ Uelis se keskij tetajmej ininuaya ininchampoyouaj itstokej ipan se tlanechikoli kampa kamanaltij inintlajtol tetajmej. Tlaj ininkoneuaj momachtiaj ipan nopa altepetl uelis amo kuali kikuamachiliaj inintlajtol tetajmej, yeka uelis ouij kikuamachiliaj tlanechikoli uan amo kuali tlaneltokaj. Yeka, tetajmej moneki momaijtosej uan kuali moiljuisej kenijkatsa kinpaleuisej ininkoneuaj  uan kiampa kuali mouikasej ika Jehová uan itlanechikol. ¿Tlake moneki kichiuasej? Moneki kinmachtisej ininkoneuaj nopa tlajtoli tlen tetajmej kamanaltij o yasej ipan seyok tlanechikoli kampa ininkoneuaj kikuamachilisej. Yeka, tlaj kitlapejpenisej yasej ipan seyok tlanechikoli, tetajmej ininuaya ininchampoyouaj moneki kuali kiyolmatisej ika tlen kitlapejpenijkej.

20. ¿Kenijkatsa tijnextiaj tikintlepanitaj katli kiyekouaj se tlajtoli?

²⁰ Tikitstokej ipan miak tlanechikolmej kenijkatsa toikniuaj kichiuaj kampeka kiyekosej se tlajtoli. Moneki tijpiasej toyolo ika toikniuaj katli ayamo kuali kamanaltij totlajtol, kiampa tikitasej kenijkatsa inijuantij tlauel kiikneliaj Jehová uan nelia kinekij tlatekipanosej. Tlaj kiampa tijchiuaj, techpaleuis ma tikinpatiitakaj uan ma tikintlepanitakaj, uan amo timoiljuisej inijuantij amo techpaleuiaj san pampa amo kuali kamanaltij totlajtol.

21, 22. ¿Kenke tlauel tijtlaskamatij Jehová?

²¹ Tijtlaskamatiliaj Jehová pampa nochi techmakatok se tekitl ipan tlanechikoli. Ma tikilnamikikaj ni tlamantli: tlaj tielij tlakamej o siuamej, timosenkajtokej o amo, titelpokamej o ya tiuejueyij uan tlaj kuali tikamanaltij se tlajtoli o amo, Jehová tlauel techpatiita, uan nojkia toikniuaj (Rom. 12:4, 5; Col. 3:10, 11).

²² Tlauel techpaleuijtok nopa neskayotl tlen Pablo kitekiuik kema kiijtok tielij kejuak itlakayo se maseuali. Tlaj tijchiuaj tlen timomachtijkej, tikitasej kenijkatsa uelis tijnextisej tijpatiitaj nopa tekitl tlen tijpiaj uan tlen kipiaj sekinok toikniuaj ipan Jehová itlanechikol.